之後去咗 Charles Bridge 附近嘅餐廳食午飯，嗌咗個炆豬肉配酸菜,真係好酸，唔識欣賞，舊豬肉都 OK 嘅。
食完嘢，走上去 Charles Bridge. 日頭嘅 Charles Bridge, 有畫畫嘅、有表演音樂嘅、有賣紀念品嘅，好不熱鬧。
經過呢個雕像，俾人摸到發晒光咁，原來係可以幫人帶嚟好運，而且，相傳保證你會再返嚟玩喎...
行到橋嘅盡頭
因為噚晚已經嚟過，經過橋之後，行多幾步，就到咗連儂牆
睇咗一陣，儲咗陣勇氣，揀好位置，Set 好腳架，出事添，草圖响手機，而手機要用嚟影 Time Lapse, 好彩有手機2號，影底咗手機嘅 Mon, 再儲多陣勇氣，就開始。而個過程都需要啲時間，因為都有唔少遊人，啲人開始駐足圍觀，真係有少少壓力，不過要做嘅事就要做完佢，而且仲係籌備咗成個幾月，連場革命都失敗埋，响自由嘅天空下，完成係必須。
收好腳架後，同一個帶交流團嘅法國人傾計，原來佢根本唔知乜事。跟住又有一個廣西嚟嘅女仔，想了解吓香港嘅狀況咁。之後，好自然地就混入人群中，影吓牆嘅其他作品
自由嘅空間，自由嘅牆，原來空白嘅 Memo 紙，好快就俾人寫上佢哋嘅字句
而自由當然係要遵守一啲規距，就好似以前中學校長嘅格言咁，自由與自律必須兼備
離開嘅時候，亦都日落西山 (下晝四點...)
日落後，可以影相嘅地方唔太多，於是就返房等天黑齊，再去影夜景。
因為唔知點解個手機上網好慢，返房前就去咗火車站間 Vodafone 問吓發生咩事，原來 Somehow 幫我轉咗日用 Plan, 本來有 1.5GB 用，依家變咗一日得返幾十 MB, 攪咗一輪，先攪得返 500 MB, 都費事去嘈佢，反正夠用。
入夜後，再坐車出舊城中心，有個 Christmas Market, 有嘢食，似乎可以一試，甜甜哋，幾好味。
週圍影吓，不過因為太多舖頭，再加棵聖誕樹，啲角度梗係爭少少
呢個不知名嘅 Monument 維修緊，唔太知係紀念啲乜嘢
似乎都無乜嘢好影，走出舊城中心睇吓都好，又係 Philharmonic 音樂廳，之前一日嚟過影過相，再影多次
遠眺 Prague Castle
附近可以影嘅都七七八八，是日行程結束。
No comments:
Post a Comment