關島之旅 - 潛水

大概9點左右，瞓到自然醒。梳洗完，叫醒徒弟仔去食早餐。因為間房 Upgrade 過，可以上樓上間 Sheraton Club 度食早餐喎。不過選擇唔多，無乜嘢食，話10點完，就真係10點鐘有人嚟收晒所有食物同飲料。食飽後，就响個 Club 度遊蕩吓，其實無乜嘢玩，都係影幾張風景相咁就走人。

跟住入房執換衫搽太陽油，Call Billy 預約晚餐，再落 Lobby 等潛水公司嘅人。間公司叫小康潛水，係台灣藝人有份投資嘅，所以用咗佢個名做生招牌。教練到咗，今日潛嘅人唔多，連埋我哋就只係5個人。先去拎潛水用品，Which is 係同 MDA 借嘅。不過佢借嗰套潛水衣似乎細咗一個碼，呼吸唔太𣈱順。

第一潛係响 Blue Hole, 一個可以去到五十幾米嘅地方，水好清，不過因為個牌嘅關係，只係潛到去19米左右。潛完之後，一上水，就要拉開拉鏈抖氣。本來以為徒弟仔响水底無乜嘢，但一返上嚟就嘔到七彩了。而我對鞋，因為放錯位置，俾其他上嚟嘅人滴到濕晒，似乎返酒店之後要攪一輪。大家休息咗一陣，就去第二個潛點。再潛水之前，教練拎咗啲腸仔喂魚，應該係沙甸魚嚟。第二個潛點叫 Gab Gab 2, 水濁少少，但能見度唔差，最後重見到海龜添!

夕陽西下，離開前影返幅相留念

返到去酒店，Billy 已經到咗，好快咁返上房開缸水沈潛水用品就即閃。今次去 The Beach 食 BBQ, 係《惡作劇之吻2》嘅拍攝場地的說，不過對我哋嚟講無乜分別。

燒燒吓，又有人出嚟表演。徒弟仔似乎好有興趣呢啲表演，對於鐘意睇 Show 嘅我，其實驚喜不大。不過，個細路仔玩火嘅表演都 OK 嘅。

食完嘢，叫 Billy 車我哋去買手信，去到間 JP Superstore, 本來想買名信片，但無得賣，徒弟仔就週圍逛吓，買咗差唔多成80蚊手信... 真係有咁多人要送... 之後再去到一間酒店嘅士多仔，有名信片，但唔靚又唔多，買幾張靚嘅就算，Billy 話我哋間酒店都有間手信鋪可以睇吓。去到手信鋪，啲名信片都係差唔多，都有一兩張新嘅，似乎關島唔係咁想你買名信片，今次唔可以大規模咁寄了。

返到酒店房，因為第二日又唔駛太早起身，攪玩啲潛水用品同我對鞋之後，兩隻夜鬼沖完涼就傾開計嚟，傾到兩點咗又就瞓了。

關島之旅 - 出發

之前同細我4年嘅師弟去旅行，行為大概都預計到，今次係同細我9年嘅徒弟仔去旅行，哈哈!真係大開睇界!

11點幾嘅夜機，五個鐘嘅機程。Check-in 完，要搭 Shuttle 去另一邊嘅登機大樓。到咗登機時間，去一去洗手間，咦?! 無人排隊上機嘅? 是但，於是就到咗登機第一人，之後先至有人陸陸續續排隊上機。上到機之後，習慣上問下有無睇罩，又有喎，但耳塞就欠奉了，而徒弟仔就嚟張機上合照外加一張自拍。

飛機都幾熱，就好似北風與太陽嘅故事咁，要除咗件褸，基本上，直到飛機離開跑道，架飛機都係咁熱。衝上雲霄後，過咗維港，過埋雲層，徒弟仔就去睇星，傾咗幾句之後，我就戴上睇罩同自備嘅耳塞就瞓。可惜好景不常，前排有個 BB 仔，俾佢啲喊聲嘈醒，喊到落機，最後只係瞓得嗰3個鐘左右。

落機過關，响飛機上面，個空中服務員剩係派咗入境表同申報表，無派到落地簽證表，於是，成機人都要响過關嘅地方填表。排隊排咗條超慢嘅龍，最早幾個出機門，但最遲幾個先過關。出閘之後，導遊呢? 唔覺唔覺，四圍搵之際，突然有個中國人接近，哦... 原來以為會係英文人接機再加個好 Hea 嘅 Local Tour 就掉我哋返酒店嗰啲添! 位導遊係叫 Billy, 係出嚟做嘢以來識嘅第一個 Billy.

