街頭 藝術

話說想改變自己嘅生活習慣，決定唔再响 Weekend 瞓晏覺，多出嚟嘅時間，就拎部相機响屋企附近影相。雖然响中上環大，但係今時今日嘅中上環已經再唔係十幾廿年前嘅中上環。最大嘅其中一個轉變，就係多咗好多 Art Gallery, 呢兩個禮拜行吓行吓，我諗只係行咗上環一帶，中環都重未行到。我諗如果要行嘅話，一日未必行得晒。

當中有唔少係幾靚

但都有好多唔太識欣賞

不過行吓行吓都有得著，就係响街頭發現嘅另類藝術

有一次經過自己以前住嘅地方，印刷廠同棺材鋪都已經唔見咗，變成果汁店同 Art Gallery

亦遇到曾經擁有過嘅書 《二十世紀世界大事實錄》

理髮記

個頭開始變形，今日去 Salon 到整整佢，今次就腳少少落灣仔。入咗去後，發現有女髮型師，係一個非常型嘅 Stylist, 心諗如果係佢做就好喇，轉個頭佢就埋嚟問想點攪，Yes!

我都係想執返好個頭啫，跟住佢就講俾佢嘅話就會咁咁咁咁咁... Good ar! 完全係我想要嘅嘢! 1號藥水、洗頭、夾、2號藥水、再洗頭，終於落手剪。悶悶哋，同佢傾咗陣計都好，話晒女仔做髮型師係 Rare item 嘛! 原來佢細細個就想做髮型師，中途輟學走去做嘢儲錢學剪髮，型到爆! 原來為咗理想，真係可以去到好盡。

個頭攪掂，效果唔錯。俾女仔做係一件好事，第一次整負離子都係女仔攪，今次仲係有 Heart 嘅女仔，實在太好了!

狂舞派 - Soundtrack 篇

《狂舞派》有兩首主題曲，一首中文加 Rap, 一首英文，唔係用嚟跳舞嘅勁歌，而係抒情之作。我最鐘意中文歌嘅《狂舞吧》入面其中呢段嘅旋律:

流連城市　人來人往　為了理想起舞吧
狂雷暴雨　亦要擁抱好嗎
無憾地笑　無憾地跳　夜晚看星在發光
像滿天　熱舞中的花　向我們盛放

嗰種 Tension 同 Relaxation 嘅配合，令到個人好精神，好舒服。當然，歌詞亦都好有意思!

今日買咗《狂舞派》嘅 Soundtrack, 入面除咗兩首主題曲，大部份都係無人聲嘅配樂或者跳舞歌，對於我呢個鐘意純音樂嘅人，係唔錯嘅選擇，今晚做 Gym 聽嗰陣重可以俾多少少力水添! 唯一唔鐘意嘅係第4首嘅 The Battle 同埋第13首嘅 Everybody Hurts. The Battle 主要係唔太識欣賞 Rap 入面嘅內容，我諗呢首歌真係要配埋 Battle 嘅片先啱聽， Everybody Hurts 就太慘情，聽完都幾無 Mood.

為了＿＿你可以去到幾盡？

去睇《狂舞派》，帶住純睇 Show 嘅心情，有 Street dance, Freerunning, Beatbox, 正到呢! 唔鐘意街頭文化嘅，大可以當一部勵志片睇，接近尾聲點題一句 How far are you willing to go for dance? 真係無嘢好講。退後一萬步連勵志片都唔鐘意睇，就當支持吓香港電影，呢套係值得買飛入場之作。

半澤直樹

一套日劇收視非常高企嘅日劇，成套劇圍繞住半澤直樹响銀行企圖改變銀行文化。當中同高層嘅鬥爭、同稅局嘅角力、同欠債人嘅周旋，都令到劇情非常緊湊。

可惜每兩三集就停一個禮拜，等得非常唔過癮，唔急嘅，建議今季完咗一次過煲晒佢。

生活

呢排要去深圳做嘢，食晏同個客傾開，原來佢哋無乜消閒活動。多數都係响屋企睇電視，又或者落街跑步咁。要睇戲，同香港消費差不多，盛謂60蚊人仔，要睇 3D, 就俾多一倍價錢買多一個 D.

呢種生活，似曾相識，細細個嘅時候，都係响屋企睇電視，又或者自己去附近嘅公園或者青年會玩。做細路嗰陣，有得玩就過到一日。今時今日，叫做生活無憂，但生活得閒心嗎? 我答你唔到。

人肉轉珠

當迫地鐵、迫巴士、或者係迫𨋢嘅時候，出面嘅人要入嚟，入面嘅人要出去。當一個一個人咁經過嘅時候，大家就玩緊一個又辛苦、又悶、又無 Combo 嘅轉珠。

小時代

一個描述四個背景不同金蘭姊妹嘅故事，劇情一般，但感情部份演釋得唔錯，不過最唔順眼係好淡嘅色水，太過有藝術氣氛了。

套戲有好多俊男美女。因為幾多台灣演員吓，所以雖然背景係上海，但一直以為係台灣片，其實係大陸拍嘅。唔知係咪水喉夠大，一拍就拍夠兩套。可惜唔夠大膽，如果拍齊四集佢，我諗故事會完整多。

講古系列 7: 太平山街

讀中學之前，每日都會行過太平山街返學。太平山街上少少有卜公花園，紀念當年港督卜力對抗鼠疫嘅貢獻。太平山街對落有東街同西街，用廣東音譯做 Tung Street 同 Sai Street, 但原來早期，東街曾經譯過做 East Street 的說，至於西街有無譯過個 West Street 就無從考究。

至於太平山街嘅名字出處，原來同香港開埠初期進駐有關 (http://www.discuss.com.hk/viewthread.php?tid=10226322):

如果各位上中原地圖網，鍵入『太平山』搜尋，佢會出『太平山街』的地址。何解？因為最原始的太平山便是太平山街一帶。
話說英人逼清政府簽訂南京條約後便派軍隊正式佔領香港。登陸地點在今的水坑口。當時海岸線在現在的皇后大道西。英兵登陸後，便沿山而上，在今的荷里活道公園插旗駐兵。那一帶的山崗因有洋人巡邏佈防，所以治安較好，故被稱為太平山。有洋人，自然會有商業發展，也會有華人進駐。太平山街便是這樣沿山開發出來的一條依山而建的大街。後來洋兵遷往更適合的地點駐防，空出來的平地便成為香港的第一個『大笪地』。當時的大笪地，小販，小商店，睇相，賣武，賣藝，各式各樣的玩意都有，是附近一帶居民閒來無事聚集的地方。
隨著城市發展，洋人越遷越高，在今的山頂區一帶建設高級住宅。既然是洋人的住區，治安當然會很好，而本來的『太平山』已成為低下階層的生活地點，治安再不太平，所以『太平山』這名字，便重新被定義為山頂區一帶。

時移世易，太平山街回復太平，近年多咗好多 Art Gallery 同 Cafe 出現，令以前平靜嘅街道開始變得不平靜。

HKPD

大部份國家嘅警察，形象並不討好。你以為美國甚麼 NYPD 定 LAPD 响電視劇好威，但你問吓當地居民，會有你意想不到嘅答案。

香港有廉署之前警察形象都好差格，係八、九十年代先至有正面少少嘅形象，唔係你估「有牌爛仔」同「好仔唔當差」係點嚟? 廿年風光過後，依家咪俾人嗌「特區公安」囉! 甚麼除暴安良的說，敢問法輪功同青關協，誰暴? 誰良? 少在自己面上貼金了。

Single Point of Failure

現代生活，離不開用幾個網上 Account. 當科技進步到用一兩個 Account 就可以 Login 到唔同嘅網上服務，唔駛成日走去 Register, 的確係幾方便。但有無諗過，如果呢一兩個重要嘅 Account 用唔到，生活會變成點?

