良辰美景

《擬魏太子《鄴中集》詩》序：「天下良辰、美景、賞心、樂事，四者難並。」

呢一兩個禮拜個天真係好靚，好耐都未見過有層次嘅雲景。(澳洲毒發作中...)

費解

正正經經咁多嘢可以反，究竟因乜事一個所謂賤男點解值得有三萬人去反對佢?

跑輸大市

45% vs. 54%, 今年多數挑戰失敗。

匿名、轉貼、論壇

上個禮拜唔知做乜頭痛咗成個禮拜，早瞓咗。响星期五晚精神少少，邊聽電台邊上網，有位軒仔話自己因為一篇網誌，俾人起底云云，今日報紙都有登到出嚟。

點解一封被轉貼嘅網誌，可以鬧到咁大件事? 出事嘅地方係一向多事(可能用「攪事」會貼切 D)嘅高登，標題話名係轉貼，內容最後話係嚟自 Xanga, 但偏偏又响 Google 度搵唔到，連 Cache 都無。

呢個係咪香港教育失敗其中一個例子? 可信度咁低嘅轉貼文章都信? 高登起底組咁「強」，點解唔搵一張軒仔同個連名都無嘅女仔嘅合照? 情侶熱戀期點都有幾幅相放上網啩?

我當個個都有獨立思考去信呢件事，但公開指責別人前有求證過嗎? 求證唔係求其响 forum 度見到幾個「數臭」當時人嘅文章就得，呢 D 文章講到尾都係無名仕嘅指控，完全無可信性。

唯一有力少少嘅真人指控，係噚晚有個小丁 Phone-in 上網台，話 13 宗罪係真嘅云云，但 13 宗罪講到尾係錢嘅問題，如果咁都係問題，咁重拍乜鬼嘢拖?

响論壇入面嘅匿名轉貼，就同我朋友聽佢朋友嘅朋友講嘅奇遇一樣，得個知字就算啦!

900

距離 1000 嘅目標不遠，等多半年應該得。

課本 vs. 教材

額外買教材只係多萬幾蚊，而且可能只係幾年先買一次，乜原來學校咁窮，連呢 D 錢都無，要去 cut 學生活動?!

利益輸送

曾任權嘅慳電膽事件其實只係一個煙幕，真正响背後要做嘅事其實係送錢俾大地主，有成千萬以上嘅賠償，真係小巫見大巫。

新 + 豪 = 毫

新樓閒閒哋都五六千蚊呎，西環樓都可以上萬蚊呎，但實用率又唔高，香港係俾人住嘅地方嗎?

Nothing to Write Home About

1. 保育政府總部東座、中座、中環街市只係應該做嘅嘢
2. 開發工廠大廈，係市場已經做緊嘅嘢
3. 派慳電膽加電費係癡咗線
4. 加強港台合作，咁下次民進黨上台又會唔會減弱返?

成份施政報告根本無整體政策嘅 Vision, 剩係識想去捉人英文 grammar 錯嘅人無資格做特首。

Unuserfriendly

唔知點解，地鐵所有新線都要改原有嘅線，攪到用開嘅人非常之唔方便。到新系統有問題，又會擾亂舊有系統。班管理層係咪應該日日都搭地鐵，感受吓應該點樣起一條好嘅路線?

消失

當你有一日返到屋企，阿媽突然話耳仔流血，都真係幾嚇人。但見到真係滲血，可以做嘅就只有去急症室。去到急症室被分類為第五類病人，心裡先至叫好過 D.

杯麵

杯麵，响讀完書返香港前都未食過。
第一次食杯麵，係某一日要開 OT, 同同事一齊食，重要係用杯麵入面無叉，要响 Pantry 度搵兩支牙籤逐條逐條撩嚟食。
之後，出 Trip, 旅行、或者無人响屋企又唔想煮嘢食嘅時候，杯麵都係不可或缺嘅食糧。
今日開完會去食晏，見到電車有大大個杯麵，响電車度。返到公司再出去開會又見到，當然要影相留念。返到嚟發現，原來司機哥哥係笑笑口對住個鏡頭。

無天理

點解有人一個 trip 嘅相都多過我呢幾年影嘅相?

港產寶馬

响陳水扁做台灣領導人嘅年代，呂秀蓮因為成日講錯嘢，俾人話係 IBM (International Big Mouth) 同 BMW (Big Mouth Woman). 呢兩日，香港都出咗個 BMW, 叫做譚香文。

話說前亞視女主播王麗珠曾經係譚香文嘅議員助理，譚香文選唔到議員，王小姐後來成為甘乃威嘅助理。噚日就無端端爆話甘乃威「求愛不遂」而炒咗王小姐，甘乃威澄清無咁嘅事，民主黨就內部調查，話要尊重投訴人要低調處理云云。轉個頭譚香文又無端端上晒電台上晒報紙大鑼大鼓數甘乃威講大話之類... 乜唔係要低調?

要搵一個做過譚香文同甘乃威嘅助理嘅人，唔難。譚香文一用前僱主嘅身份講嘢，身份就會即刻曝光。低調?

上電台，上報紙，上電視六點半新聞。低調?

先公審，後調查。低調?

