共渡時艱

給財政司司長: 5.x% 都已經四十幾萬，一年都五百幾萬，夠買一間豪宅咁大把! 果然係好似你當年咁講無乜作用。

給公務員: 如果你有私人機構咁問責又唔收長糧，我又唔介意你凍薪呀!

正生事件

梅窩居民做咗壞人，但其實係政府咨詢不足，依家基本上係撕裂咗梅窩居民同正生書院嘅關係。學校就算搬咗入去梅窩，班學生都有排受。

好多點

星期六响地鐵見到 eee PC Shell, 話咩多點觸控，咦?! Multi-touch screen 呼? 今日一睇個 spec, 原來係個 multi-touch 嘅 touchpad, 好無聊... 個 touchpad 亦都凹凹凸凸，好多點。

換護照

第一個十年，响英國申請，唔知去咗邊。
第二個十年，响香港申請，唔知幾錢，不過好硬正，所有資料都係手寫。

第三個十年，响美國申請，盛惠 73.1 美金，Paper back cover, 資料都係電腦打印。

第四個十年，响香港申請，成 1430 港紙 (好彩英磅平時換，過多一兩日個價錢已經係1620)，Paper back cover, 資料電腦打印外，加埋晶片，真係高科技。

局外人

去維園，唯一目的，影 time lapse, on the record.

19:20
無雨，拎腳架出發。

19:30
天后地鐵站，好多人，今日唔係星期日或者公眾假期，但都係為咗同一個目的地。四部扶手電梯，二上二落，點知地鐵職員竟然停咗一部上嘅?!

19:45
要高空拍攝，唯一地點，係中央圖書館去維園嘅天穚，點知有警察、保安駐守，天穚邊放晒鐵馬、唔俾用腳架、影完要走云云。把心一橫，衝入維園，求其搵個無乜人嘅位影。

20:15
身後越企越多人，突然有人衝去腳架面前坐，OK, 係應該讓局內人，但要顧住個腳架，所以無乜心情真係去參與。但係就因為欠缺參與嘅熱情，見到其他週邊嘅嘢。聽著台上講者嘅激情呼喊、前學運領袖嘅朗誦，看著點點燭光，想著是香港人的三分鐘熱度，還是二十年的執著。

22:00
隨著活動到了尾聲，相機電池亦耗盡，收拾架生，多謝特區政府俾我一個咁好嘅攝錄提材，七月一日可以上天穚影 time lapse 了。

這個年紀的我，不再是熱血的青年，悼念不是我今晚的目的，但偏偏在熱血的年代，沒有到過維園悼念六四。

六四的二三事

中國政府响一九八九年六月四號做出一件無可原諒嘅事。

原來入境處覺得學運領袖或藝術家比 H1N1 流感患者可怕，更危害公眾安全。
原來《天安門》係一部醜化學生領袖嘅紀綠片。
原來溫總當年係企响趙紫陽旁邊勉勵學生。
原來好多人都無忘記六四呢件事。

P.S.: 有人用 Beyond 嘅《抗戰二十年》紀念六四，但我覺得呢首歌係屬於家駒。

空倉

今日手痕，賣咗大部份股票，埋單計平均蝕 20% 左右。家陣先發覺，原來股票佔組合唔係太大份。

800

原來呢幾個月 100 100 咁上，今日嘅特別操作實在太特別。

Shane's Production 2.0

作品原來唔止得 Video, 種類比想像中多，為咗要集中所有作品，就用咗 Yahoo! Pipes 去完成成件事，有埋Landing Page. 再用 Microsoft Popfly 做咗個 iGoogle Gadget. 玩得最癲都係今次。

另一個問題係原來 Facebook 個 RSS Notes Import 係唔會 display thumbnail. Publish 出嚟嘅 news feed 完全唔靚。用咗好多方法試，都做得唔好。直到，嘗試 Links 嘅個 feature, 咦?! 竟然做到想要嘅較果，blip.tv 嘅 video 可以出到 thumbnail 之餘又可以 embed 埋 video player, 唔駛一片兩 post, very good! 最後，鏟晒所有 news feed, 重新逐條 link post 返上去，大功告成!

Mr. Lau

How do you do Form 1A, how do you do~
Is there anything that I can do for you~
I am very welcome you and I hope you like me too~
How do you do Form 1A, how do you do~

中一上音樂堂，Mr. Lau 第一首教我哋嘅就係呢首歌，音樂感染了整個班房的氣氛。後來入咗 Choir, 學讀拉丁文去參加歌唱比賽、上港大表演、响聖誕節到聖堂唱子夜彌撒、去感恩節晚會唱歌俾全校聽，每一幕都覺得音樂係一件開心嘅事。佢對音樂嘅熱誠，係令人感動，只可惜嘅係，一兩年之後，响學校再見唔到 Mr. Lau. 好似話去咗第二間中學教音樂，再聽唔到 Mr. Lau 嘅歌聲、說笑聲，亦見唔返佢嗰縶藝術家嘅鬍鬚，中學時偶爾會諗起佢，但之後都好似無再諗過，留低嘅，大概就只有 Choir 嘅歌譜。Panjenigua, Bless this house, I am a bliss, 做個開心健康人。

今日之後，亦都再見唔到，原來响我哋營營役役嘅時候，佢已經完成碩士、再進修博士，同時繼續將音樂帶俾好似我以前咁嘅中學生。我雖然唔係天主教徒，但係希望你可以响主懷安息，用你嘅歌聲、笑聲為天堂再多加一點喜樂。多謝你當年的教導，劉繼智老師、劉 Sir, Mr. Lau.

Bless this house, Oh Lord we pray
Make it safe by night and day
Bless these walls so firm and stout
Keeping want and trouble out

Bless the roof and chimneys tall
Let thy peace lie over all
Bless this door that it may prove
Ever open to joy and love

(Bless these windows shining bright)
(Letting in God’s heavenly light)
Bless the hearth, a-blazing there
With smoke ascending like a prayer

Bless the people here within
Keep them pure and free from sin
Bless us all that we may be
Fit Oh Lord to dwell with thee
Bless us all that we, one day, may dwell
Oh Lord, we pray

P.S.: 估唔到寫完會流眼淚，但文章寫完，眼淚流乾，心情舒暢，因為一天的苦足夠一天受的了，明天又是新的一天。
P.P.S: Mr. Lau 依家叫做 Dr. Lau 了

擔遮手則

大遮讓細遮，有遮讓無遮，有瓦遮頭收埋把遮。

溫水煮蛙 3

溫水煮蛙講緊身邊嘅事慢慢改變，到有一日變成危險時已經太遲。現實中，溫水煮蛙嘅時候，當水到達某一個溫度，青蛙係會逃生，並唔會活生生煮熟而唔知發生乜事。呢個系列嘅重點，係將生活上見到嘅改變記低，以作日後參考。

污染:
好鐘意影日落，今日搵返以前嘅作品，發覺一件令人好遺憾嘅事。
同一個地方用同一部機响差唔多嘅角度影出去，發覺空氣污染得好犀利。1999 年個太陽差唔多落到海先會唔見，顏色重有三重層次，但 2005 年响半空個太陽就已經唔見咗，而且顏色灰矇矇，雖然係兩張唔同嘅 capture card, 但無埋由差咁遠。

1999年	2005年

今年同第一次影剛剛好相隔十年，可以再影多一次，睇吓會差成點。

Shane's Production

原來响大學畢業之前都整咗唔少影片，今日整理咗唔少，加埋之前影落嘅，放响一個 Playlist 度。


會响 http://media.shaneng.net/ 做不定期嘅 update.

Read Between The Lines

曾任權話國家廿年嚟嘅繁榮倡盛同改變，造福今日嘅香港。即係話香港人係靠六四先有今日，亦即係話香港人無用要靠北京政府接濟。

心理作用

流感，好多人會戴口罩，但又好多人會戴錯。好多人戴完又凸出個鼻抖氣，病毒由鼻自由進出。好多人用手掂完個口罩唔洗手，之後隻手週圍揩。

口罩，俾人感覺安全嘅感覺，但其實危機依然存在。

小甜甜

如果龔如心深信王德輝在生，又點會同陳振聰攪關係，根本唔合邏輯。雖然「愛」呢件事係無邏輯可言，但係同時愛兩個人喎? 你信唔信?

型唔型?

唔知幾時，多咗隻豬型流感。我哋遲 D 會唔會講禽型流感? H1N1 型流感? 流感真係咁型?

