英法之旅 - Day 2

一早起身九點半，以為白金漢宮換更嘅步操儀式係十點，去到，好似乜都無得睇。再睇下，原來係十一點半。咁就唯有等吓，影吓相咁。影完相，好似無乜好位影操兵，爬咗上其中一個銅像，無耐就俾警察吹哨子叫落嚟，唯有响梯級邊等吓。位已經唔算好，但操操吓，竟然落雨，前面嘅一大堆什傘，好掃興。

睇完步操，再去噚日去咗乜都未開嘅唐人街飲茶，食完飯就出發去大英博物館。响博物館行咗兩個鐘，睇嘅係幾年前遊雅典睇唔到嘅真跡，例如衛城同巴特龍神殿嘅石像，再去到中國展區，睇完就好似中國剩係得佛教咁，十居其九都係佛像，其他嘅就係青銅器，唔係太覺有傳說中嘅好珍貴被搶嘅文物。

時間尚早，坐的士去 Tower Bridge, 本來想搭地鐵，但係一張單程飛都四幾，三個人加埋都12磅，唔著數。影完相，去 Oxo Tower 食晚餐。之後，再返 Tower Bridge 影 Time Lapse, 點之影影吓，無電，計劃告墔，唯有換粒電去 London Eye 再影。

影飽影夠，再搭地鐵返酒店，點知搭錯車又轉錯線，返到酒店都十點半。