講古系列 12: 鼇洋甘瀑

話說古有新安八景，香港有二，一為杯渡禪蹤，二為鰲洋甘瀑。熙時年間嘅《新安縣志》曰:「鰲洋甘瀑在七都大洋中。有石高十丈，四面鹹潮。中有甘泉飛瀑，若自天而下。」

鰲洋甘瀑今位於南區薄扶林瀑布灣，搭車去華富邨行一陣就到。

香港開埠前，英國外科醫生及博物學家 Clarke Abel 曾到此一遊，响 Narrative of a journey in the interior of China : and of a voyage to and from that country, in the years 1816 and 1817 中係咁樣形容個瀑布:

As seen from the ship, this island was chiefly remarkable for its high conical mountains, rising in the centre, and for a beautiful cascade which rolled over a fine blue rock into the sea. I took advantage of the first watering boat to visit the shore, and made one of these mountains and the waterfall the principal objects of my visit.

中譯:

從舟上觀香港島，只見其中峰挺拔，狀若圓錐。山下則有美瀑，水沿岩壁滾流而下。待駁艇備妥，即乘艇登岸，爬上此山，細賞此瀑美景

英國外交使節 Sir Henry Ellis 亦响 Journal of the proceedings of the late embassy to China 提到:

In the evening the ships weighed, and proceeded to the island of Hong-Kong for the purpose of watering. We hope that we shall be enabled to pursue our voyage on the morning of the 12th. The situation of the watering place is picturesque. A stream of water falls down the mountains forming the island, and the casks may be filled when the tide serves, close to the beach. Surrounding projections of the land enclose a small bay, the resort of fishing vessels.

中譯:

船隻為了補給儲水開往香港島，水源周圍的環境如圖畫般的優美。
在島嶼的山中湧出瀑布，潮漲時便可在灘上裝滿水桶……
凸出的地形圍成一個小海灣，這是漁船的庇護所……

幸得 Google 幾年前 Scan 咗當年 Clarke Abel 嘅書，還原咗當中嘅插圖:

再對比返 Google Map 嘅衛星相片，今日嘅只係一個小型瀑布，

當年嘅壯觀景況，大慨就係成張相都係瀑布

時移世易，香港開埠後，為咗應付食水供應，19世紀60年代起咗香港第一個水塘: 薄扶林水塘。大部份原本流向呢個瀑布嘅山澗水流，都引到去水塘度，鼇洋甘瀑亦只能剩下瀑布灣一名。

講古系列 11: 人日

女媧除咗補天，重會造人。話說女媧响造人之前，正月初一到初六，分別造出雞、狗、羊、豬、馬，即係所謂嘅六畜。到咗初七，女媧無休息到，反而走去用黃土同埋水，跟住自己個樣子造出啲小泥人，一批批咁造，但係覺得太慢，於是搵咗條藤條，點咗啲泥漿，一揮之下，泥漿水滴散落到一地都係，重變咗做人添。話說女媧親手造嗰批都係達官貴人，用泥漿造嗰批就係平民百姓，或者，鬧人賤過地底泥，都係咁樣嚟。Anyway, 就係咁初七就變成咗人日。到咗初八，再造埋縠物，就係咁，農曆初一至初八，就係中國嘅創世紀。

初九都有人生日，應該話係神先啱，初九係天日，即係玉皇大帝嘅生日。跟據明王逵嘅《蠡海集》記載：「神明降誕，以義起者也。玉帝生於正月初九日者，陽數始於一，而極於九，原始要終也。」

初十都有嘢生日，不過係石頭嘅生日，初十係地日。任何係石頭造嘅哋都唔多郁得，即係啲磨呀、石槌、碾嗰啲，對於一個石器時代嘅人，都幾大件事。

講古系列 10: 香港

前排睇到一份舊地圖，有一個叫 Sogcow Bay 嘅地方，想一探究竟下，無意中响 Archive.org 入面搵到一份非常舊嘅文件，叫 Typhoon Anchorages, 講適合避風嘅地方，內附一份1878年嘅香港地圖，連埋以前嘅香港地名。於是就對住個地圖探究一番，就見到香港圍呢個地方，因為當時附近嘅石排灣係用嚟轉運莞香嘅港口而得名。


