利利是是

正月十五，過咗新正頭，拆利是嘅日子。希望下年可以繼續逗，同事、微軟、客人全部人齊。

開工利是


同事利是


微軟利是


客人利是

跑! 跑! 跑!

上年馬拉松坐車返歸，今年返返去跑十公里賽，勉強完成。

準備
今次係零準備，新年之前大傷風咗兩次，想練都無得練。新年後亦忙於工作，最後係完全無練。可以做嘅本來係充份嘅休息，但之幾日又夜瞓，所以基本上係狀態最差嘅情況下跑。本來前一晚想早瞓，但夜鬼係早瞓唔到，由八點响床度捵到十一、二點，唔知幾時瞓著。

出發
三點半起身，食咗個包，一個柑，幾粒沙糖桔，幾塊餅。準備好所需能量，換好衫出發。坐地鐵，好多人，比繁忙時間要多，將三萬幾人响一個鐘頭內消化唔係一件簡單嘅事，但十分鐘先一班車，會唔會過份少少? 去到中環，已經無晒企位咁際，去到金鐘，全九龍轉車過嚟嘅人一條隊只係上得幾個，排後面嗰 D 真係唔知幾時先可以到維園。

賽前
响維園，見到嘅係人潮，但竟然撞到朋友，約埋賽後食早餐。睡意係有，狀態麻麻，但係幾年前跑過，知道大概情況，唯有放鬆心情享受比賽。

賽事
去到起點，唯一要提醒自己係唔好跑咁快，望住對面海嘅燈光，或者東廊週邊嘅住宅，加上微微嘅海風，感覺豁然開朗。响唯園飲過幾啖水，但可惜因為行去起點嘅路程變成代謝物，開跑時有少少便急，但並唔嚴重，因為排汗嘅關係，情況無再加深。大約十幾分鐘後去到兩公里，已經見到回程嘅人，真係好強勁! 去到四公里，折返向西行，見到第一個水站，慢起嚟回氣、飲水、繼續上路。身體好明顯好需要水，飲完水之後，精神好多。

完成
八公里，再經過水站，體力OK, 但係大腿開始酸痛，步拔要減慢。過咗東廊，响馬路見到有條天橋要上，開玩笑，好斜! 唯有硬著頭皮發力跑過。聽到歡呼聲，時鐘响五十五分跳緊，減返起跑時間，應該係五十分鐘左右完成，好成功! 越過終點，接過能量袋，第一件事剩係知道要飲水同食嘢補充。攞咗行李，坐一陣，拉拉筋，回復基本狀態，換衫洗面。

賽後
電話到，約好見面地點，同朋友加朋友舊同事一齊去天后食早餐。It's the greatest breakfast I have ever had! 友人請，多謝晒! 食完早餐，搭巴士返屋企已經八點幾，身體好似無乜事，沖涼再瞓過。

事後
痛醒咗，大腿同膝頭開始因為安多芬減少而產生疼痛，還好係一點左右嘅午餐時間。腳痛，唯有响屋企睇片，但四點左右都係被周公召咗上床瞓。再醒嘅時候已經係七點八，俾煮麵嘅味道香醒，但大腿同膝頭依然幾痛，拉筋係唯一可以做嘅事，希望可以早日康復。啊媽之後話，原來我將緊急聯絡人嘅電話，寫咗朋友屋企嘅電話... 至於下年嘛，剩係想帶相機上青馬橋影相，跑四十二公里真係唔係人咁笨。

所有跑手，不論路程幾遠，肯咁早起身落場跑，跑完又好，跑唔晒又好，都係對個人挑戰嘅羸家。

搬 Blog

心血來潮，搬返個 domain 嚟 compustar.blogger.com

新聞報導 vs. 新聞評論

星期一開始，無線嘅晚間新聞多咗 D 少少評論/分析/互動嘅部份，主播依然照稿讀，但表達得生硬，唔 Pro 得好緊要。可憐嘅係體育主播，企咗响無雷公咁遠，雖然有部大電視响側跟，但感覺好孤獨，希望佢係有位坐，唔駛企足半粒鐘。

新聞報導一向都係中立，多咗主觀成份，感覺好怪。

P.S.: 晚間新聞有兩節廣告，會唔會多咗 D?

以教論教

噚日講過，每一套戲都有一個設定嘅世界觀。有說人生如戲，即係其實每個人都有一個世界觀，我哋叫做觀念，同你觀念接近嘅人，好可能已經係你嘅朋友。當然，每個人嘅觀念唔同，但係兩個人都可以做朋友、拍施、甚至結婚 (星期日檔案講嘅異族婚姻係其中一例)。因乜嘢而令到呢兩個觀念嘅人可以走埋一齊? 我哋呢 D 唔信神嘅就會叫尊重，但係有宗教信仰嘅係會叫愛。聖經裏面所講嘅愛，除咗尊重外，亦會包含寬恕同包容，所以耶穌愛妓女、稅吏、撒瑪尼亞人等當時俾人歧視嘅人。

接受一套戲嘅世界觀，就可以設身處地感受當中嘅劇情，各角色嘅心態，我哋叫投入。當我哋投入身邊嘅人嘅世界，設身處地為佢思考，見到佢行差踏錯，會提醒佢有問題。如果宗教團體投入一班弱勢社羣嘅世界，想去救佢哋出嚟，係咪應該帶住尊重、包容、同埋寬恕去提醒佢? 一次唔得咪兩次，兩次唔得咪三次，直到佢哋「回頭」。就好似叫人戒煙咁，你都會好言相勸，而唔會落 order. 點解有信教嘅人偏偏要高調公開讉責佢哋? 又唔俾佢哋受法例嘅保障? 唯一合理嘅解釋，係呢 D 人只係得把口講愛，無實際行動，即係「口惠而不實」亦「口不對心」，到你哋嘅大審判時邊個上天堂，邊個落地獄大家心照。

Free will 係基督教其中一個信條，大概係指神覺得如果人唔係真正自由，就唔會覺得自己應該為自己嘅行為負責，好合邏輯。Free will 亦衍生出現今對自由嘅慨念，但自由並非絕對，一切基於尊重別人，例如你有言論自由但係唔可以中傷人。你可以接受戲入面嘅世界觀又或者別人嘅世界觀，亦可以表達對其他人世界觀嘅不滿，但係高調公開讉責，算得上那碼子嘅尊重? 當然，唔犯法，但乞人憎! 人家都有人家嘅自由，點解要將你嘅觀念，強加於別人身上?

家暴條例 + 波兒 = 邏輯陷阱

一套戲有戲入面設定嘅世界觀。將卡通片直接同真實生活比較，唔合邏輯。將波兒比喻人同動物嘅關係，唔合邏輯。

有人受到波兒因愛而千辛萬苦成為人而受感動，因而覺得唔應該將成人嘅價值觀套入。但係如果大膽假設: 如果波兒係男仔呢?

