人生之旅 - Day 365

唔經唔覺，出走咗一年，本來係時候 Review 一吓幾時結束。不過下個月月頭有一個幾好嘅機會，捕捉到嘅話，會係一個新嘅挑戰。暫時嘛，就繼續將結束日期設定為 Indefinitely.

由一開始居無定所，Reject 咗一份工，無咗一份好大機會嘅工，到搵到工後四圍旅行，生活開始進入穩定，又返咗香港兩次。目前身處嘅位置從來未嚟過美國東岸，其實，根本無諗過會再踏足美國。

生活穩定後，其實同香港嘅生活差不多，都係做吓 Gym, 睇吓日劇過日子，唯一唔慣嘅，係唔可以經常同朋友出嚟聚吓啫。

工作嘛，返工時間短咗，週圍叻過自己嘅人唔少，所以自己都要有進步，眼界亦都闊咗，最緊要係別人對自己嘅認同感。講真，因為之前响同一個地方做嘢做得太耐，成日覺得認同感只係來自响公司嘅資歷，但响一個新嘅地方，可以見到自己嘅長處同短處。同埋原來我重可以學到新嘢，對於一個自戀嘅人嚟講，來自自己嘅認同感更加重要。

一年內去咗13個國家17個城市，破晒紀錄，攪到個 Wishlist 短咗好多，應該都唔會再出現了。

呢一年實在太多事發生，如果要用兩個字去總結呢一年發生過嘅事，我諗「意外」係最合適。暫時仲係喜歡意外，喜歡改變。