黔滇之旅 - 圓通公園

昆明有個圓通寺。寺後就是圓通山。從前是一座荒山，現在是一個公園，就叫圓通公園。公園在山上。有亭，有臺，有池，有榭，有花，有樹，有鳥，有獸。後山沿珞，有一大片海棠，平時枯枝瘦葉，並不惹人注意，一到二、四月間，其是花團錦簇，變成一個花世界。

一朝早起身被人打醒，梳洗好後去返噚日間褔建鋪食早餐。唔太想食麵，叫咗碗淨雲吞，我估差唔多有廿粒，好滿足，再加蒸餃、炸餃、伴餃，份量好似同噚日差唔多，但係就食得太飽。

出發去圓通公園，中途經過圓通寺，但行極都唔覺圓通公園嘅入口，問途人，途人都話向前面行就係，但原來行多一步，其實遠在天邊，近在眼前。時間尚早，但已經有唔少人入園賞花。花並唔係好似花潮咁「上天下地都是花，可謂花天花地。」但的確賞心悅目。

影完一輪，搵個地方休息，本來想花下一 deal, 但無奈所有嘅枱都俾已經名花有主，唯有去其他無人多人嘅地方休息。Deal 之前買咗酼奶，好好食。玩咗幾舖，太陽出嚟，收拾好再影過。

影得都差唔多，走出公園，花潮後見人潮，人，其實就係中國唯一唔欠嘅事物。附近就係橋香園，一於去食碗過橋米線。叫咗碗進士米線，熱呼呼嘅湯，親手加入生料同米線，別有一番風味。行返酒店，執好行李，截的士到機場，飛機 delay, 再 deal 多幾舖。

落機後有幸地上到十分鐘後嘅直通巴，但不幸地過關時被其他人延誤咗少少時間，而錯過响過境後嘅巴士。幸而等多十幾分鐘又有另一班，到咗九龍站轉去灣仔嘅車，响中環落車，好快咁返到屋企。

Home sweet home!

黔滇之旅 - 昆明市郊野公園

七點幾，火車查飛，被強制起身。醒咗瞓唔返，稍略梳洗，望嚇窗多，終於知到點解中國係發展中國家，處處大興土木。望咗一個鐘，終於到火車站，落車搵的士站，個牌明明指住的士站嘅出口，但出到去唔單止唔見有的士站，連的士都無架，夠曬老點。

好不容易搵到架的士，耐何去酒店都塞咗唔少時間，無計，八九點係返工嘅繁忙時間。到咗酒店，好彩可以早 check-in. 放低行理，等友人準備好後，出發去食早餐，再去郊野公園。去到一間食福建米線的鋪頭，叫咗一碗麵、蒸餃、炸餃，大家都食得好滿足。

截咗架的士，途中司機係咁叫我哋包佢㗎車一日，到最後響中途黃土坡掉低咗我哋，唯有包另一架車上山。上到山買飛入公園，雖然眼瞓，但有好的預感，因為入到去無耐，就已經見到唔少花迎接我哋。落到公園底部，展覽緊唔同童話故事嘅公仔，例如係蠶豆樹上天遇到巨人、國王的新衣、迪士尼人物、變咗樣嘅叮噹同大雄等等。

去到山腳下嘅湖，有好多錦鯉，大家都不忘去玩春晚嘅魔術。差唔多時間食晏，但唔太覺有餐廳。再望過少少，有一條羊腸小徑，終於見到間餐廳，又係嗌咗四餸。食完飯，大家原來都有睡意，花亦都影得差唔多，出返去公園入口，截車返黃土坡。可惜我哋腳程比婆婆慢，比婆婆截咗架包車，唯有響路邊等。

巴士到，上車，瞓咗一覺，個人精神咗，聽今朝的士司機講去金殿都係十蚊，決定去金殿賞茶花。點知一去到，入場費三十個大洋，比的土司機老點咗，重要距離關園時間兩個鐘，放棄，再搭巴士去翠湖影海鷗。原來新巴响昆明都有服務，而且站重好密，差唔多一開車無耐就話到咗下一個站。入到去翠湖，好多海鷗，唔知佢哋響邊度嚟，總之好多好多，天上有，湖面有。差不多黃昏，要離開，多影幾幅日落照，返酒店放低裝備再出去食晚飯。

無耐雲南人似乎都係無辣不歡，除咗山羊肉，款款多多少少都落咗辣椒，最後晚差有少少美中不足。

黔滇之旅 - 音寨

瞓咗一覺好嘅，出去食咗個牛肉米線做早餐，搵去音寨嘅巴士站。雖然之前一晚睇過大概響邊度，但實在太唔起眼，真係少啲眼力都會 miss 咗個街口。買巴士飛後，時間尚早，響附近行一圈後再上巴士等開車。

到咗貴定盤江，入音寨前要行一段路，傳聞入景區之前係要收錢嘅，但收費處無人，厠所亦都鎖埋，有老點嘅成份，都唔知係好事定唔好事。唯有無視收費處，進入景區，沿路都係一片一片嘅油菜花，雖然花未開齊，但依然心曠神怡。而美中不足嘅係所謂嘅金海雪山，只見金海，不見雪山，傳說中嘅梨花唔見咗。

經過個半鐘嘅腳程，終於到寨門前，入寨前友人夫婦不忘到貴子亭影相，希望二人年生貴子。寨內解決好生理需要，洗手間外唔知點解出現國家消防法，響一個咁濕嘅地方似乎有少少多餘。再望遠少少，出現一幅又一幅嘅生育計劃宣傳，包括男性六大忌...

午飯時間，食農家菜，有番茄炒蛋、油菜花、排骨湯等等四餸一湯。原來油菜花食落，就好似日本芥末咁，有少少嗆鼻，亦難怪，原來油菜花榨出嚟嘅油就係「芥」花籽油。醫完肚，再週圍影相，太陽亦都出嚟，景色由淡黃變成鮮黃，我哋亦毫不客氣走入油菜田內影相。影完相，叫農家戶幫手召咗兩部電單車，以十倍嘅速度出返盤江。

夜晚要搭火車，所以速度咁行咗個圈搵食，但好多都無位，其間有間叫「環保餐廳」，不其然想起 environmental friendly dishes, -_- 最後響酒店出面嘅小菜館食飯。一樣係四餸一湯，飯前亦都 deal 一 deal 等餸到。飯後速度返酒店沖涼，再向火車站出發。

因為係軟臥位，所以可以入貴賓候車室，唔駛響出麵食大量嘅二手煙。有時間，再 deal 一 deal. 班車 delay 咗半個鐘，四個人一個車廂，要瞓上格床位，上去有少少難度，但經過一兩次經習，唔係大問題。只係另一個 worst case scenario 出現咗，就係架車好嘈好震，就算加咗耳塞，低頻嘅聲依然可以穿透耳塞，加上車廂不停震動，平均每兩個鐘醒一次，睡眼質素直線下降...

黔滇之旅 - 花溪公園

早起嘅一日，要坐直通巴上深圳去貴陽。要早起之餘，早到買唔到麵包做早餐，搭的士重要隧道費貴過車費，加上第一次去深圳坐飛機嘅不安，心情極唔老嚟。

去到深圳機場，聽聞響鐵梯等，點之有幾條嘅鐵梯，加上重要人物無手機 roaming, 老點指數上升。響機場兜咗個圈，想去麥記食個早晨全餐，週圍都有大大個 M 字 Logo, 就係搵唔到所在地，老點指數繼續上升。搵唔到麥記，唯有去 KFC. 叫咗個粥同一杯豆槳，估唔到 KFC 做 localization 咁厲害，如果佢有粢飯就更加好。食食嚇，突然聽到話其實酒店係無 book 到，worst case scenario 出現咗，似乎今次可以好好玩，第一次玩 no booking, 似乎係一個幾好嘅體驗.

等咗一陣，重要人物出現響眼前，加上食飽，心情靚返少少。跟手去 Check-in, 吹水、入閘。友人們玩 deal, 我要攪上網先。攪咗半個鐘先上到，但無耐就要上機，無計。但原來隻 3G 手指 roaming 係可以上到 facebook, 蘋果日報等網頁，呢個係一大發現。

飛到去貴陽，坐巴士到火車站，巴士播緊一套唔知幾多年前嘅戲，有洪金寶、成龍、張家輝幾位大明星，後生到呢~ 到站，第一件事搵酒店，附近有間 Home Inn, 二百幾蚊一晚，但友人們略嫌貴，去到一間叫金鑫嘅，咁鬼多金，有少少心涼。一入到去，電梯入面嘅羊騷撲鼻，心唸住一定係呢間。睇咗幾門房，真係住呢間。雖說一分錢一分貨，所有事物例如睇電視咁，都好似要搵到個竅門先用得到，但個厠所真係好唔得。Anyway, 只係一晚咁多。放好大型行李，輕裝去花溪公園。

搭的士去到花溪公園，天色就好似心情咁，灰灰暗暗，地下又濕，似乎老天爺話我知今日不宜出門，可惜一切太遲，已經無法改變今日嘅命運。入到公園，四圍逛搵桃花。但好似未到時候，到碧桃園，開嘅桃花就只係幾棵，大家就圍住嗰幾棵響度 burn 電池同 SD card. 影完花，再閒逛一陣，響水杉路附近影咗少少相，同時雨亦越落越大，唯有打道回府。

友人響搭的士嗰陣見到滇箘王，有說響昆明好出名，夜晚去試嚇云云。叫咗四餸一湯，似乎辣椒係貴州/雲南唔少得嘅嘢，大家都中曬招。唯有多叫一個麵，再千叮萬囑乜都唔好落，剩係落鹽。唔係係咪辣傻咗，加少少醋，食落份外好味。大家見到好似食剩太多嘢，傾緊會唔會 recycle D 飯餸，到最後得出一個 environmental friendly dishes 呢個 term. 好彩，大部份都清咗，應該唔會有咁噁心嘅事出現。

食飽，返酒店，一沖涼就出事，水溫唔夠 constant, 一係好熱，一係好凍，真係唔知點沖，有一半時間都係同水溫搏鬥。沖完涼，upload 完相，瞓覺。

財案狂想曲

財案宣佈前:
曾特首: 年底同下年都有選舉，今年財政預算案整差少少俾你哋想位。
曾主席: 好喎!
曾司長: 得，交俾我!