邏輯上如果擺愛做重點，成件事係無問題，因為呢個係卡通片嘅世界觀。如果真實世界，我相信如果一條魚為咗變成人而攪到天翻地覆，無人會接受到。亦都無人會無端端收養一個由魚變身嘅細路女。更枉論入面嘅魔法，更加係宗教團體唔會贊成嘅事，必然道出撒旦使者云云。

但成件事根本唔符合現實邏輯，而係呢部就係一部卡通片，係咪「愛」唔係重點，係根本唔應該同現實比，更枉論用嚟做論據。

如果要講愛，同性戀嘅愛同異性戀嘅愛其實有乜分別?

Cognitive Science Lesson #1: We are all retarded because our minds are so inconsistent.

16 things about me

呢篇文源於 facebook, 响 blogger post 完再由 RSS feed 返入 facebook.

規則：當你比人tag左，就要寫一篇note，內含16項有關你的事情，習慣，喜好，目標....或任何各不相干但有關你的東西。最後tag另外16個人。你必須tag返tag左你的那個人。如果我tag左你，即係我想認識你更深。為免太多重覆, tag不同類型的人

1. 無寫白話文好耐，亦都唔記得點寫。所有網絡上嘅中文文章，都係口語。

2. 我係一隻夜鬼，夜晚一兩點係最 hyper 嘅時間，四五點先會開始覺得攰。

3. 承上，一個正常人要返工嘅生活，令我經常唔夠瞓，我覺得我會有一日因為咁而暴斃街頭，但我又唔會因為呢個原因而早瞓。

4. 再承上，唔夠瞓攪到記性好差、做嘢好燥。

5. 再再承上，我係一個怕煩嘅人，亦怕有人响我面前做蠢事，尤其係唔夠瞓嘅日子，我會搵嘢發洩。當我講嘢開始有骨嘅時候，就係暴風雨嘅前夕。

6. 小弟弱聽，唔該同我講嘢大聲 D.

7. 我覺得香港人經常得把口而唔付諸實行，試過兩次同 Internet 有關嘅 breakthrough 响我面前擦身而過。

8. 除咗處境喜劇，我無睇香港嘅劇集好耐。

9. 我覺得，香港年青一代越嚟越無家教，將好多事視之為理所當然。

10. 我其中一個夢想係當我有能力嘅時候，請晒所有朋友開開心心咁去一次旅行。

11. 如果可以再活多一次，我想由中學時代開始。

12. 我好憎食煙，見到識得嘅人食煙，我都會叫佢戒咗佢。

13. 我經常對貓有幻想，嚮往貓嘅性格同埋生活，但因為環境嘅關係，我又唔會拎一隻返嚟養。

14. 呢排愛上咗 Graffiti.

15. 副修過心埋學，但係好多都俾返晒教授。

16. 如果要我講返大學教授上堂講過而又解到俾一個小學生明白嘅嘢，應該就只有 Race Track Principle, Pigeon Hole Principle, 同埋一個用龜兔賽跑講 recursion 嘅 Zeno's Paradox.

胡說八道

原來任由家鬼作祟，就可以創造出一個和階社會
籤文可能太深，但注解「內有家鬼 家宅不吉 自身不安 求財不遂」同甚麼團結、和諧原全無關係。

中國雅虎知識堂嘅正解

第二十七簽下簽

君不須防人不肖，
眼前鬼卒皆為妖；
秦王徒把長城築，
禍去禍來因自招。
求得此簽者，當知今日困境乃由「家鬼」所造成，如能接受他人意見以改過遷善，尤可有線生機；若盲目信賴自家的人，不管旁人之意見，很快便步上失敗之途。
謀望：有計劃，做事有系統，多吸取別人意見，會事半功倍，大大提高成事機會。
錢財：財運不佳，可能會有財富損失。
婚姻：感情事往往緣來緣去，所以抱平常心，觀事觀物，是最恰當的。
自身：積福行善，助人為快樂之本，大大提高人格修養層次。
家宅：彼此雖然是一家人，但慎防家中壞分子，以免受到詐騙或被牽累而惹上訴訟。
開業：避因財失義的事件發生。
遷居：遷居不宜龍年進行。留等下年吧。
出行：今年不宜旅游，以防意外生。
疾病：請養成良好飲食習慣和生活檢點。
六甲：產前做足准備工夫，以防不測。
行人：請留意消息。
訴訟：冷靜處之，小心謹慎面對。

煙花直播 + 不合格導播

睇咗幾年，咁多年來都無進步，TVB 尤其嚴重。有時候好唔明，D 導播係都要 Zoom 埋去一個大大棵嘅煙火度，個效果通常都係咁:


其實，拉遠境咪得囉，你又已經有唔同角度嘅攝影機，驚悶咪 fade 去第二部機。Zoom 近少少影兩艘船再慢慢 pan 去另一艘船又得。煙花，係要睇佢嘅宏大同整體效果，唔係用顯微鏡去睇。

講古系列 1: 無情雞 + 炒魷魚

今日公司聚餐，食到一碟雞，問起有乜意頭。我就 up 咗以前年尾「無情雞」嘅習俗。為免知其然而不知其所以然，今晚再上網查吓。

只係大致上經濟唔好嘅年尾做尾牙 (或者年尾最後嗰餐)，老闆會特別加一碟雞做餸 (以前嘅工係包食包住，今時今日大部份大陸廠都係)。開飯時候，老闆會挾件雞頭過你，話辛苦晒云云。識趣嘅食完飯後，真係要執包袱走人。無謂無世界都知你應該走，自己又賴死唔走。

亦有說會响開牙嗰日 (正月初二) 先會有無情雞出現，等大家開開心心過完年先，開市前就要執拾細遠，另謀高就。

講開執包袱，唔覺意睇到「炒魷魚」嘅典故。原來，以前嘅人執包袱，唔係執剩係幾件衫就 OK. 包食包住，無話包有被舖。所以被舖自備，到執包袱嗰陣，就要將被舖捲起。而捲起咗嘅被舖，睇落就好似炒熟咗嘅魷魚咁，「炒魷魚」因而成為俾人辭退嘅俗稱。

酒鬼無賴

標準係 22, 出事嘅司機係 93. 一係晨早流流就去飲，一係之前嗰晚飲得好夜 (通宵唔定) 同好勁啦! 政府宣傳話:「酒精害人，開車前咪飲。」但害人嘅唔係酒精，而係無自制能力嘅人囉!

