講古系列 1: 無情雞 + 炒魷魚

今日公司聚餐，食到一碟雞，問起有乜意頭。我就 up 咗以前年尾「無情雞」嘅習俗。為免知其然而不知其所以然，今晚再上網查吓。

只係大致上經濟唔好嘅年尾做尾牙 (或者年尾最後嗰餐)，老闆會特別加一碟雞做餸 (以前嘅工係包食包住，今時今日大部份大陸廠都係)。開飯時候，老闆會挾件雞頭過你，話辛苦晒云云。識趣嘅食完飯後，真係要執包袱走人。無謂無世界都知你應該走，自己又賴死唔走。

亦有說會响開牙嗰日 (正月初二) 先會有無情雞出現，等大家開開心心過完年先，開市前就要執拾細遠，另謀高就。

講開執包袱，唔覺意睇到「炒魷魚」嘅典故。原來，以前嘅人執包袱，唔係執剩係幾件衫就 OK. 包食包住，無話包有被舖。所以被舖自備，到執包袱嗰陣，就要將被舖捲起。而捲起咗嘅被舖，睇落就好似炒熟咗嘅魷魚咁，「炒魷魚」因而成為俾人辭退嘅俗稱。