萬宜水庫

友人抽起條筋去行山、觀石、影相。晨早搭車去地鐵站，再轉巴士，再坐的士。先去水庫大壩，望一望 D 六角柱形嘅石，相傳就係呢 D 成億年歷史嘅石柱，令到遲 D 會有地質公園。再落防波堤、賞天池、入海蝕洞，好多「到此一遊」嘅塗鴉，同埋想洗走塗鴉嘅痕跡，簡直係雙重破壞。攀上防波堤，對住大海，又一番景象，太平洋嘅水流，不敵垃圾嘅堆積，唔少沖咗上岸。揹住背囊，重心有少少唔平衡，加上畏高，腳仔軟，落嚟時驚險萬分。

上返東壩壩頂，食咗個輕便嘅午餐，行返出去。沿途遮陰地方甚少，加上要避車，都幾辛苦吓。行咗個半鐘去到西壩，大家又拎部相機出嚟玩，一玩又用半個鐘，先行完短短嘅西壩。之後，見到好多的士開始衝入東壩接人走。不經不覺又行咗個半鐘，出到馬路，遇到分叉位，正當大家都猶疑行邊條路嘅時候，一架巴士突然响巴士站出現，所有人都用最後嘅力飛奔上前。

出返市區，第一件事係去洗手間洗手、沖面等，之後就搵食醫肚。食完飯，閒逛電器舖後，又各自歸家。返到屋企，發覺條頸又紅又痕，原來唔記得搽防曬落條頸度，呢幾日有排受。

Go to gallery


後記: 途中有人問 D 標距柱之間嘅距離係幾多，一開始估 100 米，發覺唔妥，之後又估 200 米、400 米等。响康文署嘅網頁 (http://www.lcsd.gov.hk/healthy/hiking/b5/safety.php) 最尾一段提到係每 500 米一條，不過會因環境因素稍做調節 (http://www.afcd.gov.hk/textonly/tc_chi/country/cou_how/cou_how_vis/cou_how_vis_cpvlg/22cpvlg.html)。