卸責

如果卸責可以少 D 嘢做
如果卸責可以搵多 D 錢
如果卸責可以成家立室
如果卸責可以長生不老
如果卸責可以改變一切

但係卸責改變唔到任何事。There are all kinds of mistakes leading to the problems, anyway. Why don't I just solve the problems?

萬宜水庫

友人抽起條筋去行山、觀石、影相。晨早搭車去地鐵站，再轉巴士，再坐的士。先去水庫大壩，望一望 D 六角柱形嘅石，相傳就係呢 D 成億年歷史嘅石柱，令到遲 D 會有地質公園。再落防波堤、賞天池、入海蝕洞，好多「到此一遊」嘅塗鴉，同埋想洗走塗鴉嘅痕跡，簡直係雙重破壞。攀上防波堤，對住大海，又一番景象，太平洋嘅水流，不敵垃圾嘅堆積，唔少沖咗上岸。揹住背囊，重心有少少唔平衡，加上畏高，腳仔軟，落嚟時驚險萬分。

上返東壩壩頂，食咗個輕便嘅午餐，行返出去。沿途遮陰地方甚少，加上要避車，都幾辛苦吓。行咗個半鐘去到西壩，大家又拎部相機出嚟玩，一玩又用半個鐘，先行完短短嘅西壩。之後，見到好多的士開始衝入東壩接人走。不經不覺又行咗個半鐘，出到馬路，遇到分叉位，正當大家都猶疑行邊條路嘅時候，一架巴士突然响巴士站出現，所有人都用最後嘅力飛奔上前。

出返市區，第一件事係去洗手間洗手、沖面等，之後就搵食醫肚。食完飯，閒逛電器舖後，又各自歸家。返到屋企，發覺條頸又紅又痕，原來唔記得搽防曬落條頸度，呢幾日有排受。

Go to gallery


後記: 途中有人問 D 標距柱之間嘅距離係幾多，一開始估 100 米，發覺唔妥，之後又估 200 米、400 米等。响康文署嘅網頁 (http://www.lcsd.gov.hk/healthy/hiking/b5/safety.php) 最尾一段提到係每 500 米一條，不過會因環境因素稍做調節 (http://www.afcd.gov.hk/textonly/tc_chi/country/cou_how/cou_how_vis/cou_how_vis_cpvlg/22cpvlg.html)。

每日一字 3

Pandemic - 中譯: 普遍流行的、蔓延全國 [世界] 的

1666, from Gk. pandemos "pertaining to all people," from pan- "all" + demos "people" (see demotic). Modeled on epidemic. The noun is first recorded 1853, from the adj.

由三個希臘字根
pan-: 解 所有，例如: 仙丹=panacea, 即係有病醫病，無病強身嗰 D. 又或者 全景圖=panorama
dem-: 解 人，例如: 民主=democracy, 人民自主。另一個例子 人口統計學=demography
-ic: 形容詞

Pandemic 字面解，即係個病可以感染所有人...

Déjà vu 2

當年陳馮富珍日日食雞安定人心，今日周一嶽又話可以安心食豬。豬嘅基因，比雞嘅基因更接近人類。信? 唔信?

每日一字 2

Flu - 中譯: 感冒, 係 influenza 嘅簡稱

字源

1743, borrowed during an outbreak of the disease in Europe, from It. influenza "influenza, epidemic," originally "visitation, influence (of the stars)," from M.L. influentia (see influence). Used in It. for diseases since at least 1504 (cf. influenza di febbre scarlattina "scarlet fever") on notion of astral or occult influence. The 1743 outbreak began in Italy. Often applied since mid-19c. to severe colds.

以前有禽流感，依家有豬流感。
Bird Flu - 禽流感，正式 D 叫 Avian Flu. Avian 係 Aviary 嘅形容詞，字根係拉丁文嘅 Avis. 係希臘文 Aietos 衍生出嚟，解做鷹。
Pig Flu - 豬流感，又或者 Swine Flu. Swine 係嚟自古英語 Swin, 即係豬。咁 Pig 係豬，Swine 又係豬，有乜分別? 原來 Pig 由古英語 Picg 演化出嚟，係小豬，Swin 係成年嘅豬。

每日一字 1

Dialysis - 中譯: 透析

字源

1586, from Gk. dialysis "dissolution, separation," from dialyein "dissolve, separate," from dia- "apart" + lyein "loosen." Used originally in logic and grammar; chemistry sense is first recorded 1861, medicine 1914.

大概係指分開一 D 嘢。

對腎病人嚟講，因為腎功能衰退，要分開嘅，就係血液中嘅雜質同廢物。透析分兩種

• Hemodialysis: 俗稱洗腎，其實係洗血，中譯血液透析。Hemo- 解血，例如紅血球係 Hemoglobin
• Peritoneal Dialysis: 俗稱洗肚，中譯腹膜透析。Peritoneum 係腹膜，Peri- 解圍繞例如圓周係 Perimeter. Toneum 由希臘文 teinein 轉化成，字根為 ten- 解作收縮例如緊張係 Tense。照咁解，腹膜原來係好實咁包住你 D 內臟，等內臟唔會亂咁走位嘅器官。

Game Theory

Traditional applications of game theory attempt to find equilibria in these games. In an equilibrium, each player of the game has adopted a strategy that they are unlikely to change.

今朝去灣仔見客，發現兩件 D 好得意嘅事情
1. 金鐘一大班人上車，全部都係灣仔落車，即係地鐵設計有問題，點解當年要用金鐘轉車?
2. 體現到博奕論, 原來地鐵上車大家係玩緊一個遊戲:
　　i. 如果大人繼續上車，架車就唔會閂門。
ii. 架車要上唔到，先至唔會有人再迫上去。
對於一班只係搭一個站嘅乘客，最緊要自己上車上得快，架車閂門閂得快，走又走得快。但無理由吓吓都要成車人，迫到沙甸魚咁先開車。而最快令架車閂門嘅方法，就係企响門口，唔俾人入，坐緊嘅人亦唔會叫企响車門嘅人企入少少。出面嘅人入唔到，車門就會閂，架車就會開。所以車廂中間係好空吓，但係架車都會開走。咁令到坐緊嘅人繼續舒服咁坐，企緊嘅人只係企一個站就走人，完全平衡到車入面嘅人目的。

Generation Y

電視話 1975 至 1980 年出世嘅係 Y世代，跟住搵個廿幾數嘅0靚妹同剛剛畢業嘅大學生嚟講，話家陣後生仔工作同生活態度差云云。咦，貨不對辦，係講緊後生仔衣食無憂嘅生活咋喎! 係人都想衣食無憂，但係生活要苦過，先至會努力令自己未來生活無咁苦。

電視中所見，都係屋企大把，未捱過苦，空有夢想嘅人。

Web 2.0

Web 2.0 出現咗好耐，呢個係一個社會科學嘅名詞，大概指用家一般所得嘅資訊再唔係主要由網站提供，而係由其他用家提供，而用家其實不知不覺咁提供咗資訊俾其他用家。例如 YouTube, Wikipedia, Facebook. 呢 D 網站只係俾個平台用家發佈資訊，例如影片、知識、個人 Update.

呢 D 由其他用家提供嘅資訊，會令人上癮，令到原來每日上 Facebook 或 Blogger 一次，變成每日兩次，甚至每個鐘一次，就好似 anti-virus 嘅 signature update 咁，或者係以前用 email 咁。呢 D 响心理學上叫 Internet Addiction. 如果你唔上網會失眠、心煩、多疑、甚至無端白事大力閂門，你要嘅唔係太太口服液，而係去注意自己上網嘅習慣。

又或者聰明 D, 唔駛次次都要上去 YouTube 或者 Facebook, 呢個世界有 RSS, Subscribe 咗佢入 Google Reader 或者 IE, 有 Update 就好似 email 咁，會話過你知。

溫水煮蛙 2

溫水煮蛙講緊身邊嘅事慢慢改變，到有一日變成危險時已經太遲。現實中，溫水煮蛙嘅時候，當水到達某一個溫度，青蛙係會逃生，並唔會活生生煮熟而唔知發生乜事。呢個系列嘅重點，係將生活上見到嘅改變記低，以作日後參考。

PDA:
以前有部 Palm m505. 用嘅係紅外線 beam data, graffiti 去寫字，所有事都好簡單。自從用咗部 HTC Touch, 好似無以前咁方便，要做少少記事，要開機開 program, 唔似得以前咁一個掣拎起技 stylus 就寫得字。以前用 IR 去 beam data, 全無 security 嘅問題。依家 send data 去第二部機，要開 bluetooth, set 密碼，攪一大輪。

手機功能越嚟越多，但係方便程度越嚟越低，究竟科技係進步咗定退步咗?

