立法會選舉 2012 賽後分析

泛民支持者，鐘意中間路線 (典型 Bell Shape)。而建制派，配票係配俾根正苗紅嘅黨派。

九龍嘅泛民選民一東一西，各走極端。而香港島就唔太接受行動派。

地區直選

• 選票約有 1,838,722 票
• 投票率為 53.05%
• 當中 1,810,984 票有效
• 廢票率大約 1.51%

超級區議會

• 選票約有 1,672,793 票
• 投票率為 51.95%
• 當中 1,591,872 票有效
• 廢票率大約 4.84%
• 假設投直選嘅人理應投埋超級區議會
• 投票率差距為 1.1%, 亦即係拒投超級區議會嘅人
• 減去地區直選嘅廢票率 (標準廢票率)，再加投票率差別，即係大約 4.43% 嘅人非常不滿一人兩票

An Interesting Experience

諗住輕裝投票，銀包都唔帶，拎將身份證就去投票站。但响投票站門口，隻手伸入褲袋一摸，乜個證件套嘅 Texture 咁唔同嘅? 咪住先，係八達通嚟... 暈... 折返...

回一回帶，入到票站，排隊拎選票之前，俾工作人員截住，問係咪投票... 係，唔通我嚟托咩，Show 一 Show 身份證，指我去排隊。本來想拒領功能組別票，但佢係都要夾埋張選票俾我。對於我呢個怕麻煩嘅人嚟講，係絕對可以將張白票掉落票箱。但有好多事，麻煩都要做。

投完直選票，問可以點處置張功能組別票，票站人員指我去票站主任度，坐低等一陣，主任話程序關係，搵咗票站監察人員做証，問我係咪放棄呢個投票權利，答咗係之後，主任就用印咗個 Unused 嘅字樣落張選票到，走得! 經過今次，又學到嘢。

其實响等嘅其間，見到有人因為揸皺咗張功能組別票想放入票箱被票站人員阻止。我覺得要相信制度，制度本身就可以有方法去表達到你嘅意見。到最後，票站人員咪要俾多張選票佢再投過... 民主，就係一個浪費同耗時嘅制度，但係，我鐘意!

那誰... 要有所犧牲

有人講過：「要抗爭，就要有所犧牲。」

學民思潮嘅細路唔可以睇少，黃同學講過：「我哋係將生活搬到政府總部。」即係，佢哋已經預咗係一場持久戰，唔係一時三刻每日去政府總部幾個鐘之後返屋企就得，而係要長期留守，以示決心，同你死過。

做抗爭，就係要犧牲自己，做對嘅事，帶領群眾。一味顧住別人嘅感受，係做唔到領袖。因為群眾到最後係受壓迫嘅一群，係沉默嘅大多數。要有人企出嚟，為佢哋說話，替佢哋出氣，等佢哋覺得有希望，群眾就會出埋嚟。

群眾亦係無耐性同愚昧嘅，有少少甜頭，就會收貨。所以，當政府有所讓步，就不得不停止佔領。一來，無人想見到絶食者出事。二來，一星期嚟講，似乎係香港人最大嘅耐性。未來嘅發展，我相信會係發揮香港人善忘嘅本色，繼續生活。但要喚起記憶，唔係一件難事，當休養生息後，再叫香港人出嚟，只要揀啱日子，亦唔係一件難事。

今日係選舉日，我只會叫大家去投票，至於投常態哋支持政府政策嘅名單，定咁多年嚟犧牲咗張回鄉咭，入咗去中聯辦幫你成功爭取多一票嘅名單，還是可以犧牲議席讓大家公投，帶領群眾去抗爭嘅名單，就俾大家用自己嘅獨立思考去決定。

It's Wrong From Day 1

德育及國民教育，分兩部份。

德育，係德智體群美五育之一，我諗全港中小學一向都有做開，無需要獨立成科。

國民教育，應係用嚟認識國情、歷史咁，歷史可以响中史教，但唔知點解，中史係選修科。國情又可以响通識科、常識科教。要加埋德育獨立成科，根本就係牽強。

但當「中國模式」出現咗之後，原來係洗腦愛國愛黨教育，唱國歌升國旗要感動流淚。有啲人跟住又話唔係國民教育，只係公民教育，嘩! 又係一向有做嘅嘢，都話咗唔使獨立成科咯!

跟手又話可以唔使跟指引教，唔啱使嘅部分可以唔教咁... 咁除咗中史同國情，就係愛國嗰 Part 唔啱使，但係頭先都講話咗中史同國情可以响其他科度做，你獨立成科做乜鬼嘢啫?!

由頭至尾，都係唔明點解你要獨立成科啫! 洗腦嗰 Part 似乎俾人個感覺係唯一獨立成科嘅理由! 所有話要認識國情嗰啲，話唔知邊個洗邊個腦嗰啲，唔該解一解點解要獨立成科先再講。

黃同學同陳小姐好嘢呀，俾人勸咗咁多次都唔入個乜乜委員會，唔理邊個拋出乜嘢折衷方案，都立場清晰地話要撤科。唔似有啲政黨咁俾多五個功能組別議席你去俾全港選民投票就走去妥協。要講政治倫理，黃同學同陳小姐高好多班! (定係因為佢哋唔係政客，所以唔使理政治係妥協嘅藝術?)

那誰... 要投票給誰

你知道嗎? 民主係一場浪費而又無效率嘅遊戲。就好似今次咁，選舉事務處寄咗:

• 投票通知卡
• 投票站地圖
• 一人兩票傳單
• 廉潔選舉傳單
• 直選候選人簡介
• 功能界別候選人簡介

都已經有成3個銀仔厚

再加埋一堆候選人自己印嘅政綱，屋企有3票，就有機會收到一式三份添

高過成廿個銀仔呀大哥!

但係做一場咁大嘅龍鳯，目的就只係為咗俾人民選出覺得最合適嘅代表，為人民發聲，呢一種嘅間接民主，選出嚟嘅議員，亦可稱為「代議仕」。而成個制度，亦稱為「代議政制」。

星期日選出嚟嘅立法會議員，作用就係用嚟制衡行政機關。即係今時今日唔理市民反對，硬推國民教育嗰個政府。而要制衡，即係會有浪費，所謂「費力把事拖」嘅拉布，就係當中嘅「表表者」。

至於神聖一票要俾一個所有政府議案都 Say Yes 嗰 D, 定係十年前 Say 咗 No 攪到依家都左右不是人嗰 D, 還是爭取咗廿幾年民主都只係為咗廢除功能組別而贊成增加功能組別嗰 D，抑或係俾人話係收咗共產黨錢但又打正旗號去中聯辦叫共產黨下台嗰 D, 就係閣下受過教育，經過思考後嘅選擇。

P.S. 睇吓學民思潮呢個呼籲

【佔領政總呼籲】
1. 因環保關係，請各位市民停止送上紙杯
2. 若市民有意捐增食水，請盡量購買大支裝，方便佔領物資處分發管理。
3. 帶同你的行裝和所需物品，今晚就過來跟我們一起佔領政總！

連中學生都識環保，一式三份嗰 D 水平真係連中學生都不如。

No Brainer

有呢兩個選舉承諾，重有更好嘅選擇?

1. 如若當選，必會由宣誓就職一刻開始，利用一切方法，包括拉布等議會抗爭，直至梁振英無條件撤回「國民教育科」為止。
2. 倘能5區均有成員晉身立法會，「23條立法來時，我們一定會辭職，5區公投！」

每日一字 15

响學術層面，係有好多字去形容常識，Computer Science 有 Pigeon Hole Principle, Mathematics 有 Race Track Principle.

Psychology 入面有一科係講 Memory, 有兩個專有名詞唔可以唔識，一個係 Primacy Effect, 一個係 Recency Effect. 講緊嘅係我哋記嘢嗰陣，通常都係記得頭嗰一兩個同尾嗰一兩 Items, 其他中間嗰 D 會無乜印象。係常識嚟㗎，但就係有呢兩個專有名詞。

呢排選舉，就講一 D 選舉嘅例子。黃毓民响四年立法會任期做過 D 乜? 咪就係掟蕉同拉布。好簡單嘅例子，現買現用。

咁民主黨廿年嚟做過乜，你又有乜嘢記憶呢? 其他政黨，你又對佢哋嘅印象係乜呢?

第二票

有號稱民主嘅黨派話自己幫市民爭取到一人兩票，咁就衍生出一個好簡單嘅邏輯問題: 選舉有三個步驟，提名、參選同投票。第二票嘅產生，就偏偏無被市民去提名同參選，剩得個投票權。直接 D 嚟講，就係假民主。

點解提名權同參選權同樣重要? 你睇吓龐一鳴、是但男、林依麗呢 D, 俾咗5萬蚊，就可以上電台、電視台盡抒已見。可能你會話呢 D 係騎呢人，都係上吓電視駁出位。但係其實一個文明開放嘅社會，就係可以包容呢 D 騎呢人，而無可否認嘅係，騎呢人係社會組成嘅一部份，佢哋都有佢哋要代表嘅一群。

第二票其實可能就係所謂普選特首嘅翻版，即係剩得返投票權嘅選舉。呢個唔係就係泛民一真都反對嘅制度咩? 大家唔好唔記得，投票就係授權嘅象徵，你投咗第二票，就即係話你接受呢種模式嘅「普選」，咁到時傾普選特首嘅時候，中央就有好大條道理咁將你嘅提名權同參選權剝奪。

第二票將好多選民都推向無奈嘅選擇，响台灣叫做含淚投票。但係為咗未來，呢一票絕對不能投。

那誰... 是人民力量

响極權國家，就只有透過「人民力量」或者「軍事政變」去推翻現有政權。

「人民力量」泛指以大型遊行示威集會同罷工等一連串運動，冒求推翻現政權，重點在於平民百姓嘅參與，同「軍事政變」相對。

响民主社會，人民定期以選票合法有序推翻現有政權，正常情況下，人民力量無需要出現。

人民力量，就如民主、自由、公義，不在專屬任何政治團體。
人民力量，就係你同我。

但如果有人打正人民力量旗號，身體力行，為人民發聲，我樂意支持。

每日一字 14

今日响明珠台聽到一句: "I bet the house on that." 中譯 - 我落咗重注

查咗一陣，有唔少文章都有呢句 Phrase, 但唔覺有人去解。但查查吓，見到 "bet the farm", Oxford 係咁解嘅:

risk everything that one owns on a bet, investment, or enterprise

叫 "bet the ranch" 都得，意思一樣，不過少人用 D.

再查一查，大概嚟自賭啤，Urban Dictionary 係咁解:

To put up everything you have, while gambling in a card game.

可能時移世易，無乜人有田有地，最多得間屋，"bet the house" 似乎較為切合現代情況。

利是

呢排發現有好多利是收咗响櫃桶，我諗都有好多年歷史，當中不乏二十大圓，亦偶有紅衫魚嘅出現，而大牛、金牛等應該都係新年利是。除咗新年收嘅，亦有不少都係雙喜封面，似乎婚宴嘅回禮亦係其中一個重要來源。

我諗要拆晒佢會拆到手軟，所以我決定响洗晒之前，都唔去㩒機，實得清咗佢。都差唔多成個月，似乎係證明緊電子貨幣，令生活唔太需要現金。

每日一字 13

Patronize - 中譯: 保護,贊助,獎勵,光顧 <商店等>
特別少少嘅解釋: 對<人>擺出施恩的態度


字根為 Patron - 中譯: 贊助人[團體],支援者,保護者,獎勵者,長期顧客

"a lord-master, a protector," c.1300, from O.Fr. patrun (12c.), from M.L. patronus "patron saint, bestower of a benefice, lord, master, model, pattern," from L. patronus "defender, protector, advocate," from pater (gen. patris) "father." Meaning "one who advances the cause" (of an artist, institution, etc.), usually by the person's wealth and power, is attested from late 14c.; "commonly a wretch who supports with insolence, and is paid with flattery" [Johnson]. Commercial sense of "regular customer" first recorded c.1600. Patron saint (1717) was originally simply patron (late 14c.).

衍生出 Patriot - 中譯: 愛國者, Patriotic - 中譯: 愛國
Patriotic Education 亦即係愛國教育

德育及國民教育 - 英譯: Moral and Civic Education
淪為愛國教育，淪為 Propaganda - 中譯: (動機不良)宣傳


最近有150頓聚丙烯膠粒因為十號風球由貨櫃吹咗落嚟，膠粒飄流到各永灘，難得各環保團體、政黨、討論區發起嘅清潔運動，市民一呼百應，呢 D 咪就係成功嘅 Civic Education - 中譯: 公民教育。好多嘢，唔需要特別開一科去教。

每日一字 12

neat - 中譯: 整潔

1540s, "clean, free from dirt," from Anglo-Fr. neit, M.Fr. net "clear, pure," from L. nitidus "well-favored, elegant, trim," lit. "gleaming," from nitere "to shine," from PIE root *nei- "to shine" (cf. M.Ir. niam "gleam, splendor," niamda "shining;" O.Ir. noib "holy," niab "strength;" Welsh nwyfiant "gleam, splendor").

Meaning "inclined to be tidy" is from 1570s. Of liquor, "straight," c.1800, from meaning "unadulterated" (of wine), which is first attested 1570s. Informal sense of "very good" first recorded 1934 in American English; variant neato is teenager slang, first recorded 1968. Related: Neatly; neatness.

另一個用法: 「正斗」

例句: It's neat - 中譯: 件事好正

話說成日落個客度，會帶好多線、手指、線、手指、線、手指... 等等，搵起嚟都唔易。响淘寶見到 COCOON GRID-IT Organizer, 除咗係好正嘅 Neat, 仲係整潔嘅 Neat!