人生最痛苦，莫過於識咗一個大口嘅人做傾訴嘅對象。

我對呢件事無評價，甘乃威有無求愛、示愛、表達好感係 none of my fucking business. 佢有無做好區議員或者立法會議員先係最重要。

更何況，毛主席三妻四妾，克林頓又係攪助理，薩爾科齊離埋婚又再結婚都重得。你選一個人，係選政績、政綱、政治取向、定選私生活? 我更唔明點解會有人對政客有不切實際嘅幻想，難道無聽過兩句名言: "Politics is dirty" 同 "Power corrupts, absolute power corrupts absolutely." 香港人醒少少啦! 要記住，兩個爛蘋果，只係揀個無咁爛嘅咁解啫。

天神

Picasa 有 face recognition 嘅功能，响一個無人嘅相入面識到個人樣嘅雲，至於係神係雲係乜係柒，真係天曉得。

天災

打風、地震、再打風，剛剛睇完《HOME》，又睇完新聞，地球要摧毁人類嗎? 與其說地球很危險，其實危險嘅係人類。

閱兵

慶祝中華人民共和國成立 (即係國慶，記得慶祝國慶係冗詞) 六十週年閱兵儀式响天安門舉行。我對於中國成立咗幾耐無乜興趣，我剩係對軍隊嘅徒步方陣嘅步操畫面有興趣多 D. 用 128 步每步 75 厘米嘅距離走過天安門，嗰種齊整真係好靚。就好似徒手唔用間尺畫直線咁，唔會太生硬，但又好工整。皮鞋一步一步咁敲出步操嘅聲音，齊、短、響。聽聞成件事仲係合埋眼都可以做到咁齊，我諗，就只有中國入面先至可以做到。

之後出場嘅飛機火箭大炮，唔關我事。

移居

原來要去澳洲做嘢唔係太難，係時候考慮吓係咪要轉換環境。

Cheese Moon Cake

三年前，大班出咗一隻芝士味嘅月餅，食落係 Cheese Cake 嘅味道，好香好甜。之後，一直都因為無時間去買而無再食過。呢幾年，除咗純芝士味，又開始有藍梅芝士等等 Cheese Cake 嘅味道，但始終唔似之前純芝士味咁好食。

今年終於買咗個嚟食，食落綠豆嘅比例多咗，無以前咁香，好失望。

國慶大於一切

由殖民地到今天都站在人民頭上嘅人，因為國慶，將新聞自由放埋一邊。

Change 現實版

比起鳩山由紀夫，木村靚仔好多!

發展

香港以發展為先，但發展之後生活係咪真係好咗? 大澳棚屋無人投訴，因乜事响岸上面嗰 D 咁大件事? 定係配套根本未完善就急急發展? 香港嘅城市規劃真係一絕，差到無人有。

Show Time

黃子華係一個讀哲學嘅人，同周星馳一樣係冷面笑匠。前幾年嘅棟篤笑，有少少江郎才盡嘅感覺，但今年返晒嚟，笑到有少少腰痛。我俾五粒星!

藉口

原來唔想返學係因為上學冷感，咁我諗全世界有好多人有上班冷感，係咪又要有 D 心理輔導俾打工仔?

又一年

忘記，忘記，上年忘記，今年忘記，九一一，到最後會永遠被淡忘嗎?

心在澳洲

返咗嚟香港成個禮拜，但係個心依然掛住藍天白雲青山綠水嘅澳洲，今次放假實在太舒服! 呢個，係咪假後症候群嘅其中一個病癥?

關你啥事

劉德華已經結咗婚，有人話佢係大話天王。但係，呢件係家事，關你乜事? 人哋結婚，係咪應該恭喜人? 就好似譚詠麟、成龍等，連仔都生埋，佢哋又有無公關婚事? 係咪劉德華只係天王級，未到神枱級，所以可以俾人閙得?

話無結婚、好朋友關係，呢 D 只係最基本嘅大話，後面做過 D 乜，根本無法想像，呢個由裸照事件就可以反映到。連最基本嘅大話都抵受唔住，係咪 D Fans 太天真太傻?

開恩茲之旅 - 後記

感想

• 坐飛機一定要戴耳塞
• 藍天白雲碧海綠林真係好靚
  
  
• 第一日同最後一日都見到獵夫座
  
• 外國嘅星空真係好靚
• 用 DC 仔影星空不俗
  
• 原來好多男仔都有敷面膜嘅習慣
• 唔知點解女仔對男仔之間嘅感情有 fantasy
• Sky Dive 好凍亦好正
• Bungy Jump 好辛苦
• 考慮要買技大燈潛水影 Video
• D 相好貴
• HSBC 好有錢，雅典同開恩茲嘅機場都响登機嘅 tunnel 出面賣廣告
  
  
• 雅典同台北嘅 Graffiti 比開恩茲靚
• 原來同朋友旅行可以咁開心
  

冷知識

• 原來 Hungry Jack's 係 Burger King 嘅 Franchise
  
  
  
• 原來飛機坐位上，頭部嘅位置有舊嘢可以兩面屈起枕住嚟瞓
• 原來澳洲人唔興叫洗手間做 washroom, 直接叫 toilet.
• 悉尼機場有 Internet Kiosk, 用嘅係 Ubuntu.
  

統計

• 成個 trip 洗咗 1237.3 澳紙
• 影咗 11 GB 嘅嘢，當中有 3.5GB 係相，其他 D Video, 有排攪...
  

開恩茲之旅 - Day 7

一朝早四點左右起身，梳洗再執埋少少嘢落背囊，煮好個杯麵，一切都似乎安頓好。突然團友們話露台好多星，大大個獵夫座就擺响眼前，嘩! 香港絕對睇唔到嘅咁清楚，用部 DC 仔影咗佢，突然的士大佬 call 上嚟就到咗，時間變得趕急，草草地影完相，寫低張紙俾 apartment reception 話我哋已經走咗，裝少少水入水樽，响一分鐘來攪掂。

去機場途中，因為沿途無街燈，星境比响 apartment 個露台更靚，但係都已經變成剎那光輝，留唔到入影機入面。同一批團友道別，Check-in 上機，當飛機穿過雲層，太陽亦都差唔多升起，相機快門又再啟動，再拍攝日出嘅一刻。

又再同一對友人道別，已經剩下自己獨自上路，由 domestic terminal 搭 shuttle 去 international terminal, 辨出境手續，一切就好似將到埗嘅程序反轉。等咗一個鐘，終於可以登機，飛機準備起飛之際，機長話個 public announcement system 有問題，要返返去俾機組人員 check 吓。

終於可以起飛，隔籬有一班大陸遊客，又麻麻煩煩，應該係第一次出國旅遊。開初上機嗰陣重要我同佢換位，好彩無換俾佢，唔係佢响我右邊，佢 D 朋友响我左邊，我就真係 lolijin. 食完個 lunch, 戴上耳塞，佢有佢嘈，我有我瞓。好似以前一樣，每一個鐘頭起一次身，都叫做瞓到四個鐘，之後，晚餐送到，食完，眼光光，睇 Myth Buster, 聽之前 download 咗落 PMP 嘅電台節目，都差唔多到香港。

放完假，一身都鬆晒!