由泰國示威到六四

泰國示威，攪到關系區內經濟嘅果盟會要取消，點知啊菲律賓駐泰國大使個話：「我們已見慣這裏的示威場面。」

東盟十個成員國有汶萊、柬埔寨、印度尼西亞、寮國、馬來西亞、緬甸、菲律賓、新加坡、泰國、越南，唔知點解今次會議係都要响近排邋邋亂嘅泰國，上年反他信嘅人攪完攪到要延期，今次到支持他信嘅人攪到要取消，係各國政府有心唔開會而唔去改地點? 定係各國都已經見慣呢 D 場面，覺得無所謂 (我相信新加坡一定睇唔慣)?

香港更加唔駛講，當年一班韓農就攪到警察忙過不停，社民三子响議會內嘅抗爭亦攪到市民熱血沸騰、高官頭痕。激進有一定嘅票房，尤其經濟唔好嘅時候。但當二十年前，一班熱血學生，响天安門爭取民主嘅時候，今天又有幾多個記得當時嘅情形?

我記得當天報紙登出照片中，北京長安大街上個個血流披面，港大學生會會長陳一諤呢幾日俾各方人士斥其不是。但係响 YouTube 見到，佢講嘢只係無知，企圖去製造一個討論環境。「究竟嗰條屍體係解放軍定平民，我哋唔知道」俾人引用咗唔少次，但睇埋前文後理，睇法可以好唔同。好多嘢，要自己睇過先知道真相，靠新聞報道真係蛇都死。但今次一攪，六四晚會應該又會多 D 人，多謝陳同學嘅犧牲。

又一名

又一位舊同事結婚，可喜可賀。今次用新相機影相，用 CMOS 感光果然係 Noise 多咗 D.

另外，又發現一個趨勢，話說一對新人要切結婚蛋糕，攝影團隊就佈署响台下。結果，成個過程都係做俾攝影師睇，台下根本睇唔到。回想起咁多次喜宴，似乎都真係攝影團隊擺住對新人嘅多，親朋戚友要見對新人就只係影相、敬酒、同送客嗰陣先見到。

Anyway, 今次天才表演係新郎哥唱歌俾新娘子聽，點知跌咗 Watt. 新郎哥平時唱 K 都好強吓，開始時可能緊張得濟，未去到平時嘅水平，之後回勇，新娘子睇落好冧吓。

(我估天才表演呢個環節，無論新郎哥表現得好唔好，新娘子都會冧。)

最後，都係要恭喜呢對新人，祝百年好合，夫唱婦隨!

Go to gallery

最壞日子

今次金融海嘯恆指低見 10676, 金融風暴之後開始嘅升勢守得住。如果一路 keep 住呢個勢，最壞嘅日子已經過咗。如果守唔住，咁就要睇返 87 股災個勢，即係 5000 左右...

下一站係 15600?

香港死了嗎?

友人說：「香港已死。」呢個可能係事實，但我對事實無興趣，我對原因有興趣，咁我又睇睇香港嘅死因。

唔知幾時，中央政府稱謂由中央變咗啊爺。即係話香港政府係孫仔，要聽爺爺話，爺爺會俾糖過你食。真係發神經，香港响九七前唔駛靠英國創造經濟奇蹟，成為亞洲四小龍，今天竟然要攤大手板問啊爺攞糖食?!

鄧小平當年嘅「河水不犯井水」去咗邊? 一國兩制留底嘅就只係「五十年不變」，俾上海慢慢追乎? 香港嘅管治班子有好大問題，環顧回歸前嘅高官到今時今日都係同一班人，只係個話事人變咗做香港人，跟住香港人覺得自己話唔到事，由來「港人治港」，變咗「京人治港」。行政主導以乎無咗制衡，出咗事囉!

再睇多一步，英國人做完官就返老家養老，香港人做完官竟然可以响私人公司做管理層! OK, 原來退休對公務員嘅定義同普通人嘅定義咁唔同，即係政府有年齡歧視，唔準超過 60 歲嘅人做公務員。所謂瓜田李下，究竟公務員「退休」前做過 D 乜得到私人企業嘅青徠?

另外，點解到今日同回歸前嘅管治班子都差唔多係同一班人? 呢班係既得利益者? 一班坐响高位又無乜嘢做嘅人 (so far 五十年不變，唔覺佢哋做過乜)，我哋叫老屎忽。

即係香港嘅死因，係因為一班老屎忽响回歸後，响無足夠嘅監察同制衡下，退休前唔知做咗乜退休後俾人挖角，未退休嘅又唔做嘢食老本，剩係識聽啊爺話，摧毁咗鄧小平偉大嘅一個兩制，攪到香港邋邋亂，最後，死咗...

Impulse

買嘢係靠一種衝動，今日去時代廣場逛吓格吓價。Ricoh 部相機比依家用緊嗰部真係爽好多，即刻入手，但係黑色同銀色都賣晒! 無貨可以原諒，點知個 sales 夠膽死拎部粉紅色俾我! What the hell?! 所有買部機嘅慾望無晒...

目標轉移到 Fujitsu 部 netbook, 拎响手嘅感覺係唔同 D, 但係 keyboard arrangement 有少少怪，個 full-stop 竟然擺响個 space 隔籬，即係打網址嗰陣會 www 之後要搵返個 dot 先可以繼續打，唔係咁接受到。不過個 keyboard 夠細，可以好以打 PSP 咁兩隻手拎住嚟打 email 之類，插咗支 USB modem 都唔會阻到。可惜叉滿電只可以用一兩個鐘，即係要帶個火牛出街，雖然個火牛好輕，但一來唔係週圍都有得插插蘇，二來火牛 D 線又麻麻煩煩咁，呢個都係等吓先。

跟手去咗 Diving Adventure 買咗支電筒同相機繩，下次潛水有得用!

Community Intelligence

意大利發生地震，有專家話預測到，但原來意大利人嘅睇法有少少唔一樣

It was in fact chance. I'm italian and saw the interview in which he alledgedly predicted the earthquake, he didn't, he said something very inconclusive that now is interpreted as a prediction.

That person is in fact predicting an earthquake every week. Abruzzo is a very active seismic area in Italy, and just by chance he was dramatically right this time.

In fact this person is insulting the people who lost everything in that earthquake, because he's riding the wave of his alledged prediction.

I'm disgusted by this kind of charlatans.

新聞報導無全面嘅觀點，靠嘅就只有民間消息來源。

溫水煮蛙 1

溫水煮蛙講緊身邊嘅事慢慢改變，到有一日變成危險時已經太遲。現實中，溫水煮蛙嘅時候，當水到達某一個溫度，青蛙係會逃生，並唔會活生生煮熟而唔知發生乜事。呢個系列嘅重點，係將生活上見到嘅改變記低，以作日後參考。

香口膠:
一向有食香口膠嘅習慣，去開萬寧買益達一排10片裝嘅香口膠，只係 $6.5, 比百佳嘅 $6.9 平。新年開始，賣 $4.5, 之後食開嘅薄荷味忽然無貨，開始買其他味。呢排，全線萬寧缺貨。依我記得屈臣氏係無賣開，好奇走入去睇吓，真係有得賣，重要係 $6.9, 似乎我估得無錯。

大概係李生嘅集團知萬寧賣平過佢，俾益逹壓力唔再响萬寧賣。萬寧要清貨，唯有以低價出售。

行山 x 影相?