洗腦

「港人港地」又話未有需要，個花棚我都當你真心唔記得，但你個「德育及國民教育科」，有乜咁巴閉非上馬不可呢?

當日係邊個話「教育制度需要休養生息。」依家攪科新科，又叫教師唔鐘意本《中國模式》就自己編教材，原來聽話嗰 D 就有得休養生息，唔聽話嗰 D 就做到隻積。幾萬人遊行，要實事求事，就得出一個委員會去俾意見，口口聲聲話聽民意喎!

一次又一次違反選舉政綱，呢 D 唔係叫無誠信咁係乜!

韋森持

8號風球，對我嘅影響不大，因為我係做 IT 嘅，所有嘢都可以 Remote 做，唔使返工唔代表唔使做嘢。何況難得 Office 可以咁清靜，可以專心做嘢，無特別早走到。

不過，咁多年嚟，天文台對於8號風球嘅拿捏都係好差! 尤其係呢句兩點鐘發出嘅新聞稿:

三號強風訊號現正生效。天文台考慮於下午5時至8時，改發八號烈風或暴風訊號。

我唔知天文台嗰條 formula 有幾咁 sophisticated, 以前都可以好精確咁話响「兩小時內改掛八號烈風或暴風訊號」，做乜今次個 window 成三個鐘咁無信心呢? 個風又唔係快，又唔係好飄忽。市民唔係好貪心㗎咋，唔使咩 99.999% 精確，只係希望返屋企嗰陣唔駛趕船、塞車、迫地鐵。「民生無小事」，呢 D 都係民生嘅一部份。

另外，無線新聞班男記者去晒邊? 做乜個個响街吹風報導新聞嘅都係女記者? 想畫面好睇? 想俾觀眾感受個風有幾強? 大家有眼睇到你後面 D 樹郁得幾勁，浪拍得幾高，唔使折磨班女記者啫!

每日一字 11

Confidence - 中譯: 信任;信心,自信;秘密

early 15c., from M.Fr. confidence or directly from L. confidentia, from confidentem (nom. confidens) "firmly trusting, bold," prp. of confidere "to have full trust or reliance," from com-, intensive prefix (see com-), + fidere "to trust" (see faith). For sense of "swindle" see con (3).

(論語/顏淵第十二)

子貢問「政」。子曰：「足食，足兵，民信之矣。」子貢曰：「必不得已而去，於斯三者何先？」曰：「去兵。」子貢曰：「必不得已而去，於斯二者何先？」曰：「去食。自古皆有死，民無信不立。」

一個人可信，先可以同佢分享秘密。亦衍生出 Confidential (中譯: 機密)

-al
suffix forming adjectives from nouns or other adjectives, "of, like, related to," Middle English -al, -el, from French or directly from L. -alis (see -al (2)).

再變出 Confidentiality (中譯: 保密;機密性，讀 ,kɔnfə,dentʃi:'æləti: [, 為次重音 ' 為重音 ə 為模糊原音])

-ity
suffix forming abstract nouns from adjectives, meaning "condition or quality of being ______," from M.E. -ite, from O.Fr. -ité and directly from L. -itatem (nom. -itas), suffix denoting state or condition, composed of connective -i- + -tas (see -ty (2)).

笑話兩則

話說同事們很喜歡食午飯玩電話...

待應啊姐: G 餐
無人理...
待應啊姐: G 餐
我指住叫咗 G 餐嘅嗰位同事
待應啊姐: G 餐呀! 下次 WhatsApp 你!

話說公司棟大廈有22層，公司位於11字，所以電梯經常會停在公司那層再開一開門

同事 A: 點解個𨋢門成日自己打開嘅?
同事 B: 因為有鬼囉!
同事 A: 真係㗎?

每日一字 10

𠾍，可以係動詞。例如話將啲嘢𠾍晒响度，即係話啲嘢好隨便週圍咁放响度。
𠾍，又可以係形容詞。例如話一個人好𠾍，即係話嗰個人好懶散。

捩，係動詞，有扭轉嘅意思，唐代發音係 let.

如果一件事捩咁𠾍，即係將件事扭扭擰擰、懶懶散散咁做，可以想像到係幾咁亂。

畢加索

要睇大師嘅作品，上網可以睇到晒。
去畫展，可以趁機去做吓功課，了解作品嘅背景故事，現場睇嘅時候，另有一番味道。

Perfect Notebooks 2

Toshiba Portege R830 - 1.4 kg = $8,000
Fujitsu Lifebook SH771 - 1.3 kg = $13,000
Panasonic Let's Note SX1 - 1.2 kg = $18,800

$5,000 per 100 mg

睇落好貴，但當拎上手，貴得有道理!

遊行文化

話說，2003 同 2004 年嘅遊行，人數多，但秩序井然，甚至可以見到可以發展到外國遊行嘅嘉年華會 Feel. 但時移勢逆，人數不及當年，但比當年亂。警方話遊行人士插隊、街站太多云云。遊行人士又指責警方唔開路咁。我都廢事講咩大道理，有偏見嘅人，唔會去接受另一方嘅觀點。自己睇圖再反省各方嘅心態:

人數，等 HKUPOP 再 Release Video 先慢慢計

Fashion and Taste

話說幅眼鏡都戴咗好耐，想睇吓有乜款，總括嚟講，3款鏡框佔咗9成9選擇

1. 黑色粗框
2. 無框
3. 三邊黑框

如果全世界都戴同一幅眼鏡叫合潮流同有品味, 咁就算啦!

Perfect Notebooks

要唔揹背囊做嘢，唯一方法係一部輕便嘅 Notebook. 話說 Mac Book Air 出咗之後，就出現咗所話嘅 Ultra Notebook. 但係要做到可以帶出街去做嘢，需要嘅係:

1. USB Port x 3
1. 一個插 3G 手指
2. 一個插 Mouse
3. 一個插 Mobile Hard Disk 或者其他 Device
2. VGA Port: 駁 Projector 用，HDMI => VGA 唔係一個 Option, 咪又係帶多件 Accessories
3. RJ45 Port: 駁公司或者客嘅 Network 用，Dongle 一樣唔係 Option
4. >4GB Memory: 行 VPC 用
5. >256 GB Hard Disk: 基本配備
6. ~ 1KG: 越輕越好，重過 1.4KG 唔太駛諗

但如果唔係工作用而係旅行用，買部 Surface 夠晒用!

集體回憶

廿三年前好多細路都見到嘅血腥場面，形成童年陰影，事件亦漫延到學校，包括美術科要畫六四嘅感受，音樂堂唱《愛自由》等歌曲，令印象更加深刻。廿三年後，細路都長大，成為社會嘅支柱，可能錢可以解決到生活上嘅需要，但要佢哋都唔記得呢 D 場面，錢係解決唔到嘅問題。所以，不論中國發展幾咁起飛，只要中共一日唔平反六四，呢班細路都唔會忘記中央政府做過嘅事。

不想回憶
未敢忘記

忘不了的，留不了不死意識，深深相信始終會變真某年某夕
來自你我的心，記著吧！

我也銘記我起點　不會變

不談公事

d9j07w5q4.blogspot.com

團購餐

話說老媽子鐘意週圍食，成日去團購見到有優惠問我一唔一齊去食。
以前都唔想貪小便宜，去食 D 粗製濫造嘅嘢。
前排俾人點醒，其實可以當係陪吓老媽子做佢鐘意做嘅事，未嘗唔係另一個角度。
何況，呢幾次嘅餐廳亦不見得係粗製濫造。
之前去過《老地坊》，真材實料，尤其係燉湯，唔錯!
今晚去咗《竹源越南餐廳》，好大份的說，應該夠三個人食，軟殼蟹一流!

那誰... 桿衛核心價值

話說五區公投，衍生出立法會遞補機制，經過上年七一，數萬名市民表明唔支持。

今日嘅議席出缺安排條例草案，基本論調不變，就係唔想議員再辭職引發變相公投，尤其超級區議會，只要一個人辭職，就可以引發公投。當然，做得超級區議會嘅，基本上都唔會辭職，但實際上，政府都唔想呢個情況再發生。

議會內嘅拉布戰，就係要將不合公義嘅法案拖延，繼而癱瘓政府施政，係議會抗爭嘅重要一環。剝奪議員辭職再選，或者剝奪公民為辭職議員再授權嘅權利，係不公義嘅法案。

選擇終止審議，進行表決，係不公義嘅裁決。

話會桿衛香港核心價值嗰 D, 重唔出嚟講嘢?!

婚宴

老朋友結婚
遇著一班舊同事
撞見一位學生
食咗一餐豐富嘅晚飯
尤其係椰王燉官燕
吃不了美點雙輝
搭尾班船再慢步回家

剛才太多人，欠了您一句：「恭喜！」

祝：新婚愉快！

旺角行

話說响團購買咗 D 嘢，要去到旺角提貨，但無留意日子，上到去得個吉。橫豎到咗旺角，行吓老地方: Chic 之堡同信和。

Chic 之堡都好似幾年無去，似乎已經面目全非，全部都係賣潮服，動漫週邊已經唔見晒。

信和又係另一番景象，買日劇嘅幾乎失踪，行行吓見到忍者亂太郎真人版?! Hmmm... 唔知 PPS 又有無呢，唔買住，返屋企睇吓先。再行行吓，咦! HunterxHunter 嘅砌圖?! 日版紀念版只係百六蚊咋! 可惜無現金，似乎今日都係買唔到嘢。不如問吓個天，睇吓我出咗信和之後，見到 104 先定櫃員機先。

到最後 104 好快咁响面前出現咗，104 响左邊，櫃員機响右邊，唔使諗左轉飛奔上咗架 104。返到屋企，忍者亂太郎亦都响 PPS 睇埋。

雜記 2

呢排成日去 MS 响 Cyberport 嘅 Office, 個 Receptionist 好 Pro, 原來佢一早已經記得我個名。

五月第一個禮拜，有三餐係約人出街食晚飯。有生日飯、去澳門做 Training 順便 Meet up Macau Friends, 重有派帖嘅飯。

派帖飯其中一位係師傅嚟，殿堂級嗰隻。好多時我知嘅理論，佢已經實踐過。今次食飯，又有錢入袋!

派帖飯當晚嘅另外一件事，係買咗個磅，減磅計劃開始了!

奇蹟

認識劉謙係幾年前响台灣節目「綜㙯大哥大」嘅一個「大魔競」嘅比賽環節。魔術係一樣令人著迷嘅事，但說穿了，一切都係假嘅。嗰陣差唔多每個禮拜都睇到佢嘅表演，每次都有驚喜。

星期五晚同同事一齊去睇劉謙嘅表演，最前位置嘅飛一早賣晒，唯有坐後少少。到咗之後，都唔係太後，都睇到個舞台。之前已經聽過，劉謙嘅舞台魔術並唔凸出，所以唔太精彩已經預咗，加埋音響太大聲，前半 Part 麻麻地。後半 Part 有近景魔術、有拿手好戲、有配搭小故事，係扣人心弦係表演。

喜愛劉謙嘅原因係佢嘅 Showmanship。人生不外乎尋找 Drama, 劉謙嘅表演充滿 Drama, 我鐘意!

南非之旅 - 後記

第二次同師弟去旅行，無乜特別準備，只係一早 Book 好晒所有 Tours 同 B&B, 去嗰日 Pack 好衫同電子裝備，走得!

記事

• 機場竟然無俾HSBC攻佔到
• 南非其實係一個頗為發達嘅國家
• 如果對種族隔籬政策嘅歷史有興趣，約翰內斯堡係一個啱睇嘅城市
• 食嘢比起其他發逹國家唔貴，但貴香港少少
• 食西餐多，即係漢堡包薯條鋸扒之類
• 唔記得帶維他命丸
  响南非買咗樽維他命 C, 大概係香港8折
• 比開恩茲、芬蘭都要靚嘅星空
  
  
• 羚羊到處都係，唔駛一開始見到就太奮

報銷

• 唔見咗一個鎖
  响南非一落機就唔見咗，好彩行李入面無唔見到嘢
• 報銷咗USB相機電池叉電器
  當做完緊急後備之後，叉唔到電
• 報銷咗個喼嘅手拖把手
  可能係响吉普車上面唔知點樣撞到

貼士

• 帶驅蚊手帶，180個鐘嗰隻，成個 Trip 都無俾蚊咬過
• 入境紙好似唔太使填 (可能係我本英國護照嘅關係)
• 南非 RAND 同港幣差唔多 1:1
• 插頭係舊式英式三腳圓頭
• 去 Safari 有好多唔同嘅團，住宿有响國家公園出面同入面之分，住响入面嘅叫 Rest Camp. 部份 Rest Camp 有 Night Game Drive, 應該可以見到多 D 大貓嘅活動
• Rest Camp 入面可以帶樽買水，1 RAND/L, 如果係都要响舖頭入面買支裝水，盛惠 10 RAND/L
• 响 Safari, 每天都要早睡早起，唔駛帶乜嘢娛樂
• 影動物要拍片，影相要高倍數勁 Zoom 鏡頭
• 其實除咗動物之外，影風景都係一個唔錯嘅選擇

統計

• 影咗幾唔多 6GB 嘅相同片
• 成個行程萬五蚊唔駛

Earth Hour 2012

今年，終於入到洲際酒店影 Time Lapse. 鳴謝友人請咗我食餐好滿足嘅晚餐!

7點左右到，先開餐。點咗個 Veggie Burger, 皆因去南非咗陣食咗好多餐雞，再食唔太想食 Chicken Burger. 一杯 Hot Chocolate 加棉花糖加 Cream, 嘩! 肥! Veggie Burger 加薯條再配沙津，其實唔太肥，但係對我嚟講好豐富! 之後，餐飲嘅同事問想唔想食甜品，之前睇 Menu, 有 Cheese Cake 的說，當然嗌 Cheese Cake. 酒店係唔同 D, 第3次响香港食到有芝士味嘅 Cheese Cake!