開恩茲之旅 - Day 6

其他人去咗玩浮潛，我就為咗應付聽日嘅早機而休息。休息嘅日子，噚晚用友人部單反影星，攪到一點幾。但七點幾，突然有個電話打過嚟，叫我去浮潛，我聽到一頭霧水。原來佢哋報團嗰陣留咗我個手提電話同名，一出房門，班友仔真係未出發。以為可以再瞓，電話又再響起，個司機話重未見人，一出露台，原來佢哋用咗後門，個司機話要走云云，唯有用拖字訣，個司機終於見到佢哋，收得線。但個人已經醒晒，整返個微波煮蛋三文治，食隻蕉，寫下 blog, 上吓 facebook 咁。

十一點左右，開始有少少睡意，再瞓過。瞓到一點半，又煮個雞蛋雜菜一丁，正! 本來都想再瞓，但係已經瞓唔著，去試吓 apartment 個泳池先，嘩! 乜鹹嘅?! 即刻無晒 mode 游。沖一沖個身，換件衫，都已經四點半，出去週圍行吓都好。同雅典唔同，無乜靚嘅 graffiti, 好多都係無特色嘅簽名。反而進入黃昏，街境、百鳥歸巢都幾 OK.

行行吓又進入市中心，有人做緊街頭表演，都係一個女仔搵 D 男觀眾幫手，攪到 D 男觀眾唔好意思嗰隻，不過睇落又幾好笑，大紙最細都廿蚊，唯有將所有硬幣奉上。

時間差不多，返返去 Apartment, roommate 响樓下打電話，即係全部人返晒，聽日早機，我提議早 D 食晚餐。食晚餐之前本來想去超級市場買聽日嘅早餐，點知已經一日收咗。揀咗間响 Apartment 附近嘅餐廰，叫咗個海鮮意粉，有蠔、魚、蝦、魷魚，而且茄汁重要煮得唔太酸，呢餐實在太美好，雖然貴咗少少。

之後再去食雪糕，好多款選擇，除咗有水果味，重有 Red Bull 味、金莎味、三角朱咕力味等等，實在太有特色。我叫咗個蕉糖味，Yummy!

最後，咗便利店買杯麵做聽朝嘅早餐，返到 Apartment, 影張 light painting, 之後開始執嘢，盡最後努力去 upload 相，用盡未用晒嘅 quota. Roommate 打算睇波唔瞓，我就沖完涼執多少少嘢就大覺瞓。

今日係好舒服嘅一日。

開恩茲之旅 - Day 5

學咗潛水，去到澳洲又點可以唔到大堡礁? 一朝早出發，去到 dive site, 最麻煩嘅氣樽同 BCD 都已經準備好，著好 wet suit, mask 上噴上防霧，就已經落得水?! 實在太輕鬆。只係落水時嫌落得太急，好似趕鴨仔咁，落到水未抖順條氣就已經要潛。朝早都還可以，下晝就要响水入面大啖大啖咁抖順條氣，十分鐘左右，就已經去到得 50 bar, 要上水。幸好早上都有 40 分鐘貨仔玩吓，其實都已經好夠本，再加埋水面嘅景，都係一種享受。

總共 50 分鐘嘅旅程，見到好多珊瑚、珊瑚魚，大大小小，形形色色都有。重有大海蔘、大蜆，水亦都好清，比香港好唔知幾多倍。上晝潛完水坐艇去沙灘����，buddy 們响沙灘附近浮潛，我就坐响沙灘度浸吓水睇吓風景咁。Lunch 有雞槌、寬條麵、沙津、麵包、生果等，正! 下晝潛完，就去坐隻玻璃底船再睇水底。又係源源不絕嘅靚景。回程，乘住海風，同友人傾計，渡假，原來可以咁舒服。

總結，原來去大堡礁原來係好簡單，電筒、手套、防霧全部都唔需要。甚至其實，根本唔需要學潛水。

開恩茲之旅 - Day 4

今日各自活動，唔駛咁太早起身，可以瞓到八點左右。梳洗、食過早餐、整埋行李、check-out. 九點鐘架車嚟接我同　roommate, 去到 skydive center 攪埋 D paper work, 去機場、著好裝備、上機、响萬四呎同空欣賞風景。過咗無耐，機槍門打開，寒風刺骨，我係第二個跳。背後嘅教練話只需要擺對腳出機槍，其他事佢會攪掂。果然，佢猛然一推，就翻騰咗一個圈，太陽、雲海盡收眼廉。身體感受住刺骨嘅寒風，亦承受住無重狀態嘅壓力，兩件事加埋，竟然係身心舒暢。穿過雲層，降傘打開，寒風漸退，望見一幅一幅嘅蔗田，又係另一種豁然嘅感覺。之後緩緩下降，落到地面，不禁有少少失落。

返到酒店，拎返行李去 check-in 另一間 apartment. 房間境色怡人。對住個無敵大海境寫 blog, 簡直係人生一大樂事。午餐，係一款好似 Maxican wrap 嘅 Kabab, 無乜驚喜，只係一個簡餐。之後 Roommate 話要瞓多陣，我就繼續寫我嘅 blog.