財案宣佈後:
曾司長: 嗱! 呢幾日我企硬㗎喇，之後我會咁咁咁咁咁...
曾主席: OK, 等我印定 D 成功爭取 Banner 先!

曾特首俾人撞後:
曾特首: 家陣點先，攪到我俾人揼! 快 D 同我攪點佢!!!
曾司長: 得，聽朝會宣佈「微」調。主席，聽日準時開會呀!
曾主席: 好好好! 即刻安排...

---

派 Cash 六千，退稅六千，的確係好多人得益。但新移民無得著，N 無依然 N 無，雖然的確唔係永久居民，對香港未夠多「貢獻」，但佢哋其實可能係最需要嘅一群，係咪應該對佢哋作出更多支援?

作為一個財政司司長，係應該對香港嘅經濟有一幅全面嘅藍圖。但係回歸以來咁多任，就只得梁司長有呢一幅藍圖，但就因為政治智彗不足，無端端俾人話「偷步」買車，做咗一年後俾香港人轟落台，之後俾一個飲完紅酒亂講嘢條條 fing 嘅 360 上位，再嚟個唔識轉彎又唔食人間煙火嘅公務員，所以香港人有今日嘅日子，某程度上係抵死。

回水

集體嗌回水，係每一次嘅黃子華棟篤笑結尾嘅指定動作。估唔到今年財政預算案一出，會全城一齊嗌回水。

計一計數，七百幾億盈餘除返開七百萬人，每人都可以分成萬蚊。二百四十億俾咗強積金，都仲有四百六十億剩，咁係咪可以再每人派返六千幾蚊呢?

今年同下年都係選舉年，泛民主派已經表明反對預算案，但建制派話會同曾司長傾，唔知今年年尾 D 成功爭取又會印 D 乜。

彩虹勇士

彩虹勇士號到香港，本身覺得綠色和平幾OK, 同友人一齊去睇吓。排隊，睇展覧，等上船，當中學到新 term: 非暴力直接行動

等上船期間，睇到地下有張貼紙貼咗响度，中國好多人都無乾淨嘅食水之類。跟住有位唔知係義工定授薪嘅工作人員，走上嚟搭訕，sell 每月捐錢。本來捐錢唔係問題，但 sell 嘢嘅手法有待改善:
1. 一走埋嚟話佢原來都無留意到地下張貼紙
2. 講解食水污染唔夠 pro, 有唔少錯漏
3. 話自己不滿其他慈善團體有太多錢而 cut 捐款
4. 把口剩係話唔係迫你捐，但不論態度上或者語氣上都响度迫緊你

最後嗰點都幾係嘢，友人老婆耍唔掂，我唯有都采取非暴力直接行動，一句腰落去，工作人員亦知難而退。事後，大家都討論點樣可以 sell 好 D. 遇著呢類人，對個機構嘅形象都幾大影響，就範嗰 D, 都可能一年後唔會再捐。不過難得呢位我估有四十歲嘅工作人員咁有火，希望可以改善改善。

其實呢位工作人員有一句都幾到肉，佢話：「你手機、寬頻駛唔駛個個月交錢？點解唔可以個個月為環保作出貢獻？」令我諗起心理學 Decision Science 上講嘅一件事: 人會覺得眼前、短線嘅事比長遠嘅事情嚟得重要。Anyway, 我覺得環保唔係靠捐錢，捐咗錢唔代表你可以浪費資源，捐錢唔係買贖罪卷。

環保要講生活習慣，剩係將備用電源熄咗佢，我啊媽話依家 D 電費平過當年我去咗美國嗰陣少少，即係依家同十幾年前嘅電費差唔多喎?!

至於捐錢嘅事，等我啖氣下咗先再講!

居安思危

曾司長話：「遇上經濟逆境時，政府會採取反週期策略。」
但實情係當遇上經濟逆境時，香港政府又話會量入為出。

黃子華講過：「居安果時要思危, 居危時又思危, 安嚟做乜鬼o野呀!」

家陣香港政府好境時又唔派錢，唔好境時又唔派錢，咁政府要咁多錢要嚟做乜呢?

奇妙的一天

初三赤口，同屋企人飲茶，跟住俾友人 call 上屋企拜年。拜年，本來諗住買柑，取其金銀滿屋。但超級市場嗰 D, 賣相欠佳，街市同街邊生果鋪又唔覺有開檔，辦館又賣到五個大洋一個，嘩! 都真係物以𥤱為貴。又唔想買糖果零食之類，一來要買兩合先抵，二來唔知友人啱唔啱食，三來又唔太健康。攪咗十幾份鐘，最後變咗買咗半打橙。

搭巴士到西環，原來西環街市嘅生果檔係開㗎?! 是但啦，都買咗，行上友人屋企，乜街邊嘅生果檔都係有開?! 原來新年買嘢，西環係方便過上環...

迎接我嘅除咗主人家，重有另外兩位友人，外加一個不合禮節嘅笑話。夠人，開枱玩 board game, 再玩三國殺，再玩 Monopoly Deal, 再玩三國殺... 中途又有人加入、離開，但個個都玩得不亦樂乎。盡興之時，已經係夜晚八點，食飯時間。

但年初三晚，都真係好難搵食，本來要去加記，但要等半個鐘。開嘅，大部份都係西餐，幾番探索，原來有另一間可以食小菜嘅地方。嗌好餸無耐，竟然話豆腐賣晒?! 有少少汗顏，唯有揀過另外一樣。晚飯過後，各自返歸。過咗一個充實嘅初三。

2011

呢幾年每年嘅最後一日，都會影少少嘅。今年難得可以早走，諗住去灣仔影日落，點知去到，原來冬天個太陽去咗南面，俾成個香港島遮住，真係明年請早。咁難得有個大靚位見到國金，不如唔走住，等埋今晚場 Show.

似乎香港島呢面唔係太多人，太早到無乜意思，所以拎咗支全景鏡影咗少少相，行吓坐吓。睇完幻彩詠香江無耐，友人嘅麥麥送到咗，速度解決後，個場好似多返少少人氣。差唔多時間，開始 set 腳架同相機。時間尚早，用 Google Sky 睇星，見到每年都會見到嘅獵戶座，今晚天色都幾好，睇到唔少星。

最後數小時，大家都準備就緒，現場有人派吹氣 bon bon 棒，警察開始出動鐵馬。

倒數後出現嘅煙火，唔知係咪角度問題，好似少咗 D texture, 似乎真係要正面睇先係王道。今年亦無上年咁好彩，影唔到煙火爆出嘅相。五分鐘過去，人潮漸散，玩吓 light painting, 影埋星後閃。警察哥哥話:「有一皮人」喎! 原來皮都可以用嚟形容人...

影片效果: B-
相片效果: B

2010 回顧

• 愛上珍珠奶茶
• 唔見咗部相機
• 買咗支全景鏡
• 完成英法之旅
• 霧都倫敦
• 子午線格林威治
• 出生城市利物浦
• 浪漫之都巴黎
• 到過北京
• 愛上雲境
• 影咗好多 Time Lapse
• 損失咗一名愛將
• 第一次做啊 Sir
• 換咗個 Digital TV Tuner
• 買咗部 Laser Printer
• 買咗部 Android Phone
• 影少咗相
• 寫少咗 Blog
• 做少咗 Gym

快樂聖誕

聖誕前夕: 公司聖誕 Party, 抽到四份禮物. Good!
聖誕日: 同朋友 BBQ, 行錯路但趕到尾班車. 盡興!
拆禮物日: 與友人食 full day breakfast, 再到中環睇聖誕樹。 舒服!
補假日: 到舊同學屋企打機，再出街打甂爐. 正!

Write to express, not to Impress

Merriam-Webster 公佈今年十大最多人查嘅英文字:

1. austerity
2. pragmatic
3. moratorium
4. socialism
5. bigot
6. doppelganger
7. shellacking
8. ebullient
9. dissident
10. furtive

你又識幾多? 唔識唔緊要，因為全世界都唔識，所以先上十大。

Undo

今日一睇新聞，見到 MC Jin 響聖誕為曾特首而 Rap, 重要係 Rap 起錨添?! 情況就好似支聯會主席企響國家主席隔籬同大家一齊拜年咁，不禁會問點解?

MC Jin 響 Same Cry 度 Rap 出六四嘅哀號、沙士嘅悲情，反高鐵事件亦講出咗佢嘅立場。點解會變成今日咁?

係身不由己，經埋人接咗無得推?
定係覺得只係 Rap 一首「聖誕歌」無傷大雅?
抑或被名利沖昏頭腦?

我希望係前前者。但客觀嘅事實係，今次一舖清袋又唔會，只係好大機會流失唔少支持者，

聖誕禮物

公司一年一度嘅聖誕 Party, 要準備禮物。係時候行嚇街，所以好早就做完 Gym, 落灣仔逛。

想買一本英文電腦書，但原來普通書局同埋電腦城無呢回事。
3C 用品，又好似行得滯。
設計素材，譁! 80 個 File 要 200 蚊，又好似唔係好抵。
落玩具街度睇下先，咦! 我記得好似幾個月前決定買呢個做聖誕禮物。好似響 188 有多 D 款揀，買隻實用嘅好 D, 定係好玩嘅好 D? 都係實用少少好，買完重幫我包埋花紙，Mission Completed.

你的延續

今年嘅風雲人物，係 Facebook 之父 Mark Zuckerberg. 似乎慢咗幾拍，家陣最 hit 嘅係 Wikileak. 另外，點解要係 Facebook, 而唔係 YouTube? Twitter? Apple? 時代雜誌，似乎同時代巨輪脫節。

申亞

香港傳媒係咪唔識中文?

乜嘢叫做「政府支持申亞」? 政府要攞錢攪亞運，可以自己唔支持咩?

政府可以「提出申亞」，可以「游說議員支持申亞」。唔該各位傳媒大哥唔好攪到 D 中文一鑊泡!