星期一，突然間 Skype 上唔到，話 Login 唔到。再上網一睇，原來個 Account 俾人偷咗嚟 Send Junk Mail, 個 Account Lock 咗。因為係 Hotmail 嚟，咁就唔止 Skype, SkyDrive, Outlook.com 都無埋，再禍延 Windows Phone 都 Update 唔到啲 App.

可以做嘅就只有跟佢個 URL 去做 Account Recovery. 問題係佢要嘅資料，我唔太俾到佢:

1. 姓名: 我唔記得係俾全名佢定剩俾英文名佢
2. 出生日期: 我印象中無入過
3. 國家: 我係 Hotmail 年代登記個 Account, 究竟我要答美國定香港?
4. Secret Question: 你又記唔記得你嘅答案?
5. Email Contact: 我都無乜點用 Hotmail Send Email...
6. Email Subject: 同上
7. Mailbox Folder: 同上
8. 信用咭號碼: 無買過嘢

全部問題，我只剩係知我個 Password 一定啱。所以，填完 Form, 佢 Email 我話 Unlock 唔到係好正常嘅事，問題係試咗兩次之後，佢話要等第二日先可以再試。好我等! 到試第三次嘅時候，封 Email 話我試得太多次，竟然叫我再開過個新 Account. 我「可怒耶!」上網搵 Support, 又話 Outlook.com 無技術支援，叫我自己上 Forum 問。問題係，我個 Account 都 Lock 咗，Login 唔到，又點問呢?

再搵到條 Password Reset Link, 會 Send Reset Code 俾我部電話，証明到係我啦! 入完 Reset Code, 再入新密碼，Shit! 又係 Lock 住個 Account.

好喇，搵到條 General Support Link, Submit 咗張 Ticket. 第二日係澳洲嘅 Support Email 過嚟，話我係第二個國家，做唔到 Support. 天呀! 呢個網絡年代，又唔係要你即時 Support, 分乜鬼嘢國家時區呀?

好，咁我唯有直接打去香港 Support Hotline, 終於都有人幫我去 Escalate. 但 Email 返嚟又有少少九唔搭八，要再打返我同 Hotline 講過嘅嘢。星期五差唔多放工時間，另一封 Email 問返我同將 Recovery Form 差唔多嘅問題，但係起碼今次係人肉唔係機器做嘢，應該可以。

今朝，收到 Password Reset Email, 終於一切回復正常，第一件事 Enable 2-Factor Authentication, 免煩。

今次嘅投訴，係個 Process, 點解要攪成5日先 Unlock 得返個 Account? 响講 User Experience 嘅年代，我俾 F Grade 囉!

剪片

有時，會好配服成日 Post 片上 YouTube 嘅人，影完又要剪，剪完又要加聲，加完聲又要壓，壓完又要 Upload, 都未計加特效呀，畫公仔嗰啲，重有前期嘅 Planning 呢?! Holy!!! 我呢 D 求其影個 Time Lapse, 加個 Stabilizer, 都已經開始覺煩，唔通，呢啲就係專業級同興趣級嘅分別?

小白兔

從前有位農夫，好幸運咁執咗隻小白兔返嚟，小白兔好聰明，氹得大家不亦樂乎。有一日，小白兔話想去見識吓呢個世界，就咁走咗。農夫好唔捨得，但諗住對小白兔嚟講係好事，只好將小白兔嘅事放底，繼續埋首耕田，等待收成。

Cognitive Dissonance

人係 By Design 會去過濾對自己不利嘅資訊，其中一招係合理化一件自己曾經相信但係錯嘅事，稱之為 Cognitive Dissonance.

經典例子有末日預言，教主話某年某月某日就係末日，信徒傾家盪產地追隨，時候到了，教主就話大神慈悲，回應佢哋嘅禱告，推遲咗末日嘅時間。不管你信不信，反正信徒們堅定地信了。

近例有林老師事件，大部份人因為係標題黨，讚掦警方罵不還口，鬧林老師唔應該講粗口的說。但當睇晒前文後理，為咗合理化成件事，變咗騷擾法輪功表達意見嗰啲口口聲聲話關愛嘅組織可以不理，警方選擇性執法又無問題，只好說成一位教師講粗口係瀰天大罪了。

講真，假若林老師無俾人起底，鬼知佢係老師咩! 無人有心放上網嘅話，根本知嘅人唔會多，唔好講話佢啲學生。我覺得，根本就係起好晒底先放條片上去，之後全港市民、傳媒、警方，自覺或不自覺地，都跟住劇本走。

講粗口，我又唔信警察把口好得去邊，就算堂堂大律師都响議事堂大說 F**king Chinese 啦! 唔係話教師爆粗啱，而係大事大非在前，簡直係濕濕碎。

Cognitive Dissonance 同 Confirmation Bias 一樣，簡單嚟講又係搵理由、搵藉口。自己詭自己三寶最後一寶，有機會再講。

事實之全部

林老師罵街事件，鬧得熱烘烘。睇完兩段片，其實如果唔知林老師係老師，根本係無問題。無奈嘅係，當起底起出林老師係一位老師嘅時候，大家都只係針對住老師嘅身份應唔應該罵街爆粗，而唔係問緊點解一位老師攪到要罵街爆粗。

或者，片段中一位市民講得好啱：「點解法輪功攪咗十幾年都無事，偏偏啲關愛組織一出嚟就出事？」在罵林老師的，請答好呢條問題，再慢慢討論老師應否罵街爆粗吧！

再推深入少少，如果老師罵街爆粗就係絕對唔啱，即係知識份子就一定唔可以行差踏錯啦？咁佔領中環係公民抗命，即係犯法，結論係：「唔做得」，咁係咪成個佔中行動摺得呢？過往嘅歷史，例如甘地、曼德拉、馬丁路得金等都係錯，甚至美國本身都唔應該獨立乎？

如果你問我，老師因為警察做事不公而罵街爆粗嘅行為係咪間接都代表學校內學生對老師嘅做事不公亦都可以爆粗，答案係否定。實際上，小學嘅時候，有位同學曾經問候過老師嘅娘親。最後，老師不單可以好平靜咁教導同學，呢件事亦都作為教材，老師响課堂到分享返成件事。所以，一位好嘅老師不在於爆唔爆粗，而在於可唔可以將一件負面嘅事變成教學嘅一部份。林老師响作為老師行為上有錯，但佢係一位攞過行政長官卓越教學獎嘅老師，我相信佢有能力做好作為老師應做嘅善後工作。

至於甚麼政治背景等等，我會話，佢又唔係政客、又唔係攪社運，當一個普通人去到呢個狀態嘅時候，連老師嘅身份都可能忘記，根本唔會諗呢啲嘢囉!

