話說徒弟仔去咗北歐睇完極光,會再留多陣。基於巨蟹座係一個心情比較唔穩定嘅人,就突然出咗飛過去探佢嘅念頭。另一方面,徒弟仔係一個比較隨意嘅人,其實問佢當刻,都未準備好之後嘅行程,所以提議咗之後,佢無反對。於是一個完全無計劃,口噏噏咁就出現咗一個唔存在嘅行程,問題係我請唔請到假同買唔買到機票去搵佢,就因為呢件事,攪到瞓得唔好。
第二朝起身,徒弟仔竟然話班機 Delay 咗... 咁究竟我請假好定唔請假好呢? 點知竟然得到個咁嘅回覆... 之後嘅幾個鐘完全無消息...
不過好彩,Lunch Time 之前徒弟仔出現返,原來係上咗飛機,一切 Confirm 好之後就請假,好彩之前响星期三請咗半日假,依家只係 Extended 咗做全日,再推埋原本嘅聚會,就咁空咗一日出嚟。跟住買機票,精彩... 其實如果係隔幾日訂,只係七十幾磅,依家? 哈哈哈哈哈! 不過既然請好假,死就死啦!
夜晚黑再約會面嘅地點,於是就睇咗機場巴士途經嘅地方,其中一個站响火車站隔籬嘅商場,有瓦遮頭,唔怕翻風落雨。拎到聯絡電話之後,試打... 唔通... 但徒弟仔又打到俾我喎。但呢個溝通方向不太正確,所以決定啟動 Data Roaming.
好好彩地,英國嘅 3 係可以响部份國家度用返現有嘅 Data Quota 而唔使另外俾錢,而且只要增值五磅,就會送 150MB, 所以基本上唔使錢都可以上網。
執好背囊,叉好相機電池,好早就去瞓,不過心情太過興𡚒,中途醒咗就唔太瞓得番,直至鬧鐘響嗰一刻,旅途正式開始。
五點九起身,食咗個好簡單嘅早餐,就冒住零下兩度嘅氣溫,搭地鐵去機場。原來我住呢度去希斯路機場只係半個鐘,不過就要行十五分鐘左右先到地鐵站,而且盛惠十磅幾,但總之去到就好了。
班機八點半先飛,去到先至七點左右,有好多時間剩,週圍行吓咁,去到候機室,太陽剛剛升起。
時間差不多,準備登機,點知個服務員話因為班機唔太滿,所以要我調位平衡返架飛機。Well, 你老闆,班機唔太滿又賣得咁鬼貴。上到飛機,都真係唔太滿,我諗有一半左右嘅位空咗出嚟。當架機起飛之後,就搵咗個無人坐嘅位覇晒成行佢。不過有少少估唔到嘅係,原來有飛機餐,雖然唔係好豐富,只係一個火腿芝士牛角包,但係對於一個太早食早餐嘅人嚟講就剛剛好。
個人雖然好攰,但係唔係太瞓得著,因為... 唔記得帶眼罩同耳塞... 只可以閉目養神,好過無咁解。兩個鐘頭後,終於到咗目的地。
第一時間就去咗㩒錢,之前一晚本來想去 M&S 斨挪威紙,但佢話無喎... 唯有過到嚟先㩒。
㩒完錢,剛剛有架機場巴士差不多開走,於是就上咗去,上咗車之後,發現原來架巴士有 Wifi, 不用白不用,就開始掃吓 fb 有乜嘢 Update, 之餘亦都準備好行裝,應付落雨嘅天氣。
落車嘅時候,同預計嘅時間一樣,十二點過少少,徒弟仔未到,於是就响個商場到睇吓。突然有個笠住帽嘅人搭膞頭,有少少力水,唔通老笠? 睇清楚啲,哈哈,原來徒弟仔嚟。雖然係食飯時間,但因為好多嘢都係三點鐘閂門,一於睇咗啲博物館先。
响 Google Map 度 Mark 咗幾個想睇嘅地方,頭兩站係博物館嚟,兩個相距不遠,就去咗先。不過雨都真係幾大,風亦都唔弱,就响搵博物館嘅入口嘅時候,一陣強風吹過,把遮就咁壞鬼咗。
第一站係 The Cultural History Collections, 係大學附屬嘅博物館,有石器時代維京人嘅文物、基督宗教嘅藝術品、摩登時代嘅用品、到大航海時代嘅展品都有。
