有早餐卷，就請你好好放低。歐陸早餐就食得多，日式早餐就第一次食，有玉子燒，食咗好多件。又有粥有飯有湯，白粥加昆布，又幾好味喎!
食完早餐，返房執好行李，再瞌一陣，等車出火車站。走出去酒店對面影吓相，影吓 Time-Lapse. 可惜今日雖然天晴，但雲層低，好難見到富士山嘅真面目。
影完之後，差不多要座酒店車返火車站，發現唔見咗個鏡頭蓋，就叫司機等一等。好彩搵得返個蓋，於是再影多張全景，先再上車。
去到火車站，諗住寄咗個行李入 Locker 先，點知 Full 晒喎... 好多人就咁放咗個行李入 Locker 房，但係唔放心，就再搵地方放。好彩車站入面個 Tourist Information 指咗個可以寄存行李嘅地方，可以一個背囊再遊走富士五湖地區。
第一站係天上山，响河口湖側，用咗少少時間排隊買飛。上咗䌫車，去到山腰，個景靚到大家都嘩嘩聲
上到天上山，依然好大舊雲遮住，唯有等
等嘅其間，食杯雪糕解暑，有幾種味道揀，天氣有啲熱，決定買杯偏酸嘅白桃味解一解暑
天上山其實都無乜嘢睇，係有個鳥居同一個天上之鐘
等咗幾十分鐘，啲雲終於都差不多飄走晒，終於見到富士山嘅真身。影咗幾張相，就落山趕去另一個景點。
落山嗰陣，一陣大風吹過，慢天櫻花花瓣，大家又再嘩嘩聲，不過相機影唔切了
落咗山，行去附近商店，有一個好熟悉嘅包裝，好地道 Feel, 買咗支，味道一樣咁地道
行去到便利店，預計無時間坐底好好食晏，於是就買咗個包同腐皮壽司，一路行一路食
返火車站中途，見到啲政黨海報，個長沢乜乜乜好面善，有啲似猿渡五郎
食完個包，剛剛去到去富士芝櫻嘅巴士站，等咗一陣，就上到車，個腐皮壽司似乎要落車先食得
未到會場，個富士山就好似一幅畫，或者一毎投影，好唔真實
落咗車，就換張入場券
因為開得20%嘅花，所以無相片中咁狀觀，遲啲嚟可能會好啲
影完相，係時候返去火車站，不過架車差不多滿，原來巴士嘅走廊位都可以坐人
返到火車站，拎返行李，好口渴，買咗支桃味嘅水飲，一來有少少味道，二來凍冰冰可以解吓暑
因為唔知幾時返，所以又無 Book 到巴士，但今次就無咁好彩，無死雞執，要搭火車。由於有一程係私營鐵路，所以要買兩張飛
去到大月站轉車
因為唔係指定席，所以要行去遠遠嘅車卡上車
對面有個女性專用車卡，但入面似乎男人多過女人
終於到新宿火車站喇!
原來酒店都唔近，行咗10至15分鐘左右，先到酒店。雖然係單人房，但唔係話太細。
係時候祭五臟廟，走咗去橫街，求其入咗一間鋪頭，又係指手畫腳嘅時候，嗌咗碗 DX 乜乜乜，我剩係知道有蛋做料，其他都唔太清楚，總之煮到嚟就食
食飽後就去夜攝
週圍行吓，入咗去間免稅店，都有好幾層好多嘢賣，由衫褲鞋襪、化粧用品、到家品電器都有。最大開眼界嘅係，放兒童玩具個 Segment, 隔籬係賣成人玩具...
買咗幾對襪，走出免稅店，原來差不多就係歌舞伎町
入面係消閒餘樂嘅地方，入咗一間遊戲中心睇
除咗打機之後，重有公仔夾
有女仔 Figure, 女仔 Figure, 同埋女仔 Figure,
男仔 Figure 都有
附近重有好多扭蛋機，唔係好記得呢套係咩卡通添
這是 Live Show 麼?
影得差不多，返酒店途中，見到百貨公司都玩 EVA
又見到一班人好努力咁跳舞
返酒店之前，經過便利店，想買啲生果，香蕉就免，呢兩日想食番茄呢啲偏酸嘅蔬果。
重有呢啲透明遮，臨走前一定要買返把
返酒店途中，見到有人响路邊練街舞，所謂台上十分鐘台下十年功就係呢啲
係俾失明人任用呢嗎?
酒店附近修路
酒店房入面有三張咭，有一張得日文，唔知佢講乜
今日好似去咗好多地方，算超額完成了。
No comments:
Post a Comment