日本靚仔

點解日本可以出咁多靚仔? 尤其 Johnny's 事務所，有堂本剛、瀧澤秀明，睇完野豬後，又迷上咗山下智久。剛睇完欺詐獵人，遲 D 再睇求婚大作戰。

風雨飄搖

呢個月真係大起大落，中國基金未見到今日嘅價唔計住，今個月非常之波動。都好彩，响無大動作之下，都有 6% 增長，可喜可賀。

可惜嘅係 MPF 成績好似強差人意，大跌之後仲未返返去月頭嘅價值，重要係已經計埋今個月嘅供款，HSBC/恆生系嘅 MPF 嘅成績好唔掂，係未 update 定係點呢? 就等你禮拜日會唔會 update 睇睇。

今個月會有額外收入，出糧後嘅現金水平都頗高，可以行街 shopping, 可以選擇買多一手嘅宏利，可以等待時機嘅來臨。但洗錢嘅季節已過，要買嘅上幾個月都買得七七八八，唔多再駛行街。宏利 D 股息又要同加拿大政府分，唔多著數。暫時最好嘅選擇，依然係用時間等待，以逸代勞。

向 650 的一天出發

多謝各界支持，成功突圍 600. 估唔到短短嘅四個月內做到我以前要用兩年做嘅事。

體能訓練

第一次做，之前無食飽，做得好唔暢順，感覺完全唔掂，下次要食飽 D 先得。

野豬大改造

好耐未睇過描寫友情同人際關係嘅劇，好正! 青春無敵，真係好希望可以返返去讀書嘅日子。

一個冷酷嘅人，係咪都要有一個熱情嘅人响身邊做朋友? 冷酷嘅人都會嫌熱情嘅人煩? 熱情嘅人又會有方法令冷酷嘅人接受佢? 熱情同冷酷嘅角色又有時會調轉? 當朋友要離開，又會唔會經常做 D 以前一齊做嘅事又或者學佢會做嘅事去懷念佢?

冷酷，可以裝出來，但熱情卻只有用心去感應。熱情的人可以溶化冷酷，但冷酷的人一樣可以催毁熱情。誰勝誰負，就只有時間可以証明。

盂蘭節

每年呢個時候，街上面都會見到 D 起勢咁燒衣紙嘅人，又臭又唔浪費又唔環保...

優勝劣敗

經過今個月，手頭上 provision 緊嘅股票嘅質素全部現形，正考慮加碼月供平保，再遠離大市，學習各名人實行懶人投資法。

Training

實行新人培訓大計，每月一 topic.

資金

今次調整，手上嘅股票大部份都 100% 回復至月頭水平，宏利同平保仲有微升添。MPF 就唔知，HSBC 系係兩個禮拜 refresh 一次，無得 check 住。再睇返中國基金，原來上星期五都跌得幾金吓，又唔駛再諗住。

今日發現，資金原來唔係無，係個人懶，遲遲唔去入張支票。Anyway, 時光一去不返，何況，有錢亦唔等於有時間睇住個市，一於靜觀其變。道指 200 天平均線守到，50 天平均線衝唔衝到上去呢? 關前莫擺陣，小心睇位入。

預言家

對於股市，總有不少預言家。有一位移居美國嘅朋友，响年半前返嚟香港，話美國樓市將會好唔掂，會完全退出股市云云。年半後佢又返嚟香港，就當然覺得家陣跌係應該啦!

但計落條數，如果跟佢全退出，你估下場會係點? 以宏利嚟計算，大概係 230 蚊左右，上星期五經過成個市調整後有 274 蚊，有足足 20% 嘅差別。今次大跌市，小弟嘅 portfolio 都只係跌咗 5% 左右。計落，都係我羸。所以話，投資嘅嘢信自己好! 自己為自己做嘅決定負責。

再睇返圖表，就算剩計美國嘅 Dow Jones, 都只係跌到去 3 個月前嘅水平，香港人熱愛嘅匯豐係 5 個月前，中資金融股係兩個月。

重點係，預言家講嘅嘢一定會中，但唔知係幾時嘅。我始於都係信「貨幣＋心理＝趨勢」多 D. 如果要我為此做一個小預言，如今要各國央行同 FED 大量供水，但人心似乎未夠穩，相信要牛皮一段時間，先可以再決定趨勢。

說穿了，要理解股市，原來係一科 Behavioral Science.

