蝴蝶效應 1

Butterfly Effect 總恬嚟講就係因為一個輕微嘅變化，而引致一個重大嘅改變。今次個重點，唔係個效應本身，而係想講一講超時工作 (即係 OT) 點樣改變香港人生活模式。

運動篇:
據一個 05 年嘅調查，有近八成人運動不足 (不符合每周運動不足三日及每次逾半小時的要求)。如果要滿足呢個要求，即係一個星期大概有兩個 weekday 要抽半個鐘做運動。但當一個普通打工仔，八、九點先收工，食完嘢再抖兩個鐘，都已經十點幾十一點，咁夜，跑完又要返屋企、沖涼，攪得嚟，都差唔多十二點一點，第二日，都好大機會無精神返工。即係話如果要做運動，咁就要將工作時間向前撥一個鐘。加上星期五差唔多都會拎嚟玩，即係一個星期有三日會有大概 10% 嘅 productivity "loss" (假設 OT 呢幾個鐘真係 productive).

賣地的詛咒

政府賣親地個市都會跌...

DVD-RMVB

响 newsgroup 度，見到有人 post DVD-RMVB 嘅電視節目，不禁响度諗，我對 rmvb 嘅質素真係不敢恭維，睇親嘅 file 都好似偏矇。而所謂嘅 DVD-RMVB, 就係 DVD 嘅 resolution 嘅 RMVB. 無畫質可言，要嚟睇都還可以，用嚟收藏就唔掂。

gym gym gym gym

呢個 weekend 俾人叫去沙灘，但係我好怕曬又怕熱，決定去做 gym. 今日個狀態好掂，可以跑到 9.5km/h 三十分鐘。跑完，好舒服，做咗兩 set weight training 發覺無乜力，唯有撒退。返到屋企，沖咗個涼，無無聊聊寫 blog. 家陣有少少餓，但係剛做完 gym, 咁快食嘢就肥梗，所以，唯有等多半個鐘。

兵分三路

迷火影迷到一路睇譯版漫畫、一路追日版動畫、一路睇港版電視。

錯覺?

唔通，你係因為我而上 icq? 多謝你嘅厚愛!

壞習慣

自從睇咗 Monster 之後，發覺自己有個壞習慣。
唔可以再做倫華探長... 要戒!!!

Heroes

一套一流嘅劇，一個 Season 完一個大故仔，唔駛拖戲，去追下一個 Season 釣住條引, 正!
下一個 Season 有少少 Preview, 以古代做背景，應該係 Season 1 嘅前傳啩，祈待!

白痴顧問

去美化旺角，目的係「吸引市民到該區消費」，係咪嫌响旺角嘅人唔夠多?

警告? 預言?

對上兩次班大佬出嚟警告叫小市民小心投資，個市無耐就跌落去咗。今日大佬們又再提醒股民，究竟幾時又會大跌?

錢太多

考完個車牌，又手多多報埋個「金牌路路通」，咁又去咗幾千...

薪酬調查

人家 n 年前減人工你又唔跟住減，家陣已經加咗增薪點，又想加埋人工，邊有不勞而穫咁著數呀?

情趣???!!!

小學生話無得上網玩，就會無咗生活嘅「情趣」。所謂嘅情趣，係兩個談戀愛嘅人之間嘅生活點滴同趣味。小學生咁講，一係佢响網上識到個女仔，一係佢用錯詞語。佢可能想講生活嘅「樂趣」，真係唔該 D 正字人去教好小學生。

三談不雅

如果讀物流傳時間較長，公眾接受就可以豁免審查，咁呢個時間係邊個去介定? 公眾又係指邊個? 點解《秋天的童話》嘅投訴又會被接納? 整個審查機制根本就係有問題! 完全無準則!

再談不雅

如果一份讀物可以逐篇逐版去評級，咁報紙嘅風月版係咪要日日送檢? 時下嘅八卦週刊，影完相又作晒文咁圖文並茂，係咪又要期期送檢? 聖經唔送檢，係因為係宗教文獻。但係學生報係咪可以算學術期刊? 八卦週刊同報紙係屬於監察社會，咪又可以唔駛再送檢? 咁咸書亦都可以話係藝術寫真，亦都唔駛送檢。到最係就乜都唔駛送檢，結論係: 影視處係廢嘅!

