雲境

難得今日唔係灰濛濛，又唔係一大片青天。

豐收

今日心血來潮去計自己今年嘅投資回報:
Bought Over 9.41%
New Capital 30.78%
Total 16.3%

相比之下:
HSI. 5.87%
2318 33.04%
2888 18.8%
945 -13.48%
2840 26.23%
939 8.04%

廿日後年結時，唔知會唔會有大變化?

瑣事

噚晚開夜，今朝唔駛咁趕返公司。食早餐嘅時候，老媽子入咗嚟講一 D 家務事。細心聽吓，原來一個家庭主婦可以為咗濕度底而可以嘅朝早洗衫，响同一日夜晚收衫而高興。亦因為前晚可以收衫，噚日因為㗎洗衣機壞壞哋而攪到要夜晚先洗到衫而覺得不值。

生活，係咪就係咁簡單?

和平獎

究竟，乜嘢係中國特式?

社會主義: 具有中國特式嘅社會主義...
人權: 吃飽飯就是中國人的人權...
和平獎: 孔子和平獎 -_-
姓名: 國家質監總局審議緊英文拼音名係咪都係同中文一樣，先姓後名 -_-|||

普世價值係咪咁唔啱中國人? 中國，又係咪真係咁獨特?

意外

本來有少少猶疑，但無端端隻手揩到個撥號，睇嚟整定要講，感覺比想像中好。

神算

前幾日响 aastock 度拎咗幅圖嚟度，好似差唔多到底，210 左右應該會反彈。但等咗兩日都唔跌得太落去，最後 213.6 入咗。今日竟然真係去到 210.8, 真係有少少唔甘心，都好，收市返返去 216.4. 英國嗰邊升咗近 4%.

故事教訓: 要相信自己，不過食魚要切頭切尾。

Geek Pride

前排見到好多畢業相，唔知幾時，個個畢業嗰陣，不論男女，都會揸住個好 cutie 嘅公仔。

倒帶返十年前，數碼相機無算普及，所以影相唔多，影完相仲係要曬出嚟再 scan 返入電腦。

我最鐘意嘅一張畢業相，係同兩位 Professor 影嘅一張。一位係 Virginia Lo, 一個專門研究 resource scheduling. 一位係 Andrzej Proskurowski, 專門研究 tree structures + algorithms. 可以同兩位大師級人馬影相，真係諗起都開心。




拍片更加唔駛講，只有低解像低質嘅格式。想當年嘅 DivX 3, 已經睇唔返，好彩有壓埋 MPEG-1, Standard 始終係可以經歷時間嘅洗禮。

近排一段 Steve Jobs 响 Stanford 嘅畢業演辭响 Facebook 輪迴. 我哋當然請唔到佢，但係有 Kent Beck 坐陣，都唔失禮。

http://blip.tv/file/4434254

P.S.: 差少少唔見咗呢一段回憶，好彩到最後都搵得返。

歲月不饒人

今日响 Data Center 度等開工，發呆之際電視做緊放學 ICU, 睇吓譚玉瑛姐姐重响唔响度。發覺，係就係响度，但以乎有少少滄老。睇見上嚟嘅嘉賓，個個都後生過佢，個個都係睇住佢嘅節目大，究竟嘉賓會係乜嘢感覺? 會唔會同佢影相，又或者攞簽名?

譚玉瑛姐姐係香港人嘅集體回憶。

學店

直資學校，以商業模式運作，咁同私校有乜分別?
係咪因為教育局無指引，就可以亂洗錢?
如果學校唔能夠以身作則，咁點辦教育?
教育界嘅立法會議員剩係識鬧教育局無監管，而唔討論校方嘅責任，又係咪合理?

低頻超音波驅蟲器

食完飯，去貢茶買咗杯珍珠奶茶。返公司途中，經過間戴住個耳咪做推銷嘅舖頭，眼尾一掃，個產品叫「低頻超音波驅蟲器」。

睇嚟起名嘅人要接受再教育先得，超音波英文係 Ultrasound, 即係因為空氣嘅震動頻率太高而普通人聽唔到嘅聲。所以，超音波無可能低頻，咁呢件產品，驅唔驅到蟲，就真係唔知。

Best Man

友人結婚，第一次做伴郎，不過前晚唔太夠瞓，今日又要一早起身，只可以用五成狀態出現。不過，婚宴只係 Buffet Lunch, 五成夠用。證婚議式又有兄弟們用泡泡槍噴泡泡贈慶，效果唔錯! 只可惜相片欠奉，有時間嘅，就只係得呢幅。

完場，幫忙搬運婚宴物資後，去咗今日最後一日嘅頁茶 claim 一杯十送一嘅飲品，心曠神怡，體力勞累完後嘅滿足。

火中取栗 - 續集

唔知幾時開始，唔係太相信所謂嘅價值投資。可能係宏利跌得太勁，同股票談戀愛原來係一件咁危險嘅事，好彩都叫做低買，佢跌剩高峰期嘅1/3時，我都只係損失咗1/3, 低息環境，無計. 睇咗個市咁多年，原來最可靠嘅，似乎係最簡單嘅常識。

對渣打試驗咗兩次，見太高嘅時候，再睇一睇技術指標，再高價出售。其實唔係有心放曬，只係佔個組合比例唔細，做少少風險管理，唔係跌嗰陣其實都幾係嘢。萬一再升嘅，其實都賺唔少，月供時可以再買得返。跌咗，再留意住一個啱嘅價位，到位就入。不過，就似乎係渣打咁跟技術走位，未夠膽試其他。不過，試兩次都成功，好滿足!

以前嘅火中取栗係想賺快錢，今日嘅火中取粟係避風險。

再見 HTC Touch

用咗 HTC Touch 都有 3 年幾，係買俾自己嘅生日禮物。呢三年有樣嘅好不滿嘅係打字嘅方法，個手寫識辨又唔似 Palm 嘅 Graffiti 咁可以唔駛睇住都寫到字，個 software keyboard 又細，要用 stylus 打先打到，重要支 stylus 鬼咁易爛，3 年換咗兩支，最後放棄埋 stylus. 打字真係粒粒皆辛苦。

Sliding keyboard, 正!

Keyboard 令機身厚咗少少，但非常值得!

但係真係好細部，一張咭片都大過佢。

比 HTC Touch 順咗好多，但係好似 Windows Mobile 對我嚟講 friendly 少少，尤其係無 Hardware 嘅上下制，焗用手指去 scroll 個 touch screen... 真係白痴!

李氏力場

城市傳聞，香港首富研發咗一套系統，阻擋颱風嘅吹襲，以免降低生產力云云。雖然傳聞歸傳聞，但今年嘅颱風路線實在太迀回，力場之說，不無道理。

好多人都話力場攪到打工仔無得放假，但係咪反過嚟諗，香港係一片福地，巨大天災欠奉，大家先可以安安樂樂咁生存。假如強颱風真係吹埋嚟，低窪地區又水浸，樹又㝝幾棵，到處山泥傾瀉，D 玻璃幕牆又爛到滿天飛，都幾大吉利是。都唔好話吹到正，台灣俾個雨帶掃一掃都已經出曬事，所以都係唔好打風好!

國際大都會

地鐵出事，個個上地面搵接駁巴士，迫得就迫，無人識得排隊。究竟，係香港人染上咗大陸人嘅陋習，定係其實香港唔係我哋想像之中咁文明? 下次話大陸人唔文明之前，我諗好多香港人都要諗清楚自己係乜嘢人先。

香港政府以鐵路為主要交通工具嘅政策，係又咪要檢討吓? 一係無事，揩親都係大鑊嘢。

The Perfect Balance

原來我個 Portfolio 係安排得咁微妙，個市升，佢嘅價值會升，個市跌，價值依然係升。

巴士奇遇

响灣仔搭26號返公司，臨落車嗰陣，有個婆婆唔太識落車，又堅持佢要去嗰度附近有個巴士站，但實情我住咁耐都唔覺有，唯有揀一個最近同可以行得最舒服嘅站 (其實都係二揀一) 同佢一齊落車。

雖然婆婆話佢唔係好行得，但就好好中氣話自己搭錯車云云。由街頭行到街尾左右，都只係一分幾鐘就到咗，要離開，隨住婆婆嘅一連串祝福語，一切回復平靜。唔知婆婆會點返屋企呢?

成熟

做 Training 時同班新畢業嘅人熟咗，發覺自己好似係八十前出生，八十後嘅心。究竟由 Day 1 開始，我有無改變過呢? 呢個係十份值得思考嘅課提。

雙面刃

每隔一段時間，都會有去意。返咗嚟香港九年，究竟呢九年嘅經䌞，係有價值，定係負累? 隨手上 jobsdb 搵吓，原來都有唔少好工喎! 係咪可以考慮，就真係要考慮考慮。

怪物小王子

怪物小王子曾經係細細個日日追嘅卡通片，原來係同叮噹同一個作者，响土豆睇返嘅時候，原來已經有唔少叮噹嘅影子。得閒可以再回未近三十年前嘅作品。

真人版，搵一個大人嚟扮怪物小王子，好似唔係幾妥。不過日劇精彩嘅地方，就係將一 D 日本社會嘅核心價值融入任何提材嘅劇集。如果要搵返當年嘅童真，真人版唔係太啱，都係睇返卡通好 D.

