話說工黨好勤力咁宣傳，今朝落樓嗰陣，重有新嘅傳單派入嚟。
本來都想投咗票先返工，但今日遲咗少少出門，都係放工先去投票。
响地鐵站嘅免費報紙，當然亦會有講大選入面，各黨嘅形勢，似乎因為兩個大黨勢均力敵，投票率會幾高吓。
放咗工，就去到投票站投票。呢度唔使帶身份証明文件，只要講得出你個名同住址，就可以攞張選票。原來我住呢區有9個候選人，除咗大黨同獨立候選人，重有啲自己比較少見嘅黨，例如 Workers Revolutionary Party, Europeans Party, 同埋 The Above and Beyond Party. 頭嗰兩個大概都估到一個幫工人階級，一個親歐，但 The Above and Beyond Party 嘛... 上網一查，係一個專門推動响選票入面加入白票選項嘅政黨 (即係 None of Above)，真係孤陋寡聞。
返到屋企，睇返啲同選舉有關嘅郵件，工黨真係好出力，除咗一張自民黨冋一張選舉通知書之外，都係工黨嘅傳單，可惜吖，將我個姓攪錯咗...
投完票，可以响 Facebook 打咭，今日一朝早就响度問我投唔投票，反正個 Status 幾特別，打埋張咭。之後就手痕地 Click 咗入個 Status 度，原來有其他嘢睇!
話時話，點解女仕們咁湧躍嘅呢? 係男仕們無咁鐘意打咭，無咁鐘意用 Facebook, 定無咁鐘意政治?
十點鐘，又手㾗去問吓 Google 有乜嘢新聞，點知.. 🙇
大神呀，你呢個答案實在太令人驚喜喇嘛... 既然聽朝先有結果，咁今晚都係好好咁抖吓算。
至於我嗰票嘛，因為對英國嘅政治識條鐵嘅關係，亦無好詳細咁去搵各黨派嘅政綱，所以只可以用 Impression 去投票。首先工黨啲傳單攪錯咗我個姓，已經大大咁扣分，有些機會... 至於細黨，因為好多都係理念型，執政會比較危險。睇開首相答問大會，卡梅倫俾我嘅感覺係一個有魄力嘅領袖，每個禮拜去接受質詢喎! 所謂 Politics is Talk, 可以嘅話，維持現狀，對我嚟講係最安全。
原來我都係一個討厭政治嘅人，不過响討厭政治之前，首先你要有一個... 代表到你嘅政府。
P.S.: 原來咁都有得賭，不過唔識睇賠率... 1/100 同 16/1, 即係點???
No comments:
Post a Comment