旁觀

我係一個有政治取向嘅人，但我無參加任何組織，亦唔參與政治活動。目的，就係响週邊收集資訊，不斷反覆運用邏輯推理，去測試自己嘅取向係正確。到今日為止，仍然正確。

不流血革命

一石激起千重浪，一個以「五區公投」開始嘅新民主運動嘅一個口號「全民起義」，就引嚟建制派同親中央人士嘅批評。中國人嘅起義就梗係流血啦，共產黨當年同國民黨打杖唔知流幾多添! 就算係六四嘅和平靜坐示威，都俾李鵬話係動亂，唔係起義咪又係流血收場。

但君不見英國當年君主立憲，被後人歌頌為光榮革命、不流血革命、和平革命等，就知道一件事可以有好多方式做。以前用慣暴力陣壓示威者嘅，睇見「起義」兩個字，就一定諗到係流血。但睇真 D:
起 - 引發、產生
義 - 公正合宜的道理或舉動

「全民起義」只係叫全港市民參與一場產生公正公義嘅新民主運動。離范人大嘅革命，仲有好遠~~~





























後記: 革，革除，改變也；命，命運，生命也；革命者，改變命運也。流血不流血，不在字面上，而在行動上。

Game Theory @ 高鐵

有說，警方幫政府製造出激烈鏡頭，等中央覺得香港有民主會好亂，令到香港無咁快可以普選。但呢個假設唔係太成立，因為如果俾中央覺得香港政府做唔掂，有咁多深層次矛盾，中央只會加快結束曾任權嘅任期。如果曾任權真係想咁，我只可以用一個字形容：蠢！完全唔符合 Game Theory 入面，Game Player 都係有智慧嘅講法。

當然，另一個可能係，曾任權完全唔想做特首。

蝴蝶效應 14

Butterfly Effect 總恬嚟講就係因為一個輕微嘅變化，而引致一個重大嘅改變。今次個重點，唔係個效應本身，而係想講一講超時工作 (即係 OT) 點樣改變香港人生活模式。

上面係之前蝴蝶效應嘅序言，呢一篇唔係講 OT, 係講社會運動

「80後」篇:
2010年1月16日黃昏，立法會通過撥款，立法會外上演一場騷動云云
2010年1月15日晚上，反高鐵人士夜襲禮賓府
2010年1月9日，反高鐵大聯盟包圍立法會，以嘉年華方式集會
2010年1月1日，元旦遊行參予者衝激中聯辦
2007年10月5日，本土行動成員於利東街衝到將清拆的樓宇，攀上簷篷與警對峙
2007年7月31日，本土行動成員企圖阻止皇后碼頭被拆
2006年12月13日，市民佔領舊天星碼頭拆卸地盤
2005年12月18日，韓農企圖衝擊WTO會場 ─ 灣仔會展

今日嘅蝴碟效應，就係一個唔係太關香港人事嘅 WTO 所發展出嚟嘅。當中嘅苦行、嘉年華、衝擊，都有當年韓農嘅影子。要爭取嘅，係年青人覺得應該要保留嘅嘢：天星、皇后、囍帖街、菜園村。

發展並不是硬度理，但政府一次又一次咁強制發展。通常呢種情況，只有向兩極發展:
1. 做順民 ─ 心理學中，有一個叫 Learned Helplessness 嘅理論，即係話，一個人長期嘅無助，就會從困境中放棄自己。例如長期住响孤兒院嘅細路。
2. 抗爭 ─ 既然當權者唔聽人民嘅聲音，從建制外抗爭係唯一嘅出路，將當權者轟下台。

大部份60後同70後似乎選擇咗前者，但社民連嘅興起，令大部份80後同90後反思，立法會無能，再唔想令呢個情況延續，選擇咗後者，產生一次比一次激烈嘅行動。加上科技嘅力量，網絡再唔係玩快閃黨呢 D 小玩意，而係結集人民力量嘅渠道。一個無組織但強大嘅動員能力，無一個政黨可以駕馭，每個人都用自己嘅良心行事，係資本主義下嘅產物：Individualism.