家暴條例 vs. 宗教團體

美國獨立宣言基於基督教信仰，第一句就有 "all men are created equal." 但要到今日，先有一位非白人宣誓成為總統。即係話，宗教信仰只係俾一個目標大家，去完善社會制度。

如果真係 "all men are created equal", 又點解會有宗教團體，因為加入保障同性戀嘅條款，而反對家暴條例? 唔通，同性戀係錯嘅，咁保障同志亦係錯嘅，所以同志係可以被暴力對待?!

宗教，係導人向善。維持家庭價值係善，但容許個別人士受暴力對待，係咪善? 同當年黑奴問題又有乜分別? 如果要將個人嘅價值觀強加別人，我哋係咪要 rollback 返去中世紀以前，將基督教奉為國教，再清剿異端?

我唔係同志
我唔係教徒
我唔係想搵嘢拗
純邏輯分析

Out Fo 大日子

同事結婚，部 cam 上次影完新年煙火唔記得 set 返 auto focus. 下午嘅婚禮 out fo.
夜晚婚宴，Ricoh 相機對焦稍差，再度 out fo.

婚宴趨勢:
1. 加入天才表演，俾新娘驚喜。彈結他、彈琴等，無論練得幾好，上到台都係會太緊張，影響表演。
2. 玩新人環節唔見咗，咁多年都未見過。
3. 餐枱上嘅小禮物，見過有食嘅、擺嘅。

可以同愛人共諧連理，可喜可賀。祝一對新人白頭到老，永結同心!

Go to gallery

欲望補償

上一代嘅細路好貧困，所以好緊張食呢回事，亦都有句「辛苦搵嚟志在食」。今日有錢，除咗買嘢食補償，都無乜嘢其他嘢想買。
呢一代嘅細路窮，一定餓唔死，但無乜物質享受。今時今日出現 kidult, 就係補償返童年嘅回憶。
下一代嘅細路生活富庶，要乜有乜，尤其個個生一個嘅情況下，响屋企有如天之驕子。究竟未來佢哋會用錢補償 D 乜?

稅

又到交稅嘅日子，但係要交稅俾咁嘅政府，真係唔甘心。

漢堡大王

噚晚落咗灣仔見客，記起有 Burger King, 即刻走入去，食返個 Whopper Junior Combo. 好耐未食過，個包依然好好食。

惰性行政

原來影晒出嚟都只係「所謂假證」，乜唔係應該要徹查咩?

Night Person

當假期瞓得太多，夜晚就無晒睡意，就算之前嗰日只係瞓咗五個鐘。

Bloody Monday

一套好 Heavy 嘅日劇，內容緊湊得係需要不停咁睇去追劇情，唔太欣賞。

埋單計數

恆指唔見咗一半，投資亦縮水一半，身家就無咗四份一。重災區係上年 bought over 嘅股票投資，無咗 60%, 損失最少係今年新投資股票嘅錢，蝕 17%. MPF 同基金投資就浮游响 -31% 至 -54%.

反思問題: Did I put the eggs in different baskets?

拎車牌

趁放假去金鐘拎車牌，人唔算多，用咗份舊 form 申請，要再填過。填完 form, 撳完 EPS, 睇住將咭過膠，換返嚟嘅係一張連相都無嘅車牌... 我問女職員：「係咪完成㗎喇?」佢答：「去駕車啦!」「哦! 唔該晒...」

2008 回顧

排名不分先後
- 百萬雄師收支平衡
- 完成 gallery.shaneng.net
- 第一次公開演講
- 見返幼兒園同學
- 第一次跑馬拉松 (失敗)
- 第一次用腳踏足青馬橋
- 學識打麻雀
- 第一次攪 Table for Six
- 實行脫離 HSBC
- 體驗第一個 BizTalk development
- 俾 MS 挖角
- 捐咗一仟大圓俾紅十字會振雪災
- 買咗部 scanner + scan 咗好多相
- 參觀咗家駒紀念展
- 好多颱風 + 雨水
- 體會到乜嘢叫選戰
- 體會到乜嘢叫次按風暴
- 第一次同阿媽去旅行
- 買咗永遠之藍景品
- 對 CSS 有新嘅體會
- 布殊身手好敏捷
- 第一次出街倒數

除夕夜

新年前一日，陰天多雲，日落無得影，寄望夜晚嘅煙火倒數。十點半出門，去到西九海傍，太多人，即刻退返去西隧口。

時間就到，不停撳錯擊，到最後十秒，OK! 效果唔錯。

Lesson learned: 幾凍都唔好戴手套影相

Click to play

休息

好耐未試過好好咁休息，呢兩日都係响屋企上網鋤 D, 睇書、做 gym, 好舒服!

Heroes Season 3

唔驚唔覺，Heroes 已經去到第三輯。呢輯正邪大兜亂，精彩!

明愛愛不愛

明愛係教會組織，但明愛醫院嘅員工無救人嘅心? 究竟，員工係為指引做事，定為病人服務?

That's What Happens in Free Societies

布殊身為一國元首，不但身手敏捷，可以連避兩隻鞋，重有廣大嘅器量。呢 D, 亦都是自由社會發生嘅事。一個得罪咗全世界嘅美國總統，竟然可以好過我哋香港精英做特首多多聲。

時世命運

金融海嘯，Euro 平咗十幾%, 但係希臘雅典發生暴亂。如果唔係上年去而係今年去，我會去得成嗎?

整理

Shane's Diary好耐都無整埋過，由一個英文嘅記事，變成相簿記錄。但 maintain 住兩個同一個 target audience 嘅 blog 又的確係麻煩，而家只係欠 blogger 嘅 export/import 由 draft 搬過 production, 咁就隨時將兩個 blog merge 埋。

剛剛將以前 myphotoalbum 嘅 flash slide show, 變返晒做 gallery.shaneng.net 入面嘅 slide show. 一輪大工程，一路睇電視一路整，終於攪掂!

聖鬥士

呢幾個禮拜，都係同聖鬥士有關。繼永遠之藍景品，原來 Bandai 就係响呢個幾禮拜運咗一批玩具嚟香港展覽，當中重有一個 1:1 嘅人馬座聖衣模型! 今日最後一日，去咗見到有好多人、好多罕物、好多場景。我就影咗好多相，雖而有唔少對唔啱焦 (係咪要考慮買部好少少嘅相機?)。

走出展覽會場，係太陽落山嘅時候，海風吹過，豁然開朗。興之所至，去咗搭天星小輪再行返屋企。行到屋企附近，假日行人坊結束，買咗兩盒龍鬚糖過吓口癮。原來一個下晝，可以發生咁多事。

後記: 原來有六神合禮在場! Shit! 卦住影聖鬥士無行到去隔籬區添...

Tamashii Nations 2008 Asia @ 20081207

Go to gallery

銷售稅

如果銷售稅可以擴闊稅基，點解美國咁多有銷售稅嘅州份會响金融海潚都會錄得赤字? 當有一日，政府或者會計師公會重提計劃時，我哋係咪要好好咁認真思考?
http://hk.news.yahoo.com/article/081205/4/9lhx.html

罕物 Part 4 之實物

原裝
權像發光 (瞬唔見咗...)

