康泰之旅 - 喜宴

出發前，Book 咗架 Minicab, 因為之前都會早到，時間預少咗，點知就遲晒大到。時間一分一秒咁過，好地地有路唔行，佢走咗行 High Street, 一條常塞嘅路段，於是叫司機盡快離開。之後，道路尚算暢通，不過臨到機場一段，因為之前有車禍，所以都用咗唔少時間，去到機場嗰陣，剩返一個鐘就要上機，飛奔去 Check-in, 總算無遲到。

上到機上面，揀咗個緊急逃生位，貪佢前面多啲空間，但係就無窗，下次都係唔揀呢一行。十二個鐘嘅機程，食咗晚餐後就開始瞓，每兩個鐘頭醒一次，都叫係咁易瞓咗六個鐘，之後玩吓手機、聽吓之前 Download 嘅網台節目咁。好快就到早餐時間，即係差不多到了。

返到屋企，差不多三點，按照行程買少少嘢，洗個面，都已經係五點，屋企部電腦開嚟開去都開唔到，睇嚟遲已經都咗部機嘅極限，好似都用咗成六、七年。算，就嚟六點，出發。

婚宴會場，未有識嘅人到，先搵好位坐低，再睇吓啲結婚相

有小食，有最鐘意嘅拍碎黃瓜，反正肚餓，整咗碟嚟濟五臟廟。啲酒嘛，今晚似乎有人不醉無歸了。


各人陸續到齊，一般婚宴程序: 影相、進場、開席、敬酒、送客... 隔籬一枱飲得好高興，臨走嘅時候重飲緊，而一開始影到嘅酒樽，有近一半响呢張枱度 -_-!


伴郎們都檔咗幾杯，但新郎哥點都難逃一劫，一時興起，亦小酌半杯，呢半杯破咗兩個慣例，但值得。曲終人散，第二日又要飛了，但唔太瞓得好。

P.S.: 新娘致辭嗰陣，除咗多謝雙方家長，重講咗同新郎哥籌備婚事嘅點滴，放咗一大個閃光彈，Sweet 爆!