聖經不雅

舊約聖經，內容真係好過份。如果要送檢文字媒體，拎聖經去送檢係好理所當然嘅事。

人生的詛咒 2

考試前，必定會好忙，Master 係咁，車牌亦都係咁。

買股票一定高位買，自己買係咁，月供亦係咁，都唔緊要，最攞命係買完一定會跌一浸。

路路暢通

學車嗰陣竟然無乜車响路面，有少少唔習慣。

耍白癡

做好嘢之後就搵過第二個人嚟推翻之前講嘅嘢，唔好當我傻嘅先得㗎，都唔知你要攪乜花神。

母親節看花師奶

Download 咗「我們這一家」嘅劇場版，講啊柑同花師奶掉轉咗身體。最後一幕，雷電劈中花師奶嘅金牙，攪到啊柑差 D 支持唔住，花師奶就响最後一刻，將身體換返返嚟，啊柑最後無事。花師奶嘛，暈咗一陣，但無幾耐醒返之後企起身講:「你啊媽我身體咁強壯，唔會咁容易有事嘅!」

睇完呢幕，聽到呢句，百感交集。

生意人 vs. 技術人

生意人唔會明技術人所講嘅 flexibility 同 maintainability. 同佢講 time to market 先係王道。

理性的玫瑰

班師弟，週不時都將電腦名詞譯做中文，「理性的玫瑰」絕對係比我早前聽過嘅「力量的點」更具創意之作。

有朋自遠方來

舊同事，新 Office, 好懷念以前嘅日子。
亦因為咁，返屋企時又遇到師弟們，如果可以停留响以前嘅日子，就實在太好了。

Google Personalized Homepage

唔知幾時，Google 嘅 Personalized Homepage 轉咗名叫 iGoogle. 我亦都終於明白，點解個 url 係 http://www.google.com/ig

兩難與因果

人生有好多兩難嘅問題，一個月嘅 no pay leave (npl) 事件亦都睇到一 D 因果關係。

npl, 令公司或者 management 埳入兩難，一個月話多唔多，但係一個月唔見咗人，一係無嘢做唔需要你，一係公司要請人頂你，但唔通你返返工嘅時候要炒新人乎?

今次 npl 批咗，衍生出令自己兩難嘅局面，就係 renew contract 嗰陣，令自己變得毫無談判嘅條件。家陣上頭咁就得你，但又想加人工，如果加得唔理想，究竟要無情地走定係留响度「屈就」多一年?

不過，青春係無敵嘅，後生就係後生，做細嘅包袱，少好多~~

背馳

馳即馬車嘅行徑。背馳，即係兩架馬車彼此相反而行。用响股市度，即係現價一個比一個高，但係技術指數就一個比一個低。恆指好似已經開始支持唔到，還看平安能否平平安安咁渡過呢一劫。

舊同學

因為一連串嘅巧合，遇到一個中學同學:
如果今日唔係約咗人
如果今日臨走前唔係俾同事叫住幫手
如果今日唔係約七點半
如果今日佢無「早走」
如果今日唔係約咗去銅鑼灣
如果今日唔係搭地鐡
如果今日唔係坐車頭

如果呢 D 巧合係用嚟識女仔就好囉...

英國黨魁

英國政黨政治嘅 life cycle:

1. 一個做咗好耐嘅首相，因某些事失去民眾支持宣佈辭職
2. 同一個黨會有一個新首相，但唔會做得長
3. 政黨輪替
4. 返回第一步
   

人生的詛咒

詛咒一: 當離開一個地方嘅時候，一個月內當地股市必定大跌

例一: 1997 年 8 月離開香港，一個月內亞洲金融風暴
例二: 2001 年 8 月離開美國，一個月內發生911事件

詛咒二: 當參加完一項月供保險，保險經紀不出一個月便離開保險公司
家陣兩份保險都係孤兒單... -_-|||

久咳

呢次傷風好毒，一共有三個人同我短暫接觸之後無耐就病，仲要誘發埋氣管收縮所致嘅敏感咳嗽，即係普通咳藥醫唔到，要靠自己忍或者睇耳鼻喉專科。

為咗呢次傷風，無做兩個星期 gym, 星期五應該清晒 D 傷風毒，可以去做吓，強化返心肺功能。

怪 keywords

開咗個新 blog 個幾禮拜，見到有人終於入去睇，點知，係一個北京人 search "the benefit for numeric values" 而入嚟嘅。但我個明明係塔羅牌 blog, 唔關事啫...

我自己又 search 吓，next 咗幾頁都見唔到，set 埋做繁/簡中文都係無，究竟呢位仁兄係點 search 嘅呢?