三點鐘，我去玩 bungy jump, roommate 個我嘅 spectator. 架車有少少遲，三點四先出現。去到目的地，填好 form, 睇住其他人跳，感覺唔係太恐佈。但當一步一步上到塔頂，除咗有怡人嘅風景，亦都令人有少少膽脅。著好安全裝備，對住鏡頭 say hi, 唔得，鬆開扶手，再 say 多次 hi, 跳~~~~~~ 好恐佈，腦充血，個人唔係太舒服，雖然 50 米唔高亦都唔需要太多時間，但係感覺比起 skydive 實在差太多。不過人生嘅其中一個目標終於達到，拎到件只係跳過 bungy jump 嘅人先有嘅 T-Shirt. 不過無下次，感覺實在難受。跳完之後，再上塔上影相，可以輕鬆返一陣，落返塔底，有個女仔叫極都唔肯跳，最後，用咗十幾分鐘，終於俾工作人員說服，睇返 DVD, 大家都流露咗開心嘅神情。

呢個假期最刺激嘅一日已經完結，聽日再去完成人生嘅另一個目標：大堡礁

開恩茲之旅 - Day 3

三點幾起身去坐熱氣球，六點左右真係要上去，黑嘛嘛，乜都睇唔到，有一陣臭味，唯有見到深色嘅地方就走開，以免誤中地雷。

上到氣球，是破曉時份，一道陽光劃破長空。隨著氣球緩緩升起，天色亦慢慢變得明朗。晨光初露，氣球穿過雲端，雲海處處，又是另一番境象。相機快門、閃光燈，開關閃爍過不停。返回雲底，地面風光稍為遜色，直至太陽露出一道曙光，所有焦點都立刻轉移，快門閃燈開關閃爍比之前更甚。

返到地面，不乏影相嘅空間。架 shuttle 車我哋去食早餐，早餐大家又影吓 D 攪笑相咁。八點九，shuttle 車我哋去 skyrail station. 八個字嘅車程，車上播住催促曲，我都瞓到半個鐘左右。

九點半，响 skyrail station, 等咗一個鐘左右，同另一個團友會合，出發坐纜車。風景無乜特別，好以海洋公園咁，不過就有三程。第一程，都見到唔少甘蔗田，之後兩程都係俾一大個雨林圍繞住。

坐完纜車，已經係Kuranda, 雨林中嘅一條村，食過午餐、買過手信、影過相，已經 miss 咗兩點嘅火車，要等個半鐘先再有火車開出。上到火車，沿途風景 OK, 只係俾好多樹阻住，當然，雨林中嘅樹係必要嘅，亦唔阻人影相嘅雅興。結果瞓覺嘅瞓覺，影相嘅影相，傾計嘅傾計。又係六點，行程豐富嘅一日。

開恩茲之旅 - Day 2

噚日興起報咗個團，今朝六點半起身梳洗、食早餐、等車。七點八架車到，八點左右北上，去動物園、熱帶雨林、遊鱷魚潭、去沙灘。夜晚七點半返到嚟同其他友人會合食飯。

動物園有Standard 嘅樹熊、袋鼠、蛇。雨林入面有條河，部份人落咗去游水，我就行住等。去鱷魚潭前，响一個 Picnic site 野餐，有沙律、雞肉、生果、麵包等嘅西式野餐。之後去到鱷魚潭 (Dantree River)，森林河一條，特色欠奉，攪咗一輪，都只係得兩條鱷魚咁大把。中途有個景點，見到有隻特別嘅Tropical Green Ant, 可以食用，有豐富嘅維他命 C云云。食完蟻去食雪糕，特別嘅四色雪糕，正! 之後到一個叫 Cape Tribulation 嘅沙灘，水清沙幼，行吓劃吓沙咁，又係時候返上車。

開恩茲之旅 - Day 1

經過十幾個鐘嘅飛行，等過關，等轉機嘅旅程，終於到達開恩茲。Check-in 後，第一件事買 SIM 咭，再去超級市場買生果、水、零食等。之後去網吧報平安、Check email, 响海邊影吓相，用過晚餐，咁又一日。返到酒店，乜原來無牙膏、牙擦，又要去買過。

開恩茲之旅 - Day 0

呢個 Post 係下晝四點寫好，Schedule 咗响今晚 Publish，呢個時候，我應該身處二萬五千呎嘅高空。由三四年前開始學游水、潛水，目標就只有一個: 澳洲大堡礁。初初買 snorkel, 配咗度數嘅 mask, 之後添加潛水錶、手套，無耐又買埋 DV Cam 加潛水殼，今年買埋支電筒，一切準備就緒。

兩年前試過 Plan 一次，二萬蚊，無人有興趣。年初友人建議去澳洲，心中暗地裡呼叫一聲 Yes! 潛水、跳降傘、熱氣球，一個上天下海嘅旅程，我來了!

自助餐

好耐未同啊媽去食自助餐，今晚去咗皇悅酒店，熱嘢無乜好食，甜品就幾正，有藍莓 Cheese Cake, Tiramisu, 白蘭地啫喱，法式燉蛋。今日已經過得好滿足。

嫁錯郎

乜嘢叫「女怕嫁錯郎」? 睇吓呢段就知:

高相祐一剛的證供則指出﹕「4年前開始誘導妻子吸毒，兩人常常一起如此做。」表明酒井吸毒日子不淺。

幻滅

一個又一個有「清純」形像嘅女星變成話題，先有好天真好傻嘅阿嬌，再有玉女掌門人周慧敏嫁俾風流才子，依家有用甜美笑容迷倒整個亞洲少男嘅酒井法子沈淪毒海。究竟，天使係迷都會有墮落嘅一日? 無論幾純潔嘅人心，經過歲月嘅風霜，都會變得殘缺? 定係，以前見到嘅嘢，其實都係假象?

原來，以前對偶像嘅距離感，都不及少女模特兒攬枕嚟得真實。真亦假時假亦真，法子迷們頂得順嗎?

