人生之旅 - Day 3

同噚晚一樣，瞓得六個鐘，似乎心理壓力唔細，雖然成日話俾自己聽要正面面對，但似乎身體好誠實哋話你知你出緊事。靚仔徒弟話攪掂，淺談咗兩句，因為未 Settle 好，無交待到呢幾日發生嘅事。

食過早餐，打咗電話俾 Passport Office, 睇吓如果我响呢度唔識人做到 Countersignatory 可以點算，佢叫我寫封信解釋再交埋俾 Interview 我嗰個人喎，於是就寫好封信，好好彩地酒店嘅人肯幫我 Print 埋出嚟。

時間差不多，於是就搭地鐡去見媽媽同學。無意中見到 Priority Seat 嘅標誌，都幾隱蔽，前兩日都見到有人讓座俾老人家，係咪真係咁自動自覺呢?


早咗到，走去附近嘅超級市場睇吓，呢幾日見到唔同嘅超級市場都會入去行吓，睇吓大概嘅物價如何。
 

附近亦都有間生活精品店，賣啲嘢都幾攪嘢


禁不住影咗幅全境圖


再入到附近間商場行吓


見到有間戲院，原來英國唔止三級制，而係五級制，但係個三角形嘅標誌就反而係講緊啱細路睇... 同埋，戲飛一啲都唔平


見到媽媽同學，帶住仔仔同推住 BB 車，先去商場樓下間超級市場拎錢，過程順利，少咗部份錢嘅顧慮，個人輕鬆咗好多。

跟住大家就上去附近一間新開嘅餐廳食嘢，雖然只係一個普通嘅 Pizza, 但係有心情影食物相，似乎係正能量回升嘅 Indicator. 不過塊 Pizza 就唔知點解無切埋先上枱，呢邊興?


一邊食嘢，一邊閒談，仔仔好強勁，個兒童餐嘅 Pizza 同我嗰塊一樣咁大，我食晒都已經好飽，但佢食咗四份三個，重想再食落去，而且個餐重有蔬菜同甜品添! 最後，當然要媽媽攪掂，另加 Pizza 打包。埋好單後，媽媽同學要返屋企，臨走之前，帶咗我去間地產公司問租屋事宜。

同個經紀講咗我個情況之後，得出嘅結論係要 Prepay 六個月嘅租，先租到樓，即係最起碼要等開到銀行戶口。


好返歸，反正悶咗幾日，出去附近嘅 Kensington Garden 行吓，抖擻一下精神，中途遇到舊款雙層巴士


影咗少少相



再去買嘢食，中途見到支 3D 筆


返到房發現，原來無位擺嘢食，同埋如果我本 Notebook 太大，根本擺唔到上張枱度，呢本 Notebook 都真係啱啱好。


晚餐係中式嘅雞加西式嘅薯蓉，都幾好食吓，不過咁樣細細盒就已經五磅，好彩都夠飽，同埋無乜胃口食嘢，叫做滿足咗生理機能上需要，同埋心理上叫做食咗晚餐。


想有少少聲，開個電視睇吓，响個 TV Guide 掃吓掃吓，乜成人台都咁多選擇，成版都係，都係睇返 BBC News 算


食嘢嘅時候，同另一位大學同學傾開，講咗我嘅情況過佢聽，似乎拎到筆錢之後，個心定咗。第二日就係個 Homestay 話會 Check-in 嘅日子，但其實都上網搵過，似乎係凍過水，於是就買咗兩個保險，首先問吓酒店第二晚有無房，答案係有，Book 埋佢。第二，上 airbnb 去搵另一個短期嘅房，萬一第二晚出事，就即刻 Book 埋佢，就唔使再擔心之後一個月住邊。

安排好一切，可以安心咁瞓覺。

人生之旅 - Day 2

精神緊張之下，只係瞓咗6個鐘，要去拎錢同 Passport Application Form, 行去 Gloucester Road 站，去郵局攞好 Form. 間郵局係响一間鋪頭入面，而間鋪頭咁啱有 Western Union 嘅 Agent, 問題只係無 Passport, Western Union 嘅 Agent 都話幫唔到手，叫我打去問 Western Union 可以點做。去附近間 Burger King 食咗個 Lunch 之後，隔籬有間 HSBC, 就問吓點樣可以開戶口同 Cash 張 Bank Draft. 因為香港有戶口，但問我有無張信用咭响身，張信用咭太耐無用，已經唔知去咗邊，似乎最快嘅方法，係報失再叫屋企人寄過嚟，Otherwise 要有住址證明同 Passport 先得。張 Bank Draft 佢叫我去發 Bank Draft 嘅銀行問。

張 Bank Draft 嘅銀行全名係 National Westminster, 於是就好傻仔咁跟住個地址去 King's Cross St. Pancras 站附近去搵。出發之前要買張 Oyster Card, 用開嗰張信用咭唔太得，好彩有後備，似乎返到香港之後都係要轉銀行。倫敦嘅地鐵，係好老爺，無冷氣亦都無手機 Signal, 還好响呢啲緊張時刻，的確唔太應該拎部手機出嚟玩嘥電。落咗車，原來係大站嚟。


跟住 Google Map 行，似乎唔係好搵到個地址，一問之下，原來座 Building 已經唔存在，依家就係一個 Fitness Center. 有少少汗顏，究竟張 Bank Draft 嘅銀行存唔存在呢?