This Is It

Michael Jackson 嘅遺作，似乎製作單位做咗唔少 Making of. 姑勿論製作單位嘅用意，出嚟嘅效果，係一粒星嘅光芒，响綵排嗰陣已經發揮到專業水準，我鐘意!

環保雜談

呢篇文係因堆填區而自我思考所寫，大家可能會覺得無咁誇張，但請以各位細心諗諗有乜可以由自己做起。

聽咗厄爾尼諾同拉尼挪咁多年，我都唔知係乜嚟。但今年會係一個比以前凍嘅冬，我反而明。

話說墨西哥灣至歐洲，響海度有一股暖流，叫墨西哥灣暖流(Gulf Stream)，會將赤道嘅暖水帶到歐洲，令歐洲嘅冬天無咁凍。科學家話今年呢股暖流減慢咗，即係話歐洲會凍咗，如果全球以一個整體嚟講北迴歸線以北嘅平均氣溫係下降。咁以下就係以常識推論到嘅事情:

1. 凍，就自然會開暖氣，越凍就會需要越多能源去保暖。
2. 95%嘅能源係嚟自石化源料 (石油、煤、天然氣等)，而用石化源料產生能源係大量二氧化碳嘅成因之一。
3. 即係話越凍，天氣越凍，就會越多二氧化碳。
4. 二氧化碳係溫室氣體，過量嘅溫室氣體令地球表面溫度不斷上升 (呢個我諗大家都明)。
5. 地球表面溫度上升，令兩極冰層溶化，海水鹽份亦會淡化。
6. 正正因為海水鹽份被淡化，墨西哥灣暖流亦被減慢，令歐洲更凍。
7. 返迴 #1

再返去北迴歸線以南至赤道，因為有部份熱能無北上，近赤道嘅海水溫度自然上升。

1. 而海水溫度上升，係造成颱風嘅成因之一 (咁睇嚟我哋嘅風季睇嚟會長咗同多響打風，李氏力場應該有失靈嘅一日)。
2. 颱風多雨但打唔到入內陸地區，所以水災會響沿海發生。
3. 偏偏北迴歸線以北嘅一片歐亞大陸好少海邊，當水份留響沿海地區，內陸地區自然會出現旱災。
4. 不論水災旱災，都會影響農作物收成，咁距離饑荒還會遠嗎? 
5. 北迴歸線以南至赤道又䁔又濕嘅時間長咗，最啱微生物滋生嘅機會又多咗，咁距離瘟疫又會遠嗎?

科學家話，當墨西哥灣暖流停止嘅時候，就無法逆轉，到時極端天氣就會因為大氣同海水嘅能量失衡而更嚴重。你想下一代活於一個水災、旱災、饑荒、瘟疫嘅世界嗎?

註:
墨西哥灣暖流嘅成因係 Greenland 嘅冰塊溶解時，將海水溝淡咗，物度比較低。By diffusion, 高濃度嘅暖海水會響海面流向低濃度嘅海水再沈底，低濃度嘅凍海水自然就會由海底被推向另一邊，因而造成墨西哥灣暖流。

心曠神怡

一個將軍澳堆填區，攪到滿城風雨。對於一個由政務官做特首嘅政府嚟講，穩穩陣陣，乜都唔做係最安全嘅做法，所以所有嘅政策，都欠缺願境。減廢政策，一於零教育、零獎勵、零罰則。

班住响堆填區「豪宅」嘅人有夠無聊，李生一句心曠神怡就搬入去住，家陣响度嘈，乜當初無實地考察先搬?

响一個主張消費嘅資本主義社會，垃圾廢物只會有多無少，今日嘅情況，大家都有份做成，無得怨。

Slashdot 2

非常精準嘅 Slashdot comment:

http://hardware.slashdot.org/story/10/10/11/1838252/High-Tech-Microphone-Picks-Voices-From-a-Crowd

The quick breakdown of responses on Slashdot:
The last remaining nerds on Slashdot who actually like technology: "Sweet! That's an impressive display of audio recording techniques!"
The paranoia crowd: "ZOOOOOOOMG that means THEY(tm) can listen in on you! Then they're already stealing your identity to impersonate you! MY PRIVACY IS AT RISK OHNOEZ START REBELLION NOW PLZ KTHX"
The audiophiles: "Pfft. Everyone knows you need at least 560 microphones and analog pickups, else you'll clearly lose so much quality as to be unlistenable by any but the most primitive and underdeveloped of eardrums. Plebs."
cencithomas: "WHERE DID THE TEN MICROPHONES GO?!?"

更上一層樓

今年有好多意想不到嘅支出，個股市又傻吓傻吓咁，要儲錢實在係舉步為艱，但原來不知不覺已經達到一個短期目標。係時候定下一個目標。

地膽

响地鐵走出嚟，聽到一堆人响到講點行點行，點解唔搭的士云云。於是問一問佢哋想去邊，想去「富臨」喎...

聽落好熟，但係唔太記得响邊，跟住佢哋問上環街市响邊，指咗個方向之後，佢哋已經行開咗。過多幾秒，先記得原來富臨就係屋企對面間酒樓，即係話呢間酒樓，對於我呢個老街坊嚟講，似乎唔係一個值得記得嘅地方。

萬里路

原來我其實都去過唔少地方

Another Example of Retarded Human Being

一個唔知有無人搭嘅高鐵，26 公里造價 669 億，平均每公里差唔多 26 億。
一個講咗好耐，可以舒緩南區對外交通嘅地鐵港島南線，7 公里 100 億，平均每公里 14 億多少少。

如果依超支比例計算，高鐵分分鐘成千億先埋到單。如今竟然有當年支持高鐵嘅人話港島南線太貴，我只可以話應驗咗 Decision Science 第一堂所學到嘅事。

尋尋覓覓

呢排想出部新電話，睇緊各大電訊公司嘅 Plan. 咁多間，似乎 3 係最抵，不過有友人非常反感，題醒我上次响英國收到嘅 Roaming 嘅恐嚇短訊，最終打消咗個代頭。

成條數計落，如果我唔用 Data Plan, 自己買電話係最徍選擇，呢吓就好在乎我係咪肯去用每個月俾多 60 個大洋買個 Data Plan. 不過應該都係兩個月後嘅事，到時再諗。

口惠而不實

釣魚台，鄧小平話留返下一代人去解決，所以中共嘅政策一向都係得個講字。今次有漁民被扣押，到最後都係淪為口水戰。你有你講話係固有領土，佢有佢講話係依家辦事。而中港台三方嘅政府都想盡千方百計去阻止保釣人士去釣魚台宣示主權，半隻軍艦都見唔到。

其實如果反向思考，保釣人士應該話釣魚台係日本嘅，向日本申請簽証，帶埋支日本旗去釣魚台，分分鐘有日本自衛隊護送你上岸添!

唔知鄧小平當年選擇唔解決問題，係咪預見到中國會有今日嘅國力去經濟制裁日本? 知道政治只有永遠嘅利益，中南海各高層，呢一著其實都幾高。

手民之誤

作為一個中文人，寫字要小心係理所當然。就好似你唔會話:「我從小便...」但前幾日响電話舖見到:「一咭多號電話咭可以响各大便利掂買到...」我心只會諗，就算我要買，都唔會想去買。

諗到呢句嘅人，一係無腦嘅，一係太過聰明，想同顧客開一場玩笑。批呢句出街嘅高層，應該無乜點去留心睇清楚先出街。

中秋節快樂

香港人東西文化文匯嘅地方，所以西方節日有假放，中國節日都有假放。偏偏真係快樂嘅假期，都係响西方節日。例如，復活節同聖誕新年咁，聽落都已經快樂。

中國節日，例如清明重陽咁，一定唔會快樂先。端午節，記念屈原，係咪要好快樂咁紀念一位殉國詩人? 國慶佛誕勞動節... 我又未聽過國慶快樂、佛誕快樂、勞動節快樂 (政府一人派一隻勞力士大家會快樂 D)。春節，係就係快樂，但會講恭喜發財多。所以中秋節，人月兩團圓，可能係唯一可以快樂嘅日子。

雖然今晚見唔到月亮，但希望大家中秋節快樂!

時光倒流

香港勝在有 ICAC. 高薪養廉，英國人係有佢嘅辦法。

Slashdot

真係好鐘意 Slashdot 嘅 comment:

Read closer (Score:5, Informative)
by Anonymous Coward writes: on Tuesday September 07, @05:03PM (#33502368)

IT is not engineering. The two fields are not analogous

      Re:Read closer (Score:5, Funny)
      by Yvan256 (722131) writes: on Tuesday September 07, @05:06PM (#33502400) Homepage Journal

      They're digitalous?

數碼電視

屋企換咗 LED 電視，好似好多嘢睇，都係時候為部電腦加入數碼電視嘅大家庭。要求我似為好簡單，一張硬解硬壓嘅 TV Tuner.

但係行咗幾日，似乎硬解無乜可能，大部份都係要用張 Display Card 做解壓，似我張舊嘅 Display Card 嚟睇，睇嚟要報銷。硬壓嚟講，本來都無乜期望，電腦城、298問過晒，都話無。點知行行吓，見到一個 Logo 寫住 Hardware Encode?! 真係踏破鐵鞋無覓處，仲係唔駛三百蚊，即時入手!

