第二票

有號稱民主嘅黨派話自己幫市民爭取到一人兩票，咁就衍生出一個好簡單嘅邏輯問題: 選舉有三個步驟，提名、參選同投票。第二票嘅產生，就偏偏無被市民去提名同參選，剩得個投票權。直接 D 嚟講，就係假民主。

點解提名權同參選權同樣重要? 你睇吓龐一鳴、是但男、林依麗呢 D, 俾咗5萬蚊，就可以上電台、電視台盡抒已見。可能你會話呢 D 係騎呢人，都係上吓電視駁出位。但係其實一個文明開放嘅社會，就係可以包容呢 D 騎呢人，而無可否認嘅係，騎呢人係社會組成嘅一部份，佢哋都有佢哋要代表嘅一群。

第二票其實可能就係所謂普選特首嘅翻版，即係剩得返投票權嘅選舉。呢個唔係就係泛民一真都反對嘅制度咩? 大家唔好唔記得，投票就係授權嘅象徵，你投咗第二票，就即係話你接受呢種模式嘅「普選」，咁到時傾普選特首嘅時候，中央就有好大條道理咁將你嘅提名權同參選權剝奪。

第二票將好多選民都推向無奈嘅選擇，响台灣叫做含淚投票。但係為咗未來，呢一票絕對不能投。