講古系列 9: 銅鑼灣

1889年嘅銅鑼灣，真係有個灣响度，不過東角就已經被人填咗做貨倉，隻角已經無咁凸出。香港島都係山多平地少，銅鑼灣一帶就已經有三坐山: 東角山、禮頓山、同埋加路連山。而銅鑼灣對出就有個燈籠洲/力奇島，係英軍嘅軍火庫嚟。

响銅鑼灣嘅東面，就係天后廟，天后廟有紅香爐，相傳當年紅香爐被沖上岸邊，附近嘅村民認為係天后送嚟嘅，於是就起咗座廟，廟後嘅山叫紅香爐山，山有高低起伏，高位為峰，低位為谷，紅香爐谷就响天后廟附近嘅盤地，谷內有紅香爐村，村內有大水坑可以作為耕作之用。

時移勢易，銅鑼灣嘅灣已經變成維多利亞公園，東角山之後被香港商人利希慎買咗，所以又叫利園山，跟住又被人鏟平咗去填海。加路連山亦都有相同嘅命運，又係被人鏟平咗，南面一帶嘅山坡原本係墳場，今日就變咗大球場，但墳場重有部份遺留咗，成為掃桿埔咖啡園墳場。力奇島就因為要起海底隧道就填海填埋過去，成為隧道嘅出入口。

天后廟似乎被遷移咗對面街，用嚟耕作嘅低窪地區亦都填平咗，今日成為大家食糖水同宵夜嘅地方。紅香爐村名字不再，但因為水抗而有大坑呢個名(曾經搭過架的士，個司機以為水坑口街係响大坑，睇嚟香港真係不缺水坑...)，當然係大家都認識嘅舞火龍，聽聞呢兩年外國人都有份玩，重係玩龍頭嗰隻。

每日一字 34

前京官一句「差強人意」，好似唔係太聽得慣，究意係「強差人意」定「差強人意」? 於是就去查，50幾萬 vs. 80幾萬嘅結果，好似係「差強人意」先啱，再深入去睇內容嘅討論，話「強差人意」係廣東人老作的說。

究竟以後重用唔用「強差人意」好呢? 答案係用。第一，「差強人意」個強字讀音係強壯個強音。第二，「差強人意」同「強差人意」個意思完全不同 (做得幾好 vs. 做得差)。即係如果要用「差強人意」，就要用得啱讀得準。第三，語言係會變，只要啱邏輯同溝通到就已經成立，係咪老作唔係重點，反正香港人都創造咗唔少潮語。

呢個態度，有名，叫 Descriptive Linguistics, 即係睇語文嘅用法，講返當中嘅規則出嚟，例如六書，就係歸納漢字嘅造字方法。

相反就係 Prescriptive Linguistics, 即係所有嘢都跟文法、讀法、寫法，或者做教育嘅，都係呢種人。但呢啲正字正音嘅權威我唔太 Buy, 例如將「啲」寫成「尐」，真係正字正音嘅話，會發現尐唔係讀 D, 而係讀「節」，你改得到部份人嘅寫法，你改唔到個讀音囉!

如果睇完重覺得「強差人意」唔用得，咁就請去宣傳吓「上下其手」、「每下愈況」、「每況愈下」嘅正確用法，同埋「千絲萬縷」嘅正確讀法。

當然，如果唔合邏輯、解唔通，例如「問非所答」同「黑紙白字」咁，糾正是應該的。

選民登記

要核實選民登記，無變嘅話，可以用電話、短訊、郵寄回覆


要加人嘛，悉隨尊便


唔知香港做乜要攪咁多嘢

新遮

大約幾年前左右，《矛盾大對決》做咗一集講遮同埋大風扇嘅對決，把大風扇之前贏咗好幾把遮，但呢一集係把遮贏咗，好彩外型夠特別，响無其他資料下，都搵到間廠，係荷蘭出品嘅 Senz. 之後再發現原來香港有得賣，嘩! 幾百蚊買把遮，都係買唔落手。其實另一個唔買嘅原因，係把遮打側睇落，前面好似無乜位遮雨，感覺上唔太得。

話說年初响挪威見到徒弟仔嘅時候，當時大風大雨，我把遮俾一陣強風吹散咗，徒弟仔嗰把無事，於是就托佢買咗把同一型號嘅遮。但係响去都柏林嗰陣發現，把遮唔知幾時俾我整壞咗，有兩技骨已經彎晒，好彩把遮鋼水夠好，加埋盡量避開嗰兩支骨受力，雖然都柏林啲風都唔細，但總算捱到最後。