返到屋企，換卡開機裝 Driver, 開 TotalMedia set 好晒，睇落除咗闊少少，就係多咗上下兩條黑邊，當播 D 4:3 嘅畫面，就一個大黑框，係咪係時候換返部 16:9 嘅 Mon? 另外，TotalMedia 嘅手感唔係太好，無 always on top, shortcut key 怪怪哋咁，resize 又唔識記住。總之就係麻煩。

試硬解，CPU 由 15% 變成 2%, 非常好，試硬壓，都係 2%, Perfect! 早知買隻加強版，可以做埋 capture card.

理性與感性

823事件，全城痛罵之際，有幾篇網民所寫嘅文章，話菲律賓唔可以用香港嘅標準嚟做嘢，又或者死人慘劇其實每分鐘响全世界唔同角落發生，甚至某國際巨星响微博話做乜都會俾香港人鬧等。或者，佢哋講嘅都好啱，但係太無情。

當一件事經過透過電視機實時報道嘅時候，無論事件係响偉大嘅祖國、第三世界國家、或者係香港，都會掀動觀眾情緒。其實都唔好話係一件真實事件，就算只係一套電視劇嘅結局，如果係壞人得逞，都係會俾人鬧。如今，只係透過網絡發洩少少負能量，不為過啫... 到真係做嘅時候，只不過係市場行為，就好似其他國家嘅人見到今次事件亦唔會太想去菲律賓旅行咁。我相信就算個外傭係菲藉，如果佢幫得手，都唔會叫佢執包袱。

如果覺得網絡負能量太多，可以發放多少少正能量，唔需要無情對待嘅。

蝴蝶效應 15

Butterfly Effect 總恬嚟講就係因為一個輕微嘅變化，而引致一個重大嘅改變。今次個重點，唔係個效應本身，而係想講一講超時工作 (即係 OT) 點樣改變香港人生活模式。

外傭篇:
唔知幾時，生仔嘅人都興請位外傭幫手。工作，無非為咗搵食。搵食，又無時間湊仔，唯有搵人幫手。搵上一代，計一計數，以前廿幾歲結婚，可能父母都仲係四五十歲，體力都還可以應付。但家陣卅幾步先結婚，六七十歲嘅老人家，又點幫手湊?

最後都係用錢去解決問題，請個外傭先。咪住，唔响屋企，個外傭會唔會對個仔點? 另加部CCTV先! 成件事都係資本主資，用最少嘅錢基於零信任做事。質素，大部份都係嘛嘛囉! 你聽過幾多人話請嗰個外傭無問題?

你，又幾耐無星期日去中環悠閒地行一趟?

鬧劇 悲劇

一向對東南亞無乜信心，所以從來未踏足過，經過今晚，我諗我嘅信心都唔會有乜嘢改變。

菲律賓旅遊巴被脅持，一場一場嘅鬧劇响半個鐘內陸續上演:

1. 班警察無能地想入巴士
2. 匪徒開槍後，出現幾聲大笑
3. 個鏡頭 zoom 埋去條屍度，TVB  個女主播重要話見到有隻手但無動靜
4. 突然一陣煙出現，車門出現另一條屍體，女主播再度描述
5. 一陣煙後，匪徒原來已經被殺
6. 之後，有幾個人質行出巴士，咁個司機點解要話人質死晒?

最後，記者蘇敬恆做報道，係成段新聞最 Pro 嘅一刻。

英法之旅 - 後記

今次旅程，除咗師弟，重有師弟嘅父親。師弟父親因為打波整傷咗隻腳，行動有少少不便，因為咁，行程有少少改動，旅程放慢咗，但睇嘅嘢反而多咗。或者，响匆忙嘅城市生活，有時係需要放慢，停落嚟，諗一諗之前嘅計劃係咪合附需要。亦因為師弟父親係退休警察，所以所聞亦都多，亦有好多故仔聽，係今次旅程嘅其中一個得著。

其他記事

• HSBC 攻佔咗各地機場
• 倫敦唐人街無早市，唔好諗住過到去飲早茶。
• 梵爾賽宮個後花院係唔駛錢，如果對入面大量嘅畫無興趣，大可以唔駛排隊去皇宮。
• 就算真係要入皇宮，下晝去會好 D, 因為唔太有人排隊。
• 去到巴黎市中心，差唔多有景點都行得到去，當然可以搭一兩個站嘅地鐵亦得。
• 一定要買 Museum Pass
• 強烈建議去巴黎嘅人一定要去鐡塔睇夜景，除咗有景，個氣氛好似嘉年華會。地鐵12點尾班車，所以唔駛驚無車返酒店。
• 之前去過北京，今次去倫敦同巴黎，呢幾個城市都有地鐵。咁多個城市，香港似乎係最好，倫敦次之。
• 帶支全鏡景去影相，原來可以吸引唔少人嚟搭訕。
• 倫敦、利物浦同巴黎唔知點解都有摩天輪
• 一定會再去倫敦
• 巴黎人真係當你識法文，唔會好似雅典咁，一知你唔識當地語言就即刻轉到 channel
• 原來瞓响巴黎鐵塔附近嘅草地係一件好舒服嘅事。
• 返咗嚟香港兩個禮拜，日日都有唔同嘅 The Phantom of the Opera 嘅歌响腦海浮現。

港男

剛剛跳去睇 TVB, 原來做緊港男，係一個打功夫嘅環節。港男們徒手劈冰塊同火板，開頭有版有睇，但劈冰嗰吓有一個就咁輕輕壓一壓塊冰就散，都真係兒戲。

之後個教班港男功夫嘅女教練出嚟耍功夫，先至係專業，夠 Man 兼夠 Pro, 班花拳繡腿真係行埋一邊。隨住要聽客戶嘅說話，我都起錨去熄電視。

天朗氣清

今日上個客度，佢坐間房有個落地玻璃，望到對面海。一入到去，個天好清，一 D 矇嘅感覺到無。如果放假嘅話，我諗去出咗去影相，不過可能熱少少。

見完客，有少少時間，買杯珍珠奶茶，行去電腦城買部 Laser Printer. 最細嗰部，貴少少，盛惠七百五。

放工，食少少嘢休息一陣，睇咗一陣電視。有精神，體力好似幾 OK, 走去做 Gym. 跑 40 分鐘先得嗰唔夠400 Kcal, 都唔夠食100克嘅零食。有少少無耐，但係做完運動，個人真係好舒服。

英法之旅 - Day 7

唔經唔覺到咗最後一日，聽日就要返香港，要去晒梵爾賽宮、羅浮宮，同埋影夜境。

去到梵爾賽宮，先去買張 Museum Pass, 咁一陣去羅浮宮就唔駛再買，32歐羅做入場費之餘買個方便都好。入去皇宮前，先要排一場隊個安檢。好鬼多畫，有掛畫、壁畫、天花畫，所有房都有浮雕，真係豪華，不過竹找唔識欣賞。出返去花園就唔同，一望無際，綠草如茵，靚好多。原來去花園唔駛錢，早知响出面影相好過。

之後去羅浮宮，見到 D 原本應該响雅典見到嘅宙斯廟，似乎法國都搶咗唔少嘢。重點係睇蒙羅麗莎真跡，好多人影相，但又鬼死咁遠，都唔佑點欣賞，睇嚟都係影相返去睇。跟住係維納斯像，其實個館有阿波羅像、雅典娜像、戰神像等，唔知點解維納斯咁得人喜愛。

睇完一邊館，原來重有兩邊未睇，不過相機好似無乜電，打個轉好。一入到去，似乎都唔少嘢，但係行咗成日，我同小師弟都無力支持落去，睇咗一半，閃! 出到宮外，睇金字塔，做 D 遊客影相 (用手拎住金字塔之類)。

八點幾師弟話相食正宗法國餐，但我相影夜境，唯有分頭行動。相機電池要急差時，去咗一間叫 Quick 嘅地道快餐店，食咗個魚柳包，好食過 M 記。原來黃昏境都唔錯，急差完影幾張先。買咗張 Metro Day Pass, 先去鐵塔，再去凱旋門，跟住係協和廣場，再到羅浮宮，最後係歌劇院。除咗梵爾賽宮同埋聖母院，呢兩日嘅所有景點都去晒，好滿足!

明日: 回程

英法之旅 - Day 6

早起上網，十點左右出門，一出酒店，有麵包香，入去食早餐，食咗個正宗法式牛角包，正! 行幾個街口，就到歌劇院。影完相，坐的士去凱旋門再影過，影完就漫步香舍利謝大道搵食，食咗個雞胸餐，俾錢嗰陣，俾咗張磅出嚟，最後變咗個貼士，Shit...

行返去協和廣場，見到巴黎鐵塔，以為好近，點知望山跑死馬，最後都係坐的士去。去到塔底，感覺係一座生鏽嘅高塔。不過都係要影，本來想坐電梯上塔頂，但係超多人排隊，但係又約咗師弟父子兩個鐘頭後。第一件去洗手間先，又有人排隊，有男有女，以為得一個廁所以際，有個男人衝咗落去，睇睇吓，原來有男廁。

兩個鐘流流長，最適合影 time lapse. 有個腳架仔，放响欄杆道，原本打直放，但用嚟做 time lapse, 又好似怪怪哋咁，都係再較返橫放。中途都真係唔少人郁到個欄杆，但無計，希望效果 OK.

