洗版

話說 Facebook 有個功能係將朋友中的熱門話題 Group 埋一齊

大部份人都係 RIP

我係 Bill Gates 嘅 Fans, 但 Facebook 當咗 Bill Gates 係我個 Friend?

我呢個 Friend 重出咗個 blog post 講呢段亦敵亦友嘅關係

咁當然，Facebook 唔係萬能，講呢件事嘅，又何止12個 Friend

無咗個姓當然認唔到

中文別稱更加唔使諗

少少 typo 都認唔到，Facebook 都係流流哋

我相信呢位朋友唔係真係 Like. 係咁啱個 Title 寫得衰

離開人世，但人生片段不斷响 Facebook 輪迴

最後幅相都咁型，就算我唔係你嘅 Fans, 都覺得有少少可惜。

教主

From Lisa to Macintosh
From NeXT to Pixar
From iMac to iPhone
From technology to religion
From life to death

Steve Jobs 係一個中學已經崇拜嘅名字，與 Bill Gates 齊名。呢一對矽谷孖寶，事跡為人津津樂首，甚至有人以佢哋為故事大綱去拍電影。

大學時期，Steve Jobs 重掌 Apple, iMac, iCube, 外型 design 一流，但風評麻麻，都覺得幾可惜㗎。

畢業後，iPod 出現，又重又大部，唔太得。

今時今日，iPhone 對 Power User 嚟講，依然未合格，但對普通人係有一種謎思，一上手就識用。我自己有一套理論，當有一樣科技產品，係可以你啊媽唔使你教都識用，Usability 一定好高，一定賣得。當你見到一個師奶，响地鐵道玩得不亦樂乎，合格! iPhone 係我唯一見過嘅產品，所以 iPhone 合格。

Steve Jobs 嘅產品，鉤畫出未來嘅生活，係一套 Lifestyle. 而呢套 Lifestyle, 可以成為一種宗教，但係會隨住 Steve Jobs 嘅離去而消失。

Rest in peace

瘋狂

一個月內放咗兩日假外加一日颱風假，睇咗嘅片有

• 惡魔奶爸 x 35
• 迷茫管家與懦弱的我 x 13
• 學園救援團 x 26
• 神的筆記本 x 12
• 聖鬥士星矢冥王神話 x 14
• 全開女孩 x 11
• 名偵探柯南真人版 x 7

再見曾 Sir

「事事留心皆學問」

曾 Sir, 係細細個已經知道嘅名字，最出名係哥士的。細個嗰陣唔知係乜嘢嚟，只係知道呢位曾 Sir 好犀利，真係家居有乜奇難雜症都攪得掂。返咗嚟香港之後，遇爾响星期六聽到曾 Sir 嘅節目，但哥士的就少提，經常聽到嘅係除油浸漬粉同埋萬用去污膏，我諗每次聽親都有提過，要買嘅話要去化工原料鋪的說。

今晚睇咗新聞，原來曾 Sir 無讀過化學，佢嘅知識，全部都係問返嚟，重話：「事事留心皆學問。」似乎學問，其實就真係肯學去問，就可以得到。

雖然唔想接受，但容許我說一聲：「再見!」

漏網之魚

雖然將 Google Reader 放咗响 iGoogle 度，得到嘅資訊接近 real time, 但偶有漏網之魚，所以得閒都會去睇吓 full version. 今次條漏網之魚都幾大條，友人有喜，恭喜恭喜! 以後嘅日子辛苦晒喇!

Testing

The quick brown fox jumps over the lazy dog
微風迎客，軟語伴茶

中秋綵燈會

今日早放，同事們玩咗兩盤三國殺後，按照計劃去維園影 time lapse, 目標由5點影到半夜大概8個鐘。去到維園對面個停車場，Set 機，唔知點解咁熱，汗水一滴一滴咁好似流唔完咁。Set 好晒，似乎無人，一於做個 unattended mode, 應該無人偷，返屋企食飯，夜晚再收機。

10點左右，部機重响度，但係點解無影到相? 無理由無晒電喎，應該係俾其他人撞撞吓攪到熄咗。部相機唯一唔好處就係有少少震都會接觸不良，Check 番，7點左右已經無再影，失望... 既然一場嚟到，就走入維園影。

成個維園都好多人，影完條魚，乜好似無乜其他花燈咁，行吓行吓，火龍喎，行去睇吓，希望影到少少相。唔太掂，好多人，最後結尾，都叫做影到謝幕。影完火龍再睇其他花燈，太少喇嘛，咁大個維園，得五組花燈咁大把，再度失望。

還好，兩個鐘嘅片段濃縮成17秒嘅效果唔錯。再影嘅話，似乎需要一個 undisturbed mode 先得。

回歸十年 - 2

返咗香港一個禮拜，有間响屋企附做 Online Trading Software 嘅公司請人，膽粗粗見咗，過程頗為順利。最後一條問題，當然係錢，嗰陣不知天高地厚，開價16K, 佢叫我再返屋企考慮。過幾日佢打電話嚟問，傾唔埋欄，事件結束。

返咗香港後嘅差唔多一個月，就出現911事件，當時經濟已經唔係太好，9月11號之後，簡直係雪上加霜。當晚係追緊套電視劇，廣告嗰陣突然間有段新聞入咗嚟，見到世貿冒煙，心裏一寒，究竟發生乜事。阿媽二話不說，一定係恐佈襲擊，嗰一刹那半信半疑，最後官方証實，呢 D 咪叫見慣大場面囉!

但話說回頭，之後嗰兩個月，就係搵工嘅地獄。相信搵過工嘅人都知，搵工、寫信、等待嘅過程係幾辛苦。足足兩個月，意志被磨滅得體無完膚，終於有間個電子貿易軟件嘅公司請做臨時工。

人腦的奧妙

一段明報副刊嘅標題周日話題﹕打救唐氏綜合症，第一刻諗起嘅，係唐英年。响 Cognitive Science 入面，有專門研究記憶嘅課題，指每一段記憶都有 Keyword 做關聯，當有足夠嘅關聯嘅時候，記憶片段就會出現。

之所以由唐氏綜合症諗起唐司長，係因為網上明報幅刊一系例嘅標題:

• 肆無忌憚
• 案件重組﹕黑影. 垃圾論
• 警察總長自白書
• 安裕周記﹕一支現代警隊的心態
• 聽歌下火﹕暗語般的「709」——馬來西亞青年的「反高鐵」
• 周日話題﹕打救唐氏綜合症
• 危機處理篇
  補鑊演講詞 by洪清田
• 重新上路篇
  全面改造計劃 by彭志銘
• 小粉絲打氣區
  唐唐後援會@facebook by葉寶琳

回歸十年 - 1

十年前嘅暑假，係我最開心亦都係最唔開心嘅暑假。畢業係一件開心嘅事，但十年前嘅今日，就好似今日咁正值經濟不景，美國搵工難，八月做咗一個重要嘅決定，就係返嚟香港。

我討厭長途機，搭完長途機後重要一出閘就係又濕又熱嘅天氣，嗰刻真係好後悔，到今時今日都記得嗰種感覺。搵咗三個月工，真係意志最消沉嘅三個月。得閒就返去中學幫吓手做少少同電腦有關嘅事，好似唔知邊個攪咗套叫 CAT (Computer Aid Teaching) 嘅 System, 其實就係一套網上嘅 eLearning System, 要人手入問題做功課/測驗之類，唯一記得嘅，係用 Java Applet 嚟做。

天方夜譚

影，係各忍村入面嘅領袖，換言之，黑影，係黑忍忍村入面嘅領袖。今次黑影出現，一定係想襲擊副主席，而且要黑影親自出手，一定係 S 級任務。所以全港市民其實都誤會咗一哥所指嘅黑影，其實唔係乜嘢靈異事件，而係外國勢力所策動，要對副主席不利嘅行兇者。

至於點解黑影變咗記者，一定係黑影俾人發現咗之後，用變身術變出嚟，而個會夾住警察隻手嘅攝影機，其實係忍具之一。咁就解釋到一部普通攝影機點解都可以夾到手，其實當中可能有乜差池，萬一發動咗忍具，就可能連手都無埋。

所以，發現黑影嘅警察其實係立咗大功，同黑影糾纏後，成功阻止黑影襲擊副主席，下年回歸紀念日一定要頒個金英勇勳章過佢。

実証研究

相傳甲殼素可以幫助減肥，有晒動物研究咁講，但試咗幾個月，好似無乜分別。今晚無聊再搵吓資料，見到所有嘅動物硑究都係十年前發表，亦有呢十年內發表响人體做嘅研究，話無乜大作用。可能一兩份研究無乜說服力，但呢十年內有超過五份話無用，咁我諗唔到你唔信。

可幸嘅係甲殼素只係膳食纖維，對人體無害，只係大便無咁暢通。根據各個研究，甲殼素對吸收脂肪無乜大幫助 (statistically insignificant)，減少血液中嘅低密度膽固醇亦只係可能有幫助。所以，我諗可以唔使再食，又或者去飲嗰陣先食 (俾 D placebo effect 自己，有好過無嗰隻呢!)

無腦

一哥去立法會解畫，我就响度睇笑話。佢話，警員見到個黑影喎，跟住隻手就伸去擋住個黑影托住嘅黑色物品，係我就唔敢掂。副總理就話時運高，六四 Tee 抗議示威就乜都睇唔到啫，但日光日白出現黑影，似時運低撞邪多喎老友! 梗係問吓隔籬位手足見唔見到先再掂啦!

其實，一係你就低低哋認咗佢，想當年馬局長道完歉，件事咪完結囉! 一係你就搵個好 D 嘅藉口，連藉口都唔識作，只可以話，諗呢個藉口出嚟嘅頭骨入面裝住嘅唔係人腦，可能係米田共。

差人

意譯: 指受官員差遺工作的人

即係奉命行事，就乜都可以唔理嗰 D. 上星期副總理訪港，就係好好嘅例子。今次叻呀，做盡醜事嘅所有差人都係便衣，一個冧把都無，就可以為所欲為，唔駛負責，跟住曾司長、唐司長、李局長話都話保安恰當，話天氣熱、工作太長可能會燥少少。如果心理質素咁差，咁就慘囉，我點知會唔會有日佢哋燥得滯無端端開槍呀? 一個又一個嘅藉口，只係顯示出唔單止警隊，而係成個政府嘅無能。

有人話，今時今日嘅差人似警犬多過差人，可笑嘅係狗都知邊個俾佢一日三餐，但出糧俾差人嘅無做錯事嘅市民，就要俾差人又拉又鎖，呢 D 係乜嘢道理? 差人真係當 D 官出糧俾佢? 如果差人唔係服務市民，而係服務國內政要嘅，唔該同我取消咗差餉佢，以後就好似解放軍咁，由中央出糧。起碼中央註港部隊為人民服務嘅形象，點都好過差人囉!