P.S.: 以 8 月 1 號做 reference, 宏利抗跌能力不俗 (4.5%)，隻中國基金亦唔差 (2.5%)。其他中資股就差唔多無咗 10%, 但都無跌穿買入價，呢個組合，小弟好滿意，強烈考慮再買入中國基金。

P.P.S.: 匯豐/恆生嘅 MPF, 分別無咗 7.6% 同 5.8%, 表現強差人意。

錢從何來?

FED 下調息率 0.5% 大開水喉去救市。
如果財務公司肯借平錢俾小市民，我估一樣可以托市。

鋪田

要鍛練肌用，就要有原材料: 蛋白質
雞、魚、蛋、豆類制品不可缺少

五行欠水

大跌市但無資金，嘥晒。有錢但今日唔去執嗰 D, 唔好呻。
成手貨遇著跌市嘅感覺，無乜特別，個個都知投資梗會有升有跌，一日未吐現，勝負未定。如果佢可以跌夠二三十年，咁跌到渣到無我又心甘命抵啫。

如果，呢個跌市可以响半個月後發生，今年我個 portfolio 又可以升唔少，但唔係我要賺嘅錢，無所謂啦! (嚴重酸葡萄 feel~~~)

缺點

要 sell 一個客，就係當個客係乜都唔識，呢個係知道咗好耐嘅事。但係實行起上嚟有困難，好多嘢講得太深入時，個客唔明，就會變成缺點。無論個客有幾 hands on, 太過 detail, 會令佢多咗一個難題，但你上去 sell 佢，本來係為佢解缺問題。唯有去觀察識 sell 嘅人點 sell 去改進自己。

檯

廣東話嘅「檯」有兩種用法，各走極端。人家喜歡可以將你擺上神檯，有鑊又可以擺你上豬肉檯。
同大公司合作，都真係要小心，佢肯搵你當然開心，但係有乜唔對路，背後都真係幾論盡。唔係驚你識嗰 D, 係驚你唔識嗰 D.

公司剛剛拎到個 Best .Net Consultant Partner, 係其中一個例子，Discuss 個 case, 係另一個。Infrastructure 嘢，始終制唔過，一定無下次，LAMP 算數，起碼無政治風險。科學家相信數字，但普通人相信感覺。又係 decision making 堂嘅第一句: "human is retard." 根本就係借題發揮。錯，就錯在我無 check 清楚個 test output, 「一子錯，滿盤皆落索」。

Uwants

Uwants 竟然要賣廣告?! 重要係响電視同電台賣，都真係有錢得緊要。

無死錯人

一切，都响計劃內，今次都計得幾準。
新人開始發功，可以另外培育下一位，令新人可以 production 到，係呢幾個月嘅重點工作。
Project, 有煲緊嘅、有趕緊嘅、亦有開始埋單嘅，呢個，就係成個 pipeline, 到今日，都叫做 pipeline 得幾好。所謂貨如輪轉，客似雲來，就係要咁。雖然唔係賣實貨，但賣嘅係 service 亦都唔錯。

煲 Case

呢排煲好多 case, 同大老闆傾過，原來有好多美國嘅 case, 都係煲左成年幾兩年，香港就真係做唔到，個幾月都已經當無咗。

工人遇著兵

噚日响灣仔搭巴士返屋企，响中環一段塞咗一陣車，睇新聞，先知道出咗事。

「秀才遇著兵，有理說不清」咁工人呢? 當警察、高官等公務員享受住高薪厚祿，工人們卻响高時、低薪、開工不足嘅情況下生活。當連一個人有手有腳但生活無安全感，圍一可以做嘅就係表達出嚟、爭取權益。張建宗叫克制係無用，家陣係開唔到飯嘅問題，開唔到飯，自然要求生，叫你出嚟見吓面接吓信你都唔肯，連特首要求嘅「走入民眾」都做唔到，都唔知你做乜嘢勞工及福利局局長囉!

