最低工資

今日係五一勞動節之餘，亦係實施最低工資嘅日子。有幾條問題值得諗一諗:

1. 最低工資實施之後，有人被炒，係咪即係話呢 D 人手原本就係多餘嘅呢? 點解一間公司炒完人之後重可以維持到服務?
2. 最低工資實施之後，點解有薪金嘅加幅係可以高達三成? 係咪有部份階層嘅人嘅生活享受係建築响對其他人嘅壓榨之上?
3. 點解僱主只係投訴對僱員嘅加薪，而唔投訴地主加租? 難道幫你做事嘅唔係僱員而係地主?
4. 點解會有人因為剛畢業嘅大學生比清潔工低有問題? 大學生會一世洗大餅乎?

最低工資只係經濟體系入面嘅冰山一角，衍生出嚟嘅就業 (被人炒嗰批)、福利 (被人炒咗搵唔返工嗰批)、通脹 (彌補工資差距嗰筆錢)、強積金 (月薪制嗰批大多過5000蚊一個月)、住屋 (亦有機會多過7000蚊一個月嘅入息限制) 等等嘅問題，政府又考慮成點?

香港政府欠缺一套完整嘅經濟藍圖。