星期一，又睇吓潛完水浮面嘅一哥點响立法會解畫。有大件事，大人物會取消休假，但一哥一於懶理，會成個立法會等佢返嚟開會，即係呢件係小事一宗，又或者一哥呢個位其實唔係乜嘢大人物。如果係後者，咁唔該佢將個 1 號車牌拎出嚟賣咗佢。

覇

時間: 食飯時間
地點: 信德吉野家
買完個餐，問一問小姐隔籬個位有無人，佢話有。坐咗去第二個位，佢男朋友買完嘢返嚟，我食完個餐，都唔覺有其他人。另一個人再問佢隔籬個位有無人，答案一樣，重要嫌煩將佢杯汽水放去隔籬個位度，個男朋友當然無出聲，好似理所當然咁。大姐，食飯時間喎，兩個人覇四個位，談情大晒咩!

時間: 近四點
地點: 會展
Join 咗一個 Event, 有 Tea Break, 出到去一望，一班人堆晒响一個角落，完全唔覺有排隊嘅跡象，乜原來香港嘅 IT 人係咁「文明」㗎? 一定係眼中無 Queue, Code 中有 Queue. OK, 你慢慢堆，我又慢慢排住等。有位阿叔一件、兩件、三件，佢一定好肚餓，佢夾咗成座山咁高嘅點心走 (食入口係好好味嘅 Cheese Cake). 另一位阿叔，明明有第二個鉗近佢多 D, 佢硬係唔放低佢手上嗰個鉗俾其他人夾餅，我諗佢真係好鐘意個鉗同 Cheese Cake, 如果個鉗可以帶走佢一定拎走埋。

有時，我哋成日話自由行嘅同胞無文化，其實香港人咪又係不相伯仲呢?

火燒連還船

政要要保護
司長要垃圾
住客要通緝
學生要禁錮
一哥要解畫
公義要申張

平

去深水埗開會，順便去電腦節，想買 32 GB 嘅 SD Card. Class 10 都只係二百幾，跟手個 Sales 俾隻 USB Drive 我睇，OK 細隻，不過都係我買最大隻嘅 USB Drive. 不過好似因為之前買嗰 D 全部都太細隻，好似唔見晒咁... Anyway, 五舊水 64 GB, 抵!

Speed Dating

星期六，友人介紹，十五對男女，三十個人，每個人五分鐘，攪咗成個幾鐘先完成，量就夠多，係識人嘅地方。

十五個女仔入面， 好似好多一對對嘅情況，例如一對澳門人，一對幼稚園教師，一對空姐，一對社工。

到最後，收到五個 Contact, 但好似唔係好理我咁...

裝備

從來都唔係一個影相嘅人，我係一個玩相嘅人，單反比起多花款，多嘢玩嘅機仔，機仔比較及引。尤其內置影到 Time Lapse 嘅機，更加係一流。問題係機仔電池嘅電量太細，要長時間影 Time Lapse 都幾麻煩。

第一件事就係要可以外置電源，搵咗好耐，搵到有電池型嘅濕電 Adapter.

但電源呢? 响街度無人會借電俾你㗎喎，唯一帶到出街嘅電，我諗都係汽車電池。但汽車電池係濕電池，外型亦都唔細，更何況如果係去旅行，係帶唔到上飛機。

好彩家陣興 i 字頭嘅 Gadgets, 出現咗好多外置電池，响 Yahoo Auction 搵吓搵吓，搵到可以幫人將外置電池調壓嘅鋪仔，不過人哋通常調高電壓俾 Notebook 同 Netbook 用，我就要調低到相機電池嘅電壓之餘再加個頭兼將 Adapter 嘅頭改裝到可以駁到舊電。

舊電只係同個銀包差唔多大，重有埋腰包，隨身帶住方便至極。老闆計過就比起普通相機電池大概係六至七倍嘅電量，以相機電池平均可以影到兩個半鐘嘅 Time Lapse 嚟計，即係可以影到最少 15 個鐘。得閒要响屋企試吓先。

另一個好處係旅行可以帶上飛機，外加一條一出十嘅 USB 線 (舊電可以 USB 輸出), 真係乜差，唔係... 係叉乜都得，長途機唔會無嘢玩。

加埋之前個 USB 相機電池叉電器同濕電 1 開 4 嘅 USB Adapter。以後出門除咗 Netbook 隻牛，其他叉電機同相關電線都已經唔駛帶，方便好多。

以前出門係咁 (外加一個拖把)

從今以後 (舊外置電池其實係 Optional)

旅行就係要輕輕鬆鬆，唔係咩?

澳門冰火一日遊

星期六，一班人唔知做乜，去咗澳門。原本大家都興致勃勃，想去掃街的說，但係天氣太熱，食咗個胡椒餅、煎餃再加一杯雪糕後，都開始投降。

去到有冷氣嘅街市，感覺好乾淨，突然一位嬸嬸同一位伯伯講：「幾十年無見你囉喎!」伯伯回一句：「幾百年無見喇!」友人們都不禁爆笑，我覺得，幾百年後，我一定會同友人們咁打招呼。上到熟食中心，胃口就無乜，點咗碗易入口嘅湯餃，再加一支雪碧，滿足!

午飯過後，大家都唔太想同太陽伯伯對抗，決定搵威尼斯人睇冰雕。去到展覧中心，地方好空曠，剩係個走廊都可擺到一百圍，越走越入，亦開始感到寒風陣陣。展覧場館外圍略涼，先借件禦寒褸，再放低背囊，一入到場館，凍... 不一樣的凍，睇冰雕就係要咁凍，大家都震揗揗去參觀影相。其實身體唔太凍，最慘係無手套，相機又凍，對手真係凍到僵晒。

出返嚟，感覺和暖，大家眼鏡都起霧，有幾部相機都遭殃。想去 food court 食 D 嘢，但太多人，最後去咗 Starbucks. 友人推介 Frappuccino, 類似沙冰嘅物體，叫咗杯 Mocha. 唔似沙冰咁結晒冰，應該都係零至一度嘅狀態，感覺超甜但唔膩。不過睇佢一杯細過珍珠奶茶嘅容量，完成一杯都好滯。响賭場睇咗一陣 D 人點玩廿一點，就再向 City of Dream 出發。

City of Dream 最主要睇一場 360 度嘅視覺 Show. 跟住就去官也街食水蟹粥、木槺蛋糕。食完，都七成飽，但其實正餐係葡國菜，餐廳六點半先開，都等咗差唔多一個鐘，但人多，傾傾吓好快過。起菜後，意思意思每道菜食少少，就已經十成，但經過各位嘅努力，所有食物清晒。

食完飯，再去 Galaxy 打個圈，就去碼頭排定後補位，九點三嗰班差少少，但排到九點半，就咁度過愉快嘅一天。

iPhone Keyboard

I am not talking about this (MIDI keyboard)

or this (USB keyboard)

not even this (Docking station)

and this (...)

Since mobile devices are nonergonomic in nature, one millimeter of mistake will let you hate this expensive toy. Here are the keyboards I have seen on the net:

This one is very compact but it is just covering the virtual keyboard on the touch screen. So, you have to mount the phone before you start typing anything.

This one seems OK but when you hold it on hand, you need two fingers to support the phone when typing. Also, when you answer a call, your hand will get into a weird position.

This one looks good

but when you see how you flip it out, you will just leave it alone. Not to mention the camera is covered by the keyboard.

This one is actually very nice. The camera can be used without flipping out the phone. However, the keyboard layout is weird (see the position of the space bar).

This one is close to ideal. Very nice layout. However, like most keyboards above, they are all bluetooth keyboards and need to be charged separately.

Here is an ideal one (wishing the keys are not too small). A very compact design. Directly attached to the phone. However, it's just a concept product. Does not seem available on the market yet.

小玩意

呢排 Source 緊一個萬用後備電池，即係可以叉 iPhone, iPod, iPad, 等等電話同手提電腦嗰隻。無意間發現咗一個用 USB 叉相機電池嘅玩意。

細過粒電芯嘅大細

同專用叉電器一樣嘅厚度

USB 頭做 Lock

要將 USB 頭擺落嚟先用到

可調校闊度嘅正負極導電頭

一般情況

電池對啱正負極後，綠燈會著

叉電時紅燈會閃，叉滿電紅燈長著

只係十蚊雞，以後出門旅行只需要一條 USB 線就可以叉晒所有相機同 Video Cam 嘅電池，帶少好多叉電器!

數人頭

七一人數雖然無乜意義，但港大 Release 咗一堆响灣仔天橋嘅片，又不妨去數吓。

首先設定一個數得到嘅範圍，階因條片都影得幾遠吓，太遠根本睇唔到人頭。再睇吓平均要完成嗰段路嘅時間。

由 A 點到 B 點，25米左右嘅距離，最多唔多過15秒，差唔多每小時6公里，乜原來香港人連遊行都咁趕時間。跟住數人頭，Download 咗 16:33 - 16:55 一段同 19:10 - 19:33 一段，即係開初同三個鐘頭後兩段片。每段片再隨機抽出10個 Frame, 即係有廿個 Sample, 再响 Photoshop 數。
結果:
平均响15秒範圍出現: 48.7人
即係每一分鐘有: 194.8人
即係每個鐘有: 11,688人
即係响嗰三個鐘頭有: 35,064人

如果想要遊行有10萬人左右，咁响15秒範圍出現嘅人就要有90人，即係大概咁:

持續5個鐘。

今年要有20萬人根本唔太可能。當然，所有數字都好粗略，誤差亦好大，但係條算式無錯，响 Excel 塞條 formula 落去，就可以用唔同嘅假設放 number 入去計數。而20萬嘅意義，就只係俾壓力團體向政府同建制派施壓，真正數字根本就唔重要，結果係惡法要被押後審議，大家感覺良好就得啦! 反觀似乎政府不怕變相公投嘅50萬票，而怕數萬人上街，咁係咪即係官迫民反，鐵定要市民走上街頭抗爭先得呢? 警隊嘅朋友們，睇嚟日後要辛苦 D 喇!