G.I. Joe

師弟請睇戲，都好，原來係首映，OK. 放工即刻飛去九龍灣食咗少少嘢等睇戲。張飛寫八點三開場，八點半 VIP 區先開始滿，八點八熄燈播 Trailer, 睇足兩個鐘，十點九散水。

G.I. Joe 基本上只係對個名有印象，都係正派同反派嘅軍隊打嚟打去。所以，都係抱住去睇一套戲嘅心情。套戲以劇情為主，鐘意諗嘢嘅人應該會覺得好睇。無乜嘢特別嘅電腦特技，見到發泡膠搭嘅境，可能場地問題，音效太大聲，麻麻地。

P.S.: 師弟同自己嘅習性差不多，嗌同一樣嘅飯，飲同一樣餐飲，原來同一間小學、中學、大學出嚟嘅人可以咁似。

eVisitor

月底去澳洲，都未攪 Visa. 點知原來可以申請 eVisitor, 重唔駛錢添! 正!

eVisitor applications are free, there is no application charge or service fee.

怪警告

預 料 鰂 魚 涌 的 海 水 高 度 會 在 早 上 (8 月 5 日 ) 6 時 至 10 時 期 間 上 漲 至 海 圖 基 準 面 以上 2.9 米 ， 海 水 上 漲 可 能 會 引 致 上 環 低 窪 地 區 出 現 水 浸 。

點解唔直接講「預料本港水域海水高度...」而係「預料鰂魚涌的水域海水高度...」由鰂魚涌到上環都有一段距離啫，做乜要咁精準講到鰂魚涌水位會高，但係其實想講上環可能會水浸? 科學主任們嘅邏輯用唔到响語文度?

白癡問題

話說留咗個 HSBC Account 看門口，但係唔知點解突然 Login 唔到網上理財，咪打上去 Customer Service 睇吓發生乜嘢事。點知佢竟然問我戶口結餘同埋問我有無 autopay?! 癡線! 搵鬼去記自己個戶口結餘? 有無 autopay, 話明 auto, 做乜要記? 我真係俾佢激死，跟手叫我去 register 電話理財再去問過。點知 register 之後，又真係問過第二 D 問題: 英文全名、出生日期等。

究竟發生乜嘢事? 乜無電話理財就唔可以用電話嘅 customer service? 究竟個 Security/IT Manager 發咗乜嘢神經?

景行廳男孩

台灣以前同香港差唔多，得三個無視電視台。依家台灣嘅 cable 台幾十個，節目多元化，唔少幕後人都有機會轉營做幕前。當中景行廳男孩係佼佼者，隊員係三位三四十歲嘅幕後人員，做綜藝、拍劇、工作人員，用一年幾嘅時間，由當初一句戲言，變成今日真係唱歌跳舞出碟。

反觀香港，嚟嚟去去都係一個陳志雲，本來或者都重有個王維基。以前華人都係睇香港嘅戲、聽香港嘅歌。依家台灣紅嘅有小豬、大小S, 飛輪海、棒棒堂、幾位星光大道出道嘅歌星等等等等。香港呢? 依家紅嘅，都係十年前嘅藝員同歌星，新血欠奉，得返班「少女模特兒」。

公共廣播政策一日唔改變，娛樂事業都唔會有出路。

Boss vs. Mr. Brain

連續睇咗兩套警察查案嘅日劇，個腦好攰，木村魅力不減，輕鬆攪笑劇始終係啱我口味多 D.

每日一字 4

Eclipse - 中譯日蝕

c.1280, from O.Fr. eclipse, from L. eclipsis, from Gk. ekleipsis "a leaving out, forsaking, an eclipse," from ekleipein "to forsake a usual place, fail to appear, be eclipsed," from ek "out" + leipein "to leave" (cognate with L. linquere; see relinquish). The celestial ecliptic (c.1391) is the circle in the sky followed by the Sun, so called because eclipses happen only when the Moon is near the line.

講緊嘅係日蝕出現嘅環狀日冕，同 ellipsis 係同根字。

The Art of Decision Science

如果你買咗迷債，你會接受賠償七成嘅方案，定係再等待官司結果?

銀行咁多精算師，抛出嚟方案一定有利銀行一方，所以，接受方案嘅話，係一個 sure gain 之餘亦蝕梗俾銀行。叫苦主接受方案嘅人，一定係幫銀行一方。

Déjà vu 3

又係星期六，又係做 Training, 又係做同個客，呢件事已經 schedule 咗。但因乜事連續兩個禮拜都係三號風球?

夜遊 Ocean Park

Microsoft 今年 FY10 嘅 Channel 响海洋公園，除咗哈佬喂，第一次夜晚嚟。分別，當然係少人好多，食咗少少嘢，去到水母館，幾近無人。第一次夜晚搭攬車，夜境 OK, 唔係太 impressive. 去睇 Windows 7 demo, 好似真係幾吸引。再夜探大熊貓同小熊貓，拎埋隻 card reader 同筆記簿走人。

Go to gallery

飽飽飽飽

連續兩晚都約咗人食飯，但大家都眼闊肚窄，嘢食得唔多，我都盡晒人事，食唔落就係食唔落。

反智言論兩則

平機會話:「用指紋機打咭驚俾人偷，所以唔應該用。」
實際上，指紋機唔會儲起成個指模，所以就算係成部機俾人偷咗，都唔會有任何私隱問題。

有評論指:「警察叫人座响車度做人肉沙包，會好易死人。」
實際上，如果個人唔响車度，到撞車嘅時候根本唔知點撞法，叫司機坐返响車入面，反而係最安全，當然司機依然有受傷嘅風險。

呢件事嘅 focus 唔係响個司機嘅位置嗰度，而係警察徵用市民嘅車做 road block 唔係唔係一件啱嘅事。警察係應該响保障市民嘅生命同財產下去阻止所有罪案。車係市民嘅財產一部份，無理由俾你拎去撞，重要係大部份係搵食車，班司機大佬都真係多得你唔少。

