人生之旅 - Day <0

星期六，去啊哥度食飯，傾咗少少去英國生活嘅事，大概知到要申請乜嘢，之後去咗同啊哥一家人食飯，造個簡單嘅道別。

星期日，與友人們 Farewell, 第一次搭巴士去友人屋企，等車等咗成半個鐘，無下次了。去到無耐，大家陸陸續續到齊，小朋友們高高興興地玩，實在太得意! 小朋友們開餐後，又再繼續玩，到大人開餐打邊爐。閒談間，講咗好多對某件事情逆耳嘅忠言，或者，我好應該趁今次出走反省一吓。原來好多事，長輩講唔會聽，後輩唔會講你聽，要同輩先可以話到你知。

星期一，離開嘅前一日，要去領臨時 Passport, 本 Passport 係金黃色，鬼死咁靚。之後順便再去同靚仔魔術師食個 Lunch, 還返啲原來屬於佢嘅嘢. 跟住去銀行，再去民政處攪少少手續。中間有10分鐘嘅時間抖一抖，唔想响個 Office 度等，就去修頓坐咗陣


離開灣仔，見到架古老電車，見過紅色開 Party 嘅電車，亦見過綠色舊籐椅嘅電車，兩溝就真係第一次見


返到屋企已經天黑，食過晚飯，諗起不如準備多一打證件相以備不時之需，經過公司樓下，決定上去告別一番，作為最後嘅行程。

人生之旅 - Day -6

終於可以瞓到一覺好嘅，下晝約咗舊同事們一起吃飯，之後去剪咗個頭髮。本來諗住去買褲，但最後諗起今晚會順路經過而暫時擱置。差不多時間，拎咗幅洗牌機俾師弟，先出發去銅鑼灣買褲，再去北角大熱高湯麵。

今晚約嘅係第一間公司嘅同事，當中我係最細嘅一個，雖然只係一齊工作咗一年零一個月，但係大家都可以開懷說笑嘅伙伴。食完飯，做媽媽嘅要返屋企，留低一批佬响度，一起搵糖水吃。同前輩傾計，傾到寫 App 嘅思維，大家都覺得經驗會變成顧累，或者要寫 App 嘅話，真係要一班後生仔橫衝直撞先做到。

人生之旅 - Day -7

之前一晚搵到屋住，以為瞓得，點知有少少開心到瞓唔著，攪到個人好鬼攰。呢日再戰英國領事館，以為要等好耐，帶咗本 Notebook 過去，點知一入門口，就被保安收咗，要走先拎得返。可能因為唔再辦護照嘅關係，所以都無人，好快咁填好 Form 去申請個緊急旅遊文件，星期一攞得。離開嗰陣落雨，有少少鬱悶，返屋企食午飯再去銀行落 Deposit, 個銀行職員好似新嚟咁，問佢邊個 Code 打邊個 Code 佢都好似一頭霧水咁，攪咗差唔多成半個鐘，比起之前灣仔間分行真係差得遠。

攪完之後去 Gym Room 做 Sports Massage, 今次剩係主力攪大腿，個 Session 完咗都重行到，證明大腿無乜事。之後食咗少少嘢，就等徒弟仔放工，一齊去睇《布達佩斯大酒店》，今次應該都係最後一次一齊睇電影。睇完之後，傾咗一陣計，就各自返歸。

返到屋企，上 Monster 度搵咗陣工，見有時間，就去完成埋個魔術比賽嘅 Video.

人生之旅 - Day -8

一朝早去咗入境處見官，但其實唔使咁早去。個官問完父母有無入英藉，再問有無英國居留權，又問有無証明，但係幾十年前嘅事，本護照都掉晒，無 Proof, 無計。

攪完一單，到攪錢嘅問題，話說星期六拎唔到錢做 Apartment 嘅按金, 都真係唔好意思，但係業主真係好鬼死煩，日日响度追幾時入錢，都真係幾後悔响 Facebook Add 咗佢。今日終於去到銀行，匯咗筆錢俾 Homestay 之餘亦都拎咗做按金嘅錢，唔知點解個業主死都唔肯俾我 Wire 筆錢去佢戶口，係都要用西聯。呢次都係第一次用西聯，打過電話去問，話最好寄錢嘅人同收錢人唔同，反正靚仔徒弟公司對面就有間，於是就順便一齊食咗個午飯。

