Deadlock

話說有日同 Partner 食完飯等巴士嗰陣，有架車嘅車牌好得意

後來有一場小騷動，因為㗎車阻住咗㗎巴士，巴士後面又頂住一架巴士倒唔到車走。乘客不斷同個巴士司機講，大家都有少少勞氣。

既然問題响架私家車度，我就行埋去叫司機駛開，入面原來英文人，話架車壞咗。跟住又有乘客嚟話個司機，好快咁解釋完，好快咁後面架巴士倒車走，好快咁前面架巴士倒車走埋，留底架著咗死火燈嘅車同司機。

無耐咖啡妹到場，司機又一面無耐咁解釋，之後我架巴士就到咗，跟進唔到了。

事情只要知道問題嘅癥結，就好快解決到。問過唔同嘅人，有袖手嘅人，有怕司機係惡人嘅人，有會去拍佢窗嘅人。沒有對與錯嘅方法，只要結果係好就係好方法

理念

理念，好多人都有，但，好多人都唔會做到。

政黨如是，工作如是。

空談理念，最後只落得失望下場。

遇著不如意事，就努力去解決。

時間，擠一擠就有，但要費盡氣力去做吃力不討好的事，對不起，沒有下次了。

是日心情不佳，就讓我發洩、就讓我使勁一番、就讓我成功後勝利歸來。

雜記 8

好精彩嘅一個星期，發生咗好多事，協作為幾份 Proposal, 跟住一份獨力製作嘅 Proposal, 返嚟咁耐第一次獨挑大樑，慶幸嘅係壓力大，但成功感亦大，之後就係上個客度 Present, 應該有六七成把握。

星期三又做過一個差啲死嘅 Demo, 開會前30分鐘被告知 Server 死咗，好彩得電腦之神嘅眷顧，响做 Demo 前五分鐘就好似完全無咗件事咁。跟手就由機場去石門見另一個客，本來以為打甩咗一件麻煩事，點知又有另一件麻煩事上身，500部 Server, 究竟可以點 Mon?

今日本來又想做 YouTube Live Broadcast, 但試完啲嘢之後，發覺唔 Work, 只好放棄。跟住部機又鬼死咁慢，啲 Demo 做得子唔順，令到成個 Workshop 唔係咁靚。

今晚見完客開完會，諗住去响附近食少少嘢，見到杜丹樓，二話不說就衝咗入去。點知俾我撞到舊同事，傾咗一陣近況，雖然唔係入室弟子，但知道對方安好，係一件好事，好懷念當年一齊做事嘅日子。

呢兩晚都上咗15樓拗水吹，咁啱徒弟仔都响度，對於兩個知識控嚟講，一傾就傾到無雷公咁遠，真係好正! 不過就好似阻咗徒弟仔做嘢添...

今晚返到屋企，香港對卡塔爾場波已經過咗30分鐘，已經入咗一球。最後雖然係二比一輸咗，但已經踢得好好喇!

同徒弟仔吹水嘅時候，佢題到重播嘅《鹿鼎記》，話入面啲廣東話好唔同喎，於是求其搵咗一集嚟睇。其實又唔係太唔同，係多咗啲四字詞，亦文縐縐咗啲，但當年嘅人，呢個 tone 係好普通。今時今日，都應該唔會有人咁講嘢。啊唔係，有一個，場波輸咗嗰陣，鍾志光講咗句「江東子弟多才俊，捲土重來未可知。」大慨就係呢種感覺。

因為呢幾日都太夜瞓嘅關係，成個四日無做 Gym 喇! 而呢一刻係零晨四點，唔知聽日做唔做到呢?

十萬個冷笑話，終於俾我洗咗，但時間都好似唔係好夠洗。

呢個復活節，要玩 Node.js!

下個禮拜，進入新嘅工作模式。

雜記 7

呢排個水晶球不斷發功，有少少得人驚:

1. 去過溫莎堡，就有人去挑釁嗰度嘅御林軍
2. 做完太平山區嘅資料搜集，就有網台節目去影嗰一帶嘅地方
3. 去完 Llanfairpwllgwyngyll, 跟住因為一位天氣先生好順暢咁讀完個名而大熱

雜記 6

話說 Audition 完結，一位小朋友走入嚟話要自我檢討的說，低估咗問題所在，只係好 Casual 咁注入少少正能量。直到之後見到一句 Status, 我似乎無意識咁置身於風眼嘅中心。之前一日，我講過，作為老師，佢嘅學生要有老師一樣嘅功力，先叫合格。但係，我無講到時間，所以令到小朋友有唔少壓力。所謂「休息是為了走更長的路」，攰就抖一抖，無謂令自己身心俱疲。

同一日嘅夜晚，問咗另一位小朋友嘅夢想，佢話自己暫時係一條咸魚。都幾驚奇，睇佢平時都唔似係無目標嘅人，究竟夢想係咪真係咁難去定呢? 定係呢個世代已經唔再發夢?

