再度出發

最後一日，主要係執嘢，執咗啲之前無帶嘅嘢，例如中型腳架、剔撻舞鞋、電飯煲、同埋全境鏡。加埋托運嘅零食，原來咁又滿咗一喼嘢。

等 A11 嘅時間，落雨了，唔通連個天都唔鐘意我? 好彩雨並唔係太大，而且落車嘅地方係有蓋，唔會淋濕。响車上，見到迪士尼嘅煙火，過咗青馬橋，小睡咗片刻，睇嚟上機可以好好瞓。

去到機場，好快就 Check-in 咗，但係似乎旅行社無劃到個窗口位，最後坐返嚟香港嘅同一個走廊位，無得睇香港嘅夜景了。Check-in 完，唔想咁早入閘住，去咗無印睇吓，原來有零食賣，於是就買咗包爆谷，一打口，迎嚟嘅唔係爆谷嘅香味，而係有少少嘅燶味，味道還可以，但唔會有下之。

食咗半包，飲埋樽水，於是就入閘。沿途經過奇華，乜龍鬚糖可以賣得咁貴...


等上機嘅時候，又玩吓手機消磨時間，玩玩吓，已經係 Final Call, 要上飛機。安頓好行李，打咗個有意思嘅電話，Send 多兩個 Whatsapp Message, 就進入飛行模式，要起航了。跟住，空中服務員就派咗個飛機日用品包，太好了，可以刷個牙再瞓過。

起飛之後一個半鐘左右，係派餐時間，被空姐強制摮醒，都真係第一次，通常見你瞓咗就會 Skip, 咁俾佢攪一攪，將已經唔高嘅睡眠質素一再推往下限，差不多一個鐘醒一次。

十個鐘後，個人醒咗，一開個 Mon, 乜原來早咗成個鐘到，同埋原來條航線都幾安全


剩返兩個鐘，就去睇《美國隊長》，但到最後，係睇唔晒。落機拎行李，之前 Book 咗架車亦剛剛到咗，不過搵佢就搵咗一輪先搵到。第一次晨咁早坐車，日落就影得多，難得地影吓日出


唔使半個鐘就到目的地，道門鎖咗，早就早咗啲，但都要急 Call 房東。返到房，再瞓多幾個鐘，就出去買嘢食，Unpack, 做 Gym. 食過晚餐，一路上網，一路睇住個天變色，實在太靚


跟住，Jet Lag 發作，11點就忍唔住，上床休息咗一陣，12點醒咗去刷牙瞓覺。

遠水救近火之旅結束，見過想見嘅人，食過想食嘅飯，去過想去嘅地方，過咗一個特別嘅生日，成個旅程好有意義。休息是為了走更遠的路，人生嘅路向似乎更為清晰了。

星期五的日與夜

星期五，最後一日嘅返工日，趕住起個 Lab Manual 嘅初稿，午飯時間，開咗一個小會，就去咗同大家一齊飲茶。午飯後，去咗一轉銀行，就繼續起份 Design Spec, 幸好於工前可以完成，交待好一切，就收拾細軟，再一次將私人物件帶返屋企。

返屋企，換咗件衫，就出嚟等大家一齊去食晚飯。今次去銅鑼灣食德國菜，雖然 Book 咗七點半嘅枱，因為格種原因，遲咗十幾分鐘先到。而其他人亦响唔同地方做嘢，不過亦都陸陸續續到齊。德國菜，就當然係食䶢豬手同埋肉腸，外加多份排骨，美道唔錯。

食完晚飯傾過偈，轉去食甜品，去到大坑嘅小甜谷，其實都幾滿吓，唯有分階段分開座，遲少少再合體。一坐底，似乎有少少唔對路，心跳再加四肢無血到，就好似做 Gym 做過龍嘅感覺。但係一路行過嚟，其實都幾輕鬆，所以唯一解釋，係中暑，可能係因為濕度太高啩。好彩女徒弟有盒 Eclipse, 食兩粒，可能係心理作用，又或者係薄荷啲冰涼感覺，唔洗一分鐘，個人就醒神返晒。

嗌嘢食嘅時候，本來想點杯沙冰就算，但原來有另一個 Menu, 有刨冰，於是就當然有刨食刨。因為好多人嗌，制作亦雖時，所以都等咗一段時間。不過等係值得，因為除咗食得，重睇得。


