抗命

旅行本來係寫遊記，但遊記幾時都可以寫，有啲嘢係有時間性，要依家寫。

呢幾日見到學生嘅行動、警察嘅行動、市民嘅行動。我覺得，香港嘅未來係有希望，有希望係因為終於有一場似樣嘅公民運動，而呢場運動係由學生發起。廿幾年前，南韓嘅學生運動比今時今日更激進，依家佢哋就掌造住社會，造就今時今日嘅南韓。所以，大學時代係對個人十分重要嘅階段。

只可惜我呢一代嘅大學，只係一個搵錢嘅時候，大家都只係諗住賺錢退休，所以原諒我呢一代無付出過任何實質嘅事，只係和平唱K散水。當發現唔對路嘅時候，大家已經有家庭，已經唔可以再向前衝。呢幾年，眼見自己交嘅稅只係俾個咁嘅政府，我諗到嘅唯一辦法，就係離開，幸好我只係一個人飽全家飽。

呢幾日見到嘅事，今日嘅我參與唔到係好可惜，希望到最後唔會都係和平唱K階段性勝利散場。

可愛嘅朋友們、同事們、香港人們，努力呀!

P.S.: 好多謝有啲警察嘅朋友無 Unfriend 我，要求唔多，希望你哋鬆手少少。都攪咗幾日，大家都攰，鬆手啲，上司唔覺，感謝!