選戰2016 - 經歷篇

呢一屆選舉，參與度算最高，事緣我相信香港嘅劇本再行落去就係流血政變，難得有人講出另一個結局，想實現呢個結局，於是就去幫吓手。

對呢場選戰我只係 Contribute 咗4晚同8個鐘左右嘅時間落街去拉票。

第一晚，响鰂魚涌開完會，食少少嘢，就走去四眼個 Office 做熱血工場幫手，上到去，原來都有唔少人响度，幫手都要等一等。終於入到去，一張一張嘅 Label 紙，貼咗唔知幾多張，但唔使幾個鐘，就攪掂，然後就默默離開。

第二晚，响正街附近，個街站表係第一街同第二街交界，但呢兩條街跟本就無交界，搵吓搵吓，原來諗住走去電車路去創業睇睇，咁啱又見到個街站，咁啱四眼 (我諗我唔應該加個哥哥落去稱呼佢) 又响度。大家對熱狗們嘅印象都係打打鬧鬧，但其實，佢哋係好有禮貎，四眼重係超級客氣嗰隻。呢一晚有一位阿叔同一位嬸嬸過嚟傾計，另有一位哥仔埋嚟問獨立嘅嘢，初試啼聲，我諗我唔算答得太好，希望無失分。呢一區感覺就係一眾街坊，真心想為香港好。

第三晚，咁啱响中環開完會就見到有街站，四眼又响度，於是就順道去幫手，中途落過小雨，本來背囊係擺响街，但打怪車無耐就到，背囊就入車。中環派文宣，真係難好多，個個都放工趕住返屋企，好多都唔會接。最記得有位阿姐著得好斯咁講一句唔知乜嘢，諗咗一陣先意識到佢講走開，似乎真係好趕，但最攪笑係隔一陣我好似又見到佢上落條電梯幾次 (我記唔到樣，唔定係咪同一個人)。夜少少，又有位哥仔同我講話全民制憲係唔啱，香港人應該聽共產黨話云云，响我同佢傾嗰陣，有位熱狗又响幫手，睇得出呢位哥仔趕時間又有少少無耐，我都係接返個波送佢走。派得咁上下，有少少餓，就拎返個背囊去食少少嘢先，返到嚟已經話唔使再幫手，留响度聽節目就得。

第四晚，夜咗少少收工，只有銅鑼灣街站會做夜少少，於是食少少嘢就去幫手。又撞到四眼，但佢同途人影緊相，就直接問團隊嘅人有乜可以派。今次有個阿嬋嚟挑機，自己講完唔聽人講就自己走咗去，我唔會俾呢件事發生，就一路追住佢一路講我嘅睇法。又有一位哥仔接咗張文宣之後，响我面前撕開兩邊，乜咁樣有意義嘅咩? 最後本來10點半嘅街站，做到11點。

到咗選舉日，吃咗 Lunch 之後，就出去投票。好多人，第一次見到咁多人响票站。按照規舉，只投直選，對討厭功能組別嘅我嚟講，絕對唔會投。因為上年有經驗，放咗張直選票入票箱，就退張功能組別票，個選舉主任竟然叫我就咁放入票箱，你老闆呀! 上年明明可以打個印話張票 Unused, 你今年叫我放我票箱。今時今日，就係唔信你，到時俾你亂投咪死火! 幾經堅持，終於肯打印，要搵人做見証，好快就攪掂。

因為個禁止拉票區好大，唔知點搵街站，幸得強大嘅觀察力，見到遠處有個街站，就走過去問使唔使幫手。派文宣到差不多6點，就去食少少嘢再派多陣，之後團隊門原來話去石塘咀，但因為帶隊阿姐唔識路，就去咗堅尼地城。相對上環，氣氛熱鬧好多，走咗去一個十字路口，原來人太多，反而好難好有禮貌咁派嘢。跟住對面嘅民建聯團隊開大聲公，於是我哋就大嗌7號鄭錦滿去抗衡，而隔籬嘅王維基團隊就响度食花生，係好小學雞，但苦中作樂，無傷大雅，喉嚨就傷啲咁解。之後大聲公走咗，又無得玩。但過咗一陣，曾主席到場?! 無耐葉國謙到埋! 大嗌咗幾次又好似無乜意思，跟住黃之峰架宣傳車嚟到，呢個唔嗌唔得，佢重要駛入去禁止拉票區，這合法嗎? 剛剛街口紅燈，於是佢停幾耐，我哋就嗌幾耐。王維基團隊要散水，有人話佢支持7號喎! 都唔知點解好，最後同佢哋影咗張相。