英國議會

同樣係口舌之爭，英國議會真係好熱鬧。

趕，係無用嘅

起好部機，但我完全做唔到嘢，其他人又唔得閒，都唔知趕嚟做乜。

任性

一個月 no pay leave 嘅意義，係想玩，就係咁多。

啊媽靚湯

呢排係咁咳，啊媽整咗煲止咳湯，都 OK 有效。

心戰辦公室

辦公室，一個充滿政治嘅心理戰鬥場地。一個月嘅 no pay leave, 究竟係乜嘢意思，係時候要出招。

殘

病樣比唔夠瞓嘅樣，殘好多...

沙塵

搬咗新 office, 呢幾日嘅塵，多過响舊 office 一年嘅塵。一個十一樓，一個十三樓，但係原來對住個海，塵次係差咁遠。

400

終於過 400, 下一站 450

白痴澳警

向天開槍，根據物理學，子彈下降到地面嘅速度係同子彈剛離開手槍嘅速度一樣，所以呢 D 流彈對附近嘅人係非常危險，中唔到人係好彩，可惜，五發子彈有一發中到人...

師奶數

明報新聞節錄一則:

對於500元出團費，業界意見不一。目前沒有底薪的本地導遊彭小姐質疑﹕「500元出團費究竟邊個畀？是不是政府出錢？若不是，就一定要加團費來騰出導遊費。」她擔心若團費增加，內地客未必負擔得起。有底薪的本地導遊黃小姐則表示支持﹕「最好就是無指定購物點的行程，旅客可有更多時間玩。」

嗰 500 蚊，一團有50人，即係一團每人貴嗰十蚊，人家如果去你嗰 D 甚麼定點購物買嘢，嗰十元八塊已經唔係錢嚟!

Blog Blog 不盡

手痕開多個

理財

中國傳統有偏財神同正財神，但不論邊個財神，都無可能長期庇佑。所以要年老無憂，識得理財先至係皇道。否則，縱有千萬年薪，都可以賭晒成幅身家去。

執到寶?

去新 Office, 執到一件唔屬於今時今日買到嘅嘢，最後，拎咗返屋企同件大嘅影相。

購買哲學

要睇價做人，咁即係唔係必需品，亦即係唔使買。
如果係必需品，格價可以，但成個場都差唔多價，咁不如去一間熟 D 嘅，不問價，見啱就買，無謂為嗰十元八塊，去花自己時間。

搬

轉個角就返到 office, 夫復何求!

強弩之未

轉勢在即? 時間可以証明一切...

Rare Item

我想要一部細部 + 強 Zoom (>5x) + MPEG4 Video + 潛水殼嘅相機，但係到咗今時今日，都只係得兩部可以啱其中三個條件:
Sanyo Xacti HD1A - 強 Zoom + MPEG4 Video + 潛水殼
Panasonic DMC-TZ3 - 細部 + 強 Zoom + 潛水殼

Diet Coke 重生

Diet Coke, 一罐好難飲嘅可樂，因為難飲，香港好似賣得麻麻哋，轉由 Coke Light 作為主打。呢排有一堆 Coke Zero 嘅 Marketing Campaign, 吸引到唔少人試，啊媽亦買咗一 pack 八罐返屋企。試咗一罐，發覺係同 Diet Coke 嘅味一模一樣... 咁難飲...

打不到的架

廣東話，口字加個架為「㗎」，一個肯定個人觀點嘅助語詞，用倉頡打嚟打去都打唔到，MSN 又唔係好 show 到，有時傾計真係煩死。

神來之筆

對於美學完全無感覺嘅人，係要靠神來之筆去完成一件作品，影相如是，做 wallpaper 亦都一樣。只係材料，就要睇彩數咁解啫。所以，無料嘅人，一切皆是運，無料又無運，咪要勤力 D 去做好一件事囉，將勤補拙嘛!

肚餓 = 嗌多 D 餸?

通常同朋友食飯，都會有人問肚唔肚餓，餓就嗌多 D 餸云云。其實，餓嘅話又唔代表個胃嘅容量大咗，嗌多咗嘢，一係每個人都會食多咗，一係就會食剩。一個錯覺就攪到要浪費，唔係好掂。

默默耕耘

响 open source 嘅世界，就係有好多人用你嘅嘢你又唔會知，不過又會有 D 人俾 feedback 你。不過，睇返 Google Analytics, 响呢五個月，都有六百幾人入過嚟睇過個作品，而且遍佈歐美，都叫做唔錯!

