食完早餐要，等坐車去龐貝古城遺蹟。同房嘅團友話唔去喎，奇怪的...
車程要三個鐘左右，上咗車就瞓咗一陣，不過架車唔係太好瞓，都係一陣咁多而且質素亦不佳，醒嗰陣都幾 Wing 吓。之後就掃 fb, 係佔領第二日，有扙義嘅商戶、有死火嘅貨車、有來自不同地域嘅聲援。掃掃吓，不忘往窗外一望，火山! 差不多到了。
到咗之後，等團友們買齊飛，先响古城出面留影，再走入去
一入去古城，就係一段斜路，好過好彩唔係太長
入到古城，就係一間一間嘅屋
再入阿波羅神殿
當然，全景鏡始終最受矚目。
神殿內祭壇
影完神殿，就去到一個廣場，好大同好曬，正宗曬命。
過咗個廣場，再走入街道
有啲小巷被封，所以無人
被團友偷拍了
其實响街入面都係咁曬
羅馬浴場，不過團友急急腳咁走咗，費事失散，無詳細參觀到
估計係廚房
繁華嘅街道 (請用少少想像力)
呢間房擺放咗啲嘢,其實唔知有乜特點，無任何註解嘅牌，臨走時先見到啲壁畫，但團友又走了，無影到...
呢三舊石真係唔知要嚟做乜，個個街口都有。
受保護嘅牌
跟住就有一堆講歷史嘅牌
原來呢啲唔係廚房嚟，係熟食檔嚟。個牌話羅馬人唔興响屋企食飯，於是就會有好多呢啲小店。一個個一𥨁下面放火，上面放煲，而店舖後面係食飯嘅地方。其實羅馬人食飯又唔响屋企食，沖涼又唔响屋企沖，間屋似乎剩係用嚟瞓覺。
太好喇，一路行都無地方遮陰，終於有樹遮吓!!! 好熱呀!
瀨嘢! 點解成12點個太陽唔响頭頂嘅...唯有靠牆行了
原來幅牆係角力學校嘅外牆嚟
過咗角力學校，就係競技場。唔通响學校練習完，就可以出嚟玩專業?
都幾大吓
Yeah! 又見到我喇! 呢張相之前，係有好多張，有好多人經過，團友肯幫手先有呢張。
個競技場有兩個出入口，另一邊個出入口背光，乜都影唔到，呢一邊影得好好多。
臨走嘅時候，搵到另一個角度影間角力學校。
呢度唔知復修緊啲乜嘢，有機係 Julius Polybius 之家，呢個 Google 搵唔到料
好多一式一樣嘅「屋」
難得見到有頂嘅建築物
呢幅唔知影乜，可能係嗰一刻對幅牆有 Feel, 的確，個人响嗰度嘅時候，見到啲建築物係會有種不其然覺得好宏偉。
差不多到尾聲，係 Isis 神殿 (註: 同 ISIS 無關), Isis 係幫人生育嘅女神，由埃及傳入嚟
Isis 神殿嘅底部
近出口，又見到火山了
到咗出口，司機到咗，有部份團友未到，於是就買個包食吓。嚟到龐貝古城，就梗係試吓龐貝包 (雖然係 Gimmick 嘅多，但係作為一個遊客嘛...)
其實個包都幾大吓，我唔客氣了!
食到一半，終於齊人，上車出發去下一個目的地: Naples. 但去到一半，壞車，個司機叫我哋自己搵個地方食住嘢等，又話唔知要整幾耐，又話 Naples 啲街窄，架車唔係好入到去咁。似乎就唔想載我哋入城咁，當團友商量點做嘅時候，架車又整好咗...
去到 Naples, 第一站就係 Gulf of Naples
其實個海灣都幾大吓，影影吓就要走喎
出到軍人叫你走，唔通唔走咩...