Local Tour 先去過睇自由神像，可惜天氣不佳，突然落大雨，大家都匆匆忙忙咁返上車，Otherwise 可以留耐少少。

之後經一經過 Governor House, 跟住上山睇炮台

再去西班牙廣場影睇教宗像

最後去情人崖

回程時去埋 K-Mart, 相信好多香港人(包括當年讀大學嘅自己)第一次行美國嘅起級市場嘅時候，反應都會好似徒弟仔一樣，一個「大」字，重有衫褲鞋襪、戶外用品、電子產品、遊戲、DVD/CD 等等响百佳惠康見唔到嘅嘢買，睇都睇到嘩嘩聲，不過因為時間不多，我就趕鴨仔咁趕，買完嘢就俾錢，再食個簡單嘅早餐就去返門口集合，最大嘅收獲，係買到蜜糖芥末味嘅 Pringles. 上車之前，徒弟仔不忘影低佢覺得攪笑嘅 Additional Parking on the Roof 嘅標示。

跟住就送各團友返酒店。因為我哋唔係响主要酒店區嘅 Sheraton, 所以最後一批先到酒店。亦因為呢間酒店响 TripAdvisor 嘅評價唔差，似乎好多人住，所以無得 Early Check-in... Anyway, 啲行李寄存咗入响酒店，俾咗小費 Billy, 再訂埋夜晚嗰餐，Billy 再送我哋去 GPO 行吓。其實去 GPO 嘅唯一目的，係買張電話卡上網，廿蚊美金無限上網用到五日。响個店員幫我 Activate 張電話卡嘅同時，徒弟仔去咗 Calvin Klein 睇嘢，不過我攪掂張卡後入去無耐佢就話睇完了... OK, fine, 再行吓其他舖頭。

行到咁上下，去 Ruby Tuesday 食 Lunch, 聽聞好食過香港咁。叫咗一個 Burger 同一個 Pasta, 之前嚟咗份 Complimentary 嘅 Crab Cake. 但似乎份量太多，食唔晒，打包走。無食過香港嘅 Ruby Tuesday, 唔想太 Comment, 但咪又係美式西餐。食完飯，就搭巴士返酒店。

間酒店十二點 Check-out, 兩點 Check-in, 返到酒店後只係一點，問完都係話無房，唯有先逛吓酒店嘅設施，徒弟仔睇中咗個無敵海景泳池，我就只係想搵吓間 Gym Room 响邊，之後就响 Lobby 等吓，徒弟仔因為成程機都無瞓過，唔使一陣就响梳化瞓著咗。玩咗一陣手機，見到中學同學都係剛到關島，Ping 吓佢，原來响 Fiesta 度，似乎暫時無緣相見。時辰到，Check-in, 拎行李，叫醒徒弟仔，上樓，入房，Unpack 充電工具同電腦，Set 起個場，我就補一補眠，徒弟仔就去咗無敵海景泳池。

瞓咗個零鐘，走去無敵海景泳池搵徒弟仔，嗌咗聲聽唔到，算，回頭一睇，好大條彩虹，但無帶相機，於是乜都無影就走返入房。

時間尚早，Set 起部相機 Time Lapse, 再上吓網咁。差唔多時間，徒弟仔返嚟，沖身準備食晚飯。Oops, 將 SD Card Full 晒，Time Lapse 完結。離開酒店前，潛水公司話第二日嘅潛水係下晝先潛，Lucky! 可以唔使一朝早起身了!

晚飯其實係其中一間酒店嘅自助餐，有海鮮，有㕑師幫你 BBQ, 有土著跳吓舞咁。海鮮一定 Good, 不過最好食係啲壽司，Cheese Cake 夠甜，Texture 合格，但唔夠芝士香。另外有一隻叫 Chamorro Punch 嘅飲品，芬逹出嘅，味道又唔係太藥水，好似細細個食嗰啲冰條咁。

食完飯之後，返酒店做 Gym. 本來想捉徒弟仔落泳池試吓個 GoPro 頭帶，但可惜落大雨，佢又攪到自己唔係好見到嘢咁，最後佢自己响浴缸度自己試。

做完 Gym 返到房，開咗缸水，但原來未試... Anyway, 試完後沖涼，再準備潛水用品，發現原來有支電筒，但似乎太耐無用，有粒電塞住咗，所以得物無所用。攪多一陣大家都攰，一早就瞓覺了。

雜記 5

今日先發現，雜記係無 Post 到上 Facebook. 或者都係比較私人嘅事，所以呢篇都係唔 Post.

噚日搵咗師弟去試吓揸車，但攪到差少少撞埋欄到，好彩有驚無險，所以去關島都係唔好揸，但係似乎要為四個月後嘅事要準備。之後响 Coffee Shop 度傾咗一陣計，再自己落灣仔買少少嘢。

今晚同靚仔魔術師响佐敦食飯，但記錯車站位置，所以遲大到。為咗幾隻煎餃子食咗個好大碗嘅拉麵，聽日要努力做 Gym 了。食完嘢，一齊去逛吓，睇吓玩具咁，竟然俾我見到有六神合體嘅 Mouse Pad, 都真係 Rare Item 得好無道理，卅年前嘅卡通，電腦重未普級，點解會有 Mouse Pad, 真係諗唔通。

原來唔經唔覺已經到咗旺角，入到去信和先發現原來係信和... 除之外無乜新嘅發現。再去 Chic 之堡睇魔術，支 Vanishing Pen 唔錯。

最後到咗兆萬，One Piece 公仔大跌價，路飛都只係40蚊隻，於是就買咗隻送俾大學時期嘅兄弟。

見到一篇講巨蟹座嘅文章，係咪講緊我呢?

