Search This Blog

Monday, March 31, 2014

進擊的春雨

本來個題目剩係叫做春雨,但係略嫌太過詩情畫意。入正題:

星期日食完晚飯,去咗灣仔買少少嘢,本來都好地地,但返屋企程巴士,見到好大雨,本來以為無乜事,但係返到屋企後,响面書見到又一城嘅相之後,Whatsapp 響過不停之餘,同面書慢慢被洗版。一開電視, 黑雨、雷暴警告、強烈季候風同時出現,都咪話唔經典。


出面行晒雷咁,本來用手機影咗一分鐘嘅相,但出嚟嘅效果一般,個天空好光,同平時黃昏入夜嘅樣差唔多。


所以決定影 Video, 有聲同閃動嘅畫面,感覺震憾好多。


今日又出現黃雨,唔太想出門口,雖然話返公司好近,但係濕咗响公司吽嘅感覺真係好差吓,最後決定用50蚊買個乾爽嘅工作天。

薩拉熱窩的羅密歐與茱麗葉

前排哼起首《薩拉熱窩的羅密歐與茱麗葉》,噚日亦响 K 房唱起嚟


其實讀中學嗰陣已經鐘意呢首歌,除咗歌嘅旋律同演繹,當時最鐘意歌詞入面嘅故仔。今日做咗少少 Study, 原來個故仔係真有其事,不得不配服當年嘅填詞人林振強可以用一首歌就已經可以講晒成個故仔。

首歌係1994年嘅作品,改編自中島美雪响1990年嘅歌曲《With》


覺得舊時啲歌好好聽添...

人生之旅 - Day -17

本來諗住星期六可以去燒烤,點知朝早落雨,重要係黃雨,攪到一早走去準備嘅人要白走一趟。呢一趟都真係幾遠,入到去青山灣,本來係諗住入面近有街市,入到去買嘢就燒得,最後要放棄,有少少可惜。

當 Whatsapp 響過不停嘅時候,有人建議唱 K, 於是地點轉移咗去尖沙咀 CEO, 馬拉松式由點半唱到八點半。一反日常慣例,唔再攪陳奕迅演唱會,攪懷舊金曲演唱會,四大天王、哥哥、軟硬、克勤、Sammi, Beyond 通通嚟晒,最高潮莫過於火熱動感 La La La, 大家唱得不亦樂乎。當然,近代嘅鄭融亦好受歡迎,外加尹光同杜汶澤作為嘉賓。

一首狂舞吧結束演唱會後,大家一起去 K11 嘅 Pizza Express 慶功,點咗幾款 Pizza, 沙律、千層茄子、千層寬條麵、同埋松露焗磨菇,不過最好食,都好似係佢週邊啲麵包,好想食多幾條,但太飽了,過咗一個好滿足嘅一晚。

Sunday, March 30, 2014

人生之旅 - Day -19

呢排好多飯局,星期四晚約咗一班人食飯,佢哋由合作伙伴變成戰友,呢幾年响佢哋身上學到好多嘢。雖然大部份都已經唔响當初嘅部門做事,但呢幾年嘅業績,都係多得佢哋支撐。

席間聽到嘅故仔,都真係不得不慨歎依家佢哋有咁多麻煩事,呢啲事亦影響自己嘅業務。好彩多年來有佢哋幫我擋晒呢啲嘢,先至可以專心咁去解決技術上嘅問題。或者去到英國之後,呢啲嘢要靠自己擋了。

除了多謝,還是多謝!