甚麼之塔

給後輩的一段話：

抄嘢改嘢賺錢不是罪，但俾 Credit 人是必要的 (點俾我諗係要同原創者溝通)。好多事唔係技術上做到就可以去做，我相信你無諗呢件事有幾差。但搵錢有多方法，過到自己，我無嘢講。

祝生意興隆！
以你為榮的前輩上

書展

好耐未去過去書展，同同事們柴娃娃一齊去一趟，去到灣仔，入場都攪咗成半個鐘。入到場，週圍行吓，走到去 Page One 攤位，見到 Thinking, Fast and Slow 嘅廣告，諗起其實有本書想買，但諗嚟諗去都諗唔到書名，唯有上網搵吓。

一路搵，一路行，可能太多人嘅關係，唔係太 Stable. 再行多三分一嘅會場，搵到了，叫做 The Signal and the Noise, 再折返 Page One, 問售貨員，佢即刻話賣晒，感覺唔太夠誠意，一於自己再搵。書太多，再搵埋個封面，噢! 好 Sharp 嘅封面，記憶中成個場都唔覺有。再用會場嘅 Touch Screen Kiosk 一搵，根本無呢本書，唯有放棄。

行各攤位嘅途中，其實想買本教練肌肉嘅書，但唔想太 Hardcore, 都係算數。到最後，同事們嘅收穫，都係旅遊書。10點收檔，大家起錨食嘢，但似乎去書展嘅人都無食過咗，食肆都是滿滿的，一行十人好難搵位。最後行遠少少去翠華，時間太夜，唔太想食得太豐富，剩係叫咗個淨水餃，其他有貨嘅後生仔，一大碟炒飯、潛艇、Pasta. 坐向我面前嘅靚仔魔術師，重有一杯綠茶雪糕紅豆冰，好吸引，好想叫，但無貨，算把啦! 都係清水啱我多啲...

返到屋企，執著嘅性格浮現，搵到本 eBook, 睇完頭幾頁，似乎幾吸引，就睇吓睇唔睇得晒本書。

方便之門

話說開完會，諗住撜巴士，撞著落大雨，去附近公園更亭出面避一避雨，點知俾個看更伯伯話唔入得嚟。大佬，咁大雨，避一避都得啩... 好彩個伯伯無出嚟趕人，雨太大，算啦，唯有無視佢嘅勸告，避得就避。

香港係幾時變得咁無人情味?

真夏方程式

噚晚睇咗套福山雅治套戲，可能將45分鐘嘅一個單元，變成120分鐘，節奏略嫌太慢。無亂畫方程式，又無做到招牌手勢，始終差少少。

返屋企後，清咗火影同海賊王，諗住睇埋庶務二課，但今集唔太精彩，難怪收視麻麻。唔睇日劇，睇康熙來了，又係一個悶主題，天呀!呢晚發生咩事?

每日一字 21

話說有日同其他同事食飯，講到金菇菜係咪菜。對於一個讀過中六生物班嘅人嚟講，金菇係真菌，當然唔係菜，就好以鯨魚唔係魚咁。想舉其他例子嗰陣，就記起細細個聽過嘅 IQ 題:
是雞不長毛
是牛不耕田
是貓不捕鼠
是虎不上山

道出各例子後，同枱嘅人又開始諗其他例子，玩得不亦樂乎。

响生物學嚟講，人類嘅學名係 Homo sapiens, Homo 係拉打文，即係「人」。Pesticide 係殺蟲劑，Homicide 係 Homo + cide, 就即係殺人。
Homo 亦都係希臘文，意為「相同」，就好似 Homogeneous, 即係「一樣」或者「相似」；Homophone 「同音異義」；Homonym 「同字或者同名異義」，即係「過門都係客」嘅「過門」同埋娶新抱又係叫「過門」咁。
日常生活，單字就咁用　Homo, 就係 Homosexual 嘅簡寫，即係同性戀，亦衍生出 Homophile 係指同性戀者或者關心同性戀者權益嘅人，Homophobia 係恐同嘅人。

政治

老媽子講過：「只要有多過一個人一齊做嘢，就會有辦公室政治。」同同事飲茶嗰陣，聽到兩個清潔工之間嘅事，就只有兩個人。

聽完成個故仔，我覺得，當大家嘅目標唔一致，心裏各自盤算嘅時候，辦公室政治自然會出現。

歲月如歌

唔係話林子祥首難聽，但係《衝上雲霄》係講緊天空嘅故事，節奏應該輕快，旋律要夠響亮，歌詞要有意境。

新嘅主題曲，前奏嫌慢，頭幾句最後個音都係跌咗落街，歌詞係勵志歌而唔係講緊响空中飛翔，俾人鬧係意料中事。

每日一字 20

前排有空難，Facebook 上面出現咗一段有關中文名拼音嘅片段，今日新聞竟然會報出嚟



內容，就好似出事嘅對話咁:
Captain! Something Wrong!
We're too low!
Holy Fu*k!
Bang! Ding! Ouch!

Bang 係撞擊嘅聲音
Ding 係撞擊嘅動作或者撞擊後嘅表面花痕
Ouch  係撞擊嘅呼叫

態度

上一季嘅日劇，有兩齣校園劇外加一套家庭劇，都講好多欺凌嘅故事。講到似乎每當一個人以為另一個人好蝦，好少會雪中送炭，通常都會踩多腳。遇到一啲唔知頭唔知路嗰啲細路，見好玩，就會玩埋一份。結果似乎就只可以扮死狗，又或者搵個代替品，甚至轉校。

《家族遊戲》似乎就勝在顛覆咗呢個定律，講出變強先係治本方法，強得令別人後悔先夠型嘛!

世界中心之旅 - 前傳

細個嘅時候，經常見到一舊會變色嘅大石印响一啲類似傳單嘅紙上面，當時覺得好靚。直到九年前，睇完《在世界中心呼喊愛》，喚起去旅行嘅意欲。

上次去澳洲，只係去開因茲玩刺激嘅玩意。今次除咗睇大石，會順道去埋悉尼。大石係响沙漠中央，一個渺無人煙，溫差極大嘅地方，其實唔太舒服，睇完舊石其實就走得，所以預定一個星期嘅行程，實在要去睇睇其他地方。

上網睇吓搵吓，有間酒店係直情有房對住大石，呢啲真係 Very Good, 貴就貴啲. 但係好多澳航 Package 都夾唔啱時間，於是把心一橫睇維珍嘅 Package, 有機位，上機落機時間好得，請假，訂機位之後一日 Confirm 埋悉尼嘅酒店，再 Book 內陸機同大石嘅酒店，完成! 個 Package 重包埋悉尼水族館、動物園同觀光塔嘅門票，之後再 Book 其他 Local Tour 就攪掂!

