善事

呢排公司有好多慈善活動，之前有個 Jeans for Genes, 跟住 Ice Bucket Challenge 又終於殺到嚟，啲 VP 同 Director 聽日會响停車場淋冰，跟住又有人話玩半馬捐錢俾 Orchid.

其中一個估一個玻璃樽入面有幾多粒 M&M 嘅遊戲，我估一係430粒, 一係480粒，最後估咗430粒。點知今日個揭曉嘅結果係470, 都話我無抽獎命，二揀一都揀咗個遠咁多嘅。

Anyway, 今日又開咗好多會，好似無乜點做過實事，略嫌生產力不足，究竟幾時先可以唔駛開咁多會?

感覺不爽中...

第六週

新嘅工作，無可避免地要 Build up 個 Credit, 但 Credit Build 得快亦 Burn 得快。踏入第六週，朝早俾人讚完，放工就因為上星期唔小心而出錯。只可以怪自己聽力出事，唯有再慢慢努力去 Build Credit.

食晏嗰陣去陣銀行改地址，因為業主係一位老人家，鐘意收支票，於是就順便 Order 埋本支票簿。食完晏，張糧單就派到埋嚟，都幾神奇吓，因為今個月返咗成個月工，糧係出多咗，但係稅就俾少咗，完全唔知發生乜事。睇嚟要再觀察多一個月，先摸得清件事係點。

搬屋

今日開始搬嘢，本來只係諗住搬一兩轉先，但係因為噚晚瞓得唔係咁好，無乜精神去做 Gym, 決定全日都搬屋。


第一次搬嘅係全景鏡，順便影埋間屋全景




因為諗住一個禮拜逐啲逐的咁搬，所以搬咗啲唔係日常會用嘅嘢先。除咗書之外，其中有一套係靚仔魔術師响唔同階段送嘅禮物。呢一套嘢係收到幅啤牌嗰一刻已經諗好點擺，今日終於呈現到出嚟。


跟住去附近搵吓有無啱嘅嘢買，但係就搵似乎無乜嘢啱使，最後決定去返 Kilburn 睇吓。Kilburn 始終都係買嘢嘅好地方，係除咗間 Gym 太臭之外，其實係好好住。買好嘢，又執一埋嘢過新居。

啲中型影相嘅道具都差唔多响晒度，等一切安頓好就可以開新 Project.


攪咗成日，火車差不多到，返去食個晚餐。

P.S. 呢排早咗天黑，之前到咗11點都未黑晒，依家去到9點已經差唔多黑晒，感覺上叫做正常返少少。

新居

過咗四個月，終於租到屋，今日去 Agent 度簽 Contract, 途中要轉搭巴士，等巴士嘅時候，見到 Nokia 嘅廣告，因為 Windows Phone 嘅情義結，最後影低咗落嚟


响巴士度，經過一間賭博公司，見到個幾攪笑嘅 Poster, 睇嚟曼聯今季依然不被睇好


其實今次都算好彩，因為去到 Agent 嘅 Office, 發現係一個迷你倉，一去到嘅時候，見唔到似地產公司嘅地方，唔通又俾人呃? 打個電話，原來地址係啱嘅，個迷你倉其實係兼營 Serviced Office. 好快女代理人就出嚟接我，唔個 Office 係幾細吓，細過我依家住緊間房，不過對一人公司嚟講剛剛好無浪費。

好快 Review 份約，有少少問題但好快就解決咗，之後就簽約，再去新屋度見業主。途中問佢間 Office 唔响街度，點搵客呢? 原來都開咗業好多年，主要做物業管理，最長嗰間屋佢攪咗廿五年。

好快就到咗新屋，業主依家交晒俾個仔 Andy 打理啲物業，因為只需要交電同市政稅，就同我講大概要點做。一切攪掂之後，就接過鎖匙送走 Andy.

對住個廳，真係幾舒服吓，廚房開放式有洗衣機有焗爐，但微波爐欠奉。


間房就擺咗張雙人床，不過似乎就無位擺書枱，睇嚟買都廢事了。洗手間亦都剛剛好。


窗外嘅風景，當然係一流


跟住就出咗去買日用品同煮食用品咁，買吓買吓都唔少嘢。咁啱 Virgin Media 擺 Booth, Sign-up 埋個 Broadband, 不過要三個禮拜後先有人上嚟裝，於是就俾咗少少 Credit, 等扣晒先再俾月費的說。

近黃昏，返咗依家住嘅嗰度煮咗少少嘢食，再搬多少少嘢去新屋，正好係日落時份


Check 過 CityMapper, 地鐵未有耐到，响新屋坐多陣，真係好享受，一個屬於自己嘅空間。


有一個星期嘅時間慢慢搬，可惜 Broadband 唔可以好快咁攪掂，Otherwise 可以响呢個 Long Weekend 搬好晒佢。

冷

香港人唔知幾時開始被訓練到好服從權威，除咗話地鐵職員處理得唔好之餘，我想問月台嗰班乘客點解無幫手? 係咪地鐵職員話唔俾幫就唔去幫? 香港人太習慣唔關自己事就懶得理，對唔公義嘅事默不作聲，將責任推到別人身上，如果有人肯多行一步，成件事嘅結局就可以唔同。