响堅尼地城，似乎都有唔少熱普城支持者，好多街坊都話支持7號，感覺得幾 OK, 又有人買少少嘢嚟，但其實唔收得。到咗最後，走到去另一個街口，陳淑莊團隊同佢本人响度嗌咪，最後8秒鐘，大家一齊倒數。一切都結束，幫手收完嘢，就道別離開。唔經唔覺企咗7個幾鐘，鞠咗唔知幾多次躬，派咗唔知幾多張文宣，好彩天陰同埋有少少風，唔係真係難頂。返到屋企，條腰還好，但對腳唔係我嘅。

但一切都係從心出發，到今日知道輸咗，都係無悔。

P.S.: 其實重有一件黃色嘅運動衫係特登去買，但之後係著得返，我諗唔算乜嘢 Contribution.
P.P.S: 本來諗住一路做街站一路打電話拉票，但其實係做唔到，熱普成團隊輸咗，可能只係大家各方面都有少少嘢做得未夠，唯有下次做好啲，如果重有下次嘅話。
P.P.P.S: 熱狗，其實唔會亂咬人。By the way, 我唔係熱狗。

全民制憲

民調: 係嘥氣，最準嘅民調，就係選舉完結後出嚟嘅結果。

永續基本法: 只限於地契，反正港島區嘅地契唔受 2047 大限影響，不作詳述。

全民制憲: 先係主菜，當今香港面對嘅問題，係系統/制度/結構上嘅問題，根源之一，係部基本法做得唔好。所謂永續基本法嘅條件之一，係部基本法需要由香港人有份參與，以「本土」利益為依歸，再清淅地將含糊嘅條寫返好佢。曾經有一套可能嘅方法，只係政府自己唔肯做:


系統做得好，乜嘢人去執行已經唔係問題，君不見 iPhone 响普通用家手上玩得不亦樂乎，就係因為系統做得好。

任何政團對全民制憲有晒全盤計劃並承諾執行，我都樂意支持。

投票: 唔係想對家輸，而係想己方羸，而要羸，就一票都不能少。所以，不論你嘅立場，出嚟投張直選票，今屆唔投，下屆唔知有無得投。功能組別嗰啲: 算9數啦你.jpg

自我感覺良好

選民人數: 3,373,342
公社+大專2012得票: 440,392
支持率約為: 13.06%
全港人口: 7,026,400

假設係一個全港性嘅遊行，咁星期日就有 917,301 人參與。呢一個數，只係响八九六四、零三七一出現過。建制派以及政府可以沾沾自喜嗎?

水晶球

無水晶球，係咪預測唔到未來? 但以每小時 1.2% 嘅投票率計，總投票率會係 18%. 後果係今次嘅公投運動失敗，香港人放棄咗表達嘅權利，放棄可貴嘅民主。

今日終於俾我見到未來嘅香港，就係由國際大都會變成中國嘅一個城市。回歸廿一年，香港人由自力更生，變成乜都伸手問北京攞。CEPA, 自由行、奧運馬術、世博保留香港館，咁嘅香港值得留戀嗎? 衣食足而知榮辱，點解香港社會咁發達，而唔知個醜字點寫? 難怪台灣民進黨可以有本錢攪台獨，一國兩制總設計師都真係多得你唔少。

國際大笑話

曾幾何時，政府官員、議員、評論員等，都會用國際大笑話嚟形容一件醜事。

但點解曾班子要自己製造一個出嚟? 試問點解會有一個開放社會入面嘅政府首長，會帶頭話唔去投票? 唯一合邏輯嘅說發，睇怕都係林夕响今日响蘋果寫嘅一篇專欄所題到:

一旦政府回復常態大力鼓勵我們投票，再次大力呼籲投票乃公民責任時，我們是否可按這次的變臉而懷疑，幹嘛那麼積極？莫非方案已設計到天衣無縫，所謂普選，已有天網篩選，密而不漏，安全係數與防火牆足以安居平五路，能讓你選，任你怎選，也不離北京西環的五指山？

到時候，選邊個都係假選舉。所以，聽日唔投票，就即係將香港嘅未來，完全交俾北京。破壞一個兩制嘅，其實唔係中南海，而係香港人自己。咁，你聽日係咪都係選擇唔投票?