相傳响1816年，英國派特使想同中國講開放經商嘅問題，途經香港補給，停泊响港島南區。而英國嘅特使就應該係由石排灣上岸補給，問咗一吓個地方名，好大機會呢一刻就誤以為成個島係叫香港。而當時嘅登岸人之一係士丹頓爵士，所以香港圍所在嘅山谷，叫 Staunton Valley, 中環嘅士丹頓街亦都係以呢位爵士命名。

雖然另一說係話英兵登陸香港嘅時候，問村民而得知地名。雖然都係問村民，但係第一英兵係响水坑口登陸接管香港，第二南京條約嘅其中一條嘅條文係咁嘅:

三、因大英商船遠路涉洋，往往有損壞須修補者，自應給予沿海一處，以便修船及存守所用物料。今大皇帝准將香港一島給予大英國君主暨嗣後世襲主位者常遠據守主掌，任便立法治理。

即係英國以香港作為島名早响簽定《南京條約》前已經出現。當然，英兵可能响英國接管香港前，已經登陸過無數次，1816年嗰次可能都已經有軍隊從行，但就無從考究。

今時今日，好多名都唔同咗。香港圍變成黃竹坑新/舊圍，當時嘅黃竹坑係一條河，英文曾經叫 Staunton Creek，由於城市發展，當年嘅河道，就只剩低一條明渠。香港圍一帶就變咗香港仔，以分別香港島，香港圍對開嘅香港灣，就即係今日嘅深水灣。而隔籬嘅淺水灣，當年就叫舂坎灣。

但舂坎灣呢個名並無消失到，只係近咗舂坎角，以前叫宮魚灣，英文就係當初我想搵嘅 Sogcow Bay.

另一個有趣嘅名字變化，就係銀洲。原本係指深水灣同淺水灣對出，今日叫熨波洲嘅島仔。今日嘅銀洲，就係原本宮魚灣對出叫孖崗嘅島仔。無獨有偶地，銀洲無論以前定今天，都係擺响舂坎灣附近。

重有係原本叫下鴨脷洲 (Tree Island) 嘅小島，响鴨脷洲西面, 大概係因為上面起咗個火藥庫，而改咗名做火藥洲 (Magazine Island). 島上面除咗有火藥庫，最西面重有個編號為 101 嘅燈塔，閒時都會有人登島參觀。

3D 圖由 Google Map 提供

講古系列 9: 銅鑼灣

1889年嘅銅鑼灣，真係有個灣响度，不過東角就已經被人填咗做貨倉，隻角已經無咁凸出。香港島都係山多平地少，銅鑼灣一帶就已經有三坐山: 東角山、禮頓山、同埋加路連山。而銅鑼灣對出就有個燈籠洲/力奇島，係英軍嘅軍火庫嚟。

响銅鑼灣嘅東面，就係天后廟，天后廟有紅香爐，相傳當年紅香爐被沖上岸邊，附近嘅村民認為係天后送嚟嘅，於是就起咗座廟，廟後嘅山叫紅香爐山，山有高低起伏，高位為峰，低位為谷，紅香爐谷就响天后廟附近嘅盤地，谷內有紅香爐村，村內有大水坑可以作為耕作之用。

時移勢易，銅鑼灣嘅灣已經變成維多利亞公園，東角山之後被香港商人利希慎買咗，所以又叫利園山，跟住又被人鏟平咗去填海。加路連山亦都有相同嘅命運，又係被人鏟平咗，南面一帶嘅山坡原本係墳場，今日就變咗大球場，但墳場重有部份遺留咗，成為掃桿埔咖啡園墳場。力奇島就因為要起海底隧道就填海填埋過去，成為隧道嘅出入口。

天后廟似乎被遷移咗對面街，用嚟耕作嘅低窪地區亦都填平咗，今日成為大家食糖水同宵夜嘅地方。紅香爐村名字不再，但因為水抗而有大坑呢個名(曾經搭過架的士，個司機以為水坑口街係响大坑，睇嚟香港真係不缺水坑...)，當然係大家都認識嘅舞火龍，聽聞呢兩年外國人都有份玩，重係玩龍頭嗰隻。

講古系列 8: 太平山區

話說網台有節目講太平山嘅故事，雖然之前都做過少少 Study, 但都想睇吓有無乜嘢新發現，於是又再週圍咁搵吓。發現政府網頁依家有講太平山名字嘅起源，而網頁入面嘅文字，亦都有好多唔同嘅網頁引用。


搵搵吓，搵到另一個網頁，話可以睇吓1898年嘅維多利亞城地圖喎，就係咁，搵到去英國嘅 National Archive, 响 Richmond 度，雖然半個鐘車程唔使，但又懶得特登走過去。睇吓睇吓，原來可以叫佢 Scan 完再做 Digital Delivery, 不過要錢的，於是就等佢報價，唔太貴嘅話都濟得過。

正如網頁所說，10個工作天報價，但好鬼貴...