食食吓 Cheese Cake, 做乜個中銀無著燈? 乜咁快開始咩?! 唔係，原來係幻彩詠香江嘅 Lighting, 雖然話就話今晚取消，但大廈嘅 Lighting Program 似乎就無變。但為免有意外，好快咁食玩件 Cheese Cake, 著手 Set 機。

今年洲際酒店對出海傍，有架掃興嘅躉船，响搵啱角度之際，國金突然熄咗燈喎! 重有15分鐘喎大哥，乜今年咁環保呀你! 快快手咁 Set 好開機，避免再有其他大廈提早熄燈。Set 好一部，去酒店門口 Set 埋第二部，跟住就等...

8點半，陸續熄燈，跟住有架直昇機飛嚟飛去，乜咁環保... 原來慳咗 D Carbon Footprint 係俾你去坐直昇機㗎... 9點半，陸續開燈。9點9, 國金重未有反應，似乎今晚熄咗唔會再開，鳴金收兵，返屋企做 Editing. 為咗消化夜晚嗰餐，行去碼頭，再行返屋企，應該幫到少少啩...

http://youtu.be/_BLMuOrl6L8

南非之旅 - 回程

夜晚唔係瞓得咁好，加上師弟諗晚早瞓，好早就俾梳洗聲整醒。响床度爭扎咗一陣，到最後都係瞓唔番，要起身。換好衫，去食早餐，老闆娘親手煮嘅，正! 師弟早我一步，佢差不多食完，我等緊嘅時候，師弟再去食碗 Cereal, 不過唔知點解咁雞手鴨腳，攪到成枱都係...

我都未食完早餐，就已經有人嚟準備接我哋我機場 (其實係第一日嗰位導遊)，比原定時間早咗半個鐘到，呢 D 咪叫服務囉! 我就好快咁完成咗個小果盤，走返入房準備行李。一切準備好，導遊同老闆娘傾咗幾句，原來老闆娘又識國泰個機司云云，似乎老闆娘識得唔少人。去機場要9個字左右，時間尚早，但搵唔到 Check-in 嘅地方，剩係見到 Self-service 嘅 Check-in Kiosk. 不過，都 Check-in 咗先，再揀埋位，師弟同我都鐘意走廊位，所以分開咗坐。跟住問人行李點寄艙，原來係响 Terminal B... 我哋响 Terminal A, 即係個導遊唔太清楚國泰响邊個 Terminal.

寄好艙，出境，師弟買手信，即係非洲嗰 D 飾物同食物。我就谷咗3日嘅傷風發作，無乜心情睇。買完咗都重有排，師弟入咗 Lounge 度，我响候機室影 Time Lapse, 師弟問我除咗影 Time Lapse, 重會做乜... 無囉! Anyway, 登機坐好，由於同嚟嗰程嘅飛機係同一型號，又係坐嗰張爛鬼凳。但完全無心情，戴上眼罩，閉目養神。飛咗上天好之後，派花生?! 乜唔係 Lunch 咩? 唔理，好快咁食完，瞓!

我諗一個鐘左右，Lunch 到，俾氣味整醒，剛剛派到我個位，要咗個咕嚕雞球飯，唔錯! 食完再瞓。一個鐘醒次，張爛鬼凳瞓唔得舒服，再俾萬惡嘅杯麵騷擾，都咁做有休息過。8個鐘後，唔太再想瞓，睇吓有乜睇，有一套嘢講 Trip Advisor D Reviewer 點樣影響 Business, 似乎 D 寫惡評嘅人唔太識得享受旅行，真係太高要求囉! 另外有位叫 Dynamo 嘅魔術師，似乎幾好睇，得兩集，都好吸引。

睇完片，飛機要降落，鼻腔感到劇痛，但耳仔無事，唔通反唔到壓? 但鼻腔點反壓㗎? 當痛到極點嘅時候，無計，就試吓好似潛水咁反，嘩! 反完壓，舒服晒! 似乎係鼻水唔知塞住咗邊度。落機之後，等行李，等咗好耐，等到師弟嗰箱 Fragile 嘅紅酒出嚟都未見到我件行李。

過多一陣，終於見到，之前個手抽壞咗，想再試吓用唔用得。都係唔得，師弟建議搵國泰整，話唔定有得賠云云。果然，整都唔整就一舊半了事。其實唔係一個好嘅解決方法，你整好咗我唔駛成袋咗手抽返屋企嘛...

搭A11, 返到信德，係返工時間，响屋企沖咗個涼瞓覺。食完飯，清返一個星期未睇嘅片，但實在太眼瞓，9點左右開始昏睡12小時到第二朝先起身。

南非之旅 - 尋找花豹

又係4點半，今晚比噚晚瞓得少，都係矇矇鬆鬆咁出發。响車上面都係合埋眼，直到，導遊停咗車，話見到有豹，成車人都醒晒。我諗，以前原始人打獵嘅心情都係大同小異。初時，因為草叢太高，大家都只係見到條尾，跟住我哋兜前兜後，隻豹一支箭咁飛出馬路，走咗去對面草叢。不過大家心滿意足，因為豹實在太難搵! 睇完豹，Big 5 (犀牛、水牛、大象、獅子、花豹)全部見過同影過相，導遊亦都兜咗幾個鐘先出 Safari.

之後大家去食早餐，原來間酒店嘅 Breakfast Buffet 已經完咗，導遊帶我哋去酒店附近嘅餐廳。我叫咗一客西多士，其中一位法藉女仕就話: "This is not French." 食物到咗之後，導遊就問呢位法藉女仕: "Which one you have more? French Fries or French Toast?"

食完早餐後，就返去 B&B, 大家大部份時間都係瞓覺。到咗 B&B, 師弟話要去買紅酒，B&B 個老闆娘話附近有個 Mall, 可以去買埋，之餘亦都買埋寄艙嘅盒。買完酒返嚟，兩位大忙人就趕住睇公司 Email, 真係去旅行都去得唔安樂。

今日係師弟生日，所以我呢位師兄要破少少費，請師弟食晚餐。間餐廳都係食西餐，但唔係 Formal 嗰隻, 都係 Finger Food (Burger, Pizza) 同 Salad. 我同師弟一樣點咗個 Chicken Burger. 見到甜品有 Cheese Cake, 當然要試一試。個 Texture OK, 但都係唔覺芝士香，有少少失望。

再返到 B&B, 師弟無耐就撻咗响床上面瞓，我就整理呢幾日嘅記憶寫 Blog 同 Pack 定第二朝回程嘅行李。

南非之旅 - 尋找獅子

4點半，導遊拍門叫人，加上又唔係瞓得太好，所以好唔想起身。梳洗完畢後，就要上車出發。其實咁早起身，有係原因，因為路面經過日頭嘅曝晒吸熱，夜晚就會散熱。因為夜晚同日頭有超過10度嘅溫差(28度 vs. 14度)，猫科動物(獅子同豹都係)休息咗陣，都鐘意瞓响路中心。所以第一部車出閘好大機會見到，第二部車會窄少少，第三部真係唔駛諗。

今朝我哋係第一部車，等到5點半，Rest Camp 開閘，無耐就見到一群獅子乸。之後，又開咗一程車，見到大象、野豬、長頸鹿、犀牛，駛到去一個湖，有河馬、鱷魚、同埋一堆駖羊飲水，另一個湖有鬣狗。

食過早午餐，再另一個湖有班馬、野豬，之後再與到獅子、長頸鹿。去到一條河，除咗駖羊，重有水牛。途中有水氹，有龜有魚同埋蜥蜴，開頭條細嘅响岸度望吓望吓，之後有條巨型嘅响水度浮上水免，跟住又再潛水，返茅屋途中再與上一群馬騮同一群鬣狗。响茅屋休息一陣後，再度出發，導遊個細佬都跟埋嚟，似乎細佬好腳頭，有獅子睇，仲係一公一乸添，聽聞等緊交配的說，之後週圍兜，都係今朝見到嗰啲，好快又到黃昏，要返 Rest Camp.

影過一陣 Time Lapse, 食過晚飯，再畫一兩幅簡單嘅 Light Painting, 係時候執嘢瞓覺，皆因第二日又係4點半...

南非之旅 - 野生動物園

5點鐘起身，刷牙洗面食早餐 Pack 好晒嘢，重有時間，去泳池嗰邊有 Wifi 嘅地方上一上網。Email 都好似無乜關我事，可以放心去 Safari. 6點半，夠鐘出去等車，等極都唔到，原來架車搵錯地址，Rutland Avenue 搵咗去 Rutland Road.

過咗十幾分鐘，導遊到達，要再接埋另外兩位客人，即係成架團得4個人。另外兩位原來係法國美女，唔錯! 跟住上路，大家都大覺瞓，一個鐘左右，已經完成咗一半嘅路程，但另外嗰一半路程，就因為整去洗手間、買嘢、食晏、整路，用咗3個鐘。

入到 Safari, 導遊二話不說就嚟一個 Game Drive 先，見到羚羊、大象、河馬、一隻隱藏版嘅豹、蜘蛛、龜、馬騮、水牛、犀牛、班馬等等。之後放我哋返住嘅地方，等我哋放好行李後，再嚟一個 Game Drive. 見到嘅嘢大同小異，但醉翁之意不在酒，我不斷搵景影日落。

6點左右，Rest Camp 差唔多閂門，又再返到茅屋，執完嘢之後，一走出去，見到一個星空! 個牧夫坐已經响我面前，係第一次見到咁多星嗰隻，再夜少少，第一次見到銀河! 實在太靚!!! Time Lapse 係時候出動，不過就要同成團人一齊食晚飯先。對住個星空食飯，真係好正!

需然第二朝要4點半起身，但係都係想影 Time Lapse, 而個腳架又响剛剛行行吓仆一仆嗰陣壞咗，一個 sub-optimal 嘅情況吓影都係第一次，但銀河唔影就真係有少少不值，唯有慢慢 Set. 到最後，只係影到 100 張左右，就要收檔瞓覺，外加 100 張嘅處女座。

另一個問題係，茅屋係無電插蘇位咁制，有嘅都係舊式英國插蘇位，我同師弟都無，所以我只可以用返我個後備電池去叉相機電池，但又唔太控制到叉嘅時間，見步行步。

南非之旅 - 出發

11點9嘅機，約咗師弟9點响機場等，9點鐘機場巴士剛剛好到，原來師弟已經入咗閘，我都去自己 Check-in 入去。行去登機閘時，撞到小師弟，帶埋我入去 Marco Polo Club 嘅候機室食嘢，食咗生果、三文治、包等等。差唔多夠鐘，走返上去登機閘，影返幅唔知幾時開始旅行要影嘅登機閘相，先上飛機。飛機上好熱，隔籬嗰位大陸人士又郁身郁勢，加埋張凳又坐得唔舒服，張凳係有史以來瞓得最唔舒服嘅凳。雖然今次國泰再無杯麵味，同埋師弟介紹咗經濟位上嘅電插蘇，但張凳令到成位事大打折扣。

半睡半醒咁瞓咗10個鐘，重有3粒鐘要捱。睇吓 Discovery 嘅電視節目，食埋個早餐，終於落機、過關、出閘。一出閘就見到 Local Tour 嘅導遊嬸嬸大大隻字寫住我嘅名，打過招呼，就上車出發。沿途公路都好美國 Feel, 經過世界盃主場，去到曼德拉故居，跟住去一個簡單到唔簡單嘅文化村，再到一個大廣場，再去貧民區，見到 OLPC 嘅實物，師弟買咗件 KYP 嘅衫件為捐獻，之後就到種族隔籬博物館。

導遊嬸嬸話個館都幾大，所以會放低我哋慢慢睇，大家 Agree 咗3個鐘後再接返我哋走。入館前，過咗11點少少，師弟之話肚餓，咪祭咗個五臟廟先。叫咗個芝士通粉連沙律外加 Sprite Zero, 話就話 Zero, 但卡路里還是有的，唔過廿個大卡的說，沙律上嘅洋葱只有少少辣味，幾好，通粉都唔錯。有少少口渴，再買支水，之後發現，餐廳出面部 Vending Machine 嘅同一支水只係賣8蚊，足足平咗7蚊。

醫好肚，入館! 館入面由西方國家點入侵南非開始講，講到曼德拉成為總統。博物館有兩個展區，一個講歷史，一個講曼德拉，就咁消磨咗3粒鐘，睇到有少少感動。臨返 B&B 前，導遊嬸嬸見到有間賣酒嘅舖頭重開緊。因為師弟之前話過想買酒，但星期日又唔係好多舖頭會開，又或者係早收云云，見到有酒賣，嬸嬸就停低咗架車俾師弟慢慢買。我見到隔籬有間麵包舖, 想入去逛逛，但我就無咁好彩，間麵包舖只係開到兩點就收。

師弟似乎大豐收，收咗一小箱嘅酒，仲係以抵嚟形容買入價添。之後返到 B&B, 包租婆好好人，帶我哋行完一 Round, 已經諗緊點解決我嘅夜晚嗰餐。因為星期日响 B&B 附近嘅餐廳都唔會開，好彩佢知道遠少少有間餐廳有車接載，約咗6點嚟接我哋。

一切安頓好後，我就大覺瞓，瞓到差唔多6點，師弟叫醒我食飯。等咗一陣，車到了，間嘢係食扒嘅，我就當然無可選擇地食雞胸。麵包好食、沙律都唔錯、3塊雞胸一流添，一啲都唔「諧」。食完太飽，與甜品無緣，趁司機未到週圍行吓，最後發現，間餐廳係米芝蓮3星，唔怪得，加埋小費，成餐只係315蚊，抵!