星期日友人約行山影相，俾我拒絕咗。第一，太早起。第二，行山同影相响我心目中係兩件唔可以溝埋嘅事。我對影綠色嘅嘢無興趣，行山週圍都係草同樹，難構圖，唔覺有乜嘢好影。有 D 山隔籬就係海，加上香港嘅天空常有煙霞，天海合一，深綠加灰藍，so dull... 唔太值得早起去影。

或者只係香港環境嘅問題，用 green 做 keyword 响 flickr 搵，綠色嘅靚相都有，但人家嘅綠有層次，個天又夠藍。又或者，我唔係對影綠色嘅嘢無興趣，我係對暗綠色無興趣。

相比之下，影黃昏日落、夜境、星空，輕鬆得多。

洗 Keyboard

放假第一日，第一件事係執一執張枱。唔知幾耐無執過，發現有錢、一堆無電嘅電池、櫃樋有一張以為唔見咗嘅相、一疊新年收到嘅利是封、幾封宣傳信、同埋垃圾。一個朝早都未執完，因為俾個 keyboard 拉開咗。

本來諗住好簡單咁吹 D 塵出嚟，但越吹越有，越吹越大舊，越吹越核突，於是決定拆開後面洗前面。攪咗半個鐘再風乾，一個乾淨嘅 keyboard 重回枱面。之後先發覺，原來個 keyboard 係有一個防水功能，即係响上面倒瀉水係無問題，有幾個排水孔將水排出。

至於張枱，搵日再執過。

Wish List

辛苦咗幾個禮拜，今個禮拜休息，第一件事係想買新玩具。相機都用咗兩年，係時候換。Netbook 俾啊媽徵用咗，諗緊買部新嘅。有隻 3G 手指，又心痕買部 3G 手機上網。

相機係鐘情於 Ricoh R 系列，R10 後變咗 CX 系列。7.1x zoom 雖然已經唔係 DC 仔嘅賣點, Samsung 同 Canon 都已經出到去 10x 同 12x, 重有埋 AVC 去拍片添。但係對我嘅 killer feature, 係 interval shooting. 得閒嘅時候响一個地方 set 起腳架影夠佢一兩個鐘，砌返埋出嚟嘅效果往往意想不到。唯一可惜，就係 Ricoh 最多得 8 秒曝光，Otherwise 用 interval shooting 影星空會幾唔錯。

Netbook, 依家簡直係泛濫，但係好多部都唔得，因為無咗 touch screen, 完全無咗嗰種方便感。Notebook 嘅 mouse pad 絕對唔夠人體工學，多年嚟都用唔慣。依家有 touch screen 嘅牌子只有 HP, Kohjinsha 同埋 Fujitsu. 一部太大，一部太慢，一部太細。價錢都係五千至一萬咗右，一個 touch screen, 身價果然唔同。

睇手機嗰陣，都有少少驚奇，一部手機原來同一部普通 netbook 嘅價錢差唔多。對於我嚟講，係匪夷所思，因為手機主要係講電話，netbook 比電話嘅功能，係多好多好多。一部用嚟上網嘅手機，不可缺嘅係一個 QWERTY keyboard. 因為依家嘅手機，已經無好似以前 Palm PDA 咁可以寫 graffiti. 要真正 productive, QWERTY keyboard 係唔少得，但價錢係四千蚊起跳，比普通 netbook 更貴。

Netbook 同手機，其實買其中一個已經 OK. 只係手機可以做嘅事又太少，又唔想帶住 netbook 嘅火牛週街走 (如果有 netbook 可以 USB 叉電，又唔同講法)，所以未決定到。當然，可以買晒就梗係最好，但係價錢未去到物有所值嘅地步，落唔到手。

奸有奸輸

2009年3月28日 明報社評

社民連的言行，是經過精心計算、有策略的政治行為。現時立法會選舉採用比例代表制，候選人在每個選區，只需得到大約10%選票，即可當選，例如九龍西的梁美芬得票只有9.6%，港島的何秀蘭只有9.8%，新界東的劉慧卿只有9.2%，新界西的陳偉業更只有8%。換句話說，要當選，最重要的並非爭取社會大多數人的認同，即使候選人的政綱如何非主流甚至偏激，只需保住其中約8-10%選民的支持，即可當選。

比例代表制係精心計算俾「少數人」入立法會，我個人好歡迎用返單議席單票制，係政府攪政改嗰陣唔去改啫! 而且一個直選議員比一個功能組別議員更有代表性。

更何況，高官們嘅表現，真係好「不該」，局長、副局長、政治助理無一件事做得啱。如果一個政策只有兩個方案，如果有 n 個政策，做錯所有事嘅機會率就係 2 嘅 n 次方，特區政府回歸至今，得兩件事做得好，其他事做錯晒，機會同中六合彩差唔多，但香港人呢十年來都中完又中。好嘢就話啫，行足十年衰運，你唔日日講粗口咩?

700 年後

呢排好少聽電台，歌亦都無乜點聽，只係沖涼嗰陳開一陣收音機聽吓。呢一兩個禮拜唯一經常聽到又記到嘅一首歌，一聽就知係陳奕迅或者係劉龍嘅唱腔，好聽、舒服，係我嘅口味。

DJ 介紹過，係陳奕迅唱嘅，不過無講歌名，唔知點解好多 DJ 都唔講派台歌嘅歌名。唯有上網搵吓，原來叫七百年後，順便搵吓 mp3 有無地方可以 download. 合法欠奉，非法好多。非法下載係存在好多年，但係香港音樂界始終停响讉責非法下載，而無與時並進。Google 响大陸有 download service 但係香港用唔到。EOL Asia 都係合法但係有 DRM, 一個活响舊思維嘅生意。

舊思維塗毒下一代，令社會無進步，iTune 可以做到上億嘅生意，係有佢嘅道理。

知足

海嘯捲走大量財富，可幸的是，我是比兩年前富有。今年，重新再與恆指競賽。

Earth Hour 2009

香港嘅星空被燈光蠶食，同一個地方十年前比已經係不一樣嘅夜空。
今日 Earth Hour, 八點全維港熄燈。
星期六，其實無乜商廈開燈。
記得今次係第三次熄燈行動，第一次係無乜人支持，連幻彩詠香江都無取消。但第二次就已經有維港兩岸嘅大廈支持，今次更加係 Earth Hour 2009 嘅一部份。好以無膠袋日咁，只要風氣一開，就會成功。

講古系列 5: 豬扒 + 恐龍

呢排興講港女港男，今次講吓醜女。

响香港，醜女被人叫豬扒，豬扒一詞係由黃子華把口講出嚟嘅，當年無線有套劇叫《男親女愛》。黃子華响一間律師樓做事務律師叫余樂天，under 鄭裕玲演嘅 Miss Mo. 有場戲，余樂天話 Miss Mo 係豬扒。Miss Mo 就當然會問乜嘢意思啦，而得到嘅答案係「又乾, 又縐皮, 又多肉紋」。因為套劇當年好受歡迎，所以豬扒一詞廣為流傳，泛指醜女。

而台灣呢，醜女會被人叫恐龍。呢個就要講返三國時期，諸葛亮被稱為「臥龍」，有一說係話所謂嘅龍其實係講緊佢老婆，一個荊洲地區赫赫有名嘅醜女。與醜女同被共枕，咪臥龍囉。因為諸葛亮字孔明，大家就尊稱黃月英為孔龍。後來約定俗成，孔龍就變咗醜女嘅代號。而台灣用嘅輸入法以拼音為多，恐龍係相關字孔龍又唔係，為咗方便，就用恐龍代替，反正响上網錯別字多的是。當然叫得恐龍，就會有其他因為女子唔同特徵而衍生出例如「暴龍」等嘅唔同變化。

不進則退

國務院話要加快上海發展為國際金融中心，香港同廿年前一樣，無變過，真係五十年不變嘅魔咒? 食老本，終有一日坐食山崩。依家陣嘅速度，根據 Race Track Principle, 上海終有一日追過香港。

New Toy

早幾個禮拜見到朋友用 3 隻手指行 HSDPA 上網，聽落價錢 OK, 110-200 一個月. 噚晚由沙田出返城，响旺角食完嘢，出返隻手指。部機裝唔到，攪吓攪吓攪咗成個鐘，原來個 USB port 唔係太得。

不過，今日就已經用得著，個客嗰邊無有 D 地方無得上網，帶埋隻手指去上網搵嘢，非常方便。

講古系列之維多利亞城界石 7 - 寶雲道界石

話說英國人响港島北建立咗維多利亞城，以界石劃出城嘅界線，再以四環九約分區管治。

响一個風和日麗嘅星期日搵最後一塊界石。搭 15 號巴士上寶雲道，由司徒拔道方向開始，行咗無耐就到咗，唔難搵。呢塊好似係最大嘅一塊界石，保存得幾好。唔想撘返巴士落山，沿寶雲道行去灣仔峽道，有好多人响度練跑，途中經過姻緣石，附近有好多其他神佛例如四面佛咁。

Go to gallery

64GB

之前食飯睇到有隻 64GB 嘅手指，9xx. 今晚放工去 298 睇，只係 869. 可惜嘅係略嫌大支，唔係我嘅 style. 唯一可以做嘅，又係等。

講古系列 4: 大笨象 + 大白象

匯豐星期二競價時段收得嗰33蚊，攪到亞太區行政總裁霍嘉治都要出嚟講嘢，話匯豐响香港有特殊地位，相信香港人唔會對大笨象失信心云云。匯豐素有大笨象之稱，不礙乎
1. 恆指成份比重高，响 10%-18% 浮動，對恆指嘅升跌有不言而喻嘅影響力
2. 股價較穩，係唔少長線投資者嘅至愛，當然，响金融海嘯下完全唔成立

大笨象差少少，大白象，其實係患咗白化病嘅象，極為罕有亦係泰國嘅聖象。不過絕對唔係好嘢，如果你得罪泰皇，泰皇就會送隻大白象俾你。話到明係聖象，唔勞役得，又要養佢，幾嘥米飯，都咪話唔頭痛。所以，後來形容 D 又貴又無用嘅嘢，就用大白象嚟形容。

白化 - albino
1777, from Sp. or Port. albino, from L. albus "white" (see alb). Used by Portuguese of white-spotted African negroes. Extended 1859 to animals having the same peculiarity.