扭蛋大集會 (瞬都係唔見咗...)

罕物 Part 3 之價值

點解 Forever Blue 景品會值 600 大圓? 因為景品入面嘅人物造型係根據第一首片尾曲 Forever Blue 嘅 MV 而設計。

意外

多留一日响泰國，多一點意外機率，包機安排要快!

罕物 Part 2 之 聖誕快樂

原來有好多嘢，冥冥中有安排。上星期去 Yahoo 睇吓星矢有乜嘢好買，點知，見到一件似曾相識貨品叫「聖鬥士星矢 聖衣Figure景品 全套6盒」。再睇真 D, 咦?! 呢件咪 Forever Blue 景品! 標價 $599, 係一個 fair price. 只係擔心會唔會有人爭。唯有以逸代勞，等候星期日結束前分鐘，無人出價，正!

今日，見完客開完會，飛地鐵過信和拎貨。賣家係一間格仔鋪嘅老闆，雖然佢話係新，但係其實唔係，應該係 display 過。不過唔緊要，我都係用嚟 display, 收藏嗰套依家收藏中，千金難買心頭好。個老闆話，佢當年最貴賣過 $1200. 而我收嘅時候，亦有 $700 嘅價錢牌貼住。但其實，想當年賣嘅時候，係 100 蚊一 part, 兩 part 零售價應該只係 $200.

如果唔係去撞手神...
如果係用 Forever Blue 做貨品名...
如果有人去爭...

但呢一切一切都已經唔重要，總之今年嘅聖誕禮物已經有著落，可以開心過聖誕。

泰國

政局不穏，首都機場被佔據，航班受影響。當澳門同中國政府都叫航空公司包機去接市民，香港政府只係以巴提雅機場客運配套不足而唔做嘢。但其實，無論客運配套幾咁不足，旅客都係會滯留响機場度，咁點解唔派多幾班包機去疏導情況?

逆市擴張

海潚下，依然繁忙。請多個人係非常高風險嘅動作，但係無選擇。

衡工量值

審計署又發功

電子化

同中電完成咗一個 project. 原來每一個新嘅 IT project, 都真係會慳返 D 人手 (即係 project plan 度要交人)。好似今次呢個咁，都可以無咗廿個人左右。可幸嘅係佢哋節省人手嘅方法係自然流失。

D 千篇一律嘅工作，當然可以電子化。但會唔會到某一日，可能真係會出現 Matrix 之類嘅 program, 唔需要人去寫。

帶氧運動

噚晚跳完半個鐘繩，運動量好大，不但腳攰，手一樣攰。
今日，小腿極度酸軟。

井水河水

河水不犯井水，但係井水看似缺水，香港人想飲河水。

垃圾議員

陳茂波對以立法會權力及特權法調查迷你債券嘅觀點:
節錄於 http://www.paulmpchan.org/mailing/081119/Speech.html

根據過往的經驗和案例，這些調查和檢討相當專業，尋求改善方案，如果交由一個具高度公信力的獨立專家小組來做，然後由政府及立法會跟進，我相信會來得更有效率，更落到實處。

可惜所謂嘅專業，好多時都係為自己講嘢，尤其係財金専業。任總夠專業無? 係咪要佢自己審返自己?

另一個例子係當年會計師公會曾經話香港稅基過窄，建議開徵銷售稅，但原來暗藏利益:
節錄於 http://hk.business.yahoo.com/050408/259/1bb4v.html

莊文康在演說中提到澳洲的會計業，也談到當地於千禧年起實施的商品及服務稅（Goods and Services Tax）和香港現時談論的銷售稅（Sales Tax）。他引述說：「澳洲會計師公會的稅務專家曾建議香港特區政府徵收5%銷售稅，估計會帶來300億元（港元）的稅收。」

他補充說：「若香港實行銷售稅，在香港的會計師將會有很多工作要做。」

所以不論係幾咁專業，若有任何利益响其中，公信力完全久奉。政府一向無公信力，所有連帶嘅權力，都唔會有公信力。立法會其實都無乜，只不過，佢有市民嘅 mandate, 叫好少少咁解。

'ju:sfel

' 重音
j y 音 - 例如 Joshua 中譯 = 約書亞
u: u 長音, ai:, i: 等都係長音
s 合牙開唇氣音
f 上牙合落下唇震音
e 倒轉咗嘅 e = 模糊原聲
l 舌頭點上牙

所以就算唔知 j 讀 y, 點都應該讀 juiceful. Justful 係唔合理嘅讀法。

笑話一則

「換片」一詞係俾 user 响 system 度更換影片資料。呢排要攪緊究竟要佢「手動換片」定俾佢「自動換片」，但俾人開頭一問，咦? 我答咗句:「你生仔呀? 做乜要換片? 重可以自動換片?」之後情況當然有少少失控。

其實，俾咪真係可以有一部自動換片機? 乾手淨腳!

罕物

2003 年 Bandai 出咗一套名為「永遠之藍」嘅星矢景品，五年後嘅今日，基本上係响市場消失咗。剩係見到淘宝網有一套彩色嘅賣緊七百幾蚊人民幣，重要係台灣嘅 user 嚟。自己本身亦都買咗一套，但實在太靚，又唔想拆。唔知，幾時先至可以再買多套嚟 display.

母語教學 vs. 貝多芬

小學幾時上堂要用英文? 仲要識串貝多芬添?

自作孽

一 D 無腦嘅人，做事無諗到後果，攪到自己人要收拾返個爛攤子。

科技創造歷史

香港有黃毓民以網絡做宣傳平台，民建聯最無恥一句成名。
美國有奧巴馬用網絡為捐款平台，一句 Change 去支持近兩年嘅選舉工程。

可惜，我重未識用科技改寫自己嘅歷史。

價值

八百蚊，足夠買一對新嘅氣墊皮鞋。同樣價錢，但今晚嘅選擇係，响中環搵人擦令對鞋，再去買支左旋 C 精華。

本末倒置

Wikipedia 對銀行嘅定義:

銀行是以存款、貸款、匯兌、儲蓄等業務，承擔信用中介的金融機構。

銀行的廣義商業角色
銀行業務已不僅限於銀行，包括其他商業業務：

• 發行紙鈔(由銀行發行，持有者可要求其履行支付義務)
• 經由電匯、終端機、網路銀行或其他方式進行付款
• 發行銀行匯票和支票
• 辦理定期存款
• 預借現金、分期付款或其他類似貸款
• 辦理信用狀開狀和轉開、擔保、履約保證金、證券承銷、和其他表外項目曝險
• 文件擔保與保險箱業務
• 幣別轉換
• 直接換間接銷售、轉介保險和信託業務，或是其他類似金融產品，形成'金融超級市場'

但當今銀行，不務正業，可以有平錢用高息去借俾人又唔借，只係掛住做金融超市。請人賣金融產品，呢 D 人叫投資顧問或者理財顧問，但實質上係推銷員。今時今日，如果要問我「銀行前綫員工，可憐嗎?」我會話唔可憐，因為佢哋係受薪做呢件事，俾人追數又交唔到數，唔代表可以做寶藥黨。做得「理財顧問」，點解可以推長者去買一 D 「好似定期」嘅產品?