從生物學角度，集結，係為咗生存。之所以細胞集結成生物、小魚群集結逃避捕獵者，80後嘅年青人集結，就係為咗保護弱小、保護集體回憶、保障多元化、保障其他生活方式嘅選擇。有思考嘅年青人只會推動社會發展，君不見80年代南韓嘅大學生走上街頭掟氣油彈，但長大後走入社會，自然會為理想而努力，南韓今日就算係經過多次金融風暴依然強盛。比起掟氣油彈，香港嘅80後不算甚麼，但呢份熱血，足以推動香港往後發展嘅方向。

發展，再唔係乜嘢大型基建，而係精神上嘅發展，集體回憶、歷史同大自然保育，呢 D 如果係80後想見到嘅未來，D 五、六十歲嘅官，係咪應該聽吓年青人講嘅嘢呢?

香港有未來，因為香港今日有 80後、90後。

立此為證 1

譚惠珠今日响城市論壇話：「權力唔係來自人民，權力係來自中央。」

呢個係民主社會容許嘅事嗎？

Interesting Propositions

Proposition 1: 基本法無所謂嘅公投，舉辦任何形式嘅公投，係違反基本法
Proposition 2: 中央政府唔承該任何形式嘅公投

Dilemma:
如果中央政府視「五區公投」為普通補選，咁即係無違反基本法
如果中央政府視「五區公投」為公投，係違反基本法，但原來佢真係一個公投?!

Implication:
中央政府嘅行為，係「自己挖洞跳進去」

笑話一則

原來做唔到一地兩檢係因為基本法，咁咪叫啊爺釋法囉! 又唔係第一次!

有朋自遠方來

第一次重用呢個題目，今日見返前兩年認識嘅旅行團團友。之前搵咗間可以坐低慢慢傾嘅餐廳，談天說地，七點半到，食飯傾計傾到差唔多十一點。

雅興到，去咗尖東一趟睇夜境，香港夜境，真係幾時睇都咁靚，同場加映瞬間响天上面出現嘅牧夫座，好美滿嘅晚上。

每日一字 6

Idea - 中譯構想、主意

1430, "figure, image, symbol," from L. idea "idea," and in Platonic philosophy "archetype," from Gk. idea "ideal prototype," lit. "look, form," from idein "to see," from PIE *wid-es-ya-, suffixed form of base *weid- "to see" (see vision). Sense of "result of thinking" first recorded 1645.

睇得到，好理想嘅形態就係 Idea. 當然，實踐起上嚟嘅時候，可能會離理想好遙遠。

All great historical ideas started as a utopian dream and ended with reality.

Coudenhove-Kalergi, Pan-Europa, 1923

There are better alternatives

如果你有 690 億，你會做乜?

1. 派晒佢
   
   • 七百萬人每人都分到一萬
   • 但政府話，唔應該派糖
     
2. 用 300 億買起東隧同西隧，200 億買返領滙，另外 190 億做起樓 (公屋、居屋、市區重建)
• 500 億將基建、民生相關嘅項目變返做政府資產，好事一件。190億就算以發售價 5000 一平方呎去，可以起到 3,800,000 平方呎，如果一個單位 500 平方呎，就可以起到 7600 個單位。解決住屋問題就真係九牛一毛，但帶動就業市場不比起高鐵差。
• 但政府話：「大市場，小政府。」
3. 加碼去兩年前嗰 500億做醫療融資起動基金
• 成個醫療改革根本就係錢問題
• ...

唔知點解，香港政府明明大把錢改善迫切嘅民生，但又偏偏將 D 錢去起同國家政策接軌嘅高鐵。如果民生攪唔掂，嗰 D 基建其實就好似迪拜嘅哈利法塔咁，起好咗無人用，即係大白象一隻。

最差嘅係，點解一定要將爭議咁大嘅高鐵撥款過咗財委會先可以傾其他民生議題嘅撥款?

呢 D 咁嘅政府，如果係一個民主社會，一早俾人轟咗落台。

公民投票法

任何一個民意調查，都好難做到 unbias. 與其做唔知準唔準嘅調查，咁點解唔可以有一個公投法，俾大家投票決定有爭議嘅提目?