雜記 5

今日先發現，雜記係無 Post 到上 Facebook. 或者都係比較私人嘅事，所以呢篇都係唔 Post.

噚日搵咗師弟去試吓揸車，但攪到差少少撞埋欄到，好彩有驚無險，所以去關島都係唔好揸，但係似乎要為四個月後嘅事要準備。之後响 Coffee Shop 度傾咗一陣計，再自己落灣仔買少少嘢。

今晚同靚仔魔術師响佐敦食飯，但記錯車站位置，所以遲大到。為咗幾隻煎餃子食咗個好大碗嘅拉麵，聽日要努力做 Gym 了。食完嘢，一齊去逛吓，睇吓玩具咁，竟然俾我見到有六神合體嘅 Mouse Pad, 都真係 Rare Item 得好無道理，卅年前嘅卡通，電腦重未普級，點解會有 Mouse Pad, 真係諗唔通。

原來唔經唔覺已經到咗旺角，入到去信和先發現原來係信和... 除之外無乜新嘅發現。再去 Chic 之堡睇魔術，支 Vanishing Pen 唔錯。

最後到咗兆萬，One Piece 公仔大跌價，路飛都只係40蚊隻，於是就買咗隻送俾大學時期嘅兄弟。

見到一篇講巨蟹座嘅文章，係咪講緊我呢?

巨蟹天生就會遠離那些人品不好的人，而且會離的遠遠的，不過不是瞧不起對方，而是想要減少一些不必要的麻煩，雖然巨蟹有很多很多的缺點，但優點也是很多的，比如善良，有原則，不喜歡拍馬屁討好別人，不習慣說好話（把你當朋友的話往往會直言你不對的地方），巨蟹很特別的地方是看似重面子，但有時候卻又沒那麼在意，讓人摸不著頭緒。

本來下面張圖想寫一篇以《男人的浪漫》為題嘅文，但唔寫出嚟似乎啱 Feel 啲。

雜記 4

今日睇到一段 YouTube 片係講23種特別嘅動物，當中有一隻嘅名係叫 Pica (讀 Pie-ka), 個串法正正就係比卡超嘅頭兩個音，似乎就係比卡超嘅原型嚟。

以前就話開卷有益，今時今日，似乎就係開 YouTube 睇有益了。

話說噚晚同徒弟仔傾到「Google大神」，呢個係台灣用語，對於我呢個睇台灣電視節目嘅人嚟講，一啲都唔出奇，但徒弟仔好 Surprise 點解我會識，我其實都好 Surprise 點解佢會覺得咁特別。

講開「Google大神」，今日想搵吓嘅出處，點知搵到 Google Translate 嘅語音玩法，笑死我!

話說噚晚同靚仔魔術師傾計，講到 The Matrix 入面嘅金句，點知今日上 YouTube 就見到 Improve Everywhere 嘅 Matrix in Real Life, 睇嚟我又無意中發動咗水晶球...

Anyway, 講緊嘅金句係 "But I can only show you the door. You're the one that has to walk through it." 中文都有一句類似嘅「師父領進門，修行在個人」 對於我呢個經常教人嘅人嚟講，有一層好深層嘅意義。不過响噚晚嘅 context, 又有另一層意義。

雜記 3

呢排 JobsDB 賣廣告，電視有，的士又有。今晚做 Gym 嗰陣，眼花睇錯係 JobsBB...
BB 呢樣嘢，似乎已經係各男女神嘅暱稱，咁如果神級嘅 Steve Jobs 重在生，以後除咗搵工搵 JobsDB 之外，搵 Phone 就要搵 Jobs BB 了。

噚日李大狀提咗個所謂政改底線，話咁快今日就將個意見放入資源回收筒，譚主席話失望云云。咁唔知，其實呢個係都係中央嘅底線呢?

今個禮拜發現原來公司好多處女座嘅人... 咁一切都解釋得到了。

雜記 2

呢排成日去 MS 响 Cyberport 嘅 Office, 個 Receptionist 好 Pro, 原來佢一早已經記得我個名。

五月第一個禮拜，有三餐係約人出街食晚飯。有生日飯、去澳門做 Training 順便 Meet up Macau Friends, 重有派帖嘅飯。

派帖飯其中一位係師傅嚟，殿堂級嗰隻。好多時我知嘅理論，佢已經實踐過。今次食飯，又有錢入袋!

派帖飯當晚嘅另外一件事，係買咗個磅，減磅計劃開始了!

雜記 1

劉生响澳門嘅奇蹟，好想去睇!

响地鐵見到，Chanel 一隻叫 Chromatic 嘅手錶，廣告得黑同埋白，唔知個 Designer 知唔知 Chromatic 點解?

原來 Groupon 有震蛋賣... 而且係幾好賣添...