拜個早年

話說新年就到，同各大客戶拜年就少不免，於是就要 Designer 去整張賀年咭，要求就只係一兩句:

Could you please quickly design one? With again, our cloud favour? No need to be very RED, etc. Maybe just more around Monkey, or a cloud-like-monkey?

兩日後，就完成咗: 一個中西合壁，柔合咗科技同埋傳統嘅設計

個設計主角係隻馬騮，用嘅似係傳統新年剪紙嘅慨念，但就唔係剪紙，而用科技有關嘅 Icon 去砌出嘅剪影



除咗主角，不得不提處理雲端運算作為主題嘅方法，我諗十個雲端嘅 Logo, 有十個都係一舊一舊嘅雲


但圖中嘅背景，用中式古典雲紋，既係雲端，亦配合到農曆新年嘅傳統味道，再加幾舊現代西方嘅雲做點綴。

配色亦有一定嘅學問，棄用鮮紅，用相近嘅橙色，調暗為啡色，就係馬騮嘅色。而橙色嘅相對色，就剛剛係公司用開嘅藍色，所以，主角馬騮係搶鏡，祝賀詞嘅比重亦好大，但公司名就好醒目，三樣嘢有著唔同嘅 Tension, 但又好 Balance.

呢張賀年咭，我愛死了!

Anyway, 祝大家嚟緊新嘅一年萬事勝意

科學精神

好多人話天文台唔準，外國好準確咁預測到零度云云。

第一，噚日普遍地區氣溫無去到零度。
第二，噚日普遍地區無落到雪。
第三，今日 (週一) 亦係 3 至 9度

當有報導話落雪嘅時候，除咗天文台，如果有去其他網站睇 (accuweather, BBC, CNN), 都無一個話係噚日零度或者落雪，最低只係見過三度，估唔到天氣預測都要 Cap 圖，但三度呢個氣溫係特登記底。

呢啲評論真係唔識評論:

天文台調低溫度，就即係有新 Data 入咗個 Model 度再作出預測。亞熱帶地區難測係常識，第一條七日嘅預測唔準亦係常識。天氣預測講機會率，今次呢隻黑天鵝，輸在 Historical Record 嘅比重可能多咗。

只係用幾段新聞就鬧，只係無的放矢嘅程度。搵返過去一年香港天文台同外國天文台比較返真實情況，計吓誤差比率，睇天文台係咪真係咁政治化，永遠預測出理想天氣。

冬懂凍

一早起身，Facebook 俾「我的天文台」洗版。我印象中，細個嘅時候農曆新年都係差唔多嘅溫度，似乎和暖嘅氣候，令到寒冷嘅天氣變得特別。

亦因為咁，噚日開始，就有好多人去大帽山睇結霜... 結霜嘅嘢，打開雪櫃個冰格咪有囉，上大帽山睇個景又唔係特別靚，要睇靚嘅都係去外國睇啦! 跟住出事喇，山上進入零下嘅溫度，落雨變冰，就算係高高手，都未必可以駕御到冰地，呢一刻為此都未有意外發生，係奇蹟。

欺山莫欺水，其實山，亦都唔係咁好蝦。

復仇勇者

話說男神聖誕抽到戲飛，於是就一班人用咗佢。睇戲之前食飯，閒談間講起英文發音嚟，發現原來大家嘅發音都有問題，睇嚟可以搵日執執佢。

講返套戲，就好似睇咗兩個鐘嘅《人在野》咁，睇生火、捉魚、食生肉、執草藥、處理傷口、挖空動物再瞓响入面禦寒，總之就响雪地生存到唔知幾多日。另外，又俾熊襲擊、俾土著追殺、闖入急流、墮崖，呢啲破皮傷肉骨折嘅劇情，真係無主角光環嘅話就一早香咗。Anyway, 講故咪駁故，基本上，睇人打交、睇絕地求生、睇風景，只係故事太 Heavy.