匯錢嘅同時，個位服務員話英國嗰邊好多造假，唔好俾個 MCTN 人喎，OK... 影咗幅相俾個業主，佢話睇唔清楚個 MCTN 同埋想要寄錢嘅人名同地址，個心都十五十六俾唔俾好，最後同佢講我响街度，遲啲覆佢。

之後，去咗英國領館去攪個緊急旅遊文件，點知佢話兩點前先做，過晒鐘咁話，唯有第二日再去過。乜都唔使做，決定去做 Gym. 其間個業主又不斷咁催，為咗安心，打去西聯睇吓發生咩事。個客服姐姐話，唔好俾，MCTN 同寄錢人名都唔好俾。好，唔俾就唔俾，做完 Gym 再慢慢攪。而做 Gym 嗰陣，又有一間 Agent 打嚟，又 email 咗幾條問題叫我答，普通料，但都攪咗成十幾分鐘，希望有下文。

做完 Gym, 話咗俾個業主聽成件事，我只可以 cap 個 Screen 過佢睇，得就得唔得就算，佢唔肯，終於要拉倒了。唔理，約咗人食飯，閃!

今晚同一班大學同學食飯，見到佢地，壞嘅心情一掃而空。笑笑說說，毫無忌諱，就好似瘋狂嘅大學時代返返晒嚟咁。飲飽食醉，返到屋企，面對住由有變無嘅心情，決定再上 Craigslist, 又有幾間啱喎，Email 咗無耐，有一間回覆，價錢貴少少，亦好似無咁方便，但無所謂，最少夠大亦負擔得起。佢話啲嘢俾晒 airbnb 攪，原來除咗個假期租房，airbnb 都有做 Agent. 最好就係今次係可以直接 Wire 筆錢入銀行，唔使擔心筆錢俾唔知邊個拎咗，瞓得!

人生之旅 - Day -9

臨走前最後一個 Project, 幫靚仔魔術師拍片參加比賽。入到赤柱，靚仔魔術師介紹咗要玩嘅魔術，跟住就搵咗間酒吧坐，靚待機會。第一次，俾人請咗食檸檬，坐多陣儲多少少勇氣，再搵咗一家人嚟玩 Time Travel.


簽名、撕牌、還原，一家大細都睇得嘖嘖稱奇。表演完之後閒談咗一陣，原來係開 Art Gallery, 重要係响屋企附近嘅添! 真係有咁啱得咁蹺。

靚仔魔術師似乎要回一回啲法力，又再傾多陣計咁，跟住就趁隔籬枱嘅一對德國遊客埋單未走，就捉咗佢哋嚟表演。


表演完畢，雨亦都停咗，係時候離開。一邊食芝士薯條，一邊約師弟出嚟食飯，再玩多一個魔術，就出返市區。去到銅鑼灣，週圍摷嘢食，最後走到去 Sogo 後面，等師弟出現，咁啱有個派傳單嘅嬸嬸同師弟搭訕，師弟問有無九折云云，嬸嬸話有，於是就跟咗上去間日本餐𢌖度。日本餐𢌖無乜人，嘢食亦無乜特別，好啱傾計吹水。差唔八點過少少，師弟要去打波的說，閃!

人生之旅 - Day -10

睇啱咗個 Apartment 要落 Deposit, 一心諗住星期六攪，點知一出到中環，見到好多菲律賓人，銀行無開？！噢！唔記得係清明添… 打道回府。

午飯過後，因為星期日要去幫手影魔術，於是就去灣仔買件秘密武器。之前買咗個 IDW 嘅手機腳架 Adapter, 其實之前見過人哋嘅玩法，就係將佢於响放响部相機上面，一邊影相一邊影 Video.


買完嘢，就去差唔多時間落西環，經過中環街市，睇前係俾人拆緊嘅三聯書店，唔係嘛? 究竟真係裝修定執笠呢? 唔去考究，亦都無緣見證。

落到西環，响麥記買咗杯飛雪坐咗陣，去巴士站會合，同友人一起買餸。上到去，小昭瞓醒之後，有少少怕醜。但沖涼嗰陣係咁嗌住昭成叔叔，真係幾攪笑。玩樂、吃飯、再玩樂，小朋友嘅生活真係簡單。吃飯途中，小昭念咗首王之渙嘅《登鸛雀樓》俾我，夠晒應境:

白日依山盡， 黃河入海流。
欲窮千里目， 更上一層樓。

玩到咁上下，係時候瞓覺，拍過照，留過念，來回地由睡房出入，真係好得意。同友人傾多陣，飲多碗腐竹糖水，要走了。

本來見日頭有太陽，以為可以影星，都準備好晒添。點知夜晚太大霧，可惜...