Friday, March 28, 2014

人生之旅 - Day -21

成個假期瞓得最多嘅一日,個人叫做精神少少。前一日買咗隻 Mobile hard disk, 諗住抄啲有用嘅嘢過去。其實最有用嘅我諗係啲相,二話不說食完晏就開始抄,睇住個 progress dialog, 300 GB 嘅相,要抄成 9 個鐘,反正空閒,走去做 Gym. 做完 Gym 返嚟,重抄緊,開始搵短期居所,去到 airbnb 嘅 web site, 呢幾日對住佢,熟練咗用法,開始去 Optimize 成件事,原來都幾嘥時間,又要平又要近地鐵同埋附近有超級市場,個 Google Map 又轉咗新板慢到死咁,有排攪。

Thursday, March 27, 2014

人生之旅 - Day -22

星期一,雖然之前夜瞓,但其實都瞓得唔太好,11點唔夠就醒咗,連續三日唔太夠瞓添。呢一日約咗一位大人物,一位比我成功嘅後輩。

去到沙田火車站,又見到 Giordano 嘅 Life is a Journey,真係平時都唔覺 Giordano 有咁多分店,呢幾日就差唔多日日見。

到咗科學園,佢重開緊會,等嘅同時,趁機影吓相。


大人物登場,去咗附近嘅餐𢌖食嘢。今次其實都係一次對自己嘅試煉,雖然唔太同佢成功嘅方法,但其實可唔可以放開呢件事,大家作為一個朋友去傾計呢? 心中有一個好大嘅問號。抱住一個無偏見嘅開放嘅態度,最後發現,以前响自己眼中嘅細路,其實係好成熟,可以一步一步去達到自己嘅目標。或者抄襲 Idea 响商業世界唔係乜嘢咁特別,之前睇過唔少文章,都話 Idea 對一間 Start up 嚟講唔太重要,最重要係點解去 Execute. 如果照咁樣嚟睇,佢 Execute 得好好。大家互相交流咗啲經驗,獲益良多。

上到佢 Office, 我愛死嗰塊白板牆,由始至終都覺得,做 Creative 嘅事,係要有個大嘅地方畫嘢,思路先至可以走得更遠。個 Pantry 附近擺放咗一系列嘅黃膠鴨角色嘅公仔,無玩到佢嘅 Game 真係唔好意思開口話唔識。雖然佢話送隻公仔俾我,但都唔好意思要,之後佢又隨手响房拎起個小米嘅 Portable Battery, 都唔知點好,唯有要咗佢。

最後影咗幅相留念,走出 Office 等電梯嗰陣,見到一個幾靚嘅畫面,忍唔住影低咗。


返到沙田火車站,時間尚早,走去附近嘅 Ikea 睇吓。見到一啲掛式嘅布質吊櫃,好似幾有用,但我諗都係過到去英國先再買都未遲。走過塊鏡,忍唔住影低自己嘅造型,一啲都唔失禮,頭先應該無洩咗道氣。走畢,竟然見到有甜爆谷賣,二話不說買嚟食,正!


食完,去灣仔 298 買嘢,本來想帶屋企部機嘅 Hard disk 晒過去,但諗諗吓,不如將啲有用嘅嘢抄去隻 Mobile hard disk 度會輕便啲,於是就買咗隻 1TB 嘅。依家要諗諗帶唔帶個 Notebook Stand 加個 Full size keyboard 添...

Wednesday, March 26, 2014

人生之旅 - Day -23

靚仔魔術師前一日介紹咗一個魔術嘅交流會,話說魔術交流會係專業魔術師之間技術交流同發表作品嘅場地,對於我呢個鐘意睇魔術嘅人,當然一口答應。

本來想答地鐵,但又唔太想轉車,於是就去巴士站一碰運氣,點知就有架113出現响眼前,第一時間衝上去。不過車程就比預期長,重要搵方法過條彩虹道,遲咗成差唔多半個鐘先到,好彩去到未開始啫。


一開場就有嘢學,Frank Wong 講咗少少魔術嘅表達三步曲方法,本來想 Map 去做 Presentation 嘅方法度,但後來 Map 嚟 Map 去都唔太 Match, 都係遲啲再諗。另一個就係講效果呈現嘅邏輯,即係要觀眾明你想表演緊乜,一個於諸各表演藝術皆需要嘅原素。除此之外,重有 Zenneth Kok 嘅作品發佈,各唔同魔術師如 Michael Lam 同香蕉王子嘅表演。除咗睇到魔術效果,我重睇到佢哋嘅專業,想盡方法去推廣、製作、改善,無返咁上下熱誠,係做唔到。