傷

唔知幾時開始，做親 Training, 個喉嚨就會作痛。今次仲係用咪都無乜大幫助，係咪真係咁唔識得用聲?

雲境

難得今日唔係灰濛濛，又唔係一大片青天。

豐收

今日心血來潮去計自己今年嘅投資回報:
Bought Over 9.41%
New Capital 30.78%
Total 16.3%

相比之下:
HSI. 5.87%
2318 33.04%
2888 18.8%
945 -13.48%
2840 26.23%
939 8.04%

廿日後年結時，唔知會唔會有大變化?

瑣事

噚晚開夜，今朝唔駛咁趕返公司。食早餐嘅時候，老媽子入咗嚟講一 D 家務事。細心聽吓，原來一個家庭主婦可以為咗濕度底而可以嘅朝早洗衫，响同一日夜晚收衫而高興。亦因為前晚可以收衫，噚日因為㗎洗衣機壞壞哋而攪到要夜晚先洗到衫而覺得不值。

生活，係咪就係咁簡單?

和平獎

究竟，乜嘢係中國特式?

社會主義: 具有中國特式嘅社會主義...
人權: 吃飽飯就是中國人的人權...
和平獎: 孔子和平獎 -_-
姓名: 國家質監總局審議緊英文拼音名係咪都係同中文一樣，先姓後名 -_-|||

普世價值係咪咁唔啱中國人? 中國，又係咪真係咁獨特?

意外

本來有少少猶疑，但無端端隻手揩到個撥號，睇嚟整定要講，感覺比想像中好。

神算

前幾日响 aastock 度拎咗幅圖嚟度，好似差唔多到底，210 左右應該會反彈。但等咗兩日都唔跌得太落去，最後 213.6 入咗。今日竟然真係去到 210.8, 真係有少少唔甘心，都好，收市返返去 216.4. 英國嗰邊升咗近 4%.

故事教訓: 要相信自己，不過食魚要切頭切尾。

Geek Pride

前排見到好多畢業相，唔知幾時，個個畢業嗰陣，不論男女，都會揸住個好 cutie 嘅公仔。

倒帶返十年前，數碼相機無算普及，所以影相唔多，影完相仲係要曬出嚟再 scan 返入電腦。

我最鐘意嘅一張畢業相，係同兩位 Professor 影嘅一張。一位係 Virginia Lo, 一個專門研究 resource scheduling. 一位係 Andrzej Proskurowski, 專門研究 tree structures + algorithms. 可以同兩位大師級人馬影相，真係諗起都開心。




拍片更加唔駛講，只有低解像低質嘅格式。想當年嘅 DivX 3, 已經睇唔返，好彩有壓埋 MPEG-1, Standard 始終係可以經歷時間嘅洗禮。

近排一段 Steve Jobs 响 Stanford 嘅畢業演辭响 Facebook 輪迴. 我哋當然請唔到佢，但係有 Kent Beck 坐陣，都唔失禮。

http://blip.tv/file/4434254

P.S.: 差少少唔見咗呢一段回憶，好彩到最後都搵得返。

歲月不饒人

今日响 Data Center 度等開工，發呆之際電視做緊放學 ICU, 睇吓譚玉瑛姐姐重响唔响度。發覺，係就係响度，但以乎有少少滄老。睇見上嚟嘅嘉賓，個個都後生過佢，個個都係睇住佢嘅節目大，究竟嘉賓會係乜嘢感覺? 會唔會同佢影相，又或者攞簽名?

譚玉瑛姐姐係香港人嘅集體回憶。

學店

直資學校，以商業模式運作，咁同私校有乜分別?
係咪因為教育局無指引，就可以亂洗錢?
如果學校唔能夠以身作則，咁點辦教育?
教育界嘅立法會議員剩係識鬧教育局無監管，而唔討論校方嘅責任，又係咪合理?

低頻超音波驅蟲器

食完飯，去貢茶買咗杯珍珠奶茶。返公司途中，經過間戴住個耳咪做推銷嘅舖頭，眼尾一掃，個產品叫「低頻超音波驅蟲器」。

睇嚟起名嘅人要接受再教育先得，超音波英文係 Ultrasound, 即係因為空氣嘅震動頻率太高而普通人聽唔到嘅聲。所以，超音波無可能低頻，咁呢件產品，驅唔驅到蟲，就真係唔知。

Best Man

友人結婚，第一次做伴郎，不過前晚唔太夠瞓，今日又要一早起身，只可以用五成狀態出現。不過，婚宴只係 Buffet Lunch, 五成夠用。證婚議式又有兄弟們用泡泡槍噴泡泡贈慶，效果唔錯! 只可惜相片欠奉，有時間嘅，就只係得呢幅。

完場，幫忙搬運婚宴物資後，去咗今日最後一日嘅頁茶 claim 一杯十送一嘅飲品，心曠神怡，體力勞累完後嘅滿足。

火中取栗 - 續集

唔知幾時開始，唔係太相信所謂嘅價值投資。可能係宏利跌得太勁，同股票談戀愛原來係一件咁危險嘅事，好彩都叫做低買，佢跌剩高峰期嘅1/3時，我都只係損失咗1/3, 低息環境，無計. 睇咗個市咁多年，原來最可靠嘅，似乎係最簡單嘅常識。

對渣打試驗咗兩次，見太高嘅時候，再睇一睇技術指標，再高價出售。其實唔係有心放曬，只係佔個組合比例唔細，做少少風險管理，唔係跌嗰陣其實都幾係嘢。萬一再升嘅，其實都賺唔少，月供時可以再買得返。跌咗，再留意住一個啱嘅價位，到位就入。不過，就似乎係渣打咁跟技術走位，未夠膽試其他。不過，試兩次都成功，好滿足!

以前嘅火中取栗係想賺快錢，今日嘅火中取粟係避風險。

再見 HTC Touch

用咗 HTC Touch 都有 3 年幾，係買俾自己嘅生日禮物。呢三年有樣嘅好不滿嘅係打字嘅方法，個手寫識辨又唔似 Palm 嘅 Graffiti 咁可以唔駛睇住都寫到字，個 software keyboard 又細，要用 stylus 打先打到，重要支 stylus 鬼咁易爛，3 年換咗兩支，最後放棄埋 stylus. 打字真係粒粒皆辛苦。

Sliding keyboard, 正!

Keyboard 令機身厚咗少少，但非常值得!

但係真係好細部，一張咭片都大過佢。

比 HTC Touch 順咗好多，但係好似 Windows Mobile 對我嚟講 friendly 少少，尤其係無 Hardware 嘅上下制，焗用手指去 scroll 個 touch screen... 真係白痴!

李氏力場

城市傳聞，香港首富研發咗一套系統，阻擋颱風嘅吹襲，以免降低生產力云云。雖然傳聞歸傳聞，但今年嘅颱風路線實在太迀回，力場之說，不無道理。

好多人都話力場攪到打工仔無得放假，但係咪反過嚟諗，香港係一片福地，巨大天災欠奉，大家先可以安安樂樂咁生存。假如強颱風真係吹埋嚟，低窪地區又水浸，樹又㝝幾棵，到處山泥傾瀉，D 玻璃幕牆又爛到滿天飛，都幾大吉利是。都唔好話吹到正，台灣俾個雨帶掃一掃都已經出曬事，所以都係唔好打風好!

國際大都會

地鐵出事，個個上地面搵接駁巴士，迫得就迫，無人識得排隊。究竟，係香港人染上咗大陸人嘅陋習，定係其實香港唔係我哋想像之中咁文明? 下次話大陸人唔文明之前，我諗好多香港人都要諗清楚自己係乜嘢人先。

香港政府以鐵路為主要交通工具嘅政策，係又咪要檢討吓? 一係無事，揩親都係大鑊嘢。

The Perfect Balance

原來我個 Portfolio 係安排得咁微妙，個市升，佢嘅價值會升，個市跌，價值依然係升。

巴士奇遇

响灣仔搭26號返公司，臨落車嗰陣，有個婆婆唔太識落車，又堅持佢要去嗰度附近有個巴士站，但實情我住咁耐都唔覺有，唯有揀一個最近同可以行得最舒服嘅站 (其實都係二揀一) 同佢一齊落車。

雖然婆婆話佢唔係好行得，但就好好中氣話自己搭錯車云云。由街頭行到街尾左右，都只係一分幾鐘就到咗，要離開，隨住婆婆嘅一連串祝福語，一切回復平靜。唔知婆婆會點返屋企呢?

成熟

做 Training 時同班新畢業嘅人熟咗，發覺自己好似係八十前出生，八十後嘅心。究竟由 Day 1 開始，我有無改變過呢? 呢個係十份值得思考嘅課提。

雙面刃

每隔一段時間，都會有去意。返咗嚟香港九年，究竟呢九年嘅經䌞，係有價值，定係負累? 隨手上 jobsdb 搵吓，原來都有唔少好工喎! 係咪可以考慮，就真係要考慮考慮。

怪物小王子

怪物小王子曾經係細細個日日追嘅卡通片，原來係同叮噹同一個作者，响土豆睇返嘅時候，原來已經有唔少叮噹嘅影子。得閒可以再回未近三十年前嘅作品。

真人版，搵一個大人嚟扮怪物小王子，好似唔係幾妥。不過日劇精彩嘅地方，就係將一 D 日本社會嘅核心價值融入任何提材嘅劇集。如果要搵返當年嘅童真，真人版唔係太啱，都係睇返卡通好 D.

This Is It

Michael Jackson 嘅遺作，似乎製作單位做咗唔少 Making of. 姑勿論製作單位嘅用意，出嚟嘅效果，係一粒星嘅光芒，响綵排嗰陣已經發揮到專業水準，我鐘意!