人生之旅 - Day -11

是日 Last Day, 要見另一個客，除咗幫佢 Troubleshooting 之餘，亦都去度別。攪咗一個朝早，到最後都係蠢事一樁，因為成村人等開飯，要飛的返公司。開完 Lunch Party, 再執多少少嘢，就先搬返屋企，順道去買餅。返到公司之後，開始瘋狂影相，有單人相，有主題相，師弟做攝影師，高炒炒到 CCTV 嘅效果，真係經典。入夜，為 BizTalk Training 嘅 Assignment 作出了最後指導，種子種好了，祈望著茁壯地成長。享受著徒弟仔嘅拿手按摩，一邊同大家傾住計，好想永遠留住呢個時刻。

唔講唔覺呢套 Keyboard + Mouse + Mousepad 由我入嚟跟到今天，個 Mousepad 係私人嘅，但走嗰陣唔記得拎。個 Keyboard Drawer 嘅故仔之前都講過，會俾 Snoopy 仔拎去研究。


拖到最後，要走了，揹住最後兩袋離開，放返屋企之後換件 Casual 少少嘅服飾，再度出去食飯。今次食飯嘅對象係對我有知遇之恩嘅人，暢談咗一個夜晚，由公司到個人，由現在到未來，十幾年嘅合作，一切一切都建基於信任。

人生之旅 - Day -12

根據 Murphy's Law, 所有事情可以變差嘅都會响最差嘅情況下發生，星期四嘅朝早，睇一睇個鞋底，原來穿咗大個窿，怪不知得落雨會入水。


返到公司，就突然忙起上嚟，好彩都唔係乜嘢大嘅問題。呢日要去探一位亦客亦友嘅人，對佢嘅感覺好親切，暢談完一個午餐，再去 Office 度同其他識嘅人道別。其實呢個客都幾特別，如果話公司係我第二個家，MS 會係我第三個家，呢個客就係我第四個家。

返到公司，再發多陣功，就夠鐘去做 Sports Massage, 收到教練指示，話要做兩個鐘喎... 一個攞命嘅舉動，做完兩個鐘，個小腿酸到好似抽筋咁。不過依據經驗，第二日就會無事。返到屋企，先知道靚仔魔術師响 Lunch time 嚟過探我，有少少失落添...

呢日就係多事...

人生之旅 - Day -13

執嘢第三日，開始執之前，公仔們要入盒，嚟個最後留影


又搵到啲寶物，真係越執越唔捨得。公司由西環搬到上環，由一個單位變成一層，到依家變成兩層。公司大咗，個 Title 亦都大咗。


最後拎咗5大袋嘢返屋企


返到屋企之後，開始搵 Apartment, Budget 都係800磅一個月左右，之前都搵咗唔少個晚上，不過都係啲偏遠少少嘅 Studio 咁。今次撞咗上 Craigslist, 竟然有驚喜，重要係有唔少選擇都係生活機能唔錯嘅添，附近有地鐵站、超級市場、同埋 Gym Room 咁，啱晒我呢個懶得揸車嘅人。Email 咗兩間嘅業主，都係已經搬咗去第二個城市，都係話要証明我有錢俾先會過嚟 Show 間屋俾我睇。似乎有排攪，不過其中一間有兩間房，又有晒所有家俬電器咁，又包埋水電媒網，比另一間貴百鬆啲磅，但都係800磅一個月，啱晒 Budget. 只係個業主煩咗少少啫... 搵到屋後，有少少開心到瞓唔著，希望順順利利。