交流會完畢,同靚仔魔術師去咗附近間粥舖食少少嘢,再去行 Mikiki, 說著笑著吃著,又係時候告別,搭上101返歸。但想買鞋先,再一次去到大大步,搵返前一晚响 K-10 見到嘅 Rockport 防水皮鞋,只係8百幾蚊,平咗好多,二話不說包起佢。再睇 Columbia 嘅防水嘅運動鞋,一試又舒服,包埋佢,買鞋嘅任務完成。


返到屋企,準備影星嘅。今次帶埋個赤道儀出去,不過好大霧,搵唔到北極星,對唔到位置,只可以用手機估計大概嘅位置。試咗幾張相,原來人眼睇唔到,但只要個曝光夠長,都影到唔少星,可惜光害實在太大,啲相盡 Tune 都只可以有咁嘅效果。


返屋企途中,差唔多到屋企樓下,可能因為太夜,俾警察查身份証,都好似係咁大個仔以來嘅第一次。又係嘅,夜媽媽响條街度,的確係會有少少可疑。

返到屋企,收拾好心情,再度出發,準備去倫敦嘅事,攪到五六點先瞓,好耐未試過咁夜瞓了。

是日布吉連線:


P.S.: Frank Wong 提到每一個魔術入面,都要有展示、施法、同埋呈現三個步驟,而我就想將成件事 Map 落去起承轉合度,當然係 Map 唔到。因為之後再諗返起,佢曾經提過幾個魔術會聚成一個 Act, 幾個 Act 合成一套 Routine. 所以起承轉合係一套 Routine 嘅事,而唔係單一魔術嘅事。正因為咁樣,呈現嘅邏輯非常重要,因為觀眾唔明你想呈現啲乜,會有疑惑,疑惑一個一個魔術慮積起嚟,做唔到承轉合度,咁成套 Routine 可以收皮了。

Tuesday, March 25, 2014

人生之旅 - Day -24

一朝早起身去上環入境處排隊攞籌,一問之下,個入境處嘅職員話快証要做5日云云,跟住排响我之前嘅人話其實第二日就攞得,不過星期六嘅第二日已經係星期一,所以快嚟都已經無意思。登記好之後,排到12點,重有兩個半鐘嘅時間,諗住去灣仔碰運氣,咁啱有架780到,就上咗去,5分鐘唔使就到咗。但好明顯,個人嚟講無乜運,籌已經一早派晒。時間充裕,同時意識到自己心情係幾咁差,需要有一啲嘢嚟彌補,反正好耐無食過早晨全餐,一於嚟一客。


食完嘢,無乜嘢做,去睇吓買唔買定張本票過英國好,點知又發現英鎊剛跌咗一浸,都係唔好住,只係問咗一張本票手續費要幾多,原來都要成50個大洋。之後去咗灣仔電腦城,時間尚早,無乜嘢睇,不過都行咗一陣,搵車返歸。

响屋企再執少少嘢,又去入境處,交好 Form, 同我講話因為第一次同埋我响英國出世,唔知幾時批,總之要等信通知。睇嚟 Plan B 已經唔夠用,唔通真係要改出發日期?! 心情差到極點,已經唔係食嘢可以解決到嘅事,我決定買嘢,於是搵咗靚仔魔術師出嚟。雖則心情唔靚,但依然好理性,要買嘅係準備過英國嘅嘢,因為英國多雨,心目中要嘅係一批防水嘅用品,基本上係外套同鞋。

落到旺角,唔覺肚餓,反正有少少渴,買杯奶昔解渴之餘亦補充能量。


經過 Giordano, 見到好應景嘅設計,使唔使水晶球得咁緊要呀? 當刻好想買,但係俾理智㩒低咗個衝動。


靚仔魔術師到咗,去睇咗啲外套,無乜邊件啱心水,但就提醒咗我可能要買個防水嘅背囊。無結果,靚仔魔術師提議食少少嘢,本來諗住去吉野家食個公仔麵,但忽然諗起我未試過馳名海外嘅名將壽司,其實都唔係話太差,係有幾款特別少少啫。