巨蟹天生就會遠離那些人品不好的人，而且會離的遠遠的，不過不是瞧不起對方，而是想要減少一些不必要的麻煩，雖然巨蟹有很多很多的缺點，但優點也是很多的，比如善良，有原則，不喜歡拍馬屁討好別人，不習慣說好話（把你當朋友的話往往會直言你不對的地方），巨蟹很特別的地方是看似重面子，但有時候卻又沒那麼在意，讓人摸不著頭緒。

本來下面張圖想寫一篇以《男人的浪漫》為題嘅文，但唔寫出嚟似乎啱 Feel 啲。

香港畫廊周

趁住香港畫廊周，又行吓附近嘅畫廊，發現咗幾間平時無行過嘅畫廊，不過就無乜大驚喜。

行到 G.O.D. 附近，對面間舖裝修好，外牆較果幾好，影咗幾張相。我諗如果無咗個終止路牌，話响外國影都有人會信。

跟住幅地圖行吓行吓，行到去中環畢打行，樓上差唔多層層都係畫廊，質素重要係唔差嗰隻，原來藝術真係可以賺錢的說。

The Making Of: Cover Photo

差唔多一個月無 Update 過 Cover Photo, 今日响徒弟仔個位度見到幅上個禮拜影嘅相，不論構圖同人物都幾得，好快咁响腦海中 Crop 咗出嚟。

返到屋企，先由 Portrait Crop 做 Landscape 再 Upload 跟手 Reposition 返啱個位，同心目中諗嘅一模一樣，掂呀!

魔術TV Show

我唔係話睇唔起香港嘅魔術師，但剛剛上 myTV 睇咗第一集《街頭魔法王》，嗰浸媒除真係大得離譜。做街頭魔術，係要由個魔術師主導，唔使班主持人响週圍攪氣氛㗎囉! 除非你覺得個魔術師唔夠料，表演嘅嘢唔夠驚喜啫，得嘅話觀眾自然會圍圈睇，呢啲叫 Showmanship 呀!

一台獨大就係咁，攪邊飯死返飯。

日常之Gym Room

病咗一個星期，無去做 Gym, 今日開始返，已經有少少退步。做唔到嘅時候，可以選擇做少一 Set, 又或者抖耐少少，再唔係，坐一陣，遲少少先拉筋等等。勉強無幸福，身體對自己最誠實，經驗似乎就係教識咗我去聆聽身體嘅狀態。始終做 Gym 嘅目的，係要健康，唔係為咗做而做。

東京 Band Wagon

本來見佢收視嘛嘛地無睇，但有龜利和也，有少少睇頭啩，於是就睇咗。係單元劇嘅組織，講愛的說。我諗，鐘意睇《深夜食堂》或者係《深夜烘焙坊》嘅人會鐘意。

多事之日

之前整開頭嘅 Stylist 轉咗去另一間响銅鑼灣嘅 Salon, 今日下晝又去整一整。當然，一整又要兩個幾鐘，不過同其他銅鑼灣嘅 Salon 唔同，無乜藥水味，不過啲雜誌好似都係一兩個月前。今次就俾 Stylist 自由發揮，唔記得要話佢聽唔好剪到咁短，最後真係好似太短。

差唔多6點，食少少嘢，繼續今日嘅行程，先去皇室堡睇吓有無 GoPro 嘅嘢啱買，可惜無。再落 188 拎幅新眼鏡，因為之前唔見咗幅太陽眼鏡，今次配咗幅可以 Clip 落去嘅。至於點解唔整幅變色鏡，因為一來驚佢兩年後氧化，二來有時影相嘅時候想用清鏡嘛。不過幅新眼鏡加個短髮 Look, 略嫌稚氣太重，應該要放假先會戴。

之後行去 298, 再睇睇有無嘢啱買，目標係潛水用嘅 Filter 同埋車用電話座同 Lighter Charger, 外加一張 MicroSD. 部份有嘅，但先幾日去深水埗睇過，比較下略嫌貴咗少少，都係再去深水埗一次過買晒啲嘢佢。

搭地鐵，話咁快就到，成條鴨寮街，行過。行到最後，先入手 55mm 紅濾鏡，再見到有 Z1 套，唔貴，買個嚟試吓，再攪掂埋個 Charger. 跟住直入黃金，買 SD Card 同電話座。全部嘢三舊左右，尤其個紅濾鏡，本來預咗要幾百蚊，點知只係幾十蚊就攪掂。係張 SD Card 貴，但32GB同Class 10, 無計。