偽科學

一位大學電腦系助理教授嘅博文講人數，以咁嘅方法計

好了，談數字
- 「行人路步速約是馬路大隊的10.5倍」，是很粗略的親身估計，但比「不考慮步速」好得多
- 港大於軍器廠街點算人數為 66927 (不包括行人路)
- 按上年數據，27.7%人沒有行經軍器廠街的點算站。故港大使用調整基數為100/72.3=1.38，另加95%置信水平的3.8%誤差

重點來了。那27.7%人去哪了？是抄行人路？還是中途離開了隊伍？
a. 如果27.7%人全都是中途離開隊伍，遊行人數下限就是66927*1.38*(1-3.8%) = 88849人，但不可能無人走行人路吧
b. 如果27.7%人其實只是走行人路，調整基數該是 (27.3*10.5+72.3)/72.3=4.96，遊行人數上限就是66927*4.96*(1+3.8%) = 344900人。這27.7%當然不可能無人脫隊，但是還有一點...
c. 還有一點極重要但很難計算的是：「相信大量市民，明明有行經軍器廠街，卻是從行人路或商場通道等繞路，於電話訪問時回答『有』行經軍器廠街，卻沒有被點算為66927人之一」(簡稱A條件)，於是 27.7% 就是一個被低估的數字，最終人數亦會因此嚴重被低估。舉例：
(假設) 若有一萬人符合A條件，遊行人數上限就應為40萬
「若有一萬人符合A條件」是甚麼概念？就是說，4.75小時的取樣過程中 (按港大的 15:36 至 20:15)，有 12.9% (即10000/(10000+66927)) 的遊行人士，或平均每秒有 0.58人，明明行經軍器廠街，卻因為走捷徑而被計漏了。這個可能性絕對不低。

首先，10.5倍係 Magic Number, 係該位教授响最塞嘅 Sogo 一帶路段「親身估計」。港大係响軍器廠街點人，响各片段所見，道路暢通無比。10.5倍並不成立。

算佢10.5倍成立，b 算式應該係 (27.7*10.5+72.3)/100=3.5895, 否則粒數永遠大過 1, 無論行行人路嘅人行得幾慢。

另外但係行人路嘅 Capacity 遠遠不及馬路，所以10.5倍嘅速度但得3分1嘅容量，响行人路行嘅人數最多就只係10.5/3=3.5, 算式變成 (27.7*3.5+72.3)/100=1.6785

重點响 c 項，所謂 A 條件係指

• 行經軍器廠街
• 從行人路或商場通道等繞路
• 於電話訪問時回答『有』行經軍器廠街
• 沒有被點算為66927人之一

我諗呢位助教唔太知軍器廠街一帶係乜嘢一回事，軍器廠街係一個無商場，行人路充滿欄杆而有盡頭，只有一堆天橋嘅地方，而港大點算站正正係响天橋上面。所以要繞路行，係要繞到 Pacific Place 先可以重回大隊，無捷徑可言。基本上要附合所謂 A 條件嘅人數，一定唔會多。

結論係，錯嘅假設加錯嘅算式得出錯嘅答案。

人數

每次遊行都會為咗人數而爭拗，但又無人真係走去數人頭，所以粒數根本無意思。

除咗數人頭之後，另一個方法就係數捐款。今年各團體都籌到唔少錢，只需要做個得四條問題嘅民調，就得:

1. 有無去遊行
2. 有無捐錢
3. 捐俾邊個
4. 捐咗幾多

之後，剩 Take average 再除返又得，以每個團體嘅捐款數字做 Cross check 又得。好過數完人頭之後無端端數又乘一個 Magic number, 都唔知做乜!

下年，可以預備定問巻即場俾遊行人士答，咁就連第一條都慳返。

蚊比同牛比

睇完下面三個例子，你就知點解人家有普選。

埃及: 全國有多達一千四百萬人上街示威，比例佔全國人口近一成七 (埃及千四萬人上街要求總統下台)
香港: 香港泛民主派在雨中舉行年度七一爭普選遊行，主辦單位稱有43萬人參加。(視頻：香港43萬人參加七一遊行) 約為人口 6%.

埃及: 在埃及爆發反政府大示威，導致5位部長請辭之後，埃及總統府發言人法米(Ehab Fahmy)和內閣發言人哈迪迪(Alaa al-Hadidi)今天(2日)跟進請辭 (中國評論新聞：埃及總統府與內閣發言人　雙雙請辭)
香港: 恒隆主席陳啟宗昨天力挺梁振英，形容自2003年以來，香港以現時情況最好。 (陳啟宗力挺梁振英)

埃及: 埃及國家電視台播出了軍隊領袖事先錄製好的一份聲明，形容民眾抗議行為是「史無前例」的民意表現。(簡訊：埃及軍方發佈48小時最後通牒)
香港: 在七一遊行中，有市民想在銅鑼灣插隊，被警方阻止 (監警會曾建議警方開放整條軒尼詩道)

七月一號遊花園

十年前嘅今日，你做緊乜?
之後十年嘅今日，你又做咗乜?
今日，你會做乜?

其實，十年前嘅之後十年，大部份人都無再參與，普選就已經注定遙遙無期。香港人爭取民主嘅決心係零，真普聯嘅方案嚟睇，泛民爭取民主嘅決心亦都係零。如今十年先嚟一次大醒覺，咁全香港嘅樂隊每隊作一首「睜開眼」都無用，醒咗之後原來會賴床賴夠十年。

大部份國家嘅民主，遠至法國大革命，近至阿拉伯之春，都係用鮮血換返嚟，而且係 Reproducible, 當中嘅含意係講緊，如果每一場革命都係一次科學實驗，咁革命就係暫時已知嘅唯一科學方法去爭取民主。和平抗爭等政府自我完善嗰啲，都係坐政治監、被軟禁起碼廿年，再加國外多方面制裁先出現。要「和理非非」地去爭取民主，你話會唔會成功? 噚日，又有人話「佔中博拉不癱瘓中環」云云，抗爭抗成咁，你唔好逄星期六日公眾假期先去佔中?! 香港人究竟醒未?

畢業生

畢業典禮，係人生一大盛事，到場嘅，有同學、父母、導師、校長等。當然，重有好多你見到未見過嘅校監，但 Somehow, 你要同佢响台上行禮。

好多人覺得，响畢業典禮攪攪陣好失禮，會辜負父母一心嚟到觀禮，令佢哋掃興云云。但試想吓，專上學院畢業，就要踏出社會做事。專上教育唔係就係要教佢地要獨立思考、對社會要有承擔、對不義嘅事要有批判咩? 畢業典禮唔係就係好好嘅舞台俾佢哋實踐所學咩?

今天演藝學院嘅畢業生，以自己嘅行動證明對 CY 嘅不滿，只係以身體語言表示，無特別大叫大嚷去影響程序，已經好得體，甚至可能有人覺得略有不足添!

