戲無益

呢張相係乜? 佢原本係一張硬咭紙，即係新買 D 大褸會掛住嗰隻。但因乜事會紕晒口，殘成咁? 其實只需要有少少水份再磨擦大概五六個鐘就會變成咁。

我當然無咁無聊去做呢件事，實情係買咗 smash brothers 後，用 gamecube 手掣去玩，但好快又玩到左手手指公痛，咪求其搵 D 嘢墊住嚟玩。手汗加每日一個鐘咁玩，一個星期左右，張咭紙就變成咁，可想而知對如果無嘢墊住，左手手指公皮膚做成嘅傷害有幾大。想當年，最高紀錄係 spring break 嗰陣每日狂煲幾個鐘，依家睇返都幾恐佈。不過，嗰陣係 N64 手掣，應該無咁傷。

張咭紙都好快會唔用得，但可以磨成咁，睇怕都好難有其他代替品。搵日試吓棄用 gamecube 手掣，用 wiimote 同 nunchunk 先。