返到 B&B, 到泳池附近上一上網報平安，刷好牙沖好涼，再叉好所有要叉嘅電，10點鐘就瞓咗。

睇戲

今日早少少返咗屋企，等睇辯論。一開場，梁生讀穚講完政綱，唐生就話佢唔個「猿人」，要同大家道歉云云，聽到我一頭霧水。Public Speech, 唐生真係一個好好嘅反面教材。之後講講吓普選，又話如果2017年一人一票選特首唔成功，2020年都唔會有一人一票選立法會，要脅全香港市民乎? 跟住又話老人家「唔等得」，嘩! 你做特首我諗香港時日無多添!

最精彩都係互相質詢，當中睇到少少個人性格，梁生係一個好驚得罪人嘅人，除咗第一次講咗話自己係主場，另外兩次主場都任唐生講，係到唐生講到死唔斷氣先再重申自己係主場。唐生當然以其人之道還以其人之身，以佢嘅少爺脾氣，連講都唔俾梁生講。

最後一連爆兩單大事，商台續牌事件同2003年水炮和催淚彈事件。商台續牌我諗係當時人先知發生咩事，但2003年係嗰日先知有咁多人參加遊行，政府內部都遠遠低估遊行人數，唔係當日陳鑑林都唔會傻傻地走去天后站俾人喝倒采。咁點解梁生會响「高層會議」話有機會用水炮和催淚彈對付示威者? 係咪即係梁生有水晶球，定仰或梁生比當時政府內部三司十一局連同特首任何一位都緊貼市民脈膊? 成件事唔太合邏輯，唔該果位自稱有膊頭嘅男仕講多少少，唔好講 D 唔講 D.

俾人話係豬嘅，一 D 都唔豬，有少少毒添!
俾人話係狼嘅，略嫌無應有嘅霸氣，加上帶大家遊咗幾轉花園，有少少頭暈...
何生嘛... 陪跑的，不用理會...

南非之旅 - 前傳

返返吓工，師弟突然 MSN 過嚟，問三月攞唔攞到假，一睇就知即係要去旅行。問去邊，原來係南非，有平機票去約翰內斯堡云云，但加埋稅同燃油附加費，都唔係想像中咁平。加上芬蘭之旅、交稅、交保費都洗咗唔少，本來唔係太想去，同埋南非喎! 治安、衛生係大問題。同埋 D Projects 又要睇住，如果 Partner 覺得 OK, 我都 OK.

最後請到假，師弟又話可以控制到 Budget 一萬蚊左右，咁就去馬，Book 好機票，Pass 咗 Point of No Return.

跟住，師弟話其實唔知去南非做乜，但已經好興奮的說，都不得不寫個服字俾佢。其實我真係無諗過去南非，唯有上網睇吓約翰內斯堡有乜睇。Constitution Hill, Apartheid Museum... 乜嚟㗎，未聽過添，成個都係歷史文化之旅，唔太得。再睇 WikiTravel, 治安果然係一大問題，話出街唔好太似遊客，即係週圍影相可免則免，又唔好帶太多錢出街，又唔好帶電子嘢出街，又呢又路... OK... 咁係咪唔應該去南非?!

再週圍 Click, 咦?! 可以去非洲大草原喎! 大草原點都唔會俾人搶同俾人偷，聽落 OK 好多! 同埋，接近零光害嘅大草原，你話係咪最佳影星之地呢! 咁咪就係去非洲大草原影相囉! 再打俾師弟，佢都諗住去，話只係驚 Over 我嘅 Budget, 咁我 OK, 佢都無問題。

所以，無端端又一個 Trip. 同埋今年可以清剩一日假，Very Good 呀!

邏輯大挑戰

話說某才女 Post 咗一幅著皮草嘅相。其實我都唔知係咪皮草，因為件衫係粉紅色，又唔覺有毛毛，但見到以下面呢個 Comment, 我諗係啩!

卓小姐，只想通知聲穿真皮草，係喪盡天量，比殺人放火更暴力既暴力，社會對藝人都很留意and有期望，希望你支持人性社會是不包容此類暴力繼續有巿場，有心的話，請幫忙加力。祝福!

想當年話著皮草唔人道，係因為皮草有價，係高檔貨品，好多動物都被濫殺至絕種邊緣。但今時今日，做皮草嘅動物好似係同禽畜無異，都係人工繁殖。咁其實，食肉嘅人，都唔人道得去邊。一樣係大批繁殖、大批屠宰、大批銷售。但係點解會有反皮草嘅人，而無反食肉嘅人? 因為食肉可以充肌? 但著皮草又可以保暖啫... 皮草有代替品，肉都有呀...

同樣道理，食素嘛... 一樣係大批繁殖、大批屠宰、大批銷售... 唔好話俾我知植物無感覺，無咁殘忍，但植物都係生命啫。咁奉行生命係平等嘅人，係咪只可以食西北風同飲水過世?

瓜田不納履 李下不正冠

友人問:

真心問一句, 特首可否有富商朋友?
是否不可以有朋友款待, 又該怎樣申報?

富商朋友可以有，但款待就咪啦! 咁咪申報都慳返囉! 搭遊艇兩個人先俾嗰五舊水，TurboJet 貴賓廂一位都差唔多二千蚊啦! 係，你係做左四十幾年事，係識得好多朋友，但好多賭客都係做咗幾十年嘢喎，又唔見個個都識得有私人遊艇嘅順便接埋返香港?

有權，就係有多事唔可以做。權力使人腐化，從政幾十年，咪就係腐化咗幾十年囉! 信你嗰個都傻啦!如果政治家到今時今日都覺得佢無錯過，唔明點解一般人話佢錯。咁只可以話，佢同市民嘅落差係天與地嘅分別，就算無做過，但同社會脫節，根本唔配做特首。

PR

梁營: 西九事件，第一時間開記招，再要求政府全面公開資料，反將政府一軍。幾日後 case close.
唐營: 僭建事件，擾攘多時，前言不對後語，幾日後由有膊頭嘅男人，變成乜都係太太負責，由儲物室，變成二千幾呎嘅後宮。

唐太所言更加無理，每個家庭都想有一個舒適嘅家，耐何香港寸金尺土，你屋企大把都重要起多二千幾呎，你老公做特首對得住香港人嗎? 怪唔之後你老公對原居民僭建嘅容忍度咁高。而香港，亦唔需一個好人做特首，想當年董生又夠好人，最後咪又係腳痛下台!

The First Taste of Objective-C

轉換咗跑道，第一件事就係去睇 Objective-C. 其實學新 Language 唔難，對住份 Programming Guide, 唔駛落手寫其實都已經九成。其實幾日前，未開始學，都已經開始 Fix 唔少 App 嘅 Behavior. 難嘅，係去咀嚼成套 Language 嘅 Semantics, 尤其係 D 古老嘅 Language, Pointer 同 Reference 已經可以攪到頭都大，再加埋 Memory Management, 咁就算啦...

對 Objective-C 第一個感覺，原來無想像中咁差，有埋 ARC 之後，原來其實配套都可以好 Powerful. 希望一個月後可以開始玩一套自己嘅 Framework 出嚟。

嫲嫲

記憶太少，就大概係幼稚園定小學嗰陣上過廣州探過佢。嗰陣時嫲嫲有一間士多仔，有汽水可以飲。前店後居，屋企有一隻貓仔，但啊媽唔俾掂，話污糟喎。

到咗中學，嫲嫲落咗嚟香港一個禮拜，但都無同佢出過一次街，好似無傾幾句計添。

讀完書返咗嚟香港之後，前幾年一直都想再去廣州探佢，但因為種種原因，都無行動到，

今日，得知嫲嫲過咗身，心情無想像中咁複雜，只係覺得都差唔多係時候。

同遠在天邊嘅妳講聲:「再見了!」

假如

噚日响灣仔食完晏，週街行完，返上個客度嘅時候，經過一個棚架，突然鏗鏘一聲，天降鐵鑿，就响面前幾米落地。一開始不以為然，但諗吓諗下，如果我行快幾步、行偏少少，咁就會中招。再如果支鐵鑿唔係打橫落地，係打直落地，咁就會直穿頭蓋骨，即時係咁先。

好慶幸重可以如常生活...

如果... 命運能選擇

人生充滿選擇，感情上、工作上、甚至宗教上...

感情上，白卷一張，連最唔會結婚嘅朋友都結埋，係咪時候發力?

工作上，與到大樽頸，咁啱有大貴人招手，走唔走? 走，好似對老闆唔住，知遇之恩無以為報。唔走，好似對自己唔住，始終對做 Service 唔單止係厭倦，直頭係厭惡。一年時間，慢慢去諗...

宗教上，有唔少教徒搵上門，有佛教，亦有基督教。佛教係好耐無見過有人上門傳，之前都有個朋友成日講佛。基督教嘅感召更大，講真，我係一個幾鐘意詩歌嘅人，每聽一次都似係一次嘅感召，但諗到要應付 D 凡文俗節，主呀! 你真係要寬恕我，我真係一個好怕麻煩嘅人。

短評暈到瘋

從公司得到一部攞命呀伯伯，一路都懶得用，到想用嘅時候，原來係用 Micro-SIM, 跟住又懶得去換張 SIM card, 拖咗成個月，終於換咗。

由於俾 Palm 洗禮過，由用 Smart Phone 以來，一直堅持用中文機，因為中文機，睇中文同打中文實無死。但由 Android 開始，唔知點解，中文機都無倉頡，要自己 Download 自己裝嘅。跟住呢位伯伯，就連 Download 都無得 Download, 响 Market 上嘅所謂輸入法，其實就係一個 Virtual Keyboard 打好 D 字後俾你 Copy and Paste 去睇二度，都唔知黐咗邊條筋。再睇睇個 API, 原來根本無輸入法嘅 API. 真係已經放棄想部機。再上 Support Website 度睇，係已經開咗個 Case, 好多人都想要，但無人理囉，如果無倉頡，就咪鬼响大中華地區出啦!

好，忍你，手寫就手寫。伯伯嘅其中一個好處，就係可以做到一個 Messaging Hub, 除咗 SMS, Whatsapp, 亦駁到 Exchange (可以多過一個 Account), Email Server, Web Mail (e.g. Hotmail, Gmail) 等. 但係問題亦隨之而來，因為 Exchange 係 Push mail, 所以返工時間會好嘈，真係聽個 Email Alert 都想死，遲早俾佢攪到神經衰弱。一時唔記得轉做震機嗰陣，朝早係會俾 部機嘈醒。係可以唔 set Push Mail, 但最細嘅 Interval 係 15 分鐘，又耐咗 D 啫!

話說手寫中文，真係好差煩，煩都唔緊要，最死火嘅係佢唔識認香港常用字，「啲、嗰、嘅、㗎」完全唔見晒，我差唔多廿年來都係打廣東話口語，家陣我真係唔係好識用部機同人傾計。

個 Whatsapp 重攪笑，無得 Search contact, 噚晚要搵一個 W 開頭係人，要 Scroll 晒成個 Contact list 嗰百幾人，去到 W 喇，但係原來嗰個人未裝 Whatsapp, 白 Scroll 了。

結論，Usability 比 5 年前嘅 WM 差!

由 D&G 到 DOG

對大陸人嘅水平一向都心裏有數，所以大陸人嘅一舉一動，都係見怪不怪。暴富起來後，財大氣粗，加上少受教育，行為舉指，都唔係話改就改。

我唔會埋怨大陸同胞，要怪就怪中央政府無將資源放响教育，怪香港政府剩係識得 GDP, 無諗過長遠規劃。

以前同大學同學計過，如果13億人嚟到香港，一人一啖口水，都足以令成個香港陸沉。唔做任何規管，香港市民不單享受唔到數字上嘅經濟成果，而且生活水平就只有一日一日咁下降。

50萬 vs 3萬3

單從數字嚟睇，五區公投比泛民初選得到更多市民授權同支持。只為道德光環嘅民主黨，今次係第三次玩小圈子，下年同你慢慢計數。

2011回顧

• 去咗兩次旅行
• 第一次旅中國大陸
• 花潮唔太壯觀
• 第一次去北歐
• 極光麻麻
• 老人村嘅燒三文魚好食
• 買咗新嘅 Canon 相機
• 睇咗好多日劇、動畫
• Facebook同Blogger連接嘅時代告終
• 做咗一間公司嘅 Director
• 公司轉型做Mobile (得 user, 得天下)
• 內部努力推廣WCF (得 service, 得天下)
• 開始睇到同明白自己嘅弱點
• 第一次Speed Date
• 戒咗三國殺 Online
• 寫咗好多社會事件
• 社會真係咁腦殘?

累街坊

D&G事件醞釀發酵都唔駛一星期，係要到咗千人影相當晚先發遺憾聲明，公關手法真係拙劣。攪到成條街都係人，附近店舖真係乜生意都唔駛做。

所謂物極必反，泵得太多水落嚟，係會浸死人，尤其係呢個欠缺長遠目光嘅政府。完全無配套，話放寬自由行落嚟就放，呢 D 咪叫 Total Rubbish 囉! 再俾固有行政架構嘅人做特首同內閣，以同一思維治港，香港真係渣都無。

Best Man Returned

再度做伴郎，吸收咗上次嘅經驗，應該可以做好 D.

心理準備，其實由差唔多聽到婚訊後開始，第一件事就係排開所有事情，避免响十二月、一月做。雖然有少少意外，但時間尚算允許。

友人係一個玩得嘅人，亦都開咗張 Blank Check 話可以响酒席間爆肚，所以响收到當日安排後，去諗一個有笑位嘅小故事，隨時準備用得著。之前嗰晚，再諗到一個同賓客有少少互動嘅影相環節，希望到時玩到少少 Drama.

