起身梳洗，個頭開始難梳，搵完工之後嘅第一件事係要搵間髮型屋攪攪佢。食過簡單嘅早餐，就出發去搭火車。似乎太早出門口，自動售賣機賣緊嘅仲係緊忙時間嘅車飛，等咗一陣，就去買飛。但係，點解剩係出一張飛嘅? Shit, 一定係頭先撳錯掣... 好彩票務處就响附近，於是就飛奔過去，補咗一毫子買回程飛。
上到車，好多人，好彩過咗一個站之後，大部份都落晒車，有個位可以舒舒服服咁坐底瞌多陣，但係，突然有人嚟查飛，打亂咗個節奏，之後都唔係瞌得好舒服。今次無再响 Gatwick Airport 出閘轉巴士，一來一程要兩磅二，而轉火車來回只係俾多磅零，二來係想行吓 Crawley 嘅 Town Centre, 認識吓呢個 Potentially 要住嘅地方。簡單地行 Town Centre 嘅邊皮，都已經齊晒生活所需，一於見完工嚟個深度行。
去到 Office 見工，早到咗十分鐘，同埋上一個 Candidate 未走，等咗十五分鐘左右先開始見。因為個 Interviewer 係意大利人，有一個唔係英文嘅姓，一開始依照咗個劇本，問吓佢做姓點讀，做毎少少嘅 Ice Breaking. 上到去佢 Office, First In 嘅 Interviewer 都响度，個心定咗好多。今次問嘅問題都係問之前做過啲乜咁，送分題，無難度。不過今次係衰响自己手，問咗佢依家有乜嘢 Challenge, 佢哋竟然想做 BizTalk Federation, 真係難到我。之後再表明有第二份工搵我，再表明心跡 Prefer 佢哋多啲，睇吓佢哋係咩反應，表面上似乎係對坦白有好感，但係因為重有其他人會見，所以要到星期二先知答案。臨走嗰陣，有少少緊張，個尾唔係收得太好...
見完工，去附近嘅 Virgin Active 參觀吓，其實呢度啲 Gym 唔貴，最貴呢間都係五十磅一個月，重有泳池添! 之後去返 Town Centre, 食咗個 Lunch 之後再行吓咁，搵到另一間 Gym, 都只係十幾磅一個月，廿四小時開放嗰隻。個 Town Centre 都幾熱鬧吓，生活所需要嘅嘢都有齊，似乎住响 Town Centre 都係一個唔錯嘅選擇。
要行嘅都行完，搭火車返歸，回程途中，見到一幅畫得好靚嘅 Graffiti, 忍唔住影咗佢
本來想去做 Gym, 不過已經四點幾，有少少餓，亦都唔想第二日搬竇嗰陣無力，所以放棄咗。食過晚飯，又要 Pack 行李了。
No comments:
Post a Comment