講開警察，今次港大公開遊行片段俾大家去數人頭，唔知幾時警方先肯去 Release 示威嘅片，睇吓示威者有幾暴力都好。如果警方做事肯公開透明，我相信作為「理性」嘅香港市民，會識得分是非黑白。

Google+

叫人 Invite 咗入 Google+, 攪笑嘅係，唔知點解 Google+ 會推薦 Mark Zuckerberg 做朋友...

同埋點解呢位 Facebook 創辦人又真係有用到，劃咗一堆朋友入朋友圈...

你夠成熟嗎?

七一過後，大部份人响度討論有幾多人上街，示威者阻塞交通，警察清場嘅手法。但係爭持响呢 D 問題，可以解決最根本嘅問題嗎? 最根本嘅問題，係政府無人民授權。

假如政府有人民授權，政府有機會推出惡法咩? 如果立法機關係一個充份表達到人民嘅意願，就算政府推出惡法，立法機關可以提出不信任動議擺免政府。如果呢兩層都無事，廿萬人上街後，政府要倒台喇卦?

香港就偏偏無呢種制度，政府偏偏就係中央政府揀出嚟，立法機關偏偏表達唔到人民意願。所以廿萬人上街後，一切依舊囉!

公民抗命，參與者知道會被人拉，會承擔後果。立法會議員掟蕉，知道會被趕出立法會。一切都係等價交換。但政府做衰嘢，無後果可言。友人說，普選不可以解決所有問題。唯有普選，才可讓政府懂得等價交換，起碼問題少好多，到時大家可以集中討論嘅都已經係民生問題，再唔係糾纏响政治問題。

十七世紀，當法國王室被送上斷頭台，英國就意識到其深層次嘅意義，嚟個君主立憲。香港人嘅思維比英國人落後足足300年有多。

There is no love lost

友人對天公造美一文嘅回應，真係愛上君子之交! 一個回應，誘導出唔少想講嘅事。

友: 我不反對他們抗爭，但反對他們剝奪別人的自由。。為何要阻街瞓馬路？市民也有需要及自由使用道路回家，示威人士可以在行人路上抗爭，為何他們要做出跟民賤聯一樣的霸道行為？兩者間有何分別？

我: 分別在於政府同建制派有權，抗爭嘅人無。政府做衰嘢無人阻止到，抗爭嘅人有警察阻止。政府做嘅只係維護自己利益，抗爭嘅人維護緊大家嘅利益。

友: 話雖如此，我尊重他們的行為，但不代表贊同他們。。警察只是維持秩序，不是要跟他們對著幹。今天我聽到的是他們用咪大大聲話警方會過去修頓對付他們，但我 看不到警方有什麼行動，那他們為什麼咁講？這是不是他們所說的白色恐怖？政府及建制派的所謂權，他們不會永遠擁有，我相信人民的力量可以証明政府及建制派 是錯的，但所用的方法不是無理及力量式抗爭。香港人不同外國人，如果以理性方式作出抗爭，得到的是大眾的支持，今日沒有03年那麼多人，或多或少有些溫和 派的支持者不贊成去年的集體辭職，香港人是現實的，你亂用市民的錢，是得不到支持的。請看看，他們突然間衝去立法會及干諾道中，這些行為是得不到我們的支 持。。。

我: 政府得不到支持，咪一樣可以作惡，唔係你今日都唔使出嚟行啦! 曾特首重要視民望如浮雲，所以遊行人數根本唔代表 D 乜 (即係今日其實係白行)。我冇村上春樹咁型，可以「永遠站在雞蛋的那方。」但如果兩害取其輕，雞蛋似乎比石頭更加貼近人民。

友: 佢視民望於浮雲，只說明他的低智及高傲，我們做的是俾阿爺睇，03年証明了人民的力量能說服阿爺，証明香港人民的高度自律自治的精神。

我: 點解唔係阿爺被03年嚇怕，所以之後先响背後發功，導致今時今日嘅結果?

友: 嚇怕或是說服，我們永遠都找不到答案，而這答案在每個人心中也不同。怎樣也好，最重要的是結果。。。

我: 如果「最重要的是結果」，咁假設一場革命可以即刻有符合普世定義嘅民主，你會選擇年年去遊行去唔知幾多年，定一場革命? 可能我問太多問題，但香港嘅政制問題亦都太多...

友: 問題多不緊要，透過辯論只會越辯越明。。。政制問題是否真的有普選就能解決所有問題呢？我並不樂觀。

我: 假設候選人最終係為選民負責，今時今日嘅特首邊個係佢嘅選民? 一定唔係你同我囉...

只問立場 不問是非

所謂旁觀者清，局中人大多數睇唔清楚是非。有人話，遊行後阻街係暴動。但係大家知唔知乜嘢係暴動? 暴動係會放火燒車，洗劫商鋪，掟土製炸彈。六四咁大件事都未係暴動呀! 香港最出名咪1967年嗰 D 就叫暴動喇!

你可以唔認同阻街，但亂咁話暴動，係未見過大蛇痾尿定係太是非不分?

成件事，就只不過係市民不滿特區施政，出嚟和平抗爭。要怪就怪特區政府，唔好怪抗爭嘅人，因為抗爭嘅人幫緊你同我去爭取權益。

天公造美

我諗今年係最舒服嘅七一遊行，無落雨，又有少少風，氣溫唔太高。就好似個天要話俾香港人聽，香港人只係啱舒舒服服咁爭取民主，就一如廿年來泛民爭取民主嘅方法。如今，有兩批人分別响修頓球場同中環堅持抗爭，只係上街行嘅人，你又去咗邊? 我比較欣賞堅持嘅人。

Déjà vu 7

一條惡法，一個司長，一個局長，一個特首，再加一股民怨，彷彿係八年前嘅翻版。點解政府需要用八年去汲取一個教訓? 香港人亦唔抵幫，唔去自己努力爭取，令政府有恃無恐，今日嘅惡果，係香港人自己造成，經濟第一吖嗱!

民主政掍亦抵死，唔贊成五區公投，咁點解又唔支持遞補機制? 佢哋對五區公投咁反感，一個遞補機制一了百了，唔駛再承擔任何政治風險，最多咪搵多幾個人入名單，咪唔會俾第二個黨霸咗個位。香港人靠佢哋幫手爭持民主，慳 D! 要，你就自己落手投票，用腳遊行，所以响呢方面，80/90後比起佢哋之前嗰幾代做得好好多，上一代係欠咗俾佢哋。

所有嘢都係一脈相承，睇得通，就知香港人响政治上嘅 decision making 幾咁不堪。見到曾生都可以話自己係政治家就知，我重記得黃子華入面提到嗰本《白癡做特首》，睇嚟流傳咗俾曾生。

唔知幾時開始，遊行免問，心淡了，最好議席俾所有建制派做晒，等香港人認清佢哋會做 D 乜嘢，唔會吓吓都話用抗爭手法去爭取民主嘅人激。如果持續抗爭甚至一場革命可以帶嚟民主，又何妨呢?

重轁覆徹

八年前，政府硬銷廿三條，掃把頭掃咗上百萬人响7月1號上街，7月6號田北俊辭去行政會議成員一職，在7月7日凌晨宣佈無限期押後二讀。7月9日，有5萬人維堵立法會。7月1號，就好似係揭開董生下台嘅序幕。

八年後嘅今日，政府推出立法會議席替補機制，人肉錄音機嘅言論，加上警方嘅無謂限制，彷彿係想叫多 D 人响假期得閒上街。今日，律政司司長出嚟解畫，又有消息人士放風話會讓步云云。係想留低部人肉錄音機，定曾生唔想無端端腳痛?

國際爛 Gag

http://hk.news.yahoo.com/政府表示用抽籤處理候補名單同票情況-010400089.html
今朝聽到新聞嘅時候，都真係嚇咗一跳。乜原來呢 D 就係附合香港社會情況，有香港特式嘅民主選舉? 好心你咪笑大人個口，成日話乜乜乜會令到香港成為國際笑話，但自己又攪埋晒呢 D 無聊事。面係人哋俾，但架係自己丟。唔該將呢位局長直接放入堆填區，循環再造都費事。

八十後

呢排請人，一個新鮮人，寄咗封履歷嚟，睇落唔錯。搵人約佢上嚟見工，呢日唔得嗰日又唔得，又話要返五日工，唔係唔見。大佬，份招聘廣告咪講咗返五日囉，你無嘢呀?

跟住又問星期三得唔得，我咪話下晝 OK. 跟住又話會盡量到，大哥，家陣駛唔駛我上你屋企見你呀? 約完人又唔安排時間，玩呀? 真係... 嚟就嚟唔嚟就算!

香港歷史

TVB 出咗一個叫《香港玄案》嘅節目，奇實就係講緊一 D 香港嘅掌故，即係香港個名點嚟呀，石龜上山/下海香港會陸沉之類。正正經經嘅節目唔做，攪到好似查案咁，重要搵老人家出外境，都幾不知所謂。唔該 TVB 做返 D 好少少嘅人文節目啦!

