缺人

IT 缺人其實唔係乜嘢新聞，今晚俾晚間新聞報咗出嚟，感覺就好似新聞話阿媽係女人咁。其中一段大概係話，「業界」覺得大學所學嘅嘢都係理論，實習職位唔多，出嚟嘅人無實戰經驗。咁我又想問有幾多個人一出嚟做嘢就有實戰經驗? 而無理論做基礎，又點去實戰? 唔通所謂嘅「業界」覺得，寫 Program 要好似做實驗咁，Trial and Error 係王道乎? 咁我諗「業界」請嘅人，好多都係用 Notepad 寫 Program 頂。

人生之旅 - Day -32

噚晚終於買咗機票，第二個 point of no return, 之後一連串嘅飯局，嚟緊呢兩個星期已經 full booking.

自拍實驗

一直都唔敢挑戰自拍呢回事，星期日影完一批 Slit-scan 之後覺得無聊，就坐底咗睇書。因為係新聞嘅時間，一路睇書，一路聽新聞。新聞完咗，就諗緊有乜題材好影，最後就搵咗自己嚟攪。

第一幅係平平無奇嘅相


第二幅諗起 South Park 嘅 Kenny, 就將個咀收响件衫入面。相機位置無變，但係個 White Balance 唔知點解轉咗，成幅相偏光，但感覺尚算自然。


之後，收埋個額頭，試咗兩幅後生仔好興嘅合唇加歪嘴。


既然有帶書响手，又冷不妨試吓用道具，睇吓有咩效果。


合唇照似乎雙眼略帶殺氣，試吓單眼照，因為肌肉嘅帶動，另一隻眼無乜力撐大，眼神睇落舒服好多，但張相似乎光得有少少過份。

開始頂唔順，都係收手好啲。

爛 Gag

今日見到徒弟仔好似重未開始我俾佢嘅 Assignment, 就叫佢俾個交待我。開咗口之後，發現出事，嗱嗱聲睇吓佢附近有無膠袋，點知真係俾我見到。不幸地，佢都見到，跟手就遞咗過嚟俾我... 即時敗走...

遙控

由於手大嘅關係，用電話嚟打字都幾係一件苦差，可惜依家已經無配備 keyboard 嘅電話。其實出街都無乜問題，只係响屋企或者公司嘅時候，好舒服咁打 keyboard 嗰陣，都幾唔想去覆電話出現嘅 Messages.

唯一可行嘅方法，似乎係响度電話度開個 vnc server, 但係要 root 機先用得。呢件麻煩事，可免則免，退而求其次，唔經 network, 用 usb 又得唔得呢? 於是禮拜四就加多咗個 keyword 去搵，又真係俾我搵到 MyMobiler 喎，重只係用 usb activate 咗，就可以用 wifi 駁，雖然只係 1 秒 1 格嘅 refresh rate, 但係用 keyboard 打字，快感就好似愛國愛港港人治港高度自治咁，不言而諭。

拉麵團

星期五晚約咗 Snoopy 仔同肥仔去拉麵來食拉麵，搭26號巴士期間，又影咗幾幅 Slit-scan



車就塞咗少少，要差唔多成個鐘先到。好彩因為前面排隊嘅人未嚟齊，好快就入到去食。入到去嘅裝潢都幾特別，就忍不住嚟幅180度全境。


麵嘅味道不過不失，嗌多咗份紫菜、竹筍、同埋雞蛋。除咗竹筍之外唔太識欣賞之後，其他都好滿意。食完嘢，環顧四周，一眼就見到《怪物小王子》嘅面具，原來週圍嘅佈置，所用嘅物件都係好耐以前嘅嘢，全部都老過晒我身邊嘅兩位仁兄。


食完嘢週圍行，發現原來除咗 King's Road, 重有 King Street. 行多一陣，又見到一幅行頭繪畫同我打招招呼，突然好有正能量。


閒逛途中，見到分子料理嘅雪糕，同埋食字嘅舖頭名。


閒逛完畢，就去咗食甜品，叫咗份好耐無食嘅燉蛋白，自我滿足一吓。肥仔因為病底，所以食完返咗屋企，同 Snoopy 仔就去咗誠品，見到本 Sports Science 嘅書，講運動傷害嘅，似乎幾好睇，放咗入 Wishlist 度，遲啲有機會再買。

時間差不多，返家途中响巴士度影咗幅 Slit-scan, 開始掌握到點樣取景。

雜記 6

話說 Audition 完結，一位小朋友走入嚟話要自我檢討的說，低估咗問題所在，只係好 Casual 咁注入少少正能量。直到之後見到一句 Status, 我似乎無意識咁置身於風眼嘅中心。之前一日，我講過，作為老師，佢嘅學生要有老師一樣嘅功力，先叫合格。但係，我無講到時間，所以令到小朋友有唔少壓力。所謂「休息是為了走更長的路」，攰就抖一抖，無謂令自己身心俱疲。

同一日嘅夜晚，問咗另一位小朋友嘅夢想，佢話自己暫時係一條咸魚。都幾驚奇，睇佢平時都唔似係無目標嘅人，究竟夢想係咪真係咁難去定呢? 定係呢個世代已經唔再發夢?