環保雜談

呢篇文係因堆填區而自我思考所寫，大家可能會覺得無咁誇張，但請以各位細心諗諗有乜可以由自己做起。

聽咗厄爾尼諾同拉尼挪咁多年，我都唔知係乜嚟。但今年會係一個比以前凍嘅冬，我反而明。

話說墨西哥灣至歐洲，響海度有一股暖流，叫墨西哥灣暖流(Gulf Stream)，會將赤道嘅暖水帶到歐洲，令歐洲嘅冬天無咁凍。科學家話今年呢股暖流減慢咗，即係話歐洲會凍咗，如果全球以一個整體嚟講北迴歸線以北嘅平均氣溫係下降。咁以下就係以常識推論到嘅事情:

1. 凍，就自然會開暖氣，越凍就會需要越多能源去保暖。
2. 95%嘅能源係嚟自石化源料 (石油、煤、天然氣等)，而用石化源料產生能源係大量二氧化碳嘅成因之一。
3. 即係話越凍，天氣越凍，就會越多二氧化碳。
4. 二氧化碳係溫室氣體，過量嘅溫室氣體令地球表面溫度不斷上升 (呢個我諗大家都明)。
5. 地球表面溫度上升，令兩極冰層溶化，海水鹽份亦會淡化。
6. 正正因為海水鹽份被淡化，墨西哥灣暖流亦被減慢，令歐洲更凍。
7. 返迴 #1

再返去北迴歸線以南至赤道，因為有部份熱能無北上，近赤道嘅海水溫度自然上升。

1. 而海水溫度上升，係造成颱風嘅成因之一 (咁睇嚟我哋嘅風季睇嚟會長咗同多響打風，李氏力場應該有失靈嘅一日)。
2. 颱風多雨但打唔到入內陸地區，所以水災會響沿海發生。
3. 偏偏北迴歸線以北嘅一片歐亞大陸好少海邊，當水份留響沿海地區，內陸地區自然會出現旱災。
4. 不論水災旱災，都會影響農作物收成，咁距離饑荒還會遠嗎? 
5. 北迴歸線以南至赤道又䁔又濕嘅時間長咗，最啱微生物滋生嘅機會又多咗，咁距離瘟疫又會遠嗎?

科學家話，當墨西哥灣暖流停止嘅時候，就無法逆轉，到時極端天氣就會因為大氣同海水嘅能量失衡而更嚴重。你想下一代活於一個水災、旱災、饑荒、瘟疫嘅世界嗎?

註:
墨西哥灣暖流嘅成因係 Greenland 嘅冰塊溶解時，將海水溝淡咗，物度比較低。By diffusion, 高濃度嘅暖海水會響海面流向低濃度嘅海水再沈底，低濃度嘅凍海水自然就會由海底被推向另一邊，因而造成墨西哥灣暖流。

心曠神怡

一個將軍澳堆填區，攪到滿城風雨。對於一個由政務官做特首嘅政府嚟講，穩穩陣陣，乜都唔做係最安全嘅做法，所以所有嘅政策，都欠缺願境。減廢政策，一於零教育、零獎勵、零罰則。

班住响堆填區「豪宅」嘅人有夠無聊，李生一句心曠神怡就搬入去住，家陣响度嘈，乜當初無實地考察先搬?

响一個主張消費嘅資本主義社會，垃圾廢物只會有多無少，今日嘅情況，大家都有份做成，無得怨。

Slashdot 2

非常精準嘅 Slashdot comment:

http://hardware.slashdot.org/story/10/10/11/1838252/High-Tech-Microphone-Picks-Voices-From-a-Crowd

The quick breakdown of responses on Slashdot:
The last remaining nerds on Slashdot who actually like technology: "Sweet! That's an impressive display of audio recording techniques!"
The paranoia crowd: "ZOOOOOOOMG that means THEY(tm) can listen in on you! Then they're already stealing your identity to impersonate you! MY PRIVACY IS AT RISK OHNOEZ START REBELLION NOW PLZ KTHX"
The audiophiles: "Pfft. Everyone knows you need at least 560 microphones and analog pickups, else you'll clearly lose so much quality as to be unlistenable by any but the most primitive and underdeveloped of eardrums. Plebs."
cencithomas: "WHERE DID THE TEN MICROPHONES GO?!?"

更上一層樓

今年有好多意想不到嘅支出，個股市又傻吓傻吓咁，要儲錢實在係舉步為艱，但原來不知不覺已經達到一個短期目標。係時候定下一個目標。

地膽

响地鐵走出嚟，聽到一堆人响到講點行點行，點解唔搭的士云云。於是問一問佢哋想去邊，想去「富臨」喎...

聽落好熟，但係唔太記得响邊，跟住佢哋問上環街市响邊，指咗個方向之後，佢哋已經行開咗。過多幾秒，先記得原來富臨就係屋企對面間酒樓，即係話呢間酒樓，對於我呢個老街坊嚟講，似乎唔係一個值得記得嘅地方。

萬里路

原來我其實都去過唔少地方

Another Example of Retarded Human Being

一個唔知有無人搭嘅高鐵，26 公里造價 669 億，平均每公里差唔多 26 億。
一個講咗好耐，可以舒緩南區對外交通嘅地鐵港島南線，7 公里 100 億，平均每公里 14 億多少少。

如果依超支比例計算，高鐵分分鐘成千億先埋到單。如今竟然有當年支持高鐵嘅人話港島南線太貴，我只可以話應驗咗 Decision Science 第一堂所學到嘅事。

尋尋覓覓

呢排想出部新電話，睇緊各大電訊公司嘅 Plan. 咁多間，似乎 3 係最抵，不過有友人非常反感，題醒我上次响英國收到嘅 Roaming 嘅恐嚇短訊，最終打消咗個代頭。

成條數計落，如果我唔用 Data Plan, 自己買電話係最徍選擇，呢吓就好在乎我係咪肯去用每個月俾多 60 個大洋買個 Data Plan. 不過應該都係兩個月後嘅事，到時再諗。

口惠而不實

釣魚台，鄧小平話留返下一代人去解決，所以中共嘅政策一向都係得個講字。今次有漁民被扣押，到最後都係淪為口水戰。你有你講話係固有領土，佢有佢講話係依家辦事。而中港台三方嘅政府都想盡千方百計去阻止保釣人士去釣魚台宣示主權，半隻軍艦都見唔到。

其實如果反向思考，保釣人士應該話釣魚台係日本嘅，向日本申請簽証，帶埋支日本旗去釣魚台，分分鐘有日本自衛隊護送你上岸添!

唔知鄧小平當年選擇唔解決問題，係咪預見到中國會有今日嘅國力去經濟制裁日本? 知道政治只有永遠嘅利益，中南海各高層，呢一著其實都幾高。

手民之誤

作為一個中文人，寫字要小心係理所當然。就好似你唔會話:「我從小便...」但前幾日响電話舖見到:「一咭多號電話咭可以响各大便利掂買到...」我心只會諗，就算我要買，都唔會想去買。

諗到呢句嘅人，一係無腦嘅，一係太過聰明，想同顧客開一場玩笑。批呢句出街嘅高層，應該無乜點去留心睇清楚先出街。

中秋節快樂

香港人東西文化文匯嘅地方，所以西方節日有假放，中國節日都有假放。偏偏真係快樂嘅假期，都係响西方節日。例如，復活節同聖誕新年咁，聽落都已經快樂。

中國節日，例如清明重陽咁，一定唔會快樂先。端午節，記念屈原，係咪要好快樂咁紀念一位殉國詩人? 國慶佛誕勞動節... 我又未聽過國慶快樂、佛誕快樂、勞動節快樂 (政府一人派一隻勞力士大家會快樂 D)。春節，係就係快樂，但會講恭喜發財多。所以中秋節，人月兩團圓，可能係唯一可以快樂嘅日子。

雖然今晚見唔到月亮，但希望大家中秋節快樂!

時光倒流

香港勝在有 ICAC. 高薪養廉，英國人係有佢嘅辦法。

Slashdot

真係好鐘意 Slashdot 嘅 comment:

Read closer (Score:5, Informative)
by Anonymous Coward writes: on Tuesday September 07, @05:03PM (#33502368)

IT is not engineering. The two fields are not analogous

      Re:Read closer (Score:5, Funny)
      by Yvan256 (722131) writes: on Tuesday September 07, @05:06PM (#33502400) Homepage Journal

      They're digitalous?

數碼電視

屋企換咗 LED 電視，好似好多嘢睇，都係時候為部電腦加入數碼電視嘅大家庭。要求我似為好簡單，一張硬解硬壓嘅 TV Tuner.

但係行咗幾日，似乎硬解無乜可能，大部份都係要用張 Display Card 做解壓，似我張舊嘅 Display Card 嚟睇，睇嚟要報銷。硬壓嚟講，本來都無乜期望，電腦城、298問過晒，都話無。點知行行吓，見到一個 Logo 寫住 Hardware Encode?! 真係踏破鐵鞋無覓處，仲係唔駛三百蚊，即時入手!

返到屋企，換卡開機裝 Driver, 開 TotalMedia set 好晒，睇落除咗闊少少，就係多咗上下兩條黑邊，當播 D 4:3 嘅畫面，就一個大黑框，係咪係時候換返部 16:9 嘅 Mon? 另外，TotalMedia 嘅手感唔係太好，無 always on top, shortcut key 怪怪哋咁，resize 又唔識記住。總之就係麻煩。

試硬解，CPU 由 15% 變成 2%, 非常好，試硬壓，都係 2%, Perfect! 早知買隻加強版，可以做埋 capture card.

理性與感性

823事件，全城痛罵之際，有幾篇網民所寫嘅文章，話菲律賓唔可以用香港嘅標準嚟做嘢，又或者死人慘劇其實每分鐘响全世界唔同角落發生，甚至某國際巨星响微博話做乜都會俾香港人鬧等。或者，佢哋講嘅都好啱，但係太無情。

當一件事經過透過電視機實時報道嘅時候，無論事件係响偉大嘅祖國、第三世界國家、或者係香港，都會掀動觀眾情緒。其實都唔好話係一件真實事件，就算只係一套電視劇嘅結局，如果係壞人得逞，都係會俾人鬧。如今，只係透過網絡發洩少少負能量，不為過啫... 到真係做嘅時候，只不過係市場行為，就好似其他國家嘅人見到今次事件亦唔會太想去菲律賓旅行咁。我相信就算個外傭係菲藉，如果佢幫得手，都唔會叫佢執包袱。

如果覺得網絡負能量太多，可以發放多少少正能量，唔需要無情對待嘅。

蝴蝶效應 15

Butterfly Effect 總恬嚟講就係因為一個輕微嘅變化，而引致一個重大嘅改變。今次個重點，唔係個效應本身，而係想講一講超時工作 (即係 OT) 點樣改變香港人生活模式。

外傭篇:
唔知幾時，生仔嘅人都興請位外傭幫手。工作，無非為咗搵食。搵食，又無時間湊仔，唯有搵人幫手。搵上一代，計一計數，以前廿幾歲結婚，可能父母都仲係四五十歲，體力都還可以應付。但家陣卅幾步先結婚，六七十歲嘅老人家，又點幫手湊?