今日本來要去羅浮宮，但已經五點九，應該去唔到，唯有去聖母院影到此一遊嘅相。

今日係無帶個全境鏡，Otherwise 會有好多意想唔到嘅相。聽日，梵爾賽宮。

英法之旅 - Day 5

差唔多10點先起身，梳洗完，急差 netbook, 電話。早晨大餐，有公仔麵、蒜蓉包、煎蛋、焗薯、羊扒、蘋果、Yogurt, 總之呢幾日買嘅食物都有，食得唔好嘥。食完清潔完，Check-out 搭的士去火車站，等去 Manchester Airport 嘅火車。

去到機場，臨出火車站，個票務員話張車飛唔啱，原來噚日買錯車飛，不過最後都放行。之後就係去 Terminal 2, 不過好遠，都唔知 Manchester 係咪真係咁多人，要咁大個機場。因為都兩點幾，入閘之後買咗件 Bagel 做 quick lunch. 上到飛機，好快就到戴高樂機場，坐火車去巴黎都係半個鐘左右，不過搵的士就煩，落咗車响火車站行咗幾遠吓先去到的士站。响的士嘅時間，發覺色調唔同咗。响利物浦，建築物多數係偏紅，但呢度，建築物多數係偏奶白色。

去到 Service Apartment, 又係頂樓，不過無露台，風景欠奉，不過有齊各類日用品，Service 好似好過利物浦嗰間。攪完師弟要嘅 Wifi, 去搵食，到最後三個中國人响法國搵咗間意大利餐廳用英文點菜。食完飯，去搵吓有無超級市場或者雜貨舖之類買生果，行咗幾個街口都唔覺有，返轉頭嘅時候原來响對面街就有，真係眼大睇過龍。

返到酒店，Plan 好行程，明天又係新嘅旅程。

英法之旅 - Day 4

今日都係早起，不過就係閒 hea 嘅一日，食咗個豐富嘅早餐，之後就係上吓網咁。雖然係聽落好悶，但係呢 D 先係放假應有嘅生活。

到咗下晝，去一去離 service apartment 只有兩三個街口嘅碼頭，入咗去 Maritime Museum 睇 Titanic, 二戰大平洋戰役嘅歷史，再出岸邊影相。景就一定無香港咁豐富，但係就一望無際，都係另一種體會。

影完相，師弟兩父子唔見咗，搵咗一陣，又差唔多時間去球場，唯有坐車去球場，改參觀時間再算，希望師弟醒水。到咗球場，改好時間，無電話添，有人月用緊手機，不過係講西班牙文，問佢可唔可以俾我 send 個 SMS 之際，見到有個電話亭，即刻衝過去，打個電話搵師弟，叫佢即刻過嚟。

影咗少少相，師弟到咗，亦都係參觀團開始時間，去過 Press Room, 更衣室、球場，原來咁就成個鐘，時間過得真係快。坐車返歸，去返碼頭睇吓有乜好食，不過真係無乜好食，師弟再下廚。不過係羊扒，唔係咁啱食，但有薯條同埋幾包公仔麵，加包菜同隻蛋，都幾 OK.

兩日無月瞓太多，洗完碗沖完涼執完嘢，瞓覺。突然半夜4點，3打嚟講 roaming 嘅事，又話我有 local call 云云，真係無乜興致同佢講，返到嚟先同佢計數。

英法之旅 - Day 3

Somehow 瞓唔得太著，八點幾就晒咗，上網 check 吓 email 睇吓 website 咁。九點鐘左右就換衫，準備出發去格林威治子午線。搭地鐵，轉輕鐵，唔駛一個鐘就到咗格林威治，再行多十五分鐘左右就到子午線。子午線响皇家天文台入面，响一座出丘度，响山丘頂，視野遼闊，加上天氣良好，景色治人，係同平時不一樣嘅風景。

因為時間緊迫關係，好快咁參觀咗天文台入面嘅時間博物館，影咗幾幅相，就要離開。去火車站途中，買咗個簡單嘅 Lunch, 一個焦糖嘅 Bagel, 再加一個三文魚長麵包三文治。今次輕鐵坐車頭，有多少少嘅風景睇，呢度嘅輕鐵其實係同機場嘅無人駕駛差唔多，個司機其實只係負責檢查車飛。返到酒店附近，解決咗個 Bagel 先，咬第一啖，除咗有焦糖，原來個芯係煉奶，超甜超好食。返到酒店房，完成埋個三文治。

十二點半人齊，去火車站，出發去利物浦。兩個鐘嘅車程，瞓到一陣。到埗嘅第一個感覺，係一個好舊嘅城市，大部份都係紅磚砌出嚟嘅屋。搭的士去酒店，其實係 service apartment, 住响頂樓，有廳、有廚房、有露台、重有免費 wifi, 速度亦都一流。因為係頂樓，所以無遮無擋，對住間大教堂，即刻差電準備影 time lapse.

去超級市場買晚餐，師弟下廚整海鮮意粉，正比起當年廚藝有進步。食完飯，聽住海鷗聲玩鬥地主，初初玩，唔識玩，輸得好慘，第二朝早餐要洗碗。攪吓攪吓，都11點幾，沖涼上多陣網，差唔多兩點。

英法之旅 - Day 2

一早起身九點半，以為白金漢宮換更嘅步操儀式係十點，去到，好似乜都無得睇。再睇下，原來係十一點半。咁就唯有等吓，影吓相咁。影完相，好似無乜好位影操兵，爬咗上其中一個銅像，無耐就俾警察吹哨子叫落嚟，唯有响梯級邊等吓。位已經唔算好，但操操吓，竟然落雨，前面嘅一大堆什傘，好掃興。

睇完步操，再去噚日去咗乜都未開嘅唐人街飲茶，食完飯就出發去大英博物館。响博物館行咗兩個鐘，睇嘅係幾年前遊雅典睇唔到嘅真跡，例如衛城同巴特龍神殿嘅石像，再去到中國展區，睇完就好似中國剩係得佛教咁，十居其九都係佛像，其他嘅就係青銅器，唔係太覺有傳說中嘅好珍貴被搶嘅文物。

時間尚早，坐的士去 Tower Bridge, 本來想搭地鐵，但係一張單程飛都四幾，三個人加埋都12磅，唔著數。影完相，去 Oxo Tower 食晚餐。之後，再返 Tower Bridge 影 Time Lapse, 點之影影吓，無電，計劃告墔，唯有換粒電去 London Eye 再影。

影飽影夠，再搭地鐵返酒店，點知搭錯車又轉錯線，返到酒店都十點半。

英法之旅 - Day 1

同平時嘅長途機一樣，今次都係每隔一個鐘左右醒一次。到咗機場，行李好快 claim 到，機長快線亦好快到，的士都係行咗幾個街口就到酒店，只係貴咗 D. 機鐵盛惠18磅，的士就落錶兩磅，幾個街口加吓加吓好快就去到7磅幾，俾香港嘅的士見到，實流晒口水。

到咗酒店同師弟會合，沖咗個涼就出發食早餐，去咗唐人街，但原來十二點先開，可惜落雨，唔係又可以影幾張相先。之後到咗 Trafalgar Square, 雨未停，求其搵間美式意大利餐廳，食咗個 vegetarian breakfast. 雨停咗，去睇大笨鐘、西敏寺、國會大樓、同泰吾示河，之後食 lunch. 我叫咗個 all day breakfast. 個餐到咗先記得，今次係一日來第3份早餐，每份都有兩隻蛋...

食完午餐，係睇 The Phantom of the Opera 嘅時候，係今日嘅重頭戲，先去 Box office 攞飛，個票務員有少少困惑，因為佢以為 Shane 係我嘅 last name, 搵嚟搵去都搵唔到，我提佢 NG 先啱，一切攪掂。同聽 CD 唔同，歌聲語調無咁震撼，可能個咪唔係咁得。Anyway, 用5磅買咗份 Brochure. 其實重有玫塊、面具、杯、key chain, magnet, t-shirt 等等，本來無諗住買任何嘢，但俾隔籬個觀眾感染到，Brochure 好似幾吸引，所以大破慳囊。

之後再响 Trafalgar Square 影相，附近係 Britain Gallery, 睇吓，全部都係畫，無乜興趣，閃! 師弟帶路，行行吓去咗白金漢宮，影少少相先，返酒店，點知... 師弟帶錯路，要返轉頭，行咗成公里先到酒店。

响酒店上上吓網，個 3G 手指話有 SMS, 一睇，佢話我用咗 14MB, 要俾成千幾蚊?! 有無攪錯，一早 apply 好任用roaming, 做乜出事...? 唯有去 3 網站投訴。

結括嚟講，今日景點超額完成，係 3G 手指有少少唔安樂。

英法之旅 - 序

本來呢個旅程係去紐西蘭滑雪，但係個 Travel Agent hea 咗我成幾個月，咁啱師弟話要放假，想去歐洲云云，不如就交俾師弟攪。成個 planning 就只係上咗去佢屋企傾咗一晚，一個禮拜多少少就攪掂埋機票。

第一件買咗嘅係部新 Netbook, 舊嗰部响新嗰部買咗無耐後壞咗，天意。
但係絕大部份嘅事都係今個禮拜先攪掂，買新相機 (天意?)，攪 3G 手指 Roaming (俾北京之旅啟發)，買英磅、歐羅，買 Netbook 套，攪國車牌 (雖然唔知有無用)，訂 The Phantom of the Opera 嘅飛 (可以訂到頭十行，不過係下晝)，好彩呢排都係見灣仔客，可以順路攪埋 (又係天意?!)

