世界中心之旅 - Day 5

6點起身，7點5就有電話嚟話要出發，同預期一樣。今日遊藍山，去 Trip Advisor 度話有個 Private Tour 幾好，於是就報咗名。個司機兼導遊叫 Rob, 一個好多嘢講嘅人，講咗好多故仔，例如話英國人行藍山足足行咗廿唔年先由一邊去到另一邊咁。

遊藍山之前，去一個動物園摸袋熊睇樹熊同餵袋鼠。啲樹熊係幾得意嘅，如果係瞓覺嗰陣，但係醒咗就唔及熊貓可愛。啲袋鼠為咗食，原來都幾狼死，大家係度係咁爭食。之後影吓唔同嘅動物咁，唔係太特別。


離開動物園，去咗間賣生果嘅地方休息，生果呢幾日食唔少，都係買支嘢飲就算數。

跟住，就去到傳說中嘅秘密地方，係啊 Rob 發現，再清條路出嚟。


到午飯時間，去咗間酒店到食，間酒店都好耐歷史，呢輪裝修緊咁話。叫咗個 Chicken Schnitzel, 即係類似吉列雞扒咁，係澳洲主流菜式之一。


食飽飽，真係要入去國家公園，Rob 話可以坐纜車或者行去睇瀑布。見個瀑布幾靚，梗係要親身睇吓。最後，掛住睇瀑布，Miss 咗 Three Sisters. Rob 就再車我去睇到 Three Sisters 嘅地方。


係時候落山，落咗山後，回程唔係坐車走，而係坐船走。途中影連拍想做 Time Lapse, 但效果不佳...


晚飯就去咗 Food Court 買4份1隻雞，再去買盒士多啤梨做飯後果攪掂。之後寫 Blog, 執相，做 Geotagging, 攪到差唔多兩點先瞓。