呢一堆皇冠,數目不比維也納嘅 Imperial Treasury 少,當然款色無維也納嗰邊咁華麗
當然,重有其他古文明嘅展品,其實重有木乃衣,不過之前其他地方睇過,唔影相了。
跟住去第二個博物館 Maritime Museum, 入面其實裝修緊除咗船,就係同船有關嘅嘢,展館不大,如果係對航海歷史有興趣嘅話,可以一看。
呢個算係最唔關航海事嘅展品
因為展館不大,好快就睇完,跟隨去下一站,途中會經過魚市場,順道𥄫𥄫。點知去到,一放大個 Google Map, 出現咗「這個場地永久關閉」,唔使搵了。
下一站係搵炮台,途中經過 Bryggen, 徒弟仔話啲企好有特色,要影相留念喎,其實我覺得無乜特別,因為歐洲好多地方都係一排尖頂屋咁起,但今日徒弟仔話事,影就影。
去到炮台附近,搵嚟搵去都搵唔到,只係搵到 Haakon's Hall 嘅入口。曾經係貴族嘅宴會廳,無乜特別,所以無 Mark 到落 Google Map 度。
搵唔到炮台,亦因為落雨,上炮台影個海港嘅意義亦都無,最後放棄咗,時間亦都唔早,要食嘢。於是就去咗本應有魚市場嘅地方,原來原本露天嘅魚市場,最後變咗一間室內嘅魚市場。
魚市場入面除咗海鮮,重有熟食。
當見到個 Menu 有 Whale Burger 嘅時候有少少驚奇,本來以為係好似啲滷味咁有龍肉鳯肉呢啲得個名,一問之下,真係用鯨肉造,於是就叫咗個嚟試吓。味道同牛肉差不多,有少少臊味,唔太識欣賞。
食完嘢,就搭䌫車上 Mount Floyen, 不過太大霧,乜都睇唔到,唯有週圍行吓。
山上有唔少未溶晒嘅雪,有啲路都幾跣吓。跟住見到個轆,開頭以為係水車,點知只係一個埋咗响地嘅轆,同佢影張相,呢個作品名為「Take a 轆」。
白矇矇一片,無嘢好睇,搭返車落山。徒弟仔响 Bryggen 附近想搵賣手信嘅舖頭,點知搵嚟搵去都搵唔到,於是就走咗入去 Bryggen 入面。Bryggen 係 Bergen 最古老嘅一排民居,全部以木材興建,風格以實用為主,建築特色欠奉。因為年代久遠,所以好多木材都霉咗,需要進行大規模復修。
行完 Bryggen, 再走去一個行人商店街,商店街唔長,一陣就行完。時間亦都差不多,要返去商場度搭機場巴士。途中經過市中心入面嘅大公園,公園入面個湖都好大吓,如果係日頭嘅話,個景應該都幾好。
返到商場,搵巴士站,與其話係巴士站,不如話係一個巴士總站,而且都幾大吓,同香港交易廣場嗰個差不多大,搵個機場巴士站都搵咗五分鐘。唔使等好耐,架機場巴士就到咗,只好同徒弟仔匆匆揮手道別。
好似太早到咗機場,重有個半鐘先起飛,因為 Bergen 只係一個 Town 仔,機場唔大,所以唔使咁早 Check-in. 有少少餓,於是就去咗7仔度買咗隻熱狗,盛惠63大元。因為個5蚊 Coin 中間有窿,本來唔太想用,但無理由因為咁而斨散張銀紙,所以都係用咗。好彩原來一蚊銀都係有窿,可以留嚟做紀念。
有熱狗,上面當然要淋啲汁上去,個熱狗 Bar 都幾強勁,有多款醬汁任君選擇。
吃飽飽,入閘前週圍行吓影吓
好似去到每一個地方都會影呢啲回收筒
入閘之後,經過一間手信舖,見到珍寶珠嘅珍寶裝,同埋萬樂珠嘅珍寶裝
同埋一堆 Kinder 出奇蛋
重有來自鄰國嘅 Angry Bird 糖果
入去洗手間,不得不讚嘅係自動水龍頭可以調較水嘅溫度,極罕有!