原來一切唔响自己掌握，其實唔係咁差。

明買明賣

原來乜嘢叫出售客戶資料，對於一間控制近二百萬用戶嘅公司嚟講係咁難去定義。

將四千萬除二百萬，只係二十蚊。大家嘅私隱都真係夠平。究竟，用八達通嘅人係客戶，定係買私隱嘅公司係客戶?

走馬看花

一場嚟到北京，想去長城。買咗火車飛，見有兩個鐘頭剩，去天安門廣場行吓。

但成個廣場好鬼大又好鬼晒，行吓影吓，已經差唔多夠鐘，想趕返酒店拎遮，點知連影相都唔見埋。最後，亦趕唔到班火車，亦無咗响廣場影嘅相，同埋响香港機場影嘅 Time lapse. 剩返部低 grade 嘅 Cannon 機，都唔算 Total loss.

去 KFC 食咗個午餐，去睇吓水立方同鳥巢都好，出咗車站，又行一大餐，好彩帶埋遮，唔係真係曬死。影唔夠幾張相，部 Cannon 機話無電，似乎今日不宜出門，唯有爭取影最後幾張再折返。

返到酒店，其實都幾攰，响酒店附近食個簡單嘅晚飯算數，食咗個雪菜肉絲麵，好好食，再飲一杯沙冰，正! 沖走晒一日嘅悶氣!

Lesson Learned:

• 去任何景點都要帶遮，所有景點似乎都係無遮無擋，响天安門場曬咗個半鐘係一件苦事。
• 去長城前唔好去任何地方，先唔講趕唔趕火車，畢竟長城都係一個需要體力去行。
• 相要每日抄返落腦，唔理張 SD Card 有幾大，部相機唔見咗就乜都無。
• 北京空氣好差，剩係行咗幾個地方，鼻腔入面嘅污垢係灰黑色。
• 唔見嘢可以去北京市公安局《失物招領》網頁登記。
• 雖然北京地鐵去邊都係兩蚊，但係唔代表賣出嘅車飛可以各站通用，即係 A 站買嘅飛唔可以响 B 站入閘。當然，可以去返原本個站退錢。

希望遲 D 有機會去長城。

母難日

三十一年前，响英國利物蒲一間醫院，一個又瘦又黃嘅 BB 出世。想當年，嘅一位年輕嘅母親，到今時今日已經退休。出入醫院、牙齒脫落、白髮、皺紋，體力亦大不如前，但依然要為兩個仔粗心。

好想做 D 嘢...

馬後砲

車公真係好靈，唔信你睇嚇今年劉皇發幫香港求咗支乜嘢籤:
五三簽．中籤
　　　睽別家園歲月多，不知家內若如何；
　　　昨宵一夢真端的，今日人傳信不訛。
解曰：先難後易．凡事可許．
斷曰：家宅中平．佔病拖延．自身不錯．出入平安．婚姻合．求財有．
　　　夢信相合．有祖蔭．先苦後甜．有福份．

對民主黨:
爭取民主廿幾年，民主黨提出嘅區議會方案，本來係發夢先有得諗，跟住傳信人梁愛詩話 OK, 成件事就掂曬. 先難後易成真，共產黨對民主黨凡事可許還會遠嗎? 睇嚟有份大禮(回鄉證?)好快會到手。

對香港政府:
由五區公投、到落區起錨、最後余曾辯，因難重重，曾特首想政改方案通過真係發夢。跟住傳信人梁愛詩話 OK, 唐英年响何俊仁確定民主黨會投贊成票，一切水到渠成。先難後易成真，民主黨成為建制派時重唔係凡事可許?! 即係廿三條會好快打到嚟...

民主與公義

在香港生活安穩的人沒有資格說不要民主，因為他們正是在不公義社會下受益的一方。只用口說不要民主，而不移居的人，比正在以抗爭去爭取公義的人可恥。

User Friendliness

部新 Netbook 俾咗啊媽用，部 Netbook 係 Windows 7, 絕對係 User Friendliness 嘅測試。三個問題:

1. IE 8 度搵唔到「加入我的最愛」
2. 唔知左下角係 Windows Logo 即係以前個「開始」
3. Click 完「開始」搵唔到「關機」

測試結果: D
評語: Windows 7 唔太適合俾用開 XP 嘅人用

噪音

某些 DJ 喜歡製造沒有營養的噪音，今日，一個平庸嘅 DJ 訪問一個 YouTube 剪片人。DJ 將剪片人讚得天上有地下無，但只係顯得 DJ 嘅無知。零晨一點後再無電台聽。

通天奇兵

好耐無睇過戲，今日可以日少少收工，食完飯，又唔想返屋企住，去睇睇有無七點半睇。七點八開戲，有半個鐘頭剩，週圍行嚇。原來 IFC 有個平台對海，幾靚嚇，吹嚇海風，幾舒服。行嚇行嚇，入場。

《通天奇兵》，係細細個同屋企人睇亞視嘅美國電視劇，之前通常都係《信不信由你》。每逢星期六食完飯，成家人就對住部電視。今次睇戲，都係抱住懷舊嘅心情。同幾十年前一樣，無冷場，緊張之餘又攪笑。水牛同鈍胎都幾似以前個樣，但霹靂仔同喪榮都唔太似樣。片尾睇完 credit roller, 見返原裝嘅霹靂仔同喪榮，但都唔係太認得，因為都老咗，只好嘆一句歲月不曉人。

唯一美中不足係之前飲得太多水，中間 D 爆笑位忍得幾辛苦。

原地踏步 vs. 行差踏錯

一場政治辯論，推銷員對大律師，政治家響一個鐘入面有三個重點:

1. 大律師及其夥伴太激進
2. 今次嘅方案比2005年嘅方安係一個大進步，因為新增嘅功能組別係由市民選出嘅區議會議會選出嚟咁大把
3. 唔通過今次嘅方案，下次嘅方案都係咁

雖然唔係乜嘢好強嘅論點，但大律師道出一句：「寧願原地踏步都唔要行差踏錯。」一個近乎常識嘅道理，將所有指控、威嚇一掃而空。

一個推銷員做咗幾十年政務官，可以做好政治家呢份工嗎?

閒日

好耐無出過灣仔行，趁今日得閒，落去行吓灣仔電腦城，睇吓有乜新嘢出。行嚟行去，都係睇 Netbook 多，想換咗舊嗰部，兩年前嘅貨仔行得實在太慢。一向都係想買部有 touch screen 嘅 netbook, 但呢 D 係 rare item, 少之又少。行吓行吓，見到 Lenovo 出咗部 multitouch, 1.5kg, 8 cell 電池聲稱可以用 5-6 個鐘，唔駛四千，可以買嚟玩吓。裝機需時，買杯思樂冰去188打個轉。

原來我都好耐無去過188, 好多舖都唔同晒，Wii 有幾隻好似幾好玩嘅 game 出咗，入舊 CD 舖，見到 Beyond, TRF 等嘅 CD. 好懷念以前嘅日子，差 D 又買咗返屋企，但諗到無位擺，放棄。原來咁行行吓，都可以行到一個鐘，返電腦城拎貨。

拆盒，第一個問題係個 touch screen. 一定要用手指，要習慣吓，又或者整支 stylus. 其實唔應該貪個 multitouch, 對 netbook 嚟講根本無需要用，突然間覺得自己攞嚟煩添。

立此為證 3

Just in case 有人違背選舉政綱，我會送佢一程。

斷章取義

曾蔭權說，根據浸會大學香港過渡期研究計劃研究主任戴高禮教授(Prof. Michael DeGolyer)關於香港政制的民意調查結果

有六成受訪者同意泛民必須妥協(compromise)，因為香港需要政改，更有接近四分之三(74%) 的受訪者明確表示，香港的政制應該「循序漸進改革，好過原地踏步」。

民意調查，聽人轉述，不如自己去睇。當中問嘅問題內容，係可以對結果作出關鍵作用。點知一睇，就知乜嘢係政府點樣玩弄民意。其中有一
條係咁: How strongly would you agree or disagree with these statements for against reform:

只係提偏向自己嘅意見，唔提

1. 有 56% 支持 2012 雙普選
2. 有 46% 覺得政府經常假諮詢，所以必須要反對政府嘅議案
3. 有 56% 人唔覺得泛民阻延民主進程
4. 有 62% 人唔覺得支持泛民等如激進同製造混亂

要思考嘅係點解大部分人要求必須妥協，又必須反對政府嘅議案，係咪即係話妥協係要有底線呢? 另外，「循序漸進改革，好過原地踏步」，但工能組別同地區直選比例不變，市民係咪覺得循序漸進呢? 呢個又係一個政府要思考嘅問題。

特區管治班子患嘅係偏聽病，呢個係理想嘅管治嗎?

註:民意調查結果原文

道具

好耐無睇香港嘅電視劇，呢排睇緊《談情說案》，响一間小學校長室入面，放嘅竟然係 TCP/IP 同 FoxPro 嘅書?! 唔怪得响劇入面，呢間小學係名校...