之前一晚，11點半上床，準備第二日嘅行程，可惜蹍轉反側，都唔知過咗幾耐先至瞓得著，但係3點就已經醒一醒，要去洗手間，之後又要蹍轉一輪。5點9鬧鐘響，但好快瞓返，醒嘅時候已經係10分鐘後嘅事。好彩衫、褲、外套一早準備好，尚算準時出發。

兄弟截咗㗎的士，唔駛舟車勞頓過海，另一位兄弟開車過嚟紅磡向將軍澳出發接新郎去女家。女家响上水，到咗上水後，可能因為未食早餐，感覺到新界氣溫底一兩度嘅威力，响市區覺得 OK 凍嘅天氣，都變得幾凍吓。所謂「三軍未動，糧草先行。」新郎哥就帶大家到附近嘅茶餐㕔食個早餐。食完早餐，攝影隊伍亦都到達，大家先影少少相同片段，準備去接新娘。

入到大廈，一出 Lift 門，就見到一班姊妹响 Lift 口恭候，經過瑜伽、愛的宣言、尋寶拼圖、唇印大作戰 (感謝姊妹嘅卸妝水抺走唇膏)，終於可以俾開門利是。一番擾嚷後，新娘走出房門，情深一吻後，亦都開始為父母敬茶。為咗唔好錯過吉時，兄弟們先將物資由女家搬上車，再响樓下靜候，等一對新人落樓。

新人落樓後，再多影幾段片同相，出發去男家。男家相對簡單，只係雖要斟茶俾父母就得，跟住伯母一句「百子千孫」都知道伯母幾想抱孫! 之後嘅事，就留返俾攝影隊伍。兄弟姊妹們就去晒 Club House, 同新郎嘅妹妹會合。姊妹們繼續準備茶具，兄弟們就趁機休息。再一輪敬茶，其間攪錯新郎要傳達嘅信息，有少少內疚。午飯就同一眾男家親友响 Club House 食到會，有西式嘅三文治、沙律等，有中式嘅炒粉麵飯，甜品有 Tiramisu 同焗麵布丁，好豐富嘅一餐!

食過午餐，新娘要換上婚紗，新郎哥就準備酒樓要用嘅物資。兩點左右，部份兄弟們到達，幫手搬嘢。新娘重未換好衫，等咗一陣，姊妹團先出現，新郎新娘去到停車場出口，新郎哥一聲令下叫車駛埋嚟，車隊全員出發到教堂。

教堂度，上一對新人尚未完成，物資由車上搬入教堂，準備佈置 Reception. 4點半，儀式差唔多開始，大家各就各位，等待新娘入場。婚禮進行曲響起，全場起立，教堂大門打開，花仔花女帶頭，姊妹團隨得，新娘同世伯押軸。一輪唱聖詩 (詩歌班好 Pro)、讀經、講道、簽紙後，時間亦都唔早，兄弟們收拾 Reception, 等待嘉賓影完相後隨時出發。

由於教堂 Overrun, 大家匆匆趕到，因為花車同物資車停車嘅地方唔同，所以搵咗一輪，會合後，匆匆搬運物資。大汗淋漓，先到洗手間，除咗條呔、鬆一鬆衫鈕、洗個面、抺一抺汗，一身舒服晒，回復狀態! 同部長傾好流程，原本做 MC 嘅兄弟似乎狀態不佳，小弟頂上，主要係叫各親友影相同敬茶 (P.S. 新娘子套希臘式婚紗真係好靚!)。但因為剩係關注播片流程，無太留意婚宴流程，所以好多時都係講得唔太好，要兄弟、侍應們提醒。

準備入席、入席、準備開席，有少少不知所惜，開席前，講咗一個之前準備好嘅小故事，反應出奇地好，信心回歸後，似乎已經進入狀態，自由發揮唔係一個問題。新人進場、小訪問、敬酒、交杯，有少少口舌之誤，反而逗得大家哄堂大笑。叫新人接吻，一次唔夠，再藉賓客們影唔到相為由 encore 再 encore, 將情緒推上頂點。之後新郎哥送俾雙方家長嘅溫韾舊日片段，席間笑聲此起彼落，片段後再邀請家長們講吓對新人祈望同祝福，以新郎哥一句「酒微菜薄，招乎唔到」結尾，整個起承轉合有齊晒，Perfect!

吃過乳豬，一套大製作要上演，係當日接新娘同教堂嘅片段 (成8000個大洋，但效果好好)。之後新娘又要換衫，新郎話新娘換好衫後有表演，既然有 Show Time, 即刻同部長夾，剛好酒樓有結他表演用嘅凳同埋樂譜架，掂! 再吩咐部長控制燈光，一齊準備就緒，新娘子由新娘房出嚟，燈光調暗，見到新郎哥坐响表演嘅位置，有少少驚喜。新郎致辭、唱歌，新娘子跟住唱，本來想造多一個夫唱婦隨嘅 Drama, 但發現時已經係表演嘅尾聲，都係放過佢哋!

表演完畢，剩番敬酒同合照，同枱嘅妹妹同朋友都問重有無表演，似乎大家都好祈待，可惜真係無乜計喇。好快就到美點雙輝、糖水、生果，主人家送客、姊妹們換衫、主人家換衫。兄弟們亦除下領呔，處理好洗費，執好嘢，鬆一口氣。埋單時刻，亦無大意外，只係新郎要諗下簽邊張咭找數多用咗少少時間。之後，又係會合問題，兩邊對收費處有不同理解，加上時間太夜，商場好多地方都已經此路不通，新人們兜咗個大圈先會合到。

一位兄弟做司機將物資同新人送返新居，其他兄弟的士回家，一切圓滿結束。

It was a great honor being the best man!

Why Can't We Put a BASIC On the Phone?

其實答案好簡單，因為電話係 Consumer Product, 唔夠 Geeky.

天與地

一路都無時間睇，有長假期，順便睇吓，我係一個好易入戲嘅人，所以感覺良好，只係覺得節奏唔夠明快，唔通好嘅劇係一定要咁慢?

响香港，要拍一部時空交錯嘅片唔係咁易，就好似一部民初片咁，剩係搵景，我諗都已經考起。還好嘅係，上環重有少少境係兩年前同18年前係差唔多，包括水坑口街、太平山街、必咧者士街一帶。尤其係 Hazel 住嗰個位，睇到班男仔 D 車大部份車頭向東，就知係幾咁攪笑嘅事。不過，講古咪駁古，笑你講得通。

另一樣嘢係，究竟班後生嘅演員，知唔知 Beyond 係乜? 感覺 D 歌真係唱衰晒，話就話拍戲啫，唔駛响度折磨觀眾對耳啩!

Anyway, 一部要諗嘢嘅電視劇，好過乜嘢烈火雄心、法政先峰、廉政行動等等換湯不換藥嘅劇目。何況，今次都好考演員功力，我鐘意!

今晚有消息傳出，話中央封殺，攪到好多國內網民爭住搵嚟睇，「多謝中央!」

節奏

呢幾個月，都係一朝早就要落個客度開 Daily SCRUM. 之前都係搭地鐵，好似好快，但係好多時間都係行。行上行落再加等車嘅時間，係成個行程嘅60%. 噚日見時間鬆動，搭電車，唔駛點行，又可以閉一閉目養神，好舒服!

有時候
將生活節奏減慢
是一種享受

成熟

突然發現，好多朋友已經唔係曾幾何時認識嘅人。係咪結婚生仔後嘅影響? 好多都變得由無所謂，變得有自己嘅主意同諗法，雖然不見得完全同意，但起碼一聽就知係有諗過。

A good transformation, it is!

家有家徽

恭喜晒!

雜記 1

劉生响澳門嘅奇蹟，好想去睇!

响地鐵見到，Chanel 一隻叫 Chromatic 嘅手錶，廣告得黑同埋白，唔知個 Designer 知唔知 Chromatic 點解?

原來 Groupon 有震蛋賣... 而且係幾好賣添...

那誰... 是小奧

小奧，認識的嗎? 連番留言，困惑得很。昨夜，我找到你了，應該不認識的，但感謝你的留言。而我感興趣的，並不是你是誰，而是你怎麼找到我的部落格。再找回第一次的留言，已經是兩年前的正生事件，是從此就對部落格有興趣嗎? 還是，是更早已經留意? 是那一篇而開始留意的呢?

瑣事一宗，但假若你有空，可以留言回答嗎? 謝謝!

Windows Hosting

申請咗個 Domain Name 都有4年，每兩年轉一次 hosting. 第一間係 hostmonster, 成日話你 violate 唔知邊條 rule 去 suspend 咗個 account. 第二間係 awardspace, 本來諗住可以玩 ASP.NET hosting, 但我諗佢係用 Mono, Enable 咗之後又無乜反應，行唔到 ASP.NET, 加上衰無得駁出街，咁我 D RSS 砌嘅 page 完全死晒，等咗兩年，呢個月終於可以轉手。

今次搵 hostgator, 正正式式係有 Windows hosting service, 貴就貴少少，但可以玩好多嘢，唔駛攪 PHP, 得閒又可以整 D 私人作業玩吓，不過佢太多客，好多事都係 auto email 話你要做乜，冷就冷咗少少，但暫時可以接受。

Game Theory @ 選特首

有時，我唔知點解泛民要去參加一個唔民主嘅特首選舉，唯一嘅後果，就係去為呢特首選舉背書。無論如何，家陣有200個泛民選委，目的係乜先?
1. 令中央尷尬
2. 迫中央認可候選人提出利民嘅選舉承諾
3. 挑戰特首寶座

第3項就唔駛諗，得嗰二百票根本做唔到啲乜。第2項亦無可能，想當年曾特首競選嗰陣夠話玩舖勁㗎啦，家陣咪全港市民俾你玩舖勁㗎囉! 所以唯一可行係第1項。點實行? 咪有個民望好高但唔夠票嘅 CY 响度囉! 你何俊仁又好，馮檢基又好，無一個俾中央嘅壓力可以比 CY 大。你唔肯讓票，一係你蠢，一係你發緊白日夢以為第2, 3項實現到。

乜嘢叫做為人民福祉，乜嘢叫自私，一眼就睇得出。前者，一定唔係當今泛民!

稀有品入手

Pringles 蜜糖芥末味，响美國食過一次，滋味無窮，但之後就無再見過。見到公司同事買咗返嚟，即刻去百佳買，但係剩返一筒，無計，唔知係咪因為太好食呢?

芬蘭之旅 - 後記

貼士

• 唔好用 Smart Phone 做主要嘅電話，帶咗手套係用唔到 Touch Screen
• 如果未買衫，唔駛特登買，著多幾件衫同褲效果更佳。上身一件短袖底衫、一件長袖底衫、一件長袖面衫、一件羽䘬褸、一條頸巾同一個冷帽 OK. 下身兩條褲 OK. 最好帶埋䁔蛋。如果真係要買衫，過到芬蘭先買會平過香港買。
• 去雪地要買防水嘅鞋，否則雪溶咗大件事
• 芬蘭嘅酒店房唔一定有電水煲，如果唔想帶電水煲旅行，可以買電熱水圈 (Immersion Water Heaters), 中環吉記行有得賣，80-83 蚊
• 上到飛機可以問空姐要眼罩 (eye mask) 同耳塞 (ear plugs)
• 响 Helsinki 機場，可以搭 615 巴士或者 Finnair Bus 去市中心。615 4 Euro, Finnair Bus 6.2 Euro. 615 入買中心要成個鐘，Finnair Bus 只係廿分鐘，2 Euro 買 40 分鐘，見仁見智
• 芬蘭嘅便利店 R-Kioski 有電話咭賣，5.9 有 6 Euro 嘅 Credit. GPRS 如果 Enable 咗就會用，最好熄做手機個 Data Access 先，唔係上一上 Facebook 分分鐘已經無咗 1 Euro
• 如果有幾日玩，可以買 Helsinki Card. 網上買平 3 Euro, 包幾個 Local Tour, 交通工具任搭，食嘢買嘢響指定商舖有折。如果係夏天，去完個 Day Trip 再遊城市係一個唔錯嘅選擇
• 響 Rovaniemi 機場，有 Shuttle 去市中心，只係7 Euro.如果去其他地方，可以問吓司機可唔可以載埋你去，點都平過幾十蚊搭的士
• 城際巴士响巴士站買來回飛有9折
• 去睇極光，要隨時隨身帶相機，有腳架更好
• 聖誕老人村嘅三文魚一定要食
• Postcard 唔需要响 Post office 或者 Information Center 買，附近買紀念品嘅地方都有相同嘅 Postcard

遺失

• 耳塞一對
• 手套一隻
• 鏡頭蓋一個

統計

• 成個 trip 洗咗 2300 Euro 左右
• 影咗 8 GB 嘅嘢，當中有 5GB 係 time lapse

芬蘭之旅 - 聖誕老人村

今日七點鐘就起咗身，團友們未醒，唔知做乜好，唯有先上網。團友醒咗之後，食早餐，呢間酒店嘅早餐豐富好多，終於可以再食 Scrambled Egg, 重有牛角包添，不過無牛油味，一啲都唔香，食落都幾難食添...

