給政治宅

我唔知我係咪要洗一洗底...

我係幫過熱血公民嘅鄭錦滿當選，但係我唔係熱血公民嘅成員。
我係有聽熱血時報同 MyRadio, 但係最少有一星期嘅 Lag time, 最近好似個半星期了 (哥很忙)。更何況，聽嘅時候只係出街帶住 Headset 塞耳嘅時候聽，無乜特別留意過內容。
但我亦有聽903嘅在晴朗的一天出發，亦係 TVB 新聞台長開嘅人。

所有嘅政治判斷，大部份都係跟據自己嘅邏輯思考出嚟，只係結論咁啱大部份時間同熱血時報同 MyRadio 嘅立場一樣。

所以如果大家有咩誤會，請先認清事實先。簡單嚟講，我唔係特別支持熱普城，熱普城對我嚟講係一個選舉聯盟，熱普都還可以叫同我嘅理念一致，城就真係未參透到箇中玄機，好多事未敢苟同。更何況熱普城响選舉過後已經敗北，唔同人民力量咁有意思延續落去，所以亦都唔存在。

一位老人家(係，又係黃毓民)講過要以客觀嘅事實做主觀嘅判斷; 而我呢啲讀過科學嘅人就更應該以實質証據去作出結論。只問立場，不問是非，好容易做錯事。

P.S.: 無可否認地，熱血時報响網台嚟講係算高質，呢排玩熱血時報嘅深夜節目《愚樂無窮》，可以寫 Program 用 Chatroom 玩 AxiDraw, 呢度重溫小弟其中一幅作品: https://www.youtube.com/watch?v=Mai6OUCl8o8