城市狹縫

雲在天，人在地。响狹窄嘅街道上，要一睹雲境，就只有响城市中嘅狹縫見到。今日响街度，抬頭一望，天藍得靚，雲排得亦唔錯，身上無帶相機，唯有用手機影低。

Post 咗上 Facebook, 無獨有偶地，其他人都有代表作:

Drama

人生苦悶，大家都想响電視到找尋娛樂。以前有肥皂劇，但觀眾開始覺得演員唔夠七情上面，之後開始流行各式各樣嘅真人 Show. 十幾年來，都以 Offstage 嘅 Show 作為主導，例如 Survivor, Apprentice 咁。但觀眾又開始覺得呢 D show 入面嘅人物同劇情太過作狀，有造假之嫌。

跟住就出現一 D 以比賽藍本嘅真人 Show, 即係話以比賽為名，做真人 Show 為實嗰 D. Britain's Got Talent入面嘅 Susan Boyle 就係真人 Show 嘅其中一個主角。由佢一鳴驚人，到準決賽失準，最後得個第二名。加上新聞同網絡嘅發酵，當中劇情峰迴路轉，無不扣人心弦。

最近响見到幾條《中國達人秀》嘅片段，都係做 D 類似嘅事，但混賬嘅係，製作人响個人表演之前，都會加插主角嘅悲情故事。或者，睇第一次可以賺人熱淚，但攪多幾次，都覺得幾過份。故事一定係真嘅，咁究竟呢個係才藝比賽定故仔鬥慘比賽? 其他節目嘅劇情，係比賽本身誘發出嚟。但呢個節目，係將參賽者嘅背景故事作為主體。

講真，中國人口多，只要有 1% 嘅人不幸，就會有 1300 萬個悲劇，你想逐個逐個聽嗎? 一秒一個都要聽夠 21 個禮拜。造催淚彈都要有個限度吧!

Do you hear the people sing

响 179 年前嘅春夏之交，法國有一場政治風波。1832年6月2日，被人民愛戴嘅 Lamarque 將軍逝世，觸發大學生上街抗爭，4日後流血收場。事件亦被法國作家 Victor-Marie Hugo 响30年後寫成名著《孤星淚》，小說被編成音樂劇後，《Do you hear the people sing》成為重要嘅曲目，而頭四句亦成為歌曲嘅主旨:

Do you hear the people sing?
Singing a song of angry men?
It is the music of a people
Who will not be slaves again!

事實證明，歷史係會不斷重演。157 年後嘅春夏之交，中國亦有一場政治風波。一樣係人民愛戴嘅領袖逝世，一樣係大學生上街，一樣係流血收場。唔同嘅係，當日法國嘅七月王朝响十六年後被第二共和國取代。至於中國，今年已經係第廿二個年頭，政權卻沒有絲毫改變。

六月四日，你忘得掉嗎?

早就不是好人

他說：「相信有生之年內，失業率都唔會去番九七年百分之二點二。」
他又說：「我一直相信，人類重要的美德就是謙恭（humility）和自我反省（self-reflection）。剛愎自用加上勇往直前，最後很容易車毀人亡。」
今天，他說：「本港沒有地產霸權。」

Would you mind?!

笑聲救地球

Onsite 做嘢，食 Lunch 嗰陣腦海突然浮現出笑聲救地球嘅主題曲:
大氣頂穿左個窿 醫生也得傷風
嚴寒熱到懵 暑季偏偏刮北風
末世呼聲中 打倒叫聲響夾兇
遊行鬧市中 舉起布額當運動
為了空間爭寸土 新的建築天咁高
雲層上跳騷 打攪上帝實冇譜
淑女想收腰 早餐晚餐都要少
難為在遠方 飢餓吔蕉當豆苗

原來廿年前嘅嘅現象，今時今日依然係咁，其實香港係咪廿年來都無進步過?

Slashdot 3

Sad but true...
Confirmed: Microsoft Says It Will Open Source VB 6

Re:And we care why? (Score:4, Funny)
by fragfoo (2018548) writes: on Thursday May 19, @07:48PM (#36186374) 
> Or is there some secret in the VB6 code that the open source community can actually learn from?

Probably yes, you can learn a lot from past mistakes.

羣眾的撕裂

母語教學，讀中中嘅學生與讀英中嘅學生撕裂；
高地價，普羅市民與地產商撕裂；
自由行，大陸「同胞」與香港人撕裂；
六千蚊，香港永久性居民與新移民撕裂；
最低工資，勞工與資本家撕裂；
天台屋，非原居民與「原居民」撕裂；

民眾不斷被當權者撕裂，階級鬥爭沒完沒了。然後當權者說：「要建設和諧穩定社會。」

最後，民眾與當權者撕裂。

天台屋

天台唔知點解可以加蓋起頂? 咁究竟原本個天台係天台，定係個新頂係天台?

局長又話，天台屋同簷篷、花槽、晾衫一樣。真係... 我哋成日話大陸人無常識，似乎香港嘅局長都不遑多讓，就好似有人話手機會取代 PC 咁。

又有一說話個天台屋係用嚟隔熱，咁點解唔直接綠化天台? 天台綠化後一樣可以隔熱，又夠環保。

呢鑊真係有排攪，選舉年特別多事...

十年樹木 遇水架橋

年初胡主席到訪美國，奧巴馬送咗一句「十年樹木，百年樹人」去比喻中美關係發展。

If you want one year of prosperity, then grow grain. If you want 10 years of prosperity, then grow trees. But if you want 100 years of prosperity, then you grow people.

其實，一向都唔係太明「十年樹木，百年樹人」係乜嘢意思。既然奧巴馬講咗句咁差長嘅英文，去查一查都唔係一件怪事，原來英文係差唔多成個典故嘅意思講晒出嚟。

呢幾日中美戰略與經濟對話，希拉利有另一句

When confronted by mountains, one finds a way through. When blocked by a river, one finds a way to bridge to the other side.

係「逢山開道，遇水架橋」嘅翻譯，但英文句子唔太令人想像到中文裏面嗰種困難重重嘅感覺。

個財政部部長重攪笑，直情用普通話講「有福同享，有難同當。」都唔知好嬲定好笑。每個國家都有自己嘅政策，要做到有難同當，我諗美國同英國嘅交情都做唔到，更何況係一個日日俾你叫佢人民幣升值，天天俾你鬧人權問題嘅中國會聽你支笛?

天地雲海

好似好耐都無影過相，噚日難得天朗氣清，出發。

第一站係孫中山紀念公園，原來入面有個大草地，但唔知點解俾膠紙欄一欄，而又可以入去。向信德嗰邊一望，雲境有睇頭，set 起腳架影 time lapse. 半個鐘左右，雲量略嫌不足，轉影過對面海。ICC 一柱擎天，加上海量嘅雲，影多九個字再出發。

第二站西九，影日落。真係好耐無見過咁靚嘅鹹蛋黃，加上海風，令人心曠神怡。由夕陽到落霞，由餘暉到夜幕低垂，加上旁邊遊人嘅玩樂聲，感覺良好。本來想影埋月亮下山，但一大塊烏雲久久不散，唯有離開。

一日影四段 time lapse, 真係過足晒癮。

相簿

最低工資

今日係五一勞動節之餘，亦係實施最低工資嘅日子。有幾條問題值得諗一諗:

1. 最低工資實施之後，有人被炒，係咪即係話呢 D 人手原本就係多餘嘅呢? 點解一間公司炒完人之後重可以維持到服務?
2. 最低工資實施之後，點解有薪金嘅加幅係可以高達三成? 係咪有部份階層嘅人嘅生活享受係建築响對其他人嘅壓榨之上?
3. 點解僱主只係投訴對僱員嘅加薪，而唔投訴地主加租? 難道幫你做事嘅唔係僱員而係地主?
4. 點解會有人因為剛畢業嘅大學生比清潔工低有問題? 大學生會一世洗大餅乎?

最低工資只係經濟體系入面嘅冰山一角，衍生出嚟嘅就業 (被人炒嗰批)、福利 (被人炒咗搵唔返工嗰批)、通脹 (彌補工資差距嗰筆錢)、強積金 (月薪制嗰批大多過5000蚊一個月)、住屋 (亦有機會多過7000蚊一個月嘅入息限制) 等等嘅問題，政府又考慮成點?

香港政府欠缺一套完整嘅經濟藍圖。

舉國歡騰

威廉王子結婚，全球矚目。想知道乜嘢係萬人空巷，睇嚇倫敦嘅街道夾道送上祝福嘅群眾就知道。萬人重未夠排場? 白金漢宮外有五十萬去睇新人嘅情心一吻，一吻唔夠嚟個 One More, 咀多一啖，王子話 No More 喇~~

唔知幾時又到享利王子呢?

繁忙假期

有4日嘅復活假，的起心肝寫咗個 Project. 所有 Project 都係一樣，寫 Code 唔難，用得時間最多嘅係諗 Features 同埋寫 Document. 如果一個 Project 重要係响人哋嘅 Code 之上寫，咁大部份時間都係去 Study 人哋嘅 Code. 不過呢 D 自作業，無計。

寫 Code 嘅時間其實用得唔多，我諗一晚已經 KO 咗，但係要放上 CodePlex 又係另一回事。放上 CodePlex 就即係俾全世界人睇，咁就要寫一大堆你知但人哋唔知嘅事，要諗人哋會唔知乜，寫乜嘢會容易明白，咁就已經攪咗兩晚。

噚晚終於攪掂晒，放下一件心頭大石。

Heroes vs. SPEC

睇完日劇 SPEC. Heroes 味都幾重，都係異能人 + 異能集團 + 警察神秘部門嘅故事，可惜結局有少少爛。

智慧

好多時一 D 免費嘅網上 resource, 都會用一堆 captcha 去睇嚇用家係咪真係一個人，呢件事無可口非。但係有時，個效果真係會連人都考起埋:

面對呢 D 唔知係乜嘢嘅圖，都好懷疑究竟自己係唔夠聰明，還是做 captcha 嘅程式太勁，抑或係寫 captcha 嘅人痴咗線。

盲點

下晝食完晏去銀行，經過書局，隨手拎起講 decision science 嘅書。書中話原來中國唔係四大文明古國，成日話四大文明古國係巴比倫、印度、埃及、中國，咁希臘呢? 原來常識都唔一定係啱嘅!

高地價

下面幅圖可以理解為:

1. 通脹同恆指嘅長遠走勢其實係差唔多
2. 樓價跑羸恆指好多
3. 儲首期係一件好難嘅事

不老的傳說

八年前嘅四月一號，張國榮俾咗全香港最大嘅一個愚人節悲劇。但回心一想，究竟一顆巨星响壯年嘅時候磒落，其實係咪一件好事?