不再含淚了

之前2012年，馬英九得票6,891,139，蔡英文得票6,093,578，其實兩者差距不遠，只係差6%。
今次2016年，投票人數比起上年已經少咗8%, 國民黨敗局就梗。朱立倫得票3,813,365，蔡英文得票6,894,744，真係 Win by a landslide.

反觀宋氏由369,588變成1,576,861，上一次嘅國民黨含淚投票似乎都幾奏效。由含淚投票到今時今日嘅結果，大家都開始知道民主制度點玩，由新鮮事變成常態，由濃烈嘅情緒主導，變成批判嘅思考。連蔡英文响讀出勝利宣言嘅時候，語氣亦都不大多放情緒，但隻隻字都好有感染力，其中一段係咁嘅:

我說過，我拚了命，也要把各位的淚水轉化成笑容。各位，我們都做到了。

另一段係咁嘅:

今天的選舉結果，是向世界證明，台灣人就是自由人，台灣人就是民主人。只要我當總統的一天，我會努力，讓我的國民，沒有一個人必須為他們的認同道歉。

台灣人除咗係自由人、民主人，台灣嘅制度亦都已經發展得健全、成熟、穩定，當然今時今日嘅成績亦係前人抗爭嘅成果。

香港人，今年立法會選舉，大家嘅淚水又會轉化成乜咩呢?

每日一字 35

Landslide:
港譯 - 山泥傾瀉
粤譯 - 冧山泥
台譯 - 山崩
其他國家 - 滑坡、塌方

發生嘅時候，啲水石沙泥會將沿途嘅所有嘢帶走。Landslide Victory, 就引申到一場投票，勝出嘅一方贏到開晒巷，就好似山泥傾瀉咁帶走晒啲選票。Landslide Victory 重有另一個講法，係 Win by a landslide.

失而復得

話說上次返香港嗰陣，因為一啲事而 format 咗個 hard disk, 重寫咗少少嘢，自己 Scan 過，啲最珍貴嘅 ICQ 同 Email History 無晒，所以放埋咗一邊。

上個 Weekend, 拎咗去灣仔俾人 Scan, 前日打嚟話救得返，再三確定入面救得返，就決定俾錢救，話晒記憶無價嘛，噚晚拎咗去抄返啲 files 出嚟，今日攞得返。

呢啲紀錄相當珍貴，例如其中一個係呢位網上探險家係一個被 Random Add 嘅網友，佢又鐘意寫 program, 於是佢有問題，我得閒就答吓咁，但自從 ICQ 唔興之後，就已經無再聯絡。


呢排好多「我講嘅係廣東話，我寫嘅係正體字」嘅貼圖响 Facebook 上面出現，其實我嘅 Record 入面，打嘅字一路都係廣東話。當年係已經有香港常用字，但就無 Unicode, 為咗唔好打咗嘅字人哋睇唔到，所有口字部嘅廣東話字就加個 0 上去。

Anyway, 有興趣可以問我攞返份屬於自己嗰份，2003-2006 年都有，2003年前嗰啲又係因為一次意外無晒，2006年之後嘛，ICQ 都唔興 lu. 而今時今日啲 Whatsapp history, 我真係唔知點 Backup.

建築在痛苦上的快樂

本來以為會唔記得，但剛好呢個禮拜去上堂，有少少時間，夠時間返公司一轉做少少嘢打吓牙骹，本來想去正街但牙骹打得太耐，無乜時間，於是返屋企睇毛記嘅分獎典禮。

因為無用開 Now, 亦唔想用手機睇，所以都係用電腦睇。用 Chrome 開個直播 Page, 要先裝 Silverlight, 但裝嗰陣，又話我已經裝咗，所以打安全牌，用 IE 開，得咗!

雖然過咗差不多廿分鐘，但只剛開場，重跳緊舞䁔緊個場。其實本身無追開 100毛/毛記嘅嘢，但對於每日都要以六點半左右新聞報導為功課嘅人嚟講，一個大 Show 就係一場考試。考試喎! 你會唔會出盡力去做?