至於好唔好吃嘛，其實一開始係無乜問題，只係如果响室內有次氣嘅地方食，係會越食越凍，跟住開始打冷震，如果係室外食，响大熱天時嘅情況之下，係唔會有問題，但就要忍受响炎夏中等待嘅時間。但係若然係兩個人食，我諗係會啱啱好。食完冰，傾完計，已經差不多一點，係時候埋單散水。

散水之時，準備搭 5B, 好準時地最後一班車响身邊經過，就停响前面嘅站度，但經過中暑同食冰食到打冷震，唔想再上天橋過馬路追。放棄去搭小巴之時，同一架巴士又响小巴前嘅一個站出現，二話不說就飛身過去了。同師弟一齊搭車，傾咗一陣偈，因為唔塞車嘅關係，好快就到站了。

行返屋企嘅時間，當電車站見到架未見過嘅電車，原來係保養修專用，第一次見。


兩點鐘，第二日要走，但重未執嘢，唯有盡早瞓，聽日以執嘢作為行程。

小晚聚

返嚟兩個禮拜，想同徒弟仔坐底傾吓計咁，但响公司就似乎唔太傾得到，於是就約佢出嚟食飯。基於佢係一個大忙人嘅關係，好難得佢話星期四晚得閒，但似乎佢都真係太忙，差不多要八九點先走得，正值三號波兼大雨，唔想四圍搵，就去咗食早餐。

不過因為同公司有少少距離，都行得幾熱吓，大家都已經濕晒，我都要入洗手間去洗一洗塊面。Order 完，大家就傾吓計，其實食乜都無乜所謂，係搵個靜少少可以坐得耐啲嘅地方咁解啫。傾吓呢幾個月嚟去過嘅地方，做過嘅事，睇吓大家影嘅相咁，不奕樂乎。

可惜第二日又要返工，就好似灰姑娘咁，十二點左右要離開，送咗徒弟仔到中環街市，佢有佢去中環站，我有我行返屋企了。

又書展

靚仔徒弟話去書展，因為卓小姐出新書，都想去買返本。於是就約埋 Snoopy 仔同 IVE 仔，呢個組合，就好似係 Burger 組合咁，因為就係三個人去咗銅鑼灣食 Burger. 今次，係去食 Burger King. 去食嘢先，係為經歷過上年去到好夜先食到晚飯，當然又係 Whopper Junior 餐，正!

食完嘢，就坐地鐵，去到灣仔差不多八點，諗緊點樣唔使排長龍先入到去，但行到去天橋，唔使諗了，因為無人排。入到去一樓，買咗本《大粵港諺語》嘅 Poster, 同埋《笑死朕》嘅書，再慢慢行，去到明報攤位，卓小姐嘅事就响當眼位置，但係一揭本新書，係導演筆記嚟，感覺唔值得買，Skip 咗，於是就返轉頭去買咗本練肌肉嘅書。本書都幾實用，但係感覺好重，唔太想帶過英國，但既然有空位，就用佢嚟取代卓小姐嘅位置。

之後又四圍行，有本《圖解讀心術》嘅書，讀心術都有得圖解? 但英文係 A Guide to Psychology, 即係都係普通心理學嘅嘢，睇個內容，其實係 Behavioral Psychology, 見幾有趣，銀包又不小心地打開了。

今晚嘅收獲除咗三本書同一張 Poster, 重有一個小小嘅意外收獲，就係發現心理學嘅電腦人嘅關係其實都幾緊密，無論上一代，呢一代，同下一代都係。

最後雖然話十點收，但係都行到十點半，一個愉快嘅星期三晚上。

Amazing Birthday

話說荷比之旅最後一日，派派 B 剛好出世，三個禮拜後，星期日終於見到真人。雖然同媽咪一樣係巨蟹座，但係表情動靜就十足似佢老豆，希望佢健健康康快快樂樂咁成長。

上嚟探 B 嘅重有另外幾位友人同埋屋企人，三個豆釘一見面就玩得不亦樂乎，甚至一個氣球就可以滿足到佢哋，大人們就傾偈影相同食好好味嘅豬腳薑。之後就係簡單而隆重嘅唱生日歌、吹蠟燭儀式。至於吹蠟燭嘅嘢，當然係交俾小朋友做，口水嘅嘢就少不了，以後大人們就要聽晒小朋友話了。