張國榮、陳百強、黃家駒係咪都係因為英年早逝，所以先係經典? 睇返上個禮拜嘅華麗明星賽，草蜢其實都無咗嗰種活力，DoDo 姐簡直嘩一聲添。今日娛樂圈嘅大哥大姐們，都已經應該係退休年齡，但似乎青黃不接，佢哋重要幾時先可以安享晚年?

明星俾人嘅感覺係光鮮亮麗，年華老去嘅明星，似乎並唔係一件太完美嘅事。

將心比己

雷曼事件，纏繞咗中環各大銀行幾年。如今提出賠償九成和解，苦主們話要賠埋利息云云。其實，係咪剩係賠利息就得呢?

試諗嚇，如果你已經有幾百萬退休，有位同你好熟嘅銀行經理話介紹一隻高息過簿仔嘅債券，你覺得 OK, 個經理叫同事幫你攪攪佢。跟住幾個月後，銀行話你知你啲棺財本已經無曬，你會點?

心理壓力，加上每日奔波，原本安享晚年嘅生活，因為「債券」而換嚟幾年嘅身心疲累。計我話，百分百賠償係必須，加利息係應份，有無心理賠贘就要睇銀行有無良心。唔夠 100% 重要唔可以再追究，你係咪痴咗線?

Software Development 的問與答

草蜢仔: 如果一開始有一千份 design spec, 做咗幾個月都重有一千份未完成，咁點算?

師父: 咁點解做咗幾個月都無變到呢?

草蜢仔: 因為尐 design spec 出得太快囉! 其實 design 係咪應該快過寫 code 㗎?

師父: 無可能，寫 code 係最簡單嘅 process. design, 寫 code, 同 testing, 需要嘅時間可以係 1 比 1 比 1. 但 design 嘅比例無可能再細。

草蜢仔: 但係真係出得好快喎，有時個 design 重有 refinement 添! 都唔知點算...

師父: 咁咪即係未 design 好囉!

急性盲搶鹽

鹽嘅化學成份有鈉同埋氯，唔知點解大陸會傳到有碘嘅成份。呢個傳言有幾個可能性:
1. 有人想托高鹽價圖利
2. 大陸嘅鹽有大量雜質，當中包括有碘 (注: 海鹽係有碘，大約係五萬份之一嘅含量)
3. 大陸嘅化學已經進步到可以用碘去生產假鹽，只係大家可能食緊唔知，趁今日爆料

無論係邊種原因，似乎有人立手不良，唯恐天下不亂。而香港嘅主婦們，響咁亂嘅情況下，可以搵你嘅老公、仔女講嚇呢 D 流言先，唔好假嘅信以為真，傳俾其他主婦。話曬香港係國際都會，傳埋曬大陸嘅謠言，會成為國際笑話，曾特首同一眾高官們會唔高興。

如果你仲係心信不疑嘅話，我建議你去買包紫菜又或者乾瑤柱食。

P.S.: CNN 話原來大陸嘅鹽係加咗碘去預防因為缺碘而引起嘅症狀。

社會大學

見到一位小妹妹因為上司歧視自己畢業嘅大學而唔開心，或者我都要講吓我呢個浸完鹹水返嚟嘅人嘅感覺。

剛畢業嘅時候，我諗我係香港第一批可以用 extreme programming 同 MVC 去寫 Java program 嘅人，見到自己嘅同輩嘅朋友唔識，對自己係有一份優越感。返到香港，我有封 resume 係去 apply 一份 SA, 因為我覺得，system analysis/design 呢回事大學已經學過，工作應該無難度，興幸地因為呢份 resume 得到一份 in-house developer 嘅工作，呢個 offer 對我有少少困惑，但見咗工三個月，take 呢個 offer 係最好嘅選擇。呢份工作，令我見到比我一位俾我資深嘅人，佢唔知 MVC 呢個 term, 但實際上佢嘅 design 同 implementation 做得到 separation of concerns, 心裏十分佩服，原來知識可以由經驗累積，我只不過係比同輩識多少少嘢。

今時今日，我合作過嘅同事，有讀過同我一間大學，有其他國家畢業，有讀過本地副學士再上學士，亦都有唔係本科出身。唔係本科出身嘅，不比同我一間大學嘅人差。本科出身，只係訓練咗一套對工作比較合適嘅思維，識得做 software 要用嘅工具，但呢一切，都係可以從工作當中學到。工作上學唔到嘅，只不過係人家比你多少少學術背景，對工作全無影響。而實際上，工作上需要嘅知識，只係大學入面嘅唔夠一半。試問有幾多人依家寫 program 會做 complexity analysis? 公司面試題目入面有條最經典嘅題目，就係叫人畫兩個 Venn diagram, 一個 union, 一個 intersect. 但其實工作上，根本唔駛用到 set theory. 可惜呢條問題會有超過一半人答錯。

今時今日，我以寫 .Net 為主，MVC 已經係全行都用緊，做緊 Flex, WPF 同 Silverlight 嘅都已經要 MVVM, extreme programming 响香港我只係聽過一間速遞公司用緊。何況呢一行日新月異，邊間大學畢業同讀邊科唔係太重要，何必一般見識。

P.S.: 讀 software methodologies 嘅時候，到最後嘅結論，係無論用乜嘢方法，到最後人係其中一個令 project 成功嘅重要因素。

災難

當海嘯沖入市鎮，不奇然諗起日本人所製作嘅卡通情節。例如有怪獸、外星人、高科技神秘集團為咗統治地球，一定係襲擊日本先。

但另一部份無發生嘅情節，係日本人十分冷靜，無太大驚慌，可以想象到成個民族嘅質素，係幾咁高。雖然對日本政府無乜好感，但有咁嘅人民，真係可以做到多難興邦。

反觀，如果有海嘯襲擊香港，香港政府會做 D 乜? 香港人又會做 D 乜? 中央政府又會做 D 乜? 財爺用六千蚊已經可以撕裂香港，一個海嘯，我諗香港渣都無。不過，所有高官富豪都係住响山頂，佢哋會無事嘅多。

黔滇之旅 - 後記

第一次乜都唔諗就跟友人去旅行，有少少失望，其實可以再好 D. 例如:

• 可以請多日假，就唔駛搭早機、夜晚火車
• 可以幫手訂貴陽嘅酒店
• 可以帶個行李箱裝多 D 嘢，好似全景鏡咁
• 可以幫手搵定去景點嘅車
• 可以留低影日落

今次旅程，有唔少嘅挑戰，亦有唔少嘅得著，睇花睇到日日都啍住迎春花都係第一次，其待下次嘅旅程。

今次影咗唔少相，發現自己唔識影花，影日落同雲拿手好多。

黔滇之旅 - 圓通公園

昆明有個圓通寺。寺後就是圓通山。從前是一座荒山，現在是一個公園，就叫圓通公園。公園在山上。有亭，有臺，有池，有榭，有花，有樹，有鳥，有獸。後山沿珞，有一大片海棠，平時枯枝瘦葉，並不惹人注意，一到二、四月間，其是花團錦簇，變成一個花世界。

一朝早起身被人打醒，梳洗好後去返噚日間褔建鋪食早餐。唔太想食麵，叫咗碗淨雲吞，我估差唔多有廿粒，好滿足，再加蒸餃、炸餃、伴餃，份量好似同噚日差唔多，但係就食得太飽。

出發去圓通公園，中途經過圓通寺，但行極都唔覺圓通公園嘅入口，問途人，途人都話向前面行就係，但原來行多一步，其實遠在天邊，近在眼前。時間尚早，但已經有唔少人入園賞花。花並唔係好似花潮咁「上天下地都是花，可謂花天花地。」但的確賞心悅目。

影完一輪，搵個地方休息，本來想花下一 deal, 但無奈所有嘅枱都俾已經名花有主，唯有去其他無人多人嘅地方休息。Deal 之前買咗酼奶，好好食。玩咗幾舖，太陽出嚟，收拾好再影過。

影得都差唔多，走出公園，花潮後見人潮，人，其實就係中國唯一唔欠嘅事物。附近就係橋香園，一於去食碗過橋米線。叫咗碗進士米線，熱呼呼嘅湯，親手加入生料同米線，別有一番風味。行返酒店，執好行李，截的士到機場，飛機 delay, 再 deal 多幾舖。

落機後有幸地上到十分鐘後嘅直通巴，但不幸地過關時被其他人延誤咗少少時間，而錯過响過境後嘅巴士。幸而等多十幾分鐘又有另一班，到咗九龍站轉去灣仔嘅車，响中環落車，好快咁返到屋企。

Home sweet home!

黔滇之旅 - 昆明市郊野公園

七點幾，火車查飛，被強制起身。醒咗瞓唔返，稍略梳洗，望嚇窗多，終於知到點解中國係發展中國家，處處大興土木。望咗一個鐘，終於到火車站，落車搵的士站，個牌明明指住的士站嘅出口，但出到去唔單止唔見有的士站，連的士都無架，夠曬老點。

好不容易搵到架的士，耐何去酒店都塞咗唔少時間，無計，八九點係返工嘅繁忙時間。到咗酒店，好彩可以早 check-in. 放低行理，等友人準備好後，出發去食早餐，再去郊野公園。去到一間食福建米線的鋪頭，叫咗一碗麵、蒸餃、炸餃，大家都食得好滿足。

截咗架的士，途中司機係咁叫我哋包佢㗎車一日，到最後響中途黃土坡掉低咗我哋，唯有包另一架車上山。上到山買飛入公園，雖然眼瞓，但有好的預感，因為入到去無耐，就已經見到唔少花迎接我哋。落到公園底部，展覽緊唔同童話故事嘅公仔，例如係蠶豆樹上天遇到巨人、國王的新衣、迪士尼人物、變咗樣嘅叮噹同大雄等等。

去到山腳下嘅湖，有好多錦鯉，大家都不忘去玩春晚嘅魔術。差唔多時間食晏，但唔太覺有餐廳。再望過少少，有一條羊腸小徑，終於見到間餐廳，又係嗌咗四餸。食完飯，大家原來都有睡意，花亦都影得差唔多，出返去公園入口，截車返黃土坡。可惜我哋腳程比婆婆慢，比婆婆截咗架包車，唯有響路邊等。