以一場 Show 嚟講，表演嘅水準都合格，但諗真一層，呢場 Show 嘅主打唔係賣水準，賣嘅係努力嘅過程，賣嘅係身份嘅認同，賣嘅係花生娛樂。的確，努力但無回報嘅人比比佳是，亦被講普通話嘅人踩得一文不值，公仔箱嘅娛樂鬧多過讚而叫不上娛樂。難得有一場賣呢啲嘢嘅 Show, 飛當然會秒殺，K房爆滿亦見怪不怪，但連 Now 都話要嚴陣以待試 Server, 就真係出奇。


Anyway, 用電腦睇有個副作用，就係可以 Cap 圖，所以無意中洗咗版，因為無追開，好多歌都係第一次聽，當然聽嘅唔係旋律，而係歌詞，原來都幾到肉。

表演嘅、做觀眾嘅，都不乏上兩代嘅人，有李怡先生、有小鳯姐、有鵬哥、亦有俞琤，李怡先生只係低調地做觀眾，小鳯姐同鵬哥受歡迎嘅程度，不比當今任何一個年青偶像低，唯一困惑嘅俞琤，點諗都諗唔到佢出場嘅作用。重有何國榮，由佢去 Rap 《香港地》，Rap 得出香港地嘅味道出晒嚟，用嚟做結尾係畫龍點睛。By the way, Dickson 好慘... 又俾人一巴車埋去...

至於今次嘅大贏家，就非 Shell 莫屬，由兩個月開始就開始「#多謝Shell」 呢個 Hashtag, 而個 Show 一開始由頭到尾亦都不停地提，重要無人覺得反感，無人介意。而事實上，所有廣告，大家都照單全收。

其實呢場 Show 都可以叫做全球華人直播，英國法國可能無乜特別，但馬爾代夫都有，勁!


笑過感動過，大家準備好迎戰了嗎? 網絡廿三條過咗，下年無得睇㗎喇!

2015回顧

• 每個月有大大小小唔同嘅 Trip 一共24個城市，亦因為咁，重有好多篇遊記未寫:
1. Prague
   
2. Bergen
   
3. Helsinki
   
   Phuket
   
4. Bruges
   
   New York
   
   Washington
   
5. Salisbury
   
   Bath
   
   Bexhill
   
   Windsor
   
6. Rome, Naples
   
7. Cambridge
   
   Oxford
   
   Jurassic Coast
   
8. Bristol
   
   Llanfairpwllgwyngyll
   
9. Dublin
   
   Manchester
   
10. Milan
    
    Venice
    
    Verona
    
    Florence
    
    Pisa
    
11. Blackpool
    
    Bergen
    
    Tromso
    
12. Oslo
    
    Copenhagen
    
• 第一次睇 Pride Parade
  
• 踩單車踩到損手爛腳
  
• 第一次玩 Go Cart
  
• 想深入少少去睇香港嘅歷史，於是就走咗去 National Archives 睇舊地圖
  
• 又一次辭職，再返香港，做返老本行
• 認識新朋友
  
• 亦遇故知
  
• 買咗部 Pro 少少可以換鏡頭嘅相機
  
• 又一次玩手機 Online Game (不過剛剛 Uninstall 咗)

Call a spade a spade

以前學英文，學到一種修辭手法，明明係一件差嘅事，可以聽落去無咁差，英文叫 Euphemism - A mild or indirect word or expression substituted for one considered to be too harsh or blunt when referring to something unpleasant or embarrassing.