80後的網絡世界

Internet 曾經俾人覺得係一個虛擬嘅地方，總只係覺得上網係吹水唔抺咀嘅地方。第一代接觸網絡嘅80前，只係睇網頁、上 Newsgroup, 上 Forum. 80年後出生嘅第二代，係一個 Web 2.0 嘅年代，一切事情都人由 User Initiate. Facebook 嘅出現，將一切變成真實，造就咗網絡動員嘅力量，香港嘅政治亦都進入咗 2.0 嘅年代。

以前由政黨動員，一切有組織去做一件事，但 80 後嘅青年，對社會嘅不滿，似乎遠大於政黨所想像。就好似80年代嘅南韓青年咁，走上街頭，衝擊建制。每個一跟住自己嘅意旨去做，不受政黨所支配，欠嘅就只係一個領袖，將呢股力量再增大。

曾幾何時 50 後都有一股熱血，但時移世易，走上街頭嘅，係 80 後。70 後做唔到嘅，80 後做到。時世造英雄，專權响一個經濟發達嘅社會就只係街頭運動嘅催化劑。

2009 回顧

What's Noteworthy

• 第一次影國金煙火
• 好多保育之旅
• 維多利亞城界石
• 萬宜東壩嘅六角形石柱
• Earth Hour
  
• 香港熄燈
• 完成難忘嘅澳洲之旅
• 大堡礁
• 熱氣球
• Skyrail
• 跳傘
• 笨豬跳
• 難忘嘅星空 + 影到 Orion
  
• 今年夏天個天好清
• 响數碼港影到北斗七星
• 影咗好多日落
• 數碼港
• 廣州
• 白泥
• 影咗好多維港兩岸嘅夜景
  
• 多咗出街影相
  
• 去咗兩次海洋公園，日頭一次，夜晚一次，夜晚嗰次重要係免費
• 飲咗三餐
• 起咗 Shane's Production 嘅 Facebook Page
• 搵返好多大學前嘅作品擺咗上去
• 終於拎咗車牌
• 响香港見返 Burger King, 重食咗幾餐過口癮
• 跑咗一轉東區走廊
• 將日記 Blog 搬返去 compustar.blogspot.com, stardford.blogspot.com 處於冬眠狀態
• 買咗個旅行會藉
• 離開香港嘅念頭浮現
• 尊敬嘅音樂老師離逝
• 做少咗好多運動
• 將 Web Hosting 搬咗去第二度
• 申請咗 Flickr Pro
• 用咗 Picasa
• 再度認真玩 Photoshop
  
• 第一次 Upload 嘢上 YouTube
  
• 第一次聖誕 Party 食乳豬
• 成個 Harddisk 炒咗
• 發覺自己開始唱唔到 K
  
• 個 Blog 講咗好多社會事件
  

埋單計數 2010

今年結一結，全年回報 36.84%, 差過恆指 52.02% 好多好多。最差依然係上年 bought over 嘅股票，尤其宏利長期插水，拖累成個組合。新錢買股票反而幾好，升咗 80% 左右，可惜杯水車薪，救唔到幾多。

反而基金有唔錯嘅表現，88% 嘅升幅，差不多 recover 晒上年跌落嚟嘅。宏利個 aggressive fund 好差，只係升咗 32% 左右，反觀大中華基金嘅 61.73%, 上年蝕嘅全部賺返晒有凸。

今年反思問題: 係咁月供 ETF 算數?

聖誕聚會

Leo 搬新屋後，第一次上去，目的地係康城嘅首都。

呢排搭多咗地鐵，唔知係咪同聖誕節呢個喜慶節日有關，經常見到 0.02mm 嘅廣告。


Anyway, 呢個只係趣聞，今日嘅主要目的係去打保齡。一出車站，就係行一大段路，都行咗幾分鐘。原來行吓行吓，行過龍，要由第一座行返去第六座，咁我就成段路的距離行咗兩次...

