今日七點鐘就起咗身,團友們未醒,唔知做乜好,唯有先上網。團友醒咗之後,食早餐,呢間酒店嘅早餐豐富好多,終於可以再食 Scrambled Egg, 重有牛角包添,不過無牛油味,一啲都唔香,食落都幾難食添...
食完早餐,執嘢 Check out, 但唔見咗兩個鎖,翻箱倒篋咁搵,原來收响個背囊度,搵完嘢,好熱... 執好嘢著好衫,Check out. 叫酒店幫我哋叫的士,出發去「老人村」。等的士嘅同時,同响對面嘅滑雪場影幾幅相。
俾我哋叫老人村係因為 Whatsapp 嗰陣打「聖誕」呢兩粒字太麻煩,總之大家明就得! 去到聖誕老人村,團友話比起兩日前落雨差好遠。放低行李响樓梯底,就去影相,之後再買 Postcard. 詢眾要求,買咗好多極光 Postcard. 有1蚊張嘅,亦都有8毫子張嘅,其實沿途都有買 D. 見靚、有特色就買。寫好 Postcard, 買郵票,7毫子嘅聖誕老人,亦有7毫半子嘅極光,當然又係買極光。
寄完 Postcard, 買郵品,睇中咗兩套郵票又唔貴,都係極光嚟,買嚟儲都好! 順便買幅月曆做聖誕禮物响公司 Party 交換,月曆買都有得著喇啩! 終於財散人安樂,購物完畢,差唔多 Lunch Time, 去食嘢。
友人嚟過,話村口有間地度燒三文魚好好食的說,諗起前兩日嗰碗三文魚湯,有少少唔敢試,但友人極力推介,人又到咗,不試白不試,一於去馬! 店內設備簡單,只係中間一個火爐用嚟燒三文魚,週圍放咗枱同凳坐。剛剛有三文魚燒緊,好快就上枱,聞落一陣魚味,有少少不詳嘅感覺。食一細件魚肉,咦?! OK 喎! 無魚嘅腥味,可以入口,而且屬於好食嗰隻添! 之後就大大啖咁食,正! 只要唔好食到層皮就 OK! 三文魚配沙津,一流! 麵包亦 OK, 唔太乾,就咁食都無問題。聽店主講,燒三文魚係佢哋最原始嘅食物云云。
食食吓發現,成個「餐碟」係用木做,即係可以當柴燒。再睇一睇佢個火爐,三文魚嘅油會流返入個爐助燃。而且因為呢個大火爐,根本唔使開䁔氣。如果無咁多客人有三文魚剩,三文魚可以放响金屬箱入面,金屬箱再放响爐頂保溫。呢個火爐嘅學問,實在太大喇!
醫完肚,再週圍行吓,去買手信嘅地方一睇,剛剛响 Post office 1蚊張嘅極光 Postcard, 只係5毫子張... 大家都話唔抵的說...
之後去聖誕老人所在嘅屋仔睇吓,相... 唔諗住同聖誕老人影,因為一個人又無乜咁好影,無乜紀念價值。跟住開始等天黑 (即係三點幾四點咁),等影夜境。時間一分一秒咁過,團友响度諗緊叫唔叫聖誕老人寄信俾男友,攪到天黑都未攪掂。
天黑後,落雪,不顧相機嘅生死去影相,一部無電再用另一部影,效果唔錯,只係鏡頭俾溶雪整到 D 光化晒。影飽相後,朋友都攪掂封信,無乜嘢好做,可以同團友分開打道回府。的士站有的士,拖埋行李即上直去機場。
因為太大雪班機遲咗廿分鐘先開,但已經無所謂,因為轉飛香港班機係要等多三個鐘。不過芬蘭最犀利嘅地方係 Connectivity, 就算係呢個「聖誕老人村」所在嘅小鎭 (Rovaniemi) 入面嘅機場,都有免費 Wifi, 滯留廿分鐘唔係問題! 起飛前,見乘客唔多,揀咗個窗口位坐,有車接近,原來噴溶雪劑! 溶雪劑一噴,機冀上嘅白雪即時消失!
