人生之旅 - Day 13

星期日，一朝早去咗拎新屋嘅鎖匙，之後就準備去 Passport Interview. Passport Office 响星期日會開，係一件幾特別嘅事，講過俾其他人之，全部都打咗個突。

拎完鎖匙，時間尚早，決定搭巴士過 Passport Office, 車程唔算長，大既係銅鑼灣搭巴士去上環嘅時間。到咗重有少少時間响附近嘅商場坐一陣。時辰到，就入 Passport Office, 過安檢，攞飛仔，等嗌 Number. Passport Interview 其實就只係 Verify 返啲文件齊唔齊，唔使十分鐘就攪掂，因為係 Fast Track, 所以一個星期後會寄過嚟。

下晝要搬屋，搬去一個無咁繁忙嘅地方，同屋嘅係一個意大利人同愛爾蘭人。啲砂煲罌罉齊全唔爛可用，終於可以煮少少嘢食。所謂煮少少嘢食，都係煮個麵加隻蛋咁。

意大利人對語言好有興趣，於是就教咗佢讀我個名，都讀得幾準添!

人生之旅 - Day 11

落咗去 Crawley 見工，個天落住毛毛細雨，要搭火車過落去，好神奇地，單程嘅火車要15磅幾，來回唔使17磅，本來都唔太信，但佢又真係 Print 咗兩張車飛出嚟。


之前嗰日個 Agent 叫我打過去俾佢 So that 佢可以俾多少少見工嘅意見，於是就打咗俾佢睇吓佢有乜嘢想講，查實今次係十幾年嚟第一次見工，多聽一個意見未嘗唔係一件好事。講開呢個 Agent 都好強勁，由打嚟到見工都唔使一個禮拜嘅時間，封 Interview confirmation 重有晒個 Interviewer 嘅資料，有啲乜嘢要留意咁。打完俾佢，經過差唔多一個鐘嘅火車，去到 Gatwick Airport, 再搭巴士。去巴士站嘅過程有少少轉折，但最後都上到巴士。

去到 Office 附近，去咗 M 記食飽做午餐，食完見到徒弟仔响 Whatsapp 度，見有少少時間，傾咗幾句咁，似乎我都真係好緊張吓。入到 Office, Interviewer 未 Ready, 等咗一陣。終於見到面，介紹完後入去佢辦公室，成個過程，一啲都唔緊張，其實就好似 Sell 客咁，只不過今次唔係 Sell Service, 係 Sell 自己。

今次見呢份工，個 Title 係 Enterprise Integration Architect, 見我嘅人係 Lead Enterprise Application Architect 嚟，因為佢哋用好多 BizTalk 嘢，但係又 Outsource 晒 BizTalk 嘅 Development 出去，變咗無人太清楚啲 Quality 得唔得，亦都無人 Define 到 Integration 要點做，每次個 Integration 就只係俾 Vendor 們撳住搶。呢個位，係希望可以搵人做返啲 Guidance 嘅嘢，Review Vendor 嘅 Quote, 同埋 Quality Control, 其實就係開正我嗰飯。面對住自己熟悉嘅事情，嗰道氣好自然咁散發到出嚟，所以Interview 嘅過程，大家都傾得好投契，差不多完結嘅時候，佢重新 Confirm 我一次係咪想做呢份工。其實之前一晚，已經盤算好晒，呢邊租屋又平少少，附近又有 Gym 同超級市場, 其實都幾好住，肯請我嘅話，一定嚟。同佢 Say 咗 Yes 之後，佢亦都話好大機會可以見 Chief Architect. 到見完 Chief Architect, 就可以見 HR 完成整個過程。

雖然落住毛毛細雨，但就懷住輕鬆嘅心情行出 Office 門口，心中大嗌住 Yes, 昂首闊步咁走去巴士站返歸。回程途中，靚仔徒弟話有嘢想問，於是就用傾 King 打咗俾佢，不過火車一入隧道，無 Signal, 最後都係用返 Facebook Messenger.