巴士到，上車，瞓咗一覺，個人精神咗，聽今朝的士司機講去金殿都係十蚊，決定去金殿賞茶花。點知一去到，入場費三十個大洋，比的土司機老點咗，重要距離關園時間兩個鐘，放棄，再搭巴士去翠湖影海鷗。原來新巴响昆明都有服務，而且站重好密，差唔多一開車無耐就話到咗下一個站。入到去翠湖，好多海鷗，唔知佢哋響邊度嚟，總之好多好多，天上有，湖面有。差不多黃昏，要離開，多影幾幅日落照，返酒店放低裝備再出去食晚飯。

無耐雲南人似乎都係無辣不歡，除咗山羊肉，款款多多少少都落咗辣椒，最後晚差有少少美中不足。

黔滇之旅 - 音寨

瞓咗一覺好嘅，出去食咗個牛肉米線做早餐，搵去音寨嘅巴士站。雖然之前一晚睇過大概響邊度，但實在太唔起眼，真係少啲眼力都會 miss 咗個街口。買巴士飛後，時間尚早，響附近行一圈後再上巴士等開車。

到咗貴定盤江，入音寨前要行一段路，傳聞入景區之前係要收錢嘅，但收費處無人，厠所亦都鎖埋，有老點嘅成份，都唔知係好事定唔好事。唯有無視收費處，進入景區，沿路都係一片一片嘅油菜花，雖然花未開齊，但依然心曠神怡。而美中不足嘅係所謂嘅金海雪山，只見金海，不見雪山，傳說中嘅梨花唔見咗。

經過個半鐘嘅腳程，終於到寨門前，入寨前友人夫婦不忘到貴子亭影相，希望二人年生貴子。寨內解決好生理需要，洗手間外唔知點解出現國家消防法，響一個咁濕嘅地方似乎有少少多餘。再望遠少少，出現一幅又一幅嘅生育計劃宣傳，包括男性六大忌...

午飯時間，食農家菜，有番茄炒蛋、油菜花、排骨湯等等四餸一湯。原來油菜花食落，就好似日本芥末咁，有少少嗆鼻，亦難怪，原來油菜花榨出嚟嘅油就係「芥」花籽油。醫完肚，再週圍影相，太陽亦都出嚟，景色由淡黃變成鮮黃，我哋亦毫不客氣走入油菜田內影相。影完相，叫農家戶幫手召咗兩部電單車，以十倍嘅速度出返盤江。

夜晚要搭火車，所以速度咁行咗個圈搵食，但好多都無位，其間有間叫「環保餐廳」，不其然想起 environmental friendly dishes, -_- 最後響酒店出面嘅小菜館食飯。一樣係四餸一湯，飯前亦都 deal 一 deal 等餸到。飯後速度返酒店沖涼，再向火車站出發。

因為係軟臥位，所以可以入貴賓候車室，唔駛響出麵食大量嘅二手煙。有時間，再 deal 一 deal. 班車 delay 咗半個鐘，四個人一個車廂，要瞓上格床位，上去有少少難度，但經過一兩次經習，唔係大問題。只係另一個 worst case scenario 出現咗，就係架車好嘈好震，就算加咗耳塞，低頻嘅聲依然可以穿透耳塞，加上車廂不停震動，平均每兩個鐘醒一次，睡眼質素直線下降...

黔滇之旅 - 花溪公園

早起嘅一日，要坐直通巴上深圳去貴陽。要早起之餘，早到買唔到麵包做早餐，搭的士重要隧道費貴過車費，加上第一次去深圳坐飛機嘅不安，心情極唔老嚟。

去到深圳機場，聽聞響鐵梯等，點之有幾條嘅鐵梯，加上重要人物無手機 roaming, 老點指數上升。響機場兜咗個圈，想去麥記食個早晨全餐，週圍都有大大個 M 字 Logo, 就係搵唔到所在地，老點指數繼續上升。搵唔到麥記，唯有去 KFC. 叫咗個粥同一杯豆槳，估唔到 KFC 做 localization 咁厲害，如果佢有粢飯就更加好。食食嚇，突然聽到話其實酒店係無 book 到，worst case scenario 出現咗，似乎今次可以好好玩，第一次玩 no booking, 似乎係一個幾好嘅體驗.

等咗一陣，重要人物出現響眼前，加上食飽，心情靚返少少。跟手去 Check-in, 吹水、入閘。友人們玩 deal, 我要攪上網先。攪咗半個鐘先上到，但無耐就要上機，無計。但原來隻 3G 手指 roaming 係可以上到 facebook, 蘋果日報等網頁，呢個係一大發現。

飛到去貴陽，坐巴士到火車站，巴士播緊一套唔知幾多年前嘅戲，有洪金寶、成龍、張家輝幾位大明星，後生到呢~ 到站，第一件事搵酒店，附近有間 Home Inn, 二百幾蚊一晚，但友人們略嫌貴，去到一間叫金鑫嘅，咁鬼多金，有少少心涼。一入到去，電梯入面嘅羊騷撲鼻，心唸住一定係呢間。睇咗幾門房，真係住呢間。雖說一分錢一分貨，所有事物例如睇電視咁，都好似要搵到個竅門先用得到，但個厠所真係好唔得。Anyway, 只係一晚咁多。放好大型行李，輕裝去花溪公園。

搭的士去到花溪公園，天色就好似心情咁，灰灰暗暗，地下又濕，似乎老天爺話我知今日不宜出門，可惜一切太遲，已經無法改變今日嘅命運。入到公園，四圍逛搵桃花。但好似未到時候，到碧桃園，開嘅桃花就只係幾棵，大家就圍住嗰幾棵響度 burn 電池同 SD card. 影完花，再閒逛一陣，響水杉路附近影咗少少相，同時雨亦越落越大，唯有打道回府。

友人響搭的士嗰陣見到滇箘王，有說響昆明好出名，夜晚去試嚇云云。叫咗四餸一湯，似乎辣椒係貴州/雲南唔少得嘅嘢，大家都中曬招。唯有多叫一個麵，再千叮萬囑乜都唔好落，剩係落鹽。唔係係咪辣傻咗，加少少醋，食落份外好味。大家見到好似食剩太多嘢，傾緊會唔會 recycle D 飯餸，到最後得出一個 environmental friendly dishes 呢個 term. 好彩，大部份都清咗，應該唔會有咁噁心嘅事出現。

食飽，返酒店，一沖涼就出事，水溫唔夠 constant, 一係好熱，一係好凍，真係唔知點沖，有一半時間都係同水溫搏鬥。沖完涼，upload 完相，瞓覺。

財案狂想曲

財案宣佈前:
曾特首: 年底同下年都有選舉，今年財政預算案整差少少俾你哋想位。
曾主席: 好喎!
曾司長: 得，交俾我!

財案宣佈後:
曾司長: 嗱! 呢幾日我企硬㗎喇，之後我會咁咁咁咁咁...
曾主席: OK, 等我印定 D 成功爭取 Banner 先!

曾特首俾人撞後:
曾特首: 家陣點先，攪到我俾人揼! 快 D 同我攪點佢!!!
曾司長: 得，聽朝會宣佈「微」調。主席，聽日準時開會呀!
曾主席: 好好好! 即刻安排...

---

派 Cash 六千，退稅六千，的確係好多人得益。但新移民無得著，N 無依然 N 無，雖然的確唔係永久居民，對香港未夠多「貢獻」，但佢哋其實可能係最需要嘅一群，係咪應該對佢哋作出更多支援?

作為一個財政司司長，係應該對香港嘅經濟有一幅全面嘅藍圖。但係回歸以來咁多任，就只得梁司長有呢一幅藍圖，但就因為政治智彗不足，無端端俾人話「偷步」買車，做咗一年後俾香港人轟落台，之後俾一個飲完紅酒亂講嘢條條 fing 嘅 360 上位，再嚟個唔識轉彎又唔食人間煙火嘅公務員，所以香港人有今日嘅日子，某程度上係抵死。

回水

集體嗌回水，係每一次嘅黃子華棟篤笑結尾嘅指定動作。估唔到今年財政預算案一出，會全城一齊嗌回水。

計一計數，七百幾億盈餘除返開七百萬人，每人都可以分成萬蚊。二百四十億俾咗強積金，都仲有四百六十億剩，咁係咪可以再每人派返六千幾蚊呢?

今年同下年都係選舉年，泛民主派已經表明反對預算案，但建制派話會同曾司長傾，唔知今年年尾 D 成功爭取又會印 D 乜。

彩虹勇士

彩虹勇士號到香港，本身覺得綠色和平幾OK, 同友人一齊去睇吓。排隊，睇展覧，等上船，當中學到新 term: 非暴力直接行動

等上船期間，睇到地下有張貼紙貼咗响度，中國好多人都無乾淨嘅食水之類。跟住有位唔知係義工定授薪嘅工作人員，走上嚟搭訕，sell 每月捐錢。本來捐錢唔係問題，但 sell 嘢嘅手法有待改善:
1. 一走埋嚟話佢原來都無留意到地下張貼紙
2. 講解食水污染唔夠 pro, 有唔少錯漏
3. 話自己不滿其他慈善團體有太多錢而 cut 捐款
4. 把口剩係話唔係迫你捐，但不論態度上或者語氣上都响度迫緊你

最後嗰點都幾係嘢，友人老婆耍唔掂，我唯有都采取非暴力直接行動，一句腰落去，工作人員亦知難而退。事後，大家都討論點樣可以 sell 好 D. 遇著呢類人，對個機構嘅形象都幾大影響，就範嗰 D, 都可能一年後唔會再捐。不過難得呢位我估有四十歲嘅工作人員咁有火，希望可以改善改善。

其實呢位工作人員有一句都幾到肉，佢話：「你手機、寬頻駛唔駛個個月交錢？點解唔可以個個月為環保作出貢獻？」令我諗起心理學 Decision Science 上講嘅一件事: 人會覺得眼前、短線嘅事比長遠嘅事情嚟得重要。Anyway, 我覺得環保唔係靠捐錢，捐咗錢唔代表你可以浪費資源，捐錢唔係買贖罪卷。

環保要講生活習慣，剩係將備用電源熄咗佢，我啊媽話依家 D 電費平過當年我去咗美國嗰陣少少，即係依家同十幾年前嘅電費差唔多喎?!

