藍天白雲數碼港

去做 gym 時見到蔚藍色嘅天空，即刻走去差相機電池，之後去數碼港，睇吓可唔可以影到日落。早到咗少少，太陽太光猛，影吓雲境，都唔錯。差唔多時間，六點八 set 好腳架，起動!

影咗成個鐘，差唔多八點，想收工之際，竟然見到北斗七星! 都有年幾無見囉，唯有留耐少少，影多半個鐘。想搵牧夫座出嚟，但係唔係時候，根本唔响天空度。攪吓攪吓，原來 miss 咗最後一班出中環嘅巴士，唯有搭小巴去西環再返屋企，咁就攪到九點半先食到飯。

有機會嘅話，再去數碼港影星，或者去淺水灣睇吓會唔會有更多星出現。

Go to gallery


P.S.@20090717: 當晚見到流星