中途發現，我坐緊班車唔停我想落車個站，而停嗰班車之後一班就係，所以落咗車一陣，順便影吓全境圖。

上咗車之後，空閒非常，見好耐都無玩 Slit-scan, 就著咗個 App 影咗幾張


差唔多返到，另一個 Agent 打過嚟，話 Consultant 嗰份工 Ready 去見，不過係兩個禮拜後嘅朝早八點，希望响 Office Hour 之前完成咁話，雖然响香港做開，但係睇嚟倫敦做 Consultant 都唔易做。

人生之旅 - Day 10

一朝早經一位前輩介紹，叫做搵到人簽名，實在太好，大姐姐住响溫布頓，於是就坐火車過去一趟。


約咗差不多食晏時間，行到去一間叫 Paul 嘅餐廳，嗌咗個 Cheese and Ham Sandwich. 本來對一份普通嘅三文治無乜特別祈望，但係芝士同火腿原來又唔係太咸，同麵包一起入口係啱啱好唔會太淡，對於我呢個唔會太在意食物味道嘅人嚟講，係一種全新嘅體驗。

食過午飯，簽好晒名，反正有成個下晝，決定去網球場觀摩一吓。途中閒話家常，不經不覺就到咗球場。


無比賽，當然唔會有人打波，亦都無球星，但係就有紀念品賣，同埋有間都幾大吓嘅博物館。


紀念品嘅嘢，由 T-Shirt 到帽到球拍到水樽到Poster, 應有盡有，真係唔怕你精唔怕你呆只怕你唔來



入去博物館之前，咁啱收到個電話第二日有 Interview, 真係好彩，因為個博物館係响地底，落到去無 Signal, 就會錯失咗個機會。

博物館入面，收藏嘅除咗球星嘅衫同獎座，都有唔少網球史嘅介紹


參觀完室內，當然都要睇吓室外，其實都無乜特別嘅好睇，所以都係影咗少少到此一遊嘅相就閃人。



睇一場波嘛，都唔少錢


回程時，見到一個金漆郵筒



走之前响百貨公司度 High 咗個 Tea


回程時經 Waterloo 站，大站一個，呢日嘅旅程亦都結束

人生之旅 - Day 9

一早去咗 Passport Office 申請快證，所有文件都準備好，點知一見個官，佢就話唔得，因為個 Countersignatory 嗰個人唔係拎英國護照。真係死火，再打去約時間同問返條熱線，佢就只係 Advisory Hotline, 唔一定得喎，你唔早講...

於是食 Lunch 嗰陣，就四圍咁搵人幫手，拆騰忐忑嘅一日。

人生之旅 - Day 8

瞓咗覺好嘅，個人好精神，一著部手機，就有人打嚟。係 Job Agent 嚟，似乎復活節假後，大家都開始開工。唔接尤自可，一接就無停手


於是成日就係咁招呼班 Job Agent 了

人生之旅 - Day 7

決定唔 Join Fitness First, 因為都唔知到時搬嗰陣附近有無。Join 咗間遠少少嘅，就當行到去熱身。

去咗麥記食 Lunch, 同澳洲一樣，可以唔要薯條要沙律


响附近閒逛，時間差唔多，就去做 Gym. 做完 Gym, 感覺上雖然好似少咗啲設施，但都夠用嘅。好耐都未試過咁攰，去咗 Subway 買個三文治食。返到屋企，食完，睇返 YouTube 呀，漫畫之類咁，輕輕鬆鬆咁過咗一日。

差不多沖完涼嗰陣，想暈想暈咁，唔知發生咩事，唔通個三文治唔夠飽? 食多少少嘢之後，有少少喉嚨痛，似乎係作病，決定早啲瞓好啲。

人生之旅 - Day 6

一朝早無嘢做，就去咗另一間 Gym 度睇，不過因為落雨，有少少感覺好似唔係咁好。睇完間 Gym, 就去超級市場同葯房買咗少少食物同日用品。

食完 Lunch, 就去媽媽同學度攞個架，原來只係隔兩個地鐵站，好方便。去到之後，仔仔已經响門口迎接，真係好活潑，好得人鐘意。

傾咗一陣，有蛋撻食，當然做唔到好似香港嘅蛋撻咁，但係味道係一流。跟住就講緊點樣教仔仔中文，即係細細個嗰陣，好似都係死抄爛背咁學啲中文字，媽媽同學就問有無其他方法學呢? 之前記得睇過 TED 有人出過一套圖像教中文嘅事，於是就問咗 Google 大神，噢! 叫 Chineasy, 原來都幾平，十磅唔使一本書，十幾磅就有一套 Flash card.