之後就去咗飲茶，離開前，友人要帶諾諾去咗洗手間之後，細佬又想去，難得佢又唔驚我，就帶咗佢去洗手間搵啊爸，可惜搵唔到，返埋枱，又再搵過。原來洗手間有一格係親子格嚟，所以頭先見唔到。咁啱諾諾同昭昭都去完，就交俾我托管了。跟住神奇嘅事情就發生咗，諾諾話玩氹氹轉喎，於是就同昭昭一齊玩返幾十年無玩過嘅嘢，轉咗幾個圈，細佬攪掂，返埋位等昭昭老豆。

睇住啲細路無憂無慮天真無邪嘅樣，正能量有如湧泉，係最好嘅生日禮物。

Amazing Weekend

今日去 Sogo 買少少嘢，再去 Sony 客戶服務兼陳列室，配返對耳筒嘅抗噪膠塞。行晒成個陳例室，都唔覺有得賣，於是就問吓個職員，原來係維修嗰邊，就㩒咗張飛仔俾我等叫號碼。去到客戶服務員到，問我要大碼定細碼，二選一之下㨂咗大碼，但原來都真係幾大吓，不過都舒服。因為唔見咗張買機嘅單，順便問埋就咁做個防水測試幾錢，都要成百五蚊，換膠邊另外收費。但今晚有約，都係遲啲有機會再做。


反正時間還早，於是又去陳列室嗰邊逛吓。有好多相機玩，亦都砌咗唔少場境出嚟俾人試影。試吓相機之餘，亦都試咗自己部手機，質素我諗唔需要懷疑。



有興趣玩嘅嘢都差不多玩完，都係提早出發先，早咗半個鐘到火車站，就去咗附近嘅大家樂坐一陣，唔使等太耐就齊人，打的去目的地。

其實已經有先頭部隊到咗，一切差不多準備好，就開始玩起 Jenga Extreme, 難度還可以，之後又玩起鋤大D嚟。跟住就係豐富嘅到會，好正，好多嘢都想食，尤其係久違嘅女王啫喱。食飽飽後，玩起 Uno 嚟，跟住玩新遊戲: Rummikub. 好難玩，好嘥精神，如果係用 Computer Science 嘅術語嚟講，似乎係 NP-Hard 嘅問題，玩咗一局，大家都幾攰吓，就去咗睇 Poker 比賽。

原來响我哋玩緊 Rummikub 嘅同時，亦都上演咗美男廚房，煮咗啲好美味嘅雞翼。


除咗美男雞翼，重有女王嘅甜品，番薯糖水同埋西米露。跟住，就係七月生日 Party, 有至愛嘅芝士蛋糕，雖然會爆 Quota,  但都唔理得咁多，照吃可也。

離開時大雨，要等一陣，因為距離嘅關係，Call 唔到的士，本來想行返去火車站，咁啱又有幾架的士上咗嚟，當然唔放過佢哋。搭火車途中，美寶 BB 竟然提議打機? 我睇係可以嘅，於是就好積極咁搵人一齊打。

又俾佢搵夠腳，就去咗網吧打 Left 4 Dead. First person shooting game, 係我最弱嘅遊戲種類，但不玩白不玩，就用最簡單嘅方法去嘗試享受，就咁過咗愉快嘅兩個鐘，亦係愉快嘅一晚。

即興之夜

今日响個客度開完會，一走出 Office 就見到幾靚嘅雲境，心情靚靚，走去黃金買藍芽 Keyboard, 不過無啱嘅顏色，最後無買到。搭巴士返香港島，個海旁境太靚，不過唔係坐响窗口位，影唔到。



本來想搵人食飯，但係又好似無乜人得閒，諗住落298𥄫吓有無啱洗嘅 TV Tuner, 跟住又有人話飲嘢，都係返公司一轉先，起碼要攪掂份 Numbering 錯咗嘅 Document. 攪咗成個鐘，終於攪掂，亦都有人一齊去食飯。

食完飯，等師弟其間，就返咗公司一趟，同 Snoopy 仔傾咗陣計，再去睇吓其他人起個 Training 場，過多一陣，師弟 Ready 了。

師弟出咗車去天后站嗰頭，一間甜品店好多人排隊，質素肯定唔差。等食其間，見師弟對自己嘅右手手臂咁自豪，就忽然想睇吓近一個月無做到 Gym 嘅效果。拗一拗手瓜，果然係差咗，可以支持到，但就反擊唔到了，玩完右手，少不免玩埋左手，結果太壓倒性。驗證咗無做 Gym 嘅後果，返到去要再努力了。玩完之後，甜品亦都到咗。