迷你攝影套裝

依家嘅手機比以前進步咗好多，尤其係相機嘅功能。因為想影 Slit-scan, 諗緊點樣去將相機放上腳架度，咁就隨時都影得。上網搵搵吓，見到有隻 IDW 嘅 Supermount F, 台灣出嘅，真情就係心目中想要嘅嘢。香港邊度有得賣呢? 上 Yahoo Auction 睇無，都有啲 Mount 嘅，不過就好似嗰啲汽車手機 Mount 咁大個，唔夠方便。搵搵吓，eBay 有喎! 貨物地點仲係响香港，但係知點解個價錢係澳洲紙，是但，買到就得。

星期一就收到貨


經過地鐵站用手機影咗幅 Slit-scan 相


順手 Download 埋 Small Planet App 整 Little Planet, 手機一 Take 過，掂!


P.S. 上星期五响 Office 度前試過隻膠托，點知手機太重支持唔住，總算無白花錢。

時間 空間

幾日前去睇咗個叫做 Urban Flow 嘅畫展，攝影師自己砌咗部相機再駁電腦，去影 Slit-scan 相，效果好特別。上網睇吓，手機有 App 去做，試咗唔同嘅場境，個咗唔同嘅實驗。

尖沙咀地鐡入面


上環吉野家


銅鑼灣記利佐治街

無意中發現嘅扶手電梯效果


禮頓道巴士站


永樂街


返到屋企，再做多少少 Study, 發現原來無現成嘅 Program 去將 Video 變做 Slit-scan 相，最多都係用 After Effect 用 Time Displacement 去攪. 搵搵吓，見到 Little Planet 嘅效果，於是就用咗其中一幅相做實驗，效果合格


再搵吓，有人寫咗個 Processing Script 去做呢件事，不過要用 Processing 2.0先行到，用2.1唔知點解會出 Exception。於是就趁做完 Gym 嗰陣就影咗兩條片，因為個 Slit Size 只可以係 1 pixel, 效果不佳。選擇一，下次用 GoPro 著 High Speed Mode 影，選擇二，動手改 Script.

作為一個 IT 人，當然係改 Script, 但好似有 Bug 咁，攪咗幾個鐘先試到 Slit Size 嘅 Config. 又因為之前見過有一段 Slit-scan Video, 反正改開，於是又動手改埋，就咁唔見咗成晚。做一幅相要用一分鐘左右，所以一個鐘只係有兩秒半嘅相可以用，八秒嘅相，要成三個半鐘，重未計將一幅一幅相變成 Video 嘅時間，難怪一件藝術品咁貴了。

夜遊

好耐未試過星期五都咁忙，有 Presales, 有 TechDays 嘅 Audition, 有 Training, 不可開交是也。

攪掂晒工作上嘅嘢，同 SKE 迷去食 Burger, 因為離地鐵站都有段距離，所以決定搭巴士過去。因為都算新嚟嘅朋友，認識不大深，等巴士、坐巴士、等位呢啲時間，可以了解一吓。期間，發生咗消失的鎖匙事件，邀請埋响 Office 嘅人過嚟，最後，徒弟仔獨自留响 Office, IVE 仔過咗嚟一齊食。

期實响餐廳門口，第一樣吸引到我嘅事唔係啲 Burger, 而係 Snapple. 對上嗰次見到佢，係大學時代，返到嚟都未見過，所以買嘢食嗰陣，毫不猶疑地响雪櫃拎咗出嚟。因為時間關係，唔想食得太 Rich, 所以嗌咗個 Mushroom Burger.


個 Burger 嘅橫切面層次分明，亦都好好食。

食飽飽，週圍行吓，突然想試吓 Slit Scan 相點玩，於是就响無印良品同街頭影咗幾幅試驗作，可惜效果一般。


返公司鎖門，徒弟仔重响公司?!客串一吓做 Private Tutor, 一時又攪火車，一時又攪 Slit Scan, 一攪就攪咗5個鐘，破晒紀錄。

星星

星期日，見幾好天，於是諗住下晝做 Gym, 夜晚影天。去做 Gym 之前亦都搵個相機電叉叉佢，做完 Gym 返到屋企食埋飯，搵埋 CHDK 再 Download 埋做 Polar Alignment 嘅 App, 一切準備就緒之際，發現唔記得咗部 SkyTracker 係用緊3/8吋螺絲，唔係平時用開嘅1/4吋螺絲，即時灰咗。因為已經差唔多八點，應該都無乜地方有得賣駁頭，放棄。