三十而立

程樹德《論語集釋》說：「竊謂立止是學有成就之義。」
蔡尚思《孔子思想體系》說得更明白：「『三十而立』，也就是學有所成。」這個學有所成，不單純指知識和學問，還包括一個人的人生觀、世界觀、價值觀，包括一個人的人格。
南懷瑾《論語別裁》說：「立就是不動，做人做事處世的道理不變了，確定了，這個人生非走這個路子不可。
李澤厚《論語今讀》說：『三十而立』，有人強調與『立於禮』有關，是指人從六歲『習禮』到三十歲才算完全掌握熟練，但後世註疏多不拘泥於學禮，而泛指人格的成熟，更佳。」因此，他把「三十而立」翻譯成白話文「三十歲建立起自我」，頗耐咀嚼。
而李長之《孔子的故事》則以孔子的口吻說：「我到了三十歲的時候，彷彿對任何事都有個主意了」，也就更為形象。

綜合起來看，「三十而立」，就是在完成學業的基礎上，確立起一種積極進取的人生態度。

藍天白雲數碼港

去做 gym 時見到蔚藍色嘅天空，即刻走去差相機電池，之後去數碼港，睇吓可唔可以影到日落。早到咗少少，太陽太光猛，影吓雲境，都唔錯。差唔多時間，六點八 set 好腳架，起動!

影咗成個鐘，差唔多八點，想收工之際，竟然見到北斗七星! 都有年幾無見囉，唯有留耐少少，影多半個鐘。想搵牧夫座出嚟，但係唔係時候，根本唔响天空度。攪吓攪吓，原來 miss 咗最後一班出中環嘅巴士，唯有搭小巴去西環再返屋企，咁就攪到九點半先食到飯。

有機會嘅話，再去數碼港影星，或者去淺水灣睇吓會唔會有更多星出現。

Go to gallery


P.S.@20090717: 當晚見到流星

毒品 2.0

响乜都 2.0 嘅年代，所有嘢都由用家提供，依家學生做小拆家，用家賣毒品俾用家，家陣原來有八歲嘅細路索 K, 真係唔知乜嘢世界。

What if

呢個世界無如果，但如果我上個月無清倉，我股票嘅投資組合會唔見咗差唔多 13%!!! 宏利跌得尤其犀利，無咗 22%, 究竟發生乜事? 計落都肉痛，蝕咗真係唔知點算... 都夠我去幾次澳洲...

正常作息

响廣州，酒店上網無得上 Facebook, YouTube 等網頁，結果係每晚 12 點前就已經瞓著咗，跟住每朝 8 點 morning call 起身。真係正常到不得了。今日返到嚟香港，係咪會過返 D 唔正常嘅生活呢?

溫布頓

好鐘意睇費達拿對羅迪克，節奏夠快，唔會悶。唯一不足係費達拿屈機式嘅 Ace 波，一球、兩球、三球、四球、Game Federer, 都幾無癮。可能係鋤強扶弱嘅心態，每一次都係支持羅迪克，每一次都係屈居亞軍。依家 break point, 唔知結果會點?

車胎廣告的反思

古天樂响台灣拍咗個車胎廣告，廣告最後一句係「想節能，輪胎能」古天樂講得唔正，被電台節目主持譏笑。奇怪嘅係，該位電台節目主持嘅普通話亦都係也也烏，之前話要日日學普通話云云，咁... 做乜要笑人?

「想節能，輪胎能」我相信絕大部份香港人都未必讀得正，笑人係學習態度? 係覺得同病相憐而開心?

語言係用嚟溝通，不論普通話、台灣國語、香港國語、美式英文、星加坡英文、香式英文、香港話、廣府話、定唔鹹唔淡嘅廣東話，講得唔正，做乜要笑? Maybe it is funny but it is not laughable.

又七一

三點半到灣仔，一大班記者己經响天穚。轉移陣地，折返金鐘，所有天穚變晒做禁區，Shit...

唯有駐守响天穚底嘅樓梯，四點，乜係雷曼班人，即係話民陣嗰班未開始?! 乜今日遲咗咁多。雷曼行完，警察又趕人，樓梯都唔俾影...

去到太古廣場，都好似無乜地方啱擺腳架，大腳架用唔著，向上一望，巴士站頂喎! 細腳架出動。五點左右，開始有零零聲聲嘅人出現。隔籬個警長見我 set 起個腳架，係咁搵我傾計，話我似讀緊書，都唔知話笑定話真。之後又話隻普選香港會唔掂云云，fine...

六點幾，部機重影緊，其他警察哥哥都好 wonder 部機做乜可以影到咁耐。七點，相機無電，收工。

保完再保

存款又保、旅行團又保、連保險都要再保。咁邊個保去保險嘅保險?

再見米高積遜

第一次聽佢嘅歌，大概就係 Black or White 做嘅廣告歌，唔同人種用 video morphing 變出嚟，今時今日自己都未試過點做。之前一兩年，再聽返佢嘅歌，依然動聽。一個人有靚聲、愛心、有名有利，可能膚色係佢嘅唯一缺憾，但原來，上天造人，係比人工整容靚好多倍。

失策

去尖東影 time lapse, 本來一切安好，點知原來今日係熄燈兩個鐘? 正當猶疑緊部相機頂唔頂到咁耐之際，真係停咗影相。乜我無較細個 resolution 咩... 明明較咗格... 點會咁㗎... 就咁提早收工。每張相都係用咗 3456 x 2592 影，真係超級高清...