Perception vs. Reality

人好多時都會高估自己，所以响買嘢嘅時候，好多時都會買咗啲唔需要嘅嘢。

而買返嚟呢啲唔需要嘅嘢，總恬嚟講，當時係買緊未來。未來，充滿不確定性，好多人都想控制未來，但未來卻不一定發生。簡單例子，有無試過買一本書嘅時候諗住幾時讀完佢? 你買嗰刻，可能係好想讀完佢，但係好快就會擺埋一二邊玩你嘅手機。

所以，如果你係做行銷嘅話，就可以去賣未來嘅事，將一個美好嘅藍圖於响客人面前，邊個唔 Buy? 例如買咗屋，搵人裝修嗰陣，用 Software 畫好晒靚靚仔仔計設畫，所有嘢都發晒光咁，你一定 Buy. 但到裝修期間，或者之後，梗有嘢要執漏。

下次買咗嗰陣，諗清楚自己買緊乜，未來係一件好難掌握嘅事，不如攪清楚買緊嘅嘢係唔係解決到現在嘅問題先。未來嘅事，用未來嘅錢去洗好了。當然，如果你有水晶球，就另當別論。

官僚 vs. 官僚

一個大機構，官僚少不得。最後嘅官僚系統，莫過於政府，一切講文件、程序、條文，一句程序公義，真係殺得死你。

花旗國嘅施壓，公務員系統一於少理，一個斟情權令吹雞者最後暗渡陳倉。吹你唔脹，條氣唔順，只顯得堂堂大國小氣。話要有法治承擔，但這邊廂所做嘅事，就好似那邊廂去監視同入侵平民系統一樣，一切都係法律容許。

投影機記趣

其實，自己執著嘅時候，都幾恐佈，雖然不至於 《Rich Man, Poor Woman》入面嘅主角咁，用幾年時都買唔到幾件家俬，但有時啲要求一啲都唔低。例如今次買 Projector 咁:

1. 細: 地方唔大
2. 輕: 萬一要帶出街
3. 有電池: 同上，主要唔想帶火牛
4. 夠光: 間房有窗，唔夠光買咗等於無買
5. 駁到 VGA: Workstation 同 Notebook 都有 VGA 頭出
6. 平: 你知道嗎? 巨蟹座係好節儉㗎!

論大細，有唔少都可以做到好似手機咁，但全部都唔夠光，經一輪資料搜集所得，手掌咁大加厚身少少就差唔多，有限度妥協是可以的。有名廠 LG, 3M 可供選擇，但有 LG 重，3M 貴。搵到部 AAXA P300, 睇埋 YouTube 示範，結論係可以買。落訂之後，因為香港無貨，一開始話要 9 個工作天左右，再上網 Check Status, 話要6日，再 Check 要7日。打電話去問，剛剛到香港，下一個星期可以送貨。

收到貨，個 Package 都幾墜手，有少少擔心，但打開之後，主機唔太重，合格。第一件事係駁線試，駁好線，插好電，唔識開。明明撥咗去 On, 但部機只係閃一閃，之後無反應。週圍摸索後，原來重有個 Power 掣，之後睇返說明書，個 On/Off 掣係供電用 (i.e. On=Stand-by, Off=Off)。

部機著到，亦睇到畫面，但點 Focus 呢? 又係說明書出動嘅時間，睇完就明了。之後嘅問題係，點正式駁線。我有個 VGA Splitter, 但醒起無耐前換過底板，Support VGA+DVI Dual Output. 跟住就搵咗條 DVI 線駁 Mon, VGA 駁 Projector. Project 用 Mini-VGA, 跟咗條 Adapter 線，但好短，俾 Notebook 用係正常，但駁 Workstation 就唔得，最後用 VGA Splitter 跟嚟嗰條線做 Extension Cord, 攪掂!

開機試，點解 Win 7 認唔到係 Dual Mon? BIOS 有嘢 Set? Set 咗好多 Combination 都唔得，Driver 問題? 原來部機無裝過 Driver, 即係用緊 Win 7 Default Driver (Standard VGA Adapter 之類), 上 Asus 網站 Download 再 Install, 跟手 Reboot. Tada! 又攪掂!

但原來 Resolution 太高，要 Set 返細佢。又原來 Default 咗個 Projector 做 Primary, 攪到 Login 要開 Projector.

Projector 質素合格，但係 Form Factor 太細，Focus 得唔太好，一係上面清，一係下面清，一係 Set 中間清而上下小濛。如果用嚟做 PowerPoint Presentation 係 OK, 但係用嚟做 Demo 有少少勉強，整體而言，B-.

睜開眼

RubberBand 嘅歌，我只係識《發現號》、《阿波羅》、《Easy》、同埋《睜開眼》，似乎都係抒情歌多過 Rock 歌，被我歸類為「啲歌好聽」嘅樂隊。 當佢哋被宣佈會响維穩 Show 演出，本來都無乜咁出奇，但有人話佢哋背叛咗揺滾精神，心裏一埋問號，乜佢哋係 Rock Band 咩? 暈...

接受咗自己孤陋寡聞嘅事實後，可以開始玩遊戲了，即係表演與辭演之間嘅決擇，經理人公司接 Show 嘅因由，同埋主辦者得對表演嘅安排。

藝人寧可接受形象損失都唔辭演，一係有龐大嘅壓力响背後，辭演會有佢哋承擔唔起嘅巨額賠償，又或者佢哋真係「偽人」，一邊在曹營，一邊心在漢了。經埋人犠牲一隊剛簽約無耐嘅樂隊而接 Show, 當中嘅利益輸送亦都唔細，所謂 "business is business" 是也。

如今，事情已經發展到 RubberBand 會捐 Show 錢，之後去遊行。 我係主辦單位，一於將所有香港樂隊做壓軸，再嚟多幾場 Encore, 一於到六點半七點先放你走。RubberBand 可以做嘅，咪唱多啲「好歌」，送俾主辦單位，又或者幫主辦單位响政府提出「訴求」囉! 經理人公司只好派人𥄫實啲仔唔好亂嚟。

至於 RubberBand 可唔可以說到做到，大家就好好咁睜開眼睇呢場 Show.

維穩 Show

香港巨蛋音樂節，主辦單位話要爭取起隻巨蛋作為演出場，話台灣同日本都有，香港唔可以無云云。我又想問，台灣同日本都有普選，香港又可唔可以無? 咁點解唔攪個香港普選音樂節?

講到尾，巨蛋只係一個體育館，香港一早有極具代表性嘅紅館，香港缺乏表演場地? 你當會展、九展、新伊館、機場博覽館、香港大球場係乜嚟?

再陰謀論少少，一場提出訴求嘅音樂 Show 可以做到上大公文匯都支持嘅，件事一定唔係好事囉!