食完早餐，執嘢 Check out, 但唔見咗兩個鎖，翻箱倒篋咁搵，原來收响個背囊度，搵完嘢，好熱... 執好嘢著好衫，Check out. 叫酒店幫我哋叫的士，出發去「老人村」。等的士嘅同時，同响對面嘅滑雪場影幾幅相。

俾我哋叫老人村係因為 Whatsapp 嗰陣打「聖誕」呢兩粒字太麻煩，總之大家明就得! 去到聖誕老人村，團友話比起兩日前落雨差好遠。放低行李响樓梯底，就去影相，之後再買 Postcard. 詢眾要求，買咗好多極光 Postcard. 有1蚊張嘅，亦都有8毫子張嘅，其實沿途都有買 D. 見靚、有特色就買。寫好 Postcard, 買郵票，7毫子嘅聖誕老人，亦有7毫半子嘅極光，當然又係買極光。

寄完 Postcard, 買郵品，睇中咗兩套郵票又唔貴，都係極光嚟，買嚟儲都好! 順便買幅月曆做聖誕禮物响公司 Party 交換，月曆買都有得著喇啩! 終於財散人安樂，購物完畢，差唔多 Lunch Time, 去食嘢。

友人嚟過，話村口有間地度燒三文魚好好食的說，諗起前兩日嗰碗三文魚湯，有少少唔敢試，但友人極力推介，人又到咗，不試白不試，一於去馬! 店內設備簡單，只係中間一個火爐用嚟燒三文魚，週圍放咗枱同凳坐。剛剛有三文魚燒緊，好快就上枱，聞落一陣魚味，有少少不詳嘅感覺。食一細件魚肉，咦?! OK 喎! 無魚嘅腥味，可以入口，而且屬於好食嗰隻添! 之後就大大啖咁食，正! 只要唔好食到層皮就 OK! 三文魚配沙津，一流! 麵包亦 OK, 唔太乾，就咁食都無問題。聽店主講，燒三文魚係佢哋最原始嘅食物云云。

食食吓發現，成個「餐碟」係用木做，即係可以當柴燒。再睇一睇佢個火爐，三文魚嘅油會流返入個爐助燃。而且因為呢個大火爐，根本唔使開䁔氣。如果無咁多客人有三文魚剩，三文魚可以放响金屬箱入面，金屬箱再放响爐頂保溫。呢個火爐嘅學問，實在太大喇!

醫完肚，再週圍行吓，去買手信嘅地方一睇，剛剛响 Post office 1蚊張嘅極光 Postcard, 只係5毫子張... 大家都話唔抵的說...

之後去聖誕老人所在嘅屋仔睇吓，相... 唔諗住同聖誕老人影，因為一個人又無乜咁好影，無乜紀念價值。跟住開始等天黑 (即係三點幾四點咁)，等影夜境。時間一分一秒咁過，團友响度諗緊叫唔叫聖誕老人寄信俾男友，攪到天黑都未攪掂。

天黑後，落雪，不顧相機嘅生死去影相，一部無電再用另一部影，效果唔錯，只係鏡頭俾溶雪整到 D 光化晒。影飽相後，朋友都攪掂封信，無乜嘢好做，可以同團友分開打道回府。的士站有的士，拖埋行李即上直去機場。

因為太大雪班機遲咗廿分鐘先開，但已經無所謂，因為轉飛香港班機係要等多三個鐘。不過芬蘭最犀利嘅地方係 Connectivity, 就算係呢個「聖誕老人村」所在嘅小鎭 (Rovaniemi) 入面嘅機場，都有免費 Wifi, 滯留廿分鐘唔係問題! 起飛前，見乘客唔多，揀咗個窗口位坐，有車接近，原來噴溶雪劑! 溶雪劑一噴，機冀上嘅白雪即時消失!

飛到去 Helsinki, 跑道附近嘅草地都有一層雪，天氣真係有少少唔穩定，似乎我係一個招風雪嘅貴人。响候機室，又開始寫前一日嘅 Blog, 上網週圍睇吓咁，突然間有隻麻雀出現，本來想影張咁特別嘅情境，但有個細路走埋嚟，嚇走咗。

上機時間，改咗登機閘口?! 俾張登機證老點添! 好彩只係差一個閘... 上到機，問空姐拎耳塞 (香港帶嚟嗰對好似留低咗响酒店)，嘩! 3M 出嘅，又係高質素產品。放去耳入面，靜! 連低頻噪音都無埋，靚過我嗰對! 之後等食晚餐，嚟嗰程想瞓唔想食，今晚剩係食麵包，無乜營養到過肚，唔食唔得。本來話有雞飯同牛肉配薯仔揀，諗住食雞。但服務員到咗，話剩得返牛喎... 我又唔太食牛嘅，算，我剩食薯仔。跟住睇落件牛，又唔太似牛，食一啖，唔覺有太濃嘅牛味，照食可也! 食飽，飲水，戴上眼罩耳塞瞓覺，呢程好舒服，只係醒咗一次。

旅程完滿結束!

芬蘭之旅 - 滑雪

一早起身，喉嚨有少少唔舒服，多數係噚晚响寒風雪地上逗留得太耐凍親。睇吓噚晚嘅 time lapse, 似乎個天空兩三點嗰陣清過一輪，而且重有極光出現過添，不過8秒曝光似乎真係唔夠照，比20秒，感覺上稀薄好多。之後個天有雲，但極光亦都唔差，極光穿過雲層散射出嚟，成個天都變色。

因為要準備 Check-out, 所以之後執嘢。帶備好十年前嘅滑雪用品 (其實只係手套同眼罩)。經過團友間房，似乎未起身，又係自己去食早餐先。先放好行李入 Luggage Storage, 再食早餐，團友到，早餐亦食完，開始寫噚日嘅 Blog, 噚日發生太多事，寫唔晒，一陣滑完雪再寫。

差唔多時間，搭 Ski Bus 上滑雪場，5 Euros All Day, 本來以為係全日每程5 Euro, 睇返張飛，原來係 All Day Pass. 响車上見到個鬼仔已經成幅武裝，睇嚟跟住佢落車就無死。經過兩個站，個司機成日話 Next Stop, 似乎真係要跟鬼仔落車先啱。

到咗滑雪場，其實都算平，兩個鐘租裝備同埋 Lift Pass 都只係 49 Euro. 團友們幫我影好上之後就去初級嘅 Ski Slope, 開頭嗰半個鐘雞手鴨腳，連搭 Ski Lift 都失手。之後，搵返應有嘅感覺，順暢好多，之後要抖一抖，可惜跟住有 Ski School 一齊用 Lift, D 細路成日响 Lift 失手，攪到要停 Lift, 如果唔係可以玩多兩轉。

玩咗個半鐘，都差唔多時間，個人都散散哋，唯有離開，還裝備嗰陣，個服務員話 "You are in one piece", 因為我之前話我十年無滑過雪嘛。回程嘅 Ski Bus 已經响巴士站等開車，上車時，都費事再拎張車飛出嚟，直接同司機講 "You know I bought the ticket, right?" 司機點點頭，過關! 趁巴士司機同其他人傾計嘅時候影多幾幅相。

返到酒店，食 Lunch, 今日剩係得三文治，湯都已經無得揀喇。食完個三文治之後繼續寫噚日嘅 Blog, 嘩! 寫咗我個幾鐘，雖然係 Hea 寫，但都幾大段。又差唔多要搭巴士返聖誕老人村所在嘅城市，埋單時，侍應話唔駛錢喎，邊個話呢個世界上無 Free Lunch?!

出咗酒店，就係公路，巴士站响附近某處，天已黑，雪亦頗大，搵咗一輪先搵到巴士站。巴士遲咗10分鐘，我哋就响冰天雪地吹咗10分鐘。响中途站巴士站已經無開，唯有去附近嘅油站嘅洗手間，見到一張雪地嘅 Postcard 超靚 0.8 Euro, 買!

到咗酒店，Check in 後餐廳差少少要閂，好彩趕得切叫嘢食。團友門叫 Set Dinner, 有三文魚湯、 Reindeer 肉配肉腸加薯仔、包甜品，三文魚湯就免，Reindeer 肉有少少危 (因為之前食過鹿肉，有陣鱢未，一小件還可以，但成碟就免)，甜品我就睇中佢 Menu 入面件 Cheese Cake. 所以剩係叫咗雞胸肉配薯條青菜同 Cheese Cake. 向團友試咗一小件 Reindeer, 果然不出所料... 另外肉腸偏辣，又唔太啱口味。我嘅雞胸肉，OK, 最精彩都係啲薯條，食完成碟都咁脆! Cheese Cake 到，麻麻地，無芝士嘅香味，又配埋 D 好酸嘅莓汁，唔值得叫。食完都過咗十點，阻住人哋收工添，但侍應都好有耐性，呢啲咪叫侍客之道囉!

返到房，得 Local 電視台，外加一個 Fire Place Channel, 即係魚樂無窮火爐牌，燒柴聲好嘈，最後熄咗個電視佢。唔知係咪作病，個人幾攰，所以沖咗涼，上一上 Facebook 就走咗去瞓。

芬蘭之旅 - 六個奇蹟

今日5點幾熱醒咗，見到矇矇濃濃有嘢閃閃吓，戴返幅眼鏡一睇，北斗七星!!! 起身，影相!

開Canon試吓曝光16秒嘅效果，但無得效ISO, 唔太得。Ricoh 得8秒，更加力有不遞。開CHDK, 2o秒+400ISO, 掂!

開得 CHDK, 唔爭在 Time Lapse, 但天氣太凍，唔頂得幾耐，部機時開時閂。搬腳架入房影，又影到樹，塊玻璃又反光。攪完又瞓唔返，打開眼一睇，垂直角度效果唔錯喎! 一於放低响地上面影，效果唔錯，係差在自動 Focus, 經常 Out focus.

攪完部相機，瞓唔返，無聊咁望窗，一粒流星飛過，好耐無見過流星，响香港唔係啲乜乜流星雨都唔會留意吓個天，就當係一個奇蹟。整理好行裝，差唔多8點，去食早餐，經過朋友間冰屋，睇吓佢哋得未，未得... 唯有自己去食先，再望吓個天，又一粒流星，第二個奇蹟...

早餐有 Cereal, 麵包，水煮蛋，火腿、三文魚，選擇一般得過得去。食完早餐，本來想打聽吓 Reindeer 或者 Husky 第二日有無位，結果係今朝有剩位，可以即刻報，第三個奇蹟。但我背囊入面無預備到影相嘅嘢，唯有衝返房拎。去到發現，要換佢準備嘅預寒衣物，即係話會好凍，因為啲衫厚，都唔駛諗乜嘢重型裝備影相，帶咗嘅全境鏡頭得物無用武之地...

坐上雪橇俾鹿拉，一個悶字，成個森林都係雪啦、樹啦、同埋雪囉... 到咗中途站，導遊停低，開始走火、劈柴、煲水、沖茶。啲柴似乎係就地取材，有一陣香味，之後問返，叫做 Mentos. 飯完茶，回程。回程期間，發覺個天色完全無變過，太陽無出過嚟，就又要天黑喇!

午餐嘅選擇係吞拿魚三文治、火腿三文治同埋磨菇湯，叫咗碗湯，等上菜嘅時候，就帶住個全境鏡响村入面影相，結果唔見咗全境鏡嘅鏡頭蓋，沿途去搵，唔見，响白色嘅雪地上然搵唔到黑色嘅鏡頭蓋... 唯有等返香港配返。至於碗湯，好苦...

飯完碗湯，返房，執吓嘢又寫吓 Blog, 又瞓上張床度，除低幅眼鏡，想瞓唔唔瞓之際，又一粒流星經過，第四個奇蹟。5點鐘，芬蘭浴室開放，終於可以去沖個熱水涼。去到浴室，無人，除衫沖涼，又返房。今次準備影 time lapse, 今朝太多 Out focus 嘅相，唔太得。七點晚飯時候，set 好 CHDK, 出門。

食飯除咗 Set dinner, 另外加咗一碗湯，本來以為係雞湯，但一問之下原來係三文魚，即刻唔太想食，但無理由浪費食物，一鼓作氣食晒魚佢再慢慢飲湯，但加埋之前個沙津，已經好飽。跟手一大塊牛扒加著菜上枱，唔想食，唯有慢慢嚟。食食吓，有人一聲 Aurora, 於是全間餐廳嘅人都擁晒出去睇，第五個奇蹟。

睇到其實係一件開心嘅事，但又唔覺有想像中咁壯觀，加上身邊無相機同腳架，有少少失望。極光，睇嘅時候係白色，但經相機影出嚟，係綠色，唔知係乜嘢原理，大概係相機同人眼對光有唔同分析。睇完極光，塊牛排好食咗，好快咁食埋啲著菜，等甜品。甜品係用莓+忌廉，好酸，但照清不誤。

食完晚餐，個天已經開始俾烏雲遮住，返到房，睇吓 time lapse, 竟然捕捉到極光略過，第六個奇蹟。再準備好相機腳架嘅時候，已經成大個天都係雲，但好在响地平線度無雲，而且重有一絲極光出現，二話不說快門一開，完成。之後，Light Painting 時間，由有極光玩到無極光，差唔多兩個鐘，都十點幾。

因為之後要 Check-out, 所以要執嘢，執到11點左右，準備再影 time lapse, 不過用返 Ricoh 影，因為 Canon 剩係靠本身個電池，Ricoh 可以用 external 電池，應該影到極光嘅機會大好多，當然會無咁清楚，但影到好過無嘛。Set 好晒嘢，瞓!

芬籣之旅 - 北上

今日一起身，只係5點左右，都瞓咗8個鐘。Upload 相、寫 Blog, 7點鐘去食個早餐，睇Email, 攪吓攪吓，10點半，依原定計劃去機場，搭 Finnair Bus 廿幾分鐘直達機楊，盛惠 6.2 Euro.