公開嘅檔案似乎只此一家，其他嘅最舊都只係去到1907年嘅地圖。

放棄之際，又搵到原來地政總署出咗個 App, 入面有1898年嘅地圖，於是就一格一格咁 Cap Screen, 再還原返幅太平山區嘅地圖。

跟住，就可以講故仔了: 英軍由水坑口街登陸，因而英文被稱為 Posession Street. 亦响隔籬駐紮做軍營。而水坑口之所以叫水坑口，係因為以前有個大水坑，大慨係山水流出嘅位置，响嗰度駐紮，一來位置較高可以望出海，二來亦可能因為方便攞水。

由水坑口街轉入荷里活道向東行少少，就係差館上街，行上一段斜路，就有間差館，係第一代嘅八號差館，亦係以前嘅差館街所在。有軍營，有差館，呢區治安就唔會差，所以呢個山崗，就叫做太平山，太平山街亦因而命名，以太平山街做中軸嘅一帶，就係太平出區，屬於維多利亞城四環九約嘅其中一約。

太平山街附近有太平山街市，街市對出就係街市街。行返去皇后大道中，就係上環街市，雖然英文係叫 Western Market, 但唔係西港城。西港城要再行出少少，地圖標示住大慨係 Harbour Master Office 嘅字樣嘅建築物。

之後，因為鼠疫，拆咗太平山街市同埋差館，變成今日嘅卜公花園，街市街就變成普慶坊，差館街俾卜公花園食咗一半，另一半亦變成普義街。Harbour Master Office (即係海港政府大樓)搬咗，變成上環街市北座，附近嘅新街市街大慨就係咁嚟，而呢個上環街市北座亦成為西港城，而上環街市今日除咗係街市，亦係上環文娛中心。當年嘅軍營嘛，亦曾經係大笪地、荷里活道街市，最後就變今日嘅荷里活道公園了。

每日一字 33

Llanfair­pwllgwyngyll­gogery­chwyrn­drobwll­llan­tysilio­gogo­goch 係英國最長嘅村名。原本條村只係叫 Llanfairpwllgwyngyll, 因為呢個世界都幾多聖母堂 (Llanfair)，因而要標明係邊個。而事實上，响登島前，就係有個叫 Llanfairfechan 嘅火車站。Llanfairpwllgwyngyll 個正式火車站名亦只係 Llanfairpwll.

名字來源亦有段故，話說當年新嘅火車線開通，作為 Anglesey 島嘅第一個站，想吸引遊客多啲人响呢個站度停一停，於是就作咗個咁嘅名。响 Linguistics 嚟講，威爾斯文係屬於 Synthetic 嘅語文，即係可以將好多嘢加入一隻字度，所以個車站名可以攪到咁長，嚴格嚟講，似一句句子多過一隻字。

維基英譯:

Parish [church] of [St.] Mary (Llanfair) [in] Hollow (pwll) of the White Hazel [township] (gwyn gyll) near (go ger) the rapid whirlpool (y chwyrn drobwll) [and] the parish [church] of [St.] Tysilio (Llantysilio) with a red cave ([a]g ogo[f] goch).

响 Google Map 度，搵到漩渦，搵到 St. Tysilio Church, 但紅色岩洞就唔知响邊了


個漩渦 (其實應該唔止一個) 係位於兩條橋中間嘅位置，有名㗎，叫 The Swellies. 因為潮汐漲退，啲水由利物浦涌落嚟，加上 The Swellies 嘅水底地形而形成漩渦，時間啱嘅話，係可以玩激流獨目舟。而响有吊橋之前，係有唔少人因為過唔到激流同漩渦而斃命。

講返而村，條村係會分上村同下村，即係 Llanfair­pwllgwyngyll­gogery­chwyrn­drobwll­llan­tysilio­gogo­goch-uchaf 同埋 Llanfair­pwllgwyngyll­gogery­chwyrn­drobwll­llan­tysilio­gogo­goch-isaf.