最後都係用錢去解決問題，請個外傭先。咪住，唔响屋企，個外傭會唔會對個仔點? 另加部CCTV先! 成件事都係資本主資，用最少嘅錢基於零信任做事。質素，大部份都係嘛嘛囉! 你聽過幾多人話請嗰個外傭無問題?

你，又幾耐無星期日去中環悠閒地行一趟?

鬧劇 悲劇

一向對東南亞無乜信心，所以從來未踏足過，經過今晚，我諗我嘅信心都唔會有乜嘢改變。

菲律賓旅遊巴被脅持，一場一場嘅鬧劇响半個鐘內陸續上演:

1. 班警察無能地想入巴士
2. 匪徒開槍後，出現幾聲大笑
3. 個鏡頭 zoom 埋去條屍度，TVB  個女主播重要話見到有隻手但無動靜
4. 突然一陣煙出現，車門出現另一條屍體，女主播再度描述
5. 一陣煙後，匪徒原來已經被殺
6. 之後，有幾個人質行出巴士，咁個司機點解要話人質死晒?

最後，記者蘇敬恆做報道，係成段新聞最 Pro 嘅一刻。

英法之旅 - 後記

今次旅程，除咗師弟，重有師弟嘅父親。師弟父親因為打波整傷咗隻腳，行動有少少不便，因為咁，行程有少少改動，旅程放慢咗，但睇嘅嘢反而多咗。或者，响匆忙嘅城市生活，有時係需要放慢，停落嚟，諗一諗之前嘅計劃係咪合附需要。亦因為師弟父親係退休警察，所以所聞亦都多，亦有好多故仔聽，係今次旅程嘅其中一個得著。

其他記事

• HSBC 攻佔咗各地機場
• 倫敦唐人街無早市，唔好諗住過到去飲早茶。
• 梵爾賽宮個後花院係唔駛錢，如果對入面大量嘅畫無興趣，大可以唔駛排隊去皇宮。
• 就算真係要入皇宮，下晝去會好 D, 因為唔太有人排隊。
• 去到巴黎市中心，差唔多有景點都行得到去，當然可以搭一兩個站嘅地鐵亦得。
• 一定要買 Museum Pass
• 強烈建議去巴黎嘅人一定要去鐡塔睇夜景，除咗有景，個氣氛好似嘉年華會。地鐵12點尾班車，所以唔駛驚無車返酒店。
• 之前去過北京，今次去倫敦同巴黎，呢幾個城市都有地鐵。咁多個城市，香港似乎係最好，倫敦次之。
• 帶支全鏡景去影相，原來可以吸引唔少人嚟搭訕。
• 倫敦、利物浦同巴黎唔知點解都有摩天輪
• 一定會再去倫敦
• 巴黎人真係當你識法文，唔會好似雅典咁，一知你唔識當地語言就即刻轉到 channel
• 原來瞓响巴黎鐵塔附近嘅草地係一件好舒服嘅事。
• 返咗嚟香港兩個禮拜，日日都有唔同嘅 The Phantom of the Opera 嘅歌响腦海浮現。

港男

剛剛跳去睇 TVB, 原來做緊港男，係一個打功夫嘅環節。港男們徒手劈冰塊同火板，開頭有版有睇，但劈冰嗰吓有一個就咁輕輕壓一壓塊冰就散，都真係兒戲。

之後個教班港男功夫嘅女教練出嚟耍功夫，先至係專業，夠 Man 兼夠 Pro, 班花拳繡腿真係行埋一邊。隨住要聽客戶嘅說話，我都起錨去熄電視。

天朗氣清

今日上個客度，佢坐間房有個落地玻璃，望到對面海。一入到去，個天好清，一 D 矇嘅感覺到無。如果放假嘅話，我諗去出咗去影相，不過可能熱少少。

見完客，有少少時間，買杯珍珠奶茶，行去電腦城買部 Laser Printer. 最細嗰部，貴少少，盛惠七百五。

放工，食少少嘢休息一陣，睇咗一陣電視。有精神，體力好似幾 OK, 走去做 Gym. 跑 40 分鐘先得嗰唔夠400 Kcal, 都唔夠食100克嘅零食。有少少無耐，但係做完運動，個人真係好舒服。

英法之旅 - Day 7

唔經唔覺到咗最後一日，聽日就要返香港，要去晒梵爾賽宮、羅浮宮，同埋影夜境。

去到梵爾賽宮，先去買張 Museum Pass, 咁一陣去羅浮宮就唔駛再買，32歐羅做入場費之餘買個方便都好。入去皇宮前，先要排一場隊個安檢。好鬼多畫，有掛畫、壁畫、天花畫，所有房都有浮雕，真係豪華，不過竹找唔識欣賞。出返去花園就唔同，一望無際，綠草如茵，靚好多。原來去花園唔駛錢，早知响出面影相好過。

之後去羅浮宮，見到 D 原本應該响雅典見到嘅宙斯廟，似乎法國都搶咗唔少嘢。重點係睇蒙羅麗莎真跡，好多人影相，但又鬼死咁遠，都唔佑點欣賞，睇嚟都係影相返去睇。跟住係維納斯像，其實個館有阿波羅像、雅典娜像、戰神像等，唔知點解維納斯咁得人喜愛。

睇完一邊館，原來重有兩邊未睇，不過相機好似無乜電，打個轉好。一入到去，似乎都唔少嘢，但係行咗成日，我同小師弟都無力支持落去，睇咗一半，閃! 出到宮外，睇金字塔，做 D 遊客影相 (用手拎住金字塔之類)。

八點幾師弟話相食正宗法國餐，但我相影夜境，唯有分頭行動。相機電池要急差時，去咗一間叫 Quick 嘅地道快餐店，食咗個魚柳包，好食過 M 記。原來黃昏境都唔錯，急差完影幾張先。買咗張 Metro Day Pass, 先去鐵塔，再去凱旋門，跟住係協和廣場，再到羅浮宮，最後係歌劇院。除咗梵爾賽宮同埋聖母院，呢兩日嘅所有景點都去晒，好滿足!

明日: 回程

英法之旅 - Day 6

早起上網，十點左右出門，一出酒店，有麵包香，入去食早餐，食咗個正宗法式牛角包，正! 行幾個街口，就到歌劇院。影完相，坐的士去凱旋門再影過，影完就漫步香舍利謝大道搵食，食咗個雞胸餐，俾錢嗰陣，俾咗張磅出嚟，最後變咗個貼士，Shit...

行返去協和廣場，見到巴黎鐵塔，以為好近，點知望山跑死馬，最後都係坐的士去。去到塔底，感覺係一座生鏽嘅高塔。不過都係要影，本來想坐電梯上塔頂，但係超多人排隊，但係又約咗師弟父子兩個鐘頭後。第一件去洗手間先，又有人排隊，有男有女，以為得一個廁所以際，有個男人衝咗落去，睇睇吓，原來有男廁。

兩個鐘流流長，最適合影 time lapse. 有個腳架仔，放响欄杆道，原本打直放，但用嚟做 time lapse, 又好似怪怪哋咁，都係再較返橫放。中途都真係唔少人郁到個欄杆，但無計，希望效果 OK.

今日本來要去羅浮宮，但已經五點九，應該去唔到，唯有去聖母院影到此一遊嘅相。

今日係無帶個全境鏡，Otherwise 會有好多意想唔到嘅相。聽日，梵爾賽宮。

英法之旅 - Day 5

差唔多10點先起身，梳洗完，急差 netbook, 電話。早晨大餐，有公仔麵、蒜蓉包、煎蛋、焗薯、羊扒、蘋果、Yogurt, 總之呢幾日買嘅食物都有，食得唔好嘥。食完清潔完，Check-out 搭的士去火車站，等去 Manchester Airport 嘅火車。

去到機場，臨出火車站，個票務員話張車飛唔啱，原來噚日買錯車飛，不過最後都放行。之後就係去 Terminal 2, 不過好遠，都唔知 Manchester 係咪真係咁多人，要咁大個機場。因為都兩點幾，入閘之後買咗件 Bagel 做 quick lunch. 上到飛機，好快就到戴高樂機場，坐火車去巴黎都係半個鐘左右，不過搵的士就煩，落咗車响火車站行咗幾遠吓先去到的士站。响的士嘅時間，發覺色調唔同咗。响利物浦，建築物多數係偏紅，但呢度，建築物多數係偏奶白色。

去到 Service Apartment, 又係頂樓，不過無露台，風景欠奉，不過有齊各類日用品，Service 好似好過利物浦嗰間。攪完師弟要嘅 Wifi, 去搵食，到最後三個中國人响法國搵咗間意大利餐廳用英文點菜。食完飯，去搵吓有無超級市場或者雜貨舖之類買生果，行咗幾個街口都唔覺有，返轉頭嘅時候原來响對面街就有，真係眼大睇過龍。

返到酒店，Plan 好行程，明天又係新嘅旅程。

英法之旅 - Day 4

今日都係早起，不過就係閒 hea 嘅一日，食咗個豐富嘅早餐，之後就係上吓網咁。雖然係聽落好悶，但係呢 D 先係放假應有嘅生活。

到咗下晝，去一去離 service apartment 只有兩三個街口嘅碼頭，入咗去 Maritime Museum 睇 Titanic, 二戰大平洋戰役嘅歷史，再出岸邊影相。景就一定無香港咁豐富，但係就一望無際，都係另一種體會。

影完相，師弟兩父子唔見咗，搵咗一陣，又差唔多時間去球場，唯有坐車去球場，改參觀時間再算，希望師弟醒水。到咗球場，改好時間，無電話添，有人月用緊手機，不過係講西班牙文，問佢可唔可以俾我 send 個 SMS 之際，見到有個電話亭，即刻衝過去，打個電話搵師弟，叫佢即刻過嚟。

影咗少少相，師弟到咗，亦都係參觀團開始時間，去過 Press Room, 更衣室、球場，原來咁就成個鐘，時間過得真係快。坐車返歸，去返碼頭睇吓有乜好食，不過真係無乜好食，師弟再下廚。不過係羊扒，唔係咁啱食，但有薯條同埋幾包公仔麵，加包菜同隻蛋，都幾 OK.