朋友話聖誕老人村落雨，打算直去冰屋。响飛機上面聽到人哋傾計，話上年呢個時候已經落晒雪云云。我夠知啦，Weather Underground 個 Historical Record 見到其實係上年特別凍。

响機場本來想截的士，但有架 Shuttle 話可以7 Euro 車埋我去火車站，都好。跟住原來火車站同巴士站都差幾遠，唯有冒住雨再行過去。

响巴士站，先買車飛，買埋 Return Ticket 有九折，加埋慳咗8蚊左右。再祭五臟廟，4.5買咗個 Pizza + 汽水嘅套餐，個 Pizza 係凍嘅，但係皮脆，唔難食。汽水只係要咗一樽 Bonaqua, 飲完叫佢再幫我 Refill.

差唔多時間，去埋洗手間，就上車。車程3個鐘左右，有個中途站去厠所。差唔多，點解個司機唔覺停，作個狀準備落車，原來佢真係唔記得停車，攪到我要行返轉頭。

同友人會合食晚飯，頭盤蝦沙律，黑椒雞柳飯做主菜，再加個炸蘋果做甜品，唔錯! 之後，想報個 Reindeer 團，姐姐仔話太夜唔知 Book 唔 Book 到，要朝先 Confirm 到，朋友跟手嘅 Plan B 就係聽朝去滑雪，就一切順其自然吧!

入到房，比我嘅預期好，都知道個厠所唔會大得去邊，但係連涼都沖唔到，唯有抺身。所有嘢又Pack過晒，攪到12點先瞓得到。

芬蘭之旅 - 首都

落機後，機場同香港一樣，有免費 Wifi. 北歐係唔同啲，唔似英、法兩國咁吓吓要收錢。第一件事係上 Facebook Check-in. 之後再寫 Email 返屋企報平安。

因為有人一齊，所以出閘時間比落機時間差咗一個鐘。買電話咭 5.9 有 6 蚊儲值額，Pick up 返張上網訂嘅 Helsinki Card, 所有交通公具任搭，外加 Local Tour 只係 32 Euro. 一出機場，就有我哋要搭嘅 615 巴士，即上。

到咗總站，我去酒店 Check-in, 朋友自己玩。去到酒店，本來只係諗住放低行李，點知可以提早Check-in, 重 Upgrade 咗一間大房 (P.S. 盛惠 30 Euro)。執咗啲簡單裝備後，再去火車站報 Local Tour, 週圍又影吓相咁。本來係想影返酒店沿途風景，點知行錯咗一個街口，兜咗個大圈，但收鑊唔錯。

個 Local Tour 咗酒店附近開始，天氣又暖咗一兩度，放低件保暖低衫再出發。Local Tour 係 Audio Guide, 遊首都一個圈咁，响著名嘅石教堂同一座雕塑停一停，OK 吖，叫做遊完成個芬蘭首都。

Local Tour 完畢，去火車站附近買 Lunch, 食沙律同肉圓，其實重有好多餸，不過可以留返夜晚再試。返酒店食完 Lunch, 去碼頭搭船去睇世遺小島。剛 Miss 咗一班船，要等一個鐘，係影 Time Lapse 嘅時機，半個鐘後有船到，上船再等半個鐘。

上到小島，天其實已經差唔多黑晒，但其實三點半到未到。行咗一陣，都已經影唔到遠少少嘅景，個指示牌又亂指，兜咗好多路，寒風又起勁咁吹，一 Focus 好要按入快問就大大力咁吹，影親都鬆郁矇，聽朋友電話嗰陣要唔見咗隻手套，唯有打道回府。

落船後，原來碼頭附近嘅夜景都幾靚，但係已經無晒力。响酒店卸裝後，去附近間 Intersports 買返對手套，剛剛好又做緊減價，其中一對唔駛 10 Euro, OK 平喎! 之後去附近間 H&M 搵返朋友去交換吓大家之後嘅行程，再去超級市場買夜晚嗰餐 (大雞脾+蕃茄仔)、生果 (兩條蕉)、同零食 (Bagel+Snacker).

食完嘢，沖涼，睇電視，九點鐘左右有少少眼瞓 (大概因為香港已經零晨3點), 準備好差電瞓覺。

芬蘭之旅 - 出發

未出發前，行李俾老媽子執過，我又要重新執一次。差唔多夠鐘，執好行李，可以出發。臨出門前，老媽子响雪櫃拎咗三大個日本柿，叫我食咗佢。無辦法，一個以前鐘意食爽口食物嘅人，有返咁上下年紀，都開始要食腍嘅食物。

10點半去到機場，Check-in 好時間尚早，可以食個柿先。但响候機室食，好大陸 feel. 去搵同機嘅朋友，佢哋剛剛食完晚飯，又返去候機室。放低行李，一路睇電視一路食柿，終於食晒!

係時候上機，買機票嗰陣 book 咗個單丁位，點知起飛時，直情係無人坐，聽朋友講話 Check-in 嗰陣，地勤嗰邊話係已經有人坐，奇怪... Anyway, 坐位無眼罩，問空姐攞，嘩! 好靚質地嘅眼罩，似乎係商務位嗰隻嚟!

架飛機遲咗半個鐘先飛，晚餐嘅香氣亦隨著上升嘅飛機飄過嚟。但係唔理佢，戴上眼罩，塞好耳塞，瞓! 呢程瞓得幾好，兩三個鐘先醒一醒而唔係一個鐘一次。架飛機亦好靜，無乜低頻燥音入耳。

三隻小豬

有說唐唐是豬，CY 是狼，令我諗起三隻小豬。不過，唐唐一定係用草起屋嗰隻大豬，而且重要係唔駛 CY 吹風都會自己冧嗰隻。

但香港選特首又唔關你同我事，對於大家嚟講，只係茶餘飯後、閒話家常嘅話題。

多餘

給 LinkedIn 的一埋白癡們:

明明 Sign-up 只需要名，Email 同埋密碼，Sign-up with Facebook, 就只係同你填咗個名同 Email. 咁 Sign-up 嚟把鬼咩! 係就做 Single Sign-on 啦!

純愛 + 星空

上個月尾，睇咗一套日劇 SP 《純愛》，睇到一半，原來係同性戀劇，都睇咗一半咯，睇埋佢，無乜大反感。

今個月頭，約咗幾位友人睇由幾米畫集改篇嘅《星空》，約食飯嘅地方執咗，電話又無乜電，差 D 玩迷失尖咀。好彩無驚無險，齊腳食飯。可能太新，場數少，10點鐘响 The ONE 睇。兩個細路嘅 Puppy Love, 太單純，無乜驚喜。

Microsoft Mouse

Microsoft Hardware 又一傑作，將一隻 Mouse 攪到好似電話咁，你話得唔得呢?

朋友

Facebook 响11月22號開始唔會再 Import RSS/Atom Feed 入 Notes 入面。其實都無所謂，真正嘅朋友係會响其他地方睇到你要講嘅事。

其實好多嘢
唔需要公諸於世

起死回生

這些年來，我係有開 ICQ 做 IM.
這些年來，ICQ Contact List 出現嘅人，唔多過五個。
近年來，ICQ Support Facebook Chat, 個 Contact List 多咗好多人 Online.
近年來，我其實係用 ICQ 响 Facebook 度同大家 Chat.
這些年來，無論有幾多個人 Online, 其實我都無太主動去 Chat 過。
這些月來，ICQ Support Google Talk, 又多一批人响 Contact List.
這天，有人發現 ICQ 有 Mobile Version, 連 Mobile Contact 都被加入埋 Contact List.
這些年來，MSN, Yahoo 都有 Mobile Version, 點解係得 ICQ 會突然受觀迎?

Mobile user behavior, 係一件難懂嘅事物。加 Social network user behavior, 要明簡真係同比中六合彩更難。

SX230

Time Lapse - Wan Chai a video by Shane_Ng on Flickr.

買 SX230, 係因為想買一部 Canon 機，但又唔想全自動嘅 IXUS, 亦唔想揀大機，PowerShot 似乎係不二之選。SX230 可以影高速 Video 外加 GPS. 其實都等咗一排，等 CHDK 嘅出現，呢一兩個月終於可以 Download 到，所以買咗返屋企，將好 CHDK, 內置 Interval Shooting Script.

咁啱去個客度做嘢，個客好好咁俾咗間房我坐，其他 Contractor 都係坐外面 D 豬肉枱咋! 間房窗口對海唔影 Time Lapse 對唔住自己。Lunch time set 好機繼續開會、做嘢，開完會，相機已經無電，熄咗等我返去收。

每 10 秒一幅，影咗差唔多兩個鐘，唔夠 700 張，效果唔錯。當然 Ricoh 機唔駛裝 Script, 又可以影到兩個半鐘，略勝一籌。但 SX230 可以手動控制光圈同快門，似乎操控度幾好，雖然唔知有幾可用，但又唔係大機，有好過無。

那誰... 搬走了我的選票

會說話的數字

           2007　  2011
獨立 136629   81111 = -40.63%
泛民 454636 469360 = +3.24%
建制 547250 630338 = +15.18%

公民黨
黨總得票: 51325 vs. 47603 = -7.25%
兩屆參選者總得票: 19463 vs. 22548 = +15.85%
即係話，輸咗剩係今年參選嗰 D, 其實唔關抺黑事，一來對手強，二來空降流失選票。

民主黨 + 新民主同盟
總得票: 172073 vs. 229151 = 33.17%
兩屆參選者總得票: 108051 vs. 124396 = +15.13%
兩屆參選者總得票(民主黨): 92672 vs. 104480 = +12.74%
兩屆參選者總得票(新民主同盟): 15379 vs. 19916 = +29.50%
即係話，民主黨新人+新民主同盟一樣俾社區人士接受。無獨有偶，損失最多票嘅係58歲嘅李建賢，1780 vs. 730, 無咗58.99%. 年僅33歲嘅嚴志恆係 405 vs. 1510 = +272.84%. 呢 D 咪叫年青有為囉!

民協
黨總得票: 52386 vs. 45453 = -13.23%
兩屆參選者總得票: 32858 vs. 37126 = +12.99%
似乎表現比公民黨差

街工
黨總得票: 12565 vs. 14364 = 14.32%
兩屆參選者總得票: 7489 vs. 7700 = +2.82%
地區工作紮實?

民建聯
黨總得票: 292916 vs. 281546 = -3.88%
兩屆參選者總得票: 156797 vs. 174420 = +11.24%
D 票去咗邊? 去咗工聯會、新民黨、西九新動力、社區18、無黨派人士。配票得宜，乃萬全之策也。

等陣, 81111 + 469360 + 630338 = 1,180,809, 但係投票人數係大約 1,202,000, 唔見咗 21191 票? 廢票率係 1.76%, 比上屆多 0.87%. 即係多咗萬鬆人投白票。

含淚投票

快評：張麟徵教授的含淚含恨含血之言

「這次不管含淚、含恨、含血都要投給馬英九！」台灣大學政治系教授張麟徵日前於新同盟會演講中，幾度對親民黨宋楚瑜開炮，指宋當選機率微乎其微，若投票給宋，根本是浪費選票，且投宋就等於投給民進黨主席蔡英文；

能當人，幹嘛當豬呢？

至於「學政治」、特別是「教政治」的人，應該有點起碼的民主政治素養。否則，民主豈不真要變成愛因斯坦說的「一群會投票的豬」了？！

明年的二合一選戰，選民為何要拒絕當一隻「含淚的豬」、「含恨的豬」或者「含血的豬」？因為人是萬物之靈，萬萬不可自甘墮落。

對於民主發展，台灣有好多好多地方可以俾香港借鏡，而香港就只欠一個公平嘅制度。好多人覺得，香港唔應該學台灣，但民主發展呢條路，係一條單程不歸路，只要有民主政治，無論响邊度發生，過程就會理所當然咁發生。

希望讀到呢篇文嘅係人唔係豬。

大換血

星期日就係區議會選舉，可以預見嘅結果有兩個。

1. 所有泛民支持者繼續支持傳統泛民陣型
2. 部份泛民支持者放棄支持傳統泛民陣型

前者無乜特別，一切如常，傳統泛民陣型繼續行禮如儀幫你爭取民主。後者，其中一個後果，係被建制派漁人得利。問題係，咁又點呢? 反正地區事務，泛民定建制派都會去爭取。如果係唔滿意傳統泛民响政改表現嘅，何不俾佢一個懲罰?

至於係咪要申延到日後嘅立法會選舉? 反正泛民响立法會都唔會過半數，等建制派玩四年，假設嗰四年做得好，都係一件好事啫。廿三條? 都唔駛分組點票，即係政府一早夠票，自由黨唔會再玩嘢，即係個法案一遞上立法會就過到，泛民根本無 Say.

無謂為咗支持泛民多幾個席位而被迫投佢哋一票，响選舉政治中，背叛選民係要還㗎!

血拼

自問唔係一個經常買嘢嘅人，但買親都唔少嘢。為咗一個月後嘅芬蘭之旅，落咗灣仔一趟，一為新相機，二為禦寒衣物。

相機為次，可以最後一個禮拜先買，所以只係預先格定價。

禦寒衣物，因為試過去冰雕展，唔想再試零下15度嗰種滋味，唔買唔得。走到入間鋪，本來只係想問保暖嘅內衣，但零度同零下度數個價錢已經差咗一趉。跟住本來買埋保暖嘅褲，原來有埋防水連面褲，輕身又方便。之後係鞋，最新科技，防風防水，為亞洲人度身訂造。最後係襪，最新運到，羊毛保暖同透氣的說。就係呢幾樣嘢，差唔多二千五，貴過部相機... 但可以輕裝上路，無價!