今晚興起，終於 fix 咗兩個俾人 report 咗好耐嘅 bugs.

文字遊戲

所謂嘅「銀行分行的密度」，係用人口計定以地方面積計? 網上又夠可以去百佳惠康，又唔見 D 超級市場執晒?

柯清輝否認銀行分行不足 2007年4月12日

【明報專訊】恒生銀行副董事長兼行政總裁柯清輝否認本港銀行分行不足，他指本港銀行分行的密度，屬全球先進國家頭三名，加上市民對銀行櫃位服務的需求大幅減少，現時銀行交易以電話、網上銀行及櫃員機交易為主，只有小部分透過櫃位進行交易。

[略文]

仔仔仔仔

IT 係男仔為主嘅行業，十個有九個都係仔嚟。不過呢排返駕駛學院學車，係十個有十個係佬... D 女去晒邊? 咪响晒門市同 call center 度囉!

英女皇不及裸女

人哋為咗一個裸女而繞道，但係香港就連英女皇都無面俾，係都要拆碼頭。

二戰刻裸女 老樹變文物免砍 2007年4月10日

【明報專訊】英國一棵400年老樹在二戰時被刻上神秘裸女像及簽名，老樹最近竟獲這祼女「庇佑」，逃過被砍掉一劫。

英國運輸公路局為興建一條價值約57億港元的隧道，預備將薩里郡一個密林中千棵樹連同那棵刻有裸女像的老樹砍掉。然而準備動工之際，工人發現老樹的「性感紋身」，當局認為老樹是「有趣的歷史文物」，決定改動隧道的位置，繞過老樹，令它得以保存。

英工程繞道保樹

英國林業委員會及多名歷史學家研究過裸女像，但無人能解開其秘密。刻在老樹上的裸女像屬典型二戰漫畫畫風，約60厘米高，旁邊用正楷寫覑名字「G Wadham」，名字下面刻有「Southall」(紹索爾)，相信是作者住處，最後刻有日期「5/3/43」。護林員說：「我們估計這是一名二戰士兵的手筆，亦可能是加拿大人所為，因附近有加國營地。」

《每日郵報》記者憑覑簽名，找到最有可能刻上裸女的人——「Gerald Wadham」。此人1943年時未滿16歲，當時住在紹索爾，二戰後即搬到老樹附近居住，至5年前去世。他的女兒說他喜愛戶外活動，裸女像由他所畫的「可能性很高」。

每日郵報

零團費矛盾

點解同胞們可以俾幾萬蚊買假錶，但又參加零團費旅行團? 又唔係無錢，多俾一千幾百唔成問題啫...

Mika - Grace Kelly

邊個唱到呢幾句我話佢叻...
I could be brown
I could be blue
I could be violet sky
I could be hurtful
I could be purple
I could be anything you like

差之毫里

好多香港人對文字都有邊讀邊，有時又知其音不知其寫法。

例如「海獺」咁，因「賴」呢一個偏旁，好多人讀咗「瀨」呢個音。但其實讀音為「刷」，咁好多人聽到，就寫出「海賊 (近音而非同音)」呢個詞語。可惜呢個世界只有烏賊，即係墨魚，海賊最多係指海盜，並唔係一種動物。

由可愛嘅海獺扯到去海盜惡霸，真係差之毫里，謬之千里，用字要小心。

再見 ATI

一向用開 ATI All-in-Wonder 系列嘅 display card. 但係呢一年嚟，成日無緣無故 hang 機，經過一輪試驗，發覺個 display card driver 出事。今晚實在忍無可忍，去買張唔係 ATI 嘅 display card 加張 TV tuner card, 結束咗同佢近 8 年嘅關係。

五行欠打

點解香港仲有人不知廉恥地响食肆食煙，仲要唔聽人講?
http://video.renren76.com/view_video.php?viewkey=c69b48737cc0c92d0f3a

Newsgroup 上的評語:

• 打得好!!
• x2
• 好
• 打得非常好!!!!!!!!!!
• 好???打咁細力重話好????
  條友咁串,起碼要用鐡棒打佢兩三粒鐘 \ /
• 打得好，做錯事重串人‧打多幾下重好‧

雖然君子動口不動手，但係有 D 人係五行欠打...