兩日無月瞓太多，洗完碗沖完涼執完嘢，瞓覺。突然半夜4點，3打嚟講 roaming 嘅事，又話我有 local call 云云，真係無乜興致同佢講，返到嚟先同佢計數。

英法之旅 - Day 3

Somehow 瞓唔得太著，八點幾就晒咗，上網 check 吓 email 睇吓 website 咁。九點鐘左右就換衫，準備出發去格林威治子午線。搭地鐵，轉輕鐵，唔駛一個鐘就到咗格林威治，再行多十五分鐘左右就到子午線。子午線响皇家天文台入面，响一座出丘度，响山丘頂，視野遼闊，加上天氣良好，景色治人，係同平時不一樣嘅風景。

因為時間緊迫關係，好快咁參觀咗天文台入面嘅時間博物館，影咗幾幅相，就要離開。去火車站途中，買咗個簡單嘅 Lunch, 一個焦糖嘅 Bagel, 再加一個三文魚長麵包三文治。今次輕鐵坐車頭，有多少少嘅風景睇，呢度嘅輕鐵其實係同機場嘅無人駕駛差唔多，個司機其實只係負責檢查車飛。返到酒店附近，解決咗個 Bagel 先，咬第一啖，除咗有焦糖，原來個芯係煉奶，超甜超好食。返到酒店房，完成埋個三文治。

十二點半人齊，去火車站，出發去利物浦。兩個鐘嘅車程，瞓到一陣。到埗嘅第一個感覺，係一個好舊嘅城市，大部份都係紅磚砌出嚟嘅屋。搭的士去酒店，其實係 service apartment, 住响頂樓，有廳、有廚房、有露台、重有免費 wifi, 速度亦都一流。因為係頂樓，所以無遮無擋，對住間大教堂，即刻差電準備影 time lapse.

去超級市場買晚餐，師弟下廚整海鮮意粉，正比起當年廚藝有進步。食完飯，聽住海鷗聲玩鬥地主，初初玩，唔識玩，輸得好慘，第二朝早餐要洗碗。攪吓攪吓，都11點幾，沖涼上多陣網，差唔多兩點。

英法之旅 - Day 2

一早起身九點半，以為白金漢宮換更嘅步操儀式係十點，去到，好似乜都無得睇。再睇下，原來係十一點半。咁就唯有等吓，影吓相咁。影完相，好似無乜好位影操兵，爬咗上其中一個銅像，無耐就俾警察吹哨子叫落嚟，唯有响梯級邊等吓。位已經唔算好，但操操吓，竟然落雨，前面嘅一大堆什傘，好掃興。

睇完步操，再去噚日去咗乜都未開嘅唐人街飲茶，食完飯就出發去大英博物館。响博物館行咗兩個鐘，睇嘅係幾年前遊雅典睇唔到嘅真跡，例如衛城同巴特龍神殿嘅石像，再去到中國展區，睇完就好似中國剩係得佛教咁，十居其九都係佛像，其他嘅就係青銅器，唔係太覺有傳說中嘅好珍貴被搶嘅文物。

時間尚早，坐的士去 Tower Bridge, 本來想搭地鐵，但係一張單程飛都四幾，三個人加埋都12磅，唔著數。影完相，去 Oxo Tower 食晚餐。之後，再返 Tower Bridge 影 Time Lapse, 點之影影吓，無電，計劃告墔，唯有換粒電去 London Eye 再影。

影飽影夠，再搭地鐵返酒店，點知搭錯車又轉錯線，返到酒店都十點半。

英法之旅 - Day 1

同平時嘅長途機一樣，今次都係每隔一個鐘左右醒一次。到咗機場，行李好快 claim 到，機長快線亦好快到，的士都係行咗幾個街口就到酒店，只係貴咗 D. 機鐵盛惠18磅，的士就落錶兩磅，幾個街口加吓加吓好快就去到7磅幾，俾香港嘅的士見到，實流晒口水。

到咗酒店同師弟會合，沖咗個涼就出發食早餐，去咗唐人街，但原來十二點先開，可惜落雨，唔係又可以影幾張相先。之後到咗 Trafalgar Square, 雨未停，求其搵間美式意大利餐廳，食咗個 vegetarian breakfast. 雨停咗，去睇大笨鐘、西敏寺、國會大樓、同泰吾示河，之後食 lunch. 我叫咗個 all day breakfast. 個餐到咗先記得，今次係一日來第3份早餐，每份都有兩隻蛋...

食完午餐，係睇 The Phantom of the Opera 嘅時候，係今日嘅重頭戲，先去 Box office 攞飛，個票務員有少少困惑，因為佢以為 Shane 係我嘅 last name, 搵嚟搵去都搵唔到，我提佢 NG 先啱，一切攪掂。同聽 CD 唔同，歌聲語調無咁震撼，可能個咪唔係咁得。Anyway, 用5磅買咗份 Brochure. 其實重有玫塊、面具、杯、key chain, magnet, t-shirt 等等，本來無諗住買任何嘢，但俾隔籬個觀眾感染到，Brochure 好似幾吸引，所以大破慳囊。

之後再响 Trafalgar Square 影相，附近係 Britain Gallery, 睇吓，全部都係畫，無乜興趣，閃! 師弟帶路，行行吓去咗白金漢宮，影少少相先，返酒店，點知... 師弟帶錯路，要返轉頭，行咗成公里先到酒店。

响酒店上上吓網，個 3G 手指話有 SMS, 一睇，佢話我用咗 14MB, 要俾成千幾蚊?! 有無攪錯，一早 apply 好任用roaming, 做乜出事...? 唯有去 3 網站投訴。

結括嚟講，今日景點超額完成，係 3G 手指有少少唔安樂。

英法之旅 - 序

本來呢個旅程係去紐西蘭滑雪，但係個 Travel Agent hea 咗我成幾個月，咁啱師弟話要放假，想去歐洲云云，不如就交俾師弟攪。成個 planning 就只係上咗去佢屋企傾咗一晚，一個禮拜多少少就攪掂埋機票。

第一件買咗嘅係部新 Netbook, 舊嗰部响新嗰部買咗無耐後壞咗，天意。
但係絕大部份嘅事都係今個禮拜先攪掂，買新相機 (天意?)，攪 3G 手指 Roaming (俾北京之旅啟發)，買英磅、歐羅，買 Netbook 套，攪國車牌 (雖然唔知有無用)，訂 The Phantom of the Opera 嘅飛 (可以訂到頭十行，不過係下晝)，好彩呢排都係見灣仔客，可以順路攪埋 (又係天意?!)

原來一切唔响自己掌握，其實唔係咁差。

明買明賣

原來乜嘢叫出售客戶資料，對於一間控制近二百萬用戶嘅公司嚟講係咁難去定義。

將四千萬除二百萬，只係二十蚊。大家嘅私隱都真係夠平。究竟，用八達通嘅人係客戶，定係買私隱嘅公司係客戶?

走馬看花

一場嚟到北京，想去長城。買咗火車飛，見有兩個鐘頭剩，去天安門廣場行吓。

但成個廣場好鬼大又好鬼晒，行吓影吓，已經差唔多夠鐘，想趕返酒店拎遮，點知連影相都唔見埋。最後，亦趕唔到班火車，亦無咗响廣場影嘅相，同埋响香港機場影嘅 Time lapse. 剩返部低 grade 嘅 Cannon 機，都唔算 Total loss.

去 KFC 食咗個午餐，去睇吓水立方同鳥巢都好，出咗車站，又行一大餐，好彩帶埋遮，唔係真係曬死。影唔夠幾張相，部 Cannon 機話無電，似乎今日不宜出門，唯有爭取影最後幾張再折返。

返到酒店，其實都幾攰，响酒店附近食個簡單嘅晚飯算數，食咗個雪菜肉絲麵，好好食，再飲一杯沙冰，正! 沖走晒一日嘅悶氣!

Lesson Learned:

• 去任何景點都要帶遮，所有景點似乎都係無遮無擋，响天安門場曬咗個半鐘係一件苦事。
• 去長城前唔好去任何地方，先唔講趕唔趕火車，畢竟長城都係一個需要體力去行。
• 相要每日抄返落腦，唔理張 SD Card 有幾大，部相機唔見咗就乜都無。
• 北京空氣好差，剩係行咗幾個地方，鼻腔入面嘅污垢係灰黑色。
• 唔見嘢可以去北京市公安局《失物招領》網頁登記。
• 雖然北京地鐵去邊都係兩蚊，但係唔代表賣出嘅車飛可以各站通用，即係 A 站買嘅飛唔可以响 B 站入閘。當然，可以去返原本個站退錢。

希望遲 D 有機會去長城。

母難日

三十一年前，响英國利物蒲一間醫院，一個又瘦又黃嘅 BB 出世。想當年，嘅一位年輕嘅母親，到今時今日已經退休。出入醫院、牙齒脫落、白髮、皺紋，體力亦大不如前，但依然要為兩個仔粗心。

好想做 D 嘢...

馬後砲

車公真係好靈，唔信你睇嚇今年劉皇發幫香港求咗支乜嘢籤:
五三簽．中籤
　　　睽別家園歲月多，不知家內若如何；
　　　昨宵一夢真端的，今日人傳信不訛。
解曰：先難後易．凡事可許．
斷曰：家宅中平．佔病拖延．自身不錯．出入平安．婚姻合．求財有．
　　　夢信相合．有祖蔭．先苦後甜．有福份．

對民主黨:
爭取民主廿幾年，民主黨提出嘅區議會方案，本來係發夢先有得諗，跟住傳信人梁愛詩話 OK, 成件事就掂曬. 先難後易成真，共產黨對民主黨凡事可許還會遠嗎? 睇嚟有份大禮(回鄉證?)好快會到手。

對香港政府:
由五區公投、到落區起錨、最後余曾辯，因難重重，曾特首想政改方案通過真係發夢。跟住傳信人梁愛詩話 OK, 唐英年响何俊仁確定民主黨會投贊成票，一切水到渠成。先難後易成真，民主黨成為建制派時重唔係凡事可許?! 即係廿三條會好快打到嚟...