仙境

界石之旅上山，好大霧，好迷幻，能見度少於一百米。只要加少少幻想力或者詩意，會覺得唔少奇境响眼前出現。

Go to gallery

講古系列之維多利亞城界石 6 - 舊山頂道界石

話說英國人响港島北建立咗維多利亞城，以界石劃出城嘅界線，再以四環九約分區管治。

克頓道界石後，有兩個選擇，一係原途落山再經羅便臣道上山，或者繼續上山頂。今日嘅其中一個目的係行山，於是選擇咗後者。源途大霧，一個鐘左右到咗山頂，食咗少少嘢，去舊山頂道落山。上山容易落山難，斜度頗高，差不多見到住宅，就見到界石，亦差不多係最殘嘅一塊，如果由下而上咁望上去，都幾難留意到。

Go to gallery

講古系列之維多利亞城界石 5 - 克頓道界石

話說英國人响港島北建立咗維多利亞城，以界石劃出城嘅界線，再以四環九約分區管治。

由薄扶林道去港大，路程不遠，好耐未嚟過，畢竟响度完成碩士。入到港大上山，出咗港大再上山，克頓道响邊道? 路在口邊，問人，原來過鬼咗。落山再上山，路邊好快由住宅變成郊區，係一條晨運徑。途中俾兩隻狗吸引，回一回神，界石就响眼前。

Go to gallery

講古系列之維多利亞城界石 4 - 薄扶林道界石

話說英國人响港島北建立咗維多利亞城，以界石劃出城嘅界線，再以四環九約分區管治。

去完西寧街，上士美菲路，大斜坡，慢慢行，有分叉路，究竟繼續上士美菲路定蒲飛路? 最後揀咗蒲飛路，上到去過咗行人隧道，搵咗一輪，唔見?! 向決定再响南行，就响士美菲路口見到界石。

Go to gallery

講古系列之維多利亞城界石 3 - 西寧街界石

話說英國人响港島北建立咗維多利亞城，以界石劃出城嘅界線，再以四環九約分區管治。

遇友人相約，去探中西區嘅界石。由西環尾出發，响西寧街西寧閣對面嘅球瑒。以前嘅中學同學住响西寧閣頂樓，喺佢屋企天台燒嘢食，十幾年後重遊舊地，回想舊日嘅歡樂，另有一番滋未。呢塊界石保存得好好，亦唔難搵。

Go to gallery

Déjà vu

歷史不斷重複，當國家領導人公開支持香港特首同政府有效施政嘅時候，就係特首做得差嘅時候，距離七一、腳痛還會遠嗎?

講古系列之維多利亞城界石 2 - 黃泥涌道界石

話說英國人响港島北建立咗維多利亞城，以界石劃出城嘅界線，再以四環九約分區管治。

呢排响馬會做嘢，附近就係界石嘅所有地。食完晏，無雨，行過去睇睇。行到過咗聖保祿小學，唔見，返轉頭，咦，原來 D 字背住我頭先行嘅方向睇唔到。比想像中大，比想像中完整，比馬已仙峽道嗰塊好彩好多 。

Go to gallery

弄假成真

當年銀行呃人買迷你債卷，話好穩陣，穩陣過滙豐。結果今日，迷債又好，滙豐又好，全部冧晒。

Never trust sales person.

講古系列之維多利亞城界石 1 - 馬己仙峽道界石

話說英國人响港島北建立咗維多利亞城，以界石劃出城嘅界線，再以四環九約分區管治。

文獻記載嘅有六塊，但係其實有更多嘅界石，尤其以馬已仙峽道嘅界石最為出名，不過已經俾人拆咗，相信係 2007 年 6 月頭拆嘅... RIP

Go to gallery


參考

• 港島界石城市定向圖
• 尋訪迷失的維多利亞城界石‧City Boundary 1903
• 2007-05-28 尋找維城界石 上集
• 2007-06-14 尋找維城界石 下集
• 馬己仙峽道界石
• 灣仔是我家：（附錄一）

講古系列 3: 九龍 + 侯王 + 車公

新聞提到，大陸對食物安全有太多部門管，尤如九龍治水，响網上搵到嘅傳說係咁嘅:

據說很早以前，呼風喚雨全靠一條龍承擔。這條龍一年四季奔走不歇，雖然日夜辛苦，畢竟力量有限，不能滿足天下所有地方所有人要求風調雨順的愿望。于是，此龍就向玉皇大帝啟奏，要求多派几條龍幫助它行雨。玉帝准奏，調遣了八條巨龍歸它指揮。天下百姓無不歡呼，便在龍王廟擺下好酒好菜，讓九條龍享用。九條龍吃得大醉，醉后失控，行下傾盆大雨，大地上洪水泛濫，老百姓叫苦不迭。大雨過后，又一連數月干旱，河干井涸，庄稼枯死，老百姓怨聲載道，哀呼：“一龍治水風調雨順，九龍治水旱澇不勻。”呼聲驚動天廷，玉帝便傳旨將八條龍分到了東南西北和東南、東北、西南、西北八方，將頭龍封在中土，讓其監望八方，各龍負責各方行雨事宜，誰瀆職，就懲罰誰。

而同一個網頁，提到九龍半島呢個名嘅由來，原來係南宋末年宋帝昺逃難到香港，見到九龍有八座山脈，向大臣們提起每座山都有一條龍，呢度有八座山，即係有八條龍。大臣就話，其實有九條，因為天子為其中一龍。九龍亦因此得名。

除咗九龍，宋帝昺亦帶埋車公同侯王嚟香港。綜合 Wikipedia 同廟宇嘅網頁，相傳兩位都係護駕嘅大將，車公因曾平亂有功，被封為車大元帥，而侯王就係國舅楊節亮。

原來車公除咗打得，重識醫術，相傳求醫嘅人，都可以妙手回春。當沙田一帶發生瘟疫時，沙田居民就建廟再由西貢蠔涌請車公座鎮。

楊節亮，因為「護駕有功，世人敬其忠義，故建廟以紀念」。因為生前封「侯」，死後封「王」，侯王廟因而得名。

另類姓名學

呢 D 咁嘅名，拎去俾人算都唔知點數筆劃。

垃圾

垃圾政府制定垃圾政策選出「垃圾」議員產生垃圾議會用垃圾掉由班垃圾選委會選出嚟嘅垃圾特首委任嘅垃圾財政司讀份垃圾預算案响垃圾電視台播

蝴蝶效應 13

Butterfly Effect 總恬嚟講就係因為一個輕微嘅變化，而引致一個重大嘅改變。今次個重點，唔係個效應本身，而係想講一講超時工作 (即係 OT) 點樣改變香港人生活模式。

罷工篇:
唔知幾時，按章工作，成為一個罷工嘅手段。例如巴士嘅按章工作，架巴士會慢 D, 埋站又會停準 D. 今日電訊盈科嘅員工按章工作，係夠鐘走人唔 OT. 當中嘅含意就係 OT 嘅情況好嚴重，剩係 OT 嘅時間都已經可以影響到工司嘅運作。如果重要裁員，留低嘅只會更辛苦。

擔心不擔心

好幸運地公司透明度非常高
好幸運地同 Microsoft 做 Partner
好幸運地可以掌握自己嘅命運

見到澳洲紙跌到得五蚊，入咗少少以便今年旅行用。咦... 原來我重諗緊旅行，即係我對前景仲係正面，就算知道發生緊乜事。希望到時請到假。

酒鬼無賴 2

睇完新聞，真係無言。希望法官可以嚴懲。

講古系列 2: 大牛 + 斗零

原來五百蚊紙叫大牛，係因為 1925 年匯豐五百蚊紙係有一位農夫拖住隻水牛响度耕田。當年五百蚊紙係最大面額嘅紙幣，所以稱為大牛。但時移勢易，水牛無田耕，亦再唔係最大面額，千元紙幣帶上金色，金牛之名亦因而誕生。