看日劇 學IT

Rich Man Poor Woman 入面，小栗旬釋演嘅日向徹係一位 IT 達人，入面有一幕畫咗幅圖，其實係一幅 Sequence Diagram. 當然，Sequence Diagram 唔係 100% 咁嘅樣，但已經相當有誠意了。另一樣值得留得嘅係 Sequence Diagram 嘅頂頂三隻大字, 就咁睇唔太睇得出佢寫乜嘢。


但只要左右掉轉，係 UI, Middle 同 DB,  其實係典型嘅 3-Layer Design.


一幅 Sequence Diagram 入面得一個典型嘅 3-Layer Design, 其實無乜實質意義，但為套劇做資料搜集嘅工作人員係值得一讚。

其實我同小栗旬一樣，識响玻璃上面塗鴉，係差一枝白色嘅筆囉...

工欲善其事

工作上，要解決好多問題，有自己嘅問題，有同事嘅問題，亦有客嘅問題。問題如果 Visualize 到，一切都好辦事。所以 Office 內白板係必備嘅文具，但慢慢發現，區區一塊白板嘅空間，係唔能夠裝載所有問題。適逢公司會租多一層，又會用玻璃間房，當然要規劃一吓搬唔搬位。到決定要搬嗰一刻，間房嘅藍圖大概已經完成，係差在執行。

最主要有三個配件

1. 筆筒: 房入面有塊白板，但唔想畫蚊型圖，所以玻璃當白板。白板筆同粉擦响白板度，除非係 Iron Man, 唔係就要去白板面前攞，之後先畫到嘢，有個筆筒就可以唔駛咁轉折。無奈筆筒好多都係圖形，難得搵到個四四方方嘅，Mission Completed!
   
   
2. Keyboard Drawer
   
   
3. Projector: 個 Mon 有時要 Show 俾大家睇，但個 Mon 又唔識轉，叫人坐隔籬一齊睇 Mon 又太遠，Projector 係必須，地方唔大關係，Mini Projector 亦係要求之一。之前見到個 3M, 成五千幾蚊，買唔落手。再四圍搵吓，原來好多平貨都只係5-100流明，略嫌唔夠光。搵到部300流明嘅，再上 YouTube 睇吓效果似乎唔錯。搵到網上面有得賣，重要係香港 Vendor, 連運費 $3499, 係時候完成工程了。等咗兩個禮拜先有貨，但 Set 好之後，一切嘅等待都係值得。
   
   

Different ways to acknowledge positively

如果想正面回應別人，除咗 Yes, 其實有好多字可以用

1. Yes
2. Yep
3. Yeah
4. Right
5. Correct
6. Absolutely
7. Hm hm, uh ha, etc
8. Sure
9. Indeed
10. Exactly
11. I think so
12. You got it
13. You bet
14. You can say that again
15. You said it

關愛座

Priority seat, courtesy seat, 讓有老弱傷殘優先的說，當有人影到放工時間，關愛座空空如也嘅時候，大家就沾沾自喜咁話香港人進步咗。其實有位就座，見到有需要嘅人，不論係唔係坐緊關愛座就讓座，係常識，我唔明一張空空如也嘅關愛座有乜意義...

如果話要進步，咁係唔係要發展到所有交通運輸工具都有靜音車廂，或者女仕専用車廂，先叫進步呢? 定係唔好騷擾或者侵犯到別人係應有嘅常識? 社會文唔文明，唔係在於有幾多規距，而係在於人嘅質素。

BTW, 我支持有女仕専用車廂，好多事預防勝於治療。

Cat Duet

可能細個成日睇加菲猫同埋俏皮扮嘢猫，唔知幾時開始好鐘意貓。前日响電台聽到有首《貓歌》，幾好聽，上網搵吓，因為首歌好多 Meow 响歌詞入面，所以用 Meow 做 Keyword, 點知搵到另一首之前睇過嘅 Cat Duet:

原名 Duetto buffo di due gatti (humorous duet for two cats), 只係用 Meow 啍出個 Melody 出嚟，聽落好簡單，但係其實都幾難唱。

以發音嚟講，a e i o u 差不多用齊，見到第二個男仔忍唔到笑，差少少跌 Watt. 加上全首都係 Meow, 無文字同句子嘅高低輕重音去幫助記憶。而且係二重唱，可以好易俾隔籬啍出嚟嘅聲影響到。

Cat Duet 响 YouTube 度搵到好多版，專業女高音嗰啲，雖然都係重玩味，但到最後都會不忘飊高，勁正!

至於首貓歌，就係呢首:


原來個 Meow 响日文變咗做 Myo, 所以搵錯歌，好彩記得 DJ 提過首歌去過台灣做宣傳，直接用日本+ 台灣+貓歌做 Keyword 就搵到。

改卷

聽聞某中學中一某科某卷有條咁嘅題目:

As a Hong Kong citizen, do you prefer to be ruled under the British government or a government of a special administrative zone under the One Country Two System policy of the PRC Government?

先唔論佢係邊科同問題嘅背景，用18個英文字去形容一個政府，就已經係一個問題，亦都引起咗興趣去改。

Countable Noun
話明係兩制，即係眾數，One Country Two System, 曲線一國一制乎?

Article
A government of a special administrative zone. 乜一個 special administrative zone 可以有好多個 政府?

Wording
香港特區幾時變 HKSAZ?

Redundancy
一國兩制，係中華人民共和國獨有，而特別行政區係一國兩制嘅產物，所以 under the One Country Two System policy of the PRC Government 機本上係多餘。


Symmetry
X government or Y government 或者 government of X or government of Y 都得 X government or government of Y 好古怪。

Meaning
馬英九係香港人，我諗佢剩係想俾台灣政府管，究竟條問題問緊邊個管邊個，我真係攪唔清。

改 1 (論主權)
As a Hong Kong citizen, do you prefer Hong Kong to be ruled by UK or China?

改 2 (論法制)
As a Hong Kong citizen, do you prefer Hong Kong to be ruled under the British Law or the Basic Law?

改 3 (論地位)
As a Hong Kong citizen, do you prefer Hong Kong to be a colony or a special administrative region?

改 4 (論領導)
As a Hong Kong citizen, do you prefer Hong Kong to be ruled by a governor or a chief executive?

總結
一個句子，一個主體。想同時提晒特別行政區、一國兩制、中華人民共和國，太大貪了!

服務

話說老媽子話要借個戶口抽 iBond, 本來想响永隆攪，點知要開理財戶口先攪得，重要到總行申請。好彩分行離總行唔遠，行多幾步就到，跟手個職員話開理財戶口要預約，今日好 Full 吓云云。

嘅然咁忙，我都唔阻住佢哋做嘢，走咗去 HSBC, 等同開戶口兼申請埋 iBond 廿分鐘都唔駛，只係簽兩個名就走得，太好了!

走嘅時候落大雨，好彩條褲夠跣水 (G2000 個 Sales 話係特制)，超大雨都唔會太濕，返到公司用紙巾抹下就攪掂。

政治怪物

被自殺的人遺照，被公開在網上悼念、也被放到街頭悼念。不論本土主意者，還是大中華主意者，請先學識做人，才去做群眾運動，好樣群眾學習。

做人的底線，誰也不容超越。

巧合

2011年: 李娜以 6-4, 7-6 勝出法網
2012年: 上海證券交易所的上證指數開盤時為2346.98點，收市時跌64.89點
2013年: 第64期六合彩攪珠結果為... 三獎64注中，每注派...