民主與公義

在香港生活安穩的人沒有資格說不要民主，因為他們正是在不公義社會下受益的一方。只用口說不要民主，而不移居的人，比正在以抗爭去爭取公義的人可恥。

User Friendliness

部新 Netbook 俾咗啊媽用，部 Netbook 係 Windows 7, 絕對係 User Friendliness 嘅測試。三個問題:

1. IE 8 度搵唔到「加入我的最愛」
2. 唔知左下角係 Windows Logo 即係以前個「開始」
3. Click 完「開始」搵唔到「關機」

測試結果: D
評語: Windows 7 唔太適合俾用開 XP 嘅人用

噪音

某些 DJ 喜歡製造沒有營養的噪音，今日，一個平庸嘅 DJ 訪問一個 YouTube 剪片人。DJ 將剪片人讚得天上有地下無，但只係顯得 DJ 嘅無知。零晨一點後再無電台聽。

通天奇兵

好耐無睇過戲，今日可以日少少收工，食完飯，又唔想返屋企住，去睇睇有無七點半睇。七點八開戲，有半個鐘頭剩，週圍行嚇。原來 IFC 有個平台對海，幾靚嚇，吹嚇海風，幾舒服。行嚇行嚇，入場。

《通天奇兵》，係細細個同屋企人睇亞視嘅美國電視劇，之前通常都係《信不信由你》。每逢星期六食完飯，成家人就對住部電視。今次睇戲，都係抱住懷舊嘅心情。同幾十年前一樣，無冷場，緊張之餘又攪笑。水牛同鈍胎都幾似以前個樣，但霹靂仔同喪榮都唔太似樣。片尾睇完 credit roller, 見返原裝嘅霹靂仔同喪榮，但都唔係太認得，因為都老咗，只好嘆一句歲月不曉人。

唯一美中不足係之前飲得太多水，中間 D 爆笑位忍得幾辛苦。

原地踏步 vs. 行差踏錯

一場政治辯論，推銷員對大律師，政治家響一個鐘入面有三個重點:

1. 大律師及其夥伴太激進
2. 今次嘅方案比2005年嘅方安係一個大進步，因為新增嘅功能組別係由市民選出嘅區議會議會選出嚟咁大把
3. 唔通過今次嘅方案，下次嘅方案都係咁

雖然唔係乜嘢好強嘅論點，但大律師道出一句：「寧願原地踏步都唔要行差踏錯。」一個近乎常識嘅道理，將所有指控、威嚇一掃而空。

一個推銷員做咗幾十年政務官，可以做好政治家呢份工嗎?

閒日

好耐無出過灣仔行，趁今日得閒，落去行吓灣仔電腦城，睇吓有乜新嘢出。行嚟行去，都係睇 Netbook 多，想換咗舊嗰部，兩年前嘅貨仔行得實在太慢。一向都係想買部有 touch screen 嘅 netbook, 但呢 D 係 rare item, 少之又少。行吓行吓，見到 Lenovo 出咗部 multitouch, 1.5kg, 8 cell 電池聲稱可以用 5-6 個鐘，唔駛四千，可以買嚟玩吓。裝機需時，買杯思樂冰去188打個轉。

原來我都好耐無去過188, 好多舖都唔同晒，Wii 有幾隻好似幾好玩嘅 game 出咗，入舊 CD 舖，見到 Beyond, TRF 等嘅 CD. 好懷念以前嘅日子，差 D 又買咗返屋企，但諗到無位擺，放棄。原來咁行行吓，都可以行到一個鐘，返電腦城拎貨。

拆盒，第一個問題係個 touch screen. 一定要用手指，要習慣吓，又或者整支 stylus. 其實唔應該貪個 multitouch, 對 netbook 嚟講根本無需要用，突然間覺得自己攞嚟煩添。

立此為證 3

Just in case 有人違背選舉政綱，我會送佢一程。

斷章取義

曾蔭權說，根據浸會大學香港過渡期研究計劃研究主任戴高禮教授(Prof. Michael DeGolyer)關於香港政制的民意調查結果

有六成受訪者同意泛民必須妥協(compromise)，因為香港需要政改，更有接近四分之三(74%) 的受訪者明確表示，香港的政制應該「循序漸進改革，好過原地踏步」。

民意調查，聽人轉述，不如自己去睇。當中問嘅問題內容，係可以對結果作出關鍵作用。點知一睇，就知乜嘢係政府點樣玩弄民意。其中有一
條係咁: How strongly would you agree or disagree with these statements for against reform:

只係提偏向自己嘅意見，唔提

1. 有 56% 支持 2012 雙普選
2. 有 46% 覺得政府經常假諮詢，所以必須要反對政府嘅議案
3. 有 56% 人唔覺得泛民阻延民主進程
4. 有 62% 人唔覺得支持泛民等如激進同製造混亂

要思考嘅係點解大部分人要求必須妥協，又必須反對政府嘅議案，係咪即係話妥協係要有底線呢? 另外，「循序漸進改革，好過原地踏步」，但工能組別同地區直選比例不變，市民係咪覺得循序漸進呢? 呢個又係一個政府要思考嘅問題。

特區管治班子患嘅係偏聽病，呢個係理想嘅管治嗎?

註:民意調查結果原文

道具

好耐無睇香港嘅電視劇，呢排睇緊《談情說案》，响一間小學校長室入面，放嘅竟然係 TCP/IP 同 FoxPro 嘅書?! 唔怪得响劇入面，呢間小學係名校...

The Right Balance

友人說:

我贊成將新政改方案作公投! 我相信大多數市民會贊成的! 但是，儘管大多數市民贊成又如何!? 社會上總有些不理他人感受和自私的人! 試問最終完美的雙普選實行之後，被選出來的特區首長也總有那些不投他/她一票而反對他/她的人，那普選的意義在於什麼呢? 不是應該小數服從多數嗎? 是! 但那少數的人會服嗎!? 當前利益關係的存在，人的自私心總是叫他人感到可悲和可恥!

一個民主嘅制度，係一個市場主導嘅政治遊戲。要得到利益，就要執政；要執政，就要得到市民支持。

嗰 D 少數人，响外國叫做反對黨。佢地根本就係為反對而反對，但他朝有日，反對黨可以變成執政黨，叫政黨輪替。到執政嘅時候，如果佢地可以執行到佢哋做反對黨時嘅訴求，自然可以得到支持，反之另一次嘅政黨輪替會再出現。咁反對嘅聲音就唔會變得脫離現實，社會亦只會越趨穩定，此乃長治久安之策。一個完善嘅民主制度，係可以平衡各方利益。

反之，一個經過精密計算嘅制度，會有意想不到嘅效果。假如唔係比例代表制，社民連可能根本入唔到立法會，因為比例代表制，係一個保障少數聲音嘅制度。假如唔係比例代表制，亦唔會有變相公投，因為比例代表制，將選區由數字縮減至5個，如果分返做18區，甚至單議席單票制，根本達唔到變相公投嘅效果。說穿了，比例代表制，目的就係驚親共政黨响回歸後失去支持而選用，否則，點解唔用行之有效嘅多議席單票制?

少數

六四係「極少數人發起的反革命動亂」，大概就只有獨裁政府會強調少數嘅錯。一個民主嘅社會，會專重同包容少數。

好可惜，以特首同曾局長嘅言論，香港係屬於獨裁嘅政府。

時移勢易

俾六七暴動嘅參與者話攪破壞，額外無說服力。

Learned Helplessness

友人說:

舊一代對政治，對公民權利，對社會，都表現得十分冷漠。

也許，舊的一代，成家立室，自然希望安定。
也許，舊的一代，正享受多年努力，得來不易的成果。
也許，舊的一代，等得太耐了。

但歷史巨輪不斷地轉，長江後浪推前浪。也許，舊的一代，是時候將未來交給新的一代，讓他們當家作主。

Why Not and How

友人說:

我最憎恨係一啲政棍喺度抽水,輸打贏要.. 口口聲話輸左就認,到頭來又搬出另一番說話,話自己冇輸... 呢種人,無論有冇得自己選特首/議員好,到頭來佢都係覺得自己所講所思所行都是對的... 就算呢種人俾佢真係喺一個民主制度的地方居住,佢都會為左反對而反對囉... (就如: 佢地支持布殊,奧巴馬上台,呢種人就會日日反奧巴馬, 直到佢落台為止) . 我想問: 呢啲係咪我地香港人想要既野呢.

由頭到尾，問題「點解我唔可以回歸第一日就選我喜愛嘅特首?」

選舉係與生俱來嘅權利，點解唔係回歸 Day 1 就可以選特首? 殖民地時代係寄人蘺下，但回歸後港人治港，重要受中央氣?

關政棍乜事? 但係如果要講 How.

第一，公投運動嘅勝負，Day 1 已經講係取決於簡單多數，如今係過半數投票嘅人令辭職議員返回立法會。
第二，社民連口號為「基層主導、民主企硬，旗幟鮮明的反對派」，如果唔鐘意佢哋代表你，你可以唔投該黨票，呢個係你嘅選擇。响民主社會度，選舉係市場主導，當個個都受過教育，而該黨依然有人當選，即係仍然有市場，係咪代表成個社會有問題?

香港依家最大問題係無選擇，立法會議員得一半有得你選，特首就連提名都無份。咁我嘅選舉權、提名權、被選權去咗邊?