可惜無 GoPro 潛水用嘅 Filter, 唔係會開心好多。一攪就攪到八點半，本來想用兩個下晝做嘅事夜晚做埋，充實得很，聽日可以大覺瞓了。

師徒

今個星期嘅《Legal High 2》, 講到古美門要黛離開。我諗，呢個亦係古美門對黛嘅一個肯定，即係話佢學滿師。雖然短短嘅一幕，但好明顯係一粒催淚彈。

曾經有一位中學老師話過，一個學生如果同老師一樣叻，只係代表個老師合格。我諗，每一個做師傅嘅理想，都係希望徒弟青出於藍。

上堂5

唔經唔覺，上個禮拜五上咗第5堂，可能習慣咗，小腿無之前咁攰，亦都掌握到少少竅門，無之前咁唔協調。話雖如此，記憶力始終有限，呢排响街等人或者等 Lift 嘅時候，都會嘗試小步幅咁練，希望用肌肉去記憶，代替腦部記憶。今堂啊 Sir 玩轉身，似乎同跳舞機一樣，係另一個層次嘅嘢。

正能量

好多事情都有正反兩面，爭在可唔可以將件事慢慢轉向。學灘叔就齋，所以好多事只要啪著咗個掣，好多嘢就 OK 晒. You Are What You Think 的說。啲賭仔都係咁講，唉唉聲唉衰晒，越窮越見鬼是也。所以，用正能量去修補人生中嘅不足，係有佢嘅道理。

不過，人生同政治唔同，好多嘢唔到老百姓們話事。即係歷任特首都係與民眾對著幹，個個都話係曲線支持普選，但結果係點，心知肚明。

Escape Plan

星期日同小雲去街，因為要買配返幅太陽眼鏡，去咗灣仔188. 試完呢款試嗰款，最後售貨員拎咗幅可以 Clip 個太陽鏡框嘅，Good! 二話不說地買下。

跟住去太古城睇《逃亡大計》，情節一般外加幾個笑位，最犀利係最後一幕個鏡頭 Zoom 埋去 Close up 阿諾嘅眼神，型男就算有返咁上下年紀都係型。

睇完戲食嘢，大家都唔知食乜好，响太古城行咗兩個圈，到最後小雲想清清哋去食米線，似乎响難搵咗啲，到最後都係去 Food Count.

送完小雲返歸，要關心吓位抑鬱小生，但又問唔到啲乜，無符。

個人好病，最後一早就大覺瞓。

Z1 Club

話說用 Windows Phone 嗰陣，啱啱就係同 Microsoft 嘅人 Work 得最緊密嘅時候，所以好多時都會撞聲，尤其係 Email 同 Whatsapp 呢兩大個通訊渠道嘅聲。出咗部新電話之後，於終有返自己嘅聲，只係要重新適應過啲聲。

點知响呢一個月嘅時間，好多同事都出 Z1, 出吓一部，出吓又一部，咁就變咗公司有五部 Z1. 真係好想聽吓五部電話一齊收公司個 Whatsapp group message 嘅時候嗰種震撼。

𧦠異

香港嘅社會運動，到最後散水嘅時候，都話會將運動「遍地開花」。但之後就只會隨住時間而忘記，又或者係每年一兩次嘅集會先再講起。

真正嘅片地開花，就只可以由教育體制、宣傳著手。政府要推國民教育又或者係每晚新聞前嘅國歌，就係要愛國愛黨嘅情操遍地開花。政府只要定好政策，拎到撥款，就可以做到嘅事情，民間要做到，就要諗點樣可以做到持繼性。所以講遍地開花前，最好諗定點籌募資金，再定下行動計劃，否則，响客觀環境下，最終只會變成散水嘅藉口。

Students and I

噚晚一個人响 Office, 見到幾個 One Piece 嘅公仔，忽然覺得佢哋同徒弟們好似，所以加埋自己嗰隻，一齊影咗幅相。

承諾

今年某日，應承自己開始寫多啲 Blog.
之後，又再應承自己一個禮拜最少做兩次 Gym.
應承自己嘅嘢唔可以隨便放棄，否則一發不可收拾。

麥記的二三事

我又湊吓熱鬧講麥記

• 細細個食麥記係一件好開心嘅事
• 以前食早晨全餐係會將啲料夾埋變成一個包咁食
• 都係薯仔製品，唔知點解薯餅係好食過薯條
• 其實麥記响外國唔係一個特別平嘅選擇
• 當然外國嘅麥記係好大份
• 而美國麥記嘅汽水係可以無限Refill
• 買一盒廿件嘅麥樂雞食係一件好過癮嘅事
• 其實食麥樂雞只係想食啲汁 (唔係雞汁，係甜酸醬...)
• 唔知點解無麥香雞餐
• 包嚟講，最鐘意將軍漢堡
• 以前都鐘意巨無霸，但响美國食過大嘅之後，飽到有少少驚
• 好耐無去過麥記座底食嘢，最多都係買奶昔、新地筒或者係飛雪出街食
• 不過我都係鐘意 Burger King 多啲

Reflection

《正能量自我輸入中》

作為一個 Architect, 好了解面對新事物，第一次做嘅事一定未掌握得咁好。好多事都要依據實際情況不斷重塑，不斷改進。只要俾少少耐性，將個 Foundation 做好佢，日後嘅 Maintenance 就可以簡單好多。

《/正能量自我輸入中》

十萬個冷笑話

好耐未睇過一啲唔駛用腦又好笑嘅動畫，機緣巧合下搵到，雖然係普通話，但係好攪笑。只係十幾集，但夠消磨一個下午，唔錯!