食完嘢同靚仔魔術師道別,本來諗住返歸,但係想再睇吓外套,於是去咗時代廣場,睇吓有無嘢啱。地吓有一個藝術展,唔太識欣賞,點睇都只係勉強叫得意,唔覺得靚。


去咗 Columbia 睇,原來我買嗰件 Columbia 都已經係8年前嘅貨色,依家佢哋已經唔用 Gore Tex, 而係自家製 Omni-shield. 比起我8年前嗰件,都真係貴咗成差唔多倍半,好似唔係好買得落手,都係再週圍格吓價先。

經過間點心舖, 見到有白糖糕,反正食一次少一次,梗要整返件嚟食


返到屋企附近,去大大步睇鞋,呢排做緊盤點清貨,睇吓有無嘢啱,尤其係 Rockport 嘅皮鞋,見到有一隻大大隻字寫住 Waterproof, 但係個款係 Casual 著,亦都同網頁個樣唔似,所以都係返屋企。稍作休息後,記得 K-10 有 Rockport 專門店,睇吓個實物都好。落到去一睇,嘩! 100蚊美金嘅貨 Mark up 到去千幾蚊,會唔會過份咗啲呢? 算,記得 Nike 好似有對防水波鞋,睇吓有無貨先。又經過一間 Giordano, 個佈置幾靚,又有想買嘅衝動,最後都係無買到。


去到 Nike 專門店,貨係有,可惜得10號同13號,無我要嘅11嘅,閃。行過對面嘅美麗華商場,閒逛一會,空手而回,打道回府。

Whatsapp 入面睇到布吉嘅相,羨慕死!

人生之旅 - Day -25

因為發現唔見咗本護照,同時又唔夠瞓,心情超差。跟手又要攪 Proposal 嘅 Presentation, 友人打嚟問點解唔請假攪快証,對於呢個問題,响我腦海中係毫無任何懸念,因為份 Proposal 係我攪起,今日唔去 Present 嘅話,唔係我一個人嘅問題,係成間公司嘅問題。

晏晝同小雲食飯,傾起快証要點做,於是就諗住做完 Present 完就衝去入境處。點鬼之,個客嗰邊又遲開始之餘又多嘢問,會議結束嘅時候已經係4點半,我諗去到入境處已經打烊,所以都係返公司。

夜晚同師弟、靚仔徒弟、同埋一班同事食韓燒,除咗好食菜,重有豬牛羊海鮮燒,外加石頭飯,好豐盛嘅一餐。當大家知道我唔見咗本護照嘅時候,都係响驚訝 Mode, 我唯有無奈地苦笑。

返到屋企,因為上次去旅行係同徒弟仔一齊,所以打咗俾徒弟仔,無人聽,Anyway, 開始全間房地氈式搜尋。搵搵吓,徒弟仔打返返嚟,問咗該問嘅問題,答案亦都係預期之內,因為搵嘢搵到悶悶地,就一路搵一路傾電話。傾咗個幾鐘,該搵嘅地方亦都搵過晒,徒弟仔亦講咗句好有建設性嘅提議。掛起電話,睇咗入境處星期六幾時開,準備第二朝就過去試快証,同時再搵埋星期六夜機去布吉嘅資料,準備隨時衝去機場買機票飛過去。去到入境處嘅網頁,原來辦証件係要派籌,額滿即止,即係如果 Present 完份 Proposal 後 Walk-in 係無嘢做到,今日無嘥到時間都算係一件好事。再一次攪到3點幾,第二朝要7點起身...