P.S.: 海邊大風，好涼。但一離開，又濕又熱，D 汗流過不停，夏至果然不同凡響。
P.P.S.: 今日多雲，最後都係一粒星都見唔到，但依眼所見，就算無雲嘅區域，都係搵唔到星。香港嘅市區，真係再睇唔到星。

正生的迷思

如果你問我，正生搬去屋企附近有無問題，我無所謂。反而明報今日一則副刊，令我有更深切嘅反思:

共同分擔不受歡迎設施
對於有梅窩人不滿偏偏選了他們的社區，陳健民說，社會有多類型的設施需要大家承擔，只要不是過於集中一個地區，就有道德責任接受，就算富裕如數碼港 的富豪區，也有此責任。美國有一條Equal Share Law，也有一個透明及嚴謹的規劃制度，當地人一般會透過法律解決這類問題。香港的規劃大綱圖則定得很鬆，被劃定為公共用途的，可以是公園亦可以是一間診 療所，問題是香港官僚系統在整個規劃過程有很大權，在最後一刻硬「塞」一件東西亦不違反規劃程序，居民無從參與，增加發生衝突的機會。

點解呢 D 負面嘅社區設施，唔會响富裕嘅社區出現? 呢 D 社區一樣係遠離市區，居民個個都受高等教育，紳士淑女，話唔定接受程度會比其他社區好。又係曾特首話 "having something located near your. I think it is the least sacrifice you should make."

零污染

Yo! 環保署預測聽日空氣污染指數係零!

共渡時艱

給財政司司長: 5.x% 都已經四十幾萬，一年都五百幾萬，夠買一間豪宅咁大把! 果然係好似你當年咁講無乜作用。

給公務員: 如果你有私人機構咁問責又唔收長糧，我又唔介意你凍薪呀!

正生事件

梅窩居民做咗壞人，但其實係政府咨詢不足，依家基本上係撕裂咗梅窩居民同正生書院嘅關係。學校就算搬咗入去梅窩，班學生都有排受。

好多點

星期六响地鐵見到 eee PC Shell, 話咩多點觸控，咦?! Multi-touch screen 呼? 今日一睇個 spec, 原來係個 multi-touch 嘅 touchpad, 好無聊... 個 touchpad 亦都凹凹凸凸，好多點。

換護照

第一個十年，响英國申請，唔知去咗邊。
第二個十年，响香港申請，唔知幾錢，不過好硬正，所有資料都係手寫。

第三個十年，响美國申請，盛惠 73.1 美金，Paper back cover, 資料都係電腦打印。

第四個十年，响香港申請，成 1430 港紙 (好彩英磅平時換，過多一兩日個價錢已經係1620)，Paper back cover, 資料電腦打印外，加埋晶片，真係高科技。

局外人

去維園，唯一目的，影 time lapse, on the record.

19:20
無雨，拎腳架出發。

19:30
天后地鐵站，好多人，今日唔係星期日或者公眾假期，但都係為咗同一個目的地。四部扶手電梯，二上二落，點知地鐵職員竟然停咗一部上嘅?!

19:45
要高空拍攝，唯一地點，係中央圖書館去維園嘅天穚，點知有警察、保安駐守，天穚邊放晒鐵馬、唔俾用腳架、影完要走云云。把心一橫，衝入維園，求其搵個無乜人嘅位影。

20:15
身後越企越多人，突然有人衝去腳架面前坐，OK, 係應該讓局內人，但要顧住個腳架，所以無乜心情真係去參與。但係就因為欠缺參與嘅熱情，見到其他週邊嘅嘢。聽著台上講者嘅激情呼喊、前學運領袖嘅朗誦，看著點點燭光，想著是香港人的三分鐘熱度，還是二十年的執著。

22:00
隨著活動到了尾聲，相機電池亦耗盡，收拾架生，多謝特區政府俾我一個咁好嘅攝錄提材，七月一日可以上天穚影 time lapse 了。

這個年紀的我，不再是熱血的青年，悼念不是我今晚的目的，但偏偏在熱血的年代，沒有到過維園悼念六四。

六四的二三事

中國政府响一九八九年六月四號做出一件無可原諒嘅事。

原來入境處覺得學運領袖或藝術家比 H1N1 流感患者可怕，更危害公眾安全。
原來《天安門》係一部醜化學生領袖嘅紀綠片。
原來溫總當年係企响趙紫陽旁邊勉勵學生。
原來好多人都無忘記六四呢件事。

P.S.: 有人用 Beyond 嘅《抗戰二十年》紀念六四，但我覺得呢首歌係屬於家駒。

空倉

今日手痕，賣咗大部份股票，埋單計平均蝕 20% 左右。家陣先發覺，原來股票佔組合唔係太大份。

800

原來呢幾個月 100 100 咁上，今日嘅特別操作實在太特別。

Shane's Production 2.0

作品原來唔止得 Video, 種類比想像中多，為咗要集中所有作品，就用咗 Yahoo! Pipes 去完成成件事，有埋Landing Page. 再用 Microsoft Popfly 做咗個 iGoogle Gadget. 玩得最癲都係今次。

另一個問題係原來 Facebook 個 RSS Notes Import 係唔會 display thumbnail. Publish 出嚟嘅 news feed 完全唔靚。用咗好多方法試，都做得唔好。直到，嘗試 Links 嘅個 feature, 咦?! 竟然做到想要嘅較果，blip.tv 嘅 video 可以出到 thumbnail 之餘又可以 embed 埋 video player, 唔駛一片兩 post, very good! 最後，鏟晒所有 news feed, 重新逐條 link post 返上去，大功告成!

Mr. Lau

How do you do Form 1A, how do you do~
Is there anything that I can do for you~
I am very welcome you and I hope you like me too~
How do you do Form 1A, how do you do~

中一上音樂堂，Mr. Lau 第一首教我哋嘅就係呢首歌，音樂感染了整個班房的氣氛。後來入咗 Choir, 學讀拉丁文去參加歌唱比賽、上港大表演、响聖誕節到聖堂唱子夜彌撒、去感恩節晚會唱歌俾全校聽，每一幕都覺得音樂係一件開心嘅事。佢對音樂嘅熱誠，係令人感動，只可惜嘅係，一兩年之後，响學校再見唔到 Mr. Lau. 好似話去咗第二間中學教音樂，再聽唔到 Mr. Lau 嘅歌聲、說笑聲，亦見唔返佢嗰縶藝術家嘅鬍鬚，中學時偶爾會諗起佢，但之後都好似無再諗過，留低嘅，大概就只有 Choir 嘅歌譜。Panjenigua, Bless this house, I am a bliss, 做個開心健康人。

今日之後，亦都再見唔到，原來响我哋營營役役嘅時候，佢已經完成碩士、再進修博士，同時繼續將音樂帶俾好似我以前咁嘅中學生。我雖然唔係天主教徒，但係希望你可以响主懷安息，用你嘅歌聲、笑聲為天堂再多加一點喜樂。多謝你當年的教導，劉繼智老師、劉 Sir, Mr. Lau.