愚樂 I Love U

好耐未睇過攪笑嘅節目，亦見各人真性情。

當你見到天上星星

永遠懷念著

350

一個好難突破嘅關口，亦都好難守，個數大咗，1% 都可以去咗好多。不過，時間就是本錢，守得住。

神 vs. 龍

龍在中華，神在太平洋的彼岸，所謂山高皇帝遠，縱有神力，也力有不遞。

P.S. 現代通訊方法: 首選電話，電郵次之，部落留言為副。神之敗因通訊工具選擇錯誤...

大忙人

我以為我已經夠忙，點知仲有人忙過我...

iPod for Free

突然諗起幾個月前個客送咗部藍色嘅 iPod shuffle 俾我，邊個想要嘅請聯絡我，先到先得。

Sub-optimal Solution

所謂嘅 sub-optimal solution, 即係 bad solution. 點解有 optimal solution 唔用，硬係要 sub-optimal? 假若係資源唔許可，係咪應該無大個頭就唔好戴咁大頂帽?

政治的妥協

今次特首選舉反映假如不妥協，香港民主進程只會停滯不前。今天回看，十年前，民主派可能做錯... 政治，就是要在黑暗的角落，為著理想，爭取生存空間，達到目的。

誰人向梁家傑喝倒采?

一批市民到特首選舉場地，為著我們的下一代上公民課，但偏偏有人在梁家傑上台時喝倒采。究竟是他們不知梁家傑參與選舉的意義，還是所謂的公民課是假的? 還是有政黨去煽動呢? 我們的下一代會由這批市民教導嗎? 香港還有希望嗎?

中產? 低下階層?

當享有中產生活嘅家庭都話自己係低下階層嘅時候，呢個會係乜嘢世界?
係 social class 之間嘅界線被模糊，定係呢啲家庭無去好好咁管理財務?

I am kind

一個人係咪仁慈，並唔係自己講，用行動做出嚟實際 D.

Google 係有一手

Google Personalized Page 新 Feature: Theme

病矇咗

放工諗住去睇醫生，但係走咗入去牙醫入面，好彩有人同個接待處响度講緊 D 補牙嘅嘢先發覺出事。之後就粒聲唔出，閃~~~

Microsoft 手記

今日，同 Microsoft 嘅人一齊去做 demo, 只可以用「大開眼界」嚟形容。我講一句，佢可以講十幾句補充，呢樣嘢我係最弱嘅。我係一個講嘢好簡短嘅人，亦都好怕聽人講又長又唚。但係換一個角度睇，呢 D 補充，係咪先至係個客想要嘅嘢呢?

我上司係講得好啱嘅，Microsoft 响香港無太多 technical 嘅人，而我哋又無乜 sales, 兩個夾埋一個凹一個凸，應該係好啱 key.

如果今次要俾分嘅話，我諗俾 B- 至 C+ 啦，準備漏咗一 part, 執唔到生，失敗咗少少。同我一齊 present 嘅人，應該係同我同年，至於我幾時先追得上佢做 presentation 嘅功力，就真係要睇我嘅造化，好祈待再同佢合作。

不過，呢兩日個合作太 close, 中咗佢嘅 virus, 個名叫 influenza, 呢排趕呢件嘢，無做 gym, 又夜瞓，同早起咗，攪到身子好弱添...

BT 嘅影響

BT 唔單止係全球最大嘅 TiVo, 而且仲可以令人忘記錄影機嘅存在。就好似我啊媽咁，問我可唔可以 download 一個未做嘅節目，話到時唔得閒睇喎。我話唔一定有，跟住再指一指部錄影機話:「不如較預錄啦!」啊媽就話:「係喎，唔記得我有碟添!」

科技 - 可以改變事物，影響人嘅生活模式。

Show Time

聽日第一次對客做 Demo, 不過正確 D 嚟講，係 Microsoft 嘅 Lead, 可以欣賞吓佢哋點 sell product.

AW

記得以前上網，有人嘅網名係叫 AW, 即係好似我家陣咁: Always Wait...

公欲善其事

部機實在太慢，最後，要搵一部無人用嘅機去開個 VPC. 感覺係... 好爽~~~!

0... 1... 2... 3... 100

一個禮拜去接觸一個新 technology, 只可以做皮毛，要完成一個 PoC 實在太勉強。跟住攪唔掂又要話會影響好多人? 其實 miss 咗個機會就應該 let go, 機會只會為作好最好準備嘅人而設，未準備過，夾硬嚟只會引起負面嘅反彈。

做 software development 係靠 logic, 更加要按部就班。好多嘢，差 DD, 就完成唔到，今次係時間差 DD, 理解差 DD, 舊嘢就會行唔郁。

其他客唔通置之不理? 太 aggressive, 太 risky...