P.S.: 如果講正式嘅火車站名嚟講，最長嘅火車站名亦係响威爾斯，不過就係好正常嘅英文: Rhoose Cardiff International Airport

講古系列 7: 太平山街

讀中學之前，每日都會行過太平山街返學。太平山街上少少有卜公花園，紀念當年港督卜力對抗鼠疫嘅貢獻。太平山街對落有東街同西街，用廣東音譯做 Tung Street 同 Sai Street, 但原來早期，東街曾經譯過做 East Street 的說，至於西街有無譯過個 West Street 就無從考究。

至於太平山街嘅名字出處，原來同香港開埠初期進駐有關 (http://www.discuss.com.hk/viewthread.php?tid=10226322):

如果各位上中原地圖網，鍵入『太平山』搜尋，佢會出『太平山街』的地址。何解？因為最原始的太平山便是太平山街一帶。
話說英人逼清政府簽訂南京條約後便派軍隊正式佔領香港。登陸地點在今的水坑口。當時海岸線在現在的皇后大道西。英兵登陸後，便沿山而上，在今的荷里活道公園插旗駐兵。那一帶的山崗因有洋人巡邏佈防，所以治安較好，故被稱為太平山。有洋人，自然會有商業發展，也會有華人進駐。太平山街便是這樣沿山開發出來的一條依山而建的大街。後來洋兵遷往更適合的地點駐防，空出來的平地便成為香港的第一個『大笪地』。當時的大笪地，小販，小商店，睇相，賣武，賣藝，各式各樣的玩意都有，是附近一帶居民閒來無事聚集的地方。
隨著城市發展，洋人越遷越高，在今的山頂區一帶建設高級住宅。既然是洋人的住區，治安當然會很好，而本來的『太平山』已成為低下階層的生活地點，治安再不太平，所以『太平山』這名字，便重新被定義為山頂區一帶。

時移世易，太平山街回復太平，近年多咗好多 Art Gallery 同 Cafe 出現，令以前平靜嘅街道開始變得不平靜。

講古系列 6: 見山不是山

住响灣仔嘅人，都知摩理臣山講緊邊度。但係座山呢? 因為有石礦，石礦採完之後，成座山被鏟平去填海。但依建築物同道路嘅排列，大約可以知係點樣: 以泳池為中心，東起摩理臣山道，西至活道。

摩理臣其實係英國早期嚟到中國嘅一個傳教士，香港開埠初期，教會曾經响山頂起咗間馬禮遜英華學校，因而得名。

虎年大吉

「虎」响廣東話同「苦」一樣讀法。香港家陣同大陸嘅交流咁頻繁，同人拜年，千祈唔好直譯廣東話讀音，將 hu 讀成 ku.

响香港同大陸，「虎虎生威」以乎係拜年首選，而台灣就興用「虎虎生風」。咁究竟係生威定生風呢? 似乎老虎威猛就話講得過去，生風係乜意思? 係咪台灣寫錯字，將威字寫成風字?

原來有「虎嘯風生」呢個成語，意境大概就係老虎叫嘅時候可以勁到刮大風，似乎比虎虎生威更厲害。總之，入鄉隨俗，祝大家虎年唔駛受苦之餘，亦都「虎虎生威」、「虎虎生風」。

註: 虎嘯風生 - 比喻英雄人物順應時代潮流而出現，並且對社會產生極大的影響；亦指豪傑奮起，大展宏圖。出自《北史·張定和傳論》：「虎嘯生風，龍騰雲起，英賢奮發，亦各因時。」

講古系列 5: 豬扒 + 恐龍

呢排興講港女港男，今次講吓醜女。

响香港，醜女被人叫豬扒，豬扒一詞係由黃子華把口講出嚟嘅，當年無線有套劇叫《男親女愛》。黃子華响一間律師樓做事務律師叫余樂天，under 鄭裕玲演嘅 Miss Mo. 有場戲，余樂天話 Miss Mo 係豬扒。Miss Mo 就當然會問乜嘢意思啦，而得到嘅答案係「又乾, 又縐皮, 又多肉紋」。因為套劇當年好受歡迎，所以豬扒一詞廣為流傳，泛指醜女。