The Right Balance

友人說:

我贊成將新政改方案作公投! 我相信大多數市民會贊成的! 但是，儘管大多數市民贊成又如何!? 社會上總有些不理他人感受和自私的人! 試問最終完美的雙普選實行之後，被選出來的特區首長也總有那些不投他/她一票而反對他/她的人，那普選的意義在於什麼呢? 不是應該小數服從多數嗎? 是! 但那少數的人會服嗎!? 當前利益關係的存在，人的自私心總是叫他人感到可悲和可恥!

一個民主嘅制度，係一個市場主導嘅政治遊戲。要得到利益，就要執政；要執政，就要得到市民支持。

嗰 D 少數人，响外國叫做反對黨。佢地根本就係為反對而反對，但他朝有日，反對黨可以變成執政黨，叫政黨輪替。到執政嘅時候，如果佢地可以執行到佢哋做反對黨時嘅訴求，自然可以得到支持，反之另一次嘅政黨輪替會再出現。咁反對嘅聲音就唔會變得脫離現實，社會亦只會越趨穩定，此乃長治久安之策。一個完善嘅民主制度，係可以平衡各方利益。

反之，一個經過精密計算嘅制度，會有意想不到嘅效果。假如唔係比例代表制，社民連可能根本入唔到立法會，因為比例代表制，係一個保障少數聲音嘅制度。假如唔係比例代表制，亦唔會有變相公投，因為比例代表制，將選區由數字縮減至5個，如果分返做18區，甚至單議席單票制，根本達唔到變相公投嘅效果。說穿了，比例代表制，目的就係驚親共政黨响回歸後失去支持而選用，否則，點解唔用行之有效嘅多議席單票制?

少數

六四係「極少數人發起的反革命動亂」，大概就只有獨裁政府會強調少數嘅錯。一個民主嘅社會，會專重同包容少數。

好可惜，以特首同曾局長嘅言論，香港係屬於獨裁嘅政府。

時移勢易

俾六七暴動嘅參與者話攪破壞，額外無說服力。

Learned Helplessness

友人說:

舊一代對政治，對公民權利，對社會，都表現得十分冷漠。

也許，舊的一代，成家立室，自然希望安定。
也許，舊的一代，正享受多年努力，得來不易的成果。
也許，舊的一代，等得太耐了。

但歷史巨輪不斷地轉，長江後浪推前浪。也許，舊的一代，是時候將未來交給新的一代，讓他們當家作主。

Why Not and How

友人說:

我最憎恨係一啲政棍喺度抽水,輸打贏要.. 口口聲話輸左就認,到頭來又搬出另一番說話,話自己冇輸... 呢種人,無論有冇得自己選特首/議員好,到頭來佢都係覺得自己所講所思所行都是對的... 就算呢種人俾佢真係喺一個民主制度的地方居住,佢都會為左反對而反對囉... (就如: 佢地支持布殊,奧巴馬上台,呢種人就會日日反奧巴馬, 直到佢落台為止) . 我想問: 呢啲係咪我地香港人想要既野呢.

由頭到尾，問題「點解我唔可以回歸第一日就選我喜愛嘅特首?」

選舉係與生俱來嘅權利，點解唔係回歸 Day 1 就可以選特首? 殖民地時代係寄人蘺下，但回歸後港人治港，重要受中央氣?

關政棍乜事? 但係如果要講 How.

第一，公投運動嘅勝負，Day 1 已經講係取決於簡單多數，如今係過半數投票嘅人令辭職議員返回立法會。
第二，社民連口號為「基層主導、民主企硬，旗幟鮮明的反對派」，如果唔鐘意佢哋代表你，你可以唔投該黨票，呢個係你嘅選擇。响民主社會度，選舉係市場主導，當個個都受過教育，而該黨依然有人當選，即係仍然有市場，係咪代表成個社會有問題?

香港依家最大問題係無選擇，立法會議員得一半有得你選，特首就連提名都無份。咁我嘅選舉權、提名權、被選權去咗邊?

當然，如果:

• 你願意當年董建華繼續做特首
• 你願意曾任權代表你話中國今時今日嘅成就係多得六四
• 你願意納嘅稅每月幾萬蚊俾一個唔開會嘅議員 (有十幾位，所以係幾十萬)
• 你願意納嘅稅每月廿幾萬蚊俾一個有外國國藉嘅副局長、政治助理 (有廿幾位，即係無咗半 mil)
• 你願意將你嘅最高工資定為廿蚊

我會尊重你，只希望你可以留俾弱勢(相比三百萬，五十萬人係弱勢)發聲嘅空間。

如果無得選，請轉用直接民主，由我代表返我自己。

Why and Why Not

友人說:

唔明...其實香港人憑咩一步到位2年後去直選特苜? 由英國港督時代, 港督都唔係我地選架啦..以前唔嘈,依家先來嘈要選?

選舉係*與生俱來*嘅權利，點解唔係回歸 Day 1 就可以選特首? 殖民地時代係*寄人蘺下*，但回歸後*港人治港*，重要受中央氣? 真係開玩笑!

工資還是可以的

富士康高壓管理，工人唔離開，只係為咗多少少嘅工資。人生充滿選擇，點解工人有勇氣去結束自己嘅生命，而唔去辭職? 低少少嘅人工，比死亡更可怕嗎?

Tech vs. Prank

真係好想睇吓部機執蛋可以執得幾快

專業

專業，係需要知識。可惜做 Software 嘅，好多都唔係本科生，而係半途出家，响香港難以走上專業之路。就好似讀醫咁，係應該有成套嘅知識要讀，而唔係求其讀咗幾個 course 就話係醫生。

呢幾個禮拜不斷地做面試，發覺有唔同嘅人想入呢一行，有 D 係讀商科，考咗幾張 vendor cert 就話想入行，有 D 就讀電子工程，有 D 讀一 D 叫 Information Computing 之類嘅 degree. 但本科生實在係無乜，所以退而求其次，只好搵 D 識少少 concept, 有邏輯，有 passion, 醒目同知自己要做乜嘅人。

唔係本科生，就好似起樓無打地基咁，上面起唔到高樓。呢幾個月，發現原來公司有人要重新打過地基，有 D 剩係掃一掃灰水就 OK.

當然，唔係話做 software 唔夠專業，但水電通渠都好專業，此專業不同彼專業。 You can serve a customer professionally but the industry itself is not a profession.

Windows 7

MS 2010 產品系列嘅出現，令到不得不上去 Windows 7. 屋企同 Office 部腦都係 XP 機，但係 Office 部腦唔死得，唯有响屋企試裝一次，睇吓順唔順利先。有乜疑難雜症，都响屋企攪掂，包括換返 XP 嘅樣，sound card 無聲等等。

星期一晚試將，點知裝完唔夠位，星期二成個 installation rollback. 清一清個 hard disk, 星期二下晝再嚟。今日，終於攪掂晒。依家 公司嘅 notebook, office 嘅 workstation, 屋企嘅 PC 都上晒 Windows 7. 係嫌 upgrade 咗之後好似慢咗 D, otherwise, it's perfect!

自我感覺良好

選民人數: 3,373,342
公社+大專2012得票: 440,392
支持率約為: 13.06%
全港人口: 7,026,400

假設係一個全港性嘅遊行，咁星期日就有 917,301 人參與。呢一個數，只係响八九六四、零三七一出現過。建制派以及政府可以沾沾自喜嗎?

水晶球

無水晶球，係咪預測唔到未來? 但以每小時 1.2% 嘅投票率計，總投票率會係 18%. 後果係今次嘅公投運動失敗，香港人放棄咗表達嘅權利，放棄可貴嘅民主。

今日終於俾我見到未來嘅香港，就係由國際大都會變成中國嘅一個城市。回歸廿一年，香港人由自力更生，變成乜都伸手問北京攞。CEPA, 自由行、奧運馬術、世博保留香港館，咁嘅香港值得留戀嗎? 衣食足而知榮辱，點解香港社會咁發達，而唔知個醜字點寫? 難怪台灣民進黨可以有本錢攪台獨，一國兩制總設計師都真係多得你唔少。

國際大笑話

曾幾何時，政府官員、議員、評論員等，都會用國際大笑話嚟形容一件醜事。

但點解曾班子要自己製造一個出嚟? 試問點解會有一個開放社會入面嘅政府首長，會帶頭話唔去投票? 唯一合邏輯嘅說發，睇怕都係林夕响今日响蘋果寫嘅一篇專欄所題到:

一旦政府回復常態大力鼓勵我們投票，再次大力呼籲投票乃公民責任時，我們是否可按這次的變臉而懷疑，幹嘛那麼積極？莫非方案已設計到天衣無縫，所謂普選，已有天網篩選，密而不漏，安全係數與防火牆足以安居平五路，能讓你選，任你怎選，也不離北京西環的五指山？

到時候，選邊個都係假選舉。所以，聽日唔投票，就即係將香港嘅未來，完全交俾北京。破壞一個兩制嘅，其實唔係中南海，而係香港人自己。咁，你聽日係咪都係選擇唔投票?

由英國到香港

香港曾經係英國嘅殖民地，前幾日再度政黨輪替，保守黨同自由民主黨組成聯合政府。保守黨要執政嘅代價，就係改革選舉制度，由人民以公投決定。

咁香港呢? 點解香港人唔可以就選舉制度，用公投決定?

點解有人可以有 3 票分別選特首、選功能組別議員、地區議員? 而你就只可以選地區議員?