今年會係最關鍵嘅一年，我都要為日後打算一吓，嚟多幾個呢 D 個別事件，就會變成恆常事件，到時你玩埋我嗰份! 我只想做好一件事，唔係賣我條命，今次呢件事，完全唔合理。

P.S. 睇嚟我部公司機都夠鐘要換，家陣做 development 實在係太慢...

激光矯視

激光矯視同戴眼鏡嘅原理一樣，分別在於永久同暫時。但係呢一方面暫時係勝於永久，因為當睇近嘢嘅時候，晶狀體會特別加厚，久而久之令眼睛感覺疲倦同埋近視加深。如果戴眼鏡，其實可以帶副淺少少度數嘅，咁晶狀體就可以薄少少，無咁易攰。但係做咗激光矯視，無得改，近視只會越嚟越深。

財來自有方

每次需要洗錢嘅時候，都會有 D 意外收入幫補。一世好命乎?

賣命

响公司做嘢，真要成條人命賣俾佢，前一兩年已經有一兩個同事捱到個胃同腸有事，呢排有一個同事話有高血壓。大佬，全公司大部份人都未夠三十歲，做乜攪到個個都殘晒呀... 自求多福...

Microsoft, 我來也

中學嗰陣，一向都係 Microsoft 嘅支持者，我好多身邊嘅人亦都知我有幾想入去做嘢。但係知道佢 monopoly 嘅手段之後，就夢想有一日可以開間公司同佢爭一日之長短。雖然係咁講，但暗地裏依然係 Microsoft 嘅支持者，幾年前，佢 Software factories 嘅 concept 亦都同我所諗嘅 programming paradigm 一樣。到今時今日，佢香港嘅分公司竟然同我間公司去 form 一個 partnership. 感覺，就好似見返一個老朋友咁!

馬拉松

今年終極目標，再操 fit 自己，練跑馬拉松!

真正的快樂

藝人尤其諧星嘅工作，就係將快樂帶俾觀眾，但係好多時，呢 D 快樂都係建築响別人嘅痛苦身上。電視嘅曾志偉同林曉峰如是，電台嘅森美亦一樣。

小弟曾經好欣賞森美，覺得佢識好多嘢，好佩服。但係細心 D 聽落去，佢帶俾聽眾嘅快樂，原來只係不斷用別人嚟開玩笑，聽得多，覺得好悶，好乞人憎。一個聰明嘅壞人，我諗就係我對佢嘅感覺。

曾志偉嘛，純玩型囉! 佢主持遊戲係好成功，但到佢玩遊戲，係靠把口同埋犯規去羸 (森美都有同樣嘅錯誤)，勝之不武。林曉峰仲衰，由得曾志偉去玩，到最後，個節目咪收皮囉!

最近聽電台，聽到崔健邦都覺得快樂建築响別人度唔係一件好事，佢同我應該差唔多大，要多 D 呢 D 人，社會風氣先可以變好... 真正嘅快樂，係要大家都快樂，我唔明點解見到別人痛苦嘅表情會快樂。君不見以前許氏兄弟以前幾成功?!

從 heisshit 看香港網絡生態

heisshit.com 原本係一個女仔嘅討論區，但係唔知點解，高登人士「好有正義感」睇唔過眼，過去踩場，大數女仔不是，到今時今日，仲攪埋 sheisevil.com 去抗衡。

今次事件，睇到幾樣嘢:

1. 高登人 (or 香港男人?) 好小器 (因為容不下對男人不利嘅文章而踩場)
   
2. 高登個甚麼起底組好流 (蠢到 post 一個男人網頁加一個女仔 xanga 去 conclude 個女仔係網主，希望個女仔無受到騷擾。另外，到今時今日邊個係網主依然係個迷)
   
3. 呢個世界總會有有心人去攪大件事 (e.g. 報料俾蘋果，yukicheung, goldenpimp 之流)
   
4. 好少女仔會响網上同人嘈
5. 好多人依然用 grammar 去否定內容
6. 一個場只會越踩越旺

環保炭

前一兩個禮拜去咗燒烤，有人問起環保炭點解環保，同埋點解會係圓形一餅嘢咁。本來覺得最有可能，就係佢經過特別處理，將木炭入面嘅 sulfur 抽起，令到無咁多 greenhouse gas. 但後尾 D 人散晒水之後，先記得 sulfur 係引起酸雨嘅成因。

點解環保叫做過咗骨，但係點解係圓形就解唔到。今晚搵吓搵吓，俾我搵到，原來環保炭嘅原材料係木材加工廠嘅木碎，所謂嘅環保，其實係循環再用，亦因為要將木碎變成炭，要用機器加工壓製，而變成一粒粒圓形嘅環保炭。

哈哈! 同我原本諗嘅 high tech 嘢相差十萬八千里，風馬牛不相及呀!