由英國到香港

香港曾經係英國嘅殖民地，前幾日再度政黨輪替，保守黨同自由民主黨組成聯合政府。保守黨要執政嘅代價，就係改革選舉制度，由人民以公投決定。

咁香港呢? 點解香港人唔可以就選舉制度，用公投決定?

點解有人可以有 3 票分別選特首、選功能組別議員、地區議員? 而你就只可以選地區議員?

自97回歸後至2008年，12年內香港的本地生產總值（GDP）按同一價格基礎計算，錄得48.5％的實質增長，但期內全港住戶的每月入息中位數，按同一價格基礎計算卻不升反跌，由18,300元下降至18,000元（按2008年物價計算）。

如果話被選嘅人只需要向選佢嘅人負責，D 錢去咗邊，不言而喻。

我無水晶球，唔知未來會點，但依據趨勢，入息中位數只會跌。咁望子成龍嘅你，子女可以成龍嘅機會只會越嚟越細。5月16號，你會為子女嘅未來投下你嘅一票嗎?

沒有蘋果的選舉

常言道，選舉只係揀一個無咁爛嘅蘋果。今個星期日，再唔係揀蘋果。

因為今次，係一個公民投票，議題係「盡快實現真普選，廢除功能組別」

如果你想有普選，但又唔鐘意辭職嘅議員，大可以投俾《大專 2012》嘅後生仔。
如果你唔想有普選，可以投俾其他人。

公民投票係直接民主，即係自己話事。唔駛著特定顏色嘅衫、唔駛去維園、唔駛日曬雨淋等、唔駛封路、唔駛行幾個鐘、唔駛去政府總部，只係朝早七點半至晚上十點半，用幾分鐘去投票站外加幾分鐘投票，之後食飯又得、睇戲又得、落 MK 又得、返屋企亦得。

順帶一提，唔想有普選即係乜嘢:

• 你願意當年董建華繼續做特首
• 你願意曾任權代表你話中國今時今日嘅成係多得六四
• 你願意納嘅稅每月幾萬蚊俾一個唔開會嘅議員 x 10+
• 你願意納嘅稅每月廿幾萬蚊俾一個有外國國藉嘅副局長、政治助理 x 20+
• 你願意將你嘅最高工資定為廿蚊

只要你願意，我會尊重你嘅決定，你肯投票就得喇!

立此為證 2

香港從政嘅，從來都唔係政客。一個政客，响公開場合講嘢，一向都會好小心，考慮到人民嘅感受。

香港嘅政棍相反，永遠只向權力底頭。响年頭，譚惠珠响城市論壇話：「權力唔係來自人民，權力係來自中央。」

今日，田北辰响城市論壇話：「如果買居屋嘅人可以原價賣返俾政府，佢會支持復建居屋。」

田北辰從來唔駛擔心住嘅問題，究竟佢明唔明「住」呢件事，响小市民心目中係一件幾煩惱事? 拋出咗呢個方案，即係開咗一張支票，小市民就以為係真。一個接觸唔到市民脈膊嘅政棍，係咪可以入立法會? 同樣地，如果係一班叫做功能組別嘅政棍呢? 五月十六號，你會去投票嗎?

話事權

民主體制，最偉大嘅發明係秘密投票。

無論外面嘅人幾咁落力拉票... 又或者食咗幾多次蛇宴... 抑或係去過幾多荔枝園...

你响投票區所印嘅剔號，就係代票你神聖嘅一票。

而呢一票...

可以令你唔鐘意嘅議員下台... 可以令左右政府政策... 甚至... 可以帶領中國民主進程。

無人知你投俾邊個，亦無人可以秋後算賬。

一切一切，出於自己嘅意願，自己嘅意志，自己嘅控制。响呢個無力嘅人生入面，其中一件可以自己話事嘅事情。唔去投票，就好似放棄自己嘅權利。

5 月 16 號，你會放棄嗎?