或者世界太多事同4/6有關都唔出其，但上天安排嘅密碼，實在都太巧妙!

6 4 24

話說張証已經過咗期好耐，一路都嫌煩而無去續証，因為工作關係，要申請回鄉証。唔知係巧合都命運嘅安排，偏偏就係六四攞証。

廿四週年，似乎九因歌會變成敏感字而被河蟹。本土不本土，愛國不愛國，其實唔太關六四事，就好似同樣係廿四年前嘅 Hillsborough 人踩人事件，不單係利物蒲嘅事，亦係成個球壇嘅事，所以曼聯或者係些路迪，都曾經向死者致敬。

既然唔鐘意响維園點爉燭，咁就响自己喜愛嘅地方點，本土派可以去上水火車站、廣東道、星光大道、金紫荊廣場、山頂，愛國派可以去中聯辦、中旅社。可以嘅話，請讓燭光遍佈成個香港。

Playlist #2

今期追緊嘅日劇有

• 家族游戲
• 神探伽利略2
• 天氣姐姐
• 飛翔情報室
• 深夜烘焙坊
• 最後的灰姑娘
• 幽靈女友
• 35嵗的高中生

變髮

第三次攪負離子，之前第一次响銅鑼灣遇到一個好嘅髮型師，效果做得好好。第二次想再攪嘅時候，髮廊已經唔存在，唯有搵過第二間，第三間，第四間，都係唔得，最後都係返去銅鑼灣整，樓上鋪，效果都有八九成，合格。

今次都係去返銅鑼灣，之前嘅樓上鋪已經不再，再搵過間。有過兩次經驗，今次大概知道要乜，攪咗咁多次，似乎要貴嘅藥水先啱要求，就整咗隻最貴嘅嚟玩，成千蚊落樓，但效果似乎合格，睇吓兩星期後變成點。

而今晚可以洗頭了!

責任

呢個世界，我諗無人比醫護人員壓力大，因為佢哋分分鐘都係搵命搏。所謂醫者父母心，有任何醫療事故，唔開心嘅除咗病人家屬，醫護人員同樣唔開心。如果道歉嘅目的係安慰，咁調查嘅目的就係反省同改進。

以常識嚟講，做錯事就要道歉，係一種負責嘅表現。堂堂一個局長，道一個歉都要諮詢法律意見，重要攪成差唔多八個月。 咁我可唔可以遲八個月先交稅，再同稅局道個歉，就乜事都無? 行政失當得咁離譜，點解唔俾人告得? 响外國，你唔道歉，睇吓有無人告到你甩褲!

可笑嘅係所謂公務員士氣，我唔明點解做唔到事嘅人會有士氣? 無責任感嘅人連做事嘅動力都無，多少少士氣有分別? 最有士氣咪走去叫加薪嘅時候囉，個薪酬趨勢調查制度又輸打贏要，不如廢咗佢啦! 成立個獨立調查委員會都驚有損公務員士氣，決定嘅人係吃大便，還是大便上腦?

Civil Servant, 就係提供服務，無做到嘢就想支人工，除咗懶，無第二個形容詞。回歸前嘅「廉潔高效」公務員隊伍，如今廉潔盡失、高效欠奉。

Credit

Facebook 入面有好多同趣聞有關嘅 Page, 不外乎都係貼吓圖呀，Post 下 Video 咁，朋友一 Like 就可以見到。但係啲 Video 質素差得不得了，通常拎個 Video 嘅 Title 走去 Google 搵，就可以响 YouTube 搵到同一條片，重有高清添!

分享係一份好事，但將人哋嘅片直接咁 Upload 上自己個 Page, Credit 都唔俾返人，User Experience 差之餘，亦都好無品! 唔通樓主覺得 Share 一條 Link 唔會方便過由 YouTube Download 再 Upload 上 Facebook?

Procrastination

好多時，要處理嘅事係要及時處理。一個堅持唔到原則嘅政團，分裂十萬次都唔使恨。「感到驚訝」嗰啲唔該摺埋。

一個人無夢想，同條咸魚有乜分別?

I dream of an Africa which is in peace with itself. I dream of the realization of unity of Africa whereby its leaders, some of whom are highly competent and experienced, can unite in their efforts to improve and to solve the problems of Africa.

I have a dream that one day this nation will rise up and live out the true meaning of its creed: "We hold these truths to be self-evident: that all men are created equal".

愛國愛民

六四晚會，今年係第廿四年，似乎又會同以往一樣，獻花、播某民運人士訪問、唱自由花、搵89年出世嘅人出嚟玩薪火相傳。廿四年呀! 大個仔喇! 已經廿四歲，同你玩咗咁多年，可唔可以有啲新意? 唔係嗌幾句結束一黨專政，就可以當推動咗民主運動，有無實際行動呢?

可能好多人都唔知，支聯會嘅全名係「香港市民支援愛國民主運動聯合會」。呢個名，令我諗起黃子華响97年所講過嘅一句 Slogan: 全港市民熱烈慶祝回歸

十個字有八個字係假嘅。支聯會嘅個簡稱，無咗香港市民，亦無咗愛國民主運動。入面，又有幾多人同事已經變咗質?

電動車

電動車環保，但點解普及唔到? 車價係主因，續航能力亦係一個疑問。咁貴買部行無耐就要叉幾個鐘嘅車，略嫌欠經濟效益。

乜原來到咗2013年，叉電仲係問題? 我哋手中嘅電話、平板、相機等等，通通都要叉電。買呢啲 Gadget, 通常會買/送乜嘢附件? Screen Protector, 套/袋, 士啤電。出街帶士啤電，無電換電，就只係幾秒中嘅事，係常識。咁車呢? 要泊車嗰陣叉電喎...

3年前去法國旅行，响香榭麗舍嘅車行入面，已經 Show 咗有咁嘅 Concept: 入油站，換電，走得。等你慢慢叉? 何不換舊電算數呢? 俾埋錢，都係幾分鐘嘅事。3年前，我哋重講緊 Apple 部 iPhone 3GS 幾咁潮，今日都已經係 Samsung 嘅世界，科技行得咁快，做乜電動車依然停滯不前? 如果車廠想推電動車，就不如聯合起嚟，做個 Standard, 研發相關油站配置，咁我話知你續航能力幾差，總之搵到個油站，入去換舊電，又可以繼嬻旅程。君不見 USB 真係做到洽乎其名，Universal Standard 呀!

至於大陸製造嘅電動的士，避之則吉。

象牙塔

佔中問題攪到好不熱鬧，但似乎都係雷聲大雨點少之作。如今話唔會叫何俊仁辭職公投，會用電子投票，話如果再被人 Hack, 會用返白紙投票云云。明知會再被人 Hack, 咁你就用咪再自己攪啦!