唔緊要，反正個海灣夠大，去第二度影過都得
影相嘅位置叫做蛋堡 (豬柳欠奉)，相傳有個詩人將一隻有法力嘅蛋放咗入城堡嘅地基，如果隻蛋有乜事，城堡就要破催毁，災難亦都會响城市降臨。
團友們因為未食飯，所以佢哋去咗晏，因為都只係得個幾鐘個司機又會返返嚟接我哋走，我又已經食咗個包，於是就自己一個入城堡。
入到去，原來有藝術展
用水𣝍蓋砌圖案同雕塑
跟住上樓上睇，又同火山影吓相。可惜背光，要用閃光燈，但係效果都始終唔太好。
上到頂，睇見個 View, 令我諗起 Greed Island 嘅【一坪的海岸線】
時候差不多，走人
唔見司機，又唔見團友，同蛋堡影吓相先
無遮無檔嘅海邊
好長嘅海濱
其實除咗個海，都無乜嘢好影，等咗半個鐘，無論司機定團友，都好似消失咗咁。於是打去問團長，叫佢俾其中一個團員嘅電話我。等咗一陣，電話未到，於是就走去團友食晏間餐廳搵吓，途中，見到司機，原來原本約好嘅位置唔俾泊車，佢就泊咗去第二度... 跟住，團友們都開始出現，終於可以返羅馬了。
返羅馬途中，都係掃 fb, 一掃就個幾鐘，跟住就已經係去到羅馬市郊，想瞓一吓都無時間添。到咗酒店，休息一陣，就同團友一齊去食飯。
羅馬嘅夜晚，其實都幾熱鬧，同埋啲燈光加上古老嘅建築物，帶出一種優雅嘅感覺。
去到餐廳，噚日食完意大利薄餅，今晚就一於是意大利粉
我同另一個女團友都叫咗可樂，於是就出現咗男版可樂同女版可樂。
嗌咗個海鮮意大利粉，似乎都幾豐富，雖然當中有半碟係殼，其實都幾好味，不過都幾大碟吓。
之後餐廳送咗幾杯 Lemoncello, 試咗一啖，嘩! 好啃，唔識欣賞。
個人好攰，一來唔夠瞓，二來飯氣攻心。但團友們都重响度傾計，於是我又掃 fb 了，充滿著唔同同佔領運動有關嘅資訊，但總有著掃完嘅一刻，完全唔覺團友們有要走嘅意思。終於，佢哋傾第二日嘅行程，因為第一日個 Day Tour Guide 話要早啲去，唔係就要排個幾兩個鐘買飛的說，所以有人建議第二朝8點出發... 唔... 呢一刻，時間已經係11點... 傻的嗎? 於是決定分兩批人，一批晨咁早出發團，另一批個 Plan 係10點左右先出發。
聽日個 Plan 有著，跟住佢哋又傾喇... 其實間餐廳都打緊烊，啲員工啲衫腳都已經無攝入褲度，有無咁多計傾呀... 又過咗10分鐘，終於肯埋單了。
回程嗰刻，無錯，佢哋係一路行一路傾，好彩有個團友佢都急急腳咁行，咁我就同佢一齊返酒店先。途中示範咗香港人急速嘅步伐，佢都幾讚嘆香港人點解可以行得咁快。
返到房，重要等同房返到先有得沖涼瞓覺 (唔知點解間酒店每間房剩係俾一條鎖匙)，攰都要等，唯有一路整理吓啲相，一路等。今日佔領運動尚算平靜，個人亦都好攰，希望有覺好瞓。
後記: 終於搵到街口嗰三舊石做乜 (http://www.10minutetravel.com/article-detail.php?aid=61), 因為街上有車，車由馬拉，當中當然少不了排泄物。所以耐不耐就會用大量嘅水令條街變成河流咁去沖條街，嗰三舊石，就係俾人過馬路的，我諗，都係班馬線嘅始袓了。
No comments:
Post a Comment