之後又一齊食晚飯，傾多一陣就走。返到房間，便急不及待 Set 好個架，可以隨時開工了。

人生之旅 - Day 5

在晴朗的一天出發，食過早餐後，開始 Pack 好行李，因為要三點半左右先可以 Check-in 新嘅房間，所以响酒店度等吓。無聊之下，Download 咗套 ADT 嚟玩吓，原來 Setup 成個 Environment 到响 Emulator 度成功行到個 Hello World 都幾 Tricky. 攪吓攪吓，又到 Lunch time, 去咗地鐵站附近嘅 Wasabi, 買咗個齋炒麵食


悶悶地，又去 YouTube 睇吓片咁，去到三點半，打的去新嘅住址。新嘅住址响 Kilburn, 係一個幾多中東人嘅地方。

香港有十蚊店，美國有 Dollar Store, 原來英國都有類似嘅嘢


去到間屋度，都幾爛吓，絕對唔係長住嘅好地方，而且得張床、一個衣櫃同一張凳，連枱都無張。不過呢一刻無謂揀擇，應該諗點樣解決問題。其實，只要响張床度加個鞋盒，就可以用嚟做張臨時嘅書枱，於是就問媽媽同學有無。好好彩地，得到嘅唔單止係鞋盒，而係一個架，第二日過去攞。

叫做 Settle 好之後，就週圍行吓，响 Google Map 見到 Fitness First, 於是就行咗過去，都要成十幾分鐘。不過，Join 一個月唔可以俾 Cash, 一定要 Prepaid 四個月先得，唯有返去慢慢諗。


回程見到嘅 Graffiti, 不算得靚，夠 Colorful 咁


週圍逛，見到間 Chicken Cottage, 決定去入睇吓，招呼我嘅係中國人，傾咗幾句，醒咗隻雞搥我歎。


今日好好天，只是近黃昏

人生之旅 - Day 4

瞓咗八個鐘，今日心情好好多，因為復活節假期，都無乜特別嘢做到，於是決定跟住本旅遊書去行吓。

呢幾日其實都係好好天，原來無論酒店定係窗外嘅境色都幾靚吓


呢幾日早餐其實都係食呢幾樣嘢，多士搽果醬，Cereal, 同 Assorted Fruit


時間好快咁又到午飯時間，去咗附近嘅中國餐館開餐，嗌咗一客楊州炒飯


之後搭地鐵去 Piccadilly Circus, 見到風起了嘅電影 Poster


出咗地鐵站，就見到唔少人扮鬼扮馬


其實一場嚟到，都想睇吓有無平價飛賣，可惜唔太啱睇


行過少少，剛剛有人跳街舞


突然見到呢座建築物嘅色同個天撞得幾靚


不過影全境就嘛嘛


香港唔興嘅人力車，倫敦有進化版本


走到去 National Portrait Gallery, 一入去就見到好大嘅一幅相


其實，如果話韓國嘅整容技術整到個個都一樣，其實以前嘅畫師又何嘗唔係做緊同一件事


你諗得佢係邊個嗎?


行完 National Portrait Gallery, 再行到去 National Gallery, 人山人海的說，應該都係攪復活節嘅 Event.


不過，都係跟返旅遊書所講，入去 National Gallery, 睇吓的名畫先。幾年前嚟嗰陣，只係見到一堆畫，完全唔想去睇，今次有目的去睇，感覺差好遠。

睇完名畫，行返出嚟，原來係做緊復活 Cosplay, 興趣不大，閃


比起上次嚟，今次好似多咗隻雞擺响度，隻雞下面亦都吸引咗啲鴿聚集


本來想行去睇 Institute of Contemporary Arts 嘅 Gallery, 不過原來係私人經營，要一磅入場費，可以 Skip. 再行不遠就係白金漢宮，不過都幾遠吓，都係唔行。


附近嘅 Duke of York 銅像，呢一區真係無嘢多，最多就係銅像


今日行程結束，搭地鐵嗰陣，見到個左行右企嘅告示，其實香港係咪都應該豎個牌响度，等啲自由行唔好阻住晒。


呢個路牌，好似同香港唔同


買咗四份一隻雞做晚餐


行程匆匆，係因為個 Homestay 話七點可以 Check-in, 其實雖然都打咗輸數，但只好抱住良好願望去試一試，到最後，當然 Check-in 唔到，亦都無再覆我 Email. 亦都按計劃行事，去 Airbnb 到 Book 咗間房。一切都叫做安排好，等聽日去執行。