返到嚟倫敦，落雨嗰陣啲風都唔係人咁笨，免得嗰兩支出現金屬疲勞而出事，就決定再買遮。英國啲遮其實都唔太得，之前又見到 Snoppy 仔出相，原來响遮頂嘅角度睇返，都唔係想像中咁細把，於是幾日前上網頂咗把。Senz 都出好多款色，除咗大遮同迷你縮骨遮外，有一款係自動開關嘅迷你縮骨遮，好處係遮柄唔似普通嘅迷你縮骨遮咁細，可以揸得舒服啲。

今日收到把遮，個包裝好長，其實有少少擔心會唔會好大把，拆咗出嚟之後，原來只係包裝盒嘅一半多少少


把遮都幾墜手吓，鋼水呢方面似乎唔使懷疑。前面係短咗少少，希望夠用，呢啲要實戰過先知。


其實，把遮係深藍色，唔知點解影相時係偏黑


一把 Senz 嘅價錢，大約可以買到10把遮，而呢年半已經壞咗3把遮，即係半年一把左右，所以如果把 Senz 捱到5年嘅話，就可以回本了。

雜記 7

呢排個水晶球不斷發功，有少少得人驚:

1. 去過溫莎堡，就有人去挑釁嗰度嘅御林軍
2. 做完太平山區嘅資料搜集，就有網台節目去影嗰一帶嘅地方
3. 去完 Llanfairpwllgwyngyll, 跟住因為一位天氣先生好順暢咁讀完個名而大熱

講古系列 8: 太平山區

話說網台有節目講太平山嘅故事，雖然之前都做過少少 Study, 但都想睇吓有無乜嘢新發現，於是又再週圍咁搵吓。發現政府網頁依家有講太平山名字嘅起源，而網頁入面嘅文字，亦都有好多唔同嘅網頁引用。


搵搵吓，搵到另一個網頁，話可以睇吓1898年嘅維多利亞城地圖喎，就係咁，搵到去英國嘅 National Archive, 响 Richmond 度，雖然半個鐘車程唔使，但又懶得特登走過去。睇吓睇吓，原來可以叫佢 Scan 完再做 Digital Delivery, 不過要錢的，於是就等佢報價，唔太貴嘅話都濟得過。

正如網頁所說，10個工作天報價，但好鬼貴...


公開嘅檔案似乎只此一家，其他嘅最舊都只係去到1907年嘅地圖。

放棄之際，又搵到原來地政總署出咗個 App, 入面有1898年嘅地圖，於是就一格一格咁 Cap Screen, 再還原返幅太平山區嘅地圖。

跟住，就可以講故仔了: 英軍由水坑口街登陸，因而英文被稱為 Posession Street. 亦响隔籬駐紮做軍營。而水坑口之所以叫水坑口，係因為以前有個大水坑，大慨係山水流出嘅位置，响嗰度駐紮，一來位置較高可以望出海，二來亦可能因為方便攞水。

由水坑口街轉入荷里活道向東行少少，就係差館上街，行上一段斜路，就有間差館，係第一代嘅八號差館，亦係以前嘅差館街所在。有軍營，有差館，呢區治安就唔會差，所以呢個山崗，就叫做太平山，太平山街亦因而命名，以太平山街做中軸嘅一帶，就係太平出區，屬於維多利亞城四環九約嘅其中一約。

太平山街附近有太平山街市，街市對出就係街市街。行返去皇后大道中，就係上環街市，雖然英文係叫 Western Market, 但唔係西港城。西港城要再行出少少，地圖標示住大慨係 Harbour Master Office 嘅字樣嘅建築物。

之後，因為鼠疫，拆咗太平山街市同埋差館，變成今日嘅卜公花園，街市街就變成普慶坊，差館街俾卜公花園食咗一半，另一半亦變成普義街。Harbour Master Office (即係海港政府大樓)搬咗，變成上環街市北座，附近嘅新街市街大慨就係咁嚟，而呢個上環街市北座亦成為西港城，而上環街市今日除咗係街市，亦係上環文娛中心。當年嘅軍營嘛，亦曾經係大笪地、荷里活道街市，最後就變今日嘅荷里活道公園了。

大勢所趨

細個嗰陣，成日諗點解會有立法局，嗰陣覺得都咁多年，要立嘅法唔係應該一早立好晒喇咩? 大個之後，發現社會要進步，法律都要跟得上時代步伐。

睇返歷史，好多時都要跟隨社會嘅需要同科技嘅發展:

• 小巴
  

  小巴本來就是白牌車你們知道嗎?
  