人生之旅 - Day -15

清理 Office, 執咗好多嘢出嚟，句括呢兩年响工作上收到嘅利是


一啲 n 年前嘅 report


為咗做成 Partner 嘅其中一個 Certify Process


未做 Microsoft 嘢之前嘅一啲 Analysis


一啲偉大嘅工程


同埋網上搵到嘅 Reference


第一個 Project


十年前嘅聖誕咭


第一次出 Trip 嘅 Project


當年未有 Google Map


曾經用過嘅筆記簿，但係用到第三本已經變成數碼化了，當年原來都好仔細咁畫嘢


如今紙同筆，只係無聊時嘅塗鴉


原來好多年前上海嗰邊已經做緊 Azure Media Service 做緊嘅嘢

人生之旅 - Day -17

本來諗住星期六可以去燒烤，點知朝早落雨，重要係黃雨，攪到一早走去準備嘅人要白走一趟。呢一趟都真係幾遠，入到去青山灣，本來係諗住入面近有街市，入到去買嘢就燒得，最後要放棄，有少少可惜。

當 Whatsapp 響過不停嘅時候，有人建議唱 K, 於是地點轉移咗去尖沙咀 CEO, 馬拉松式由點半唱到八點半。一反日常慣例，唔再攪陳奕迅演唱會，攪懷舊金曲演唱會，四大天王、哥哥、軟硬、克勤、Sammi, Beyond 通通嚟晒，最高潮莫過於火熱動感 La La La, 大家唱得不亦樂乎。當然，近代嘅鄭融亦好受歡迎，外加尹光同杜汶澤作為嘉賓。

一首狂舞吧結束演唱會後，大家一起去 K11 嘅 Pizza Express 慶功，點咗幾款 Pizza, 沙律、千層茄子、千層寬條麵、同埋松露焗磨菇，不過最好食，都好似係佢週邊啲麵包，好想食多幾條，但太飽了，過咗一個好滿足嘅一晚。

人生之旅 - Day -19

呢排好多飯局，星期四晚約咗一班人食飯，佢哋由合作伙伴變成戰友，呢幾年响佢哋身上學到好多嘢。雖然大部份都已經唔响當初嘅部門做事，但呢幾年嘅業績，都係多得佢哋支撐。

席間聽到嘅故仔，都真係不得不慨歎依家佢哋有咁多麻煩事，呢啲事亦影響自己嘅業務。好彩多年來有佢哋幫我擋晒呢啲嘢，先至可以專心咁去解決技術上嘅問題。或者去到英國之後，呢啲嘢要靠自己擋了。

除了多謝，還是多謝！

人生之旅 - Day -21

成個假期瞓得最多嘅一日，個人叫做精神少少。前一日買咗隻 Mobile hard disk, 諗住抄啲有用嘅嘢過去。其實最有用嘅我諗係啲相，二話不說食完晏就開始抄，睇住個 progress dialog, 300 GB 嘅相，要抄成 9 個鐘，反正空閒，走去做 Gym. 做完 Gym 返嚟，重抄緊，開始搵短期居所，去到 airbnb 嘅 web site, 呢幾日對住佢，熟練咗用法，開始去 Optimize 成件事，原來都幾嘥時間，又要平又要近地鐵同埋附近有超級市場，個 Google Map 又轉咗新板慢到死咁，有排攪。

人生之旅 - Day -22

星期一，雖然之前夜瞓，但其實都瞓得唔太好，11點唔夠就醒咗，連續三日唔太夠瞓添。呢一日約咗一位大人物，一位比我成功嘅後輩。

去到沙田火車站，又見到 Giordano 嘅 Life is a Journey,真係平時都唔覺 Giordano 有咁多分店，呢幾日就差唔多日日見。

到咗科學園，佢重開緊會，等嘅同時，趁機影吓相。

Views: 香港科學園 by Shane Ng

大人物登場，去咗附近嘅餐𢌖食嘢。今次其實都係一次對自己嘅試煉，雖然唔太同佢成功嘅方法，但其實可唔可以放開呢件事，大家作為一個朋友去傾計呢? 心中有一個好大嘅問號。抱住一個無偏見嘅開放嘅態度，最後發現，以前响自己眼中嘅細路，其實係好成熟，可以一步一步去達到自己嘅目標。或者抄襲 Idea 响商業世界唔係乜嘢咁特別，之前睇過唔少文章，都話 Idea 對一間 Start up 嚟講唔太重要，最重要係點解去 Execute. 如果照咁樣嚟睇，佢 Execute 得好好。大家互相交流咗啲經驗，獲益良多。