This is a death or alive issue, not a game play! 如果要顧及甚麼遊戲規則，你係响度草菅人命。

呆滯嘅一天

五點瞓，十點起身，雖然八號波，但返到屋企繼續作戰，終於完成要完成嘅嘢。唔夠瞓，個人好呆... 下次，都係唔好夜媽媽手痕開工，越做越精神!

時間=金錢

呢幾日手痕，想重拖故技，玩吓窩輪咁。但呢個禮拜實在太忙，有時間睇價但無時間賣貨，所以呢幾日升咗無賣到出去，好彩係閒錢啫，就睇吓到期前次按呢鑊嘢仲可以拉到個市幾低。今次係 FA 將 TA 擊敗，但我依然相信 regression 呢回事，恆指就話仲有空間去 250 天平均線，但 5 號仔再跌，就真係變長跌，我就真係搵定錢入都得。

Anyway, 呢幾日個市又高又低咁，我個 portfolio 又跟住走，真係小 D 定力都唔得。不過忙人有忙人好嘅，一於唔理個市，等個佢自動波，橫豎今年已經做到最基本嘅 15% 目標，再升上去都只係 bonus. 將個人投資轉為被動，主力開拓自己嘅事業，準備好資金再投資，讓金錢為自己工作。

P.S.: 記得《一個投機者的告白》提過「貨幣＋心理＝趨勢」，如今市場無錢，亦非常憂慮，個市會跌一排，其實係應該。

與神共聚

美國同學返嚟香港，俾佢點咗我去安排... 麻煩，佢仲得閒過我又有乜理由要我去安排?! 最後嗰刻，咪又係佢自己 take over 返!

今次嘅主角，就當然唔係佢啦，事關上個禮拜已經見過。今次最主要見吓個就結婚嘅師弟，同好耐無見嘅女玩伴。好懷念當年同佢玩 N64 嘅 Smash Brother, 希望遲 D 可以响 Wii 度再決一高下。

風起雲湧

好耐無打過風，但一打風，就出事。

當有二千人响地鐡中環站

又或者要迫上巴士，有時，話大陸人唔守秩序，其實香港人亦唔好得去邊

當打風嗰陣，無遮自然會淋濕

但有遮，亦都唔見得好過，小學老師都有教，打風出街，千祈唔好開遮


點都好，有風嘅夏天，比悶熱嘅夏天好!

路遙知馬力

雖然被政敵說為有能力，但係响在生嘅時候對民主政制發展無貢獻，有權而唔為人民服務，只懂辦蛇宴與社會服務機構爭民心，刻薄 D 講句，你去啦!

洗錢季節

無論個理財計劃做得幾好都好，都總會有 D 經常性非經常性開支。

每年夏天，都儲唔到錢，例如交保險，又或者交學費，又有時要應付 D 突發事件，年年如是。

電車

同朋友唱完 K, 响街上感受到微風，心血來潮，決定坐電車返屋企，感覺良好。

8 月中

1997 年 8 月中，我去咗美國
2001 年 8 月中，我返嚟香港

依家，係我離開香港十週年暨回歸香港六週年... 亦係亞洲金融風暴十週年暨美國九一一恐佈襲擊六週年。

人生好多巧合，要長期離開一個地方而一個月內就會發生某些國際大事，呢個係我其中一個巧合。

學者幽默

沈教授嘅一篇响明報嘅文章，最後都要幽明光社一默，令人會心微笑。

假如被綁的是其他國民…… 2007年8月5日

【咫尺地球】23名南韓義工在阿富汗被塔利班份子綁架，南韓外交的軟、硬實力備受正面考驗，各方人等紛紛自動請纓獻策調解，人質依然未放，還死了兩人。假如被綁架的是其他國民，他國政府的營救方式肯定另有蹊徑，儘管不能保證有效，但從南韓的技窮，始終可見其綜合國力未臻上乘。