  在五十年代, 新界有一種比巴士收費高的白牌車, 因為影響到巴士的收益, 在香港這是非法的, 所以被警察大力掃盪. 這些白牌車, 就是小巴的前身.
  
  但去到六七年香港暴動時, 巴士司機罷工, 導致交通癱瘓. 政府為了解決交通問題, 便默許了白牌車進入市區, 以抒緩交通工具的需求. 因為巴士司機罷工, 導致了白牌車開始大受歡迎. 法律總是跟不上現實的需求和變化.
  
  而在 1970 年, 麥理浩上任之後, 就開始依香港目前的情況和需求解決各個暴動之後的問題. 其中之一, 就是將這些白牌車合法化, 就變成了今天的「小巴」.
  
  不要問我為何這篇文章下面那張圖是一部的士, 我沒有影射或暗示任何事.

• DHL
  

  面對DHL來勢洶洶的挑戰，郵政局當然不會坐以待斃。其實當時郵政局之所以完全壟斷，全因法例規定， 所有文件的運送都必須經過郵政局處理。因此，香港DHL營業後不久，政府在1973年就立即控告鍾普洋。幸運的是，裁判官當時同情DHL的遭遇，質疑既然 法例容許公司請一個辦公室助理來派信，為何不容許公司請一間公司來派信？結果鍾普洋先勝一仗。政府不服上訴，但由於提交的法律文件出錯，不獲高等法院受 理，最終政府為保面子索性放棄訴訟。
  
  然而，歌利亞真正的攻擊此刻才正式開始。1976年，政府決定收緊郵政條例，消除所有法律漏洞以加強郵 政局的壟斷地位，例如船公司在修例後，不可再運送任何與該班船無關的文件，即使是公司內部文件也不例外。鍾普洋心知只要修例成功，DHL便正式宣布死亡， 因此這個大衞決心要盡力反擊。
  
  他發現修例行動有兩個問題，第一，政府將包裹的重量上限設為22磅，這數字對許多公司以至法律人士來說都明顯 太低；第二，銀行或航空公司其實不時會「偷雞」運輸文件，而修例後假如再有公司犯法，政府將直接控告董事，最高罰款5萬元及入獄3個月。鍾普洋看準這些問 題，於是聯同13個貿易組織，合共超過200人（大多是公司董事）向政府抗議。事實上，當時許多公司都喜歡DHL的高效服務，心裏也不想它倒閉，「那時 Hong Kong Bank（滙豐銀行）很需要快捷的速遞服務，所以反對得最大聲」。結果，在這些有權勢人士的極力反對下，加上鍾普洋不斷強調速遞業有助香港與外國競爭，政 府最終無限期擱置修例，「如果DHL當年死了，今天香港就不會是亞洲的金融樞紐」。
  
  DHL戰勝歌利亞後，業務蒸蒸日上，今天已是世界數一數 二的速遞貨運公司。鍾普洋指，早前一個曾任公務員的老朋友對他說，當年整個政府都想不通，為何總打不敗這個叫鍾普洋的小伙子。情況就恍如歌利亞不明白何解 會敗在大衞手下。鍾普洋面對整個港英政府也可突圍，誰還敢說戰勝巨人乃不可能？

• Internet
  

  ［以史為鑒］1995年政府為左維護香港電訊利益，警察商業罪案調查科（CCB）突擊搜查七間ISP（互聯網絡供應商），拉人封艇。之後香港不論大小ISP用戶，都需要向香港電訊繳付每小時$1.98 PNETS費用（上網要逐個鐘計錢，好多90後都未聽過）。留意，當時上門拉人唔係重案組，係CCB。
  
  結果：由當日起，從來都唔識上網嘅香港人都知道原來有樣嘢叫Internet咁方便，自此互聯網才真正在香港普及起來。

政府自己跟唔到社會進步，有咗創新科技局又如何? Uber 嘅發展都已經唔係科技問題，係政治問題了。

每日一字 33

Llanfair­pwllgwyngyll­gogery­chwyrn­drobwll­llan­tysilio­gogo­goch 係英國最長嘅村名。原本條村只係叫 Llanfairpwllgwyngyll, 因為呢個世界都幾多聖母堂 (Llanfair)，因而要標明係邊個。而事實上，响登島前，就係有個叫 Llanfairfechan 嘅火車站。Llanfairpwllgwyngyll 個正式火車站名亦只係 Llanfairpwll.

