國際大都會

一個城市嘅發展，唔係剩睇 GDP, 唔係睇你搵幾錢。香港作為要支撐住七百幾萬人嘅城市，本身嘅基建係好重要嘅一環。呢度嘅基建唔係講咩港珠澳大橋、高鐵呢啲對外嘅基建，係道路、交通、渠務、水電、通訊等等內部嘅基建。香港响呢方面係做得太出色，而要做得咁出色，係因為呢個唔單單係需要，而係一個必要。香港停頓一日，就已經無咗數以十億計嘅經濟損失 (而我唔知呢條數點計)，所以呢一刻話落八號波，如果以30分鐘嘅車程再加30分鐘嘅準備，响一個鐘頭內，整個城市基本上運作正常，全球只此一家。

反觀澳門，2016年人均 GDP 比香港要高 50%, 啲錢洗咗去邊呢? 我唔止一次聽過澳門好似香港咁成日整路，但又唔係鋪電線整水管嗰啲，而係無端端掘爛條路再鋪返佢。最後，噚日一個風，水浸不再話下，斷水斷電，再加上人命傷亡，損失難以估計。然後，行政長官走去無事嘅地方視察，官員話按本子跟程序做事，然後，就沒有然後了。唔係人民選出嚟嘅人，唔使向人民負責，呢個係常識。台灣之前都停過電，高官識做就乖乖辭職，但關個高官事咩? 基本上唔關，但電網脆弱，欠規劃，最終就要算到高官頭上，呢個係對人民負責嘅自覺。

順帶一提，香港，同樣有個唔係人民選出嚟嘅政府，一個變咗橡皮圖章嘅立法會，同埋一個已經做緊政治審判嘅司法機構。已經過咗 Point of no return, 未來係點，澳門係前車可檻，做定心理準備吧!

孫中山講過：「政就是眾人之事，治就是管理，管理眾人之事，便是政治」實實在在咁解說民生同政治嘅關係。你討厭政治，那便放棄民生。唔好阻人搵食，咁就打死無怨。窮得只剩下錢，之後失去生命，呢啲叫有錢無命享。

人工智能原理 淺陋篇

作為一個電腦從業員，去理解 AI 點運作，係責任。人會因為無知產生恐懼，作為專業人員唔可以。

依家嘅 AI, 基本上係 Neural Network, 簡單嚟講係 Weighted Average. 個 average 就係分類結果嘅信心/準誠度。而分類嘅結果準唔準，就要睇吓啲 Weight 啱唔啱。至於啲 Weight 點搵出嚟，就要有一 set data 去話俾個 Neural Network 知乜嘢係啱，個過程叫做 Training.

最簡單嘅 Neural Network, 例如 OCR 去認英文字同數字，一個 10 x 10 嘅單色圖，1 個 input layer 有 100 個 node, 1 個 output layer 有 62 個 node. 入面有好多數要計 ，當中會用到數學上嘅 Matrix, 所以最理想係用 GPU 計。

多過兩層嘅 Neural Network 就叫做 Deep Network/Learning, 功較就係加入複雜性，例如有一層識得認直線、橫線、斜線，下一層就識得認十字線同交叉線，而圖案嚟講，就係由複雜嘅線條組成，從而去認唔同嘅物件。

無論係唔係 Deep Network, training data 嘅質素係好重要，學電腦第一堂學嘅就係 Garbage In, Garbage Out, 亂教一通嘅話，就係一個亂嚟嘅 AI, 同你亂教一個鬼佬講廣東話粗口當係問候語效果差唔多。

所以 AI 會唔會發展到消滅人，就要睇吓 Neural Network 嘅結構同埋擺乜嘢 data 去 train.

至於 AI 會唔會有自我意識，咁就要睇吓點樣將自我意識呢樣嘢變做 1 同 0 先。

P.S: 點解 QQ 個 Bot 點解會反共，一係假 AI, 一係俾人 feed 咗啲反共 data 去 train, 無其他。