選戰2016 - 經歷篇

呢一屆選舉，參與度算最高，事緣我相信香港嘅劇本再行落去就係流血政變，難得有人講出另一個結局，想實現呢個結局，於是就去幫吓手。

對呢場選戰我只係 Contribute 咗4晚同8個鐘左右嘅時間落街去拉票。

第一晚，响鰂魚涌開完會，食少少嘢，就走去四眼個 Office 做熱血工場幫手，上到去，原來都有唔少人响度，幫手都要等一等。終於入到去，一張一張嘅 Label 紙，貼咗唔知幾多張，但唔使幾個鐘，就攪掂，然後就默默離開。

第二晚，响正街附近，個街站表係第一街同第二街交界，但呢兩條街跟本就無交界，搵吓搵吓，原來諗住走去電車路去創業睇睇，咁啱又見到個街站，咁啱四眼 (我諗我唔應該加個哥哥落去稱呼佢) 又响度。大家對熱狗們嘅印象都係打打鬧鬧，但其實，佢哋係好有禮貎，四眼重係超級客氣嗰隻。呢一晚有一位阿叔同一位嬸嬸過嚟傾計，另有一位哥仔埋嚟問獨立嘅嘢，初試啼聲，我諗我唔算答得太好，希望無失分。呢一區感覺就係一眾街坊，真心想為香港好。

第三晚，咁啱响中環開完會就見到有街站，四眼又响度，於是就順道去幫手，中途落過小雨，本來背囊係擺响街，但打怪車無耐就到，背囊就入車。中環派文宣，真係難好多，個個都放工趕住返屋企，好多都唔會接。最記得有位阿姐著得好斯咁講一句唔知乜嘢，諗咗一陣先意識到佢講走開，似乎真係好趕，但最攪笑係隔一陣我好似又見到佢上落條電梯幾次 (我記唔到樣，唔定係咪同一個人)。夜少少，又有位哥仔同我講話全民制憲係唔啱，香港人應該聽共產黨話云云，响我同佢傾嗰陣，有位熱狗又响幫手，睇得出呢位哥仔趕時間又有少少無耐，我都係接返個波送佢走。派得咁上下，有少少餓，就拎返個背囊去食少少嘢先，返到嚟已經話唔使再幫手，留响度聽節目就得。

第四晚，夜咗少少收工，只有銅鑼灣街站會做夜少少，於是食少少嘢就去幫手。又撞到四眼，但佢同途人影緊相，就直接問團隊嘅人有乜可以派。今次有個阿嬋嚟挑機，自己講完唔聽人講就自己走咗去，我唔會俾呢件事發生，就一路追住佢一路講我嘅睇法。又有一位哥仔接咗張文宣之後，响我面前撕開兩邊，乜咁樣有意義嘅咩? 最後本來10點半嘅街站，做到11點。

到咗選舉日，吃咗 Lunch 之後，就出去投票。好多人，第一次見到咁多人响票站。按照規舉，只投直選，對討厭功能組別嘅我嚟講，絕對唔會投。因為上年有經驗，放咗張直選票入票箱，就退張功能組別票，個選舉主任竟然叫我就咁放入票箱，你老闆呀! 上年明明可以打個印話張票 Unused, 你今年叫我放我票箱。今時今日，就係唔信你，到時俾你亂投咪死火! 幾經堅持，終於肯打印，要搵人做見証，好快就攪掂。

因為個禁止拉票區好大，唔知點搵街站，幸得強大嘅觀察力，見到遠處有個街站，就走過去問使唔使幫手。派文宣到差不多6點，就去食少少嘢再派多陣，之後團隊門原來話去石塘咀，但因為帶隊阿姐唔識路，就去咗堅尼地城。相對上環，氣氛熱鬧好多，走咗去一個十字路口，原來人太多，反而好難好有禮貌咁派嘢。跟住對面嘅民建聯團隊開大聲公，於是我哋就大嗌7號鄭錦滿去抗衡，而隔籬嘅王維基團隊就响度食花生，係好小學雞，但苦中作樂，無傷大雅，喉嚨就傷啲咁解。之後大聲公走咗，又無得玩。但過咗一陣，曾主席到場?! 無耐葉國謙到埋! 大嗌咗幾次又好似無乜意思，跟住黃之峰架宣傳車嚟到，呢個唔嗌唔得，佢重要駛入去禁止拉票區，這合法嗎? 剛剛街口紅燈，於是佢停幾耐，我哋就嗌幾耐。王維基團隊要散水，有人話佢支持7號喎! 都唔知點解好，最後同佢哋影咗張相。