如果你去豐澤買咗個電話，但原來係壞嘅，你會唔會拎去換?

又或者如果我係一個無料嘅 IT Consultant 去老點你，到最後鑊咗，你又會唔會搵我算賬? 又會唔會同我間公司追討返賠償?

又如果一個 Medical Consultant 斷錯症，開錯刀，做錯手術，除咗要佢賠錢，仲要醫務委員會去審睇吓使唔使除牌。

人同此心，心同此理，咁一個叫做 Wealth Management Consultant 嘅人話俾啊婆聽，呢樣嘢同「定期差唔多」，但係 D 息高 D. 之後啊婆將棺材本放晒入去呢樣同「定期差唔多」嘅嘢度。跟住突然收到電話原來呢樣同「定期差唔多」嘅嘢係雷曼債卷。咁呢個 Wealth Management Consultant 同間銀行係咪都應該負責?

一個顧問唔係為客戶最大利益為前提去提供服務已經夠 SHIT, 家陣仲可以唔為自己服務過失負責，都真係一 SHIT 還有一 SHIT SHIT.

自己做咗乜，心照啦!

改變

美國，可以由一個黑人做總統。
中國，又幾時可以由新彊人、西藏人又或者蒙古人做總統呢?
香港，盛智文今日歸化中國籍，下屆特首又有無佢份?

係咪小兒科?

小學要識倉頡，唔知識唔識跟筆順寫字?
乜小學一年班會教唐詩?

書

唔知幾時開始，自己變成咗一本書，即係當人家有問題先至會嚟搵你。可悲!

零基礎

節錄明報一連兩日有關母語教學嘅報道

10月31日

「你認為下列哪一位母親最值得表揚？孟子的母親、岳飛的母親、《遊子吟》中的慈母？試討論並達成共識。」考試及評核局 的報告揭示，不少高級程度會考生對這3名人物一竅不通，甚至對《遊子吟》聞所未聞，報告形容對考生中文科水平「大感詫異」。有資深中文評卷員說﹕「母語教學十年，十年來學生中文水平未見進步。」

11月1日

評核全港約20萬名小三、小六及中三學生的全港性系統評估（TSA）成績公布，英文科達標學生比例是中、英、數三科中最低，逾三成中三學生未達英語基本能力。考試及評核局追蹤08年中三生於小六時的表現，發現7.8%學生於小六時達英語基本能力，升讀中三後英語不達標，按推算約6500人經過初中3年後英語退步。

正當政府為各會考合格率有所上升而沾沾自喜，我們卻要為 5 年後大學生嘅言語能感到憂慮。

契機

一直都好想做一個 trainer. 呢排個市唔掂，公司需要開源，有機會可以攪一個 training center, 如果條數計得掂，會係時候轉型。

沒資金 + 沒信心

等於一日 1600 點，真正的大奇蹟日。

Hunter x Hunter

路經灣仔188, 見到竟然有獵人嘅扭蛋，諗咗一陣，行咗個圈，買咗。

當 Architect 遇上 CFO

完全雞同鴨講，Demo OK, Sell 得不太好。要斷續努力。

一蕉了

字裏行間，就可以見到香港良心同民主之父嘅分別。

新聞穚 10月19日

陳方安生：恢復立法會的尊嚴和權威

雖然我身在外地，但仍密切關注香港發生的大事。我曾經是地區直選產生的立法會議員，看到10月15日行政長官宣讀施政報告過程中，某些直選議員的行為，我實在震驚。假如他們以為藉著這種不負責任的嘩眾取寵舉動，能夠彰顯社會公義，有助推動香港發展真正由民主產生的管治制度，那就大錯特錯。他們這種完全不尊重制度的行徑，只會使到投票支持他們的人失望和困惑，甚至成為那些一直聲稱香港人未準備好民主普選的藉口。

明報 10月21日

李柱銘
黃毓民與朱高正

○四年十月，梁國雄（長毛）首次晉身議會，其別具一格的議政作風，惹來社會非議。當時，筆者曾撰文指出，立法會內有不少規範、掣肘，使立法會難以監察政府施政，故不排除立法會將有更多長毛出現。

四年後新一屆立法會，長毛的「戰友」果真增加了。上周三，特首曾蔭權發表施政報告期間，社民連三位議員先後以行動宣示不滿，該黨主席黃毓民更把三隻香蕉擲向特首站立的主席台前。

相信有不少市民不認同他們表達意見的方式，但筆者卻非常明白，何以他們要這樣做，因我亦曾在同一位置多年，親嘗那強烈的無奈感。

多份批評黃毓民等人的報道，皆提及台灣立法院的粗暴議會文化。筆者約在二十年前，曾與台灣打罵議政的始祖前立委朱高正在港會面，他告訴我，他在立法院內搶咪，是由於根據編配，立委每年只可發言一次。

理解其原委後，我說： 「如果立法局都是每年只可發言一次， 那我都可能會去搶咪了！」

不合理的限制，迫使議員以非一般方法表達意見，台灣、香港都一樣。《基本法》對議員提案範圍的限制，及分組點票機制的掣肘，再加上立法會的不民主組成，永遠都屬少數的民主派議員，在議會內可謂舉步維艱，無法代表民意，監察政府，改善施政。

議員面對此困局，很自然會感無奈和政治無力，有的便因而採取激烈行動，雖不足以打破困局，但起碼能喚起社會對問題的關注。

假如特區推行民主，獲多數市民支持的民主派議員，能夠取得與支持度相應之議席的話，那議員就毋須出「蕉」了！

忠言逆耳

好多年前，A, B, C 三個都係好朋友。有一日，A 同 B 講咗 C 嘅少少意見，但 B 又向 C 話 A 同佢講咗對 C 嘅意見。C 搵 A 理論，A 無否則，亦堅持咗己見，無諗過道歉，亦無諗到 C 會因為咁而嬲。從此 C 無再搵過 A, 就算 A 搵 C 出嚟，C 亦都好少再出現。

究竟，如果 A 所講嘅係事實，A 應唔應該道歉?