影唔到星星，唯有睇星星了，Download 咗套近排熱播嘅《來自星星的你》，唔係話非常好睇，但全智賢都真係演得好正，可追之，個男主角係靚仔亦都夠 Cool，難怪咁多女仔中毒，但 Cool 得嚟略嫌矯情咗啲。19集，係差唔多兩套日劇嘅份量，反正好睇少少嘅日劇都係 Weekend 先有種，Weekday 無聊時可以慢慢睇了。

P.S.: 因為天氣幾好，做 Gym 之前去咗摩囉街影咗幾幅 Street View

Views: 摩囉街 by Shane Ng

P.P.S: 因為 Fitness First 又就嚟執，又响2樓影多一幅留念

Views: Fitness First by Shane Ng

小聚

星期四同靚仔魔術師、番書仔、同徒弟仔食飯。去咗佐敦一間人氣韓國餐𢌖，好多人排隊，等咗都幾耐吓，條隊好似無郁過咁。魔術師同番書仔去週圍睇吓有乜嘢其他嘢食，點知俾佢哋搵到同一間餐𢌖嘅分店，重已經有位坐添。

叫咗炒年糕、紫菜包飯、同炒粉絲，同一人一𩜌石頭飯，我就因為之前個下午茶都未落格，所以就免了。好辣嘅年糕，好大碗嘅炒粉絲，同好好味嘅紫菜包飯。大家談天說地一番，好不開心。食完飯，去掟標，我呢啲鐘意睇唔鐘意掟嘅人，睇住佢哋玩得不亦樂乎。徒弟仔無掟開，舉動雖然令人側目，不過亦係一個快樂嘅源頭之一。

歡樂嘅時光完結，可以嘅話希望晚晚都可以咁開心咁過，

英文

星期五晚，公司個電話響起嚟，原來唔知幾時 Mute 咗部手機，Forward 咗去公司度。喂的一聲，咦?! 鬼佬，係一間英國嘅 Agent, 話收到我份 Resume, 想問我幾個問題的說。自問英文唔係話好好，但普通對答係 OK 嘅，但係忽然之間轉 Channel, 佢又講得鬼咁快，一開始都反應唔切。經過十零句熱好身，漸入佳境，不過佢都係講得好快，完全唔留情面咁用機關槍掃射，好彩都答到佢問嘅問題，但佢講嗰啲嘅 Job Description 就唔係太清楚，剩係知道做 Consultancy, 公司係 Flat Hierarchy 咁，即係同香港嘅情況大同小異，係有時要去唔同地方做嘢，有機會一攪就攪一年的說。呢份工唔係話太吸引，人工係 OK, 只係唔想做同香港一樣嘅事，咁就違反咗離開香港嘅本意，不過用嚟做水泡亦唔係一件壞事。

今次表現嘛嘛，睇嚟，係時候準備份 Script 做呢啲 Interview, 費事再出醜。

嫁女

公司好耐都未有過喜事，一嚟就係第一次嫁女，有少少形容唔到嘅心情。

約咗人打牌，早就去到，新郎哥剛剛出咗嚟，新娘子換緊衫，佢今晚都有排忘，打咗個招呼，放咗佢走。未有人到，影吓全景，再影吓佈景。今次個人名牌好特別，唔係就咁 Grand 少少嘅草書就算，而係將公仔溶入人名嘅設計。

Views: 都會海逸酒店8樓 by Shane Ng

n 君遲遲未到，人家三缺一，我哋就三缺n... 新娘子換好衫，閒談幾句，無乜點瞓過的說。放走咗新娘子，再同到咗嘅麻雀腳食住餅傾住計等。


等到人齊，可惜所有枱已經 Occupied. 只好鋤D, 鋤咗幾鋪，有張麻雀枱吉咗出嚟，大家蜂擁而上，好攪笑。不過好耐無玩，已經唔係太識玩，碰同上都亂咁嚟，叫錯晒，不過都俾我一開局就對對糊冧莊。可以玩嘅時間不多，玩咗剛剛好一圈就收枱。

大會準備儀式迎接新人嘅同時，都準備好手機，著咗個 Burst Mode. 點知... 部機 Short 咗，剩係影得一幅相...


乳豬歌係 Be Our Guest, 呢首係最穩陣嘅歌，唔老土之餘亦將個 Focus 擺咗响客人到。12道菜，美味非常。不過個待應分得好急，亦收得好急，重要碟碟菜都分好晒，攪到坐响隔籬嘅美寶 BB 食唔切...

中場休息嘅時候，發現原來有啲好有心思嘅擺設，頭先掛住打牌無留意到，點都要睇真啲。


整個流程偏向平淡，可能新郎哥比較內斂，中場無攪到乜嘢天才表演，成個婚宴可以用安全嚟形容。其實好多女人別無所求，但求個男人穩穩陣陣，安安全全啫!

祝一對新人白年好合，永結同心!