名字來源亦有段故，話說當年新嘅火車線開通，作為 Anglesey 島嘅第一個站，想吸引遊客多啲人响呢個站度停一停，於是就作咗個咁嘅名。响 Linguistics 嚟講，威爾斯文係屬於 Synthetic 嘅語文，即係可以將好多嘢加入一隻字度，所以個車站名可以攪到咁長，嚴格嚟講，似一句句子多過一隻字。

維基英譯:

Parish [church] of [St.] Mary (Llanfair) [in] Hollow (pwll) of the White Hazel [township] (gwyn gyll) near (go ger) the rapid whirlpool (y chwyrn drobwll) [and] the parish [church] of [St.] Tysilio (Llantysilio) with a red cave ([a]g ogo[f] goch).

响 Google Map 度，搵到漩渦，搵到 St. Tysilio Church, 但紅色岩洞就唔知响邊了


個漩渦 (其實應該唔止一個) 係位於兩條橋中間嘅位置，有名㗎，叫 The Swellies. 因為潮汐漲退，啲水由利物浦涌落嚟，加上 The Swellies 嘅水底地形而形成漩渦，時間啱嘅話，係可以玩激流獨目舟。而响有吊橋之前，係有唔少人因為過唔到激流同漩渦而斃命。

講返而村，條村係會分上村同下村，即係 Llanfair­pwllgwyngyll­gogery­chwyrn­drobwll­llan­tysilio­gogo­goch-uchaf 同埋 Llanfair­pwllgwyngyll­gogery­chwyrn­drobwll­llan­tysilio­gogo­goch-isaf.

P.S.: 如果講正式嘅火車站名嚟講，最長嘅火車站名亦係响威爾斯，不過就係好正常嘅英文: Rhoose Cardiff International Airport

Constructive Criticism

本來都以為可以對一個 Product Specialist, 一個 Technical Lead 作出識度嘅尊重，It is good but... 嘅所謂建設性批評咁剩係識指出問題，而唔係因應 Product 嘅 Feature 或者 Limitation 去解決問題，跟本一啲都無建設性囉。剩係識講未有 Business Requirements, 但任何 Design 都要落 Assumptions, 係咪無 Business Requirements 無 Use Cases, 係咪乜都唔使做呢?

唔落地嘅 PK, 最啱落地獄。

Windows 10

噚晚終於得閒去 Upgrade 部機 上 Windows 10. Download 同過 USB 手指都好快手，但係裝嗰陣就要唔少時間，到最後係瞓咗等第二朝再繼續。

跟住第二朝，睇手機嗰陣，不約而同地收到同一段新聞: 話有人 Upgrade 咗之後個 Screen Saver 用咗咸相個 Slide Show... 乜原來我嘅形象係咁嘅咩...


Anyway, Upgrade 過程都好順利，一開返個畫面就已經係簡 Preference, 剛剛起身，無睇到內容，總之就揀咗 Express Settings 就㩒咗 Next. 有聲又上到網，唔使另裝 Driver, 好得! 之後先發現好似怪怪哋咁，原來係個 Screen Resolution 被較到最高，啲字同 Icon 都好細，但要返工，都係返嚟先再整。

返到嚟之後，諗住試吓 VPN, 咁就出事，點解唔可以直接㩒 Connect, 要開多個 Setting 出嚟嘅?


跟住想用 VLC 開 YouTube 啲片睇，VLC 竟然 Crash 咗?! 唔... 好彩只係太耐無 Update, 裝返最新嘅 Version 又攪掂。

另外，個 Start Menu 有响度當然好，但可唔可以用中文嘅輸入法嗰陣，唔好話我知我係用緊英文定中文呢?


想試 Contana 嗰陣，就要用 Microsoft Account Sign-in, 但原來會取代咗原來個 Account


差少少出事，因為我係用緊雙重認証，一㩒咗 Switch, 之後係咪吓吓都要開部手機去攞 Code 先 Login 到呢?


唔知，亦唔太博得過，唯有暫別 Contana.

跟住開個 Excel, 唔知因乜事要重新 Config 過，之前 Upgrade 試過次次開新 Office 都要 Config, 攪到要重新裝過個 Office. 好彩今次只係 Config 一次，安全!