South Park

多年來係 South Park 嘅 Fan. 今次將奧運嘅大場面卡通化，別有一番風味。

台灣之旅 - 總結

• 將缺陷叫做缺陷美，聽落去美，但實質上係缺陷
• 用攪笑嘅方式去賣嘢，的確可以令師奶俾咗錢但係唔知買咗乜
• 健康食品係俾健康嘅人食，珍珠、靈芝、綠茶係健康食品
• 以命名學嚟睇，我係一個急躁嘅人，但又對人好好。我條命同個名係相沖，坐北面有利
• 故宮，真係好迫
• 台灣嘅夕陽，真係好靚
• 跟團去旅行，真係好辛苦
• 千祈唔好同一個同你有唔同價值觀嘅人去旅行，除非嗰個係你親人
• 導遊係咪日日同我哋洗腦，到今日都係重未思索到

迷你債券

將一個複雜嘅產品，冠以一個簡單嘅名稱，分明搵笨。就好似叫一個十幾數嘅學生哥，去食 K 仔咁。賣俾散戶嘅銀行，絕對要負責。

被顛覆的西方理論

資本主意曾為西方所推崇，今天變成萬惡的根源。
牛奶長久以來是健康飲料，現在卻是疾病的禍端。

台北 + 回程

瞓飽、食飽、收拾好行裝，再去西門町一逛。人流明顯比夜晚少，感覺同大街差不多，亦見到好多 graffiti. 影相! 影相! 影相! 响「掛鴨頭，賣鵝肉」嘅鴨肉扁食過米粉同鵝片同去三兄妹食刨冰，返去酒店集合去機場。

Check in 晒，影相嘅影相，留電話嘅留電話，大家都忙過不停。因為香港天氣差，delay 咗少少，一切都唔錯，但响香港上空飛咗幾個圈，又降落又上升返轉頭，機師亦不見得有空閒。到真係降落，响 mon 度睇住佢遲遲都 calibrate 唔到跑道中央，加上成個過程好似玩機動遊戲咁拋嚟拋去，真係有少少緊張。

降落一刻，所有乘客都拍掌，離開跑道一刻，再拍多次。今次旅行加送一次驚險刺激嘅機動遊戲，抵玩又難忘!

台北 2

今日係購物團，買靈芝、睇天祿、買綠茶沖劑 (據說可以局部減肥...)，一袋二袋後去上山浸温泉。

每一個購物景點，都隔住一個觀光景點，唔覺唔覺咁去買嘢。包括忠烈祠睇換更，好以希臘立法會嘅士兵換更咁，每個鐘換一次。步法亦差唔多，但係多咗項耍槍，都幾好睇，亦好熱。之後就去食自助 lunch. 有熟食、生料，生料叫人幫你炒又得，自己打邊爐又得。

睇完天祿俾人算完名，俾人話我個名令自己急燥、易發脾氣，但個命生出嚟對人好好，好 atypical 嘅性格，個名同個命完全唔 match. 亦講到氣管有問題，聽落都幾準。之後去圓山飯店門口影相，同阿媽一齊影、同成團人影、同阿媽一個影、同自己影、同飯店就咁影。

溫泉無去浸，一大班人去浸一池嘅暖水，信唔過。上到山，影暮景，兩個缺陷:

1. 上去得太遲，最唔到日落過程
2. 腳架放响木板上，唔少人經過，少不免出現震動嘅情況，timelapse 效果唔理想。

落山去士林夜市，食咗個蚵仔煎、加個俾人加大咗嘅魯肉炒麵，超飽! 最後加多杯青蛙下蛋，it is just too full.

再去埋龍山寺，時間關係，只可以响關寺前幾分鐘去到，只可以影少少相。過去對面西華街，成個鴨寮街咁，係多咗 D 小食檔，唔多特別。最特別係見到部任天堂紅白機，只係賣 450 台幣，仲有其他遊戲帶賣! 夠晒珍貴!

今日行程太趕，明日全自由活動，休息...

台北

六點幾起身，但早之前早瞓，唔係太攰。一去，就去到中正紀念堂，好多蔣介石嘅文章，原來都佢手字都幾靚。行完一輪，再到故宮，實在太多文物，導遊介紹咗幾件，都係當聽聽故仔咁，之後自由欣賞，其實都唔識欣賞，最後影幾張相，走人。

跟手上山去九份，又係食少少嘢、影少少相，再去下一站深坑豆腐街，食豆腐花同豆腐雪糕，炸豆腐有少少陰影，唔敢食。

返到酒店，放好行李，行去附近嘅西門町，簡直就係幾條旺角行人專用區，有表演、小食、地攤等。不過今日行程實在太緊密，食咗碗阿宗麵線，都無乜力再行，唯有明日再戰。

Taiwan Trip @ 20081003

Go to gallery

台中

晨咁早起身，去南投縣嘅孔雀園，途中經過集集，見到俾地震震到歪嘅供電塔。到孔雀園，其中一隻開屏，但係換毛季節，個孔雀屏無乜顏色。

去到日月潭，有間文武廟，有關公、孔子，但經過地震，復修過，好多建築都幾新。途中聽到導遊講咗好多故仔，神仙、神獸顯靈云云。

食過午飯，去九族文化村，太多嘢睇，要走馬看花，匆匆影幾張相、由山上影到山下就要上返旅遊巴，去台中。司機買咗埔里嘅水作為道別禮、導遊買咗豬肉乾、美人蕉請大家食。

食過晚飯，行行夜市，比起噚晚嗰個有少少失色，只係食咗用滾油浸嘅肉員。好香、好食，亦好滯。

聽日比今日要更加早起。

高雄 - 完全錯晒

原來睇錯咗行程，仲帶埋個腳架諗住去影日出，得物而無所用，可惜。

台灣真係好多寺廟，响高雄全日都係睇呢 D, 係夜晚去咗夜市一轉，但係夜晚嗰餐食得太多，所以只係飲咗杯蜂密苦瓜汁同一份三件嘅臭豆腐。但係食咗臭豆腐之後，喉嚨赤赤痛...

聽日，六點半 Morning Call...

All or Nothing

Cut 嘅機會好微，即係一係唔 Cut, 一 Cut 就會成間無咗。究竟結果會點? 好期待半年後會發展成點。

天天大奇蹟

到有一天沒有奇蹟時，是真正的奇蹟，還是沒有奇蹟?

無聊分辨圖

P/L: 身家 vs. 恆指

秋去秋來

今日起身，咦! 房同出面嘅溫度差唔多。返工落樓，絲毫沒有炎夏氣息，過完立秋，秋天降臨。

銀行的迷思

匯豐 CIBM 裁員，輕輕一裁都已經去咗 100 人，大部份係後勤。究竟當中嘅 IT 人有幾多? 究竟一間銀行要咁多 IT 人做乜?