而五仙之所以稱之為斗零，係有一個好官方嘅說法，响 2005 年 9 月第 44 期嘅《香港金融管理局季報》提到

所有在1866至1933年間鑄造的香港五仙硬幣，包括1903年的五仙硬幣都是以白銀鑄造。1903年的五仙硬幣重1.37克，約相當於三分六厘（0.036兩），因此簡稱為「三六」。

二十世紀初，果菜欄所用的暗語是以「之辰斗馬蘇零」代表一、二、三、四、五、六，因此簡稱「三六」的五仙便被通稱為「斗零」。「斗零」這個稱號相當普及，即使到1989年五仙停止流通後仍一直沿用。

20 世紀少年

個 weekend 吞咗成套 20 世紀少年嘅漫畫。浦澤直樹嘅作品，好強勁，繼 Monster 之後，延續其風格，將好多好多人，响唔同時空，做同一個故事。可惜嘅係，有幾個配角嘅特色唔夠明顯，尤其係細路，攪到唔能夠太投入。

邪教用病毒侵襲，事敗後再嚟粒炸彈，好熟口面。係 Bloody Monday 嘅劇情，只係由平凡人救地球，變咗做電腦天才駭客救東京。咦?! 用炸彈炸東京，咪神探咖俐略最後一集嚟?! 唔通 Bloody Monday 抄得咁離譜? Anyway, 比起 Bloody Monday, 20 世紀少年描寫得好好多，相信睇戲會爽好多，一版一版睇漫畫嘅節奏真係好慢。

零規劃

港島北嘅交通每況愈下，要拆天星同皇后碼頭填海去起繞道舒緩交通壓力。但依家跟手又話要响中環海濱起甲級商廈，即係點? 甲級商廈，帶嚟嘅係大量嘅車，到時塞車，又再填海嗎?

統計學的錯覺

聽到有牧師話有六成愛滋病人係同性戀，所以同性戀係高危云云。搵咗篇原文出嚟為証，可以睇吓呢一粒數可以點玩。

4. 最後，我和你們分享我自己個人的經歷，我在三藩市牧會十多廿年，也牧養過一些同性戀的弟兄姊妹，也曾陪伴過一些因AIDS而死的同志，走他人生最後一程，我內心直至現在也不能忘懷這些經歷，AIDS是一種非常可怕和恐怖的疾病，我腦中也浮現出那張驚惶和不安的面孔，他好像控訴說：「為甚麼不早告訴我這後果，要我受此痛苦呢？」我當時對美國政府隱瞞了很多事實而感到憤恕，如：

‧ 在三藩市，患AIDS的病人中其中佔60%是同性戀人士；

‧ 據UCSF研究，避孕套的意外高達50-60%，是非常危險的；

‧ 同性戀人士是AIDS高危一族。

這些經歷叫我更覺得有責任去告訴那些同性戀人士：「請你三思，愛惜你的生命呀！神是愛你的呀！」

也希望你們為這星期遊行的那些同性戀者代禱，求主施恩。

願主恩常偕！

你的弟兄

蘇穎睿

2009年2月14日

牧師教友反對同性戀係無可口非，但我好懷疑意圖，係咪想令人覺得六成同性戀者係愛滋病人? 大多數人只會記得片面嘅詞句，「患AIDS的病人中其中佔60%是同性戀人士」好多人只會記到三樣嘢: 「AIDS」、「60%」、「同性戀」，至於次序，都應該唔會點記。咁樣，一班教友可能圍內傾吓傾吓，就會得出同性戀嘅人有60%係有 AIDS 嘅結論。呢個亦都係原文照錄嘅原因，免得道聽途說。再諗深一 D, 即係有四成愛滋病人係異性戀者，6:4實際上分別大唔大呢? 咁就真係見仁見智。

另外「避孕套的意外高達50-60%，是非常危險的」即係乜嘢? 係避孕套令身體受傷嘅意外? 係意外懷孕? 係意外感染性病? 咁，係咪唔用避孕套會無咁多意外? 如果要關聯到上一點，就可能想講「同性戀戴咗避孕套都無用，因為會有超過一半機會中招。」OK, 聽落真係好危險。但真相係不論同性戀或者異性戀，如果伴侶無出去同HIV帶菌者有體液接觸，無論戴唔戴避孕套，變成愛滋病患者嘅機會係零。即係話，只要唔偷食或者濫交，唔應該會有問題。亦即係，站在道德高地嘅人應該鬧濫交嘅人(即係有二三四姨太嗰 D)，而唔係同性戀。

而「同性戀人士是AIDS高危一族。」我相信係以上兩點嘅結論。但如果以上兩點並唔成立，結論係咪都唔成立?

另，點解去遊行就係同性戀? 即係同你持反對意見就係同性戀? 咁我咪又無端端變咗同性戀? 定係剩係為同性戀祈禱?

以上總總，得出嘅結論係:「一派胡言」

妙問妙答妙回

有人問曾俊華：「高官可唔可以減人工？」

曾俊華話：「減少少人工無乜作用。」

學生回：「你哋人工高過美國．．．」
毓民回：「勿以少善而不為．．．」
網民回：「咁不如減多Ｄ囉！」

Google 姓名學

Shane Ng 頭 200 個 result:
1. 自己嘅網站, Facebook, 自己嘅相簿, 有份寫嘅 Paper
2. 交友網站 (Facebook, LinkedIn, etc) 同名嘅 Profile
3. 自己嘅 Projects - 包括 JavaScript Obfuscator, Code Generator Framework
4. 公司 eMagazine
5. 一堆同自己無關嘅網頁
6. 十一年前 (1997) 港娛嘅 post???!!!
7. 其他網頁

shaneng 頭 100 個 result:
1. 自己嘅網站
2. 其他網頁

原來重可以被拆成 shan eng 同 sha neng. sha neng 普通話拼音 = 莎能 = 一間賣羊奶嘅公司

同場加映 "Shane Ng" @ Google Groups
原來自己响十幾年前响 newsgroup 度發表過唔少偉論。不過好多都變晒亂碼，有 D post 根本開唔返，好懷念當年嘅日子。

Black Friday

黑色點期五，一切都好似好順暢，係咪暴風雨嘅前夕?

A 16.5 Million Business

今年有五萬五千人跑渣打馬拉松，計一計每人收三百左右，都有千六萬。再睇固定獎金支出，都係一千萬左右。即係有六百萬做其他宣傳同營運開支唔駛蝕。

另，原來香港身份証持有人响三個鐘內完成馬拉松，有一千蚊獎金。而成個賽事只係有少過一百人做到呢個成績。

又，點解見到終點個鐘係五十五分鐘左右，但係出嚟嘅成績係一個鐘零七分廿二秒?

荒謬的一天

今日做乜咁多白癡事件?

原來唔聽上司指示，係小毛病，亦都係依照法例工作。



唔知係我聽錯，定記者聽錯，定余議員講錯，定個編輯好人改正。究竟係「黑紙白字」定「黑字白紙」?如果係「黑紙白字」，相信余議員係電腦高手，因為佢仲用緊 command prompt, 又或者經常 telnet.


原來銀行敲詐係無需要監管，難怪迷你債卷...


無賣嘅買到，「肯定」又可以同「可能」一齊用，我中文真係咁差咩?


家陣 D 細路玩 PSP, NDSL, 邊會玩啪啪紙喎!

利利是是

正月十五，過咗新正頭，拆利是嘅日子。希望下年可以繼續逗，同事、微軟、客人全部人齊。

開工利是


同事利是


微軟利是


客人利是

跑! 跑! 跑!