公平

有人說

機會是自己爭取、夢想是自己追尋的。住公屋可以靠政府，但要買樓，就靠自己的實力吧。難道從前的環境比現在好嗎？試想想，你們一出生，便有屋住、有飯吃；還有空調、電腦、手機，更有比從前泛濫的大學學位。上一代，或上上一代的人，情況一定比你們糟一萬倍，他們有投訴要走路上班，要死慳死抵，要清茶淡飯嗎？那個年代，也有達官貴人，也有外資大企，有更不完善的制度，但大家也懶理，有甚麼好怨，即管做吧！最後不是賺了你出生時便擁有的東西嗎？那請問你們現在還怨甚麼？難道特首與你對話後，你便立即可以上車買樓麼？成功的香港人從來沒有依賴政府，大家也是靠一雙手，憑自己的努力和上進，肯捱肯搏，然後打出一片天。你給我的偏不要，想要的就自取，這就是香港人的骨氣。可惜，現時已很少人談骨氣了。

但睇完，心裏又不是味兒。的確想當年嘅制度比依家更加唔公平，但係時代係要進步，唔通今時今日我哋可以容許當年嘅呂樂探長貪污? 我諗唔可能啩?

友人說

賣菜呃秤，消委會要罰
賣抽油煙機報大轉數，法庭判坐監
賣樓誤導景觀、間隔、報大面積、發水，無事
對小市民致力打擊，對大財團視若無睹
這就是香港政府。市民早已絕望。

點解香港政府可以咁不堪? 請拿出 2003 年 7 月 1 號嘅骨氣，响 5 月 16 號投票。

由世博到微博

世博，係一個國家展示國家實力嘅地方。經過文革、經過六四，改革開放三十年，北京可以舉辦奧運、上海可以舉辦世博。一切一切，中國都好似強大。

但人權，似乎無乜進步。梁詠琪嘅微博、杜汶澤嘅微博分別被刪。經濟發達咗，科技已經可以上去太空，點解仍然容不下一兩句維權呼聲?

香港自九七後開始被大陸化，釋法、釋法、再釋法，CEPA、《珠江三角洲地區改革發展規劃綱要》、《粵港合作框架協議》，實行經濟統戰香港。好多上一輩嘅人同我講過，話香港無咗大陸唔得，無謂攪普選。

System Thinking 入面有所謂嘅 Negative Feeback, 同大家常識所認知嘅無乜分別。但成個普選 vs. 經濟，其實根本係一個 Negative Feeback: 無普選=>政府低效施政=>民怨=>中央加大力經濟誘因=>既得利益者支持中央=>無普選

如果反過來有普選嘅話，中央可能根本唔需要出手。唔係話普選一定可以救香港，但係點解要一個唔係自己選嘅人去攪攪陣? 要有普選，就要由自己開始，不論任何選舉都要盡公民責任去投票。投邊個無所謂，因為旨在選一個比較無咁爛嘅蘋果。五月十六號，為自己投下公義嘅一票。否則，廿三條立法後，大家嘅自由可能會一去不返，唔單止無微博，可能要同大陸一樣，要「翻牆」先可以睇到 YouTube, Blogger, Google.

杜汶澤响佢個 Blog 到講呢件事嘅最後一句係咁嘅

雖然多一些無聊留言，還是這裡好。至少自由。I love Hong Kong!

放眼未來

大專 2012, 令小弟嘅公投狂想成真。數返時間，係後八十同前九十年代嘅後生仔，俾教改、母語教育玩殘嘅一羣。但今日可以走出嚟，做該做嘅事，十年後嘅香港，會變成點呢?