當然，如果:

• 你願意當年董建華繼續做特首
• 你願意曾任權代表你話中國今時今日嘅成就係多得六四
• 你願意納嘅稅每月幾萬蚊俾一個唔開會嘅議員 (有十幾位，所以係幾十萬)
• 你願意納嘅稅每月廿幾萬蚊俾一個有外國國藉嘅副局長、政治助理 (有廿幾位，即係無咗半 mil)
• 你願意將你嘅最高工資定為廿蚊

我會尊重你，只希望你可以留俾弱勢(相比三百萬，五十萬人係弱勢)發聲嘅空間。

如果無得選，請轉用直接民主，由我代表返我自己。

Why and Why Not

友人說:

唔明...其實香港人憑咩一步到位2年後去直選特苜? 由英國港督時代, 港督都唔係我地選架啦..以前唔嘈,依家先來嘈要選?

選舉係*與生俱來*嘅權利，點解唔係回歸 Day 1 就可以選特首? 殖民地時代係*寄人蘺下*，但回歸後*港人治港*，重要受中央氣? 真係開玩笑!

工資還是可以的

富士康高壓管理，工人唔離開，只係為咗多少少嘅工資。人生充滿選擇，點解工人有勇氣去結束自己嘅生命，而唔去辭職? 低少少嘅人工，比死亡更可怕嗎?

Tech vs. Prank

真係好想睇吓部機執蛋可以執得幾快

專業

專業，係需要知識。可惜做 Software 嘅，好多都唔係本科生，而係半途出家，响香港難以走上專業之路。就好似讀醫咁，係應該有成套嘅知識要讀，而唔係求其讀咗幾個 course 就話係醫生。

呢幾個禮拜不斷地做面試，發覺有唔同嘅人想入呢一行，有 D 係讀商科，考咗幾張 vendor cert 就話想入行，有 D 就讀電子工程，有 D 讀一 D 叫 Information Computing 之類嘅 degree. 但本科生實在係無乜，所以退而求其次，只好搵 D 識少少 concept, 有邏輯，有 passion, 醒目同知自己要做乜嘅人。

唔係本科生，就好似起樓無打地基咁，上面起唔到高樓。呢幾個月，發現原來公司有人要重新打過地基，有 D 剩係掃一掃灰水就 OK.

當然，唔係話做 software 唔夠專業，但水電通渠都好專業，此專業不同彼專業。 You can serve a customer professionally but the industry itself is not a profession.

Windows 7

MS 2010 產品系列嘅出現，令到不得不上去 Windows 7. 屋企同 Office 部腦都係 XP 機，但係 Office 部腦唔死得，唯有响屋企試裝一次，睇吓順唔順利先。有乜疑難雜症，都响屋企攪掂，包括換返 XP 嘅樣，sound card 無聲等等。

星期一晚試將，點知裝完唔夠位，星期二成個 installation rollback. 清一清個 hard disk, 星期二下晝再嚟。今日，終於攪掂晒。依家 公司嘅 notebook, office 嘅 workstation, 屋企嘅 PC 都上晒 Windows 7. 係嫌 upgrade 咗之後好似慢咗 D, otherwise, it's perfect!

自我感覺良好

選民人數: 3,373,342
公社+大專2012得票: 440,392
支持率約為: 13.06%
全港人口: 7,026,400

假設係一個全港性嘅遊行，咁星期日就有 917,301 人參與。呢一個數，只係响八九六四、零三七一出現過。建制派以及政府可以沾沾自喜嗎?

水晶球

無水晶球，係咪預測唔到未來? 但以每小時 1.2% 嘅投票率計，總投票率會係 18%. 後果係今次嘅公投運動失敗，香港人放棄咗表達嘅權利，放棄可貴嘅民主。

今日終於俾我見到未來嘅香港，就係由國際大都會變成中國嘅一個城市。回歸廿一年，香港人由自力更生，變成乜都伸手問北京攞。CEPA, 自由行、奧運馬術、世博保留香港館，咁嘅香港值得留戀嗎? 衣食足而知榮辱，點解香港社會咁發達，而唔知個醜字點寫? 難怪台灣民進黨可以有本錢攪台獨，一國兩制總設計師都真係多得你唔少。

國際大笑話

曾幾何時，政府官員、議員、評論員等，都會用國際大笑話嚟形容一件醜事。

但點解曾班子要自己製造一個出嚟? 試問點解會有一個開放社會入面嘅政府首長，會帶頭話唔去投票? 唯一合邏輯嘅說發，睇怕都係林夕响今日响蘋果寫嘅一篇專欄所題到:

一旦政府回復常態大力鼓勵我們投票，再次大力呼籲投票乃公民責任時，我們是否可按這次的變臉而懷疑，幹嘛那麼積極？莫非方案已設計到天衣無縫，所謂普選，已有天網篩選，密而不漏，安全係數與防火牆足以安居平五路，能讓你選，任你怎選，也不離北京西環的五指山？

到時候，選邊個都係假選舉。所以，聽日唔投票，就即係將香港嘅未來，完全交俾北京。破壞一個兩制嘅，其實唔係中南海，而係香港人自己。咁，你聽日係咪都係選擇唔投票?

由英國到香港

香港曾經係英國嘅殖民地，前幾日再度政黨輪替，保守黨同自由民主黨組成聯合政府。保守黨要執政嘅代價，就係改革選舉制度，由人民以公投決定。

咁香港呢? 點解香港人唔可以就選舉制度，用公投決定?

點解有人可以有 3 票分別選特首、選功能組別議員、地區議員? 而你就只可以選地區議員?

自97回歸後至2008年，12年內香港的本地生產總值（GDP）按同一價格基礎計算，錄得48.5％的實質增長，但期內全港住戶的每月入息中位數，按同一價格基礎計算卻不升反跌，由18,300元下降至18,000元（按2008年物價計算）。

如果話被選嘅人只需要向選佢嘅人負責，D 錢去咗邊，不言而喻。

我無水晶球，唔知未來會點，但依據趨勢，入息中位數只會跌。咁望子成龍嘅你，子女可以成龍嘅機會只會越嚟越細。5月16號，你會為子女嘅未來投下你嘅一票嗎?

沒有蘋果的選舉

常言道，選舉只係揀一個無咁爛嘅蘋果。今個星期日，再唔係揀蘋果。

因為今次，係一個公民投票，議題係「盡快實現真普選，廢除功能組別」

如果你想有普選，但又唔鐘意辭職嘅議員，大可以投俾《大專 2012》嘅後生仔。
如果你唔想有普選，可以投俾其他人。

公民投票係直接民主，即係自己話事。唔駛著特定顏色嘅衫、唔駛去維園、唔駛日曬雨淋等、唔駛封路、唔駛行幾個鐘、唔駛去政府總部，只係朝早七點半至晚上十點半，用幾分鐘去投票站外加幾分鐘投票，之後食飯又得、睇戲又得、落 MK 又得、返屋企亦得。

順帶一提，唔想有普選即係乜嘢:

• 你願意當年董建華繼續做特首
• 你願意曾任權代表你話中國今時今日嘅成係多得六四
• 你願意納嘅稅每月幾萬蚊俾一個唔開會嘅議員 x 10+
• 你願意納嘅稅每月廿幾萬蚊俾一個有外國國藉嘅副局長、政治助理 x 20+
• 你願意將你嘅最高工資定為廿蚊

只要你願意，我會尊重你嘅決定，你肯投票就得喇!

立此為證 2

香港從政嘅，從來都唔係政客。一個政客，响公開場合講嘢，一向都會好小心，考慮到人民嘅感受。

香港嘅政棍相反，永遠只向權力底頭。响年頭，譚惠珠响城市論壇話：「權力唔係來自人民，權力係來自中央。」

今日，田北辰响城市論壇話：「如果買居屋嘅人可以原價賣返俾政府，佢會支持復建居屋。」

田北辰從來唔駛擔心住嘅問題，究竟佢明唔明「住」呢件事，响小市民心目中係一件幾煩惱事? 拋出咗呢個方案，即係開咗一張支票，小市民就以為係真。一個接觸唔到市民脈膊嘅政棍，係咪可以入立法會? 同樣地，如果係一班叫做功能組別嘅政棍呢? 五月十六號，你會去投票嗎?

每日一字 9

有人辭官歸故里，有人漏夜趕科場

有無人知「漏夜」個「漏」字點解?

漏——是古代的計時器，就同於現代的時鐘，有沙漏，油漏，水漏之分，也就是說用容器內的介質流出的多少確定一個時間段；與很多小說中間的一柱香時間大概意思相同，都是表示一個時間過程。漏夜就是不分晝夜的意思了

Self Handicapping

噚晚學到一個心理學名詞: Self Handicapping

簡單嚟講就係當一個人覺得一件事無可能嘅時候，佢就會搵個藉口俾自己，到真係失敗時，令到自己好過 D.

就好以孫中山所講

吾心信其可行，則移山填海之難，終有成功之日。吾心信其不可行，則反掌折枝之易，亦無收效之期也

觀戰

Adobe 話 Apple 霸道，Steve Jobs 話 Flash 太慢，又趕唔上潮流，FSF 話 Apple 錯誤引導消費者。Open Letter 一封接一封。最後得益嘅，唔係各位俾錢嘅消費者。

一間科技公司，唔可以將科技應用响消費者身上，就已經係失敗。但原來，Adobe 同 Apple 都唔係科技公司，係一間設計公司。兩個 Chief Designers 响網上罵戰，最後係無好結果，因為 Design 無對錯，只有好壞，結論永遠係無結論。

CS5 已經犠牲，FSF 已經開腔, Firefox 似乎唔會 support H.264. HTML5 video 會係下一個戰場，最後犠牲者，永遠都係用家。

話事權

民主體制，最偉大嘅發明係秘密投票。

無論外面嘅人幾咁落力拉票... 又或者食咗幾多次蛇宴... 抑或係去過幾多荔枝園...

你响投票區所印嘅剔號，就係代票你神聖嘅一票。

而呢一票...

可以令你唔鐘意嘅議員下台... 可以令左右政府政策... 甚至... 可以帶領中國民主進程。

無人知你投俾邊個，亦無人可以秋後算賬。

一切一切，出於自己嘅意願，自己嘅意志，自己嘅控制。响呢個無力嘅人生入面，其中一件可以自己話事嘅事情。唔去投票，就好似放棄自己嘅權利。

5 月 16 號，你會放棄嗎?