原來諗住開個 IEeee.... 咦! 係喎，雖然個 Icon 差唔多，但已經係 Microsoft Edge 了, 之前 IE 係如果 Facebook Load 得太多頁嘢會 Load 唔到，Edge 似乎可以無限 Load 落去。Performance 方面，Edge 一開始快少少，但不斷地 Page Down 之後雖然未至於慢，但有少少唔暢順嘅感覺，反而 Chrome 嘅速度就無變過。睇返個 Memory, Edge 似乎要加把勁。


其實好似講咗好多 Windows 10 嘅壞話咁，但只係小問題，部機無疑係比之前順暢。我最鐘意係倉頡打錯字碼嗰陣，有埋 Suggestion 揀，唔使重新打過。


同埋如果開咗個 Touch Keyboard, 係可以直接打 Emoji, 美中不足係 Keyboard 上面啲圖細咗少少。


值得留意嘅係個 Accessories 改咗名叫 Windows Accessories, 要 Scroll 到落底先見到，開小畫家之類可能直接打字搵會快手啲。


Anyway, 其實重有好多好用嘅地方，包括我自己常用嘅 Snipping Tool 都有新功能，呢啲都係留返响《大王的教室》講，不過應該就唔再係一分鐘系列。總括嚟講，呢一刻為止我俾八分。

娃娃愛天下

我記得我好似係直播睇呢場表演，但睇返時序，係2001年3月嘅事，我都重未返香港，所以就當我响平行時空睇緊直播，當時感覺係個比賽好騎呢。

今朝睇返新版本，只係多咗個雨僑响度，阿舜就做咗和音同伴舞，跳舞好咗少少嘅，唱功無乜變。有好多人話當然批評佢嘅江華都走咗去做保險，而佢今時今日俾人恥笑完後重可以上台表演，好勵志的說。

可能係唔响現場嘅問題，總覺得跳舞嗰 Part 一個人跳太 Dry, 唱歌一去到高音就上唔到去，攪到雨僑都好似有少少失準 (我好配服當年彭家麗同主席唱《從不喜歡孤單一個》)。成個表演，擺得上枱面嗎? 呢個係 Entertainment Business, 個表演有人睇，有人 Being entertained, 有人 Buy 就得啦!

全港市民熱烈慶祝回歸

好多人當初問我幾時返，我都會答 Indefinitely, 因為真係唔知，我諗留到幾耐就幾耐。

直至上年最後一季發生嘅事情，出現咗一個限期，時間一直向前調整，到最後，定咗12月10號由倫敦返香港。

返嚟之前，當然要去多幾個地方，時間係8月尾嘅銀行假期，10月頭完成一個 Project 之後同埋臨返香港前嘅一個長假。

銀行假期本來想請多幾日假去遊意大利，但係見到話夏天會遍熱，就打消咗個念頭。之後嘅 Candidate 係 Edinburgh, 但有日手㾗睇埋 Dublin 嘅時候，Dublin 機票似乎平少少，於是就決定過海，睇一睇呢個傳聞中嘅歐洲矽谷。

而意大利，就十月頭去。意大利係一個幾特別嘅地方，有唔少名勝古蹟，加埋世博，一個禮拜都差不多。

到最後就係北歐之旅，因為睇咗有關北歐嘅漫畫，想行吓，亦想再睇多次極光，順便補完返 Bergen 之旅，上次同徒弟仔嘅 Day Trip, 天色不佳，落咗成日雨，亦太匆忙，今次主要影返日頭嘅街景同上山影夜景，希望好天 (Bergen 成日落雨的說)。

而行程，我係由北歐開始計劃，之後先到意大利，Dublin 嘛，我重未諗要做乜。Edinburgh 可能搵一個 Weekend 睇一睇，而另一個想去睇嘅地方，係擁有全英國最長名稱嘅城市: Llanfairpwllgwyngyllgogerychwyrndrobwllllantysiliogogogoch. 玩埋呢兩個城市，Great Britain 就可以話都踏足過了。至於其他英國嘅地方，睇吓星期六一有時間就會去。

其實本來想再去希臘一轉，但時間唔夠之餘，經濟政局亦都不大穩定，所以都係算。其他歐洲國家，可能有機會再嚟過，但我諗機會微咗少少。再下一站: 北海道

夠型夠格

公司裝修，差不多成個 Office 反轉咁濟，同時亦出現咗一啲好有格調嘅座位設計


本來都諗唔明點解要用啲咁嘥位嘅設計，但係經過一輪思考後，發現原來係用嚟 Match 返公司個 Logo


當然，一個並唔代表乜嘢，要砌夠一排先至夠型

師兄辛苦了

今日睇睇吓新聞嘅時候，見到有個熟悉嘅面孔，再睇埋個名，咦! 師兄喎!