公投狂想

如果有所謂嘅公投 B 隊，將會係曾特首及一眾高官嘅惡夢。因為如果選舉一旦要舉行，特首及高官們無可能唔投票。而 B 隊嘅政綱同 A 隊一致，係要爭取真普選。結果係，只要佢哋一出現响票站，都係代表佢哋支持真普選 (除非佢哋當住全港市民話佢哋投白票)。如果唔出現，第二日又會被大字標題話唔去投票。

由以上假設，可以得出一個結論: 港島區一定有最少一個唔知乜嘢人去角逐補選

如果無公投 B 隊之餘又無其他人參與補選，成個運動就會因為被選唔係涵慨全香港而失敗，De facto Referendum 會淪為 Pseudo-Referendum. 公民黨如果堅持唔贊成有 B 隊嘅出現，而社民連又被制止出 B 隊，殺傷力比民主黨唔參加辭職還要大。

解決辦法只得一個，就係搵人個無政黨背景嘅人做 B 隊。可以係普通網民，政綱又係真普選，唔做任何宣傳，嗰五萬蚊保證金，搵返嗰十萬個厭惡民建聯嘅人，一人一區五毫子，五區都只不過係兩個半。兩個半有一個公投俾全港有機會玩吓，都好過成萬蚊起個唔知會唔會搭嘅高鐵。

不流血革命

一石激起千重浪，一個以「五區公投」開始嘅新民主運動嘅一個口號「全民起義」，就引嚟建制派同親中央人士嘅批評。中國人嘅起義就梗係流血啦，共產黨當年同國民黨打杖唔知流幾多添! 就算係六四嘅和平靜坐示威，都俾李鵬話係動亂，唔係起義咪又係流血收場。

但君不見英國當年君主立憲，被後人歌頌為光榮革命、不流血革命、和平革命等，就知道一件事可以有好多方式做。以前用慣暴力陣壓示威者嘅，睇見「起義」兩個字，就一定諗到係流血。但睇真 D:
起 - 引發、產生
義 - 公正合宜的道理或舉動

「全民起義」只係叫全港市民參與一場產生公正公義嘅新民主運動。離范人大嘅革命，仲有好遠~~~





























後記: 革，革除，改變也；命，命運，生命也；革命者，改變命運也。流血不流血，不在字面上，而在行動上。

立此為證 1

譚惠珠今日响城市論壇話：「權力唔係來自人民，權力係來自中央。」

呢個係民主社會容許嘅事嗎？

Interesting Propositions

Proposition 1: 基本法無所謂嘅公投，舉辦任何形式嘅公投，係違反基本法
Proposition 2: 中央政府唔承該任何形式嘅公投

Dilemma:
如果中央政府視「五區公投」為普通補選，咁即係無違反基本法
如果中央政府視「五區公投」為公投，係違反基本法，但原來佢真係一個公投?!

Implication:
中央政府嘅行為，係「自己挖洞跳進去」

De facto Referendum

資訊科技入面，有一種標準叫 de facto standard, 即係唔係一個業界嘅標準，只係約定俗成，好多人用嘅一套方法，變成實際上嘅標準。例如，Microsoft Windows 係 PC 嘅 "standard" OS, 又或者當年 IE6 中 HTML 同 CSS 嘅用法，甚至係今時今日大家寫 AJAX 都會用到嘅 XMLHTTPRequest (XHR) 等，全部都係 de facto standard.

Referendum, 簡單嚟講叫公投，拉丁文解作: "that which must be referred"

兩個字 (三個字?) 加埋一齊，即係變相公投。

點實行? 五個立法會選區每區其中一個立法會議員辭職，以單一議提做補選政綱。如果辭職議員嘅得票總和多過半數，就即係大多數市民支持議題。

點解要辭職? 因為香港無公投法。但議員辭職後，政府要安排補選、點票等程序，五區全港嘅選民都可以去投票，結果有認受性。

咁咪好嘥錢? 請班高官都好嘥錢，佢做錯嘢時你又叫唔叫到佢下台? 生產力促進局一年收二億，但可以唔見 Server, 百幾部電腦。邊個嘥錢 D?

如果輸咗點? 輸咗就要認，市民唔願支持，辭職議員要承擔後果。

點解要投票? 因為越多市民投票，不論支持或反對議題，都可以增加該議提嘅社會認受性，政府無得再用 D 唔知點做嘅民調或咨詢去扭曲民意。而市民，只要幾分鐘落街去投票站，就可以表達自己意見。

P.S.: XHR 响今年 11 月係一個業界嘅標準。