食完甜品，本來都諗住返屋企，點知師弟多口問咗句想去邊，見天色唔差，想去睇星，就近近哋，衝口而出話去石澳，點知佢又肯聽我老點，早知話想去萬宜水庫啦!(笑!) 去到石澳，本來想開個玩笑 Tag 埋師弟，但為咗唔好毁佢一生幸福，放過佢。

嚟嗰陣，港島北望過對面海係無乜雲，但嚟到香港島嘅南端，風景又大不同，似乎座太平山擋咗唔少雲。於是响有雲、有月光、同埋有燈光下睇星。其實已經好過市區好多，都睇到唔少星，開咗個 Google Sky Map 幫手認星座，天鵝座俾嚿雲遮咗一半，天龍座認到個頭，但要見埋個身就好勉強，北極星嘛，燈光太強，都係放棄算數。

因為太即興，無帶到相機，唯有用手機影相，而手機影相嘅夜景 Mode, 就令到影月光好似變日頭咁。


不過影低層雲就似返肉眼見到嘅嘢，重 Colorful 咗添!


天氣太熱，都係閃人好啲，今次著皮鞋落沙灘都算經典，好彩對鞋防水，去洗手間沖一沖對鞋，走得!

整電腦

好耐未整過電腦，返到嚟部機就壞咗，於是就睇吓發生乜事。

第一日，係咁易掃吓塵，開到機，好似無事。
大前日，又開唔到機，唔通火牛壞?
前日，開到機，但係最後自己熄咗。
噚日，買咗個火牛返嚟，情況無改善，拆件掃塵。反正掃開，拆埋粒 U 扇，發現重災區，終於可以正常開機，但係會自己熄返。搵吓搵吓，有機會粒 U 過熱，於是當開到機嘅時候，就入 BIOS 睇吓，100度嘅高溫，凝視住個溫度之際，佢又熄咗，似乎買散熱膏。

今日，放咗工之後，走去買散熱膏，原來有一包細細包獨立包裝，唔駛驚用唔晒。再度拆機箱，拆 U 扇，吱好散熱膏，發現原來重有隻 IDE Hard Disk 無插到，於是順便插埋落去。跟住一開機就話 Windows 有 File Corrupt 咗，要入 Recovery Mode. 之後，就只可以用 Temporary Profile Login, 奇怪... 似乎有啲嘢攪錯咗。

再拆返隻 IDE Hard Disk, 情況無改善。於是就整隻 Recovery Disk, 噢... 隻 OS Disk 去咗 E Drive, 應該係隻 IDE Hard Disk 霸咗個 C Drive 位，所以 Load 唔到個　User Profile 呢? Google 大神話要改 Registry 先可以改 Drive 名，但改完無乜反應，似乎個 Registry 係 Recovery Disk 個 Windows 嘅 Registry.

最後搵到方法改 OS Disk 嘅 Registry, 改完，攪掂，攪咗三個鐘，親愛嘅 Desktop 終於復活了。

呢個故事教訓我哋，唔好手多...

PMQ

返咗嚟香港，同師弟食咗個 Lunch 之後整一整個頭，見有時間，週圍行吓。

遇然發現原來地鐵站附近多咗間 Burger King


跟住再行過少少，睇吓原 Fitness First 變咗啲乜，原來係做咗畫廊，唔通做藝術真係好賺過做健身?


剛好有個展覽，入去𥄫𥄫


其實都無乜嘢睇，只係兩個裝置藝術加幾幅畫


呢三個應該唔係展覽嘅一部份，只係普通嘅吹風機


約咗靚仔魔術師嚟 PMQ, 見時間差不多，就上咗嚟先


一入嚟就俾1600隻熊貓迎接


响其中一個地方，搵到呢兩個 Poster, 但就唔見有 M


以前嘅信箱


搵到 M 了


原來重有好多幅


經過介紹舊警察宿舍嘅展覽




啲舖頭仔都幾得意

可以用一百個唔同方式計設骷髏頭，都幾強

又有用水墨計設嘅 Poster

同埋用凳做主題嘅裝置，確實唔錯


靚仔魔術師到咗，但係好多舖頭都已經閂咗門，所以只係行多一陣就要走。

啲熊貓亦都要返屋企



呢個櫃得呢一家人咋


晚飯途中，靚仔魔術師當然唔少得表演一吓魔術，但第一個就失敗咗，其他都合格。食完飯，本來去搵甜品食，點知靚仔魔術師話想去機舖表演一隻 Game, 就去咗附近間機舖，點知我就中伏了，被偷影了。