攪到中譯嘅時候，就出現啲奇奇怪怪嘅翻譯，例如:
1. 加價 - 價格調整
2. 裁員 - 節省人手
3. 落後國家 - 發展中國家

最經典嘅例子，莫過於將「收返」變成「回歸」

語言、思想、行為互相影響下，慢慢就變成習慣。最後「走私」變成「水貨」，「攎人」變成「跨境執法」，你只會响麻雀枱繼續講「係咩? 碰!」

溫水煮蛙，並唔係一日煉成。

我至叻

香港一位好叻嘅明星成日話政治中立，但遍遍就响電視上面大講政治。就好似一班唔識攪政治嘅立法會議員被人選入立法會，同埋一班唔使負責嘅問責官員，再加一個唔係服務香港人嘅香港特首咁，即係亂咁嚟。

中學嗰陣，呢位好叻嘅明星係我偶像，成日覺得人只要夠勁就串得起。但人係會長大，會發現越勁嘅人，係越唔會囂張，反而會虛心聆聽。開口埋口話其他人唔得嘅，心裡其實都有一份恐懼。好鐘意友人一句：「點解叫阿叻？因為得把口有力囉！」主持人問佢如果佢係90後，佢會係乜，佢話佢會做特首，但90後係做唔到特首，因為基本法對特首有年齡限制，所以有啲嘢唔識，就唔好講了。

城市發展無非係想下一代嘅人生活得好啲，唔使好似以前咁辛苦，但點解香港反而會令呢一代年青人覺得生活艱難? 跟住大人們就响度話以前自己幾捱得，年青人係咪要多謝你創造一個要同以前一樣咁捱嘅社會? 作為大人，係咪應該反省吓以前捱嘅意義?

P.S.: 考12個A, 係生活响以前嘅年代，而且會考最多只係考10科，真係你老_，那有咁多個A... 都係嗰句，唔識唔好亂講。

鎅票

泛民日嗌夜嗌話唔協調就係鎅票，選區太多，就集中睇吓最為人千夫所指、動員力最高嘅熱血公民鎅到幾多:

天平西

2015年
1 潘德榮 （民主黨） 1445 32.39%
2 黃宏滔 （工聯會） 2219 49.74%
3 李政熙 （熱血公民） 797 17.87%

2011年
1 嚴志恆 （民主黨） 1510 44.33%
2 黃宏滔 （工聯會） 1896 55.67%

單從數字睇，鎅咗唔夠100票，但工聯會多咗幾百票。

慈雲西

2015年
1 梁𧙗敬 （熱血公民） 362 5.98%
2 翁誠光 （民主黨） 2405 39.74%
3 袁國強 （民建聯） 3285 54.28%

2011年
1 呂永基 （民主黨） 2502 49.08%
2 袁國強 （民建聯） 2596 50.92%

又係鎅咗唔夠100票，民建聯多咗幾百票。

利東一

2015年
1 黃潤基 （熱血公民） 177 3.50%
2 李嘉盈 （民建聯） 1810 35.81%
3 區諾軒 （民主黨） 3068 60.69%

2011年
1 區諾軒 （民主黨） 2148 49.88%
2 陳封華 （人民力量） 129 3.00%
3 張少強 （獨立/香港漁民團體聯會） 2029 47.12%

整體南區選民多咗15%左右，但區諾軒多咗43%嘅票，地區成績不言而喻。值得留意嘅係建制團隊跌票。

利東二

2015年
1 羅健熙 （民主黨） 2564 56.25%
2 蔡文龍 （熱血公民） 119 2.61%
3 彭兆基 （民建聯） 1854 40.68%
4 鄧嘉樂 （獨立） 21 0.46%

2011年
1 盧中文 （人民力量） 92 2.08%
2 黃志毅 （獨立/公屋聯會） 1995 45.00%
3 羅健熙 （民主黨） 2346 52.92%

無區諾軒咁強桿，但都有9%嘅進漲，建制團隊同樣跌票。

元州及蘇屋

2015年
1 陳偉明 （民建聯） 3491 75.06%
2 方智龍 （熱血公民） 1160 24.94%

2011年
1 鄧美晶 （社民連） 493 8.44%
2 施德來 （民協） 1947 33.32%
3 陳偉明 （民建聯） 3403 58.24%

整體深水埗區選民多咗8%左右，民建聯得票持平，假設社民連嘅票去得晒熱血公民度，但要攞到民協嘅票並唔容易。

樂翠

2015年
1 何君堯 （獨立） 2013 46.19%
2 阮偉忠 （快信社會服務團） 99 2.27%
3 鄭松泰 （熱血公民） 391 8.97%
4 張永偉 （獨立） 25 0.57%
5 沈錦添 （獨立） 94 2.16%
6 何俊仁 （民主黨） 1736 39.83%

