講古系列 9: 銅鑼灣

1889年嘅銅鑼灣，真係有個灣响度，不過東角就已經被人填咗做貨倉，隻角已經無咁凸出。香港島都係山多平地少，銅鑼灣一帶就已經有三坐山: 東角山、禮頓山、同埋加路連山。而銅鑼灣對出就有個燈籠洲/力奇島，係英軍嘅軍火庫嚟。

响銅鑼灣嘅東面，就係天后廟，天后廟有紅香爐，相傳當年紅香爐被沖上岸邊，附近嘅村民認為係天后送嚟嘅，於是就起咗座廟，廟後嘅山叫紅香爐山，山有高低起伏，高位為峰，低位為谷，紅香爐谷就响天后廟附近嘅盤地，谷內有紅香爐村，村內有大水坑可以作為耕作之用。

時移勢易，銅鑼灣嘅灣已經變成維多利亞公園，東角山之後被香港商人利希慎買咗，所以又叫利園山，跟住又被人鏟平咗去填海。加路連山亦都有相同嘅命運，又係被人鏟平咗，南面一帶嘅山坡原本係墳場，今日就變咗大球場，但墳場重有部份遺留咗，成為掃桿埔咖啡園墳場。力奇島就因為要起海底隧道就填海填埋過去，成為隧道嘅出入口。

天后廟似乎被遷移咗對面街，用嚟耕作嘅低窪地區亦都填平咗，今日成為大家食糖水同宵夜嘅地方。紅香爐村名字不再，但因為水抗而有大坑呢個名(曾經搭過架的士，個司機以為水坑口街係响大坑，睇嚟香港真係不缺水坑...)，當然係大家都認識嘅舞火龍，聽聞呢兩年外國人都有份玩，重係玩龍頭嗰隻。