奧蘭治縣

好好一個 Orange county 俾無線新聞譯咗個奧蘭治縣，唔識嘅話都唔知發生乜事。

感情生活

反思呢十幾年嚟，感情生活，係近乎零。睇得想上嘅女仔，係得兩個。十年前有一個，今年剛剛出現另一個。意圖去追嘅，亦都有三個，十年前嗰個真係想追，上年有一個係做咗試驗品，今年呢個要認真出擊。

點解呢兩年咁活躍，之前嗰八年做乜? 我只可以講話我頭嗰四年用咗嚟讀書，尾嗰四年用咗嚟工作。話說十年前嗰個，話等畢業後先再算婉拒咗，咁我就真係等畢業，其間又無特別去留意其他女仔，亦都唔知點解識親嗰 D 都係剛烈型，我全部都當晒做兄弟，依家諗返，都有一兩個有 potential. 畢業之後，當然係無咗件事，到做嘢嘛，無耐做 software development 係一個男人工業，亦都好多 OT, 根本無時間去諗去識女仔。

到呢兩年，我嘅 status 係屬於令人關注嘅狀態，不論母親大人、朋友、上司、同事都好關心，再 review 返自己剛入大學所定嘅一個人生目標，係廿八歲結婚，所以叫做積極返少少咁。又好唔好彩，上次同上司去上海，同我睇掌，話我:

1. 感情線好亂，應該係有好多桃花、potential candidates 响身邊，可能係男或女 (即係唔理我係咪基啦)，係心諗好多又或者現實真係好多。
   講真，係好多，男女都有，不過變晒做朋友囉... 上司、大老闆、同事、客都變晒做朋友，有幾真我唔知，係咪好事我都唔想理，總之公還公私還私就得。甚至上網都可以無端端走個人出嚟叫我做師傅、啊哥之流，呢 D 係咪叫強力磁石，定係我防人之心太弱?
   
2. 無論响邊度工作，都會成功，但工作同感情有 contradiction.
   呢個就真係難攪，會成功即係要投入工作啦! 換句話講，感情免談...

呢兩點仲代表 D 乜，真係要慢慢參透，我就唔理，總之時機一成熟就去馬。

找尋自己

有時無聊都會打自己個名入 search engine 度，睇吓有幾多個人同自己一樣名，自己又有幾多嘢 on the record. 到今日，我知道分別响香港、台灣、星加玻、澳洲同美國都有英文名相同嘅人。不過，同我有關嘅網頁就通常擺响頭幾位。

手腳，我係有做嘅，但係亦都係上咗網十幾年嚟不斷咁累積返嚟，包括自己嘅一 D 資料，擺咗咁耐，都無諗住去 delete, 因為我做總有我識嘅人想搵我，所謂「有朋自遠方來，不亦樂乎！」搵得到，我會好開心。不過依家諗返，我應該去 market 返個中文名，識我英文名嘅，有聯絡開就已經聯絡開，其他人嘛，係唔熟嘅人...

筆戰

同任何人筆戰，只要捉到佢哋嘅諗緊乜，再 setup 一個 trap, 通常都唔會輸，再鋪一條下台階俾人家，咁就大家都好落台。

所以要玩，可以好好玩，一切都可以控制於股掌，係無聊，但得閒玩吓啫，無壞。

高登

高登係乜嘢地方，大家都知，美國個大老闆問我佢哋係乜嘢人，咪解釋吓發生乜事囉，我又唔會好負面咁講，只係答咗佢哋係一班有好多時間同好有創意嘅人，一星期左右就會無事。今日就剛剛一星期，結果好多嘢都回復正常。