响堅尼地城，似乎都有唔少熱普城支持者，好多街坊都話支持7號，感覺得幾 OK, 又有人買少少嘢嚟，但其實唔收得。到咗最後，走到去另一個街口，陳淑莊團隊同佢本人响度嗌咪，最後8秒鐘，大家一齊倒數。一切都結束，幫手收完嘢，就道別離開。唔經唔覺企咗7個幾鐘，鞠咗唔知幾多次躬，派咗唔知幾多張文宣，好彩天陰同埋有少少風，唔係真係難頂。返到屋企，條腰還好，但對腳唔係我嘅。

但一切都係從心出發，到今日知道輸咗，都係無悔。

P.S.: 其實重有一件黃色嘅運動衫係特登去買，但之後係著得返，我諗唔算乜嘢 Contribution.
P.P.S: 本來諗住一路做街站一路打電話拉票，但其實係做唔到，熱普成團隊輸咗，可能只係大家各方面都有少少嘢做得未夠，唯有下次做好啲，如果重有下次嘅話。
P.P.P.S: 熱狗，其實唔會亂咬人。By the way, 我唔係熱狗。

月球之旅

大約响2015年，第一次見到月球燈，就好想有一個，因為實在太靚。當時响 Indiegogo 集資，可惜慢咗一步，已經無晒 Quota.

幾個月前搵到間 Workshop 做月球燈，一路都無報到名。見就嚟中秋，搵咗徒弟仔同男神一齊做個 Workshop. 成個過程要成四個鐘，就一齊响對面間阿鴻小吃食咗晚飯先。

食潮洲嘢，嗌咗個炒飯加湯，一個南乳粗齋，再嚟一個蠔餅，三個人剛剛好，味道不俗。

食完嘢，時間差不多，就過對面工廈。好本能咁上咗一層樓搵電梯，電梯係有，但感覺上又唔多對路，正當疑惑之際，就試吓去返地下，經過個停車場，真正嘅電梯就出現咗。

上到去間 Workshop, 呢啲手作嘢，本來以為係女仔教，但其實係兩條仔。介紹完大慨嘅流程，就真係落手做。流程大慨就係溝膠水，倒落個模度，再搖勻佢，搖九次，每次兩分鐘。唔好睇少呢個動作，真係攪到出晒汗手到軟埋。

之後就等乾，等乾嘅時間，導師就寫名。唔好睇佢係男仔，手字都幾靚:

跟住就係打磨公仔嘅時間，聽聞可以將個太空人公仔磨成一隻玉免...


時間差不多，就係將個月球燈由模具拎出嚟，聽聞如果啲膠水搖得唔夠勻，拎出嚟嗰陣就會爛。好好彩地，所有人嘅燈都無爛到，之後就係亮燈儀式。

有乜嘢靚過一個月球燈? 就係五個月球燈


加埋剛剛打磨好嘅太空人


近看月球


跟住就係將赤度嘅水口位打磨返平佢，而最後製成品就係咁樣


加埋頭先嘅字連包裝盒


等埋徒弟仔收拾，離開嘅時候，已經十一點幾。

盞燈靚係幾靚，但唔知擺响邊好 -_-

理念

理念，好多人都有，但，好多人都唔會做到。

政黨如是，工作如是。

空談理念，最後只落得失望下場。

遇著不如意事，就努力去解決。

時間，擠一擠就有，但要費盡氣力去做吃力不討好的事，對不起，沒有下次了。

是日心情不佳，就讓我發洩、就讓我使勁一番、就讓我成功後勝利歸來。

全民制憲

民調: 係嘥氣，最準嘅民調，就係選舉完結後出嚟嘅結果。

永續基本法: 只限於地契，反正港島區嘅地契唔受 2047 大限影響，不作詳述。

全民制憲: 先係主菜，當今香港面對嘅問題，係系統/制度/結構上嘅問題，根源之一，係部基本法做得唔好。所謂永續基本法嘅條件之一，係部基本法需要由香港人有份參與，以「本土」利益為依歸，再清淅地將含糊嘅條寫返好佢。曾經有一套可能嘅方法，只係政府自己唔肯做:


系統做得好，乜嘢人去執行已經唔係問題，君不見 iPhone 响普通用家手上玩得不亦樂乎，就係因為系統做得好。

任何政團對全民制憲有晒全盤計劃並承諾執行，我都樂意支持。

投票: 唔係想對家輸，而係想己方羸，而要羸，就一票都不能少。所以，不論你嘅立場，出嚟投張直選票，今屆唔投，下屆唔知有無得投。功能組別嗰啲: 算9數啦你.jpg

What if?

話說去書展買咗幾本書，其中一本係《What if?》

書入面都係一啲異上天開嘅奇怪問題，但係就用一個科學，甚至係常識嚟解答問題。


其中一條問題，係講緊如果全地球嘅人一齊跳起身會發生啲乜野事。而本書分析嘅唔只係跳完之後發生咩事，重分析埋全地球人點樣離開，到最後，呢個故事個結果呢，就係因為糧食同埋治安嘅關係而死咗好多人。

呢本書三百頁左右，入面有唔同既故仔，都係一啲短嘅故仔嚟嘅， 好容易消化，所以呢好快就睇完，有興趣嘅話可以拎去睇。

每日一字 36

話說 Pokemon Go! 入面有一隻 Eevee.

日稱 イーブイ Iibui, 大慨就係想用 Evolution 嘅簡寫 Evo, 但日文無 V 音，於是就用咗 B 嚟代替。個名其實幾貼切，因為呢隻 Pokemon 可以進化八種唔同嘅加強版。

至於港譯伊貝，就只係日文音譯。

英文都好特別，以4個 e 字去話俾人知好多唔同嘅進化。

話說有一集嘅 Pokemon 係講 Eevee brothers 三兄弟，分別係 Pyro, Sparky 同 Rainer, 如果將 Pokemon Go! 入面嘅 Eevee 改名做其中一個，咁進化出嚟嘅 Pokemon 分別就係 Flareon, Jolteon 同 Vaporeon. Spark 同 Rain 大家都知點解, 而Pyro 响拉丁文係解火。

有別於啲 hemi-, pre-, micro-, aqua-, 响英文就好少用 Pyro- 做 Prefix. 咁就要講返 Linguistics 入面有樣嘢叫 Grimm's Law, 講一啲英文字會由一個字母嘅讀音轉化成另一個字母，好似 Pyro 嘅 P, 响現代英語已經變成 F. 其他例子有:
- Pedestrian 嘅 Ped 係 Foot 嘅字根
- Patriot 嘅 Patr 係 Father 嘅字根

Gotta catch 'em all

Pokemon 嚟講，唔算係童年回憶，因為接觸嗰陣係大學嘅事，重要係打一隻叫 Super Smash Bros 嘅 N64 遊戲。係一隻格鬥 Game 嚟，有幾隻 Pokemon 做戰鬥角色


亦有其中 Pokemon 場景，好多 Pokemon 出現


呢啲 Pokemon 出招嘅時候係會叫，不過唔知佢哋叫乜。直到有一日，我哋走去睇套卡通，先意識到 Pokemon 剩係識叫自己個名，同認識咗隻 Game 出現嘅 Pokemon.

我嘛，因為外國讀書生活苦悶，成套 Pokemon 就咁俾我煲咗。

有一日，行 Mall 嘅時候，見到呢隻，好想買，又唔捨得買 (唔係話貴，但唔想買多舊嚟擺)，但呢個世界總有人會推你一把，當時嘅 Roommate 一句鐘意買咪買囉，遲啲可能買唔到㗎喇! 的確，呢隻係 Rare Item 嚟，應該係 Team Rocket 第一代嘅其中一隻 Pokemon, 今日應該無乜人記得，去日本嘅 Pokemon Store 都搵唔到，睇嚟應該絕咗版。