2011年
1 陳偉業 （人民力量） 303 8.29%
2 何俊仁 （民主黨） 1876 51.31%
3 沈錦添 （新界社團聯會） 1477 40.40%

整體北區選民多咗2%左右，點解何俊仁會跌票? 睇返南區嘅結果，我諗大家心知肚明。關唔關鎅票事呢? 重有，其他國家嘅選舉機器啟動，原本差不多1500票嘅新界社團聯會，變到得唔夠100票，而且何君堯嘅票重有15%嘅進漲，究竟啲票邊度嚟嘅呢?

號外: 馮檢基落馬!
麗閣

2015年
1 陳穎欣 （民建聯） 2531 48.88%
2 黃仲棋 （獨立） 215 4.15%
3 馮檢基 （民協） 2432 46.97%

2011年
1 馮檢基 （民協） 2528 52.05%
2 趙植東 （人民力量） 239 4.92%
3 鍾詠淵 （獨立） 75 1.54%
4 范國輝 （民建聯） 2015 41.49%

整體深水埗區選民多咗8%左右，點解馮檢基會跌票? 係咪黃仲棋鎅走嘅呢? 唔似，因為上屆投咗俾人民力量嗰啲，跟本就唔係佢嘅票，家陣呢啲票去咗投黃仲棋，好正常。不如反省吓點解會跌票重好啦!

總結
做得太耐，老神在在，自然會被選民唾棄。普遍嚟講，稍為激進少少嘅有3-10%嘅勢力 (北區係特例)，難成氣候。傘兵、當區獨立居民就連連報捷。區議會始終係區議會，政治話題似乎唔係太關事。要勝選，就要靠地區工作，靠後生仔嘅幹勁，又或者靠其他國家支持... 成日話鎅票嗰啲，可以歸類為係無做嘢。

By the way, 你知道嗎? 10% 嘅選票可以代表一個立法會議席，下年選舉係咩格局，就拭目以待了。

支持民建聯

有人話無同泛民協調嘅，就係民建聯 B 隊，咁就可以數吓有民建聯有幾多隊:

• 熱狗 - B 隊
• 本土 - C 隊
• 傘兵 - D 隊
• 假傘兵 - E 隊

一隊泛民打咁多隊，真係辛苦晒! 民主建港聯盟，有民主，又建港 (建國?)，又有ABCDE咁多隊一齊做聯盟，字面上好值得支持。至於支持邊隊，自己諗。

講古系列 11: 柴灣、小西灣、西灣河

香港有好多地方，都係填海填返嚟，差不多有個灣字嘅地方都真係一個海灣，當中包括柴灣同小西灣。


相傳當年柴灣附近盛產木材，可當柴燒，所以海灣因而得名。而柴灣亦有西灣呢個別稱，聽聞係因為呢兩個字响客家語嘅發音相近，翻譯員手文之誤而產生。睇返 1893 年嘅文件，柴灣的確係有 Sywan 同 Chaiwan 兩個譯音。而柴灣東面嘅小柴灣，就變咗小西灣了。


致於西灣河，有說話係柴灣西面附近嘅河，但香港東區當年嘅河實在太多，說起上嚟有少少牽強。再查得深入啲，根據《東區風物志》:

西灣河是鰂魚涌黃角嘴與筲箕灣之間的一條小村落，昔日有一條小河由柏架山流經今天的太安街。村落位於小河之西，小河亦將筲箕灣區分為東西兩部分，因村落位於筲箕灣區西面，故名為西灣河。

再睇返1845年地圖，今日西灣河地鐵站附近的確有條河，河嘅西面亦有條村落，似為正解。

大都會

曾幾何時，我對於梁錦松對香港有整體經濟藍圖，覺得佢被迫下台，有少少同情，甚至係可惜。但係當佢講咗話要將香港發展成有一千萬人口嘅大都會嘅時候，直覺嗰份經濟藍圖，似乎唔係乜嘢宏圖偉略。一千萬人口究竟係乜嘢慨念?