犠牲

屋宇署人手不足，罷工半個鐘，連食飯時間都長過你罷工時間，祝你好運!

菲國人治事件，連停發菲傭簽證香港人都唔制，祝家屬及幸存者好運!

寫 App

搭車無嘢做，最啱聽電台，商台可能係大部份香港人嘅首選。但去到地鐵，密封式設計嘅車站，係電台訊號嘅最大敵人，次次一入站口，就無得聽。唔知好彩定唔好彩，佢又整咗個 Hong Kong Toolbar 出嚟，咁就只要上到網嘅地方，就可以聽到電台... 理論上...

之前用 Windows Phone 嘅時候，的確係可以响地鐵聽到電台，係細聲少少，但聊勝於無。但係轉咗台兼轉埋 Android 之後，發覺完全聽唔到，初時重以為 PCCW 差添。今日上返到 Google Play, 原來個 Hong Kong Toolbar 只係兩粒星，重要係極大部份都係俾一粒星。再睇啲 Comments, 負面到唔負面，乜原來大公司寫個劣評 App 出嚟，真係唔覺得羞家?

講返個 App, Android Version 個 Usability 係好有問題，係就係有高清881同埋高清903, 但我相信呢個已經無無限 Plan 嘅香港，無人想聽高清囉! 要聽標清，得，要走去右上角慢慢轉個聽電台嘅 Option 出嚟之餘，重要㩒個粒丁屎咁呆粒嘅掣，真係好難㩒。出到個電台 List, 想聽咩? 聽廣告先，係呀聽廣告呀，好似佢啲內容無廣告咁，要再聽多啲呀。By the way, 我之前好似講過根本聽唔到節目喎，所以佢啲內容的確係無廣告... 所以個廣告你係白聽，重要次次都聽嗰個死人廣告...

你梗會話咁多人聽，一定係個 Server 唔掂，但咁就解釋唔到點解 Windows Phone 聽到，唔通佢真係咁優惠 Microsoft 用家? 不見得。另外，的確係有其他 Android App 可以駁到佢個 Server, 而且聽得好順添! 我只係希望佢唔好 Block 人哋個 App. 我亦都唔明點解佢要 Block, 乜多啲人聽節目唔係廣告客戶嘅好事咩? 定係自己技不如人就要走去 Block 人哋? 响呢個 Microsoft 都要出 iPhone/Android App 嘅年代，已經不合時宜。你賣嘅係 Content, 唔係賣 App.

當一個 App, 無咗佢原有嘅主要功能 (唔好話俾我聽佢主要係做即時新聞...)，即係廢 App, 所以 Uninstall 咗佢係一件好合理嘅事，話晒都 9.7MB... 我唔明點解所有 Content 都係响 Server Stream 落嚟嘅情況下，個 App 都要咁大份囉...

熄電視日

其實我係用電腦睇電視，所以唔存在熄唔熄電視嘅問題。我可以 YouTube, 日劇、動畫同電視一齊開，差在邊個 Pause 同邊個滅聲。唔係話熄電視日無意義，但係如果响現實當中，大部份睇嘅係師奶，我諗，佢哋追劇，緊要過新嘅電視台...

Bottleneck

對於陌生嘅事，只有摸著石頭過河，或者可以問人意見，但啱唔啱自己用，都要自己考量。人生最唔鐘意就係 Uncertainty, 一種操控唔到嘅無力感，好討厭。但如果呢個係必經階段，以我嘅耐性，應該可以忍幾個月...

雜記 4

今日睇到一段 YouTube 片係講23種特別嘅動物，當中有一隻嘅名係叫 Pica (讀 Pie-ka), 個串法正正就係比卡超嘅頭兩個音，似乎就係比卡超嘅原型嚟。

以前就話開卷有益，今時今日，似乎就係開 YouTube 睇有益了。

話說噚晚同徒弟仔傾到「Google大神」，呢個係台灣用語，對於我呢個睇台灣電視節目嘅人嚟講，一啲都唔出奇，但徒弟仔好 Surprise 點解我會識，我其實都好 Surprise 點解佢會覺得咁特別。

講開「Google大神」，今日想搵吓嘅出處，點知搵到 Google Translate 嘅語音玩法，笑死我!

話說噚晚同靚仔魔術師傾計，講到 The Matrix 入面嘅金句，點知今日上 YouTube 就見到 Improve Everywhere 嘅 Matrix in Real Life, 睇嚟我又無意中發動咗水晶球...