而且天文台話今年會特別凍，咪當買定先。

小說

好耐都未試過睇網上小說，呢幾年相片、影片充斥成個網絡，純文字嘅小說自然失色。不過睇過嘅網絡小說其實並唔多，連埋呢部，都只係第三部嘅小說。

第一部應該係星矢冥王篇嘅同人小說，將冥王篇嘅內容重新設定，再加入其他神話傳說，精彩程度比漫畫有過之而無不及。不過當時係上台灣某大學嘅 BBS 睇 (好似係叫陽光沙灘)，作者出文嘅速度當然不及我睇嘅速度，之後，好似無咗回事。

第二部係一部叫《史上最強》嘅科幻小說 (好似係都係响陽光沙灘度睇)，講主角買咗一部唔知邊度嚟嘅超級 Notebook, 裏面嘅姐姐仔教佢《軒轅戰法》，改變時空云云。

最近睇呢部叫《盜墓筆記》嘅靈異小說，即係 Tomb Raider 嘅中國版，已經出到第八篇，網上小說可以出到有真書、漫畫、同人漫畫、遊戲，唔可以錯過。

釋法

案例一: 港人內地子女居港權
當年就係為咗唔好俾佢哋嚟香港，攪到終審法院嘅決定被人大推翻。結果今時今日，所有香港出生嘅中國公民都可以有居港權，攪到產房忙過不停。

案例二: 普選方案
唔知點解，普選三步曲由基本法所寫嘅本地立法後人大備案，變成要人大批準。本來 2012 有嘅普選，變成唔知幾時先有。

潛在案例三: 外傭居留權
我向來對外傭無乜好感，但只要係法庭嘅判決，個居留權就係應得嘅。我唔知點解有班人會覺得唔可以本地立法去堵塞所謂嘅漏洞，而又要去人大釋法囉，澳門直頭講到明外傭剩得逗留權啦! 由之前嘅案例睇，唔經正常程序釋法後一定無好嘢，香港人嘅存在核心價值何在? 輸打贏要就係核心價值? 咁驚嘅咪唔好請囉!

香港人自己將管治權交俾中央，可悲!

你夠潮嗎?

其實，我唔係想開玩笑，但係見到呢個會嘅名，真係笑咗出嚟! 自認係潮人嘅，可以試吓去入會。

話說呢個會嘅幹事長出選區議員，幾個月前响街上面見到幹事長嘅海報，另加大大隻嘅會名。心諗，乜香港連潮人都有個會... 但幹事長幅大頭相太正經，點睇都唔太潮。

呢排街上面嘅海報變咗，個會只係十多個會嘅其中之一，其他會嘅銜頭有

• 會董
• 副理事長
• 榮譽會長
• 福利主任
• 名譽會長
• 會員???

 咁多嘢做，我怕幹事長無時間做議員，睇嚟我都唔會去投佢一票。

Alan Turing

Alan Turing 係 Computer Science 入面嘅大人物，有幾大? 下年叫做 The Alan Turing Year, 係 Alan Turing 嘅一百週年壽辰。讀 Computer Science 嘅人無人唔識 Turing Machine, 係今時今日電腦嘅始祖。人工智能有一個 Turing Test 嘅測試，睇吓一個 Program 可唔可以好似人咁對答，即係 Siri 嗰 D Program 呢!

講起 Siri, 唔知係我嘅錯覺，好似如果搵佢傾閒計，佢嘅對答好以 Eliza 咁，似乎未係打破到電腦 GIGO 嘅宿命。同埋，佢嘅 Voice Recognition 唔係好認到亞洲口音嘅英語，同十年前嘅 Voice Recognition 好似無乜大進步。講 AI, 似乎都係要用超級電腦 (IBM 砌出嚟玩 Jeopardy 嗰部 Watson 呢), 搬入手機，始終係有限公司。

玩 LINE 百態

星期五，Lunch time 上 Facebook, 見到一個 Barcode, 上個網頁度睇嚇，一毎好普通嘅 Chat App，無視。放工時間，一堆 Barcode 出現，見到同事們響度搖手機 Add 對方，係一個幾百痴嘅 Add 人方法，唔會咁去 Add 人囉!

星期六，開始有流言話 Send Message 會用到 SMS 云云，唔關我事。

星期日，有幾段新聞話可以用 App 偷資料?! 有趣，去 Market 睇嚇先，8MB?! 唔使嘛，Chat App 咋喎! 個 Permission list 水蛇春咁長，即係乜事做得啦! 夜晚開始，又再俾叫人 Uninstall App 嘅 Post 洗版。

成個 Journey, 就出現咗呢幅圖 (星期五突然多咗好多人裝，跟住呢兩日又 Uninstall 返):

今次被形容為盲搶鹽次世代，其實大家都係普通人，不在乎當年為家事奔波嘅師奶或至潮嘅年輕人。

Lesson Learned:

• User 係唔會睇個 Permission List
• 謠言傳播速度好快，尤其當有新聞 Cover 嘅時候
  (據聞 TVB 新聞有份散播謠言，當然相對話前國家主席離逝好好多!)

夕陽無限好@赤柱

未去過赤柱影日落，見出太陽可以一試，可惜今日有煙霞又無雲，似乎效果會麻麻。去到海濱長廊，日落西山，大大座山响前面，似乎都影唔得耐，行到長廊盡頭，有間天后廟，行上去無遮無檔，大腳架都唔駛開，就可以影到相。影影吓，見到熟人，但有其他人一起，唔打算騷擾佢哋嘅興致，不過就入咗鏡。

6點45分，天黑齊，都唔多，收拾行裝走人。去完洗手間，條拉鏈一拉，成個拉鏈頭拉咗出嚟，似乎唔係好整得到，唯有搵個大腳架遮遮掩掩返屋企。條褲重要係第一次著，掃興!

千奇百趣

改圖比原圖更有氣勢，我鐘意!

曾生，民意代表問緊你嘢你唔去答，你又問返人咩事幹，呢 D 叫答非所問。學吓人哋 Bill Clinton 响西雅圖舉行嘅世貿會議點答記者點睇會場外嘅示威:

...because they represent millions of people who are now asking questions about whether this enterprise in fact will take us all where we want to go. And we ought to welcome their questions, and be prepared to give an answer...

你有無咁嘅政治智慧先，政治家?

怪物

諗嘅時候係完美嘅怪物
砌出嚟嘅時候核突嘅怪物
完成係行得走得嘅怪物
半年後唔記得點砌出嚟嘅怪物

猜一科技產業

低能

你俾得個 Email 我幫你做嘢，有乜理由你聲都唔聲就改咗個 Email Address, 咁我幫你做開嗰 D 嘢係咪唔使再理呢? 你答我喇，公司政策大定 Serve 你個客大先?

洗版

話說 Facebook 有個功能係將朋友中的熱門話題 Group 埋一齊

大部份人都係 RIP

我係 Bill Gates 嘅 Fans, 但 Facebook 當咗 Bill Gates 係我個 Friend?

我呢個 Friend 重出咗個 blog post 講呢段亦敵亦友嘅關係

咁當然，Facebook 唔係萬能，講呢件事嘅，又何止12個 Friend

無咗個姓當然認唔到

中文別稱更加唔使諗

少少 typo 都認唔到，Facebook 都係流流哋

我相信呢位朋友唔係真係 Like. 係咁啱個 Title 寫得衰

離開人世，但人生片段不斷响 Facebook 輪迴

最後幅相都咁型，就算我唔係你嘅 Fans, 都覺得有少少可惜。

教主

From Lisa to Macintosh
From NeXT to Pixar
From iMac to iPhone
From technology to religion
From life to death

Steve Jobs 係一個中學已經崇拜嘅名字，與 Bill Gates 齊名。呢一對矽谷孖寶，事跡為人津津樂首，甚至有人以佢哋為故事大綱去拍電影。

大學時期，Steve Jobs 重掌 Apple, iMac, iCube, 外型 design 一流，但風評麻麻，都覺得幾可惜㗎。

畢業後，iPod 出現，又重又大部，唔太得。

今時今日，iPhone 對 Power User 嚟講，依然未合格，但對普通人係有一種謎思，一上手就識用。我自己有一套理論，當有一樣科技產品，係可以你啊媽唔使你教都識用，Usability 一定好高，一定賣得。當你見到一個師奶，响地鐵道玩得不亦樂乎，合格! iPhone 係我唯一見過嘅產品，所以 iPhone 合格。

Steve Jobs 嘅產品，鉤畫出未來嘅生活，係一套 Lifestyle. 而呢套 Lifestyle, 可以成為一種宗教，但係會隨住 Steve Jobs 嘅離去而消失。

Rest in peace

瘋狂

一個月內放咗兩日假外加一日颱風假，睇咗嘅片有

• 惡魔奶爸 x 35
• 迷茫管家與懦弱的我 x 13
• 學園救援團 x 26
• 神的筆記本 x 12
• 聖鬥士星矢冥王神話 x 14
• 全開女孩 x 11
• 名偵探柯南真人版 x 7

再見曾 Sir

「事事留心皆學問」

曾 Sir, 係細細個已經知道嘅名字，最出名係哥士的。細個嗰陣唔知係乜嘢嚟，只係知道呢位曾 Sir 好犀利，真係家居有乜奇難雜症都攪得掂。返咗嚟香港之後，遇爾响星期六聽到曾 Sir 嘅節目，但哥士的就少提，經常聽到嘅係除油浸漬粉同埋萬用去污膏，我諗每次聽親都有提過，要買嘅話要去化工原料鋪的說。

今晚睇咗新聞，原來曾 Sir 無讀過化學，佢嘅知識，全部都係問返嚟，重話：「事事留心皆學問。」似乎學問，其實就真係肯學去問，就可以得到。

雖然唔想接受，但容許我說一聲：「再見!」

漏網之魚

雖然將 Google Reader 放咗响 iGoogle 度，得到嘅資訊接近 real time, 但偶有漏網之魚，所以得閒都會去睇吓 full version. 今次條漏網之魚都幾大條，友人有喜，恭喜恭喜! 以後嘅日子辛苦晒喇!

Testing

The quick brown fox jumps over the lazy dog
微風迎客，軟語伴茶

中秋綵燈會

今日早放，同事們玩咗兩盤三國殺後，按照計劃去維園影 time lapse, 目標由5點影到半夜大概8個鐘。去到維園對面個停車場，Set 機，唔知點解咁熱，汗水一滴一滴咁好似流唔完咁。Set 好晒，似乎無人，一於做個 unattended mode, 應該無人偷，返屋企食飯，夜晚再收機。

10點左右，部機重响度，但係點解無影到相? 無理由無晒電喎，應該係俾其他人撞撞吓攪到熄咗。部相機唯一唔好處就係有少少震都會接觸不良，Check 番，7點左右已經無再影，失望... 既然一場嚟到，就走入維園影。

成個維園都好多人，影完條魚，乜好似無乜其他花燈咁，行吓行吓，火龍喎，行去睇吓，希望影到少少相。唔太掂，好多人，最後結尾，都叫做影到謝幕。影完火龍再睇其他花燈，太少喇嘛，咁大個維園，得五組花燈咁大把，再度失望。

還好，兩個鐘嘅片段濃縮成17秒嘅效果唔錯。再影嘅話，似乎需要一個 undisturbed mode 先得。

回歸十年 - 2

返咗香港一個禮拜，有間响屋企附做 Online Trading Software 嘅公司請人，膽粗粗見咗，過程頗為順利。最後一條問題，當然係錢，嗰陣不知天高地厚，開價16K, 佢叫我再返屋企考慮。過幾日佢打電話嚟問，傾唔埋欄，事件結束。

返咗香港後嘅差唔多一個月，就出現911事件，當時經濟已經唔係太好，9月11號之後，簡直係雪上加霜。當晚係追緊套電視劇，廣告嗰陣突然間有段新聞入咗嚟，見到世貿冒煙，心裏一寒，究竟發生乜事。阿媽二話不說，一定係恐佈襲擊，嗰一刹那半信半疑，最後官方証實，呢 D 咪叫見慣大場面囉!

但話說回頭，之後嗰兩個月，就係搵工嘅地獄。相信搵過工嘅人都知，搵工、寫信、等待嘅過程係幾辛苦。足足兩個月，意志被磨滅得體無完膚，終於有間個電子貿易軟件嘅公司請做臨時工。

人腦的奧妙

一段明報副刊嘅標題周日話題﹕打救唐氏綜合症，第一刻諗起嘅，係唐英年。响 Cognitive Science 入面，有專門研究記憶嘅課題，指每一段記憶都有 Keyword 做關聯，當有足夠嘅關聯嘅時候，記憶片段就會出現。

之所以由唐氏綜合症諗起唐司長，係因為網上明報幅刊一系例嘅標題:

• 肆無忌憚
• 案件重組﹕黑影. 垃圾論
• 警察總長自白書
• 安裕周記﹕一支現代警隊的心態
• 聽歌下火﹕暗語般的「709」——馬來西亞青年的「反高鐵」
• 周日話題﹕打救唐氏綜合症
• 危機處理篇
  補鑊演講詞 by洪清田
• 重新上路篇
  全面改造計劃 by彭志銘
• 小粉絲打氣區
  唐唐後援會@facebook by葉寶琳

回歸十年 - 1

十年前嘅暑假，係我最開心亦都係最唔開心嘅暑假。畢業係一件開心嘅事，但十年前嘅今日，就好似今日咁正值經濟不景，美國搵工難，八月做咗一個重要嘅決定，就係返嚟香港。

我討厭長途機，搭完長途機後重要一出閘就係又濕又熱嘅天氣，嗰刻真係好後悔，到今時今日都記得嗰種感覺。搵咗三個月工，真係意志最消沉嘅三個月。得閒就返去中學幫吓手做少少同電腦有關嘅事，好似唔知邊個攪咗套叫 CAT (Computer Aid Teaching) 嘅 System, 其實就係一套網上嘅 eLearning System, 要人手入問題做功課/測驗之類，唯一記得嘅，係用 Java Applet 嚟做。