至於捐錢嘅事，等我啖氣下咗先再講!

居安思危

曾司長話：「遇上經濟逆境時，政府會採取反週期策略。」
但實情係當遇上經濟逆境時，香港政府又話會量入為出。

黃子華講過：「居安果時要思危, 居危時又思危, 安嚟做乜鬼o野呀!」

家陣香港政府好境時又唔派錢，唔好境時又唔派錢，咁政府要咁多錢要嚟做乜呢?

奇妙的一天

初三赤口，同屋企人飲茶，跟住俾友人 call 上屋企拜年。拜年，本來諗住買柑，取其金銀滿屋。但超級市場嗰 D, 賣相欠佳，街市同街邊生果鋪又唔覺有開檔，辦館又賣到五個大洋一個，嘩! 都真係物以𥤱為貴。又唔想買糖果零食之類，一來要買兩合先抵，二來唔知友人啱唔啱食，三來又唔太健康。攪咗十幾份鐘，最後變咗買咗半打橙。

搭巴士到西環，原來西環街市嘅生果檔係開㗎?! 是但啦，都買咗，行上友人屋企，乜街邊嘅生果檔都係有開?! 原來新年買嘢，西環係方便過上環...

迎接我嘅除咗主人家，重有另外兩位友人，外加一個不合禮節嘅笑話。夠人，開枱玩 board game, 再玩三國殺，再玩 Monopoly Deal, 再玩三國殺... 中途又有人加入、離開，但個個都玩得不亦樂乎。盡興之時，已經係夜晚八點，食飯時間。

但年初三晚，都真係好難搵食，本來要去加記，但要等半個鐘。開嘅，大部份都係西餐，幾番探索，原來有另一間可以食小菜嘅地方。嗌好餸無耐，竟然話豆腐賣晒?! 有少少汗顏，唯有揀過另外一樣。晚飯過後，各自返歸。過咗一個充實嘅初三。

2011

呢幾年每年嘅最後一日，都會影少少嘅。今年難得可以早走，諗住去灣仔影日落，點知去到，原來冬天個太陽去咗南面，俾成個香港島遮住，真係明年請早。咁難得有個大靚位見到國金，不如唔走住，等埋今晚場 Show.

似乎香港島呢面唔係太多人，太早到無乜意思，所以拎咗支全景鏡影咗少少相，行吓坐吓。睇完幻彩詠香江無耐，友人嘅麥麥送到咗，速度解決後，個場好似多返少少人氣。差唔多時間，開始 set 腳架同相機。時間尚早，用 Google Sky 睇星，見到每年都會見到嘅獵戶座，今晚天色都幾好，睇到唔少星。

最後數小時，大家都準備就緒，現場有人派吹氣 bon bon 棒，警察開始出動鐵馬。

倒數後出現嘅煙火，唔知係咪角度問題，好似少咗 D texture, 似乎真係要正面睇先係王道。今年亦無上年咁好彩，影唔到煙火爆出嘅相。五分鐘過去，人潮漸散，玩吓 light painting, 影埋星後閃。警察哥哥話:「有一皮人」喎! 原來皮都可以用嚟形容人...

影片效果: B-
相片效果: B

2010 回顧

• 愛上珍珠奶茶
• 唔見咗部相機
• 買咗支全景鏡
• 完成英法之旅
• 霧都倫敦
• 子午線格林威治
• 出生城市利物浦
• 浪漫之都巴黎
• 到過北京
• 愛上雲境
• 影咗好多 Time Lapse
• 損失咗一名愛將
• 第一次做啊 Sir
• 換咗個 Digital TV Tuner
• 買咗部 Laser Printer
• 買咗部 Android Phone
• 影少咗相
• 寫少咗 Blog
• 做少咗 Gym

快樂聖誕

聖誕前夕: 公司聖誕 Party, 抽到四份禮物. Good!
聖誕日: 同朋友 BBQ, 行錯路但趕到尾班車. 盡興!
拆禮物日: 與友人食 full day breakfast, 再到中環睇聖誕樹。 舒服!
補假日: 到舊同學屋企打機，再出街打甂爐. 正!

Write to express, not to Impress

Merriam-Webster 公佈今年十大最多人查嘅英文字:

1. austerity
2. pragmatic
3. moratorium
4. socialism
5. bigot
6. doppelganger
7. shellacking
8. ebullient
9. dissident
10. furtive

你又識幾多? 唔識唔緊要，因為全世界都唔識，所以先上十大。

Undo

今日一睇新聞，見到 MC Jin 響聖誕為曾特首而 Rap, 重要係 Rap 起錨添?! 情況就好似支聯會主席企響國家主席隔籬同大家一齊拜年咁，不禁會問點解?

MC Jin 響 Same Cry 度 Rap 出六四嘅哀號、沙士嘅悲情，反高鐵事件亦講出咗佢嘅立場。點解會變成今日咁?

係身不由己，經埋人接咗無得推?
定係覺得只係 Rap 一首「聖誕歌」無傷大雅?
抑或被名利沖昏頭腦?

我希望係前前者。但客觀嘅事實係，今次一舖清袋又唔會，只係好大機會流失唔少支持者，

聖誕禮物

公司一年一度嘅聖誕 Party, 要準備禮物。係時候行嚇街，所以好早就做完 Gym, 落灣仔逛。

想買一本英文電腦書，但原來普通書局同埋電腦城無呢回事。
3C 用品，又好似行得滯。
設計素材，譁! 80 個 File 要 200 蚊，又好似唔係好抵。
落玩具街度睇下先，咦! 我記得好似幾個月前決定買呢個做聖誕禮物。好似響 188 有多 D 款揀，買隻實用嘅好 D, 定係好玩嘅好 D? 都係實用少少好，買完重幫我包埋花紙，Mission Completed.

你的延續

今年嘅風雲人物，係 Facebook 之父 Mark Zuckerberg. 似乎慢咗幾拍，家陣最 hit 嘅係 Wikileak. 另外，點解要係 Facebook, 而唔係 YouTube? Twitter? Apple? 時代雜誌，似乎同時代巨輪脫節。

申亞

香港傳媒係咪唔識中文?

乜嘢叫做「政府支持申亞」? 政府要攞錢攪亞運，可以自己唔支持咩?

政府可以「提出申亞」，可以「游說議員支持申亞」。唔該各位傳媒大哥唔好攪到 D 中文一鑊泡!

傷

唔知幾時開始，做親 Training, 個喉嚨就會作痛。今次仲係用咪都無乜大幫助，係咪真係咁唔識得用聲?

雲境

難得今日唔係灰濛濛，又唔係一大片青天。

豐收

今日心血來潮去計自己今年嘅投資回報:
Bought Over 9.41%
New Capital 30.78%
Total 16.3%

相比之下:
HSI. 5.87%
2318 33.04%
2888 18.8%
945 -13.48%
2840 26.23%
939 8.04%

廿日後年結時，唔知會唔會有大變化?

瑣事

噚晚開夜，今朝唔駛咁趕返公司。食早餐嘅時候，老媽子入咗嚟講一 D 家務事。細心聽吓，原來一個家庭主婦可以為咗濕度底而可以嘅朝早洗衫，响同一日夜晚收衫而高興。亦因為前晚可以收衫，噚日因為㗎洗衣機壞壞哋而攪到要夜晚先洗到衫而覺得不值。

生活，係咪就係咁簡單?

和平獎

究竟，乜嘢係中國特式?

社會主義: 具有中國特式嘅社會主義...
人權: 吃飽飯就是中國人的人權...
和平獎: 孔子和平獎 -_-
姓名: 國家質監總局審議緊英文拼音名係咪都係同中文一樣，先姓後名 -_-|||

普世價值係咪咁唔啱中國人? 中國，又係咪真係咁獨特?

意外

本來有少少猶疑，但無端端隻手揩到個撥號，睇嚟整定要講，感覺比想像中好。

神算

前幾日响 aastock 度拎咗幅圖嚟度，好似差唔多到底，210 左右應該會反彈。但等咗兩日都唔跌得太落去，最後 213.6 入咗。今日竟然真係去到 210.8, 真係有少少唔甘心，都好，收市返返去 216.4. 英國嗰邊升咗近 4%.

故事教訓: 要相信自己，不過食魚要切頭切尾。

Geek Pride

前排見到好多畢業相，唔知幾時，個個畢業嗰陣，不論男女，都會揸住個好 cutie 嘅公仔。

倒帶返十年前，數碼相機無算普及，所以影相唔多，影完相仲係要曬出嚟再 scan 返入電腦。

我最鐘意嘅一張畢業相，係同兩位 Professor 影嘅一張。一位係 Virginia Lo, 一個專門研究 resource scheduling. 一位係 Andrzej Proskurowski, 專門研究 tree structures + algorithms. 可以同兩位大師級人馬影相，真係諗起都開心。




拍片更加唔駛講，只有低解像低質嘅格式。想當年嘅 DivX 3, 已經睇唔返，好彩有壓埋 MPEG-1, Standard 始終係可以經歷時間嘅洗禮。

近排一段 Steve Jobs 响 Stanford 嘅畢業演辭响 Facebook 輪迴. 我哋當然請唔到佢，但係有 Kent Beck 坐陣，都唔失禮。

http://blip.tv/file/4434254

P.S.: 差少少唔見咗呢一段回憶，好彩到最後都搵得返。

歲月不饒人

今日响 Data Center 度等開工，發呆之際電視做緊放學 ICU, 睇吓譚玉瑛姐姐重响唔响度。發覺，係就係响度，但以乎有少少滄老。睇見上嚟嘅嘉賓，個個都後生過佢，個個都係睇住佢嘅節目大，究竟嘉賓會係乜嘢感覺? 會唔會同佢影相，又或者攞簽名?

譚玉瑛姐姐係香港人嘅集體回憶。

學店

直資學校，以商業模式運作，咁同私校有乜分別?
係咪因為教育局無指引，就可以亂洗錢?
如果學校唔能夠以身作則，咁點辦教育?
教育界嘅立法會議員剩係識鬧教育局無監管，而唔討論校方嘅責任，又係咪合理?