而台灣呢，醜女會被人叫恐龍。呢個就要講返三國時期，諸葛亮被稱為「臥龍」，有一說係話所謂嘅龍其實係講緊佢老婆，一個荊洲地區赫赫有名嘅醜女。與醜女同被共枕，咪臥龍囉。因為諸葛亮字孔明，大家就尊稱黃月英為孔龍。後來約定俗成，孔龍就變咗醜女嘅代號。而台灣用嘅輸入法以拼音為多，恐龍係相關字孔龍又唔係，為咗方便，就用恐龍代替，反正响上網錯別字多的是。當然叫得恐龍，就會有其他因為女子唔同特徵而衍生出例如「暴龍」等嘅唔同變化。

講古系列之維多利亞城界石 7 - 寶雲道界石

話說英國人响港島北建立咗維多利亞城，以界石劃出城嘅界線，再以四環九約分區管治。

响一個風和日麗嘅星期日搵最後一塊界石。搭 15 號巴士上寶雲道，由司徒拔道方向開始，行咗無耐就到咗，唔難搵。呢塊好似係最大嘅一塊界石，保存得幾好。唔想撘返巴士落山，沿寶雲道行去灣仔峽道，有好多人响度練跑，途中經過姻緣石，附近有好多其他神佛例如四面佛咁。

Go to gallery

講古系列 4: 大笨象 + 大白象

匯豐星期二競價時段收得嗰33蚊，攪到亞太區行政總裁霍嘉治都要出嚟講嘢，話匯豐响香港有特殊地位，相信香港人唔會對大笨象失信心云云。匯豐素有大笨象之稱，不礙乎
1. 恆指成份比重高，响 10%-18% 浮動，對恆指嘅升跌有不言而喻嘅影響力
2. 股價較穩，係唔少長線投資者嘅至愛，當然，响金融海嘯下完全唔成立

大笨象差少少，大白象，其實係患咗白化病嘅象，極為罕有亦係泰國嘅聖象。不過絕對唔係好嘢，如果你得罪泰皇，泰皇就會送隻大白象俾你。話到明係聖象，唔勞役得，又要養佢，幾嘥米飯，都咪話唔頭痛。所以，後來形容 D 又貴又無用嘅嘢，就用大白象嚟形容。

白化 - albino
1777, from Sp. or Port. albino, from L. albus "white" (see alb). Used by Portuguese of white-spotted African negroes. Extended 1859 to animals having the same peculiarity.

講古系列之維多利亞城界石 6 - 舊山頂道界石

話說英國人响港島北建立咗維多利亞城，以界石劃出城嘅界線，再以四環九約分區管治。

克頓道界石後，有兩個選擇，一係原途落山再經羅便臣道上山，或者繼續上山頂。今日嘅其中一個目的係行山，於是選擇咗後者。源途大霧，一個鐘左右到咗山頂，食咗少少嘢，去舊山頂道落山。上山容易落山難，斜度頗高，差不多見到住宅，就見到界石，亦差不多係最殘嘅一塊，如果由下而上咁望上去，都幾難留意到。

Go to gallery

講古系列之維多利亞城界石 5 - 克頓道界石

話說英國人响港島北建立咗維多利亞城，以界石劃出城嘅界線，再以四環九約分區管治。

由薄扶林道去港大，路程不遠，好耐未嚟過，畢竟响度完成碩士。入到港大上山，出咗港大再上山，克頓道响邊道? 路在口邊，問人，原來過鬼咗。落山再上山，路邊好快由住宅變成郊區，係一條晨運徑。途中俾兩隻狗吸引，回一回神，界石就响眼前。

Go to gallery

講古系列之維多利亞城界石 4 - 薄扶林道界石

話說英國人响港島北建立咗維多利亞城，以界石劃出城嘅界線，再以四環九約分區管治。

去完西寧街，上士美菲路，大斜坡，慢慢行，有分叉路，究竟繼續上士美菲路定蒲飛路? 最後揀咗蒲飛路，上到去過咗行人隧道，搵咗一輪，唔見?! 向決定再响南行，就响士美菲路口見到界石。

Go to gallery

講古系列之維多利亞城界石 3 - 西寧街界石

話說英國人响港島北建立咗維多利亞城，以界石劃出城嘅界線，再以四環九約分區管治。

遇友人相約，去探中西區嘅界石。由西環尾出發，响西寧街西寧閣對面嘅球瑒。以前嘅中學同學住响西寧閣頂樓，喺佢屋企天台燒嘢食，十幾年後重遊舊地，回想舊日嘅歡樂，另有一番滋未。呢塊界石保存得好好，亦唔難搵。