飛到去 Helsinki, 跑道附近嘅草地都有一層雪,天氣真係有少少唔穩定,似乎我係一個招風雪嘅貴人。响候機室,又開始寫前一日嘅 Blog, 上網週圍睇吓咁,突然間有隻麻雀出現,本來想影張咁特別嘅情境,但有個細路走埋嚟,嚇走咗。
上機時間,改咗登機閘口?! 俾張登機證老點添! 好彩只係差一個閘... 上到機,問空姐拎耳塞 (香港帶嚟嗰對好似留低咗响酒店),嘩! 3M 出嘅,又係高質素產品。放去耳入面,靜! 連低頻噪音都無埋,靚過我嗰對! 之後等食晚餐,嚟嗰程想瞓唔想食,今晚剩係食麵包,無乜營養到過肚,唔食唔得。本來話有雞飯同牛肉配薯仔揀,諗住食雞。但服務員到咗,話剩得返牛喎... 我又唔太食牛嘅,算,我剩食薯仔。跟住睇落件牛,又唔太似牛,食一啖,唔覺有太濃嘅牛味,照食可也! 食飽,飲水,戴上眼罩耳塞瞓覺,呢程好舒服,只係醒咗一次。
旅程完滿結束!
Search This Blog
Wednesday, December 7, 2011
Subscribe to:
Post Comments (Atom)
Popular Posts
-
前幾日,睇到呢篇文 嬲爆!電車司機哭訴,竟被斥奴隸! 今日搵返出嚟嘅時候,見到另一篇謬論,先回: 1。歐、美各國發達或不發達民主國家。出糧時,最少4 % 扣去供EI unemployment insurance 失業保險,最少3 % pension 退休金,如非管理層,最...
-
Ten days ago, it was my 26th birthday. My colleagues have throw a small party at lunch. I also got a gift from a friend of mine in the eveni...
-
香港嘅社會運動,到最後散水嘅時候,都話會將運動「遍地開花」。但之後就只會隨住時間而忘記,又或者係每年一兩次嘅集會先再講起。 真正嘅片地開花,就只可以由教育體制、宣傳著手。政府要推國民教育又或者係每晚新聞前嘅國歌,就係要愛國愛黨嘅情操遍地開花。政府只要定好政策,拎到撥款,就可以...
-
响新聞度聽到政府官員响立法會講休「恬」空間,惡夢... 正字人去咗邊?
-
咁就一個月,之前寫咗個 program 仔去做 backup facebook 嘅 content. 跟住發現咗一個功能,反正一個月可以做個月結。因為 Like 係最簡易嘅動作,就用 Like 嚟做個小分析。 呢個走勢圖入面,大家重記唔記得每個高峰點發生過乜事? 頭10...
-
Sad but true... Confirmed: Microsoft Says It Will Open Source VB 6 Re:And we care why? (Score:4, Funny) by fragfoo (2018548) writes: on Th...
-
想當年响學校遇到一個非常之伯父嘅老師,見佢第一眼已經覺得佢好惡,求神拜佛希望佢唔好教我。當然,天主教學校對神神佛佛一慨不理,中三嗰年,就係佢教 Physics. 佢係湯 Sir, 湯應祥老師,係眾學生口中嘅蘋果佬。 蘋果佬嘅來源有兩種說法,有一說係似前學校門口有檔生果攤,學生...
-
給佔中三子和泛民議員的一封公開信 (美國)尹浩鏐 我是一個旅居美國快50 年的老華僑,原本不必為香港的前途擔憂,但我又不能不擔憂,因為那裡住著600萬我的親人同胞,不能眼看著他們被少數有心人帶入死胡同而不發一聲,我人微言輕,我的話你們不一定會聴得入耳,但我若不把心裡話吐出...
-
細個嗰陣,成日諗點解會有立法局,嗰陣覺得都咁多年,要立嘅法唔係應該一早立好晒喇咩? 大個之後,發現社會要進步,法律都要跟得上時代步伐。 睇返歷史,好多時都要跟隨社會嘅需要同科技嘅發展: 小巴 小巴本來就是白牌車你們知道嗎? 在五十年代, 新界有一種比巴士收費高的白牌車...
-
因為各種意外,影唔到熄燈嗰吓。 熄燈前 熄燈後 但係,其實除咗大廈外牆,好似無乜家庭熄燈。 另,今晚帶咗部行咗 CHDK 嘅相機,試一試 60 秒曝光影維多利亞港。點知,熄咗燈都係爆光,一片白色。另一樣唔太掂嘅,係個 focus, 點影都係 out 晒 focus...
No comments:
Post a Comment