去租保齡球鞋，竟然全場得一對 11 號鞋，俾我著咗，德仔無得著。Anyway, 保齡依然要打，實在太耐無打，一個鐘，四個人打兩場，啱啱好，小弟平均無 80 分，失禮晒。

上返去，諗住叫麥麥送，點知，太遍遠，唔送?! Shit! 打去嘅地方似乎唔係香港人接，因為個接線生好似唔係好知道日出康成呢個地方。大家亦開始諗夜晚嗰餐點算 -_-!!! 打去 Pizza Hut, good, 可以送嘅。

跟手打俾駱陽叫佢買定少少嘢食上嚟，大家開枱打麻雀之餘亦都開餐，甜品有 Leo 嘅生日蛋糕，正! 繼續打牌，Leo 嘅女朋友仔上埋嚟，開始整嘢食，聽落會整唔少嘢，似乎今晚唔駛叫 Pizza Hut 添。

一圈過後，準備開飯，嘩! 實在太豐富! 有腿蛋麵、西籣花、菇、鮮果沙律，感謝!


食完飯，唔想再坐响麻雀枱，睇電視算數。Leo 遛玩 Winning, 對於我呢個初哥，Leo 就變成教練，之後，成班人話要同我試腳，真攪笑!

再有無下次? 哈哈! 我諗要等康城再熱鬧 D 先。

沙龍

近兩次唱 K 都係同公司同事一齊唱，老實講，呢一年都好少聽歌，所以無乜點新歌，只係指定動作咁點一堆陳奕迅較早期嘅歌。但原來《七百年後》同一隻碟入面有另一隻唔錯嘅歌叫《沙龍》，兩次都俾啊歌神個 friend 點咗出嚟，第一次聽無乜感覺，但聽第二次就有衝動搵出嚟聽嘅歌都真係罕有。

今晚搵咗出嚟聽，搵埋歌詞慢慢嗒，真係好聽!

聖誕快樂

又到聖誕，公司攪 Party, 有嘢食又有獎抽。今年大家都太忙，有人要救火、生仔、睇醫生、湊女等，人唔太齊。6 點鐘，唔少人仲忙緊，唯有部份人開始住先。大家食完嘢，玩吓啤牌，就直接進入直路去抽獎。

今年抽到一盒酒，對於我呢個唔好酒嘅人，又多一個擺設。

但有同事有興趣，就交換咗份禮物，皆大歡喜。


抽完獎，都已經 9 點，之後一大班人唱 K, 真係盡興嘅一晚。

滋味蝦堡

好耐未食過麥當勞做正餐，夜晚响灣仔，一於去食個滋味蝦堡餐。正! 但為咗消耗過多嘅熱量，放棄搭車，行返屋企，35分鐘嘅路程，涼風陣陣，好舒服。

De facto Referendum

資訊科技入面，有一種標準叫 de facto standard, 即係唔係一個業界嘅標準，只係約定俗成，好多人用嘅一套方法，變成實際上嘅標準。例如，Microsoft Windows 係 PC 嘅 "standard" OS, 又或者當年 IE6 中 HTML 同 CSS 嘅用法，甚至係今時今日大家寫 AJAX 都會用到嘅 XMLHTTPRequest (XHR) 等，全部都係 de facto standard.

Referendum, 簡單嚟講叫公投，拉丁文解作: "that which must be referred"

兩個字 (三個字?) 加埋一齊，即係變相公投。

點實行? 五個立法會選區每區其中一個立法會議員辭職，以單一議提做補選政綱。如果辭職議員嘅得票總和多過半數，就即係大多數市民支持議題。

點解要辭職? 因為香港無公投法。但議員辭職後，政府要安排補選、點票等程序，五區全港嘅選民都可以去投票，結果有認受性。

咁咪好嘥錢? 請班高官都好嘥錢，佢做錯嘢時你又叫唔叫到佢下台? 生產力促進局一年收二億，但可以唔見 Server, 百幾部電腦。邊個嘥錢 D?

如果輸咗點? 輸咗就要認，市民唔願支持，辭職議員要承擔後果。

點解要投票? 因為越多市民投票，不論支持或反對議題，都可以增加該議提嘅社會認受性，政府無得再用 D 唔知點做嘅民調或咨詢去扭曲民意。而市民，只要幾分鐘落街去投票站，就可以表達自己意見。

P.S.: XHR 响今年 11 月係一個業界嘅標準。

吐氣揚眉

也許，香港足球沉淪咗十幾年。今日，東亞運奪冠，可謂一吐烏氣。