上年馬拉松坐車返歸，今年返返去跑十公里賽，勉強完成。

準備
今次係零準備，新年之前大傷風咗兩次，想練都無得練。新年後亦忙於工作，最後係完全無練。可以做嘅本來係充份嘅休息，但之幾日又夜瞓，所以基本上係狀態最差嘅情況下跑。本來前一晚想早瞓，但夜鬼係早瞓唔到，由八點响床度捵到十一、二點，唔知幾時瞓著。

出發
三點半起身，食咗個包，一個柑，幾粒沙糖桔，幾塊餅。準備好所需能量，換好衫出發。坐地鐵，好多人，比繁忙時間要多，將三萬幾人响一個鐘頭內消化唔係一件簡單嘅事，但十分鐘先一班車，會唔會過份少少? 去到中環，已經無晒企位咁際，去到金鐘，全九龍轉車過嚟嘅人一條隊只係上得幾個，排後面嗰 D 真係唔知幾時先可以到維園。

賽前
响維園，見到嘅係人潮，但竟然撞到朋友，約埋賽後食早餐。睡意係有，狀態麻麻，但係幾年前跑過，知道大概情況，唯有放鬆心情享受比賽。

賽事
去到起點，唯一要提醒自己係唔好跑咁快，望住對面海嘅燈光，或者東廊週邊嘅住宅，加上微微嘅海風，感覺豁然開朗。响唯園飲過幾啖水，但可惜因為行去起點嘅路程變成代謝物，開跑時有少少便急，但並唔嚴重，因為排汗嘅關係，情況無再加深。大約十幾分鐘後去到兩公里，已經見到回程嘅人，真係好強勁! 去到四公里，折返向西行，見到第一個水站，慢起嚟回氣、飲水、繼續上路。身體好明顯好需要水，飲完水之後，精神好多。

完成
八公里，再經過水站，體力OK, 但係大腿開始酸痛，步拔要減慢。過咗東廊，响馬路見到有條天橋要上，開玩笑，好斜! 唯有硬著頭皮發力跑過。聽到歡呼聲，時鐘响五十五分跳緊，減返起跑時間，應該係五十分鐘左右完成，好成功! 越過終點，接過能量袋，第一件事剩係知道要飲水同食嘢補充。攞咗行李，坐一陣，拉拉筋，回復基本狀態，換衫洗面。

賽後
電話到，約好見面地點，同朋友加朋友舊同事一齊去天后食早餐。It's the greatest breakfast I have ever had! 友人請，多謝晒! 食完早餐，搭巴士返屋企已經八點幾，身體好似無乜事，沖涼再瞓過。

事後
痛醒咗，大腿同膝頭開始因為安多芬減少而產生疼痛，還好係一點左右嘅午餐時間。腳痛，唯有响屋企睇片，但四點左右都係被周公召咗上床瞓。再醒嘅時候已經係七點八，俾煮麵嘅味道香醒，但大腿同膝頭依然幾痛，拉筋係唯一可以做嘅事，希望可以早日康復。啊媽之後話，原來我將緊急聯絡人嘅電話，寫咗朋友屋企嘅電話... 至於下年嘛，剩係想帶相機上青馬橋影相，跑四十二公里真係唔係人咁笨。

所有跑手，不論路程幾遠，肯咁早起身落場跑，跑完又好，跑唔晒又好，都係對個人挑戰嘅羸家。

搬 Blog

心血來潮，搬返個 domain 嚟 compustar.blogger.com

新聞報導 vs. 新聞評論

星期一開始，無線嘅晚間新聞多咗 D 少少評論/分析/互動嘅部份，主播依然照稿讀，但表達得生硬，唔 Pro 得好緊要。可憐嘅係體育主播，企咗响無雷公咁遠，雖然有部大電視响側跟，但感覺好孤獨，希望佢係有位坐，唔駛企足半粒鐘。

新聞報導一向都係中立，多咗主觀成份，感覺好怪。

P.S.: 晚間新聞有兩節廣告，會唔會多咗 D?

以教論教

噚日講過，每一套戲都有一個設定嘅世界觀。有說人生如戲，即係其實每個人都有一個世界觀，我哋叫做觀念，同你觀念接近嘅人，好可能已經係你嘅朋友。當然，每個人嘅觀念唔同，但係兩個人都可以做朋友、拍施、甚至結婚 (星期日檔案講嘅異族婚姻係其中一例)。因乜嘢而令到呢兩個觀念嘅人可以走埋一齊? 我哋呢 D 唔信神嘅就會叫尊重，但係有宗教信仰嘅係會叫愛。聖經裏面所講嘅愛，除咗尊重外，亦會包含寬恕同包容，所以耶穌愛妓女、稅吏、撒瑪尼亞人等當時俾人歧視嘅人。

接受一套戲嘅世界觀，就可以設身處地感受當中嘅劇情，各角色嘅心態，我哋叫投入。當我哋投入身邊嘅人嘅世界，設身處地為佢思考，見到佢行差踏錯，會提醒佢有問題。如果宗教團體投入一班弱勢社羣嘅世界，想去救佢哋出嚟，係咪應該帶住尊重、包容、同埋寬恕去提醒佢? 一次唔得咪兩次，兩次唔得咪三次，直到佢哋「回頭」。就好似叫人戒煙咁，你都會好言相勸，而唔會落 order. 點解有信教嘅人偏偏要高調公開讉責佢哋? 又唔俾佢哋受法例嘅保障? 唯一合理嘅解釋，係呢 D 人只係得把口講愛，無實際行動，即係「口惠而不實」亦「口不對心」，到你哋嘅大審判時邊個上天堂，邊個落地獄大家心照。

Free will 係基督教其中一個信條，大概係指神覺得如果人唔係真正自由，就唔會覺得自己應該為自己嘅行為負責，好合邏輯。Free will 亦衍生出現今對自由嘅慨念，但自由並非絕對，一切基於尊重別人，例如你有言論自由但係唔可以中傷人。你可以接受戲入面嘅世界觀又或者別人嘅世界觀，亦可以表達對其他人世界觀嘅不滿，但係高調公開讉責，算得上那碼子嘅尊重? 當然，唔犯法，但乞人憎! 人家都有人家嘅自由，點解要將你嘅觀念，強加於別人身上?

家暴條例 + 波兒 = 邏輯陷阱

一套戲有戲入面設定嘅世界觀。將卡通片直接同真實生活比較，唔合邏輯。將波兒比喻人同動物嘅關係，唔合邏輯。

有人受到波兒因愛而千辛萬苦成為人而受感動，因而覺得唔應該將成人嘅價值觀套入。但係如果大膽假設: 如果波兒係男仔呢?

邏輯上如果擺愛做重點，成件事係無問題，因為呢個係卡通片嘅世界觀。如果真實世界，我相信如果一條魚為咗變成人而攪到天翻地覆，無人會接受到。亦都無人會無端端收養一個由魚變身嘅細路女。更枉論入面嘅魔法，更加係宗教團體唔會贊成嘅事，必然道出撒旦使者云云。

但成件事根本唔符合現實邏輯，而係呢部就係一部卡通片，係咪「愛」唔係重點，係根本唔應該同現實比，更枉論用嚟做論據。

如果要講愛，同性戀嘅愛同異性戀嘅愛其實有乜分別?

Cognitive Science Lesson #1: We are all retarded because our minds are so inconsistent.

16 things about me

呢篇文源於 facebook, 响 blogger post 完再由 RSS feed 返入 facebook.

規則：當你比人tag左，就要寫一篇note，內含16項有關你的事情，習慣，喜好，目標....或任何各不相干但有關你的東西。最後tag另外16個人。你必須tag返tag左你的那個人。如果我tag左你，即係我想認識你更深。為免太多重覆, tag不同類型的人

1. 無寫白話文好耐，亦都唔記得點寫。所有網絡上嘅中文文章，都係口語。

2. 我係一隻夜鬼，夜晚一兩點係最 hyper 嘅時間，四五點先會開始覺得攰。

3. 承上，一個正常人要返工嘅生活，令我經常唔夠瞓，我覺得我會有一日因為咁而暴斃街頭，但我又唔會因為呢個原因而早瞓。

4. 再承上，唔夠瞓攪到記性好差、做嘢好燥。

5. 再再承上，我係一個怕煩嘅人，亦怕有人响我面前做蠢事，尤其係唔夠瞓嘅日子，我會搵嘢發洩。當我講嘢開始有骨嘅時候，就係暴風雨嘅前夕。

6. 小弟弱聽，唔該同我講嘢大聲 D.

7. 我覺得香港人經常得把口而唔付諸實行，試過兩次同 Internet 有關嘅 breakthrough 响我面前擦身而過。

8. 除咗處境喜劇，我無睇香港嘅劇集好耐。

9. 我覺得，香港年青一代越嚟越無家教，將好多事視之為理所當然。

10. 我其中一個夢想係當我有能力嘅時候，請晒所有朋友開開心心咁去一次旅行。

11. 如果可以再活多一次，我想由中學時代開始。

12. 我好憎食煙，見到識得嘅人食煙，我都會叫佢戒咗佢。

13. 我經常對貓有幻想，嚮往貓嘅性格同埋生活，但因為環境嘅關係，我又唔會拎一隻返嚟養。

14. 呢排愛上咗 Graffiti.