Pokemon Go! 最成功嘅係嘅 Trailer. 至推出以嚟，好多 Report 話玩家成日分神响馬路出意外。但除咗掟 Pokeball 嗰吓同轉 PokeStop, 其實唔使望住個 Mon 邊行邊玩，呢個世界係有 Headset 同震機的說，只需要開住 Mon, 聽到聲就係到咗 PokeStop, 震機就係有 Pokemon 出現。


不過唔睇路嘅人就唔睇路，只係呢隻 Game 引晒呢啲人出街。

反正成隻 Game 就係週圍走，睇住個地圖玩亦都唔好玩，即係卡通入面嘅主角都唔會對住個地圖搵 Pokemon. Come on, it's just a game. Sit back, relax, and enjoy!

P.S.: Gotta catch 'em all 係英文版嘅 Slogan, 中文版我就唔知係乜了
P.P.S.: 中文改名對我無影響，因為我用開英文名
P.P.P.S: 呢排好熱，唔好叫我特登出嚟捉

愉快星期天

俾一晨早流流捉咗去睇書展，都未到10點，就已經有咁多人排隊，後來發現呢度重要唔係主場館喎


走返去一樓，就開始逐個逐個攤位睇，有啲都幾特別


呢啲係書嚟嘅咩?


友人係加拿大人，返到嚟睇香港嘅教科書，係咁投訴話「香港咁教嘅咩?」云云。入面教啲生字嘛，我真係唔識


未到中午，已經開始迫人


最後，買咗三本書，同拎咗一本之前訂咗嘅書，唔知睇唔睇得晒。


同友人吃過午飯，就分道揚鏕，稍息片刻，又再出去。

呢幾日好天，好想去試吓影銀河，但又唔想去得太遠，搵吓搵吓，原來鴨脷洲好似有一個唔錯嘅地方，反正近近哋，一於試吓。

玉桂山有個配水庫，入面有個休憩處，零燈光，為面俾人鎖住，由於四野無人，影低聯絡方法先


似乎呢度都係影日落嘅好地方


等天黑，八點幾嘅時候，差不多黑晒，就開始試機，試咗幾個唔同嘅 Settings, 就開始影，效果一般般，但最大目的係返屋企學執。

除咗影銀河，又見到北斗七星


重有奔向西天嘅獅子


返到屋企，推一推個 Contrast, 變埋 Time Lapse, 超靚呀!

人生的開始

今日一朝早，大神就同我打招呼。


做完 Stand-up meeting, 可愛嘅同事們又唱咗首祝壽歌俾我聽。

同個客開完會，可樂又同我打招呼


所謂禮多人不怪，一次唔夠，要嚟多一次


返到公司，又收到其他同事嘅祝福，好幸福呀!

放工之後，去睇 Independence Day 第二集, 呢套戲想睇好耐，劇情一般，但回憶無價，咁就廿年喇!

不過 Windows 有咁多個 Version, 粒開始掣亦都廿年喇!


不如今年我又重新出發，開展一個新嘅旅程!

Panono

話說兩年前响 Indiegogo 睇到一個 Crowd funding 嘅 Project, 係一個球型影 360x360 嘅全景相機。賣點係可以將部機相拋起影相，聽落好吸引，二話不說就訂咗。原本嘅出貨日期係年半前，之後因為各種技術問題一拖再拖，到有貨，但係因為資金問題，要派貨俾 Retail 客。

於是一等再等，一個月前我決定唔再等，因為已經有好多產品影到呢啲全景圖同埋全景 Video. 當我寫咗封 Email 話想 Refund 嘅時候，佢話可以派咗貨俾我先喎。就咁過咗一個禮拜，部機到手。

開箱之後，唔太識用，個 Workflow 都幾麻煩吓，要影好相， 先 Download 落手機，再 Upload 上 Cloud 等做 Stitching, 之後先可以 Download 幅相再 Post 上 Facebook. 用咗一晚，去了解成個 Product 嘅特性之後，就係接受試煉嘅時間。


測試1: 唔用腳架影夜景
表現就好似用10年前嘅傻瓜機咁，欠缺咗 Noice Reduction, 加上個 Shutter 有少少 Delay, 所以好易影到面目模糊