科技係用嚟令企業運作更暢順，所以一個科技部門人太多，其實係一個問題。好嘅科技可以 scale up, 但人多，係 scale 唔到。

問題奶粉的迷思

如果加入三聚氰胺，係為咗補給氮嘅成份。亦即係話，奶粉係應該稀釋咗。

但係點解只得腎石事件，無再出現大頭娃娃呢?

The Potential

一個人成功嘅背後，有好多人支持住。人在做，天在看，我亦在看。睇嚟，我係應該睇緊少少。呢排原來 miss 咗好多嘢。I found a treasure!

Outlier

前幾日嘅跌市係咪其中一個?

Outlier points can therefore indicate faulty data, erroneous procedures, or areas where a certain theory might not be valid.

歲月的痕跡

自己好少影相，所以當年自己係乜樣，都唔太記得。曾經以為自己不斷响生命中留白，但原來間中自己係會無端端去寫網頁、日記等。呢幾個禮拜不斷努攪自己 domain, 搵吓搵吓，原來自己當年留咗唔少嘢。包括九年前嘅肥仔樣、七年前嘅畢業相、同朋友嘅相處記錄、五年前對工作嘅宣泄。

係時候一次過整理晒佢。

資產與負債 4

When a company is facing a hard time, how does the company treat an employee and how does the employee feel before the decision has been made. This is the moment of truth.

下一站 15500

一條 3 年期嘅上升軌支持唔住
一條 20 年期嘅响 14400
再嚟 13800? 12300?

股市係一個雙羸遊戲:買方同賣方都覺得自己係羸家

光頭的疑惑

今日去 HSBC, 個個都光光哋頭，係物以類聚抑或真係咁勞累? 天知!

轉行的迷思

同一班舊同事食完晏，其中一位當年想轉行而離職，到今天都未轉。不禁想一想，佢轉行要考一大埋要時間去讀嘅試，但點解唔用呢 D 時間去慢慢 upgrade 自己? 我當年嘅錯，令一個後生仔返唔到轉頭?

語言

陳議員嘅搓胸論熱爆 youtube. 人家英文差，係唔應該笑人，肯去講敢去講多去講，我覺得問題不大。短片，我睇完都笑咗出嚟，但唔係因為句 try our best 讀錯，而係語言沙石太多，又 um 又 er, 仲要俾人係將個 er... 舖滿成個畫面，實在太有趣。

有趣歸有趣，咁口齒不清嘅人做到議員，多幾個都真係唔知點算。泛民之福? 人民之福?

三份之二的迷思

有說，要參加功能組別搶位，得到 20 席立法會議席監督政府施政，避免政府再度提交廿三條等法案。但如果睇返基本法同三份之二多數相關嘅條文:

第四十九條 香港特別行政區行政長官如認為立法會通過的法案不符合香港特別行政區的整體利益，可在三個月內將法案發回立法會重議，立法會如以不少於全體議員三分之二多數再次通過原案，行政長官必須在一個月內簽署公佈或按本法第五十條的規定處理。

第五十二條 香港特別行政區行政長官如有下列情況之一者必須辭職： (二) 因兩次拒絕簽署立法會通過的法案而解散立法會，重選的立法會仍以全體議員三分之二多數通過所爭議的原案，而行政長官仍拒絕簽署；

第七十三條 香港特別行政區立法會行使下列職權： (九) 如立法會全體議員的四分之一聯合動議，指控行政長官有嚴重違法或瀆職行為而不辭職，經立法會通過進行調查，立法會可委托終審法院首席法官負責組成獨立的調查委員會，並擔任主席。調查委員會負責進行調查，並向立法會提出報告。如該調查委員會認為有足夠證據構成上述指控，立法會以全體議員三分之二多數通過，可提出彈劾案，報請中央人民政府決定；

第七十九條 香港特別行政區立法會議員如有下列情況之一，由立法會主席宣告其喪失立法會議員的資格：(六) 在香港特別行政區區內或區外被判犯有刑事罪行，判處監禁一個月以上，並經立法會出席會議的議員三分之二通過解除其職務； (七) 行為不檢或違反誓言而經立法會出席會議的議員三分之二通過譴責。

第一百五十九條 本法的修改權屬於全國人民代表大會。 本法的修改提案權屬於全國人民代表大會常務委員會、國務院和香港特別行政區。香港特別行政區的修改議案，須經香港特別行政區的全國人民代表大會代表三分之二多數、香港特別行政區立法會全體議員三分之二多數和香港特別行政區行政長官同意後，交由香港特別行政區出席全國人民代表大會的代表團向全國人民代表大會提出

附件一 二○○七年以後各任行政長官的產生辦法如需修改，須經立法會全體議員三分之二多數通過，行政長官同意，並報全國人民代表大會常務委員會批准。

附件二 二○○七年以後香港特別行政區立法會的產生辦法和法案、議案的表決程序，如需對本附件的規定進行修改，須經立法會全體議員三分之二多數通過，行政長官同意，並報全國人民代表大會常務委員會備案。

唔過一半嘅席位只係三份之一嘅少數，可以做嘅只係

1. 維持行政長官執政
2. 令行為不當嘅議員保住議席
3. 維持基本法不變
4. 令選舉制度維持現狀

絕對否決唔到政府嘅議案，否則，當年田北俊對廿三條投嘅反對票，係唔會令佢成為英雄。所以，搶位論不攻自破。

7年

又係九月十一號，返咗嚟香港七年左右，人生經歷多咗，但思想依然幼嫩。呢幾日發生一 D 事，令我感覺到自己處事太唔成熟。或者，我生在福中不知福，又或者，我未敢去把握機會踏出呢一步。

立法會選舉 2008 之 6

噚晚嘅三個問號

1. 網絡可唔可以改變選情? 可以，毓民高票當選
   
2. 口投民建聯係咪奏效? 係，配票機器投鼠忌器，建制派平均分票
   
3. Google 做民調準唔準? 唔太準，香港區錯估一席
   

總結:
- 投票嘅選民，都係聰明嘅，選票分得啱啱好
- 比例代表制，多張名單，比一張名單著數，一張名單兩個人，會變咗用嚟交捧
- 公民黨做唔到王 (無地區工作?)
- 民主黨重有三斤釘 (但新舊交替到嗎?)
- 民建聯配唔到票 (後生仔入民建聯，瞓响度就做議員)
- 自由黨不得民心 (全面普選咪死得?)
- 社民連得三席 (真係曾特首惡夢嘅開始?)
- 毓民多咗個花名 (狂貓)

影片:
回首 (至今最精彩 sound bite)


今天 (勁串)


謙卑 (感動)


爛 (口齒不清做議員)

爛船的三斤釘

留意三號民主黨，响中西區同南區得票比例特區高，灣仔區、東區同四號何秀蘭差唔多，即係話，泛民嘅基本盤，係 10%, 地區工作另加 5%. 而八號嘅公民黨，多咗嘅係名氣票。

	1	2	3	4	5	6	7	8	9	10
中西區	0.48%	9.34%	15.68%	2.58%	18.87%	0.53%	5.64%	27.54%	19.01%	0.32%
灣仔	0.80%	10.04%	9.79%	2.94%	16.46%	0.50%	5.89%	30.96%	22.26%	0.35%
東區	0.73%	10.19%	10.50%	3.66%	20.22%	0.57%	6.79%	26.11%	19.07%	2.17%
南區	0.73%	9.40%	16.69%	3.00%	18.66%	0.65%	7.00%	23.94%	19.60%	0.32%

靜待結果

今晚留吓三個問號

1. 網絡可唔可以改變選情?
2. 口投民建聯係咪奏效?
3. Google 做民調準唔準?