自97回歸後至2008年，12年內香港的本地生產總值（GDP）按同一價格基礎計算，錄得48.5％的實質增長，但期內全港住戶的每月入息中位數，按同一價格基礎計算卻不升反跌，由18,300元下降至18,000元（按2008年物價計算）。

如果話被選嘅人只需要向選佢嘅人負責，D 錢去咗邊，不言而喻。

我無水晶球，唔知未來會點，但依據趨勢，入息中位數只會跌。咁望子成龍嘅你，子女可以成龍嘅機會只會越嚟越細。5月16號，你會為子女嘅未來投下你嘅一票嗎?

沒有蘋果的選舉

常言道，選舉只係揀一個無咁爛嘅蘋果。今個星期日，再唔係揀蘋果。

因為今次，係一個公民投票，議題係「盡快實現真普選，廢除功能組別」

如果你想有普選，但又唔鐘意辭職嘅議員，大可以投俾《大專 2012》嘅後生仔。
如果你唔想有普選，可以投俾其他人。

公民投票係直接民主，即係自己話事。唔駛著特定顏色嘅衫、唔駛去維園、唔駛日曬雨淋等、唔駛封路、唔駛行幾個鐘、唔駛去政府總部，只係朝早七點半至晚上十點半，用幾分鐘去投票站外加幾分鐘投票，之後食飯又得、睇戲又得、落 MK 又得、返屋企亦得。

順帶一提，唔想有普選即係乜嘢:

• 你願意當年董建華繼續做特首
• 你願意曾任權代表你話中國今時今日嘅成係多得六四
• 你願意納嘅稅每月幾萬蚊俾一個唔開會嘅議員 x 10+
• 你願意納嘅稅每月廿幾萬蚊俾一個有外國國藉嘅副局長、政治助理 x 20+
• 你願意將你嘅最高工資定為廿蚊

只要你願意，我會尊重你嘅決定，你肯投票就得喇!

立此為證 2

香港從政嘅，從來都唔係政客。一個政客，响公開場合講嘢，一向都會好小心，考慮到人民嘅感受。

香港嘅政棍相反，永遠只向權力底頭。响年頭，譚惠珠响城市論壇話：「權力唔係來自人民，權力係來自中央。」

今日，田北辰响城市論壇話：「如果買居屋嘅人可以原價賣返俾政府，佢會支持復建居屋。」

田北辰從來唔駛擔心住嘅問題，究竟佢明唔明「住」呢件事，响小市民心目中係一件幾煩惱事? 拋出咗呢個方案，即係開咗一張支票，小市民就以為係真。一個接觸唔到市民脈膊嘅政棍，係咪可以入立法會? 同樣地，如果係一班叫做功能組別嘅政棍呢? 五月十六號，你會去投票嗎?

每日一字 9

有人辭官歸故里，有人漏夜趕科場

有無人知「漏夜」個「漏」字點解?

漏——是古代的計時器，就同於現代的時鐘，有沙漏，油漏，水漏之分，也就是說用容器內的介質流出的多少確定一個時間段；與很多小說中間的一柱香時間大概意思相同，都是表示一個時間過程。漏夜就是不分晝夜的意思了

Self Handicapping

噚晚學到一個心理學名詞: Self Handicapping

簡單嚟講就係當一個人覺得一件事無可能嘅時候，佢就會搵個藉口俾自己，到真係失敗時，令到自己好過 D.

就好以孫中山所講

吾心信其可行，則移山填海之難，終有成功之日。吾心信其不可行，則反掌折枝之易，亦無收效之期也

觀戰

Adobe 話 Apple 霸道，Steve Jobs 話 Flash 太慢，又趕唔上潮流，FSF 話 Apple 錯誤引導消費者。Open Letter 一封接一封。最後得益嘅，唔係各位俾錢嘅消費者。

一間科技公司，唔可以將科技應用响消費者身上，就已經係失敗。但原來，Adobe 同 Apple 都唔係科技公司，係一間設計公司。兩個 Chief Designers 响網上罵戰，最後係無好結果，因為 Design 無對錯，只有好壞，結論永遠係無結論。

CS5 已經犠牲，FSF 已經開腔, Firefox 似乎唔會 support H.264. HTML5 video 會係下一個戰場，最後犠牲者，永遠都係用家。

話事權

民主體制，最偉大嘅發明係秘密投票。

無論外面嘅人幾咁落力拉票... 又或者食咗幾多次蛇宴... 抑或係去過幾多荔枝園...

你响投票區所印嘅剔號，就係代票你神聖嘅一票。

而呢一票...

可以令你唔鐘意嘅議員下台... 可以令左右政府政策... 甚至... 可以帶領中國民主進程。

無人知你投俾邊個，亦無人可以秋後算賬。

一切一切，出於自己嘅意願，自己嘅意志，自己嘅控制。响呢個無力嘅人生入面，其中一件可以自己話事嘅事情。唔去投票，就好似放棄自己嘅權利。

5 月 16 號，你會放棄嗎?

問題

溫家寶總理講過:

在中國，多麼小的問題，只要乘以十三億，就是很大的問題。多麼大的經濟總量，只要除以十三億，就會變成很小的數目。

一個 dress rehearsal, 就攪到派飛嘅妹妹仔俾人圍，如果呢班人乘十三億，問題都真係夠大。

怪夢

夢見自己以前嘅小學，同事係其中一班嘅教師，中學嘅師弟响入面上緊堂，唔知係佢嘅婆婆定嫲嫲嘅鬼魂擔心佢中 spyware 响大堂叫我去提醒佢。

之後師弟獻計等呢位老人家走得安樂 D, 就係佢將一條問題嘅答案轉告，如果老人家要留响度，就會講唔到之後嘅答案俾佢云云，等呢位老人家知道自己阻緊孫仔學習。

究竟係呢位師弟叻，我係我嘅潛意識叻?

公平

有人說

機會是自己爭取、夢想是自己追尋的。住公屋可以靠政府，但要買樓，就靠自己的實力吧。難道從前的環境比現在好嗎？試想想，你們一出生，便有屋住、有飯吃；還有空調、電腦、手機，更有比從前泛濫的大學學位。上一代，或上上一代的人，情況一定比你們糟一萬倍，他們有投訴要走路上班，要死慳死抵，要清茶淡飯嗎？那個年代，也有達官貴人，也有外資大企，有更不完善的制度，但大家也懶理，有甚麼好怨，即管做吧！最後不是賺了你出生時便擁有的東西嗎？那請問你們現在還怨甚麼？難道特首與你對話後，你便立即可以上車買樓麼？成功的香港人從來沒有依賴政府，大家也是靠一雙手，憑自己的努力和上進，肯捱肯搏，然後打出一片天。你給我的偏不要，想要的就自取，這就是香港人的骨氣。可惜，現時已很少人談骨氣了。

但睇完，心裏又不是味兒。的確想當年嘅制度比依家更加唔公平，但係時代係要進步，唔通今時今日我哋可以容許當年嘅呂樂探長貪污? 我諗唔可能啩?

友人說

賣菜呃秤，消委會要罰
賣抽油煙機報大轉數，法庭判坐監
賣樓誤導景觀、間隔、報大面積、發水，無事
對小市民致力打擊，對大財團視若無睹
這就是香港政府。市民早已絕望。

點解香港政府可以咁不堪? 請拿出 2003 年 7 月 1 號嘅骨氣，响 5 月 16 號投票。

愛

今日第一次參加响教堂舉行嘅婚禮，比預期嚟得平淡同埋簡單，但係成個氣氛真係好正。

响婚禮度，牧師教導乜嘢係親人嘅愛，不禁想起自己係一個乜嘢人。計數唔係我嘅強項，但我好似好鐘意將所有事 Quantify 去計，好似响我心目中，數字永遠唔會呃人咁。

偏偏，親人嘅愛係無得去量化，親人嘅愛係無條件嘅愛。

都係時候學習去搵真愛。

後記: 聖詩真係好好聽!

電話奇遇

電話: 吳生，我係 $!#@$ 公司，請問你想唔想轉工?
我: 唔想
電話: 咁你嘅 email 係咪 @@@gmail.com?
我: 係
電話: 請你將你份 CV email 去...
我: 我話唔想轉工喎?!?!!?
電話: 哦哦哦，好唔該 -- cut 線 --

原來有人耳聾過我...

一語雙關

Slashdot 最好睇嘅地方唔係入面嘅文章，而係入面 User 留嘅 Comments.
一個同攝影師有關嘅報導可以係咁
Photographers Want Their Cut From Google's E-books

I wonder how this will develop.

      Re:Hmmmm (Score:5, Funny)
      by WrongSizeGlass (838941) writes: on Wednesday April 07, @05:38PM (#31767844)

      I wonder how this will develop.

      Colorfully?

            Re:Hmmmm (Score:5, Funny)
            by yincrash (854885) writes: on Wednesday April 07, @05:48PM (#31767978)
            I think this one is clearly black and white.

                  Re: (Score:2)
                  by Ron Bennett (14590) writes:

                  Especially on a Kindle.
                        Re: (Score:2)
                        by yincrash (854885) writes:
                        nah, that's a grey area.
                              Re:Hmmmm (Score:5, Funny)
                              by Vinegar Joe (998110) writes: on Wednesday April 07, @06:08PM (#31768230)

                              You guys are so negative.