每日一字 23

好多時，中文翻譯係短過英文，難得一見嘅例外: 肌萎縮性脊髓側索硬化症
Amyotrophic Lateral Sclerosis
Amyotrophic comes from the Greek word amyotrophia: a- means "no", myo refers to "muscle", and trophia means "nourishment"; amyotrophia therefore means "no muscle nourishment," which describes the characteristic atrophy of the sufferer's disused muscle tissue. Lateral identifies the areas in a person's spinal cord where portions of the nerve cells that are affected are located. As this area degenerates it leads to scarring or hardening ("sclerosis") in the region.

百萬雄師

噚日差不多放工嗰陣，有個公司全體大會，不過距離太遠，完全聽唔到佢哋講乜。不過會後，大家就去咗附近嘅酒吧飲嘢傾計食飯，公司埋單。

今日下晝，又因為慶祝有一百萬個客而開 Pizza 午宴，咁多個 Pizza 盒，其實都幾壯觀吓。


不過今日就真係忙到傻咗，好多會要開，寫寫吓份 Doc, 又開吓會，開完會，又要寫 Doc. 第一次感覺完全無 Mood, 於是就去咗搵嘢食，好彩公司唔缺糖，整咗幾粒朱古力嚟食，無乜效，食多個蘋果，好似好啲，跟住又要開會了。開完會，又寫好份 Doc, 即刻閃人。

本來個天係落緊雨，但走嗰陣無雨，睇嚟個天好鐘意我。


因為噚晚同今日下晝都食得唔係幾健康，所以今晚決定去跳舞，坐地鐵嗰陣，見到好靚嘅夕陽


唔... 對於我呢個記憶力有限嘅人嚟講，似乎個街舞課唔係咁啱我，可能唔再去得咁密了，等搬好屋再諗。

差啲唔記得講，似乎今個禮拜可以簽租約，好快可以有個自己嘅地方了，希望可以順利。

佔中 反佔中

今日終於明白點解警察部門會剩係計維園嘅數字，閙劇上演咗。呢場鬧劇除咗係人數方面，亦都係警察方面，經過今次之後，我唔知警察下年可以點處理七一遊行，如果人數少過反佔中，係咪應該更寬鬆處理七一?

鬧劇中，TVB 有阿婆被問到知為乜嘢而遊行，Cable 亦都有問到小朋友乜嘢係中國嘅普選，佢哋唔知係好正常，因為可哋可以當佢哋都係無知嘅村民。但我保證，你問年年行七一嘅人爭取緊乜，佢哋會答爭取緊民主同普選。咁乜嘢係民主，乜嘢係普選呢? 真係一人一票咁簡單? 我只可以舉個簡單嘅例子，北韓金正恩係一人一票選出嚟。

有中國特式嘅社會主義，即係唔係社會主義。
有中國特式嘅普選，不解釋了。

週末日常

都好耐無將一本書拎起手上面睇，星期五晚睇咗本响書展買嘅書，教人點樣 Run 一間網台。其實入面所寫嘅方法，已經俾作者响網台度講過晒，本書只係作為一個紀綠，有少少被騙嘅感覺。因為已經略知一二，所以一晚就睇完，無乜大驚喜。

第二朝，突然忙起上嚟，史東問起去芬蘭嘅事，於是就將遊記、收响 Google Doc 嘅洗費、同埋 GPS Log 分享，希望有用。睇住個遊記嘅後記同埋份 Google Doc, 原來間冰屋酒店貴咗差不多10%, 但係電話咭依家就抵用好多，以前係逐 MB 計，依家有無限上嘅 Plan 了，三年嘅時間，真係大不同。

跟住，又收到母親大人唔見手機嘅消息，打個電話睇吓發生乜嘢事，對於一個好日唔搭的士嘅人，一搭的士就出事，再聽吓其他故仔咁，好彩嘅唔係乜嘢大件事。

食完晏，就到靚仔魔術師出場，响佢張相度留咗個言，可能踢爆咗一啲嘢，之後張相就變走咗，大家又 chit chat 咗一陣。

突然諗起之前睇本書入面嘅一啲嘢，就搵咗 Snoopy 仔傾計，點知一傾就傾咗幾個鐘。

食過晚飯，繼續寫有關全景圖嘅事，其實噚晚開咗個頭，不過就剩係得個頭，夜晚完成埋佢。本來想攪埋教材，係最難嘅題目，好耐未挑戰過，但係呢幾日搵到個大方向，都係暫時擱置，搵日精神少少先攪。

全景圖 Q & A

友人 Post 咗條有關全景圖失敗作嘅 Link, 問發生緊咩事。

全景圖制作嘅原理有兩種，其中一種係 Photo Stitching, 顧名思義，就係將一堆相砌埋一齊，咁當然 App 本身會幫啲相對好位，再幫你拉直張相，至於詳情係點，就要搵識 Linear Algebra 嘅人講