Bless this house, Oh Lord we pray
Make it safe by night and day
Bless these walls so firm and stout
Keeping want and trouble out

Bless the roof and chimneys tall
Let thy peace lie over all
Bless this door that it may prove
Ever open to joy and love

(Bless these windows shining bright)
(Letting in God’s heavenly light)
Bless the hearth, a-blazing there
With smoke ascending like a prayer

Bless the people here within
Keep them pure and free from sin
Bless us all that we may be
Fit Oh Lord to dwell with thee
Bless us all that we, one day, may dwell
Oh Lord, we pray

P.S.: 估唔到寫完會流眼淚，但文章寫完，眼淚流乾，心情舒暢，因為一天的苦足夠一天受的了，明天又是新的一天。
P.P.S: Mr. Lau 依家叫做 Dr. Lau 了

擔遮手則

大遮讓細遮，有遮讓無遮，有瓦遮頭收埋把遮。

溫水煮蛙 3

溫水煮蛙講緊身邊嘅事慢慢改變，到有一日變成危險時已經太遲。現實中，溫水煮蛙嘅時候，當水到達某一個溫度，青蛙係會逃生，並唔會活生生煮熟而唔知發生乜事。呢個系列嘅重點，係將生活上見到嘅改變記低，以作日後參考。

污染:
好鐘意影日落，今日搵返以前嘅作品，發覺一件令人好遺憾嘅事。
同一個地方用同一部機响差唔多嘅角度影出去，發覺空氣污染得好犀利。1999 年個太陽差唔多落到海先會唔見，顏色重有三重層次，但 2005 年响半空個太陽就已經唔見咗，而且顏色灰矇矇，雖然係兩張唔同嘅 capture card, 但無埋由差咁遠。

1999年	2005年

今年同第一次影剛剛好相隔十年，可以再影多一次，睇吓會差成點。

Shane's Production

原來响大學畢業之前都整咗唔少影片，今日整理咗唔少，加埋之前影落嘅，放响一個 Playlist 度。


會响 http://media.shaneng.net/ 做不定期嘅 update.

Read Between The Lines

曾任權話國家廿年嚟嘅繁榮倡盛同改變，造福今日嘅香港。即係話香港人係靠六四先有今日，亦即係話香港人無用要靠北京政府接濟。

心理作用

流感，好多人會戴口罩，但又好多人會戴錯。好多人戴完又凸出個鼻抖氣，病毒由鼻自由進出。好多人用手掂完個口罩唔洗手，之後隻手週圍揩。

口罩，俾人感覺安全嘅感覺，但其實危機依然存在。

小甜甜

如果龔如心深信王德輝在生，又點會同陳振聰攪關係，根本唔合邏輯。雖然「愛」呢件事係無邏輯可言，但係同時愛兩個人喎? 你信唔信?

型唔型?

唔知幾時，多咗隻豬型流感。我哋遲 D 會唔會講禽型流感? H1N1 型流感? 流感真係咁型?

卸責

如果卸責可以少 D 嘢做
如果卸責可以搵多 D 錢
如果卸責可以成家立室
如果卸責可以長生不老
如果卸責可以改變一切

但係卸責改變唔到任何事。There are all kinds of mistakes leading to the problems, anyway. Why don't I just solve the problems?

萬宜水庫

友人抽起條筋去行山、觀石、影相。晨早搭車去地鐵站，再轉巴士，再坐的士。先去水庫大壩，望一望 D 六角柱形嘅石，相傳就係呢 D 成億年歷史嘅石柱，令到遲 D 會有地質公園。再落防波堤、賞天池、入海蝕洞，好多「到此一遊」嘅塗鴉，同埋想洗走塗鴉嘅痕跡，簡直係雙重破壞。攀上防波堤，對住大海，又一番景象，太平洋嘅水流，不敵垃圾嘅堆積，唔少沖咗上岸。揹住背囊，重心有少少唔平衡，加上畏高，腳仔軟，落嚟時驚險萬分。

上返東壩壩頂，食咗個輕便嘅午餐，行返出去。沿途遮陰地方甚少，加上要避車，都幾辛苦吓。行咗個半鐘去到西壩，大家又拎部相機出嚟玩，一玩又用半個鐘，先行完短短嘅西壩。之後，見到好多的士開始衝入東壩接人走。不經不覺又行咗個半鐘，出到馬路，遇到分叉位，正當大家都猶疑行邊條路嘅時候，一架巴士突然响巴士站出現，所有人都用最後嘅力飛奔上前。

出返市區，第一件事係去洗手間洗手、沖面等，之後就搵食醫肚。食完飯，閒逛電器舖後，又各自歸家。返到屋企，發覺條頸又紅又痕，原來唔記得搽防曬落條頸度，呢幾日有排受。

Go to gallery


後記: 途中有人問 D 標距柱之間嘅距離係幾多，一開始估 100 米，發覺唔妥，之後又估 200 米、400 米等。响康文署嘅網頁 (http://www.lcsd.gov.hk/healthy/hiking/b5/safety.php) 最尾一段提到係每 500 米一條，不過會因環境因素稍做調節 (http://www.afcd.gov.hk/textonly/tc_chi/country/cou_how/cou_how_vis/cou_how_vis_cpvlg/22cpvlg.html)。