美國：表面上定必拒絕釋放被點名交換的塔利班囚犯，卻會向武裝分子承諾交換「隱形人質」(未公開曝光的塔利班囚犯)或「未來人質」(釋放下一批將捕獲的塔利班)。不少美國定義下的未經審訊「拘留者」(detainees / enemy combatants)，既不是正式戰犯(POWs/war combatants)、又不受平民法保護，呆在關塔那摩基地，過去數年都因為莫名其妙的原因獲釋，就是交易的最佳籌碼。

英國：外交部會嘗試啟動歷年和伊拉克、阿富汗一帶部落酋長交往的歷史檔案(畢竟當地曾是英國殖民地與勢力範圍)，找出掌握了痛腳的當地部落酋長，通過他們來分化綁匪。事實上，這次綁匪來自不同集團，既有意識形態較強烈的塔利班新生代，也有與塔利班只屬策略同盟關係的普什圖族地方軍閥，後者明顯更愛錢，容易受英式談判專家分化。

中國：慣用方法是通過盟國巴基斯坦向塔利班施壓，巴國的施壓方式大概是「嚴打」由邊境往塔利班的武器輸送，同時暗示假如塔利班放人，卻「可能」會「巧合」地通過友好軍閥獲得新武器。這不是說中國向巴基斯坦供應武器建立的「傳統友誼」，就是為了操控、影響反西方武裝分子，但巴國曾作為北京的白手套和恐怖分子打交道，當毫無疑問。

法國：在阿富汗沒有紮根，不會有特別表現，但假如被綁國民處於前法屬非洲，則會通過當地教會或文化組織(像法國文化協會)，動員地方長老營救。與南韓邀請長老營救不同的是，法國動員的長老要是不能達成使命，會受到文化排斥，失去文化領袖地位。不少法國人在非洲綁架根本不被報導，都是通過文化渠道獲釋。單靠聲望、沒有其他配合，也許足以令國家賣帳，但不足以令非國家綁匪賣帳，例如日本曾動員奠堂級恐怖分子、曾參與巴勒斯坦反以運動的赤軍之母重信房子，向伊拉克薩達姆要回日本人質，卻不能照辦煮碗，救出被扎卡維斬首的青年香田證生。

其他歐盟國家：以「附勢策略」(bandwagon)動員整個歐盟向上述任何一國施壓，以其獨門方式協助救人。月前被塔利班綁架的意大利人獲釋、阿富汗政府願意以塔利班囚犯交換，多少是上述策略的成果，而不是意大利外交的單獨成果。然而就是南韓加入東盟，也不能有同樣效果，因為東盟只是「水平機關」(inter- governtalism)，各國平等，沒有上繳主權予歐盟式垂直機制(supra-nationalism)，不能構成整合壓力。

香港：最有效自然是邀請明光社造訪阿富汗，與塔利班交流重整道德的心得，曉以大義，必能感動頑酋放人，令塔利班不敢再夜郎自大，功德無量。

中文大學亞太研究所研究助理教授 沈旭暉

會考評級

評級用英文字母，簡單易明，無人會誤會 A 級會差過 B 級。
用數目字，真係考 IQ. 日常生活，1 級比 2 級好，但偏偏會考就 1 級係最低，5* 級係最好...

就好似英文嘅 priority 咁，有人用數字代表，咁究竟 1 係高 D priority, 定 5 係高 D priority? 都係用英文好 D, High, Low, Med, 清楚易明。

DJ

一個成功嘅 DJ, 係咪就係天天攪笑，又或者日日串咀?