15. 副修過心埋學，但係好多都俾返晒教授。

16. 如果要我講返大學教授上堂講過而又解到俾一個小學生明白嘅嘢，應該就只有 Race Track Principle, Pigeon Hole Principle, 同埋一個用龜兔賽跑講 recursion 嘅 Zeno's Paradox.

胡說八道

原來任由家鬼作祟，就可以創造出一個和階社會
籤文可能太深，但注解「內有家鬼 家宅不吉 自身不安 求財不遂」同甚麼團結、和諧原全無關係。

中國雅虎知識堂嘅正解

第二十七簽下簽

君不須防人不肖，
眼前鬼卒皆為妖；
秦王徒把長城築，
禍去禍來因自招。
求得此簽者，當知今日困境乃由「家鬼」所造成，如能接受他人意見以改過遷善，尤可有線生機；若盲目信賴自家的人，不管旁人之意見，很快便步上失敗之途。
謀望：有計劃，做事有系統，多吸取別人意見，會事半功倍，大大提高成事機會。
錢財：財運不佳，可能會有財富損失。
婚姻：感情事往往緣來緣去，所以抱平常心，觀事觀物，是最恰當的。
自身：積福行善，助人為快樂之本，大大提高人格修養層次。
家宅：彼此雖然是一家人，但慎防家中壞分子，以免受到詐騙或被牽累而惹上訴訟。
開業：避因財失義的事件發生。
遷居：遷居不宜龍年進行。留等下年吧。
出行：今年不宜旅游，以防意外生。
疾病：請養成良好飲食習慣和生活檢點。
六甲：產前做足准備工夫，以防不測。
行人：請留意消息。
訴訟：冷靜處之，小心謹慎面對。

煙花直播 + 不合格導播

睇咗幾年，咁多年來都無進步，TVB 尤其嚴重。有時候好唔明，D 導播係都要 Zoom 埋去一個大大棵嘅煙火度，個效果通常都係咁:


其實，拉遠境咪得囉，你又已經有唔同角度嘅攝影機，驚悶咪 fade 去第二部機。Zoom 近少少影兩艘船再慢慢 pan 去另一艘船又得。煙花，係要睇佢嘅宏大同整體效果，唔係用顯微鏡去睇。

講古系列 1: 無情雞 + 炒魷魚

今日公司聚餐，食到一碟雞，問起有乜意頭。我就 up 咗以前年尾「無情雞」嘅習俗。為免知其然而不知其所以然，今晚再上網查吓。

只係大致上經濟唔好嘅年尾做尾牙 (或者年尾最後嗰餐)，老闆會特別加一碟雞做餸 (以前嘅工係包食包住，今時今日大部份大陸廠都係)。開飯時候，老闆會挾件雞頭過你，話辛苦晒云云。識趣嘅食完飯後，真係要執包袱走人。無謂無世界都知你應該走，自己又賴死唔走。

亦有說會响開牙嗰日 (正月初二) 先會有無情雞出現，等大家開開心心過完年先，開市前就要執拾細遠，另謀高就。

講開執包袱，唔覺意睇到「炒魷魚」嘅典故。原來，以前嘅人執包袱，唔係執剩係幾件衫就 OK. 包食包住，無話包有被舖。所以被舖自備，到執包袱嗰陣，就要將被舖捲起。而捲起咗嘅被舖，睇落就好似炒熟咗嘅魷魚咁，「炒魷魚」因而成為俾人辭退嘅俗稱。

酒鬼無賴

標準係 22, 出事嘅司機係 93. 一係晨早流流就去飲，一係之前嗰晚飲得好夜 (通宵唔定) 同好勁啦! 政府宣傳話:「酒精害人，開車前咪飲。」但害人嘅唔係酒精，而係無自制能力嘅人囉!

家暴條例 vs. 宗教團體

美國獨立宣言基於基督教信仰，第一句就有 "all men are created equal." 但要到今日，先有一位非白人宣誓成為總統。即係話，宗教信仰只係俾一個目標大家，去完善社會制度。

如果真係 "all men are created equal", 又點解會有宗教團體，因為加入保障同性戀嘅條款，而反對家暴條例? 唔通，同性戀係錯嘅，咁保障同志亦係錯嘅，所以同志係可以被暴力對待?!

宗教，係導人向善。維持家庭價值係善，但容許個別人士受暴力對待，係咪善? 同當年黑奴問題又有乜分別? 如果要將個人嘅價值觀強加別人，我哋係咪要 rollback 返去中世紀以前，將基督教奉為國教，再清剿異端?

我唔係同志
我唔係教徒
我唔係想搵嘢拗
純邏輯分析

Out Fo 大日子

同事結婚，部 cam 上次影完新年煙火唔記得 set 返 auto focus. 下午嘅婚禮 out fo.
夜晚婚宴，Ricoh 相機對焦稍差，再度 out fo.

婚宴趨勢:
1. 加入天才表演，俾新娘驚喜。彈結他、彈琴等，無論練得幾好，上到台都係會太緊張，影響表演。
2. 玩新人環節唔見咗，咁多年都未見過。
3. 餐枱上嘅小禮物，見過有食嘅、擺嘅。

可以同愛人共諧連理，可喜可賀。祝一對新人白頭到老，永結同心!

Go to gallery

欲望補償

上一代嘅細路好貧困，所以好緊張食呢回事，亦都有句「辛苦搵嚟志在食」。今日有錢，除咗買嘢食補償，都無乜嘢其他嘢想買。
呢一代嘅細路窮，一定餓唔死，但無乜物質享受。今時今日出現 kidult, 就係補償返童年嘅回憶。
下一代嘅細路生活富庶，要乜有乜，尤其個個生一個嘅情況下，响屋企有如天之驕子。究竟未來佢哋會用錢補償 D 乜?

稅

又到交稅嘅日子，但係要交稅俾咁嘅政府，真係唔甘心。

漢堡大王

噚晚落咗灣仔見客，記起有 Burger King, 即刻走入去，食返個 Whopper Junior Combo. 好耐未食過，個包依然好好食。

惰性行政

原來影晒出嚟都只係「所謂假證」，乜唔係應該要徹查咩?

Night Person

當假期瞓得太多，夜晚就無晒睡意，就算之前嗰日只係瞓咗五個鐘。

Bloody Monday

一套好 Heavy 嘅日劇，內容緊湊得係需要不停咁睇去追劇情，唔太欣賞。

埋單計數

恆指唔見咗一半，投資亦縮水一半，身家就無咗四份一。重災區係上年 bought over 嘅股票投資，無咗 60%, 損失最少係今年新投資股票嘅錢，蝕 17%. MPF 同基金投資就浮游响 -31% 至 -54%.

反思問題: Did I put the eggs in different baskets?

拎車牌

趁放假去金鐘拎車牌，人唔算多，用咗份舊 form 申請，要再填過。填完 form, 撳完 EPS, 睇住將咭過膠，換返嚟嘅係一張連相都無嘅車牌... 我問女職員：「係咪完成㗎喇?」佢答：「去駕車啦!」「哦! 唔該晒...」

2008 回顧

排名不分先後
- 百萬雄師收支平衡
- 完成 gallery.shaneng.net
- 第一次公開演講
- 見返幼兒園同學
- 第一次跑馬拉松 (失敗)
- 第一次用腳踏足青馬橋
- 學識打麻雀
- 第一次攪 Table for Six
- 實行脫離 HSBC
- 體驗第一個 BizTalk development
- 俾 MS 挖角
- 捐咗一仟大圓俾紅十字會振雪災
- 買咗部 scanner + scan 咗好多相
- 參觀咗家駒紀念展
- 好多颱風 + 雨水
- 體會到乜嘢叫選戰
- 體會到乜嘢叫次按風暴
- 第一次同阿媽去旅行
- 買咗永遠之藍景品
- 對 CSS 有新嘅體會
- 布殊身手好敏捷
- 第一次出街倒數

除夕夜

新年前一日，陰天多雲，日落無得影，寄望夜晚嘅煙火倒數。十點半出門，去到西九海傍，太多人，即刻退返去西隧口。

時間就到，不停撳錯擊，到最後十秒，OK! 效果唔錯。

Lesson learned: 幾凍都唔好戴手套影相

Click to play