Go to gallery

講古系列之維多利亞城界石 2 - 黃泥涌道界石

話說英國人响港島北建立咗維多利亞城，以界石劃出城嘅界線，再以四環九約分區管治。

呢排响馬會做嘢，附近就係界石嘅所有地。食完晏，無雨，行過去睇睇。行到過咗聖保祿小學，唔見，返轉頭，咦，原來 D 字背住我頭先行嘅方向睇唔到。比想像中大，比想像中完整，比馬已仙峽道嗰塊好彩好多 。

Go to gallery

講古系列之維多利亞城界石 1 - 馬己仙峽道界石

話說英國人响港島北建立咗維多利亞城，以界石劃出城嘅界線，再以四環九約分區管治。

文獻記載嘅有六塊，但係其實有更多嘅界石，尤其以馬已仙峽道嘅界石最為出名，不過已經俾人拆咗，相信係 2007 年 6 月頭拆嘅... RIP

Go to gallery


參考

• 港島界石城市定向圖
• 尋訪迷失的維多利亞城界石‧City Boundary 1903
• 2007-05-28 尋找維城界石 上集
• 2007-06-14 尋找維城界石 下集
• 馬己仙峽道界石
• 灣仔是我家：（附錄一）

講古系列 3: 九龍 + 侯王 + 車公

新聞提到，大陸對食物安全有太多部門管，尤如九龍治水，响網上搵到嘅傳說係咁嘅:

據說很早以前，呼風喚雨全靠一條龍承擔。這條龍一年四季奔走不歇，雖然日夜辛苦，畢竟力量有限，不能滿足天下所有地方所有人要求風調雨順的愿望。于是，此龍就向玉皇大帝啟奏，要求多派几條龍幫助它行雨。玉帝准奏，調遣了八條巨龍歸它指揮。天下百姓無不歡呼，便在龍王廟擺下好酒好菜，讓九條龍享用。九條龍吃得大醉，醉后失控，行下傾盆大雨，大地上洪水泛濫，老百姓叫苦不迭。大雨過后，又一連數月干旱，河干井涸，庄稼枯死，老百姓怨聲載道，哀呼：“一龍治水風調雨順，九龍治水旱澇不勻。”呼聲驚動天廷，玉帝便傳旨將八條龍分到了東南西北和東南、東北、西南、西北八方，將頭龍封在中土，讓其監望八方，各龍負責各方行雨事宜，誰瀆職，就懲罰誰。

而同一個網頁，提到九龍半島呢個名嘅由來，原來係南宋末年宋帝昺逃難到香港，見到九龍有八座山脈，向大臣們提起每座山都有一條龍，呢度有八座山，即係有八條龍。大臣就話，其實有九條，因為天子為其中一龍。九龍亦因此得名。

除咗九龍，宋帝昺亦帶埋車公同侯王嚟香港。綜合 Wikipedia 同廟宇嘅網頁，相傳兩位都係護駕嘅大將，車公因曾平亂有功，被封為車大元帥，而侯王就係國舅楊節亮。

原來車公除咗打得，重識醫術，相傳求醫嘅人，都可以妙手回春。當沙田一帶發生瘟疫時，沙田居民就建廟再由西貢蠔涌請車公座鎮。

楊節亮，因為「護駕有功，世人敬其忠義，故建廟以紀念」。因為生前封「侯」，死後封「王」，侯王廟因而得名。

講古系列 2: 大牛 + 斗零

原來五百蚊紙叫大牛，係因為 1925 年匯豐五百蚊紙係有一位農夫拖住隻水牛响度耕田。當年五百蚊紙係最大面額嘅紙幣，所以稱為大牛。但時移勢易，水牛無田耕，亦再唔係最大面額，千元紙幣帶上金色，金牛之名亦因而誕生。

而五仙之所以稱之為斗零，係有一個好官方嘅說法，响 2005 年 9 月第 44 期嘅《香港金融管理局季報》提到

所有在1866至1933年間鑄造的香港五仙硬幣，包括1903年的五仙硬幣都是以白銀鑄造。1903年的五仙硬幣重1.37克，約相當於三分六厘（0.036兩），因此簡稱為「三六」。

二十世紀初，果菜欄所用的暗語是以「之辰斗馬蘇零」代表一、二、三、四、五、六，因此簡稱「三六」的五仙便被通稱為「斗零」。「斗零」這個稱號相當普及，即使到1989年五仙停止流通後仍一直沿用。