Monday, March 24, 2014

人生之旅 - Day -26

上星期四唔知點解無任何約會,於是決定去買嘢。旅行要輕便,之前睇過一個 Blogger, 建議旅行用 Hom 嘅快乾內褲,又做個少少 Study, 話 Hom 嘅質料噤著,著幾年都唔會 wear, CK嗰啲無得比云云,於是就去咗 Sogo 嘅專門店一逛。見啲質地幾好咁,於是除咗快乾款,又買多咗平時著嘅。跟住又話二千蚊有9折,差二百蚊咁,又 Sell 一條好 colorful 嘅款式,但個人嚟講真係唔係好接受到,於是揀咗對襪就算數。最後因為折咗,所以都係加多9蚊就可以埋單,亦送咗兩個 Pack 衫袋。


返到屋企,原本諗住搵倫敦嘅酒店做暫時嘅居所,搵搵吓又想執去布吉嘅行李,點知執吓執吓,發現少咗樣好重要嘅嘢,就係本護照。於是就反轉咗成間房起勢咁搵,最後求救於母親大人,被人省咗一鑊之後,一齊去搵都係無結果,攪到三點幾先瞓。

溫泉之旅

話說同事們話去旅行,於是上星期週未就去咗惠州龍門。一大朝早就出發,其實係我嘅死穴,不過既然某些條件達到,即係有些事情已經早有安排。

搭咗八點嘅跨境巴士,九點唔駛就到咗黃崗嘅集合地點,導遊係惠州客家人,上車之後就講咗幾句,上咗 Highway 就俾熄咪俾大家瞌咗陣。經過油站,大家交過水費,稍作伸展後,就去一個客家農莊食客家菜。客家農莊入面有出羊,亦都有養雞、魚之類。徒弟仔見到隻鴨「鴨鴨」聲咁不斷叫,佢又有樣學樣咁叫埋一份。


雖然惠州有好多天然嘅風景,但路中亦遇上唔少工廠


之後去到一個當地嘅大型商場,但係因為大修緊,所以無乜嘢行。最有睇頭嘅係個頂層有間機鋪,機鋪入面係有間 K 房唱歌。因為無乜嘢行,導遊就帶咗我地去附近嘅市集買生果。買完生果,就出發去酒店。


同事們都去浸溫泉,我就去咗影風景










當然唔少得嘅係 Slit-scan, 人少少,加上比香港慢嘅步速,效果滿意。


六點半左右,就去咗食晚飯,又係客家菜,但係客家渡假村,又 Expect 啲乜嘢呢? 食完晚飯,去咗渡假村入面嘅士多買嘢,睇緊有乜嘢買嗰陣,又發現亮點「好多魚」,實在太攪笑。


買完嘢之後大家返房玩 Dixon, Take 6, 衾棉胎,同潛烏龜。隨住香港有人急 call, 遊戲亦都結束。

臨入房前,影多一幅全境圖



攪完香港嘅 case, 都已經差唔多兩點,瞓瞓吓 Inception 咗兩層,場境係响酒店房度,聽見徒弟仔好大聲咁講電話,嘈醒咗一層,眼前一片漆黑,意識到道自己發緊夢之後,再醒多一次。徒弟仔重瞓緊,間房好亦好寧靜,去過洗手間又再瞓過。八點左右,聽到少少聲,原來徒弟仔醒咗,去浸溫泉的說。個人醒咗,就執嘢。

食完早餐後,完多幾次 Dixon, 係時候返歸。途中經過妨歐陸小鎮嘅地產項目
 

悶悶地,影返幅男神現身照
 

職業病,捉Typo...


返上車嘅時候,搵到個景好啱做 fake miniture


個名令我諗起流動的哈爾城堡...
 

返去關口路上,見到日落西山,有三個街口嘅機會去捕捉,但最啱嗰福都係 Out focus 咗... 似乎响車度拍攝有難度


喵喵怪要睇波所以走先,剩低一行五人想去東門小肥羊,兩架的車去。點知一架車咗我哋去周一品小肥羊,另一架連路都唔識行,折返羅湖口岸。因為另一架車嘅人無 Data, Whatsapp 被廢,幸好無開到飛行模式,可以用 SMS 保持聯絡。8點半左右終於人齊了,離開旅遊巴差唔多兩個鐘,一於不吃白不吃,衝入小肥羊。


食完飯,搭地鐵,經羅湖口岸過關。都好耐未踏足過呢個口岸,俾我嘅印象係好多人,好多層電梯,同埋好多彎要轉,今次嘅感覺無變,但總算完成今次嘅旅程。

Popular Posts