其實同蘇師兄一啲都唔熟，印象就只係佢曾經做過同舍嘅舍長，好似係高材生的說 (即係會考攞咗唔知幾多條 A 嗰啲)。

鉛水事件似乎短期內會有更多個案，睇嚟師兄有排忙了，加油吧!

別字

呢排寫緊 Program 做廣東話嘅語法分析，而做分析嘅第一步，係要做個詞庫出嚟，原來網上有公開嘅字典同詞典可以 Download, 本來想 Download 埋 Google 嘅 ngram. 但係睇見係簡體字，好似唔係咁啱用。

字典同詞典只係建立詞庫嘅第一階段，跟住就要將呢個詞庫同其他文章將做比較去豐富個詞庫，而廣東話嘅文章嚟講，無嘢好得過用高登嘅文章，夠晒地道同本土。當然，因為呢個 Blog 都係用廣東話嚟寫，都係一個唔錯嘅選擇。

而比較呢一個 Blog 嘅文章嘅幅產品係，搵到唔少別字，都花咗少少時間改返啱晒:
跟本 -> 根本
大慨 -> 大概
仲要 -> 重要
隔離 -> 隔籬
隨咗 -> 除咗
赤度 -> 赤道
完來 -> 原來

除此之外，重搵到啲詞語嘅唔同寫法，唔係別字，但意思又有少少微妙嘅分別:
宣佈 vs. 宣布
精彩 vs. 精采

分工

當你以為 DBATeam 已經包含晒所有 DBA, 原來其實重有個 All DBA Team. 我投降...

The Interview 3

今日唔係講個 Candidate, 係講個 Recruiter. 話說今日做完個 Phone Interview 之後 Send 咗個 Feedback 俾上司，點知上司話佢已經 In 過同埋同個 Recruiter 講咗唔得. 原來個 Recruiter 無跟到正常程序，叫個 HR 去直接同我 Schedule 個 Interview. 而個 HR 又唔知我上司嘅 Feedback, 就 Pass 咗俾我。咁唔好彩地我又 Feedback (當然係負面嗰隻)返俾上司，成件事就穿咗煲。

呢個 Recruiter 係一個好進取同好有計，就係佢介紹我入呢間公司嘅 Recruiter 嚟。當年(其實只係上年嘅事)佢有辦法令到我上司 Skip 咗個 Phone Interview, 我就直接上 Office 見工。不過今次呢，真係有少少出事。

破格同犯規，係結果論嘅描述，做呢件事其實係一場賭博，或者個 Recruiter 覺得我上司唔可以响 Technical 層面睇嘢，所以响我身上博一博。可惜嘅係我上司個 Technical 底唔差，講唔明佢嘅話，落到嚟我呢度俾我問得深入少少，就會出事。

希望個 Recruiter 好運，話晒都叫對我有恩。不過學到嘢，如果要破格或者犯規:

1. 要知道一間公司嘅內部嘅溝通問題
2. 要知道一間公司嘅內部嘅人事架構同人名
3. 手頭上要有十足把握
4. 鼓起勇氣去執行

Pride London

今年做咗好多應該上年做嘅嘢， 話說上年計錯數，攪到睇唔到倫敦嘅 Pride Parade. 今年差少少唔記得，之前突然醒起，就 Mark 低咗個日子，遲免任何嘅旅行或者活動之類，不過反正對手未好返晒，最後都無意外。

唯一嘅意外係 Pride Parade 之前一日，美國最高法院宣佈同性婚姻為基本人權，因而令同性婚姻合法化。Facebook 亦出現咗 Profile 相嘅彩虹 Filter, 咁就當然要贈吓慶，加咗入去個頭像相度。

十二點三先出門，比劇本遲叿少少，但到咗遊行路線都唔算太多人，都可以搵到欄桿位睇。但咗差不多成個鐘，大隊終於出現，打頭陣嘅係各國嘅代表


氣氛亦不俗


有唔少團體嘅代表，包括政黨、宗教、體育、政府、公共事業、私人公司嘅都有


奇裝異服亦都唔少得


High five 亦都 High 到手軟


原本話四點半完，最後五點幾先完


完咗之後，因為响唐人街附近，就順便去剪個頭先返屋企。