上海同北京都有大約二千萬人住緊，係咪就係半個上海同北京呢? 唔係! 睇返人口密度，上海每平方公里3631人，北京每平方公里1311人。香港依家都已經每平方公里6544人，維基話，香港只係發展咗25%嘅地區，剩係計再計返已發展地區嘅話: 「人口密度高達約28,500人每平方公里」用區區嗰5%嘅郊野公園用地，幫到啲乜?

香港2014年淨增長人口大約係二萬人左右 (死亡: 45k, 出生: 62k),本應係過百年後嘅事，但係加埋每日150將單程證，50年攪掂。50年又係乜嘢慨念? 當年鄧小平話香港50年不變，至今18年，香港已經變成咁，再多50年，真係渣都無。再睇吓上海同北京有咩問題:
上海

目前上海面臨許多人口問題。上海本地居民從1993年起即陷入負增長，近年來雖隨着嬰兒潮而有所緩解，但本地人口的增長基本為零。於此同時，大量的外地移民湧入使得上海政府長期對戶籍進行嚴格控制，每年僅通過「人才引進」方式有限發放兩萬餘戶籍。隨着流動人口的劇烈增加，上海市的土地、水源、環境、交通等資源也承受沉重壓力，且大部分犯罪為流動人員所為，對上海的治安造成了影響。與日益增加的外來人口相對應，上海本地文化與方言受到壓縮和流失以及由於文化差異而導致的上海人和外來人口的衝突也趨於明顯。

北京

如今北京市正面臨著非常嚴重的人口問題。官方的調查報告指出，北京目前的人口規模已經超過了北京地區環境資源的承載極限，水、電、氣、熱、煤的供應常年緊張，特別是水資源短缺已經到了十分嚴重的程度，甚至以至於需要調用應急戰略儲備水源才能滿足城市供水需要。糧油醬醋等生活必需品絕大部分亦需從外省調入，穩定保障供給的難度很大。且按照目前北京市的垃圾產量，全市之垃圾場將會在4-5年內全部被填滿。同時引發的交通、住房、醫療、教育等問題也使整個城市不堪重負。

係咪似曾相識? 大部份問題已經响香港發生緊，再多啲人，會有更多同更嚴重嘅問題。將所有郊野公園發展晒都無用，因為唔係土地問題咁簡單。

除咗實質上行唔通，再諗返當年曾任權話香港要發展城一千萬人，今日梁錦松又話要一千萬人，而梁錦松又係董建華嘅人，以董建華嘅背景嚟講，即係呢個一千萬計劃由 Day 1 就响度，陰謀啲嚟講，中共一開始收返香港嗰陣，就有預謀有計劃有組織地殖民，將香港變成一個普通嘅中國城市。到時乜嘢獅子山精神、核心價值通通都會掉晒去堆填區。

古語有云兵貴精不貴多，話自己番書仔嘅梁錦松唔通又未聽過 Quality over quantity?

講古系列 10: 香港

前排睇到一份舊地圖，有一個叫 Sogcow Bay 嘅地方，想一探究竟下，無意中响 Archive.org 入面搵到一份非常舊嘅文件，叫 Typhoon Anchorages, 講適合避風嘅地方，內附一份1878年嘅香港地圖，連埋以前嘅香港地名。於是就對住個地圖探究一番，就見到香港圍呢個地方，因為當時附近嘅石排灣係用嚟轉運莞香嘅港口而得名。