測試2: 用腳架影夜景 + Time lapse
用咗腳架係好好多，但都係 Noise 嘅問題，加上影 Time lapse, 要經過 Download, Upload 再 Download 嘅基本工序，先可以開始砌 Video, 會死人的，都未計要再水平線逐幅逐幅較返啱嘅時間。最後就係粒電唔太得，幾十幅相就玩完，3 秒嘅 Time lapse 做唔到。


測試3: 日頭正常影相
較果還可以，又係個 Shutter Delay 會出事，一個唔覺意就會郁咗，又變咗鬆郁朦


至於拋起個波影相嘛... 用嚟答訕係幾好，只係張相就「哈哈哈」啫，要等好天有大太陽先用得


部機其實唔係話唔得嘅，只係最少要响 Software 層面攪好佢，如果用晒腳架先可以做到高清全景圖 (億萬嘅像素品億)，唔係呢個價錢嘅事。

MAGIC at the Fringe

星期三開會，個會 Overrun 咗成9個字，約咗靚仔魔術師睇 Show, 晚飯就食唔到，於是就先食自己，再去中環附約。

今次係第二次去睇呢個 Show, 不同嘅表演者表演著不同嘅魔術。中場休息，有魔術師走埋嚟表演，手法一流唔再講，佢重要表演一個我知點變嘅整彎銀仔嘅魔術，呀~ 點變㗎?! 件道具收咗响邊呀? 點解嘅!? 點解嘅!? 點解嘅!? 跟住因為今次係今期最後一次，所以 Harry 哥哥派朱氏魔術嘅道具，唔知係乜嘢嚟，重未得閒玩。


朱氏魔術出名嘅魔術道具店，聞說澳門店榮休，所以 Harry 哥哥去咗尋寶。其中一個就係呢個斷頭台，重搵咗一個法個人上嚟玩。



跟住就到我表演喇... 係被人請咗上去幫手玩 Cold Reading, 不過我就唔覺意咁發咗個白日夢，攪到個表演嘅 Tempo 亂咗少少，魔術師亦估錯咗張啤牌，當大家以為佢失敗之際，佢又變返張啱嘅出嚟，好正!


如常地，今晚係高棚滿座，過埋今晚，就要等到十月尾再有機會欣賞咁出色嘅表演了

六四的句號

話說大學生會們不再參與維園燭光晚會，重話要為悼念畫上句號，被人質疑否定六四精神。

大學生嘅回應略嫌小學雞，但少不更事，後生仔同老人家鬥氣，係可以理解。反觀另一廂，一班幾十歲嘅人重同後生仔嗌交，同何柱國同黃之峰嘅咪高峰外交都係差不多水平，唔... 諗真啲，呢廿幾年嚟我哋就係俾呢班人老點，係咪重要响佢哋個場悼念呢? (如果要悼念嘅話)

呢廿幾年嚟，已經無愛國民主運動，咁究竟要乜嘢支援呢? 係咪成個「香港市民支援愛國民主運動聯合會」同「全港市民熱烈慶祝回歸」一樣，其實都係假嘅呢?

有人話維園嘅燭光係對共產黨嘅控訴，無人去維園，共產黨最開心。我就無去維園嘅習慣，有兩年去咗影相，相係靚嘅，但兩年做嘅嘢無分別，都係獻花唱歌解散，或者廿幾年嚟都係咁。我諗行禮如儀嘅控訴，共產黨就真係最開心，因為一件事無 Follow-up, 即係無 Action, 即係無 Threat, 即係 Business as usual.

再將個鏡頭 Pan 去尖沙咀嗰邊，兩年前一個簡單嘅悼念之後，就已經走上街喊住打倒共產黨，尖沙咀喎，自由行集中哋喎，法輪功要天滅中共，都只係行人專用區擺吓街站。今年，選舉年，尖沙咀集會預計會宣傳五區公投全民制憲。

鏡頭 Pan 返去學界，上年只係幾間大學各自攪六四研討會，今年十間一齊攪，人會死，但思潮卻會延續。反共也好、獨立也好，新生一代，係社會嘅未來。

面對人心思變，並且會行動嘅一班人，你話共產黨會唔會開心呢?