如果大學有人開香港網絡生態呢一科，我諗我會好有興趣報名。

Barbie

著衫我就真係無乜講究，但係好多人都話如果我肯執吓，個 feel 就會唔同晒。呢 D 煩事，我就真係唔想諗，於是就搵咗兩個女仔幫我置裝，睇吓個效果會點。所以，我呢排都會變做 Barbie 公仔，俾兩個女仔舞，要去邊同買 D 乜佢哋就已經有晒 planning, 當然，佢哋都會順便試吓自己鐘意嘅衫，睇嚟都要準備 D 薄禮先得。

性格分裂

通常一個人做唔同事有唔同嘅態度，不過，呢種行為就完全應驗咗响 decision making 呢科心理學，教授响第一堂入面所講 "human is retarded" 呢句。呢句係指人因為行為唔夠 consistent, 所以經常做出愚蠢嘅決定。

自呢堂起，唔想做一個 retarded 嘅人，我就揀咗一種坦白同好率直嘅性格，貫切始終咁去實行，我知道當中可能得罪咗好多人，但最後留得返低嘅都係真心嘅朋友。

不過總有撞板嘅一日，就响今日，disclose 咗一 D 個 partner 唔應該知道嘅 info 俾個 partner, 攪衰咗個 negotiation 嘅 process, 起咗一個可大可小嘅政治風波，好彩有個好嘅上司同老闆，佢話得啖笑喎，輸咗就輸咗，但係我就要多 D 去學做生意同多 D 去問問題。

要變，唔係話唔得，但係唔想變成一個性格分裂同 retarded 嘅人...

他媽的 Firewall

個 web server 唔知點解神咗差唔多成年，今日先發現原來係因為响 XP 度無開到 firewall...

利利是是

過咗十五，又係拆利是嘅時候。利是呢樣嘢，通常都唔會主動去逗，因為呢 D 嘢係無償嘅財富轉移，無端端無理由要人哋破財，以一句恭賀嘅說話做回禮，唔通人家真係買個意頭咩，係嘅話，三毫子一擔...

不過話唔逗唔逗，人哋俾到又無理由唔要，通常都係一聲多謝就算，恭賀說話嚟嚟去去都係嗰 D, 無乜新意，女嘅青春常駐，男嘅步步高升，年長嘅身體健康，做生意嘅一本萬利。

以前我記得重有好多，同健康有關嘅，有龍馬精神、龍精虎猛、身壯力健，同錢有關嘅，有財源廣進、橫財就手、財運享通，做生意有生意興隆、貨如輪轉、年年有餘。其他仲有萬事勝意、如意吉祥、花開富貴、魚躍龍門、出入平安、學業進步。依家都好少拎出嚟講，今年好懶，無乜準備，等下年再睇返呢個 post, 咁回禮都回得有誠意 D...

Tamama

Tamama 係 Keroro 軍曹嘅一個細路仔性格嘅角色，但戰鬥力就絕對唔弱。見呢個角色幾可愛，就想睇吓點樣畫出嚟，原來係非常簡單:但之後發現，卡通入面嘅角色，唔單止係改一改顏色，原來個頭係有唔同 pattern, Keroro 係純色，Tamama 雙色圓型面，Giroro 左眼有刀疤，Gururu 有大近視眼鏡加超多嘅皺紋，Dororo 就帶口罩。呢 D 面型特徵唔難畫，設計簡單但係又非常討好。最大敗筆係個青蛙身，俾人嘅感覺好求其...

係唔識定留一手

話說呢兩日趕起個 Flex 嘅 PoC 俾個 Adobe 去 sell 客，話得係 PoC, D code 就梗係爭 DD, 諗返轉頭，有 D 嘢無諗起要做，就無 study 到點做，又或者嫌煩無做到。我係好相信如果呢個客係 sell 得掂嘅，我成個 backend logic 嘅 code 會留傳萬世 (大客~~, 有自己 development team, Adobe sell 緊 FDS, 我哋剩收 PoC 嘅錢，重要係趕俾佢)，所以個 PoC 好多都係 best of the breed 嘅 code.

但係差少少就係差少少。今次我俾 B grade 自己，如果有多 D 時間，應該會好 D. 所以留一手就假嘅，唔識亦都唔太係，識唔識都係要查 reference, 時間先係關鍵。

鑊

外國人有 pan, 中國人有鑊。鑊嘅英文係 wok, 純綷音譯。而 pan 响中文叫平底鑊，因為中國嘅鑊係弧型底。亦因為衛星天線同鑊嘅型狀差唔多，香港人亦叫呢 D 天線做鑊。但都係得個講字，外國人就叻得多，真係將隻鑊變咗做天線...