低頻超音波驅蟲器

食完飯，去貢茶買咗杯珍珠奶茶。返公司途中，經過間戴住個耳咪做推銷嘅舖頭，眼尾一掃，個產品叫「低頻超音波驅蟲器」。

睇嚟起名嘅人要接受再教育先得，超音波英文係 Ultrasound, 即係因為空氣嘅震動頻率太高而普通人聽唔到嘅聲。所以，超音波無可能低頻，咁呢件產品，驅唔驅到蟲，就真係唔知。

Best Man

友人結婚，第一次做伴郎，不過前晚唔太夠瞓，今日又要一早起身，只可以用五成狀態出現。不過，婚宴只係 Buffet Lunch, 五成夠用。證婚議式又有兄弟們用泡泡槍噴泡泡贈慶，效果唔錯! 只可惜相片欠奉，有時間嘅，就只係得呢幅。

完場，幫忙搬運婚宴物資後，去咗今日最後一日嘅頁茶 claim 一杯十送一嘅飲品，心曠神怡，體力勞累完後嘅滿足。

火中取栗 - 續集

唔知幾時開始，唔係太相信所謂嘅價值投資。可能係宏利跌得太勁，同股票談戀愛原來係一件咁危險嘅事，好彩都叫做低買，佢跌剩高峰期嘅1/3時，我都只係損失咗1/3, 低息環境，無計. 睇咗個市咁多年，原來最可靠嘅，似乎係最簡單嘅常識。

對渣打試驗咗兩次，見太高嘅時候，再睇一睇技術指標，再高價出售。其實唔係有心放曬，只係佔個組合比例唔細，做少少風險管理，唔係跌嗰陣其實都幾係嘢。萬一再升嘅，其實都賺唔少，月供時可以再買得返。跌咗，再留意住一個啱嘅價位，到位就入。不過，就似乎係渣打咁跟技術走位，未夠膽試其他。不過，試兩次都成功，好滿足!

以前嘅火中取栗係想賺快錢，今日嘅火中取粟係避風險。

再見 HTC Touch

用咗 HTC Touch 都有 3 年幾，係買俾自己嘅生日禮物。呢三年有樣嘅好不滿嘅係打字嘅方法，個手寫識辨又唔似 Palm 嘅 Graffiti 咁可以唔駛睇住都寫到字，個 software keyboard 又細，要用 stylus 打先打到，重要支 stylus 鬼咁易爛，3 年換咗兩支，最後放棄埋 stylus. 打字真係粒粒皆辛苦。

Sliding keyboard, 正!

Keyboard 令機身厚咗少少，但非常值得!

但係真係好細部，一張咭片都大過佢。

比 HTC Touch 順咗好多，但係好似 Windows Mobile 對我嚟講 friendly 少少，尤其係無 Hardware 嘅上下制，焗用手指去 scroll 個 touch screen... 真係白痴!

李氏力場

城市傳聞，香港首富研發咗一套系統，阻擋颱風嘅吹襲，以免降低生產力云云。雖然傳聞歸傳聞，但今年嘅颱風路線實在太迀回，力場之說，不無道理。

好多人都話力場攪到打工仔無得放假，但係咪反過嚟諗，香港係一片福地，巨大天災欠奉，大家先可以安安樂樂咁生存。假如強颱風真係吹埋嚟，低窪地區又水浸，樹又㝝幾棵，到處山泥傾瀉，D 玻璃幕牆又爛到滿天飛，都幾大吉利是。都唔好話吹到正，台灣俾個雨帶掃一掃都已經出曬事，所以都係唔好打風好!

國際大都會

地鐵出事，個個上地面搵接駁巴士，迫得就迫，無人識得排隊。究竟，係香港人染上咗大陸人嘅陋習，定係其實香港唔係我哋想像之中咁文明? 下次話大陸人唔文明之前，我諗好多香港人都要諗清楚自己係乜嘢人先。

香港政府以鐵路為主要交通工具嘅政策，係又咪要檢討吓? 一係無事，揩親都係大鑊嘢。

The Perfect Balance

原來我個 Portfolio 係安排得咁微妙，個市升，佢嘅價值會升，個市跌，價值依然係升。

巴士奇遇

响灣仔搭26號返公司，臨落車嗰陣，有個婆婆唔太識落車，又堅持佢要去嗰度附近有個巴士站，但實情我住咁耐都唔覺有，唯有揀一個最近同可以行得最舒服嘅站 (其實都係二揀一) 同佢一齊落車。

雖然婆婆話佢唔係好行得，但就好好中氣話自己搭錯車云云。由街頭行到街尾左右，都只係一分幾鐘就到咗，要離開，隨住婆婆嘅一連串祝福語，一切回復平靜。唔知婆婆會點返屋企呢?

成熟

做 Training 時同班新畢業嘅人熟咗，發覺自己好似係八十前出生，八十後嘅心。究竟由 Day 1 開始，我有無改變過呢? 呢個係十份值得思考嘅課提。

雙面刃

每隔一段時間，都會有去意。返咗嚟香港九年，究竟呢九年嘅經䌞，係有價值，定係負累? 隨手上 jobsdb 搵吓，原來都有唔少好工喎! 係咪可以考慮，就真係要考慮考慮。

怪物小王子

怪物小王子曾經係細細個日日追嘅卡通片，原來係同叮噹同一個作者，响土豆睇返嘅時候，原來已經有唔少叮噹嘅影子。得閒可以再回未近三十年前嘅作品。

真人版，搵一個大人嚟扮怪物小王子，好似唔係幾妥。不過日劇精彩嘅地方，就係將一 D 日本社會嘅核心價值融入任何提材嘅劇集。如果要搵返當年嘅童真，真人版唔係太啱，都係睇返卡通好 D.

This Is It

Michael Jackson 嘅遺作，似乎製作單位做咗唔少 Making of. 姑勿論製作單位嘅用意，出嚟嘅效果，係一粒星嘅光芒，响綵排嗰陣已經發揮到專業水準，我鐘意!

環保雜談

呢篇文係因堆填區而自我思考所寫，大家可能會覺得無咁誇張，但請以各位細心諗諗有乜可以由自己做起。

聽咗厄爾尼諾同拉尼挪咁多年，我都唔知係乜嚟。但今年會係一個比以前凍嘅冬，我反而明。

話說墨西哥灣至歐洲，響海度有一股暖流，叫墨西哥灣暖流(Gulf Stream)，會將赤道嘅暖水帶到歐洲，令歐洲嘅冬天無咁凍。科學家話今年呢股暖流減慢咗，即係話歐洲會凍咗，如果全球以一個整體嚟講北迴歸線以北嘅平均氣溫係下降。咁以下就係以常識推論到嘅事情:

1. 凍，就自然會開暖氣，越凍就會需要越多能源去保暖。
2. 95%嘅能源係嚟自石化源料 (石油、煤、天然氣等)，而用石化源料產生能源係大量二氧化碳嘅成因之一。
3. 即係話越凍，天氣越凍，就會越多二氧化碳。
4. 二氧化碳係溫室氣體，過量嘅溫室氣體令地球表面溫度不斷上升 (呢個我諗大家都明)。
5. 地球表面溫度上升，令兩極冰層溶化，海水鹽份亦會淡化。
6. 正正因為海水鹽份被淡化，墨西哥灣暖流亦被減慢，令歐洲更凍。
7. 返迴 #1

再返去北迴歸線以南至赤道，因為有部份熱能無北上，近赤道嘅海水溫度自然上升。

1. 而海水溫度上升，係造成颱風嘅成因之一 (咁睇嚟我哋嘅風季睇嚟會長咗同多響打風，李氏力場應該有失靈嘅一日)。
2. 颱風多雨但打唔到入內陸地區，所以水災會響沿海發生。
3. 偏偏北迴歸線以北嘅一片歐亞大陸好少海邊，當水份留響沿海地區，內陸地區自然會出現旱災。
4. 不論水災旱災，都會影響農作物收成，咁距離饑荒還會遠嗎? 
5. 北迴歸線以南至赤道又䁔又濕嘅時間長咗，最啱微生物滋生嘅機會又多咗，咁距離瘟疫又會遠嗎?

科學家話，當墨西哥灣暖流停止嘅時候，就無法逆轉，到時極端天氣就會因為大氣同海水嘅能量失衡而更嚴重。你想下一代活於一個水災、旱災、饑荒、瘟疫嘅世界嗎?

註:
墨西哥灣暖流嘅成因係 Greenland 嘅冰塊溶解時，將海水溝淡咗，物度比較低。By diffusion, 高濃度嘅暖海水會響海面流向低濃度嘅海水再沈底，低濃度嘅凍海水自然就會由海底被推向另一邊，因而造成墨西哥灣暖流。

心曠神怡

一個將軍澳堆填區，攪到滿城風雨。對於一個由政務官做特首嘅政府嚟講，穩穩陣陣，乜都唔做係最安全嘅做法，所以所有嘅政策，都欠缺願境。減廢政策，一於零教育、零獎勵、零罰則。

班住响堆填區「豪宅」嘅人有夠無聊，李生一句心曠神怡就搬入去住，家陣响度嘈，乜當初無實地考察先搬?

响一個主張消費嘅資本主義社會，垃圾廢物只會有多無少，今日嘅情況，大家都有份做成，無得怨。

Slashdot 2

非常精準嘅 Slashdot comment:

http://hardware.slashdot.org/story/10/10/11/1838252/High-Tech-Microphone-Picks-Voices-From-a-Crowd

The quick breakdown of responses on Slashdot:
The last remaining nerds on Slashdot who actually like technology: "Sweet! That's an impressive display of audio recording techniques!"
The paranoia crowd: "ZOOOOOOOMG that means THEY(tm) can listen in on you! Then they're already stealing your identity to impersonate you! MY PRIVACY IS AT RISK OHNOEZ START REBELLION NOW PLZ KTHX"
The audiophiles: "Pfft. Everyone knows you need at least 560 microphones and analog pickups, else you'll clearly lose so much quality as to be unlistenable by any but the most primitive and underdeveloped of eardrums. Plebs."
cencithomas: "WHERE DID THE TEN MICROPHONES GO?!?"

更上一層樓

今年有好多意想不到嘅支出，個股市又傻吓傻吓咁，要儲錢實在係舉步為艱，但原來不知不覺已經達到一個短期目標。係時候定下一個目標。