因為有時間嘅差距，當有人出現，時間嘅差別會令人响唔同位置，就會出現一啲唔同邏輯嘅畫面。而唔同嘅 App, 會有唔同嘅方法去盡量減少人同雲呢啲會郁嘅嘢帶嚟嘅影響。


另一種方法，就係 Slit-scan. 試相像一部相機得一條好細嘅罅曝光，而底片因時間而移動，如果相機唔郁，效果就會係咁


相機跟住郁嘅話，就會係咁


再用手機嘅陀螺儀去做 Calibration，就可以變成一幅靚嘅全景圖


如果係曝光條罅由上至下移動，而物件自轉，就可以出現身體扭曲嘅效果。


同樣道理，如果曝光條罅嘅移動方向，同物件嘅移動方向一樣嘅話，就會有拉長嘅效果


只要曝光條罅嘅移動停頓，再將物件移動，要製造雙正極電池亦唔係難事


總括嚟講，係時間、空間、同影像嘅組合。

睇返條 Link 入面嘅相，其實有唔少係特登造出嚟，事關全景始終係用嚟影景，唔係影人。

再起舞

今日係好特別嘅日子，第一次見客。個客唔响倫敦，要搭成個鐘嘅的士去 Hampshire, 响倫敦西南面。架的士可以坐八個人，司機一個，司機隔籬一個，後面六個，我哋一行七個人，唔太想同人 Social, 於是就坐咗車頭，瞓咗一陣，好舒服。


其實個會同我無乜大關係，只係 Kick off meeting, 亮吓相咁。呢個 Kick off, 就咁傾咗兩個鐘，呢兩個鐘嘅內容，係講 Assumptions, 如果唔係 Call 咗的士，夠鐘走人，個會係可以傾落去。

因為有人早走咗，所以坐咗車尾，佢哋其實都係傾個 Project 可以點做呀，又傾吓去邊度食飯正咁，有時又傾吓買樓。無乜大 Follow 到細節，唔知點解突然問我幾歲，咁就唯有叫佢哋估吓，有廿五六到卅一都有，乜佢哋似得幾年經驗嘅人可以做到 Tech Lead? 似乎俾人睇小咗添... 係咪要搵方法洩漏吓霸氣呢? 當然，公佈完答案，個個都話 No Way.

返到公司已經六點半，不過今晚唔係留响公司，亦都唔係返歸，而係去 Studio 度跳剔撻舞。所以今日有啲論盡，又要帶跳舞鞋，又要帶衫，同埋帶去開會嘅 Notebook, 成個背囊都係嘢。又因為個背囊，而無帶開嘅袋，所以無帶到啲 Pass, 攪到今日都幾唔方便吓。


因為搭錯車，所以遲咗啲，上唔到中級班，於是就等遲少少嘅初級班吓，可能係好耐無跳，雖然唔係好難嘅步法，但係都幾遲頓吓。


落堂之後換得衫嚟，都已經九點九，第一次咁夜都重响街度，不過原來倫敦嘅夜晚另有一番風味，可乎得閒可以玩吓夜攝。

權

工作，最忌係權責不清。今日差少少要發脾氣，但最後都俾理性羸咗，先解決咗件事先，之後慢慢再計。

話說啤梨上司上星期要我開個 Email Alias, 跟手又叫我用個 Alias 去散朝早份 Document. 係，我係遲咗開，係我衰，但 Service Desk 做嘢又要時間咁，都唔係話開就開到，咁 Send 乜鬼嘢 Document?

今朝又問點解無收到嘢，Shit, 一次誤會咗兩件事，個 Email Alias 係俾全世界，重要係俾逢星期二四嘅晏晝會用。我諗我英文真係太差，Catch 唔到你想做乜，你想放權，都唔係我一嚟到就放啦，家陣印度嗰邊嘅人都未係太啋我，吓吓都要撻你朵都唔係辦法啫。

解決方法，就唯有將一切問清問楚，呢幾日一定要煩吓你。

起舞

前幾晚開始搵邊度有地方跳剔撻舞，見到星期日有兩堂街舞課，於是就㨂咗其中一堂去玩吓。因為天雨關係，攪到地鐵部份地方水浸，於是要轉巴士去 Studio 度。去到之後，交好入會費，就等上堂。


又係天雨，導師遲到，又上一堂嘅導師幫手熱咗身先，一個鐘頭，轉睇間就過去，可能因為係初級班，難度不高，只係我呢度四肢不大協調嘅人唔係太跟到啲姿勢。

落完雨之後，太陽出來了，而地鐵亦都通返車，好順利咁返到房。


响房到抖咗一陣，出發去媽媽同學度拎信，探吓細路咁。吃過晚飯，玩過遊戲，談過工作說過政治，係時候返歸。去到地鐵站，見到呢幅 Poster, 唔知香港鐵路夠唔夠膽作出呢個 SLA.