要上飛機了,先要出境,登機,坐好等起飛。另一個驚喜係,啲登機橋係無匯豐 Logo 㗎! 感覺個機場好清新~
可能呢幾日都瞓得唔太好,一上到機就好似人無電咁,好攰好眼瞓。好彩特登揀咗坐第一排,所以飛機餐亦係第一個派,好普通嘅 BLT 三文治,不過味道唔差。
小睡咗片刻後,差不多越過英倫海峽,因為揀咗窗口位睇夜景,無理由又再瞓過。以前一向都係坐走廊位,年幾前同徒弟仔去咗關島之後,發現機上嘅夜景嘅可觀性不差,所以如果係夜機嘅話,無乜特別原因都會揀窗口位。跟住就想影相,不過因為機艙入面光而出面暗,所以窗口嘅玻璃反光,加上係雙重玻璃,就算個鏡頭貼晒响窗度,都過唔到出面嗰層玻璃嗰關。經過一輪思考之後同試驗,原來可以拎本書去遮住手機,效果亦不差。
旅程完畢,睇返手機嘅 Account, 只係用咗唔夠40MB, 重有大把剩。
搭地鐵返屋企,本來增咗值,點知原來機場即日來回只係一磅半,突然多咗好多錢响張 Oyster Card 度。
呢個 Trip 好突然、好即興、好攰、亦都好開心,有一個可以陪你癲嘅人,人生一樂也。
後記: 由於把遮壞咗,第二日倫敦落雨,無遮用添... 好彩只係微雨,同埋有一身嘅防水裝,無事,嘻嘻!
後記2: 原來唔响英國本土㩒錢個 Rate 唔差,只係我又㩒得唔多,個定額手續費出咗少少事,但最後都好過機場個 Rate.
Search This Blog
Subscribe to:
Post Comments (Atom)
Popular Posts
-
給佔中三子和泛民議員的一封公開信 (美國)尹浩鏐 我是一個旅居美國快50 年的老華僑,原本不必為香港的前途擔憂,但我又不能不擔憂,因為那裡住著600萬我的親人同胞,不能眼看著他們被少數有心人帶入死胡同而不發一聲,我人微言輕,我的話你們不一定會聴得入耳,但我若不把心裡話吐出...
-
一場地震,看到中國人面對天災的不同面。 1. 解放軍 - 為人民服務: 拯救及開路消耗大量體力,但部隊吃的只是粥、饅頭和蕃薯等粗糧。 「特殊情況要特殊對待。在這個環境裡,有這個已經不錯了」 2. 商家 - 好大戲功 + 貪: 3. 乞丐 - 略盡綿力: 最震撼的在這裡!! 這是街...
-
想當年响學校遇到一個非常之伯父嘅老師,見佢第一眼已經覺得佢好惡,求神拜佛希望佢唔好教我。當然,天主教學校對神神佛佛一慨不理,中三嗰年,就係佢教 Physics. 佢係湯 Sir, 湯應祥老師,係眾學生口中嘅蘋果佬。 蘋果佬嘅來源有兩種說法,有一說係似前學校門口有檔生果攤,學生...
-
兩年前,梁禮勤响七月尾做埋最後一日嘅一切從音樂開始,離開咗商台。今年,又係七月尾,劉偉恆最埋最後一日嘅我恆我素,亦離開咗。亨恆勤從此成為絕響。其實只係今日無無聊用 google 想睇睇梁禮勤嘅近況,無耐,搵到嘅反而係劉偉恆離開商台嘅結果。 當年,剛剛由美國返嚟,有一晚無無聊聊聽到...
-
香港知識分子何在? ──論當前世界政治的躁動與香港學生「佔中」 霍韜晦教授 躁動的世界政局 前略... 自大專橫的美國人 美國人的自大,到現代還不能接受教訓。從中東抽身,又想重返亞洲,還串連日本、菲律賓、東南亞,一起向中國施壓:從倉庫裡檢出上世紀圍堵...
-
呢個世界無如果,但如果我上個月無清倉,我股票嘅投資組合會唔見咗差唔多 13%!!! 宏利跌得尤其犀利,無咗 22%, 究竟發生乜事? 計落都肉痛,蝕咗真係唔知點算... 都夠我去幾次澳洲...
-
完全雞同鴨講,Demo OK, Sell 得不太好。要斷續努力。
-
It has been a long time I didn't take any leave. After two days of rest, I am really energized.
-
I've attended an ePayment course that my friend is taking. The lecturer came from America. I felt like I was in US in during the class. ...
-
We have the reunion gathering on Sept 3. We had a gathering last month. Now, we have more people to join in and with our form master. Howeve...
No comments:
Post a Comment