Search This Blog

Sunday, February 28, 2016

日常 4

成個星期個人非常煩燥,難得週末,決定暫時忘記工作嘅事,閒逛一番。

屋企附近係荷李活道,有好多畫廊,行吓一間,行多幾步又一間,雖然唔係間間啱睇,但遇到啱睇嘅,係不失為生活調劑嘅好方法。


行到 PMQ 附近嘅畫廊,見到 Space Invader 嘅作品


其實今日嘅目的地主要係 PMQ, 咁啱有人打籃球比賽,行過少少,Space Invader 再度响眼前。


用咗兩個鐘行晒兩座入面嘅舖頭,見得靚嘢多,心情亦都舒暢咗。

Thursday, February 18, 2016

變革

各知名網上評論員大打網戰,不如還原基本: 投票嘅意義係投可以代表到你嘅人一票

連自己想投嘅一票都捍衛唔到,咁呢啲評論員就只係無底線地將自己嘅立場放响大局上,為求穩定大局,就喪失咗改變局面嘅勇氣,又點可以靠呢班評論員監察政府? 最多只係做到小罵大幫忙嘅程度,為社會改變做不了甚麼。講白啲,無用。

再者,評論員們又用緊乜嘢理據去以上帝視覺去判斷大局? 重用緊歷史數據? 話唔定到咗猴年,成個大局已經唔同咗。

Sunday, February 14, 2016

講古系列 11: 人日

女媧除咗補天,重會造人。話說女媧响造人之前,正月初一到初六,分別造出雞、狗、羊、豬、馬,即係所謂嘅六畜。到咗初七,女媧無休息到,反而走去用黃土同埋水,跟住自己個樣子造出啲小泥人,一批批咁造,但係覺得太慢,於是搵咗條藤條,點咗啲泥漿,一揮之下,泥漿水滴散落到一地都係,重變咗做人添。話說女媧親手造嗰批都係達官貴人,用泥漿造嗰批就係平民百姓,或者,鬧人賤過地底泥,都係咁樣嚟。Anyway, 就係咁初七就變成咗人日。到咗初八,再造埋縠物,就係咁,農曆初一至初八,就係中國嘅創世紀。

初九都有人生日,應該話係神先啱,初九係天日,即係玉皇大帝嘅生日。跟據明王逵嘅《蠡海集》記載:「神明降誕,以義起者也。玉帝生於正月初九日者,陽數始於一,而極於九,原始要終也。」

初十都有嘢生日,不過係石頭嘅生日,初十係地日。任何係石頭造嘅哋都唔多郁得,即係啲磨呀、石槌、碾嗰啲,對於一個石器時代嘅人,都幾大件事。

Tuesday, February 9, 2016

開年文

選擇性執法,係執法部門嘅大忌。眾所週知,好多新界丁屋都係起多過三層嘅時候,千呎豪宅地庫僭建亦有常聞,但通常收到清拆令嘅,就往往係住喺幾百呎嘅小市民,重要係上唔知幾多手僭建嘅添。

新年新界燒炮杖,年年都燒,新聞年年播完燒炮杖就話管有炮杖係犯法。而違例泊車抄牌,响新年會鬆手少少亦係潛規則。但點解新年夜市就偏偏揸正嚟做?

Yea, 犯咗法就唔啱,但窮人犯法,比富人犯法,比新界土豪犯法,似乎就更會被先取締。
Yea, 新年流流,應該一團和氣,要俾少少人情味,法律不外乎人情,但小販例外。

這是不公平、有違法治精神嘅選擇性執法,既然已經有往績,網絡廿三過咗之後,選擇性執法就梗㗎啦!

學生讀歷史,係要知歷史大事嘅背景,以史為鑑。政不通,人不和,就係香港今時今日嘅局面。重點係政先不通,人至會不和,執法者作為前線,係政不通嘅幫兇,甚至係人不和嘅催化劑。

Popular Posts