Anyway, 講緊嘅金句係 "But I can only show you the door. You're the one that has to walk through it." 中文都有一句類似嘅「師父領進門，修行在個人」 對於我呢個經常教人嘅人嚟講，有一層好深層嘅意義。不過响噚晚嘅 context, 又有另一層意義。

出門三件事

噚日去睇 Gravity, 成套戲得三個人，因為睇 IMAX 版本，效果不俗，幾幕太空碎片飛出銀幕，都真心想避開。但略嫌內心戲太多，有少少悶。

睇完戲，悶悶哋，去唱 K, 不過三個人嘅背景都唔太同，大家唱嘅歌接近 Mutually Exclusive, 唔夠過癮，不過可以再次將《孤兒仔》嘅歌詞調轉嚟唱，都幾攪笑。

唱完 K, 因為徒弟仔食個下午茶食咗兩個鐘，本來想食個 Light Dinner, 但番書仔見到亞之媽好吸引，於是就入咗去食。叫咗個石頭飯、餃子年糕湯、同埋煎薄餅。跟住因為調咗位嘅關係，送咗客壽司俾我哋。哈哈! 咁大個仔都未試過，似乎跟住靚仔有著數 (老闆娘讚徒弟仔靚仔的說)。

雖然我夜晚食得唔多，徒弟仔又已經飽飽哋，外加一客壽司。但味道的確又唔錯，尤其係啲餃子，所以到最後都清晒枱面上嘅食物，連前菜都唔放過，好滿足嘅一頓晚餐。

食完晚餐後，番書仔返歸，同徒弟仔傾旅行嘅事，除咗潛水，其實都係睇風景，當中傾到租唔租車，呵呵，我只可以話我手車係 Dangerous and Not Recommended 囉!

音樂欣賞

星期六睇咗場 Tap Dance Show, 當中有部份音樂劇嘅場境，其中一幕係唱《預言書》呢首歌:


Tap Dance Show 嘅表演者嘅唱法，相比起原唱，更有 Power 同更好聽，係咪受過專業嘅訓練唔同啲呢?

暈

好耐未試過成個人休克，對上一次好似係十年前左右做第一份工，返到屋企小解完就突然間感覺唔到心跳，到有知覺嘅時候，個下巴好痛，似乎就係撞咗落咗個馬桶度。

今日做 Gym 嗰陣，只係好簡單咁提腿收腹，只係做咗一 Set, 又係感覺唔到心跳，知自已就暈，但已經做唔到啲乜，到有知覺嘅時候，又係個下巴痛，外加膝頭同左邊面痛。應該就係膝頭撞咗落部收腹機嘅左腳踏，個下巴再撞落右腳踏，重要係左邊牙骹受力。休克完畢，唔再做腹，就好簡單咁做返胸，Bicep 同 Tricep. 腳似乎都唔係時候再做，就走返屋企。

到依家都重痛緊，食嘢都唔可以左邊用力了...

上堂2

話說阿 Sir 星期五有表演，嚟咗個 Miss. 呢堂要做啲用腳板大大力 dum 落地下嘅動作，嘩! 痛到呢!

Dilemma

讀咗一篇明報嘅文章，當中有一句都幾值得深思:

最初入TVB一切都是新的，可以說不成熟，但很人性。當它成熟到一個階段，變成脫離了人味，它變成不需要顧及感受，但人往往需要一種感受。

制度，往往就係缺乏人性，所以政府運作雖要制度。但好多行業，都需要人性去維繫，但公司成長亦必需要靠制度去維持，究竟可以點取捨同平衡呢?

閒逛

自從去完澳洲旅行，好耐無行 Gallery. 今日下晝無嘢做，又再行返。

屋企附近行上少少嘅一個 Gallery, 有好多雕塑、擺設同裝置。呢一個就咁睇可能無乜特別，但一套擺晒响度係幾靚。我真係唔識去評論藝術品，但好襯同好舒服:

呢個就得意啲，由幾個唔同大細嘅網紋加上摩打後，效果唔錯:


轉入去太平山街，經過科記，見門外有一隻貓剛剛瞓醒，作為一個鐘意貓嘅人，忍唔住去影佢:

藝術除咗响 Gallery 外，街頭都有唔少。我鐘意黑白色嘅廣告去襯個街牌:

呢個其實白襯藍都幾好睇，但相信完成後，啲做 Masking 嘅紙會唔見咗:

呢個價錢，令我諗起篇潮文, 雖然唔使$2300, 但都好貴... 唔知剪完係咪都有半個梁潮偉呢:

差不多可以行嘅都行咗，落灣仔買嘢，之前買咗部電話其實都重未入殼。到咗188, 選擇比電腦城多，但最後都係搵唔到可以插個叉電座嘅殼，所以，買咗個好 Generic 嘅皮套就算數。

後記: 四圍行嘅時候，發現好多 Gallery 執嘅執，搬嘅搬，其實 Gallery 係點樣生存嘅呢?