由世博到微博

世博，係一個國家展示國家實力嘅地方。經過文革、經過六四，改革開放三十年，北京可以舉辦奧運、上海可以舉辦世博。一切一切，中國都好似強大。

但人權，似乎無乜進步。梁詠琪嘅微博、杜汶澤嘅微博分別被刪。經濟發達咗，科技已經可以上去太空，點解仍然容不下一兩句維權呼聲?

香港自九七後開始被大陸化，釋法、釋法、再釋法，CEPA、《珠江三角洲地區改革發展規劃綱要》、《粵港合作框架協議》，實行經濟統戰香港。好多上一輩嘅人同我講過，話香港無咗大陸唔得，無謂攪普選。

System Thinking 入面有所謂嘅 Negative Feeback, 同大家常識所認知嘅無乜分別。但成個普選 vs. 經濟，其實根本係一個 Negative Feeback: 無普選=>政府低效施政=>民怨=>中央加大力經濟誘因=>既得利益者支持中央=>無普選

如果反過來有普選嘅話，中央可能根本唔需要出手。唔係話普選一定可以救香港，但係點解要一個唔係自己選嘅人去攪攪陣? 要有普選，就要由自己開始，不論任何選舉都要盡公民責任去投票。投邊個無所謂，因為旨在選一個比較無咁爛嘅蘋果。五月十六號，為自己投下公義嘅一票。否則，廿三條立法後，大家嘅自由可能會一去不返，唔單止無微博，可能要同大陸一樣，要「翻牆」先可以睇到 YouTube, Blogger, Google.

杜汶澤响佢個 Blog 到講呢件事嘅最後一句係咁嘅

雖然多一些無聊留言，還是這裡好。至少自由。I love Hong Kong!

日劇短評

《粉紅系男孩》雖然靚女欠奉，勝在劇中刻畫出角色心理狀況好攪笑，好耐無睇過咁輕鬆嘅作品。《Code Blue 2》感覺太沉重，最近睇理《極道鮮師》電影版，好似校園劇啱我睇多 D.

二千人的反思

個 Earth Hour Time Lapse, 距離今日第三日，有二千人左右睇咗。對 Web 2.0 有更加深嘅體會。

1. Flickr 嘅網絡都幾大吓，有唔少 referral 都係相關嘅 mashup
2. 今次影唔到熄燈嗰吓，但原來咁會令著燈嘅一刻更震撼
   
   

   Wait till the end when all of the lights turn back on. Remember there are over 7 million residents.

   Oh, Wow - this is fabulous. I thought there were way too many lights for earth hour- until the time passed and they all started coming on! Fabulous idea and great execution.

   wow, when the lights came on i was amazed.

3. 無乜亞洲人响 Flickr 入面，睇嘅多都都係嚟自英語系同西歐語系嘅國家
4. 同一條片其實係 Upload 咗上 Youtube, 但 Youtube 除咗頭一日嘅 traffic 多少少，之後就無以為繼。而大部份都係由 earthhour.org 嚟，似乎 Youtube 嘅力量唔係想像中咁強大

Earth Hour 2010

因為各種意外，影唔到熄燈嗰吓。

熄燈前

熄燈後

但係，其實除咗大廈外牆，好似無乜家庭熄燈。

另，今晚帶咗部行咗 CHDK 嘅相機，試一試 60 秒曝光影維多利亞港。點知，熄咗燈都係爆光，一片白色。另一樣唔太掂嘅，係個 focus, 點影都係 out 晒 focus. 係咪 Canon 嘅傻瓜機無得校個 focus?

夢

見到朋友圓咗英超夢，不禁諗起上年嘅開恩茲之旅。究竟我重有幾多個旅遊夢呢?

1. 滑雪之旅
好耐無滑過雪，應該話自從大學畢業之後都無滑過，數吓手指都差唔多成十年，希望今年可以完成。

2. Vegas 之旅
好想睇拉斯維加斯嘅魔術表演。

3. 回鄉之旅
想睇吓自己嘅出生地英國係點。

4. 郵輪之旅
好想再去地中海，睇吓希臘嘅白色屋仔，乜都唔駛諗去享受海風。

放眼未來

大專 2012, 令小弟嘅公投狂想成真。數返時間，係後八十同前九十年代嘅後生仔，俾教改、母語教育玩殘嘅一羣。但今日可以走出嚟，做該做嘅事，十年後嘅香港，會變成點呢?

日本Cheese Cake

好耐未堂食過吉野家，排隊買餐，見到有 Cheese Cake, 連餐買都只係加多 6 蚊雞，做甜品一流!

食過正餐，甜品時間，唔太香又唔夠甜，食咗一舊唔知乜嘢落肚。其實個餐已經夠飽，呢件 Cheese Cake 攪到飽過龍添，有少少後悔。

係咪日本 Cheese Cake 唔係太啱我口味?

愛旅遊

Time sharing, 係電腦嘅名字。但當用响旅遊會藉，簡直係神奇。

十幾萬去買個會藉，原來可以因為通脹而以更高價賣返出去。即係話個會藉係免費?!

換嚟嘅係最多二千二蚊就可以每年住一個禮拜嘅四人套房，另加特價機票連行程安排，再加多每日一百蚊就可以租車，好似再加多幾十蚊有埋全日導遊。

每年嘅 Maintenance Fee 都只係二千五，同埋好似幾年交一次嘅會費，咁即係五千蚊住七晚。如果以萬五蚊做旅行 budget, 即係有成萬蚊剩去買機票同玩。如果二至四個人去，可以玩得更加豪。正!

3 vs 1010

3G 手指嘅速度，暫時都係 NextG 好。雖然 3 無 limit 個 bandwidth, 但一向得幾十 KBps. 所觀 NextG 話最多得 3.6 Mbps, 就可以俾到 2Mbps 嘅速度。

公投狂想

如果有所謂嘅公投 B 隊，將會係曾特首及一眾高官嘅惡夢。因為如果選舉一旦要舉行，特首及高官們無可能唔投票。而 B 隊嘅政綱同 A 隊一致，係要爭取真普選。結果係，只要佢哋一出現响票站，都係代表佢哋支持真普選 (除非佢哋當住全港市民話佢哋投白票)。如果唔出現，第二日又會被大字標題話唔去投票。

由以上假設，可以得出一個結論: 港島區一定有最少一個唔知乜嘢人去角逐補選

如果無公投 B 隊之餘又無其他人參與補選，成個運動就會因為被選唔係涵慨全香港而失敗，De facto Referendum 會淪為 Pseudo-Referendum. 公民黨如果堅持唔贊成有 B 隊嘅出現，而社民連又被制止出 B 隊，殺傷力比民主黨唔參加辭職還要大。

解決辦法只得一個，就係搵人個無政黨背景嘅人做 B 隊。可以係普通網民，政綱又係真普選，唔做任何宣傳，嗰五萬蚊保證金，搵返嗰十萬個厭惡民建聯嘅人，一人一區五毫子，五區都只不過係兩個半。兩個半有一個公投俾全港有機會玩吓，都好過成萬蚊起個唔知會唔會搭嘅高鐵。

People Don't Change

Heros 又完成一季，睇 Heros, 劇情從來唔係精彩嘅地方，所以都好多人睇到媽媽聲。Heros 最好睇嘅地方係寫人心點樣改變。呢一季可以睇到 Samuel 點去召集喜年華會嘅人、Sylar 點去尋找自己、Peter 點去原諒 Sylar, Claire 點去面對 Roommate 等等。

每個異能人都有改變，而下一季嘅開始，就係 Claire 講咗句 "People don't change" 之後，表演返响第一季嘅無繩笨豬跳，之後對住傳媒講 "My name is Claire Bennet. This is attempt number..." 將所有事情歸零，成個劇 loop 返轉頭，下一季重新開始。

再見蘋果佬

想當年响學校遇到一個非常之伯父嘅老師，見佢第一眼已經覺得佢好惡，求神拜佛希望佢唔好教我。當然，天主教學校對神神佛佛一慨不理，中三嗰年，就係佢教 Physics. 佢係湯 Sir, 湯應祥老師，係眾學生口中嘅蘋果佬。

蘋果佬嘅來源有兩種說法，有一說係似前學校門口有檔生果攤，學生經常見佢買蘋果。另一說係因為佢長期教 Physics, 將牛頓嘅蘋果冠為老師嘅別名。

上佢嘅 Physics 堂，真係幾特別。每每都係衝入課室就寫黑板，再加揮一揮手示意班長唔駛響鐘敬禮，成堂除咗抄黑板同睇佢對住學生嘻笑怒罵，再等佢一句：「有無問題呀?」一陣沉默，之後又一句：「梗無嘅!」再緊隨一堆理論。教電力學，雙槍將亦不時出現。有時派簿亦都唔係叫班長派，係叫人名，跟住飛簿... 命中率都有 80%, 唔中嗰 D, 唔該自己執。

當年蘋果日報創刊，一個咁惡嘅蘋果佬, 對於一班學生嚟講，無嘢好玩得過買份創刊號返學校，轉堂、Lunch time 時大家一起傳閱，大家都已經好開心。見到好玩 D 嘅啊 Sir 或者 Miss, 都會問吓佢哋有無買返份响教員室睇。中學時代真係好幼稚，亦好易滿足。

考完會考，同同學傾返，無人唔記得湯 Sir, 亦無人唔認為佢係一個好嘅老師。一個又惡又串嘅啊 Sir, 原來唔見得會係一個差嘅啊 Sir.