返到酒店房，首先打俾 airbnb, 睇吓個 apartment 發生咩事，點知佢話無做 Real Estate Agent, 大鑊了，再 check 返晒啲 record, 用嘅嘢全部都係 free web resources. 今舖都真係丟架，做咗咁多年 IT, 都竟然察覺唔到呢件事，收拾心情，再打去 Western Union, 問吓點樣攞錢。最後嘅答覆係，改收款人就 OK. 雖然唔太信神，但「當上帝為你關上一道門,必會為你開啟另一扇窗」呢一扇窗實在太重要，因為幫我匯錢嘅係靚仔徒弟，咁啱呢度又撞得返十幾年前嘅大學同學，即係筆錢終於有機會到手。

正面能量回升少少，再上去睇吓 National Westminster 係乜嘢銀行，原來遠在天邊近在眼前，嘅係 NatWest, 附近就有間，走去問一問，Bank Draft 劃咗線，即係一定要存入銀行，Cash 唔到，開戶口，都係要住址證明同 Passport, 問多幾間銀行，似乎住址證明同 Passport 缺一不可。HSBC 張信用咭似乎係最後機會。

返到酒店附近，見到啲熟悉嘅商舖，無印良品同Uniqlo, 响香港都經常擺埋一齊開，估唔到去到倫敦都係開响對面街。


返酒店後，好簡單咁整咗個杯麵做晚餐，跟住就打俾位做咗媽媽嘅大學同學，約第二日一齊去拎錢。臨瞓前，亦叫咗靚仔徒弟去改 Instruction.

人生之旅 - Day 1

一朝早搭機場巴士，收到唔少人嘅祝福


全幅家當，就係得咁多，過到去會買好多嘢吧


Check-in 完之後，有兩個鐘先入閘，週圍閒逛一番，見到星星嘅威力


同埋星矢嘅威力


入咗閘，又見到一個古蹟展覽


時間尚早，搵個地方叉一叉電


登機之後，因為係 Premium Economy, 有 G.O.D. 設計嘅飛行包，同埋橙汁


例牌地，Delay 咗一陣先至起飛


用 Slit-scan 捕捉到嘅畫面，分別係香港同英國嘅上空嘅分別


開餐，今次又係揀咗素餐，無去澳洲嗰程咁好食，不過唔同航空公司有唔同菜單啩


依家嘅手機連飛機窗外結霜都影到


小睡幾個鐘之後，唔係太瞓到，睇返狂舞派，唔知係咁眼瞓嘅關係，感覺無之前睇咁澎湃。跟住睇激戰，都係無乜 feel. 再睇騙海豪情，唔... 都係好似麻麻地，似乎唔太應該响半睡半醒嘅情況下睇戲。本來想睇埋中國合伙人同 Mary Poppins, 可惜時間有限，都係有機會再睇。


到倫敦，好快咁出到境同拎行李，之後買咗張電話咭，但無 Instruction 去做 Activation, 攪咗成個鐘，先至攪得掂。之後就搭機鐵入市中心，再搭的士去 Homstay 嘅地址。


點知去到之後，無人應門。Email 咗聯絡人，佢話佢老婆撞車，响醫院云云，叫我去搵酒店住住先，星期五先再 check-in 咁。好彩附近有間 Best Western 有房，有間 Dirty Room, 其實只係花灑漏水，問題不大，就住幾日先。


呢個似乎只係惡夢嘅開端，一切並不預期中順利。

人生之旅 - Day <0

星期六，去啊哥度食飯，傾咗少少去英國生活嘅事，大概知到要申請乜嘢，之後去咗同啊哥一家人食飯，造個簡單嘅道別。

星期日，與友人們 Farewell, 第一次搭巴士去友人屋企，等車等咗成半個鐘，無下次了。去到無耐，大家陸陸續續到齊，小朋友們高高興興地玩，實在太得意! 小朋友們開餐後，又再繼續玩，到大人開餐打邊爐。閒談間，講咗好多對某件事情逆耳嘅忠言，或者，我好應該趁今次出走反省一吓。原來好多事，長輩講唔會聽，後輩唔會講你聽，要同輩先可以話到你知。

星期一，離開嘅前一日，要去領臨時 Passport, 本 Passport 係金黃色，鬼死咁靚。之後順便再去同靚仔魔術師食個 Lunch, 還返啲原來屬於佢嘅嘢. 跟住去銀行，再去民政處攪少少手續。中間有10分鐘嘅時間抖一抖，唔想响個 Office 度等，就去修頓坐咗陣