雞汁

俾雞汁洗版... 其實我無睇過 May 姐有請，但我知道有薯片同雞汁，重有哈哈哈。我其實想像唔到呢三樣嘢加埋點解會撐到一個鐘，許志安首尖尖尖 Loop 十分鐘都覺煩啦! 但點解有人睇，我真係唔明，重要係有廿幾點。一係就個收視調查出錯，一係班師奶客真係咁強悍。

以平均家庭有大約三個人，當每個家庭都有一位師奶，雖然未到半邊天，但都有33%, 即係氹得掂晒班師奶觀眾，就已經有33點，難怪無線咁落力製作師奶劇。用33%嚟除開個收視率咁計，即係大約七成嘅師奶會睇，咁 TVB 仍然會有大把增長空間 (假設 Cable 同 PCCW 都係製作啲師奶唔會睇嘅節目)。

與民為敵

經過董建華，再嚟曾任權，跟住嚟個梁振英，特區政府無一次係順民意而行。所以唔發牌俾HKTV , 其實係意料中事。或者咁講，政府根本上當民意無到。

根本唔使勞氣，可惜就可惜啲，但有乜嘢市民就有乜嘢政府，完。

成果

話說呢一兩年體重都係浮遊响165-170磅之間，唔太滿意。於是，就決定做返 Gym, 不過今次無做帶氧運動，只係用5分鐘跑步熱身，之後做45分鐘左右嘅 Weight Training, 重要係𠺪做嗰隻，覺得差唔時再舉重啲咁。

半年過去，減咗十磅，感覺唔錯。直到有一日水機無水，要由樓下搬一樽上嚟，因為又要開門，又要㩒Lift掣，又要㩒密碼咁，於是單手拎起，原來都幾重。上到 Office, 唔得，拆包裝，直接抬上水機。心諗係咪自己重未得之際，一 Check, 原來一樽水有18公升，以一公升等於一公斤嘅重量，即係18公斤。咁做 Gym 嗰陣都係兩隻手舉20公斤左右，單手的確係太勉強了。

希望去關島前可以減到去150磅!

再戰狂舞派

今日同人去睇攝影展，早咗少少到，响商場週圍行吓，行到差唔多夠鐘，到集合地點，人齊，出發。場地就响地鐵站對面，所以好快就到。攝影展介紹話有300張相，聽落好似好多，但其實好多都係大堆頭咁拼埋一齊，半個鐘左右就睇晒。不過最欣賞嘅係為咗配合主題「家」嘅感覺，有好多相都係貼咗响雪櫃上面。時間尚早，隔籬重有個畫展，入去行吓都好，畫展似乎好睇過少少，起碼有部份睇得明。

時間差不多，搭地鐵去戲院睇《狂舞派》，都想睇第二次好耐，適逢遇到未睇過嘅人，於是就一齊去睇咗，上次係當 Show 咁睇，今次睇多咗好多細節位。笑位依然好笑，感動位依然感動，而且因為代入咗角色入面，外加聽熟咗 Soundtrack，真係難以不為之動容。

睇完戲之後，本來想去食紅螞蟻，點知執鬼左，去食越南米線，又多人排隊，最後，去咗 Food Court. 一路食，一路傾返劇情，一次唔錯嘅心靈交流。

上堂

今日第一堂，遲咗少少走，跟手又無的士，成個上環嘅馬路又塞晒，搭地鐡又要行餐死，反正都係行，一於行少少過中環搭電車。去到 APA, 個排舞室點解無人，唔通老點? 唔理，買支水先。買完水，再去排舞室，有幾個學生响入面，但唔係上堂... 左問又問之下，原來轉咗房... 足足遲咗3個字，好彩唔係開始咗好耐。

教咗幾個唔同嘅步法，發現有少少似曾相識嘅感覺，就好似細細嗰啲行路行得奇奇怪怪嘅壞習慣咁，乜原來係用嚟跳剔撻舞?! 幾經辛苦改善嘅壞習慣，似乎要返返嚟...

Anyway, 上完堂，小腿好攰，阿 Sir 嘅小腿其實都好紮實吓，似乎要拉多幾次筋先得!

新機短評

用咗部 Lumia 800 咁耐，夠係夠用，但係唔好用，所以，都係決定轉機。噚晚出咗部 Sony Xperia Z1, 順𣈱爽手係第一個感覺，過相同過歌攪咗1晚。啲 Whatsapp History 又無鬼晒，我諗我唔會再轉 Platform 囉... 今日試用，太耐無用 Android 機嘅關係，有少少唔識用，我諗要少少時間習慣。食晏嗰陣，俾靚仔徒弟示範咗個 Gesture, 真係唔講唔知。

用完第一日，用單手操控嘅話，略嫌太大部，尤其個 Back 掣，如果用右手，感覺好遠，打字感覺係合格，個 Power 掣同大細聲太近，影過咗一張相咁大把，感覺滿意，用耳筒可以播歌、接電話夠方便，耳筒質素亦唔錯，有個叉電座唔錯，只係條線太短，唔太得，同埋一買套就會廢咗武功，去完電腦城睇，無乜選擇，下次去188再𥄫𥄫先得，電就唔得掂，個 Gym 做咗一個鐘左右剩係聽網台同少量 Whatsapp 都已經無咗差唔多20%, 似乎玩唔到一日囉。要俾分嘅話，單手操控能力、叉電座、用電量各扣10分，得70分。

前路

呢排好多人話要介紹女性朋友我識，其實响呢一刻，我唔知未來要點行落去，非洲有句諺語: If you want to walk fast, walk alone; if you want to walk far, walk together!

