食過早餐，按照行程坐地鐵去巴士站，呢個巴士站同嚟嗰個巴士站地點唔同，不過都幾方便。跟住發現，個行李個轆有啲唔穩陣，係隨時甩嗰隻，睇嚟要小心啲用，一個唔覺意真係甩咗，用手抽幾公斤都幾係嘢。似乎十幾英磅嘅貨色，只係用到兩次旅行，唔係咁抵玩，下次都係洗多少少錢買靚少少。
到咗站之後唔使一陣，架巴士就到咗。又係雙層巴士，不過今次全車滿座，都幾迫吓，好彩窗口都算乾淨，可以影吓相。
因為車程稍長，又橫跨 Lunch Time, 原來架車會停响捷克入面嘅食肆一陣，趕晒啲人落車。噢! 我啲捷克克朗無放入銀包，無錢買嘢食，連厠所都去唔到。
到咗布拉格之後，要買地鐵飛，但係售票機就剩係食 coins, 可能因為除夕，無乜商店開門，於是就去咗地鐵站附近嘅士多仔買少少零食，順便去斨錢。
斨完錢買完飛搭地鐵，再轉電車，差少少 Miss 咗班電車，好彩都趕得切。
落咗電車要行一段路仔，間房好骨子，可謂麻雀雖小五臟俱全。
放好行李之後，接待員話附近有 Lidl, 於是就去買咗，但係又因為除夕，早收... 都係差半個鐘咋... 好彩附近有間 Tesco Express, 應該同倫敦一樣開到夜晚11點。途中撞到一對朋友，一個丹麥嚟，一個英格蘭嚟，佢哋都係想去 Lidl 買嘢，又係食咗閉門羹，於是就一齊去 Testco Express.
買完嘢之後，就去食晚餐，搭地鐵去咗中央車站睇吓有咩食，有 Burger King 就當然係去食個 Whopper Junior.
食完嘢再搭地鐵去 Charles Bridge. 比起其他大城市，布拉格嘅地鐵系統相對簡單。就好似十幾年前嘅香港地鐵咁。
睇住個地圖，感覺就好似 Mini-Metro 嘅遊戲咁。
出咗地鐵站口，就响 Charles Bridge 附近，啲燈光打得都幾靚吓，反正未有耐到12點，於是就週圍行吓影吓相。
原來連儂牆亦都响 Charles Bridge 附近，又𥄫吓先，都幾緊貼香港嘅情況
有排都未到午夜，去咗附近嘅麥記抖一抖，呢杯係香港無嘅雲呢嗱味奶昔，其實想試好耐，今日終於試到，原來無咗朱古力嗰種甜味配襯，味道並不討喜，怪不知得香港無賣。
之後就响 Charles Bridge 度等，時不時都有民眾燒嘅煙花出現
越近零辰，煙花嘅密度就越高
搭正零辰一刻，就一發不可收拾
煙花放完後，跟住人潮去搭地鐵，哈，有對情侶走去跑扶手電梯，於是有人呼叫吶喊，有人玩埋一份，氣氛熱鬧非常。
好，上到地面之後，點知原來地鐵係有，但電車欠奉，於是唯有行返酒店了。行返走店嘛，Google 大神話搭多一兩個站會近啲，到最後都係要行多半個鐘，兩三點先到房間，四點先有得瞓...
No comments:
Post a Comment