可以肯定嘅係，香港人無得救，就好似我七月所講咁。如果借黃教授嘅講法：「香港人『返屋企瞓覺。』所以今天『沒有抗爭，沒有改變。』」

低投票率

學者老吹一個理由


但我覺得係因為選民投票嘅策略改變:

Time	2008	2004	相差	走勢
8:30	1.04%	1.33%	-0.29%
9:30	3.07%	4.03%	-0.96%	-0.67%
10:30	5.66%	7.86%	-2.20%	-1.27%
11:30	8.83%	12.17%	-3.34%	-1.14%
12:30	11.76%	16.39%	-4.63%	-1.29%
13:30	14.42%	20.26%	-5.84%	-1.21%
14:30	17.46%	24.36%	-6.90%	-1.06%
15:30	20.23%	28.21%	-7.98%	-1.08%
16:30	23.52%	32.15%	-8.63%	-0.65%
17:30	29.78%	38.87%	-9.09%	-0.46%

好多選民都係抱住觀望嘅態度。

票站調查

四年前嘅票站調查，係用 PDA 做嘅。今年，見到個調查員竟然係用電話做?! 唔通用 SMS 直接 send 返去調查中心?!

立法會選舉 2008 之 5

今年立法會選舉臨近，其實心已有所屬，但係想用一 D 另類嘅方法，睇吓可唔可以好客觀咁分析選舉

港島區最後形勢:
縱觀大部份選舉，人氣、形象似乎比政綱、政績重要，自問小弟無能力去做一個選舉調查，但以 Google 作為一個工具，未嘗不可。

*先以人名作為關鍵字，若有太多不相關結果，加入「香港」或政黨名稱作為關鍵字。相近結果亦包括其中。
#以候選名單所有候選人為關鍵字得出結果 (x)，將候選名單人數減1再乘結果總數 ([n - 1] * x)，篩除所有候選人重複出現的結果。

關鍵字*	返回結果	得票總數	得票百分比	取得議席	得票總數 (調整後#)	得票百分比 (調整後)	取得議席 (調整後)
林翠蓮 "自由黨", 王錦泉 "自由黨", 顏才績	613 + 329 + 327	1269	7.74%	1	671	6.41%	0
何秀蘭	878	878	5.36%	0	878	8.39%	1
甘乃威, 楊森 "民主黨", 徐遠華 "民主黨"	755 + 867 + 548	2170	13.24%	1	912	8.71%	1
曾健成 香港	823	823	5.02%	0	823	7.86%	1
曾鈺成, 蔡素玉, 鍾樹根, 張國鈞 香港, 陳學鋒 "民建聯", 郭偉強 "民建聯"	823 + 864 + 825 + 682 + 550 + 419	4163	25.40%	2	2443	23.34%	1
蕭敏華 香港	676	676	4.12%	0	676	6.46%	0
勞永樂 香港	680	680	4.15%	0	680	6.50%	0
陳淑莊, 余若薇, 容詠嫦	710 + 877 + 625	2212	13.50%	1	876	8.37%	1
葉劉淑儀, 史泰祖, 黃健興 香港, 陳岳鵬 香港	884 + 766 + 411 + 748	2809	17.14%	1	1801	17.20%	1
黎志強 香港	708	708	4.32%	0	708	6.76%	0

民主的奧義

秘密投票，係民主過程最重要嘅一環

選票不用寫下自己的名字及身份識別，避免非自願讓人知道自己的投票意向。由於這種投票方法不能追查投票者的投票意向，可確保投票者所投的票出於個人意願，而非受人指使或強迫

令選舉公平、公正。

不論何人、何時、何地帶你入投票站，又或者政黨如果利誘選民，响小小嘅投票間，投咗俾邊個，就只有你自己知道，只需要向自己交待。

將選票放入票箱，係神聖嘅一刻，以和平嘅方式，革除你不滿嘅人。人民和平嘅革命，明天一起參與。

投白票=做白癡

白票改變唔到事實，但投白票就只會益咗建制派。

1. 支持建制派同支持反對派都可能唔投票
2. 支持建制派嘅人一定唔會投白票，但支持反對派嘅人有機會投白票

此消彼長，所以如果對政府不滿，就要投反對派。如果對今天嘅議員不滿，就要投第二位反對派名單。

投白票就即係滿足現狀，支持建制派。作為一個受過教育嘅選民，請盡公民責任，運用你嘅選舉權，選出你嘅代表，表達你嘅真正意願。

選舉心戰

港大今次傻吓傻吓做咗件好事

9月5日晚上編輯
Now新聞台：3成人票站調查會亂答
Now新聞台互動投票區
問題：你會如何對待星期日立法會選舉中的票站調查?
A：如實作答 24%
B：不作回應 44%
C：以假答案回應 32%

令到多咗人關注票站調查會被人利用做成不公平選舉，選民唯有以牙還牙，唔答或者亂答。一個調查如果只有少過一半嘅數據係正確，結果會令到誤差太高。有心人用唔用，自己諗喇!

鐘庭耀講得好啱，調查機構有責任對調查對象解釋調查嘅目的。所以，港大嘅調查，如實作答吧! 香港不能缺少學術研究。其他嘅，就要問吓調查目的，拖吓時間，將個 sample size 進一步降低都好。

零調查

當票站調查成為選舉工具，就成為不公平嘅選舉。拒絕回答，直至選舉委員會有清淅、公平、合理嘅指引為止。

變種

Email 由當年嘅普普通通 abc@def.com, 變成 abc at def dot com, 今日又見到新意思 abc SHIFT 2 def dot com, 實在太聰明!

立法會選舉 2008 之 4

今年立法會選舉臨近，其實心已有所屬，但係想用一 D 另類嘅方法，睇吓可唔可以好客觀咁分析選舉

港島區政綱比拼:
收到10張候選人名單嘅政綱，要客觀比較，就將所有政綱合拼，只用名單編號比較，得出政綱較好嘅名單，再投票。