未來嘅路難行，之後嘅一年半載會發生好多事，充滿挑戰，既然自己想作出改變，就無謂再作他想了，一切就順其自然咁發展落去。

除咗多謝，還是多謝!

巨輪

磁帶，係好多年前嘅 Technology, 就好似磁碟咁，會俾人淘汰。依家乜嘢都用智能晶片，唔知手機嘅 NFC 讀唔讀到將提款咭嘅晶片呢? 同埋，點解會有 Expiry Date 呢? 再安全啲咁話?

閒逛

今日要 Cut 隻 3G 手指，因為都無乜點用。唔知點解，個門市剩係可以用嚟上台，要 Cut 要打電話 Cut... 跟住佢又話條 Cut 台線緊忙，話24小時後再打返俾我。算! 跟手想睇吓電話加上台 Plan, 原來 PCCW 有個叫「傾King」嘅 App, 只要有 Wifi, 就可以唔使錢打俾香港嘅電話，又或者收人哋打俾你嘅香港電話，真係犀利! 可以考慮吓!

電話本來係想買 Sony Z1, 但留意到 Samsung S4 拍片可以去到 120fps (768 x 512), iPhone 5s 可以去到 120fps @ 720p, 家陣啲電話真利害，GoPro 遲早真係唔掂。因為唔會買 iPhone, 所以都係 Sony 同 Samsung 之爭，不過之前試過打字，似乎 Sony 無咁多 Typo, 好大機會都係佢。

跟手落灣仔剪頭，之後去電腦城行行先，無乜特別驚喜，係見到呢張 Poster, 有少少無奈... Saint Seiya 變咗 Brave Soldiers...


去到 Salon, 搵返上次個 Stylist 幫我剪，佢之前話唔使做負離子做得咁密，就睇吓 Keep 唔 Keep 到。似乎都 OK, 聽日洗完頭就可以見真章了。

跟住行去港島潮聖地 188, 好多舖唔同咗，多咗好買手機週邊嘅舖頭。諗住買隻路飛公仔送俾人，再買隻 Zoro 俾自己，點知呢兩隻同 Chopper 一定要成套買，都唔知逐隻標價做乜! 其實路飛同 Zoro 受歡迎我明吖，但 Chopper?! 重要係咁多隻之中最貴，暈! 唯有上網 Bid 了...

老店

住咗响度咁耐，每次做 Gym 嗰陣，都會經過一間辦館。今晚，見到佢係最後一日，已經拆緊啲櫃。响文咸東街，有三間都係呢一兩年先開始賣紅酒嘅舖頭，竟然容不下一間幾十年嚟賣洋酒、賣香煙、賣生果、賣果汁嘅辦館。



再睇真啲，隔籬嘅花舖又係拆緊，唔通成幢重建? 不得而知了...

街名

出街時，突然間俾人問路。作為一個老街坊，係好樂意回答，點知佢問我「歌舞街」响邊。香港無呢條街，但係有條歌賦街，係有邊讀邊嘅問題。因為細細個都有邊讀邊，所以知佢講緊邊條街。問題係，大街或都地標我就大概知响邊啫，歌賦街係橫街嚟，嗰頭嘅橫街都係一堆咁响嗰頭，毫無頭緒是也。跟住佢話想食牛腩河，哦! 九記! 唔... 呢個位置(永樂街/急庇利街交界)有少少難度，手指指咁話直行轉左，上條大樓梯，再行過少少就到，希望佢 Get 到。

不過無論歌賦又好，歌舞又好，中文嚟講都係好有意思(詩意?)。但其實，個街名只不過係一個英國人(Gough)嘅譯名，不得不讚當年翻譯者嘅神來之筆!

AKA

噚晚一大班人落吧掟標唱K, 但一第一首《K歌之王》出事，運氣嗰陣一股煙味走咗身體，喉嚨好痕好乾，之後週身唔聚財。都係唔好點啲難度咁高嘅歌，《忘記歌詞》 啱 Key, 之後呢排想唱《Home Alone》, 就點咗嚟唱。徒弟仔到咗，點咗《孤兒仔》唱 Eason. 跟住《Crying in the party》, 我諗最難嗰首都係《Shall we talk》。其他嗰啲，因為條氣都運得唔係太順，都係客串吓就算。

叫咗兩杯嘢，一杯 Mint Lime Lemonade, 佢真係加啲薄荷葉入杯嘢度，唔太識欣賞。另一杯本來想叫 Passion Punch, 但係似乎佢聽錯咗，嚟咗杯 Fruit Punch... 算，無謂嘥嘢。

十二點左右，煙味越嚟越勁，頂唔順，閃!