離開灣仔，見到架古老電車，見過紅色開 Party 嘅電車，亦見過綠色舊籐椅嘅電車，兩溝就真係第一次見


返到屋企已經天黑，食過晚飯，諗起不如準備多一打證件相以備不時之需，經過公司樓下，決定上去告別一番，作為最後嘅行程。

人生之旅 - Day -6

終於可以瞓到一覺好嘅，下晝約咗舊同事們一起吃飯，之後去剪咗個頭髮。本來諗住去買褲，但最後諗起今晚會順路經過而暫時擱置。差不多時間，拎咗幅洗牌機俾師弟，先出發去銅鑼灣買褲，再去北角大熱高湯麵。

今晚約嘅係第一間公司嘅同事，當中我係最細嘅一個，雖然只係一齊工作咗一年零一個月，但係大家都可以開懷說笑嘅伙伴。食完飯，做媽媽嘅要返屋企，留低一批佬响度，一起搵糖水吃。同前輩傾計，傾到寫 App 嘅思維，大家都覺得經驗會變成顧累，或者要寫 App 嘅話，真係要一班後生仔橫衝直撞先做到。

人生之旅 - Day -7

之前一晚搵到屋住，以為瞓得，點知有少少開心到瞓唔著，攪到個人好鬼攰。呢日再戰英國領事館，以為要等好耐，帶咗本 Notebook 過去，點知一入門口，就被保安收咗，要走先拎得返。可能因為唔再辦護照嘅關係，所以都無人，好快咁填好 Form 去申請個緊急旅遊文件，星期一攞得。離開嗰陣落雨，有少少鬱悶，返屋企食午飯再去銀行落 Deposit, 個銀行職員好似新嚟咁，問佢邊個 Code 打邊個 Code 佢都好似一頭霧水咁，攪咗差唔多成半個鐘，比起之前灣仔間分行真係差得遠。

攪完之後去 Gym Room 做 Sports Massage, 今次剩係主力攪大腿，個 Session 完咗都重行到，證明大腿無乜事。之後食咗少少嘢，就等徒弟仔放工，一齊去睇《布達佩斯大酒店》，今次應該都係最後一次一齊睇電影。睇完之後，傾咗一陣計，就各自返歸。

返到屋企，上 Monster 度搵咗陣工，見有時間，就去完成埋個魔術比賽嘅 Video.

人生之旅 - Day -8

一朝早去咗入境處見官，但其實唔使咁早去。個官問完父母有無入英藉，再問有無英國居留權，又問有無証明，但係幾十年前嘅事，本護照都掉晒，無 Proof, 無計。

攪完一單，到攪錢嘅問題，話說星期六拎唔到錢做 Apartment 嘅按金, 都真係唔好意思，但係業主真係好鬼死煩，日日响度追幾時入錢，都真係幾後悔响 Facebook Add 咗佢。今日終於去到銀行，匯咗筆錢俾 Homestay 之餘亦都拎咗做按金嘅錢，唔知點解個業主死都唔肯俾我 Wire 筆錢去佢戶口，係都要用西聯。呢次都係第一次用西聯，打過電話去問，話最好寄錢嘅人同收錢人唔同，反正靚仔徒弟公司對面就有間，於是就順便一齊食咗個午飯。

匯錢嘅同時，個位服務員話英國嗰邊好多造假，唔好俾個 MCTN 人喎，OK... 影咗幅相俾個業主，佢話睇唔清楚個 MCTN 同埋想要寄錢嘅人名同地址，個心都十五十六俾唔俾好，最後同佢講我响街度，遲啲覆佢。

之後，去咗英國領館去攪個緊急旅遊文件，點知佢話兩點前先做，過晒鐘咁話，唯有第二日再去過。乜都唔使做，決定去做 Gym. 其間個業主又不斷咁催，為咗安心，打去西聯睇吓發生咩事。個客服姐姐話，唔好俾，MCTN 同寄錢人名都唔好俾。好，唔俾就唔俾，做完 Gym 再慢慢攪。而做 Gym 嗰陣，又有一間 Agent 打嚟，又 email 咗幾條問題叫我答，普通料，但都攪咗成十幾分鐘，希望有下文。

做完 Gym, 話咗俾個業主聽成件事，我只可以 cap 個 Screen 過佢睇，得就得唔得就算，佢唔肯，終於要拉倒了。唔理，約咗人食飯，閃!

今晚同一班大學同學食飯，見到佢地，壞嘅心情一掃而空。笑笑說說，毫無忌諱，就好似瘋狂嘅大學時代返返晒嚟咁。飲飽食醉，返到屋企，面對住由有變無嘅心情，決定再上 Craigslist, 又有幾間啱喎，Email 咗無耐，有一間回覆，價錢貴少少，亦好似無咁方便，但無所謂，最少夠大亦負擔得起。佢話啲嘢俾晒 airbnb 攪，原來除咗個假期租房，airbnb 都有做 Agent. 最好就係今次係可以直接 Wire 筆錢入銀行，唔使擔心筆錢俾唔知邊個拎咗，瞓得!