相傳响1816年，英國派特使想同中國講開放經商嘅問題，途經香港補給，停泊响港島南區。而英國嘅特使就應該係由石排灣上岸補給，問咗一吓個地方名，好大機會呢一刻就誤以為成個島係叫香港。而當時嘅登岸人之一係士丹頓爵士，所以香港圍所在嘅山谷，叫 Staunton Valley, 中環嘅士丹頓街亦都係以呢位爵士命名。

雖然另一說係話英兵登陸香港嘅時候，問村民而得知地名。雖然都係問村民，但係第一英兵係响水坑口登陸接管香港，第二南京條約嘅其中一條嘅條文係咁嘅:

三、因大英商船遠路涉洋，往往有損壞須修補者，自應給予沿海一處，以便修船及存守所用物料。今大皇帝准將香港一島給予大英國君主暨嗣後世襲主位者常遠據守主掌，任便立法治理。

即係英國以香港作為島名早响簽定《南京條約》前已經出現。當然，英兵可能响英國接管香港前，已經登陸過無數次，1816年嗰次可能都已經有軍隊從行，但就無從考究。

今時今日，好多名都唔同咗。香港圍變成黃竹坑新/舊圍，當時嘅黃竹坑係一條河，英文曾經叫 Staunton Creek，由於城市發展，當年嘅河道，就只剩低一條明渠。香港圍一帶就變咗香港仔，以分別香港島，香港圍對開嘅香港灣，就即係今日嘅深水灣。而隔籬嘅淺水灣，當年就叫舂坎灣。

但舂坎灣呢個名並無消失到，只係近咗舂坎角，以前叫宮魚灣，英文就係當初我想搵嘅 Sogcow Bay.

另一個有趣嘅名字變化，就係銀洲。原本係指深水灣同淺水灣對出，今日叫熨波洲嘅島仔。今日嘅銀洲，就係原本宮魚灣對出叫孖崗嘅島仔。無獨有偶地，銀洲無論以前定今天，都係擺响舂坎灣附近。

重有係原本叫下鴨脷洲 (Tree Island) 嘅小島，响鴨脷洲西面, 大概係因為上面起咗個火藥庫，而改咗名做火藥洲 (Magazine Island). 島上面除咗有火藥庫，最西面重有個編號為 101 嘅燈塔，閒時都會有人登島參觀。

3D 圖由 Google Map 提供

講古系列 9: 銅鑼灣

1889年嘅銅鑼灣，真係有個灣响度，不過東角就已經被人填咗做貨倉，隻角已經無咁凸出。香港島都係山多平地少，銅鑼灣一帶就已經有三坐山: 東角山、禮頓山、同埋加路連山。而銅鑼灣對出就有個燈籠洲/力奇島，係英軍嘅軍火庫嚟。

响銅鑼灣嘅東面，就係天后廟，天后廟有紅香爐，相傳當年紅香爐被沖上岸邊，附近嘅村民認為係天后送嚟嘅，於是就起咗座廟，廟後嘅山叫紅香爐山，山有高低起伏，高位為峰，低位為谷，紅香爐谷就响天后廟附近嘅盤地，谷內有紅香爐村，村內有大水坑可以作為耕作之用。

時移勢易，銅鑼灣嘅灣已經變成維多利亞公園，東角山之後被香港商人利希慎買咗，所以又叫利園山，跟住又被人鏟平咗去填海。加路連山亦都有相同嘅命運，又係被人鏟平咗，南面一帶嘅山坡原本係墳場，今日就變咗大球場，但墳場重有部份遺留咗，成為掃桿埔咖啡園墳場。力奇島就因為要起海底隧道就填海填埋過去，成為隧道嘅出入口。

天后廟似乎被遷移咗對面街，用嚟耕作嘅低窪地區亦都填平咗，今日成為大家食糖水同宵夜嘅地方。紅香爐村名字不再，但因為水抗而有大坑呢個名(曾經搭過架的士，個司機以為水坑口街係响大坑，睇嚟香港真係不缺水坑...)，當然係大家都認識嘅舞火龍，聽聞呢兩年外國人都有份玩，重係玩龍頭嗰隻。