日本之旅1 - 東京舞祭

最後嘅一日，只係想去附近嘅上野公園行吓，於是就將行李放响酒店，就出發。

本來想去火車站附近睇吓有咩早餐，但係唔覺有，於是走過火車站，繼續向公園出發。點知一路行，漸漸覺得餓，但沿路都無乜商鋪，好彩地，眼前出現一間便利店，於是就買咗個豆沙包做早餐。

行行吓，見到一間 One Piece 做主題嘅酒吧


跟住睇睇吓 Google Map, 發現有少少唔對路，明明公園就應該响對面，但行嚟行去都唔覺有路過，兜咗一陣，原來要行上橋。

橋底就係火車軌


影到呢幅相，總係覺得熟口熟面


原來响倫敦都影過差唔多嘅相


過咗橋，過埋馬路，再經過寺廟


就係國立科學博物館，不過今日想去美術館多啲


美術館好似要穿過個公園，一走入去，睇到有班女仔响度排舞，再望遠少少，有好多攤位喎，唔通呢啲就係傳說中嘅祭典? 咁就唔美術館喇!


原來係東京舞祭，一嚟就見到响度舞旗，好型啫


當然，亦有啲九流少少嘅表演


但整體上嘅水準不俗


唔好睇中間個細路細細個


跳起嚟都係有板有眼


基本上，都係日本傳統風服飾，加上流行音樂嘅表演


青春非常


除咗一大班人，呢三個女仔就咁上台，唔使華麗嘅燈光掩飾，大膽表演，敢氣可嘉


除咗年青人，當然唔少得有大媽，但日本嘅大媽，可觀性當然比中國嗰啲高得多


一個成功嘅表演

就係可以令到觀眾同樂，婆婆都睇到手舞足蹈


大堆頭表演


不經不覺，睇咗毎半鐘，其實都差不多係午飯時間，於是就週圍睇吓有乜好食

先嚟個烤雞用


一路行一路睇，雪糕喎! 一陣可以考慮吓


唔知玩緊乜


日本人分類分得好仔細，木筷子係另外回收，插到成座山咁


炭燒海鮮喎，我唔客氣喇!


刨冰呀! 雪糕都要行埋一面呀! 飯後甜品決定好!


跟住係燒墨魚丸，好似唔係好夠飽咁，買埋先!


呢個舞團係超級大堆頭

個個都跳得好開心

再嚟一個文靜少少嘅芭蕾舞


個燒墨魚丸好大份，可能亦因為個飽嘅感覺有少少 Delay, 食得有少少過飽嘅情況，中間抖咗一陣，好彩都食得晒。

甜品嘅嘢，係有第二個胃處理，刨冰!


又再返嚟睇表演，呢個舞團有一個唐氏綜合症嘅細路，不過佢係跟得好齊，唔留心嘅話，係唔會留意到




女仔都可以做旗手


睇嚟個舞祭係 Full Day 攪，但係我差不多時候要返酒店拎行李去機場，呢隊係最後一隊了


由另外一端行返去酒店


其實唔係太識路，問過幾個人，因為言語關係，到最後都係誤打誤撞咁返到酒店

由酒店去火車站途中，見到有班熱血嘅學生呼籲捐錢俾熊本地震振災


重有類似法輪功嘅物體


臨去火車站之前，買咗把透明遮，不過呢間便利店分店無70cm 賣，剩得65cm, 但應該都夠用


去到京成上野搭 Skyliner 去返機場，不過其實我唔知有無買錯飛上錯車，總之出到閘

時間尚早，就响 Pokemon Store 度逛咗陣，不過無心水，到最後只係買咗幾個紀念幣做手信


差不多時間入閘，好快咁過安檢，但因為多咗把遮，有少少唔方便，不過反正有時間，唔急

原來登機閘好遠，要行好一段路，途中重有地方可以 Last Minute 去體驗日本風情，都幾攪笑


中途經過嘅天花，幾有特色


起飛喇!


之前本來訂咗個素餐，到最後取消咗，都係試吓正常餐先


返香港嘅天氣大致多雲，不過反正坐機翼位，唔覺有乜嘢睇，跟住原來經過一個雷雨區，係咁閃


返到香港，就9秒9落機，又行一大段路，眼見有架 A 巴士，但係已經準備開走，跑都無謂，返到屋企都已經係半夜，第二朝要返工作戰喇!