可惜影唔到正面，因為個髮型師幫我吹個頭都幾爆炸性吓，已經唔會再出現了。因為搵唔到甜品，於是就送咗靚仔魔術師搭地鐵，我亦都飛上巴士涼冷氣了，香港都真係好鬼熱。

Unfriend

Facebook 本意係用嚟結交朋友，但當一堆一堆嘅廣告、遊戲嘅邀請出現咗之後，佢不外乎係一個資訊平台。所謂 Add Friend, 就只不過係 Subscribe 咗你朋友嘅一啲資訊。

既然佢只係一個資訊平台，咁 Un 唔 Unfriend 其實係無實質意思。老實講，朋友好多時都係同自己有差不多意見嘅人，當然隨住時間嘅改變，大家嘅意見都會有改變。我個所謂 Friend List 其實由愛國愛港嘅人，到日日鬧政府嘅人都有，相比起同自己相近意見，我更加珍惜有不同意見嘅朋友。

作為一個讀過心理學嘅人，清楚知道乜嘅係自找藉口嘅三個機制: Confirmation Bias, Cognitive Dissonance, 同 Motivated Reasoning. 有不同意見嘅朋友，起碼可以減少呢三件事發生，雖然有時會睇到嘔血，不過又有時會學到新嘢，有時甚到可以 Proof by contradiction, 令自己嘅理念更清晰。更何況，多討論，先係尋找真理嘅道路吧!

所以，如果有人因為意見同自己唔同，而去 Unfriend 人或者叫人 Unfriend 自己，咁只可以話，响 Facebook 玩 Unfriend, 認真你就輸了。

網戰

雖然有少少 Out, 但都值得寫，亦嘗試用生活少少嘅例子去寫。

DOS: 令到銀行做唔到生意
DDOS: 叫一班人令銀行做唔到生意
HKIX: 去唔同銀行嘅馬路
DNS: 俾客人攞飛仔等排隊嘅機器 (想像吓係全香港嘅銀行都要响度攞飛仔), 張飛仔有銀行嘅地址，香港係有自己一套專門負責 .hk 嘅飛仔機。

要令銀行做唔到生意嘅方法有三個:

1. 叫一班人罷住條馬路度
2. DNS Flood Attack: 叫一班人係咁攞飛仔
3. 直接去銀行攪事:
1. SYN Flood Attack: 叫一班人去銀行，櫃台問佢哋想做乜，全部人唔答，令櫃台呆等
2. HTTP Flood Attack: 叫一班人去銀行，全部話要唱唔常見嘅外幣 (南非幣、盧布等), 因為唔常見，無响櫃桶度 (技術上叫 cache)，就變咗要多啲人手同時間去拎外幣
3. HTTPS Flood Attack: 叫一班人去銀行，全部話要開保險箱攞錢，過程已經夠麻煩，之後可能要唱外幣
4. Amplification Attack: 叫一班人去銀行，全部話要唱一千蚊一毫子，浪費人手亦嘥時間

跟住 CloudFlare 其實响好多地方都有 Office, 銀行將响部 .hk 飛仔機嘅地址改去 CloudFlare 嘅地址，CloudFlare 就可以做嘅係應付去銀行攪事嘅人，包括:

1. 查吓身份証或者護照，睇吓佢係咪可以入銀行先
2. 問咗佢哋要做乜先
3. 唱一千蚊一毫子嗰啲叫佢過主

真係正常嘅客人，CloudFlare 就做呢個客人嘅代理人 (Proxy)，幫手去真正嘅銀行櫃台做嘢。

咁你依家睇得明呢幅圖嗎?