驚用公帑，你佔中要動用嘅警力維持秩序夠要用公帑啦，不如唔好攪! 用公帑做變相公投，受選舉法規管，客觀而公正，係制度容許唔公平無法啫! 被人 Hack 完之後，又要市民响街上又迫又排幾個鐘投票，又有乜謂? 你唔驚唔嘥市民嘅時間，但就驚嘥公帑?! 跟手就話好多謝市民肯排咁耐隊投票，好有代表性，投票機會得來不易云云，Drama 唔係咁推切㗎!

除非選舉系統運作上出問題，否則應以變相公投為優先考慮。咁快就放棄公投，到選舉系統真係出問題嗰日，就真係多得你班「和理非非」之流。如果話董特首、曾特首、同 689 係民主無間道，咁你哋就係中央無間道，葬道香港嘅民主之路。

諗咗一個比較進步嘅運動出嚟，但又執行到咁嘅款，咁不如繼續做你嘅學者，响大學做研究算把啦!

左右手

話說個 Keyboard Drawer 放咗响 Office 好耐 (係用幾本書換返嚟)，一路都以為要鑽窿先將到。今日俾人講一句，好快手就裝好咗。3M 嘅設計係唔同啲!

道德高地

話說 South Park 入面, Mr. Garrison 同 Mr. Slave 係一對戀人。有一日，Mr. Garrison 變成 Mrs. Garrison, 之後佢哋就散咗，因為 Mr. Slave 唔鐘意女人。

同性戀傾向、性別認同障礙、易服，呢啲都有佢嘅定義同成因，唔係一句道德問題就可以解決晒。

教育

追緊《家族遊戲》，一套幾黑暗嘅日劇，但下面嘅一段說話，其實都幾啱香港。

明明離我們最近也是最重要的近代史

為甚麼只在第三學期就匆匆結束

事發還不足一百年的首相暗殺事件

在教科書上只有區區數行描寫

他是在作樣的背景下 又是因為怎樣的主張才被殺的

這些才是我們應該學習的東西吧

可是沒有人覺得這有甚麼不妥

那是因為就算進行填鴨式教育

社會也在隨之運作著

不過這種扭曲 最後以喪失個性為表象呈現出來

只能模糊地理解自我走向的我們

對自己失去了信心

繼而害怕迎戰 開始附和他人

最經典的例子 就是人們被媒體玩弄

只用片面的意見對事物蓋棺定論

我們在不知不覺中 被剝奪了個性

成為了那種不依賴誰

就活不下去的毫無骨氣可言的人

接受著這種教育 只會粉飾太平的人們

在無意識中

萌生出不會為之愧疚的惡意

然后卑鄙地逼迫那些弱者

殖民地

香港要交軍費俾英國，但政策唔太駛考慮英國或其企業利益。
香港唔駛交軍費俾中國，但政策要考慮中央感受。
如果錢可以換取自由，我買!

Communication 101

話說要去 Present 一件事，就要知道邊個係 Target Audience.

Google 响 Chrome 嘅輸入法工具度加咗「廣東話輸入法」，重拍埋片添。本來係個幾好嘅工具，但係條片唔得。

當你聽到:「Add 廣東話輸入法 by selecting extensions.」你有咩感覺?

點解唔講 "Add Cantonese input method by selecting extensions..."
又或者講:「要加入廣東話輸入法，首先揀 Extensions...」

對於一個香港人嚟講，廣東話夾雜英文係好自然，但英文帶純正嘅廣東話，成件事就好哽耳。

成條片嘅「廣東話輸入法」，就變成好似外星人咁，步驟關係又要不斷重複，攪到好似真係外星人先用咁。拍返條廣東話版本會好好多，你又唔係唔識講吖!

當然，如果原來係俾外國人用嘅，唔好意思，咁當我無寫過。

Update @ 2013-5-13:
原來有廣東話版本

陰謀論

用半年搜證，用年半去通緝，都真係搵鬼信，香港警隊幾時開始咁無效率?
或者，一位裁判官响菲傭打15蚊斧頭案嘅評語比較有見地: Does the police in Hong Kong have nothing else to do?

你話唔知佢係佔中義工，乜警隊情報咁流嘅咩? 擺到明係政治打壓，係你就認咗佢啦! 咩陰唔陰謀論啫，維隱呢啲嘢，一向都係 lai yin di!

Gigapix Trial

今日，原來諗住影億萬像素嘅全景圖，但係一來天氣唔太好，二來唔知點解返到屋企先知，第一行嘅相唔見咗，唯有下次得閒再影。

好彩影咗單行香港島嘅 Skyline 做後備，唔係嘅話真係 Total Lost

跟手見到個鴨頭，就影多幅有隻鴨嘅全景圖

不過嚟同走嗰陣都好大陣象，乜香港人真係咁鐘意隻鴨? 俾我玩嘅話，我會將隻鴨每個鐘過一過海，效果會更加好。起碼個商場入口可以散一散啲影相嘅人潮。

同場加映: Complex Pile Under ICC

板燒雞麥趣飯 vs. 野菜煎雞飯

飯
板燒雞麥趣飯係用泰國米再加少少粟米。
野菜煎雞飯用珍珠米，飯量多啲，會飽肚少少。

雞
板燒雞麥趣飯以乎一定係雞脾，但偏咸同偏辣，應該同個板燒雞腿包一樣料。
野菜煎雞飯就應該無特別腌過，只可以話係雞有雞味。

汁
都係同一隻汁，無分別。

菜
板燒雞麥趣飯只係配西蘭花。
野菜煎雞飯除咗西蘭花，外加椰菜花同甘筍。

服務
板燒雞麥趣飯剩係夜晚6點後先有。
野菜煎雞飯全天候供應，重可以叫厨房去雞皮同走汁。

價錢
板燒雞麥趣飯餐: $29
野菜煎雞飯餐: $25 (下午茶) $32 (正價)

結論
板燒雞麥趣飯只可以話入得口，如果想試吓一舊又咸又辣又酸 (汁嘅問題) 嘅雞係點，呢個飯幫到你。

那誰... 在浪費納稅人的金錢?

當王議員大大聲咁話拉布拉咗1530萬去，唔知又係邊個將1億送俾大陸「賑災」? 嗰1530萬，只係九牛一毛。「捐」咗嗰一億，對大陸嚟講，都係九牛一毛。但如果用反响香港，可以做多好多嘢。

• 用嚟買明哥嘅飯票，可以幫到過萬個低收入人士每日一餐溫飽。
• 可以資助2000大學生一年學費。
• 追加多10%，可以令全部獲批車船津貼嘅學生都攞到全額津貼。
• 追加多20%，可以補貼6條離島渡輪航線3年。
• 追加多30%，可以資助食物銀行成年嘅開支。
• 追加多40%，可以幫15萬個領取綜援個公屋住戶交租金連差餉。
• 追加多50%，可以攪多次五區公投。
• 追加多60%，可以提供多1200個護士培訓名額。
• 追加多70%，可以全數資助5000名癌症病人買自費抗癌藥。