今日嘅 DJ, 不再係 Disc Jockey, 只係一個 Broadcaster (播音員) 或者係藝員。播歌，就只係播 D 派台歌，無技術可言。做 DJ 嘅功力，其實要响四個鐘頭嘅深宵音樂節目或者其他純音樂節目磨練出嚟。如果你可以播歌四個鐘都唔會令人覺得悶，令人唔知時間嘅飛逝，咁就係一個合格嘅 DJ. 當今商台可以做到嘅，可能剩係得返余宜發.

好嘅 DJ 一個一個咁離開商台，真係唔知發生乜事...

遺產

點解遺產分配只可以係正數?

嗰 D 財務公司，如果無押借貸，個欠債人無端端瓜咗老襯，又無買到保險，咁咪好蝕?

越位關係

兩年前，梁禮勤响七月尾做埋最後一日嘅一切從音樂開始，離開咗商台。今年，又係七月尾，劉偉恆最埋最後一日嘅我恆我素，亦離開咗。亨恆勤從此成為絕響。其實只係今日無無聊用 google 想睇睇梁禮勤嘅近況，無耐，搵到嘅反而係劉偉恆離開商台嘅結果。

當年，剛剛由美國返嚟，有一晚無無聊聊聽到「越位關位」呢個節目，從此著迷。亦因為呢個節目，星期六夜瞓時又開埋收音機去聽一切從音樂開始。可惜，呢個節目陪咗我一年半載後，就無咗，梁禮勤亦都走埋。到名嘴門走埋，我亦都無再聽一台，轉咗去二台，內容 ok, 說說笑笑又一天。

聽到余宜發嘅一切從音樂開始，令我諗起梁禮勤嘅做法，發覺都 ok 喎，咁有時夜瞓又開著個收音機。但當有其他人代班，完全跌晒 watt. 純音樂節目，並唔係剩係音樂嘅，聽眾始終鐘意同主持人互動，就好似梁禮勤當年讀 fax, 睇 newsgroup, 接電話，今日余宜發亦都會讀留言版，希望其他 DJ 可以學習。

諮詢

有說，中環填海工程早已响 2002-2003 年諮詢，點解到今時今日先反對?

好簡單，2002-2003 年，23條同 SARS 都比任何一樣事大，呢項填海諮詢真係搵鬼睬你。2004 保護維港行動 做過嘢格，係政府覺得打完官司羸咗就無問題啫! 到家陣要拆，話反對就梗係遲，咁點解由 day 1 有得救嗰陣再諮詢多次? 無腦就係無腦，昨日嘅因就係今日嘅果。

如果有得揀，用納稅人嘅錢去賠俾承建商，都好過俾班無腦嘅高官。承建商俾咗錢佢唔會拆呢拆路，無腦嘅高官為咗要「有嘢做」會出好多無腦嘅政策。

無憂

我上司曾經話過我係一個唔係好駛點煩惱嘅人。或者係我怕煩，所以避得就避，通常都唔駛點煩。

好似 18K 事件咁，好多人都嘩嘩聲。但呢一兩日，又响第二個 project 度搵得返，本來就無煩過，依家就更輕鬆。唔駛出去接 freelance 都有額外收入，係一件美好嘅事，起碼多咗空餘嘅時間做自己想做嘅事。

呢 D 空餘時間同額外收入，令到個人有時間空間响自己嘅方向發展，係公司新制度下帶嚟嘅好處。

往事

有 D 大學嘅 video, 我以為隨住我個舊 hard 壞咗而會唔見，但原來我有一部份 backup 咗，仲要俾我啊媽搵歌聽嗰陣無意發現。剛剛又同一班同學飯局，依家睇返，真係百般滋味。時光流逝，回憶，就只有用科技留住，不論好與壞，事情已經發生咗。

今日嘅同學，同往日嘅同學，經六年光景，本質上實在差無幾。過多十年後，唔知大家會變成點呢?