真係要我答?

友人問

這邊廂投訴警察整損你，令你有傷痕，要生要死乜乜乜...嗰邊廂又要警察去捉向你拎雞蛋反對你的暴徒。

口口聲聲說看不明你不喜歡的法庭禁令的同時，又要洋鬼子律師向對你不利的人追究法律責任...

究竟是我太蠢不慬這些玩弄法冶為自己謀福利的招數，還是這些根本不是為這個社會可以接受的思考模式?

有時見到啲 Status 我唔知點答好，就例如噚日見到有藍絲 Page, 將女警同梁同學擺埋一齊，跟住寫著

網民傳來一張相，標題是《天與地》
大家有獨立思考能力，明辨醜惡和美麗的能力

當然，梁同學嗰張相係一張殘相。所謂「明辨醜惡和美麗的能力」，簡單嚟講即係以貌取人，或者你可能有，但獨立思考能力，Like 嘅人一定無囉，因為佢哋無諗過建制派同當權者入面，無邊個可以稱之為美麗，而個美麗嘅女警，就係為緊呢啲醜惡嘅人服務，咁究竟個女警係美麗定醜惡呢?

獨立思考，需要知識，無知識、無事實做基礎嘅獨立思考，係幻想。就例如好多人成日幻想佔領運動有外國勢力咁。

知識嘅嘢，自己搵又得，睇人哋分享嘅文章又得，就响今日，我就學識咗 Weapon Effect, 去解釋前警線警員嘅行為。如果你係藍絲嘅一員，我想問呢60日你學過啲乜嘢?

但既然朋友有問題，我好樂意答:

1. 要投訴警察，係咪就代表唔可以要求警察做事? 警察係授薪，佢要做事係理所當然。如果因為唔喜歡一個人就唔做事，呢個係乜嘢員工? 更何況係警察!
   
   呢條問題就好似有啲人話你犯法在先，所以就抵俾警察打咁。但對唔住，真係犯法在先，一樣會俾法律保障，就算法庭作出裁決被判定有罪，都唔代表你唔受法律保障。警察唔係就係執行法律嘅人咩? 問題中嘅矛盾，可以衍生出一個更大嘅矛盾，咁其實條問題係咪已經問錯咗呢?
   
   當然，入到監獄之後係咪有另一啲潛規則，我未入過去，答你唔到了。
2. 如果我响度寫 IT 嘢，我就算用廣東話寫完，任憑我點寫，都好難會令一般人明得晒當中想講嘅事。更何況係法律文件，法律嘅嘢，普通人識條鐵咩! 唔係就唔使搵律師，個個走去自辯啦!
3. 如果你知乜嘢係法治，就知呢條問題並唔成立。你可以玩弄法律，可以玩弄政治，但法治唔係法律加政治，只係一個慨念，可以歪曲，無得玩弄。問題唔成立,唔想猜度意思，所以等你攪清楚條問題先再答啦吓。

答就答完，聽得幾多入耳就隨緣。

P.S.: 唔知點解好多人以為我寫嘢嗰陣係燥底，但其實寫嘢嘅時候係最平靜嘅時候，燥底嘅時候，永遠表達唔到想講嘅嘢。