困獸鬥

有人話2003年遊行成功迫政府撤回廿三條，忽略咗自由黨先係關鍵。當年自由黨為咗第二年嘅直選考量，先唔再支持政府，政府唔夠票，唯有撤回。今時今日，明年無選舉之餘，自由黨亦都成為功能組別黨，即係唔再需要受民意左右。

响科學嘅角度，一個實驗只要成功得出同一個結果三次，個結果就係 well proven. 咁如果和平遊行咗十幾年，政府都無啋過你，其實就已經 Prove 咗呢個政府係唔怕民眾。即係個妹仔成日俾大少摸手摸腳，妹仔次次都只係好溫柔咁叫大少唔好，大少何止唔會停，摸多幾次就肯定會變本加厲。

結論係，九萬人又好，五十萬人又好，七百萬人又好，和平嘅遊行示威抗議，根本就無俾過壓力政府。數人頭，玩數字遊戲，只係追求量嘅改變，但本質不變，無用。即係去買 A 貨，買再多嘅 A 貨，都不代表你有擁有原廠品牌。再者，當你真係認真咁數過一次人頭，你會發現原來大會宣佈嘅人數，都真係幾脫離現實。

有人問點睇今次遊行，基於上述原因，只可以話大家行完打完卡，聽過遊行人數之後，第二日只會一切如常。呢個係大家引以自豪，和平理性非暴力抗爭嘅結果。例如啲半桶水嘅和平理性非暴力佔領行動，最後就只會俾執法人員諗出對策，防止事件再重演，君不見立法會審議東北發展前期撥款就係咁嘅情況，呢啲咪叫累街坊囉!

又有人問香港人點自救，之後可以點行，我會反問返，你覺得西方國家嘅民主係點嚟? 遇到啲咁嘅情況，2003年已經暴動咗啦! 重會拖足11年? 從來我都唔會話香港人係港豬，因為我相信受過教育嘅人，做事都經過自己思考，考量過後先去做佢覺得啱嘅事，只係一班人覺得自己做得啱嘅事但個後果並不如佢哋所想。有乜嘢人民就有乜嘢嘅政府是也。唔好講其他，11年前，點解可以開到兩條行車線，今日有人衝出東行線，點解大家只係企响度睇，而唔係一班人衝出去? 要自救，就先要諗吓自己可以做到乜，總之，乜都試咗先，做吓先，如果每人都肯行出平常嘅框框，香港就會好唔同。

最起碼，當出現稍為有衝擊場面嘅時候，唔好走去鬧衝擊嘅人暴力，因為比起外國嘅抗爭，香港嘅衝擊根本係蚊比同牛比 (警察嘅暴力就真係同外國有得 Fight, 議會暴力更力有過之而無不及)。再者，佢哋嘅衝擊係為啲乜呢? 咪為咗大家! 大家唔肯做，或者做唔到嘅嘢，有人肯幫大家做，真係多謝都嚟唔切講啦! 有時啲嘢，真係可以出少句聲當幫忙。

每晚新聞前播嘅國歌頭兩句係乜? 如果香港人同中國人都做到，咁我諗香港同中國都會不一樣。

P.S. 對於做警察嘅朋友們，我只可以講如果你覺得你對手無寸鐡嘅市民所做嘅事對得住你拜嘅關二哥嘅話，你就即管去做啦! 正氣嘅關二哥會保佑你!

十一年前

2003年，沙士剛過，著住黑衫，約咗友人第一次去維園，响球場其間，遇到唔少中學同學。帶住口罩，過咗唔知幾個鐘，無行上政府山，拖住疲倦嘅身驅，沿大馬路，行返屋企。之後7月7號，放咗工，因為廿三條，又去圍過立法會。

之後好似再去咗一兩次七一，但最後嗰次，我發現香港人係唔知行嚟做乜? 點解人數會少咗咁多嘅呢? 乜普選嘅訴求實現咗喇咩? 如果係漫無目的出嚟行，之後返屋企，即係白行，對唔住，你行埋我嗰份，從此以後，無再行，無再集會。

或者個身份有少少改變，由參與者成為記錄者，即係得閒嘅時候會影吓 Time Lapse, 數人頭咁。

十一年過去，又係一代人嘅更替，友人、同學都結晒婚生晒仔，我亦都已經身在異地，依家已經係八、九十後嘅世代，至於係唔係都做埋啲白做嘅事，就等佢哋自己決定了，唔好俾上一代嘅人影響到，去揀適合自己嘅 A 餐或者 B 餐。

抗爭不是在請客吃飯。