人工智能

AlphaGO 同圍棋高手對決，當你知道箇中原理，你可能會崩潰。

動漫迷一定記得响《全職獵人》入面，會長同蟻王對決嘅一幕。會長千手觀音嘅招式，縱使有無限嘅可能性，但因為每一個人都有自己嘅 Preference, 而將可能性大大降低。而蟻王最後就睇穿咗會長嘅 Pattern, 會長意識到不敵蟻王，最後就只可以出大招攬炒。

AI 嘅其中一個範疇就係搵出最 Optimal 嘅 Solution, 而搵嘢嚟講, 相信無人會反對 Google 係首屈一指。AlphaGO 其實就係去搵 Pattern, 再搵出最有機會取勝嘅棋法。聽說圍棋講求棋手個性、棋型、平衡呢啲，電腦唔會玩呢套囉! 只要 AlphaGO 搵出對方嘅 Pattern, 再勁嘅高手，到最後就只會輸。

唔好為人類輸咗而失落，因為人追求各方面嘅完美，電腦追求解決問題。即係你叫電腦去解決一個道德問題，例如:

有一群小朋友在外面玩，而那個地方有兩條鐵軌，一條還在使用，一條已經停用。只有一個小朋友選擇在停用的鐵軌上玩，其他的小朋友全都在仍在使用的鐵軌上玩﹔很不巧的，火車來了（而且理所當然的往上面有很多小孩的，仍在使用的鐵軌上行駛），而你正站在鐵軌的切換器旁，因此你能讓火車轉往停用的鐵軌，這樣的話你就可以救了大多數的小朋友，但是那名在停用鐵軌上的小朋友將被犧牲，你會怎麼辦？

電腦無辦法去自我衡量各種價值嘅比重，我哋只可以輸入自己嘅價值觀去得出計算結果。就算叫電腦由人類歷史中搵出 Pattern, 咁樣，輸入唔同嘅歷史時段或者事件，都會左右得出嘅計算結果，或者佢只可能得出大部份人會認同嘅結果，佢可能搵唔到路軌問題一個皆大歡喜嘅結局。

其實 AI 唔需要所有嘢都係最 Top, 佢只要比平常人做出更好嘅決策就得，而現實生活中，好多做投資嘅基金同銀行，都係用電腦計完一大餐之後就做買賣。落一個買盤或者賣盤或者無乜嘢，但試想像，如果人類嘅所有決策，到最後都係依電腦計算出嚟嘅結果去做，咁究竟係電腦幫緊人，定係人類變成電腦嘅奴隸? 當人類意識到嘅時候，就接受唔到被電腦「統治」，跟住就想反抗，咁科幻小說入面人機大戰嘅情節，就變得好 Make Sense 了。