上到佢 Office, 我愛死嗰塊白板牆，由始至終都覺得，做 Creative 嘅事，係要有個大嘅地方畫嘢，思路先至可以走得更遠。個 Pantry 附近擺放咗一系列嘅黃膠鴨角色嘅公仔，無玩到佢嘅 Game 真係唔好意思開口話唔識。雖然佢話送隻公仔俾我，但都唔好意思要，之後佢又隨手响房拎起個小米嘅 Portable Battery, 都唔知點好，唯有要咗佢。

最後影咗幅相留念，走出 Office 等電梯嗰陣，見到一個幾靚嘅畫面，忍唔住影低咗。


返到沙田火車站，時間尚早，走去附近嘅 Ikea 睇吓。見到一啲掛式嘅布質吊櫃，好似幾有用，但我諗都係過到去英國先再買都未遲。走過塊鏡，忍唔住影低自己嘅造型，一啲都唔失禮，頭先應該無洩咗道氣。走畢，竟然見到有甜爆谷賣，二話不說買嚟食，正!


食完，去灣仔 298 買嘢，本來想帶屋企部機嘅 Hard disk 晒過去，但諗諗吓，不如將啲有用嘅嘢抄去隻 Mobile hard disk 度會輕便啲，於是就買咗隻 1TB 嘅。依家要諗諗帶唔帶個 Notebook Stand 加個 Full size keyboard 添...

人生之旅 - Day -23

靚仔魔術師前一日介紹咗一個魔術嘅交流會，話說魔術交流會係專業魔術師之間技術交流同發表作品嘅場地，對於我呢個鐘意睇魔術嘅人，當然一口答應。

本來想答地鐵，但又唔太想轉車，於是就去巴士站一碰運氣，點知就有架113出現响眼前，第一時間衝上去。不過車程就比預期長，重要搵方法過條彩虹道，遲咗成差唔多半個鐘先到，好彩去到未開始啫。


一開場就有嘢學，Frank Wong 講咗少少魔術嘅表達三步曲方法，本來想 Map 去做 Presentation 嘅方法度，但後來 Map 嚟 Map 去都唔太 Match, 都係遲啲再諗。另一個就係講效果呈現嘅邏輯，即係要觀眾明你想表演緊乜，一個於諸各表演藝術皆需要嘅原素。除此之外，重有 Zenneth Kok 嘅作品發佈，各唔同魔術師如 Michael Lam 同香蕉王子嘅表演。除咗睇到魔術效果，我重睇到佢哋嘅專業，想盡方法去推廣、製作、改善，無返咁上下熱誠，係做唔到。

交流會完畢，同靚仔魔術師去咗附近間粥舖食少少嘢，再去行 Mikiki, 說著笑著吃著，又係時候告別，搭上101返歸。但想買鞋先，再一次去到大大步，搵返前一晚响 K-10 見到嘅 Rockport 防水皮鞋，只係8百幾蚊，平咗好多，二話不說包起佢。再睇 Columbia 嘅防水嘅運動鞋，一試又舒服，包埋佢，買鞋嘅任務完成。


返到屋企，準備影星嘅。今次帶埋個赤道儀出去，不過好大霧，搵唔到北極星，對唔到位置，只可以用手機估計大概嘅位置。試咗幾張相，原來人眼睇唔到，但只要個曝光夠長，都影到唔少星，可惜光害實在太大，啲相盡 Tune 都只可以有咁嘅效果。


返屋企途中，差唔多到屋企樓下，可能因為太夜，俾警察查身份証，都好似係咁大個仔以來嘅第一次。又係嘅，夜媽媽响條街度，的確係會有少少可疑。

返到屋企，收拾好心情，再度出發，準備去倫敦嘅事，攪到五六點先瞓，好耐未試過咁夜瞓了。

是日布吉連線:


P.S.: Frank Wong 提到每一個魔術入面，都要有展示、施法、同埋呈現三個步驟，而我就想將成件事 Map 落去起承轉合度，當然係 Map 唔到。因為之後再諗返起，佢曾經提過幾個魔術會聚成一個 Act, 幾個 Act 合成一套 Routine. 所以起承轉合係一套 Routine 嘅事，而唔係單一魔術嘅事。正因為咁樣，呈現嘅邏輯非常重要，因為觀眾唔明你想呈現啲乜，會有疑惑，疑惑一個一個魔術慮積起嚟，做唔到承轉合度，咁成套 Routine 可以收皮了。